رواية #جوليت وأسرها.... الفصل الحادي والسبعون 71 - بقلم الكاتبه سمو العراق

البارت العاشر
رواية...جولييت واسرها...غياهب الإنتقام
بقلمي...نور سمو العراق

💔💔💔💔💔💔💔💔💔💔💔

هاها..

ياخيال اليكرب ليك..انت اعلى الكوم اتهد وتحول..
...................

انخلي أركان الحد تتمايل........لانادونه عله الميدان

................................

جولييت...

دخل علينه جاسر يصيح ويغلط ومتعصب،عرفت ماعاركين اول بداية عبالي،متعارك ويه اهلي نسيت اهلي راحو وعافوني...

ركضت عليه واني،شايله مجتبئ،وأسأل بي بخوف...شكوو شكوو جاسر شصاير شبيييك احجي

هو جان مسدسه شايله انوب دخل فتح الكنتور طشر الملابس مالته وطلع الرشاشه...

لزمته بخوووف بعد ما نزلت مجتبئ...جاااااسر شدتسوي جااااسر شنو المن هل رشاشه احجي

هو دفعني،وصلاح دخل يركض

ضليت ابجي،بصوت عالي،واتوسل بي،وهو يصيح لك ...جييب،الشاجور والرشاشه صلااااااح

نزل جعفر يركض كله جاسر...تعال،انت بسرعه وياي تعااال،

جعفر راح يركض،وصلاح طلع الرشاشه والشاجور و ماما رضيه تتوسل بيهم تريد تعرف شنو السالفه ماكو فرفح كلبها تفرفح

وخالتي،أم فلاح لزمتهم وتتوسل بيهم بنحيب.. يمه استرو عليه يمه شبيكم شكو احجولي،فدوه الكلبك المشاكل ما تجي من وراها بس المصايب...

اني لزمت جاسر واتوسل بي جاسر ..لا فدوووه جاااسر لا يكتلونك لا تررروح

هو سحبني،من كتفي،ودفعني،انشك ثوبي،بيده وخله وطلع يركض وجعفر وصلاح وراه...

ضليت افرك باديه وابجي،ياربي بس،لا العركه ويه بيت عمي بس لا انوب تصير كاتل ومكتول

يمه جاسر اكييد سووله شئ،وهد عليهم ياربي شوكت اخلص من هل،قهر

اني لازم اتطلك لان هل،مشاكل مراح تخلص،بين جاسر وبين بيت عمي العشيرتين بينهم ثار...

طلعت وقار جانت بالحمام طلعت تركض كالت برعب...شكو شكوو والله حتئ،ما لحكت اسبح شبيهم اخواني

رديت عليها بخوف وقلق....والله ما ادري مدري ويامن متعاركين

جانت نوال كاعده علئ الدرج كالت...ويه اهلج اكييد لان بصراحه انتي،من دخلتي،بهل بيت ما شفنه خيير لا منج ولا من اهلج...

مجاوبتها لان حقييره هي دتشوف الوضع مشتعل،انوب تجي تعلكها بيني،وبين خالتي

اتصلت ماما رضيه علئ شيخ عكاب،كلتله...خويه الحك ولد اخوك مهيوب،اخذو رشاشاتهم ومدري عليمن هدوو وما اعرف ويه منو تعاركوا...

جاوبته بصدمه وخوف شديد...يا عزا ويه جااابر يااا،يااا صدك تحجي وهسه وين جابر بالمستشفئ...

قفل الخط عمو هي ضلت تتصل وهو ميجاوبها

وقار خلت ايدها علئ،صدرها ...عزا العزاني ياا جابر بس لا ماات بس لا صار بي شئ فدوه ماما خابري جاسر فدووه

ردت عليها ماما....يااا انتي شبييج تردين يتخبل عليه تردينه يتسودن ما تعرفين اخووج

ضلينه محتارين ونرجف يمه الولد راح يتكتلوون شلوون بس،لا انوب مثل ما مات عمي الشيخ وابنه وبنته السلاح يخووف...

.........................

جابر بعد ما انضربت هم انهزموا كلهم من بيوتهم

اني تخبلت خابرت ابوي وخابرت جاسر عاد جاسر ضل يصيح ويغلط كال...وين انت جايك ولك اني اتونس علئ المشاكل والله اليوم لو اكتل لو انكتل

كتله بقهر...اني راجع لان الي اذاني هم بالمنطقه مالتنه هو الي ضربني

و ولد ابو اللول وياهم يصير ابن خالهم ملاكم مدري شنو...

رد عليه بغضب كاسح...شووف جابر انت ضل هناك واني،جايك هسه ابوهم اسمطه كفيلك علي

ضليت منتظرهم ...وخالتي،صبريه كاعده يمي وكل شويه وعضت اصبعها...انه انه ياخذوون مسدسي مني افااا هاي عليها كعدة عشاير والله والله اليوم اكتل وانكتل

اخذت المسحاة مالتها وراحت هدت بس اني لزمتها    اكعدي خاله خلي،يجي جاسر نشوف شيسوي. 

