رواية #جوليت وأسرها.... الفصل السادس والأربعون 46 - بقلم الكاتبه سمو العراق

بارت 34
رواية..جولييت...واسرها...غياهب الإنتقام
بقلمي...نور سمو العراق

💔💔💔💔💔💔💔💔💔💔

يوما ما سأقتلك بيدي و سأدفنك أيضا و سأرقص واحتسي النبيذ فوق قبرك احتفالا لوداعك

..............................

احس الدنيا يوم الي وقرن عليه واتاكدت ان كأس الحياة مر محد جرعه غيري

ومن اقارن مأساة الحياة الخيالية ويه الحياة الواقعيه اتمنئ اعيش بخيال واتلاشى وانتهي ولا اضل تحت رحمته وعنفوانه...

مليت مليييت من تذبذبه ومن تقلباته ومزاجيته اعرف خطئت بس اعترفت بخطئي وذبت باحزاني

ليش ما يرحمني ليشش؟ ليش يعذبني شكد انوح كدامه وانحب ولا تهمه دمعه من دموعي هيج اني عنده سراب وما الي اي اهميه بكيانه...

بالحظة انتقام مني وبالحظة ضعف سحبت المسدس من حزام البنطلون و وجهته عليه

هو باوعلي بصدمه ورفع حاجب استغرب من شاف المسدس يعلن عن تمرده ضد الكاسر...

باوعلي بجمود وهدوء من فووگ ليجوه وابتسم باستهزاء...

رجفت ايدي من نظراته الحاااده والمسدس اهتز بقوه وهو بين اناملي الناعمه...

جنت مراقبه حركاته الهادئه سحب باكيت الجكاير واخذ من جكاره وشغلها سحب منها اول نفس ونفخ الدخان من بين شفايفه

همس بملل...يلا استعجلي وراي شغل شوكت حابه تنهين الدراما الهنديه مالتج ؟

بلعت ريكي بحقد وغصه...وو والله اقتلك وما يرف الي جفن تعبت منك تعبببت حسس بيه حسس انت شنو حجاااره طابوكه دموعي ما تكسر خاطرك

انت تجبرت وتفرعنت والله والله ارميك وانهييك من الوجود واكول انتحر واخذ اطفالي ونعيش بسلام ولا تهمني ولا البس اسود ولا ابجي عليك

رد بغرور...اهااا تمام هسه اطلع لو ترمين ..اعلمج شلون ترمين لو تعرفين

باوعتله بنظرات حاده ودامعه والمسدس يرعش بين اديه...لا تستغفلني كووولشي اعرف وتطلكني وغصبا والك مهله بس هل اسبوع لا والله اترس صدرك رصاص

رد بتوسل مصطنع...لا عفيه جوجو انطيني مهله للاسبوع الجاي بين ما اضبط اموري واجمعلج الحاضر والغايب

تقرب مني اكثر واني رجعت بخطوات كبيره صرخت عالي...ارجع لا اكتلك لا تحسيني غبيه

تقرب اكثر وهو يعض شفته وابتسم ورفع حاجب...لان فعلا انتي غبيه

اردف بانذباح...طلقه وحده منج تنهي كل هل مهزله تنهي روح ذابت وشتعلت وانطفت وحدها بدون محد يداويها...

رفع اديه بثقه...بلاا ارمي خلصيني حرريني تسويلي خدمه ما انساها الج طوول حياتي

رجفت ببكاء وخوف همست بألم...واني؟

رد بذبول وحسره...انتي مجنونتي الي شكد ما اقسئ عليها ما اريدها تكون مثلي ولا اريدها تتطبع بطبعي لان اني مو بشر اني حجر اني رمااد

اني نااار مجرم وانتي مثل قطرة ندى ما اكدر اشوفج بعيوني مجرمه بس اذا طلقتي هل رصاصه راح اعتبرها رصاصة رحمه ارحمي كاسرج وخلصيني وخلصي نفسج

نزلت المسدس من ايدي بخذلان وجسمي كله يرعش مثل سعفة وضربتها رياح قوووية

تقرب مني اكثر واحتضن ايدي الي بيها المسدس بيده الخشنه وخلاها بصدره وباوعلي بنظرات قاسيه مخلوطه بتوسل

همس بالم...اووول مره اتوسل بيج ارمي يالله وشدكولين كولي انتحر مات مقتول كيفج؟

باوعت لعيونه عبالك مثل رواية ويحيطها الغموض مر عليه كل شريط حياتي من اول يوم تعرفت عليه لحد هل لحظة بين ايام حلوه ومره وعرفت العشرة ما تهون عندي واعترفت اني مو مجرمه مثله حتئ اقتله...

رمشت باسئ وعيونه تقابل عيونه...ما اكدر

عيونه جانت تتأمل عيوني بنهيار همس بقهر...عذبتيني

حسيت تنفسي ضاااق عرفت اني سبب بعذابه اني مو خير عليه اني فگر مثل ميگول وفعلا تعبته وعذبته

سحبت ايدي منه وبعده المسدس عندي رديت بقهر...ترئ مو بس انت متعذب ومتاذي والله اني تعبانه بكد السما السابعه...

