البارت الثاني عشر
رواية...جولييت واسرها...غياهب الإنتقام
بقلمي...نور سمو العراق
💔💔💔💔💔💔💔💔💔💔💔
الدمعة وكحه وشرعت باب العيون
وانه شمعه ومن كثر دمعي انطفيت
..................................
اذا مات الضمير ماتت الانسانيه هوايه ناس باعت ضميرها واصلا ما باعته هي ضميرها ميت من زمان وشيعته علئ مشارف الهلاك
انصدمت من الرجال الفقير الي انطه بنته الجاسر مو بس انصدمت لا تزلزلت
يعني شلون يبني بيت بنته علئ خراب بيت ثاني اخاف ما يدري بجاسر متزوج
بس شلون ما يعرف هو مو يخابره يعني اكو واحد ينطي بنته بدون ما يسأل الله اعلم بعد ما اريد اضلمه للرجال مبين فقير ومسالم
حطيت اديه علئ عيوني بتوتر شلون ورطه هسه جويسر يشوف روحه عليه خطبو مدري انطو مره
هو جاسر اني هم هيج صار وياه يعني هماتين ما خطبني امي طلبت منه حتئ،يحميني من اخواني
صاير محامي ابو مريضي
هو الإنسان الي يسوي مواقف ليش الناس تكيف علي وتريده وتبني سعادتها علئ تعاسة غيرها...
بس والله اذا تزوج والله اروح اكعد بالشارع وافضحه فضيحه لا والله اعيش،ويه الچلاب وما اعيش،وياه واتطلك وغصبا عليه و اريد الرجال اليحجي
وهااا ولدي اخذهم ثنينهم لو يموتني لو يدفني،واني عايشه ما انطيهم اله...
اي والله شنو انوب متزوج وجايني هو من غير هيج وهيج شايله رايه عليه مو انوب يتزوج حتئ يركعني مية نعال...
كله بسبب جعفر ما خلاني،اسمع شنو الصار بينهم وشنو جاسر قبل بيها لو لا يبووو بس لا يتزوجها بسر
لان اني محرمته علئ نفسي ولو زغلطت واخذله يوم مني ...
بس ترئ،عادي لان هو من جان محرمني علئ نفسه اخذت يوم منه وهسه هو اخذ يوم مني يعني تعادلنه
هسه شلوون اخاف يتزوج واني،ما ادري واني الثوله ما اعرف اكسبه اليه ابببد
اشوفلي وحده تعلمني بس،منو تعلمني ماما رضيه؟ هي ماما رضيه اصلا مهيوب طاكها بمره ومتزوج عليها
وخالتي صبرية متزوج عليها ابو اللول ...
اوووف منو تعلمني ...ان شاء الله اصير خياطه ويجن النسوان واتعلم منهن
بس هو ما يقبل اخييط هددني ..والله ما يصير هييج كاطع رزقي قطع الاعناق ولا قطع الأرزاق...
دا امشي،وصار بوجهي هاله باوعتلها بحده ودا اتجاوزها وافوت
هي سبحت ايدي كالت...وين جاسر عندي وياه موضوع دسم
اني اول ما حجت هييج عرفت هل موضوع يخص اهلي
لزمتها من ايدها بقووه وشديت علئ،اسناني...اتقي شري هاله وابتعدي عن زوجي
ضحكت باستهزاء...انتي شدخلج والله هل موضوع العندي اخلي يوديج وره الشمس
سحبتها من ايدها ودفعتها دخلتها الغرفتي صكيت علئ اسناني ...انتي شتردين مني ما كفاج الي سويتي
ضحكت بصوت عالي...ليش اني شمسويه ترئ والله لحد الان ممسوي شئ ممسوي الي يشفي،غليلي
باوعتلها بصدمه وحددده حسيت أعصابي تشنجت...لهل درجه مغثوثه مني ولج والله ما غلطانه وياج ورغم كل الي صار بسببج واجيت اول ما تزوجت وكلت خطيه خلي احجي وياها
بس انتي ما تستاهليين ...انتي وحده حاقده وانانيه جنج هذن الساحرات بأفلام الديزني...
ضحكت وصفكت بيدها...انهجم بيتج يا الأميرة سنوايت...
اردفت بغضب...اصحي النفسج انتي مو بس حرمتينب،من حب حياتي انتي هواي شغلات سويتيها ضدي
وكل مشاكلي اجت بسببج انتي،اني انضربت وانهنت من وراج انتي
وخر شعري،من وجهي بعصبية....لا مو بسببي انتي وكعتي بشر افعالج وتستاهلين الاهانه
ابتسمت بسخريه...ترئ محد انهان بكدج وكرامتج انسحلت سحل امج طردتج وتخلت عنج ههه
انوب جاسر طردج واتخلئ عنج وانتي اجيتي النه واحنه هم نخاف علئ ولدنه منج وانتي عندج سوابق فطردناح
غمضت عيوني باسئ كلامها من السياط وتضرب بگلبي ...