والله مر وقت وهي سفطت السيارات بيهن اربعه نزل جاسر منها وهو لازم اسلاحه وعيونه تجدح حممر باوع عليه شافني مضروب تخبل...

رجع باوع علئ الشباب الي،جايبها وياهم جعفر وصلاح كلهم بغضب وصوته يهز البساتيين .  شوفوا احنه احزام الجابر ما اريدكم تصيرون خنجر لا احنه سيوف بتاره ما نسكت علئ  دم اخونه

الكل ضل يهووس ويحجي وياه

رحنه علئ،بيت ابو اللول جاسر باوع الجعفر كله جبت الوصيتك عليه

هز راسه بأي

وكفنه كلهم جاسر...لحد يرمي بس اني الي ارمي

هو لزم رشاشته وخرطهم خرط ويينك لك كووواد...وين كواويدك....طلعهم وييينهم والله اليوم اخليهم مثل النسوان يتصارخوون

ابو اللول شرد من ديوانه وراح لبد بغرفته دخلنه عليهم ماكوو محد كلهم شارديين بس ابو اللول ومرته

باوعله جاسر ببتسامه غاضبه...عافووك وانهزموا الخنيثات العندك

صاح بي بصوت عالي اهتزت اركان البيت اله...جييب السند العندك مال البستان والله اله اخليك تتنازل وانت الممنون

والله لو اعرف اتكاتل علئ نص البستان اتكاتل وتنطي وانت الممنون

الرجال شال السند وانطاه اله وهو يرجف

اخذ السند منه بسرعه وضل مركز بي ويباوعله بنظرات حاقده...ومتعصبه

طلعنه من الديوان صاح علئ جعفر كله...جيب البطل وخلي بديوانه

راح جعفر يركض جاب البطل مال الخمر وخلاه بنص الديوان

جاسر باوع النه واجتمعوا الفلاحيين الموجودين هناك كلهم شوفوا هذا ديوان ابو اللول حاط بدل الدله بطل خمر

خلينه وطلعنه رجعنه البغداد...

جان جاسر يعرف الضابط الي بالسيطره وعنده شغلات تخلي،يفووت...

وصلنه البغداد جاسر كال...ادك بيت هذا الملاكم وادك النادي مالته واريد كلب ابن سطعش كلب يطلعله

هو يصير ابن اخت حسنه وشايخ علئ،العالم عود ملاكم ومسنود من جهه تابعه لاحد الأحزاب...

كلت الجاسر كال...انعل ابوو اليوم يا ابو حتئ الحزب الي ينتمي اله اريد كوا...اليطلعله...

وصلنه البيتهم دكيناهم بس جاسر كال لازم ادك النادي

كتله خاف مفتح النادي انوب ينكتل واحد

رد عليه بسخرية...خلي يولي شنو هل اغم ويخلي يفتح هسه تلكاه معزل وغصبا عنه

وصلنه للنادي وضلينه نرمي هو محد يرمي بس جاسر لان متمرس علئ السلاح وما قبل اي،واحد منهم يرمي غيره

رغم هم دمهم حامي وكلها تصييح اني الارمي....وكلها تصيح الزود عندي

رجعنه للبيت واني حيييل مقهوور ومهضوم من الصار اني انهان وانضرب واني ابن شيوخ وابن دواووين لا والله وسفه

اني هذا الاغم يضربني وما اخذ حقي لا والله يا حييف

هذا الكلب ابن ابو اللول جان لازم اسلاح وذول بواري وتواثي...

كال جاسر...اليوم اذا ما حوولو واخذت حقك مربع يا جابر ما اطلع ابو مرتضئ

جريت نفس وهزيت راسي بقهر...

وصلنه للبيت تلكاني ابووي وبعد شيوخ وناس كالو...يالله يالله ان شاء الله ما بيك شئ بالريش

مسحت وجهي من الدم ومحجيت دخلت جوه محد لكيته حتئ،امي ماكوو

هم شويه واجو  عدنه ويردون عطوه ويحولون

جاسر لزم جعفر وصلاح كلهم اي واحد منهم يحجي لا تنطو مجال ضلو رفسو بالباب وصيحو وضيعو كلامهم مفهووم

هم دكوا صدرهم وكلوله عد عيناك...ابوهم انسمطه اليوم...