روحي دتتكطع ألم وشووگ مشتاقه النفسي مشتاقه الجولييت الاسرتوها وذبحتوها مشتاقه الامي دا اتكطع والله حسو بيه فدوووه حسوو

احس الوجع ينهش باحشائي احس روحي بين لحظة والثانيه حيغمئ علية..

والله مووجوعه وتعبانه بس مدا احجي ولا اشكي ما اريد اضوجكم دائما اكون ان شاء الله اني بخير

ولو ماكو اي خيير بحياتي

كملت بانتقام من نفسي...اني سبب بعذابك وبعدم راحتك

اردفت بدمعة يتيمه واني ارفع اكتافي ..تمام حخلصك من همي

رفعت المسدس وخليته بصدري..ابريني الذمه جاسر وعينك علئ اطفالي...

فتح عيونه بصدمه وزمجر بغضب...جولييت لاااا اموتج والله

بلعت ريكي ضغطت علئ الزناد وهو هجم عليه بسرعه سحب المسدس من ايدي بقسوة كبيره ورفعه للاعلئ

والطلقه انطلقت من المسدس واستقرت بسكف الغرفه المزين بالثريات

وكعت وهو فووكايه صرخت بصوت عالي عبالي الطلقه استقرت بي هوو

سمعت الباب يندك بقووه وهنه يصيحن...شكوو جاسر كتلت منوو احجي

رد ببرود...ماكوو شئ ثارت طلقه واني انضف بالسلاح

ضلن يلحن بس هو مجاوبهن وبعدها رفعني بقوووه من ثوبي وبغضب عارم عاط بوجهي..شسويتي

رجع هزني بقوووه...شسووويتي احجي لج انتي شنو من مله لج والله تعبت بسببج لو ميته شراح يكون موقفي...

دفعته باسئ وابتعدت عنه خطوات واني اجمه بخصلات شعري المبعثر همست بخفوت...ما الك شغل بيه

رجع سحبني بقووه وهو يباوع لعيوني بحقد...جوووليت تمردتي هوووواي وسكتت عنج هوواي اخر مره تتجرئين وتلزمين السلاح مره ثانيه والله ايدج اكسرها واعلگها برگبتج فااهمه

محاجيته غلست منه هو تخبل ما يحب اغلس منه ...

رجع هزني مره ثانيه كال...بس كليلي انتي شبييج مخبله لج والله متت منج تتصرفين تصرفات مال مزعطه ومو منطقيه

رديت ببرود...منك نتعلم

ابتعد عني وجر نفس كال...من اخذتج لحد الان واني لا اني للسما ولا اني للارض

باوعتله بهدوء واستفزاز ...شو بدي اعمل حظي هيك معفن

لزمني من فكي قوووي....انتي ما توبين تحبين الكتل

ابتسمت...ايي بحبو بس بصراحه ما بحبك

دخل ايده بشعري وابتسم بمكر...صريحه زياده جولي خانوم

رمشت بعيوني باستفزاز...كتيير

جر شعري حيييل احجي عدل والله اذا استفزتيني وحجيت غير العراقي بوكس واحد افلش وجهج

تنفست بهدوء...تمام اعتقد هاي غرفتي واعتقد انت محرمني فماكو داعي كل شويه تدخل الغرفتي وتقتحمها مو صح ؟

رد ببرود...والله البيت بيتي وبكيفي ادخل وين ما يعجبني واعتقد ما الج حق تحجين مو صح؟

انتبهت علينه احنه الاثنين ساعه نصير جمر ومشتعل وساعه نصير ابرد من الثلج...

جريت نفس ورديت...لا مو صح اخي العزيز عيب لازم تحترم حرمة البيت وبعدين جاسر اغا لازم تحترم بنات العالم ولا تنكث بالوعد

غلس علئ الموضوع وباوع للسكف كال...مخربه ممتلكاتي زرفتي السكف وشوهتي شكله لازم عليج تدفعين خساره وتعويض مو هيج لو اني غلطان

رفعت عيوني للسكف..اممم لهل درجه واصل بيك البخل بحيث تحاسبني علئ طلقه اوك اعوضك عن هل سكف بس انت بشنو تعوضني بعد ما شوهت وجهي

باوعلي ومسح علئ خدي بعدم مبالاة وحنان...حلوو ما بي شئ ميحتاج تعويض...

ابتسمت بحزن وذبول...الحايط يتصلح بس الجرح الي بگلبي ما يتصلح ولا يلتئم...

رفع حاجب بذهول...معقووله ان طلعتي انتي المجروحه واني ظالمج وجرحج ما يلتئم تردين اطيب جرحج مثلا...

تنهدت...لالا عادي اصلا انب تعودت علئ كسرة الخاطر

وكف وكعد علئ السرير كال بوجع...ترئ اني تعبت والله لحد الان هروبج مني مسبب ازمه عندي ومجروح منج هووواي يمكن لو ما متصرفه من حالج جان حالنه احسن من هسه

واني هووايه امور تغاضيت عنها رغم عليه ضغط مو طبيعي ورغم الكلام الاسمعه وارجع واكول كلامهم باطل هي مالها شغل باهلها هي مرتي وام ولدي

شلون تردين اتصرف و واحد نذل مثل داوود كل شويه يخابر ويتصل بيه وكال..نامت بحضني بسته عضيتها...