تنهدت بوجع .. ميخالف بس اضل عندي كرامه احسن منج واضل املي بربي كبير مو مثلج املج بالشيطان وافعالج شيطانيه
حطت ايدها علئ كتفي كالت...جولي ليش تسوين روحج فقيره و مسكينه رجعي الاصلج افضل
دفعت ايدها بغضب...منو كلج اني،فقيره ومسكينه ترئ الحياة تجارب والدنيا تعلم وتقوي واني لا فقيره ولا مسكينه
رفعت حاجب بغرور...بس ما تكدرين الجاسر السر الي،اكوله اله احتمال احتمال امممم ما اعرف شيسوي بس اكيد يتخبل هههه
رديت عليها بنفس البرود والغرور.... هو زوجي اكيد ما يضرني بس،قسم بالله اذا الموضوع الي ببالي ابالج وصل الجاسر ما تتوقعين شنو الاسوي
جاوبتني بدهشه...هااا يعني تعرفين عاصم ما مات؟
تخللت الفرحه داخل صدري يعني صح كلام جابر عاصم ما مات بس شلوون اريد افهم والله محد ديفهمني شئ...
بس رجعت الخوفي وعصبيتي وتقدمت منها بتهديد...شوفي لج والله اذا نطقتي كلمه ما تلومين اله نفسج
انتي بسببج وبسبب نفاقج وفتنتج هيج صار بينه ولا عبالج ما ادري اخوج هيثم هو الي،دفع عاصم علئ،بيت عمي الشيخ
هزت ايدها بسخريه وهي تضحك...اي مو احنه كلناله روح اكتل هاي شلج بيها عيني،ست جولي
باوعتلها بحده...اني حذرتج وانتي بعد بكيفج والله اخلي عمي يكسر ضهرج والله
وبعدين احنه مو ما نحجي وياكم شكو كل شويه رايحه وجايه شنو انتي ما عندج كرامه لو الإحساس عندج معدووم...
بثت نظراتها الحاقده عليه وتكلمت باحتداد...شوفي اني مجايه عليج اني جايه البيت خالتي ومشتاقه الخالتي ومشتاقه لام سجاوي...
باوعتلها من فووك ليجوه...مدام جايه الخالتج ومشتاقتلها روحي كابلي خالتج واحترمي نفسج واكعدي لا تكعدين تبثين سمج عليه
ضحكت...لا لا جولي اليوم جيتي خصيصا عليج شوفي ياروحي اني زايعه وبايعه وما اعترف باكبر واحد
وخاصه انتي واهلج اكرهكم كره العمئ ترئ،انتو سبب بكوولشي،واني انكتلت وانضربت من وراج ومن وره اهلج
ترئ،ما انسئ اليوم الي انضربت بي انهنت ونسبيت وخطيبي عافني هسه اني ما اريد منج شئ غير طلب،واحد تنفذي وهذا هو كوولشي ينتهي
عقدت حواجبي وجنت منتظره شنو الي تريد تطلبه كلتلها...شنووو؟
تقربت مني وفتحت عيونها بحقد كالت...تطلكين من جاسر وتسافريين يا اما اني اروح واكول الجاسر علئ موضوع عاصم وانتي بعد بكيفج
وثقي بالله لو اهلي يكطعوني تكطع يسووني وذر احجي هل،موضوع احجي اذا ما نفذتي الي طلبته منج...
تقربت منها بغضب...ما انفذ الج الي تردي لو تموتين اني شلون اعووف زوجي واطفالي وبيتي لخاطرج انتي هو انتي شنو اعترف بيج بسوك الفافون
جرت نفس وهي تبتسم...امممم لعد يا بنت عمي اعذريني يعني اني لازم لازم اكول الجاسر وتعرفين اذا كتله عليج تعرفين وضامه عليه وبيت عمه هم السبب شيسوي بيج والله والله يمكن يموتكم
لزمتها من كتفها وطلعتها خارج غرفتي امشي،اطلعي امشي لا بارك الله بيج ولا باصلج
حقيره حيوانه شلون تريد تخرب بيتي وتهدمني اني واطفالي
هو اني مو اجيت العمي وكال اهلج عافووج شلون حيوانه وحقيره ما نرتاح منها العار الحيوانه
هي طلعت بس ناويه علئ الشر وتباوع حتئ للبيت بحقد مبينه ناويه علئ الشر ومو مثل كل مره هل مره زايده وزياده
هي شويه وخلت وطلعت وراحت هي وخالتي،ونوال تبوس،بيها دكولها...الله عليج عيديها ونبي مشتاقتلج
اخذي رقمي وخلينه نتراسل هههههه عندي موضوع وياج ضروري ..