صدك اجوو العالم وصار الحجي اني ما طلعت لان كلولهم ابنه مضروب

وكفت بالباب الثاني للاستقبال جان اكثر شئ اشوفه هو جاسر صاير بالوسط وابويه بصفه ورجال ثاني بصفه

هم ضلو يحجون واول ما حجو قروا ايه قرآنيه ومدري شنو وكالو جابر هم ضارب منهم وكلهم اديهم مشدده

هو جذب اني صح ضربت بس مجان بيدي شئ وداوود الوحيد الي جبته ببوكس

جاسر رد عليه بغضب كاسح...ويطبهم مرض واذا ضربهم يعني ذاك المعتدي شنو تريد ابن عمي يباوع عليه لو يضربه ويكله هاك اخذ الثاني

اردف بعصبية وجبروت...لا بووويه لااا انتم بعدكم ما تعرفونه زيين اذا انت خفافيش احنه صكور ناكل باليل وبالنهار وحكنه ما ننام عليه

رد واحد عليه...ونعم منكم بس الحسين عليه السلام طلع للإصلاح واحنه لازم نقتدي بي ونسويها مراضاة لاجل الستر

جعفر وصلاح ضلو يصيحوون ويسبوون اشر الهم ابويه يسكتوون

رد عليه جاسر بجمود... الحسين طلع للإصلاح وتاليها انخذل من هاي العالم لا عمي الإنسان لازم ياخذ عبره واني رجال ما ادور الستر لان بهاي الدنيا القوي ياكل الرچيچ...

احنه بيت العلي نشتري المشاكل شرايه ونتونس عليها ودمي الدم ابن عمي يفووور

رد واحد من شيوخ ذييج العشيره...خليها هدنه علئ الطرفيين

وكف جاسر بغضب وبصوت تهتز اله الدواويين ...شنووو هدنه علئ الطرفيين؟ خليكم علئ حق واذا ما تحبوون الحق الله ومحمد وعلي،وياكم واحنه ان شاء الله اهل الملعب ما ننام علئ دم ابن عمنه

جاوبه واحد من غير عشيره علئ،كيفك عمي اهدء وخلينه نحجي وياكم وان شاء الله التريده يرضييك

كعد جاسر وجر نفس كله الرجال شتريد بويه احنه بخدمتك وبخدمة هاي الوجوه الطيبه

جاسر رد عليه بهدوء مخلوط بجبروت...خادم ربك حجي شوف شييخ هذا ديوانه مال صكور والسبع بينه نتشيم بي ونحطه علئ راسنه

النريده هو...اولا هذا الملاكم مدري منو هذا ما يفتح النادي مدة سنه كامله واني،وياه والشارع وين ما اشوفه اكتله

جاوبه واحد منهم...بس،عمي هاي ارزاق عالم وهو هذا شغله ما يصير تكطع رزق العالم قطع الاعناق ولا قطع الارزاق

باوعله جاسر بطرف عينه..لا بووويه اني اريد اكطع رزقه حتئ انكله وحتئ،يعرف ويامن اندك وما مجبور يسوي،مشاكل ويتعده علينه وبعدين يضل يتبجبج كطعتو رزقي هذا الشئ منتهين منه وما بي نقاش

شغله ثانيه عطوة الكم تسع ايام اليوم العاشر اذا ما حولتو... الدم بينه

رد عليه واحد من ازلامهم...لا عمي نحووول

باوعت الجاسر ابتسمت بحزن جان جدي الله يرحمه يكول مهيوب صل وخلف صل وزاد عليه

صدك جاسر زايد علئ عمي ونفس نظرات عمي جان من يحجي عمي ابو فلاح الديوان يهتز اله والكل يشهد الوكفاته وبكل ديوان حاضر وكل مشكله كلفه يحلها...

واحد منهم جان صاحب لحية طووويله وحواجبه ثخان يخووفن وشواربه واسمر طووخ كال ...اعرفكم بنفسي اني من نسيب ابو اللول ماخذين خالتي وابن عمي صاحب النادي

اني رجال بال.....وانتمي الحزب....ومعروف بالمراجل واتصال مني اترس الشارع همرات

عاد جاسر صاح عليه بغضب ومد ايده  بتهديد ...وشنووو تخوووفني شوف عمي احنه ازلام مهيوب لا نخاف من حزب ولا نخاف من جيش نخاف بس،من الخلقنه

ولا تكعد تهددلي انت من حزب فلان ومن حزب علان كل الاحزاب ما اعترف بيهم بدرهم

تريد احجيلك بالقانون اني القانون كله

تريد احجيلك بالعصابات اني مافيا

واذا حاب نحجي بالدواوين اني ابن شيوخ وتربيت بالدواوين

رد عليه ابو حواجب ابو الاحزاب...لا اكييد ما اهددك بس اعرفك عن نفسي

اشر اله بهدوء...عرف عن نفسك بدون ذكر اسماء الاحزاب لان يا بويه المووت واحد والاسباب تعددت والتهديد ويانه ما يفييد ولا حتئ التذكير مهم بتعريفك عن نفسك ..

سكته لصمه علئ حلكه حتئ،ما عرف يحجي صال بيهم صوووله كلها فتحت حلكها عليه

حتئ،ابووي جان صافن عليه ويسمي مرات يكول اخاف علئ،جاسر لان حجاي اخاف يحسدونه لان صغير بالعمر بالنسبه للشيوخ ومن يحجي يسكت الدواوين....

ضل واحد منهم يحجي والحجي الي ميعجب صلاح وجعفر خبصو الامه بالصياح والضرب بالباب ...