لج وحق الله من اسمع كلامه انهااااار وكل مره ما ارجع للبيت اكول ما اريد ااذيها ما اريد اموتها واني فاقد اعصابي

ترئ الصار مو قليل واحد غيري طك ومات من زمان

كل مره اكول ما اريد اجرحها وما اريد اذكر الماضي اني لو اريد اقهرج جان ذكرت شام بكل دقيقه وقارنتج بيها بس اكول ما اريد اجرحها...

وانتي مثل الزمال كل شويه وكلتي بحبك شوو هاد ومدري شنو عود تستفزيني بشام وانتي ما تدرين من تحجين هيج تخليني اتعلق بيها واحبها اكثر

كل مره ما ابين اني ضجت من كلامج لان ما اريدج تلزمين عليه نقطة ضعف لان اعترف نقطة مرتي السورية شام...

انتي انسانه عقلج مو براسج اعرف بيج فقيره وفطيره وصغيره بس تطلعين طلعات لا يرضئ بيها الله ولا بني ادم وحتئ ابليس ما مسوي سوالفج

رحتي انهزمتي وخليتي العشاير تاكل وجهي وما فكرتي من تطلعين ميت كلب ينهش لحمج وميت كلب يعتدي عليج

وانتي ما شاء الله ما قاصره حلوه وصغيره وتبجين المحافظ...

ومثل ما شفتي لو ما صبرية جان انتي هسه بخبر كان لج لو داوود متعرض الج اني اخليج لو اخلي داوود لج اني كسرته ولحد الان كلبي ما ارتاح منه

صعب اسمع بواحد مثله متعرض الحرمتي وام اطفالي

وتجين تحاسبيني دكولين انت قاسي انت مجرم انت وانت

كم مره كتلج لا تخابرين اخووج المجرم وكتلج علاقتج انهيها بي وانتي مثل الجحش الصلافه عندج مركز اول اذا متجيبين مشاكل النفسج ما ترتاحين

رحتي اخذتي رقم رضيه وخابرتي ومن قمة غبائج نسيتي اني ما تفوت عني فايته وجنت مسجل المكالمات الي،بموبايل رضيه

كلت هسه تستقر هسه تكطع منه هسه وهسه ولمحت اكثر من مره وانتي لا ابالي

عبالك اخوج المجرم رفعة راس وتفتخرين بي وهو قتل تلاثه ومو بس هيج انتي لو ما حماره جان فكرتي وكلتي اخوي الي يخاوي بالمشاكل ما اريده

جان فكرتي وكلتي هو لو يحبني مجان طلب ذهبي يبيعه حتئ يحمي نفسه

وارجع واكول اني حذرتج وانتي كسرتي كلماتي واني اخوتي زلم مشوربه محد كسر كلمتي

اول ما كمل كلامه اني انطلقت همست بقهر...انت قاسي ويايه وجامد ومتحبني وتغورني بهاله وشام وكل هذا واني ساكته

وتستغل ضعفي وتهددني باطفالي اني من اسوي هييج واجيب المشاكل النفسي بس لان اني ما عندي ثقه بييك لان انت عدمت الثقه الي بيني وبينك

انت لو تحبني وتحترمني جان من اتوسل بيك تاخذني لصدرك وتطبطب عليه مو تكسرني

اقرب مثال الديج مالتي ذبحته وحركت دمي بس في سبيل تحرگ گلبي وتقهرني واني ضليت شهر ابجي عليه ما اهتميت لدموعي

شكد قهرتني من اخذت مرتضئ ومجتبئ مني وما كلت هاي ام شلون هيج احرك كلبها وانت تعرف الفراك صعب..

انت فاركت شام وغزل وشفت اللوعه ليش ما ترحم كلبي وصغر سني انت فهمني مو تضربني خليني اثق بيك مو اخاف منك

وكف بغضب...انتي سوالفج مو تتسولف انت صلفه رغم فطيره ...

وكفت بصفه و واجهته بعناد...بس انت من يوم يومك ما تحبني اصلا انت تزوجتني مجبور وبطلب من امي

سحبني من خصري بسخرية...لا والله تحجين صدك شنو حرمة اني وانجبر وشنو لهل درجه طلبات امج اوامر عندي ...

حطيت ايدي علئ ايده المحتضنه خصري همست...وجعتني عووفني

رد بمكر...لج بربوگ راشديات ومكافش ما دكولين وجعتني وهسه لزمت خصرج ضليتي تتدلعين عليه..

ضربته علئ صدره بدلع...لا تفشر عليه عيب عليك وبعدين من شوكت وانت تفشر

لزمني قووي ...من اليوم ورايح لان انتي فد وحده اوووف منج ما اريد احجي كلمه اكبر منج

ردت احجي انطق بكلمه اكوله شنو الكلمه بس احس لساني نربط وعيوني غوووشت وروحي حسيتها طلعت اول مره تصير عندي صرخت واني الزم ايده..جاااااسر رووووووحي روووووحي حتطلع

هو لزمني بخوووف...شبييج جوولييت؟ جولييت

لزمت صدري بووجع...يمممه روووحي روووحي جاااسر راااح اموووت

صرخت بصوووت عالي...اطفالي يمممه

هو تخبل احس ماعت روحي يشيلني منا اوكع منا بسرعه ركض فتح الباب صااح...رضيه رضيييه

اجت رضيه تركض لزمتني كالت بخووف...يمه جولي يمه شبييج

احس الموووت يسحب بروحي صرت ارجف اريد احجي ما اكدر

كلتله رضيه بغضب...انت شسويت الها

رد عليها بعصبية..ما سويت شئ فجأة وكعت

كل شويه اصرخ بصووت عالي عبالك وحده متعارضه وارجع اوكع عبالك نوبة صررع كلهن اجن يركضن عليه يردن يكومني ماكو

هو شالني بدون لا حجاب ولا عبايه وكصيبتي تخط علئ كتفه ...