وهاله ترد عليها....هههههه مو اهم من مواضيعي والله عندي اخبار اله بشده
نوال...هههه لا بشرفج راسليني،بسرعه اول ما توصلين الفار لعب بعبي ههههههههههه
هاله باوعتلي وجمدت ملامحها كالت...لا مستحييل هه
حسيت اطرافي جمدت من كلامها اذا حجت النوال حتصير مصيبه لان نوال حيه مسمومه وتريد بس المشاكل
وخاصه عليه تريد بس تحرگ گلبي وتقهرني متت منهن والله
هو جاسر مو كال انشيل ببيت الوحدنه ليش ما يشيلني منا والله اليوم احجي وياه واتعارك وياه شنو هو مو حجه حجايه لازم ينفذها
اني ليش اصير بيد اللطامات وضاله بيد نويله و هويله وين التافهه تتحكم بيه
خلن وراحن وجاسر لسه كاعد ويه ابو زهراء
ياربي والله بلوه شلون ورطه منا نويله وهاله الزباله وانوب طلعلي ابو زهراء صفح يريد يزوجه بنته مو قلة زلم بس جويسر...
كعدت علئ الدرج واني انفخ بضيق ومشمش ومرتضئ يلعبون
جريت نفس والله اذا عرف جاسر اني اعرف وما كتله والله ياخذ مني اطفالي ويطردني
بس خلي يروح هاي مو رجوله منه شنو ياخذ اطفالي والله العب لعب اني اني مو قليلة شر
شفته طلع هو والرجال وهو يضحك وياه ويكوله...ههه لا سهله سهله ان شاء الله ما يصير خاطرك اله طيب...
مسحت وجهي بتوتر اوووف ياربي والله هسه اتعارك وشنو تايهه هي شنو منو اجه وتزوج
شلون ضربتين علئ الراس توجع موضوع عاصم موضوع ابو زهراء...
راح ابجي بس كوه دا اصبر نفسي والله
هو دخل شفته دخل بجبروته المعتاد للغرفته واني طكيتها ركضه وراه
قبل لا يسد الباب دخلت عليه باوعتله وهو باوعلي وابتسم بغرور وفتح باب الغرفه سمحلي ادخل...
ضل يباوعلي من فوك ليجوه ويخترقني بنظرات غامضه وابتسم بخبث
بلل شفايفه ونظراته تخووف تخووف
رد بلهفه...مشتاقلي الحلوو موو ؟
بلعت ريكي بتوتر...لا مو هييج بس اني عندي موضوع وياك والحرمه بشارب الخير ..
انت مو خير اريدك تحل الي مشكلتي...مو بس تحل مشاكل عمامك وكرايبك اني هم محسوبه عليك
تقرب مني وحضن خصري كال...افااا مريتي داخله عندي وما احل مشكلتها والله ازين شاربي بموس مزنجر
ابتسمت بخجل ...شكرا ربي يوفقك
باس شفايفي،بهدوء ورد ببرود...لا ولو ادللي
رجعت خصلة شعري وره اذني بخجل وبلعت ريكي
همست بصعوبه ...اريد اكعد ببيت الوحدي
لزم ايدي وباسها كال...ابشري والج الي تردينه تدللين علئ ابو مرتضئ...
بلعت ريكي الجاف...ما يدلل عليك ضالم اريج بيت لان بصراحه ما اكدر اتحمل بعد والله اسمع كلام يسم البدن ودا اتحمل وابلع واصبر ميصير هيج والله
مسح باصبعه علئ خدي...والله بعيني اكعدج ببيت الوحدج وياج رضيه تكعد بس بشرط المكينه افلشها
ضربته علئ صدره بقبضة ايدي واني اتدلع عليه...لا تصير خبيث ترئ والله فايدتني ومسليتني
تقرب مني وهمس عند شفايفي ببراءه...بس ما احبه
عقدت حواجبي بزعل...ليش،والله مماذيتك بشي كاعده وساكته وحتئ ممعاركتك خوش مكينه ما تدور طلايب
رد بحزم...لا تدور... كاسره ضهر مريتي
تنفست بضيق...ومرتك هي راضيه
باوعلي بلهفه كال...اي البربوك عنوديه
هسع ميخالف عمي،قابل بمكينتج بس ما اريد تشتغلين بيها مجرد تسليه تمام
واذا اسمع بيج مخيطه للجيران لو تشتغلين بيها ترئ والله اشمرج من السطح ولا دكولين جاسر ما كال
ضحكت...لا كلت والله اببد ما اخيط بس النفسي وماما رضيه واصلا خياطي محلوو يلعب النفس الله ينطي ماما رضيه تجبر بحاطري ودكول حلو اله هو خياطي يلعب ستين نفس
ابتسم وحضني...لا حلووو كله حصر وبارز المفاتن
ضربته بدلع...يا مفاتن
حضني...اكلج جوجو خلينه نكثف الشغل حتئ الانتاج يطلع حلو شنو راييج ؟
سحب نفسي بحياء...لا لا كافي عليه التوم مالتك وانوب مو تريد تتزوج بنت هطا الرجال الفقير انت عود صاير لوتي تلعب علئ الحبلين
رفع حاجب...لا بشرفج واني جايبلي عله علئ،كلبي لا عمي لاا شمرتها علئ رائد رضا خووش ولد وسبع وزلمه حووك خلي،ياخذها...