الشيخ كال . ..عمي هسه عوفونه من هل مشكله بس داوود تعرفونه هو ابن خال جابر ومضروب بيده ويريد منكم تحولون عنده تراضونه لان هو حاجوز وجابر ضربه. 

فزع جاسر من مكانه لان جاسر يتخبل من داوود وحقه محد يلومه السواه بمرته مو قليل هو كسره بس ما يتوب وان شاء الله هاي كرصة اذن اله

فزع بغضب...لا والله خاف ما يرضئ هذا الخايس انوب يريد يجي احوول عنده

شوف عمي داوود اذا يعتبر نفسه حاجوز فالحاجوز ما اله اي شئ بقانون العشاير لان محد جبره يحاجز

واذا يعتبر نفسه واحد منهم وبيهم فاني،وياه وكووم وهسه دازله كوامه وانعل سلفه سلفاهم...

وبعدين هذا داوود بيني وبينه ثار لا تخليني هسه اروح اجيبه سحل من ديالئ لحد بغداد...

واحد منهم كله...بس لا تسووها فصول بعد عمك

رد عليه بغرور ..شوف عني،انت مو تفرض عليه راييك اني بكيفي اخذ فصل او لا وبعدين شنو اني عايزلك لو فاتح جيسي الفصلك ترئ عندي دم ابن عمي اغلئ من املاك العالم كلها

ما كدرو ياخذون منه لا حق ولا باطل وخلو وراحوو واخذو عطوة عشرة ايام

احنه رحنه البيت عمي مهيوب الولد كالو تعال يمنه جنه بالطريق ابوي يسولف ويه جاسر وجاسر خابص الأمه....

وجعفر كل شويه وكال...مع الاسف لو ماخذلي مجعه من البطل هههه حرامات هسه يشربه ابو اللول ويهحم علئ خالتي صبريه

ضربه صلاح...ههه ولك اسكت خالتك صبريه راحت البيتنه ولك منو الوصلنه البيت ابن اخو حسنه

جعفر ..اي هم صدك هسه يشربه ابو اللول ويهد علئ كنوش ويدك كنوش،وياخذ اخته فصليه هههه

هزيت ايدي اني النار مشتعله بيه وجعفر مخلصها ضحك...

باوعت الجاسر شلون دمه محترك علئ ضربتي وجعيفر يتمضحك

انقهرت علئ جاسر اني مراح اكله بالسر العندي لان اني ادور راحته

بس ام مرتضئ معذبته ادري بيها هي حقها محد يلومها مسكينه ان شاء الله اكلها بالسر وابرد خاطرها وخليها تصير زينه ويه جاسر...

.....................

جولييت

جنت كاعده اسوي جاي ومي ومدري شنوو والخوف داب باعضامي وارجف وابجي

هل موقف ذكرني بالصار من سنين وتدمرت بي،حياتي

ليش ولكم يا اخواني والله جاسر جان الهم دركه وسيف واليتعده عليهم يكص راسه

ابوي جان يكول جاسر زلمه سبع مثل العگرب السانه بذيله يلدغ ويمشي متباهي ويخلي الواحد متفرفح من كلمه وحده

بس اهلي ما عرفوا يحافظون علئ،علاقتنا

شويه ودخلت علينه شهد تبجي وتنوح وترجف ضلت تحجي عن ماما رضيه وخاله ام فلاح كالت...والله عتبت عليجن ليش هيج والله واحد منكم سأل عني اني مو جنتكم ومحسوبه عليكم لييش ترئ،والله حرام عليكم

اني وين اروح من الضيم مرة ابويه تعاركت ويايه واني اجيت لان ما الي سند هناااك والله تعبت

هنه دخلنها الغرفتها لان بصراحه عدنه مشكله وما فارغين هسه وهي خطيه هم حقها البنيه تاذت والله

نوال همزين صعدت من زمان كالت...اووه عبالي مدري منو انكتل جابر ضاربه شويه براسه وخبصو الامه اروح انام احسن الي

وخلت وراحت صعدت واني و وقار وماما رضيه نسوي جاي ومدري شنو

هم الولد اجوو وجاسر خابص الامه بصوته والعالم التمت وبس هو يصيح لا يتعب ولا يسكت ماخذهم حاصل فاصل

طلع من الاستقبال وهو يصيح ...بسييطه والله اله اخلي رضاوي يكتله بالنعال

وكل شويه وراح ورجع عليهم وانوب لابس،قميص يجي يمنه ونزع القميص ومو يريد يروح يتذكر حجايه راح لبسه

ورجع يمي ونزعه ومتعصب،وجهه نار خلصها ينزع القميص ويلبسه

تالي صاح بيه بصوت عالي...تعاي شنوو هذا القميص موتني والله اكضه واحركه هسه والله

اخذت القميص منه ورحت جبتله غيره هو صدك شويه جان صغير عليه

ابتسمت حتئ ويه القميص تعارك

انوب شافو مجتبئ،ومرتضئ ركضو عليه ولزمو برجليه هو شال مرتضئ وباسه وضحك كله...لك والله حلف انت تكتل هل كلب خايس