ورضيه تركض جابت القران وتفتحه بوجهي وتسده

ونوال تصيح...مو كتلكم اكو جني بالبيت شوفوا تلبسها الجني والله بعد ما انام بالغرفه لو شيصير...

خلاني بالسياره ورضيه ويايه وجايبه شال وقران خلته علئ شعري وكل شويه تقره قران عليه وتفتح القران بوجهي

كالت...كولي يالله

اريد اكول يالله ما اكدر اريد انطق الكلمة ما اكدر احي لساني يبس صار خشبه ضليت اهمس بصعوبه...ا ا الله الله

هو عاط برضيه بغضب...راح تموووت نزل من السياره يركض وراح للمحل جاب بطل مينكعني تنكع

ورجع ساق بسرعه جنونيه وهو يخطف من بين السيارات والسيطرات من يشوفوا عنده مريضه ميحجون ويسهلون امرنه وصلنه للمستشفئ ال « ...»ما استقبلونه وحالونه المدينة الطب...

هو بسرعه انطلق المدينة الطب بصراحه انقهرت عليه لان جان متخبل ومتوتر وانوب شايلني واني جسمي كلي ماات بحيث احس نفسي ثكيله اريد اعين نفسي ما اكدر

نقلونه المدينه الطب دخلونه للطوارئ واني لا نعال ولا عبايه بس بالثوب والشال مخربط نوموني علئ السديه فحصني الدكتور اني احس بكوولشي بس اكو شئ بداخلي يمنعني احجي وجسمي ميت ولساني ثكيل

تشاهدت وذكرت اطفالي وامي بس ردت اوصي علئ اطفالي بس ما كدرت...

كال الدكتور...عندها انهيار عصبي راح اضربها ابره مهدئ بالوريد

صدك ضربني ابره كال الرضيه خلي ايدج علئ الكطنه علئ ايدها هي رضيه خطيه مو مرتبكه عافت ايدي والكطنه وراحت والدم ترس ايدي وملابسي ترس

جاسر جان يم الطوارئ اجه وشاف الدم بيدي وهو تخبل ضل يصيح ويغلط اجه الدكتور والممرضاات يركضن

جاسر بغضب...انتم شسويتوووا بيها شوووف الدم النزف اخذها انت شسويت الهااااا احجي

الدكتور بقلق...لا تخاف لان هسه ماخذه ابره بالوريد وعافوا الكطنه هيج صار بيها...

بس حاب اسألك سؤال اكو احد محاجيها غاثها لان البنية مو طبيعية وانهيار عصبي حااد عندها

اردف بهدوء...انت زوجها موو؟ متعارك وياها محاجيها البنيه وجهه بي كدمات اكيد انهارت من المشاكل

جاسر بغضب...مالك شغل

عافنه الدكتور وراح ورضيه كاعده يمي وتمسح علئ شعري واني دموعي تنزل بصمت خطيه طول ما كاعده تقره عليه قران...

باوعتله بصدمه ما اخذ ايدي واحتضنها بيده وباس باطن كفي بحنان...

ومن خلال صدمتي نمت تعبانه والدموع تلمع باهدابي...

وما اعرف شكد مر وقت كعدت من نومي شفته لسه كاعد وعيونه تتأمل ملامحي التعبانه ورضيه لحد الان تقره قران...

وكف بلهفه وحط ايده علئ جبيني همس بحنان...هااا بشري شلون صرتي

رديت بتعب واني ابلع ريكي...شويه احسن بس اريد مي..

ركض بسرعه ورضيه ضلت تبوس بيه وتسالني عن احوالي...

اجه جايب بطل مي حط ايده وره ضهري ورفعني صار ورايه وضهري سنده بصدره شربني شويه وبعدها رجعني نمت عدل شالني وهو يخبي خصلات شعري المتمرده علئ حجابي...

انتظرنه شويه وكتبلنه خروج وبعد ما وصاه كله بعد لحد يضوجها لان حيصير عندها صرع وهاي بداياته...

خلينه ورجعنه دخلنه للبيت خالتي و وقار تحمدن اليه بالسلامه وبعدها اخذت اطفالي صدك اليوم شفت الموت بعيني وصور اطفالي تتخايل الي

هو اخذني الغرفتي طلعلي ملابس لان ثوبي كله دم وبعدها اخذني للحمام غسل اديه من الدم ونشفهن

جنت اباوع عليه وابجي بصمت رغم موقفه الحلو لكن اهتزيت لو ما عاصم كتل اخو جان هسه احنه بخير ...