ابتسمت...مبروك عليها
رجع حضني وتقدم مني خطوات وعض شفته بفخر كال...شفتي شلون خطابتي تركع كلها صارت تنطيني نسوان ههه طلعت مرغوب
رفعت حاجب بغرور...نفس خطابتي من خطبوني اوووف لو قابله جان هسه اني،بتركيا ولابسه قبعه و واكفه علئ جسر إسطنبول....
لزم ايدي بقووه ...اشك حلكه الي،يتقرب منج انتي بس الج
تنفست بصعوبه ...تغاااار
ضحك بغرور....والله يا جكليته الي ميغار علئ حرمته خنزير ومو رجال...
نزلت عيوني بارتباك...شكرا
جر نفس ورجع باسني بخدي كال...جولي اني...
فتح الباب مرتضئ ومجتبئ،وهم يصيحون كل واحد يريد يدخل قبل الثاني المضارب بينهم
ومرتضئ يصيح...سكييته امت اددت..« جكليته امج اجت »
ومجتبئ يدفع بي،يكوله..نعله ابوووك اني ادله أمها ادت..« نعله علئ،ابوك اني،اكولها امها ااجت »
قطعوا كلام جاسر وكلامهم اثر بيه ...صدك امي اجت اووويلي يمه ويينج والله اشتاقيت وانصهر گلبي عليج
حسيت بداخلي حنين مشتعل مثل النيران المتوجره
صدك سلبو عقلي،وجسمي بس قلبي لحد الان يحن الامي ...وبكل لحظه بيها اصرخ اريد امي اي والله اريد امي...
احس انرفعت المشانق الاعدامي والله دا اتعذب من تنذكر كلمة ام...
مرتضئ وكف مقابيلي كال...امت طبريه ادت ..« امج صبرية اجت »
مسحت دموعي واني،ابتسم...خالتي صبريه اجت فدوه الكلبها
جاسر شالهم كلهم...ادري بويه شبيكم تخبلتوا تسبون بيه تتعاركون بينكم
ولكم شنو اني تايهه الكم ترئ والله وراي امكم تطيح حضكم
رد عليه مرتضئ...هلاوو والله عفهاا حييل
ضربه مجتبئ علئ ايده...انسب والله ما عف ماما...« انجب والله ما تعض ماما »
ذاك عاااط...عاااااا قكاني « طكاني » اليوم اموته
هو كعد يهدي بيهم ويلعب بيهم وصاحبهم بينهم...لان متزاعلين
طلعت لكيت خاله صبريه جايه حضنتها وبوستها هي خطيه ممخليه شئ مجايبته وياها
كالت...الدويج بس لا ذبحه جويسر
ضحكت...لا بعده خاله موجود فووك بنيه اله طابق ثالث وحنزوجه ومعزومه علئ،عرسه هههههه
ضربتني وهي تضحك...ههههه دهر فرج كوون ولج شلون هل ديج يتزوج گبل گنوش هي فالتوه كلمن اله لا يمه لا نزوج كنوش وبعدها عود نفكر بدويجكم
واردفت بضحكه...هسه دويجكم يعرس،علئ رضيه و لو هاي نويله بعدها ما متزوجه هم جاا هم زوجناها اله وخليناهن صار شرايج ههههه
ضحكت بصوت عالي....ههههه والله يا خاله عليج سوالف تموت ضحك
ابتسمت كالت...والله ضال هيج لا مره ولا بطيخ
ضلينه نضحك واني سولفت الها كلتلها حطلع ببيت الوحدي
هي خطيه كيفت كالت...اي يمه اطلعي افضلج ولا تضلين تحت كتر النسوان انتي،يتيمه وذن ياكلنج لحم ويذبنج عظم...