رد عليه مجتبئ ببراءه وهو عاكد النونه ...لا اني اعفه حيييل

شاله جاسر وهو يضحك...عفيه سبع بعد ابووك وانت هم تعضه وتنعل والديه بعد شتريد ؟

هو تقرب من رگبته جاسر وعضها باسنانه الناعمه ويحجي من بين عضته ...اتله اتله...« اكله اكله »

ضحك جاسر وبعده عنه...ولك بويه مو هييج ولك كلبت الديوان وباجر وراي كعده لا يشوفون رگبتي ويكولون هذا الصل مرته مشوهه رگبته

باوعلي بنص عين...ما يدرون بيها البربوك محرمتني علئ نفسها

باوعتله واني اخفي ابتسامتي،وعفته ورحت جاسر مخبل رسمي هم زين من شاف ولده وشافني هدء شويه

معقوله يحبني....

...............................

وقار ...

كاعدين احنه ودخلوا الولد ووياهم جابر مضروب ، نسيت كل شي صار بيني وبينه وكمت ايدي على قلبي ومذعورة ...

يمممه لااا الا جابر ماريده يتأذى احس اني الى اتأذى مو هو ..
احس انتقل المه ووجعه الي يحس بي بجسمي  ...

كعدوا بالصالة وايده متوجعة واني واكفة متحنطة كباله واديه على خدودي بفزع .
وهو يرفع راسه متوجع ولازم ايده والدم مدري منين يطلع ..

ماما رضية وامي  كعدوا يمه يبجون واني واكفة اناشغ والصدمة محنطتني ومسيطرة عليه وبقيت واكفة بمكاني مثل شجرة ثابتة ..

هو كللهن بنبرة ألم يحاول يطمنهن بيها ...
مابيه شي مااابيه لتخافون ماله داعي كل هذا .

بنص المه اجت عيني بعينه اربكتني نبرة العتاب الممزوجة بألم الي بعيونه ..

كال صلاح بنبرة امر وخوف وقار ليش واكفة روحي جيبي شاش وكطن عقميله الجرح ولفي كبل لا يتلوث

ركضت جبت معقم وشاش وكطن ورحت للاستقبال بسرعة .

باوعتله بتردد هو انتبه عليه واكفة ارجف وباديه الاغراض .

دنك وهو يحجي ومتألم ويه ماما رضية يسولفلها ع الحادث .

ركضت كعدت يمه بدون تردد هالمرة ..

مديت ايدي افتح دكم قميصه حتى انظف جرحه
هو خله ايده على ايدي بقسوة وظل هو يفتحها .

ابتعدت شويه وحاولت احجي ويا بلطف وتوسل وازيح جبال الصد  االي بيننا .

على كيفك جابر لتأذي نفسك وان شاءالله حقك مايضيع والله انته زلمة ووراك زلم ويرجعون حقك الك ويطلعونه من حلك السبع همين .

بس هو وين ولا يهمه كلامي ظل كلساع يثور بعصبية  مثل بركان تصرخ حممه كلما اقتربت ساعة ثورته.

رد بفورة غضب وانتفض ويا كل جسمه
خلاني اوكف وماكمل بلي داسوي على ايده

: لا والله اني يضربوني اله اطلع حليب امهم من خشمهم والله بسيطة .....

رديت : عفية جابر على كيفك جرحك كلما تتحرك كلما تنزف .

كال بتذمر وهو ياخذ قميصه من الكاع
كافي وقار كااافي لعبت نفسي سويلي طريق خلي اغسل ايدي عن الدم .

هو كال هيج ودخلت عمتي امه تبجي وتصيح
يممه جااابر شسسوو بيك الله ينتقم منهم الله ياخذهم .

هو سند جسمه ع الكاع وكام الها تلكاهه ويبوس براسها
ويهديها ..
على كيفج يمه عدت سلامات وربج حقي اخذه مربع بس لا تقهرين روحج .

باوعتله وهيه تشهك شيردوون منك ليش ضربوك هالواحد عندي انته .

ماما رضية وماما كاموا يهدأون بيها وهو واكف متخصر وهي كوة تتنفس ..

امي باوعتلي يووم وقار جيبي كلاص مي لعمتج بسرعة ..

ركضت جبت مي شفتها كاعدة ع القنفة وهو مكنبص كاعد يمها وهيه بعدها تبجي ، داانطيها كلاص المي اخذه مني وانطاه الها .

ووكف بصفي كال سويلي طريق ..
هزيت راسي ومشيت قبله للمغسلة ..
وكف يغسل واني  بقيت اباوعله واكفة دقايق انقل بثقل جسمي من رجل للثانية بتوتر .

خلص تغسيل وكال بحدة  جيبي قميصي وتعالي .