رجعني للغرفه كعدت علئ سريري وهو رفع ثوبي ونزعه مني ضميت نفسي باديه منه بخجل

ضليت بس بالملابس الداخليه وجههي تلون من خجلي من نظراته الي كل شويه وسرقهن الجسمي

لبسني ثوب غيره شويه خفيف ومشلتح وشال رجليه نومني علئ السرير وغطاني

باسني بخدي وطول شويه ابتعد عني ولاحظ ارتعاش اناملي وخجلي منه

فتح موبايله وطلع قران بصوت عبد الباسط عبد الصمد وخله الصوت هااادئ وراح كعد علئ الكرسي وحط ايده علئ عيونه بتوتر...

جنت اسمع لكلمات الله التامه وهي تسلل لگلبي بعبق ايماني وتنور ذرات روحي

جنت اردد السوره ودموعي تشكي حالي وتشكي همي الرب العالمين...

........................................

شهد...

زوجة ابويه حاده اسنانها شلون بطلت تريد ارجع اداوم بس اني ما ارجع لان اعرف بيها ارجع راح يحلالها الجوو وراح تضل تدخل ولد وتطلع ولد

ولمن تشوفني حتخاف محتدخل ولد

ابويه لا يسأل ليش بطلت ولا يحجي

دخلت زوجة ابويه كالت...يالله مدام المسعده المدلله بدلي بسرعه حتئ نروح اني وياج

رديت عليها بسخرية...وين للمول

هزت ايدها بتذمر...اي للمول مال الخلفج

جاوبتها باستهزاء وتوسل...لا عفيه الله يخليج اخذينه لمول الخلفج بي شغلات حلوه وحديثه

تعصبت وردت من بين اسنانها...كومي كومي طايحة الحظ يالله امشي خلينه نروح للكشافه تاخذلج خيره ليش قسمتج اتاخرت ولحد الان ما تزوجتي

رديت بتسنكار....ياااا والله ولا اروووح شنو اني شكد عمري وتفترين بيه عند الكشافات

شمرت عليه النعال وكع ببزونتي عاطت بزونتي بقووه وختلت بحضني ومرة ابويه تصيح...دكومين لا اخلي ابووج يشمر بزونتج بالزباله

شلت البزونه وبستها بخدها و وكفت بعصبية بدلت وهي بدلت ورحنه ركبنه تكسي مشه بينه الرجال بطريق طوويل وكله مقالع مال زبل ويخوف

وبعدها نزلنه بمكان مهجور يخوف بيت هنا وبيت ابعد منه بمترات ومبينه المنطقه حواسم...

وطينه وترابه وملعوسه تلعوس...

دكينه الباب عبالك بيت السحاره الموجوده بتوم وجيري يخوف

طلعت منه بنيه كالت..ما موجوده ام خماس

خلينه ورحنه ضلينه نسأل عن كشاف كالوا هناك اكو كشاف خوش يسوي شغل ركبنه بستوته ورحنه

دخلنه البيت كله اعلام ورايات دخلنه جووه لكينه رجال كبير بالعمر لابس غتره ودشداشه ويمه تكيه بيها حرمل وبيها شغلات ما شفتها شنو

ضل ياخذ خيره لوحده ويكولها هاي شوفيها البطاسه هاي تريد تاخذ زوجج منج شوفيها شلون بينت بالطاسه

اني نطيت من مكاني...علئ كيفك حجي وين اكو بطاسه صوره انت منو نبي موسئ حتئ نبي موسى ما مسويها...

كال ...تعاي بويه تعاي شوفي صورتها

وكفت بلهفه ورحت شفت كووولشي ماكو كتله حجي ماكوو شئ

ضل ياشر بالمي كال...شوفي شوفي شلون هاي بالمي طلعت اني ايمانج ضعيف ما تشوفين

والمره ردت عليه...لا خاله صدك هاي مره مبينه من شكلها اي هي خطافة الزلم اخذت رجلي مني

رفعت اكتافي بعدم معرفه ورجعت المكاني هو ضل ياخذ الها وبعدها صاح عليه بعد ما راحت المره...

كال لزوجتة ابوية...احجي يابه شعندج

بلعت ريكها وردت بقهر...هاي البنيه مدري شبيها يجوها خطابه وما تصير واني اريد ازوجها...

هو جمع اغراضه جان عباره عن نجمة البحر ولؤلؤة ومحبس وصباره جافه وعظام مال ضهر السمجه طوويل ومحاره مدري شنو

جمعهن بيده وشمرهن علئ قطعتة قماش بيضه...

كتله بضحكه ...ههههههههههه حجي انت تاخذ خيره لو كاعد تحضر ارواح وبعدين شنو هاي نجمة البحر ولؤلؤة والمحاره حسستني بقاع الهامور هسه تطلع انت سبونج بوب ههههههه

ضربتني زوجة ابويه بعكسها علئ خصري كالت...انلصمي

هو اشر علئ المحبس كال...هذا واحد يحبج ومتخبل عليج

وهاي المحاره...عدوو

رديت بسرعه...اي هااي نويلة وجهه الطاوة

اشر علئ سنسول السمجه كال...وهاي وحده ساقطه تسويلج سحر

وهاي الؤلؤة تابعه عندج وعارض بقسمتج

كلتله زوجة ابويه...هسه اريد ازوجها شكد تطلب عليه وتزوجها...