........................
شهد...
طلعت من غرفتي شفت جعفر بوجهي باوعتله بحده وخليت ومشيت دا اروح للمطبخ
لكيت سجئ دتلعب بالموبايل وتضحك ومن شافتني بسرعه غلقت موبايلها وسكتت
وضلت تباوع اليه بارتباك وبعدها خلت وراحت اني تفاجئت منها هاي شبيها البنيه مو طبيعية
عفتها ما اهتميت الها وشويه ورجعت عليه كالت...اكولج اشو انتي قبل شويه تباوعيلي وتخزرين بيه شنوو عيني ليكون شاكه بيه واني ما اعرف
تنهدت بضيق...واني،شدخلني،بيج حييبتي روحي شنو تسوين سووي،قابل بنت عمج بنت خالج
تصاحبين تحبين شدخلني بييج ...
هو فتحت عيونها بعصبية وصدمه وضلت تعييط ...انجبي حقيييره حيووووانه اني مو مثلج اصاحب واحب والله والله اله اكوول الامي عليج
انتي ام الولد
كلها اجت تركض علئ صوتها واني انصدمت منها هاي شبيها اني شنو حجيت وياها وكبت عليه هيج كبه
كلتلها بارتباك وغضب...شبييج لج هو منو حاجي وياج انتي مخبله لو شنو
هي باوعت الجعفر وهي تبجي...عمووو عموو شوفها شلون تغلط عليه وتشك بيه وتفشر عليه دكول انتي ام الولد وتصاحبين
مدت موبايلها...عمو هذا موبايلي وفتشو وشوفوا اذا عندي صاحب او لا هي تصاحب وهي ام الولد وكلمن يشوف الناس بعين طبعه
عاد هو تخبل لزم موبايلها وشمره فلشه تفلش وهجم عليه راد يضربني
بس لزمنه امه وماما رضيه وهو يسب،ويغلط ويتهدد عليه
اني صدك تخبلت كتله بغضب ونحيب...انت تتهدد عليه والله والله ما اضل عندك دقيقه
شمرت الصحن وكسرته حييل وصرخت بصوت عالي والله اروح الاهلي وتطلكني وغصبا ما علييك
كال بغضب عارم...انتي طاالق طالق
ديكول للمره الثالثه طالق بس ماما رضيه لزما حلكه وما خلته يحجي،
اني بعد من طلكني تخبلت وشفت نوال تتبسم وفرحانه
حققت غايتها هي،وبنتها
عاد اني تخبلت ضليت افشر واغلط عليها وهو اجه صلاح اخذه وضل يرزل بي ويغلط عليه
رحت الغرفتي،اخذت الذهب وكل ملابسي،ولبست صايتي،وطلعت وحتئ الجنسيه وشهادة الجنسية ما خليت شئ...
متخبل صاير وحش عليه والله مو ذاك جعفر لا هذا مو جعفر جعفر جان يحبني يموت عليه هذا متخبل
هاي وجهه الطاوه مدري شسوت اله وهاي،مرة ابويه تعاركت ويايه اني،وين اروح بهل حاله
الما عندها حزام ظهر تنذل ...الله يساعد جولييت واني،بعد اردئ من جولييت علئ،الاقل جولي زوجها سبع مو مثل جعفر تقشمره وجهه الطاوه
بس والله جعفر جان من تحجي،كلام يطيح حضه وينعل سلفه سلفاها هسه تفرعنت عليه
والله جان يسحلها كل سحله هسه مدري شبي،واكف الها سيف،ودركه بعد ما جان دايسها دووس
خليت ورحت الاهلي تلكتني زوجة ابويه ما حجت ويايه ابد بس،ضاجت
واني طلعت الها باوعتلها بغضب كلتلها.. ترئ،تطلكت احسبو احسابكم
هي تخبلت ضلت تغلط وتفشر وتسب عاد اني قفلت الغرفه وكعدت خلي تولي البيه مكفيني وزايد....
............................
وقار...
كنت كاعده بغرفتي واني اكتب بمذكرتي بالموبايل
احبك في زمان الخوف والغربه ...احبك رغم احزاني،ورغم ظروفنا الصعبه...
دخل للغرفه بسرعه طلعت من الذاكره وقفلت الموبايل هو راح دخل للحمام...
اتبعته بنظراتي لحد ما وصل لباب الحمام...