كتله بحزن كله دم هسه اجيبلك من ملابس صلاح وعفته واني اتلفت عليه هو واكف يباوع لجرح ايده .

انقهرت  عليه ركضت جبتله ملابس من صلاح وكف يم المغسلة يدكم بسرعة بالقميص ..

ويرفع راسه و تتجول نظرات عيونه فوك وجهي بتركيز ثواني  تتصاعد وياه وتيرة  ارتباكي من نظراته المتفحصة ، نزلت راسي بسرعة ..

طلع من يم المغسلة يمشي بسرعة .. واني تبعته امشي اسابق بخطواتي اريد اوصله ..

صار مقابيلنا جاسر كله وين رايح اخذ مرتك وياك ...

رد بحدية لا ما اخذها اله اخذ حقي بيدي ..

وباوعلي بنظرات باردة

درت وجهي اتفادى نظراته  ودمي يفور والالم ينهش بيه وبروحي .

وجاسر تبعه يحاجي واني فتت جوة ابجي ..

خطيه والله انقهرت عليه جابر ما يستاهل كعدت وخالتي،صبريه شدكول ...شكول عليج يلجبتيلج وحيد ترف چلاه من تلفي الهواديد

اووف شكول عليج يام جابر يم الجبتي بس جابر لو جايبتله بعد اخوه ولو ولد عمه ما قصروا

باوعت الامي وكلتلها...عفيه عليج يالجبتيلج اربعه يحلون الحجي بالدواوين

والمايل ذول يعدلونه ...

امي هزت ايدها راح فلاح وابو فلاح يهزون الديوان هز ومن يحجون شواربهم ترجف....

.........................

ضلوا تقريبا لتلاثه هم كاعدين وبس يسولفون انوب من يسولفون عبالك يتعاركون ميحجون بهدوء ونبي عبالي،عركه

حطيت مجتبئ بمكانه دا اريد انومه

مجتبئ كال...ماما عمو سابر قالع منه دم منو عفا

ابتسمت بحزن. الجلب بعد لا تطلع يعضك الجلب مثل ما عض عمو جابر

باوعلي مجتبئ مقابل كال.  هلاوو والله اعفه حييل اقلع الدم

هزيت ايدي ...ياربي انوب ما يخافوون

ضليت اسولف عليه واحجي وياه وهو دوخني يعني ما يقتنع ابو ومخليته

نعست اني،وهو ما نام انوب خله وشرد راح يم ابو

أطفالي ملائكه لحد يحجي عليهم...

رحت كعدت علئ المكينه مالتي اخيط الثوب الي،شكاه جاسر من كتفي خطيته وعندي كم قطعه مخيطه عدت فصالها...

وماما رضيه جابتلي قماش كلت سوي برده لان حلو كعدت افصل واخيط بي

واني دا افصل اتذكرت ذاك اليوم مجتبئ يكول لابو...بابا اني وسكيته احوان..  « اني وجكليته اخوان »

ابو استغرب كله....شلون ولك اخوان

هو طلع الوحمه الي بصدره وسحب ثوبي من صدري كله.. سووف تنينه عنه اوااا انا...« قصده ثنينه عدنه وحمه »

جاسر كال.  افااا والله ذكي منتبه علئ الوحمه وفايد ابوك

كتله.. والله ولدك ينتبهوون علئ كوولشي وبعدين شلون فادك

جان يرد عليه يكولي.  مثلي اول يوم شفتج بي حفضتج ببالي ...وفادني عرف شلون يكشف هل انوثه كدامي

ابتسمت بحزن وخليت ورحت هو ششاف مني،جنت مدمايه تدمي ومفرفحه من البجي،من وره هاله ضربوني،اخواني...

رجعت الواقعي جريت نفس احس،شئ كاتم علئ،صدري هاي مو حياة والله دا احس عاصفه مستقره بصدري

يالله الحمد لله على كل حال احاول اصبر نفسي،

بس،اكثر شئ قاهرني هم اهلي شلون هيج تسوون بيه وتكسرون بيه مو بنتكم اني

هذا جاسر علئ ابن عمه كتل روووحه هم شبيهم هيج ويايه حتئ،لو واصلهم كلام محلو عني،بس،ما الهم حق ولا الهم فخر...

رجعت اخييط ومجتبئ،ومرتضئ اجوو كعدو يلعبوون وساعه ياتعاركون هم الحمد لله من جعفر طلع وما شاف طيوره مطيرينهن

جان هم ضل يعربد عليه

فتحت الكنتور عندي ثوب شويه الصدر مالته فارغ حبيت ارتبه شويه...

دورت عليه دورت ماكوو .. يااا عزا وين صااار اني،من تخربطت ريهام عفت الملابس مطشره

عزااا كال رضاوي،...ماما تتاوي قبت بيتنه تاحذ باعه..« سجاوي طبت البيتنه تاخذ ارباعه »...