جر نفس كال..بويه شغلتها مستعصيه عندها عارض وتابعه ومتلبستها جنيه لازم تنطيني خمسيميه الف وان شاء الله امشيها مثل الورد

واردف وهو يباوعلي...هي محد مگلبها موو

ضحكت واني اهز بيدي..شنوو باله خمسه بخمسمية ومحد مگلبني هههههه

خزرتني زوجة ابوويه واني سكتت وكوة كاتمه الضحكه

كال وهو يباوع للعده مالته ...هاي ما تثق وحتئ من اشتغل الها ما راح يجي وياها الشغل لان ما عندها ايمان

جريت نفس ...والله اني السحره كلهم ما اثق بيهم

مرة ابويه بغضب...انجي تثقين وغصبا علئ ابووج

كلت بكلبي دخلي اخسرها تولي وما استعمل شغلها كتلها بتذمر وملل...اووك اوووك بس كملي يالله اتأخرت موعد مخابرتي ويه جعفر راح ينتهي

هي باوعتله كلتله...عفيه حجي اريدك تخلصني من جعفر المطي موتني لو ما هو من زمان تزوجت

ضربتها بغضب...لا دكولين علئ جعفر مطي ترحيله فدوة انتي وجهالج

جرت نفس وخزرتني واتفقت هي و الكشاف بمية الف تسويلي فتح قسمه...

طلعنه من الرجال بعدني بالباب دا البس بحذائي وما اشوف وحده دخلت هي وامها و وياها طفله صغيره

فتحت عيوني بتفاجئ وصدمه...عزاا وجهه الطاوه شجابها هنا...

هي باوعتلي بقرف وكالت...هااا ام السحورة جاي تسوين الجعفر والي موو

هزيت ايدي كتلها بضحكه...دطيري اسوي الها والجعفر امداج والله انتم اخر همي..

خليت وطلعنه رجعنه للبيت بسيطه نويله اله اكوله عليج واخلي يكتلج...

...................................

ريهام...

ام ريهام .. شفتها ذبلت ووكعت مثل وردة انهاريت واحس گلبي انخطف مني . لطمت صدري وصحت وصرخت يمه بنتي يمممه رهووومة ..

شمرت شكو شي بيديه من العلاليك ووكعن مني بالكاع ورحت سندتها وخليت راسها بحضني واضرب على خدهه واحاجيهه : يمه رهووومة شجاج بنيتي كعدي كعدي شبيج بعد گلبي بعد  امج يمه .

وهي ماكو فد نوب فاقدة ، اجه الرجال الي يبيع بمحل الملابس الي وكعت يمه رهام ، ساعدني ودخلها للمحل
سندتها على الكرسي وهي فاقدة بعدهه .

حضنتها ولزمتها قوي واني واكفة يمها والرجال خطية جاب العلاليك وخلاهن يمي ظليت اترحم على والديه

ردتها تصحى ماكو .. ابو المحل كال حجية امشي
ناخذج للمستشفى  خطية  ساعدوني اهل الرحم واخذونه بتكسي للمستشفى . كعدت ورى وخليتها بحضني .
وابجي على حالها واحس گلبي راح يوگف .
يمه رهام شمعتي المضوايه مادري شبيها صارلها فترة .

طلعت الموبايل وخابرت صلاح دكتين وجاوبني
_ ها عمه خير خو ماكو شي خلصتوا ؟ محتاجين شي ؟

جاوبته ابجي وصوتي كوة يطلع : صلاح عمة الحكني رهام وكعت عليه بالسوك وماجاي تصحى ما ادري شبيهه .

جاوبني بخوف : صدك تحجين عمه شبيهه رهام وين انتوا هسه جايكم ع سريع انتوا وين بس كليلي ؟

_  يمه اهل الرحم ماقصروا واحنه بالطريق رايحين للمستشفى .

_ تمام تمام هسه رايح گبلكم ...
سديت الموبايل منه ورجعت امسح وجهه بيدي
واقرا عليها ايات من القرأن ، بلكي تصحى وهي سودة عليه تغمض وتفتح وذبلانه اسم الله عليها .

بالطريق صلاح خطية كلساع يخابر ويسأل
لحد ماوصلنه هو ماكطع صوته يبين شكد خايف عليها وقلق .

من وصلنا للمستشفى تلكانه من التكسي حضنها وباسها على راسها يحجي وياهه ولاتسمعه ولا تصحى
شالها ونزلها من السيارة بسرعة .
وركض بيها لجوه ، فحصتها الطبيبة قاست ضغطها كالت الضغط هابط ومحتاجة تحاليل بعد .

نوموها بالردهه ،  صحت على السستر سحبت منها دم وشكلتلها مغذي .

وظلت تسألني متزوجة خاف حامل ؟

جاوبتها اي متزوجة ..

اجه صلاح اخذ التحاليل للمختبر وخطية ظل يلووب رايح للمختبر وجاي منه يطمأن عليها ، قريب تخلص المغذي صحت شويه
نظراتها ذبلانة  وتعبانة حيل .

خليت ايدي على كصتها وحجيت وياهه
بنبرة بجي : يمه رهومة شتحسين شون صرتي هسه ؟

ابتسمت ابتسامة بضعف : لا تخافين عليه ماما زينة ان شاءالله .