جريت نفس...هو اجه عمو رجعني من جنت زعلانه بس عادي دخلت الغرفتي وما صار بيني وبين جابر اي شئ
وهو ما بادر اني هاي اخر فرصه حتكون واذا ما شفت ردة فعله حلوه بصراحه ارجع اللهلي واطلب من جاسر اخويه يطلكني لان هاي مو حاله
شدعوه هل بروود اذا ميحبني،شكو يرجعني
طلع من الحمام لابس،بجامه رصاصيه وبدون قميص عاري الصدر وينشف بشعره وكف علئ المرايه وباوعلي من خلالها
ابتسم واني نزلت راسي بسرعه شمر الخاولي علئ القنفه وتقرب مني خطوات بسيطة
حسيت بخياله خيم عليه جر نفس ودنك باس راسي وبعدها كعد بصفي واحتضني
همس عند اذني بعذاب...شلونج حبيبتي
باوعتله ببتسامه وهمست بهدوء...الحمد لله زينه ..والحمد لله علئ سلامتك...
ضحك وتنهد بلهفه سحبني الحضنه كال...وقار اني احبببج والله ترئ لا عبالج ما احبج والله والله قسما بذات الله احببج واموت عليج
وانتي،ما تعرفين من زعلتي وضليتي عند اهلج شلون تبهذلت وتاذيت اني رجال تعلمت عليج
تصدكين غرفتي ما صرت ادخل الها لان فارغه من دونج وبارده ما بيها اي حياة
لزم ايدي المعاقه وخلاها علئ صدره كال...انتي صرتي وتربعتي بهل مكان ومن زمان مو من هسه
ترئ،واني،من اول ما شبيت ومن اول ما انتي انفجر عليج الساحق حسيت بروحي تعذبت عليج وانتي بالمستشفئ
وكلت هاي بنت عمي الي ما تصير الغيري
وبيها انتي اختفيتي عن الأنظار واني جنت اتمنئ بس اشوفج شكد اجي وشكد ادخل عليكم ما شفتج بعد اببد اعتزلتي عن العالم وعن الناس
واني انطيت النفسي وعد انتي الي مو الغيري وحتئ من عرفت انتي انخطبتي لابن خالي داوود ضجت وحجيت بس كلت يمكن البنيه فرحانه وقابله ما اريد اكسرها
وجان اسعد يم عندي مم يوم الي نهيت عليج بي واخذت باحضاني
ابتسمت ومسحت دموعي بعذاب
هو جر نفس ومسح دموعي وحضني كال...اششش لا تبجين والله دموعج يزيدن عذابي
شهكت من البجي...لا جابر اني والله احببك بس اريد اهتمام منك اريد احس اني زوجتك
رفع ايدي وباسها كال...انتي مرتي وحبيبتي وبنت عمي،اخليج علئ،راسي والله احببج لا تضلين تسمعين لكلام الناس،ترئ كلام الناس يخرب
نزلت راسي...لا هذا هو والله ان شاء الله بعد ما اسمع
ضحك كال...اي حبي ان شاء الله هذا الاسبوع كلنه نروح لكربلاء وان شاء الله نروح اني،وياج وامي واهلج هم يرحون...
حضنته حييل...اي والله مشتاقه اروح الكربلاء
رفع راسي وباسني حييل كال..والله نروح هذا الأسبوع....
سحبني نومني،بحضنه وضل يسولف ويايه ويلعب بشعري وكل شويه ويبوسني،ويحضني
اني والله حييل حييل احب جابر امووت عليه...
.......................
ريهام...
صرت شويه زينه يعني حالتي الصحيه تحسنت بس المرض لحد الان ياكل بجسمي...
صلاح كال ...اليوم نروح الكربلاء ونبات هناك
خطيه البنات ما قصرن حضرن اكل سون دولمه وكباب وكبه يعني كوولشي وفاكهه
هو جاسر ياخذ عائلته وماما رضيه واحنه نروح ناخذ عمتي ام فلاح وجابر ياخذ امي وياخذ صبريه وياه
يعني احنه نروح عائله كامله بس جعفر ما يروح نوال دكوله نروح الوحدنه
وصدك الولد تخبلو من عرفوا بي طلك شهد رزلوا وطيحوا حضه بس هو عديم الإحساس ما اهتم للكلام
انوب ضل يصيح اجه جاسر يكتله بس لزمته عمتي وماما وصلاح كلوله خلي يولي هو مدري شبي متخبل
تقريبا صارت الساعه بالخمسه العصر طلعنه كووولنه بسياراتنه
بس قبل لا نطلع جابر وصلاح اتفقوا ويه جاسر هو يطلع كدامهم وهم وراه
لان جاسر يندل الطريق وصلاح ما يندل وجابر خطيه جان بالدوام ومنعس ما نايم فدايخ
فطلبوا من جاسر هو يسوق وهو وراه
احنه طلعنه وهو كدامنه جهاله الكاع ما تجرعهم مطلعين روسهم من الجام يصيحون ...عمووو سابر
طلاح اعببببك خابصين الامه خبص
شويه وجاسر طاااار نريد نلحك بي ما نكدر صلاح ضل يحجي كال...هذا يحجي صدك ادري عدنا سباق هسه اريد الحكه ماكو
ضل يتصل بي وجاسر ما يجاوب
وجابر اتصل بصلاح كله...تعال ولك جابر اني نظري قليل وما اشوف يحجي صدك جاسر اريد الحك بي ماكو...