رجعت اكمل اخيبط وهم نامو

وكلها نامت اله جاسر بعده خابص الدنيا يتنفس مشاكل يخابر ويغلط ويسب ومدري شنوو

شويه ودخل الغرفتي،لزمني،من ايدي حييل وهو متعصببب نااار كال...   انتي،شبييج ما دكولين هذا زوجي مقهور خلي اطفي ناره وهو محترك كلبه ضاله تخرطين بمكينتج

باوعتله بخووف وصدمه ..شنو علئ كيفك شنو اخرط بمكينتج وجاسر بعدين شطفئ،منك اذا انت حتئ ويه قميصك،تعاركت اني،مرايده روحي انوب احصلي راشدي

لزم خصري بثنين اديه حسيت ضهري انكسر بلزمته كال . ولج اني زوجج ومتعصب،من اتعصب،بوسيني،حضنيني،هديني مو صافنه عليه الزميني

رديت عليه بحده ...ترئ لزمتك وخليت روحي،بروحك وانت لزمتني ودفعتني حتئ ردان ثوبي انشك وهسه خيطته

باوعلي،بغموض وعيونه تنطق بمشاعر مبهمه...اييي حسيت بانوثتج انفجرت لذاك الثوب اخذت ثاري منه وشكيته لان بعثر ودمر مشاعري ...

ابتعدت عنه...جاااسر عووفني شبيك يا انوثه يا بطيخ

هو رجع سحبني بقوه والتهم شفايفي،بعنف ايده لافها علئ خصري عبالك ايد حديد وانقفلت والثانيه علئ،راسي بحيث راسي ثبت وقدمتله شفايفي بطبق من ذهب

حاولت اخلص نفسي،من بوساته الحااده بس ما كدرت

جان عندي شلون الميز اخلي بي،احتياجات الاخياط هو مال خشب

رفعني،من خصري وخلاني عليه الميز ورجع يشم بشعري

دفعته برعب...شبييك عووفني مااا اريد

صاح بوجهي بغضب...هو شنو الما تردين اني رجال باجر وراي فصل اذا ما ارخي اعصابي اطك واموت

جاوبته...وشدخلني،بفصولك اني مره غريبه لا منكم ولا من عشيرتكم حتئ،تريد تنعش فصلك بيه...

رد ببرود...ماكو غريب غير الشيطان أم مرتضئ انتي،منا وبينه ..

رجع باس شفايفي،بوسه خفيفه هزيت راسي،بنفي واني،اتفاده قبلاته

ابتعدت شويه كتله...اني نعست اريد انام وباجر وراي كعده

هو باوعلي،بحده وبعدها سحبني،من ايدي شمرني،علئ السرير كال بغضب...يالله نامي اذا سمعتج تخيطين و ما نايمه اله افلش المكينه تفلش وطلع حركة ضربة جابر بيج

باوعتله بخووف واني لازمه بالفراش عبالي حيجبرني وينام ويايه هزيت راسي بقبول ...اي حنام

ضل يباوعلي،واني غطيت نفسي بالديباج حتئ راسي بس،عيوني طالعه باوعت عليه ونظراته خوفتني بسرعه غمضت عيوني

حسيت الضو طفئ فتحت عيوني شفته لسه واكف بس،طفئ الكلوب وكطع واير المكينه شكد خبيث يحاربني برزقي ولو لحد الان اني ما مسترزقه

خليت ونمت بعد اجيت اروح ارجع اخيط بس،خاف افتح الضوه ويرجع عليه بس حرامات متحمسه اكمل الثوب

حطيت ايدي علئ شفايفي جويسر نذل حتئ بوساته مخبلات ومسودنات مثله...

........................

ريهام ...

صلاح اجاه اتصال وطلع وظليت وحدي بالمستشفى
مرت الدقايق طويلة عبالك دهر .

حيل خايفة وقلقة خاف صار الهم شي يربي احميهم وارعاهم لا يتأذى منهم أحد .

بقيت لازمة سبحتي بيدي اسبح وادعي ، وكلساع امد ايدي للتليفون اخابر محد يجاوبني .

الحيرة صارت تنهش بروحي نفس هذا المرض اللعين المستفحل بجسمي .

. ليش يبقيني صلاح هيج قلقة ووحيدة مو من عوايده اكيد صاير شي عدهم .

استمرت دعواتي طول الدقايق الي انتظره بيها
واليوم تطلع تحاليلي .

رحت للمختبر وحدي
امشي واجر بخطواتي متألمة ومتعذبة ..

اخذت تحاليلي للمختبر وتوجهت لغرفة الدكتور
انتظر دوري حتى افوت ..

تعبت كعدت شويه يله اجه سرايه فتت ع الدكتور خليتله
الاوراق الي بيها التحاليل على المكتب مالته وكعدت على الكرسي الي بجانب مكتبه .

هو قربهم منه وظل يقراهم لثواني
وكال ريهام ...

جاوبته بحماس نعم دكتور ..

كال ببرود : نسبة المرض عندج ٩٠ % بالمية ..
وباوعلي كمل كلامه : ونسبة كلش خطيرة ..