اجه صلاح جاب التحاليل شافها كاعدة دنك عليها وباسها على راسها وطول البوسة رفع راسه منها وهي مبتسمة اله وتباوع لعيونه بنظرات تعب .

بلهفة حاجاههه شلونج حبيبتي هسه خوفتيني عليج عمري .

هزت راسها تغمض وتفتح لتخاف عليه ماكو شي ان شاءالله .

سألته ها يوم صلاح شونها تحاليلها شطلع عدهه ؟

جاوبني : هسه عمه رايح اوديهم للدكتورة تقراهم ..

كال هيج وطلع واني بقيت يمها ابوس بيهه
شويه واجه مبتسم وظل يبوس بيها وهي خجلانة منه تريد تبتعد عنه .

لزم ايدها يبوس بيدهه واني اسأل بي ها يمه صلاح شطلع عدهه بس كلي ؟

جاوب بلهفة : عمه حامل حامل ..

_ صدك يمه الف مبروك .. دنكت ابوسها بخدودهه ..

هو كمل كلامه كال اي عمة حامل بس حملها ضعيف وعدهه هبوط حاد بالدم والسكري هم نازل .
ان شاءالله باجر نوديهه للدكتورة نسائية 

كلت ان شاءالله .. خلصنه المغذي ورجعنه بيها للبيت واني مايهون عليه اتركهه بقيت يمهه .

ريهام : احس بتعب ودوخة فرحت من طلع تحليلي حامل وصلاح فرحته اكثر مني ، مايعرف شلون يداريني .

نزلني من السيارة وهو شايلني ومددني على الجرباية
ومدد يمي لزم ايدي يبوس بيها ويدلعني .

حسيت نفسي تحسنت شويه كمت ..

سألني ها حبيبتي وين رايحة انت تعبانة ظلي بالفراش .

لا عمري ليظل بالك صرت زينة لازم اكوم اتوضى هسه .

حضني من كتفي وسحبني اله عمري بعده ما اذن من يأذن اني اكولج انت نامي وارتاحي هسه .

لا حبيبي اني اتوضى  قبل الاذان ما انتظر المؤذن يناديني للصلاة للربي اني اروح اتوضى واستعد لصلاتي قبل وقتها .

اخذ راسي وباسه حيييل وباوعلي مبتسم
همس شكد  اجببج رهام اموت عليج خوفتيني  هواي .

لاتخاف حبيبي اني برعاية الله ولن يصيبنا الا ماكتبه الله لنا .

_ عمري حياتي روحي ان شاءالله يصيبج كل الخير والعافية يالعافية واهلها  انتي .

خليت راسي على صدره شويه وبسته بركبته وكمت
هو سندني اجيت اوكع حضني لزمت بي قوي

رفع وجهي لزمه باثنين اديه ويباوعلي بتفحص
بيج شي حبيبتي ارجعج للسرير تنامين خاف مابيج تصلين ؟

غمضت عيوني لحظة سويت تؤ بيه حبيبي الا الصلاة حتى لو اني جنازة لازم اصلي .

ظل يمسح على راسي : اسم الله عليج عمري لأتكولين هيج عليج .

هزيت راسي مبتسمة اله ، واحس بدوخة والدنيا تدور بيه ، فتحت الباب صارت ماما مقابيلي .
كالت ها يوم شون صرتي ؟

ابتسمت الها : لتخافين زينة زينة وهسه راح اتوضى حتى اصلي .

_ يمه مو خاف مابيج توكفين اجليها وارتاحي صليها قضاء ربنا غفور رحيم .

_ لا ماما لا مدام بيه اكوم وامشي ليش اأجلها واصليها قضاء ماضامنة عمري اني .

ماما عاطت اسم الله يوم ليش تكولين هيج وتخوفيني

حسيت بصلاح سحبني اله همس يم اذني حبيبتي
رهام ليش هالحجي هذا .

_ شبيكم هو منو ضامن عمره ومنو يعرف شوكت يموت فدوة لاتخافون ماكو شي ان شاءالله ، ماما روحي ارتاحي حيل تعبتي اليوم ويايه وخفتي عليه حيل وانت حبيبي روح ارتاح هم تعبت ويايه .

جاوب لاعمري ماتركج ولا لحظة لا تحاولين ..

ماما كالت قابل عندي العشرة هو بس انتي يا امي ..

خليت ايدي على زندها لتخافين ماما

اخذني صلاح للمغسلة توضيت ومن دنكت ورفعت راسي جيت اوكع واختل توازني هو لزمني وسندني
ابتسمت بوجهه ابتسامة اطمنه بيها رغم تحب جسدي .

خلصت وضوء واخذني للغرفة ..

...................

وقار....

كعدت من النوم مرعوبه وخايفه استغفرت ربي ورحت للاستقبال ...