شفنه جاسر وكف يم حمامات بالطريق واحنه كوه لحكنه بي ووصلنه
من نزلنه كلنه كله صلاح...جاسر صدك تحجي ادري شكد تمشي احنه مو كلنالك احنه ما نشوف احنه ما نندل وانت دليلنا شلون هييج تطيير واحنه نركض وراك...
رد بتكذيب وصدمه...عمي ولا ماشئ امشي سبعين
جاوبه صلاح بغضب...جاسر تضحك علينه شنو سبعين ؟
رجع جاوب ببرود...لا ثمانين
جابر بعصبية...شنو جاسر شنو ثمانين
جاسر...تسعيين
صلاح ضحك وهز ايده...هو اني امشي ميه يا تسعين يعني اني مزيد السرعه وانت اسرع مني
جولييت ردت بفهاوه...لا ستيين
رد عليها جاسر بضحكه...هههههاي لا جولييت مو هييج ادري سلحفاه شنو
اردف وهو يحك بركبته...لا بصراحه فوك الميه
صلاح بقهر...اي ادري بييك جاسر الله عليك لا تمشي هيج اني ما اندل وجابر منعس مدري ميشوف لا نروح نسوي حادث
جر نفس ...مو اني رجال حااار ما احب الفهاوه اريد اوصل بسرعه
بس والله راح امشي علئ،كيف ولو اني ما ماشي ماشي علئ كيف بس،هي سيارتي لان حديثه هيج تمشي
هي السبب مو اني
ردت عليه صبريه ..اي انت فقير كنوش ياكل عشاك وما تحجي
ضلينه نضحك وبعدها النسوان الكبار دخلت للحمامات..
وبعدها رجعنه انطلقنا الارض الأحرار ارض كربلاء المقدسه
جانت روحي تناجي رب العالمين بايمان يارب اني متوجهه اليك نبيك نبي الرحمه يارب اقسم عليك بعليل كربلاء يارب اطلب الشفاء منك انت طبيبي يااارب
واني قسمت عليك بالأنبياء والمرسلين والائمه المعصومين واملي ياربي بييك كبيير ...
وصلنه الكربلاء وكانت القلوب عبراء والدموع حيرا دموعي تنزل بدون سابق انذار واني اتوسل برب العالمين واتوجهت بالامام عليه السلام ...
ضليت واكفه ما اكدر اتوجهه للقبر او للشباك لان جان ازدحام حييل حسيت بروجه اخذتني اخذتني ومدافع مال نسوان وما شفت نفسي اله لاصقه بالشباك
جانت فرحتي ما تنوصف لزمت الشباك وغمضت عيوني براحه وبجيت بقلب،محروگ واني اتوسل بربي واتقرب الامام الهدئ،واطلب الشفاء النفسي...
حسيت بنسمه بارده تخللت الداخل اعظامي وانعشت روحي
رحت اني والبنات صليت جولييت و وقار جانن يصلن ورحنه زرنه ابو فاضل عليه السلام...
اني سجدت...اللهم لك سجدت وبك آمنت ولك اسلمت سجد وجهي للذي خلقه وصوره وشق سمعه وبصره بحوله وقوته تبارك الله احسن الخالقين
سبحانك اللهم ربنا وبحمدك اللهم اغفر لي ...
ضليت ابجي ابجي منا لمن انقطعت انفاسي تعبت ونمت علئ،الارض واني اباوع للناس بحزن
اجت امي وغطتني برايه خضره باوعت الها وابتسمت بحزن...الله يساعد امي اني،دا اموت كدامها واذبل وهي دتموت عليه ومبين الحزن علئ عيونها...
نمت واني متغطيه بالرايه كعدتني حولييت كالت...حبيبتي رهومه كوومي حنتعشه
ابتسمت واني لابسه الرايه وخلينه وطلعنه رخنه للحسينيه صبينه الاكل جانت الزياره كوووولش حلوه وتونسنه حييل جنه كوولنه مجتمعين ونضحك ونسولف جمعه حلوه يااارب يديمها...
وبعدها صلينه صلاة الفجر ورحنه البيتنه واني جنت نايمه بالسياره
اتحملت جن اجاني واحد لابس ابييض وانطاني عشرة آلف وضربني علئ ظهري بعوجيه صرخت من الضربه وفزيت فزة كوولش جنت مرعوبه...