بلعت ريك وهمست يارب رحمتك ...

ورجع باوع للاوراق وعدل نظاراته كال وجابر نسبة التطابق وياج 25 يعني ممطابق .

واني بغمرة يأسي ابتسمت بيأس وطلعت مني تنهيدة تفسيرها الوحيد هو الالم .

سألته دكتور يصير شخص غيره يتبرع غير اخويه ؟

رجع ظهره على الكرسي وكال برفض قاطع اكيد لااا .

هزيت راسي بيأس اكبر ..

وسألته  زين دكتور يعني اذا طبت يصير احمل لو الكيمياوي اثر عليه وبعد ميصير عندي اطفال؟

باوعلي بتفحص و زاوية فمه ترتفع مثل الي يقاوم الابتسام .. واردف بنبرة استهزاء ..
_ بابا انتي اليوم باجر ميتة  يا طفل الي تحجين عنه ؟

تحجرت الدموع بعيوني او جفت دموعي ماكو بعد دموع او الي اعانيه اكبر من ان يداويه دمع.

كمت من عنده ، مديت اديه ترجف للتحاليل دااسحبهم بس لزمتني دوخة وفقدت واسودت الدنيا بوجهي والظلام يحيط بيه من كل جانب .

يأس وعذاب وألم ، والموت جاي لا محالة ، رحمتك واسعة يربي سلمت امري بيدك وثقتي بيك كبيرة وماتخيب رجائي .

حسيت الدنيا تفتر بيه وماشوف شي كدامي بعد سندت ايدي بالمكتب بس بعده الظلام محاوطني
وكعت على الكاع مخنوووكة وماكدر اتنفس وفقدت الوعي والاحساس بكل شي .

كعدت مخليني على سرير المستشفى والاوكسجين على خشمي ..

لحظات تذكرت كلام الدكتور والدموع الي جانت متحجرة قبل شويه بمحاجري اذابها الحزن واللوعة على حالي وصارت تنزل بغزارة  .

ورجعت فقدت مره ثانيه....

بس كعدت تقريبا بالاربعه الصبح لكيته كاعد بصفي صلاح ويمسح علئ هاي الي لابستها براسي ويبوس بيدي

ابتسمت بس من كثر التعب والهبطه الي اكلتها ما كدرت ارد عليه

بس عتبانه عليهم كلهم شلون يامنون بنتهم تنام الوحدها بالمستشفئ...

..........................
جولييت

اليوم الكعده مرة تسع ايام وهم خابروا يحولوون عدنه

جاسر جان لابس دشداشه بيضه وعمي كل شويه ومتفق وياه ويحجون بهمس بينه

اني جنت كل شويه اسرق النظر اله للاسف رجولتة جاسر تاسرني بس الصار مو قليل

مع الاسف الدنيا عوجه وياي والله انقهر من اشوفه

احتمال لو مو اخويه كتل اهله جان دمر العالم دمار لان هو نار علئ ابن عمه

جان الولد يرحون ويجوون

اني جنت عند بيت عمي ابو جابر لان كلنه رحنه هناك حتئ نساعدهم بالغدا والجاي

مجتبئ دمر ملابسه ورحت غسلتهن جاسر كال لبسيهم دشاديش نفس اللون واريد يكعدون بالديوان من هسه اريد اعلمهم علئ الدواوين

فكلت خلي اغسل دشداشه مجتبئ لان دمرها الوكح حتئ،تيبس،بسرعه

صعدت فووك اشرها حسيت بشخص صعد ورايه

باوعت شفته جابر انصدمت وخفت حتئ،بطني،لوتني

هو كال...علئ كيفج جولييت لا تخافين اني عندي موضوع وياج وهذا الموضوع اريده يكون سر بينه

هذا السر الجاسر ما اريده يعرفه مفهووم

استغربت...سريش شنو السر وبعدين جابر خليني انزل لا احد يفهمنه غلط وشلون تصعد ورايه انت ما تخاف ما تعرف ابن عمك

رد بسرعه...اعرف بس اني الخاطر جاسر احجي والله لان ابن عمي وكفلي وكفة اخوو

باوعتله بتساؤل...اي شنوو

جر نفس،وكال......

نهاية البارت...يتبع

كونوا انتم كونوا بخير...احبكم 💔

نور سمو العراق 😘

لا تنسو التصويت والمشاركه بكم نكتمل ضغطو النجمه البنزرقيه 😂

والبارحه مراح اعتذر لان بالله الكريم كملت البارت وانحذف كوووله عاد متت قهر متت والله اجيت ابجي اجيت اللطم حاولت وماكو وخطيه الكاتبه نورا ناصر ابد ما قصرت وكالت اساعدج منا للثنتين بس اني تعبت خلصت طاقتي ما كدرت بعد اكتب وتكدر خاطري والله 💔💔😥

وهذا الكلام خاص من طلحه الكم وشرفتوني احبكم كووووومه 😍😍😍😍