لكيت جعفر كاعد وصلاح وجاسر وامي ورضيه ونوال

صبحت عليهم وكعدت علئ القنفه ماما كالت...شبيج مزعووجه

باوعت النوال كلتلها..تحلمت جن فلاح يركض وره نوال هي تركض وهو يركض وراها لازم بطل مال بانزين وجداحه

وهو يكولها اريد احركج مثل ما حاركه كلبي ولج شلون هيج تسوين ولج سوالف خبلني اليوم والله احركج شلون تحركين كلبي و تتزوجين جعفر

وكف جعفر وهو يصيح..الله اكبببر الله اكبر الحمد لله خويه فلاح من حسيت بيه من باجر ثوابك عليه

هي صار وجهه اصفر كالت..وشنو قابل كفرت متزوجه علئ سنة الله ورسوله وبعدين لو اني ميته جان دور اله مره من الثالث مال الفاتحه

كتلهم دخلي اكمل الحلم ...ردوا عليه اي كملي

كملت...جن هي تصييح فدووه واحد منكم يحميني منه تعالو احمووني اجيت اني اركض لزمته واني اتوسل بي فدوه خويه فلاح علئ كيفك وياها والله تزوجت مجبوره

هو دفعني بكل غضب وكال..لحد يدافع الها والله الي يدافع الها احركه وياها..

وكف جعفر مره ثانيه...فدووه اروحلك خوويه ابو حسن كوون حوريه بالجنه مثل الي يحبها كلبك واتزوج اختها واخلص من وجهه الطاوه

هي ما كالت هيج تخبلت ضلت تصيح وتحجي علئ جعفر وجاسر كلها...امشي روحي الغرفتج وانتي اسكتي وانت جعفر انلصم...

سكتت وما كملت الحلم الي جانت نهايتة بيها ضرر اليه لان فلاح من راد يحرك نوال احتركت اني وطفتني خالتي صبرية بس مجان بيه شئ...

اندك الباب راح صلاح فتح الباب اجه كال حضري نفسج اجه جابر وصبريه وعمتي ام جابر...

بدلت بسرعه وغسلت وجهي ومكيجت سلمت عليهن وبعدها رحت لجابر لكيته كاعد لوحده علئ الفنفه ويكلب بموبايله

ابتسمت وهو باوعلي بإعجاب و وكف اني جنت زعلانه منه وما ارد عليه لان هو مره وعدني يجي وما اجه...

وكف واحتضن خصري باسني بخدي واني درت وجهي زعلانه منه ضحك كال...اووويلي الزعلان ابو خشم حلو

ضربته بصدره بدلع...عووفني زعلانه

ضحك بتفاجئ...هلااا وقورة زعلانه لج والله صدمتيني صايره دلوعه وتتزعلين وين الخجل وين المستحه...

باوعت بعيونه وضحكت وهو كرص خدي وتقرب مني واخذ شفايفي بهيام ويلتهمهن برومانسيه عميقه

دك كلبي خجل ورجفه وارتعاش حطيت ايدي علئ صدره وبادلته شوويه وبعدها ابتعدت منه

ضحك وضمني الصدره همست بحيا..فدوه جابر لحد يجي

رد بقهر..ويطبهم مرض خلي يجوون شنو حلالي و بكيفي

سحبني وكعد وكعدني علئ رجليه سحب ايدي المجروحه وباسها حسيت تكهربت كووولش انقهر من ايدي واخجل منها...

ودائما هل ايد تثير مشاعري وتبعثر احساسي نزلن دموعي باسئ وهو تخبل مسح دموعي وباس خدي وشفايفي

همس برعب..شبيج حبيبتي شبييج ليش تبجين

باوعت الايدي وهمست...انت تعطف عليه مو

ضربني بأطراف أصابعه على خدي بخفيف..انجبي اني ما منتبهه لايدج بكد ما منتبه لشفايفج الحلوه

عضيت شفتي بخجل ونزلت عيوني

حرك خشمه علئ خدي برومانسيه وهمس...لا تعضيهن هذن ملكي بس اني اع...

حطيت ايدي علئ شفايفه ...كافي لا تحرجني

ضمني الصدره بقوه وعناد كال...اليوم احرجج واحرك عشيرتج

قرب وجهه من وجهي وهو ديبوسني

اقتحمت الغرفه صبريه كالت بصوت عالي وهي تدخن بجكارتها...هلا هلا انوب حضون وبوس ناموا بعد ناموا

اخليكم بعد ساعتين ابنكم يطلع يتمشئ وياكم

اني كمزت من حضنه وهو وكف بخجل وهو يمسح بوجهه بالكنلكس وحط ايد علئ حلكها يسكته...افضحينه افضحينه بعد...

هي دفعت ايده وباوعتلي كالت...يالله ولج حضري. روحج راح نروح نكص نيشان

طلعت بسرعه وهي ضلت تحجي علئ جابر وهو خله وراح من وراها بس تلعلع...

حضرت نفسي وخلينه وطلعنه اني وامي وعمتي ام جابر وصبرية

لكيت اخووويه جاسر واكف بالباب هو و جابر باوعت الجابر وضحكت وتالي خلينه ورحنه...

...

جابر ..

شلون خجلتني صبريه خليت وطلعت بره

لكيت جاسر واكف بره خليت ورحت وكفت يمه هنه طلعن وقار ابتسمت الي وراحن...

ضلينه واكفين اني وياه وما اشووف اله واحد ثنين بماطور ملثمين

ما اشوف اله الرمي خرطنه خرط والدم طفر علئ قميصي

صرخت بصووت...جاسر

نهاية البارت...يتبع

كونوا انتم كونوا بخير...احبكم 💔

نور سمو العراق😘

لا تنسوا التصويت والمشاركه