حطيت ايدي علئ ضهري وباوعت الايدي تنهدت حلم عبالي صدك بيدي عشره
رجعنه للبيت واني ذبيت نفسي مثل الميته ونمت مرتاحه لاول مره بس احس بوجع مو طبيعي بضهري...
..........................
جولييت...
رجعنه من الزياره كووولش تونسنه جانت زياره من العمر
وجاسر ابد ما قصر ويانه خطيه ما خله شئ مجابه الي،والاطفالي هو الطلعه وياه حلو مو معقد بالطلعه ابد بالعكس يضحك ويسولف ويتشاقه شئ حلو
رجعنه جانت الامور طبيعيه بس نوال متخبله شلون رحنه للزياره وهي ما راحت
اخذت جعفر ثاني يوم وبناتها ومدري وين راحو اجوا باليل
بس هي مستمره اتصالات ويه هاله انوب تباوعلي تتمضحك مدري شبيها
حسيت كلتلها ان عاصم ممات بس جنت مستبعده هل شئ يعني اكول مو هلكد حقيره حتئ هيج تسوي ما جنت ادري بيها جربوع وعندها لسان حيه...
دخل جاسر باوعلي كال...حضري نفسج بسرعه عندي الج مفاجأة
استغربت مفاجئة شنووو؟
هماتين بدلت واخذت اطفالي ورحت وياه ركبنه بالسياره وهو خلصها يخابر ويسولف ويخطط ومدري شنو...
وصلنه علئ منطقه حلوه نوعا مااا وكف عند بيت نزلنه يمه هو فتح القفل مالته ودخلنه جوه
ابتسمت بفرحه عارمه من عرفت هذا البيت النه واخيرا حنستقل بي ونرتاح ...
اطفالي عبالك مشايفيين هجموا علئ البيت ويلعبوون
وجاسر سحب ايدي وهو يشوفني بالبيت ويكولي هذا مطبخ هذا المطبخ ما تدخليله خاف تموعين
ضحكت...هههه لا مو لهلدرجه
شوفني كل البيت وبعدها صعدنه للطابق الثاني غرفة النووم
جان بيها شباك طووويل علئ،طول الغرفه وكفت عليه وهو حضن خصري وباس كتفي كال...هذا الشباك ادرامي نوكف عليه ونتحاضن ووو
حطيت ايدي علئ شفايفه واني خجلانه...اوووه كافي لا تتخبل عليه عيب
رفع حاجب...لا لا ترئ،ما طلبت استقل ببيت الوحدي اله اريد اخذ راحتي رجال محروم مظلوم ومسلوب حقي،وتره اشووور
درت وجهي بمرح...والله انت تصرفاتك وو وانت محرم نفسك محد جبرك فلا تتراجع
لزم وجهي حييل كال...دنطيني بوسه بعد خالج
غطيت وجهي باديه...ماااا
ضحك ونزل اديه وناسني وهو حاضني تفاعلت وياه شويه واني ابلع بريكي
ابتعدت بسرعه ونزلت اركض هو صاح عليه...وين ولج ام اللسان...
رديت عليه...اءءء دا اروح اشوف مجتبئ ومرتضئ لا انوب يحركون البيت ونوال دكول حوبتي هههه
نزلت واني كلبي يدك يدك سرريع حطيت اديه علئ شفايفي وتنفسي ضاق
ضليت العب اني ومجتبئ ومرتضئ بالحديقه وهم يصيحون عليه...سكيته حلوه سكيته حلوه
بعدها خلينه ورجعنه واكلنه مووطه هو جابلنه
وصلنه للبيت ونوال حاده أسنانها علينه هو كال لامه اني اريد اطلع ببيت الوحدي واشتريت بيت وان شاء الله هل اسبوع اشييل
جان هي نوال دخلت كلتله بغضب وصياح...جااااسر انت شلون تستقر وكتال اهلك بعده يسرح ويمرح
نهاية البارت...يتبع
كونوا انتم كونوا بخير...احبكم 💔
نور سمو العراق 😘
بنات لسه الراوتر عطلان وهسه اجه زوجي وكنكت عليه والله والنت ضعيف
حتئ الماسنجر ما يفتح عندي 😥😥😥😥
كلها مكنكه علئ الرصيد بس اني مظلومه محرومه مثل جويسر ...
بنات اريد منكم دعوووه صادقه لاهلي من كل قلبكم كون يتغلبون علئ اعدائهم وحقهم يرجع الهم علئ حق ان شاء مو علئ الباطل طلب منكم ادعولنه فدوه 💔💔💔💔
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!