رواية جت تعلمني الغرام وجيت أعلمها القصيد رحلت كلي حب وراحت أعظم شاعرة الفصل السادس والعشرون 26 - بقلم HaboOoshy

  كل ما شفتك حبيبي كل حالي يختلف
بسمتي نظرة عيوني فرحتي ما تنوصف

لا لمست كفك أيديني ولا جت عينك في عيني
حس قلبي آهـ يا قلبي بين ضلوعي يرتجف وأختلف
الحيا خلاني اخبي كل إحساسي في قلبي
أعشقك والله وربي ما أحد بحالي عرف
صار همي في حياتي أني أتنكر لذاتي
وأصبحت كل أمنياتي إني أشوفك لو صدف

وأختلف لا لمست كفك أيديني ولا جت عينك في عيني
حس قلبي آهـ يا قلبي بين ضلوعي يرتجف وأختلف

مرت سنيني وحالي تاه في سهد الليالي
مع إن العمر غالي باعني وعندك وقف
عشت أحلامي الحقيقة عشتها لحظة ودقيقه
ولو لقى قلبي طريقة أني أشوفك أنكسف !!

وأختلف لا لمست كفك أيديني ولا جت عينك في عيني
حس قلبي آهـ يا قلبي بين ضلوعي يرتجف وأختلف  

يوم الزواج ..
الساعه 1 الظهر
جالسة في غرفة رنا , ما نامت أمس في غرفتها ..
شيهانة بملل ناظرت في رنا : قومي.. رناااا ... قومي
رنا فتحت عيونها بنعاس : وش .. وش
شيهانة وقّفت متوجهه لـ سرير رنا : الساعه وحده الظهر
رنا رفعت راسها وهي تقول : حتى لو قمنا وين بنروح العلّة موضي جايبه ناس يشتغلون تحت عشان الزواج
شيهانة جلست على طرف السرير وهي تهز طرف رجلها , يالله ما توقّعت بيكون اليوم صعب من بدايته ..
وقّفت وهي تدور في الـغرفة , لفّت على رنا وهي تقول : رنا قومي نطلع ..
رنا ناظرت فيها , وهي عارفة كيف أحساس شيهانة بيكون : أوكي .. نطلع ليش لا
شيهانة ناظرت في رنا : لا خلاص .. خلاص
رنا جلست على الـسرير وهي تقول : بنت حددي موقف لو سمحتي ..
شيهانة ناظرت في رنا , وبعيون يبان فيه لمحة حزن : وش أسوي يعني
رنا ناظرت في شيهانة : موب قلت لك يا شيهانة بتحبينه
شيهانة جلست على الـكنبه , وهي تنزّل راسها وحط يدينها عليه : موب وقته
وقّفت رنا وهي تقول : قومي .. عندي دعاية لـ مطعم بسويها اليوم
شيهانة وقّفت وهي تقول : مالي خلق .. بروح غرتفي
رنا ناظرت فيها : بأجلها لـ بكرة عشان تروحين معي
شيهانة وهي تتوجهه لـ الباب : اوكي ..
طلعت شيهانة من الـغرفة , توجهت لـ غرفتها , بس قبل لا تدخلها
لفت وتوجهت لـ غرفة ميسا
فتحت الباب وهي تقول : الـسلام ..
ميسا أبتسمت : ما بغيتي تزورين
شيهانة توجّهت لها , باست خدّها وهي تقول : أمس جيت , و جلست أرتب الاشياء ما امداني
ميسا أبتسمت : سألت صقر عند قبل يمكن لا يسافر .. خفت يكون فيه شس بينكم
شيهانة ضحكت وهي تقول : لا أبشرك مافيه شي و الدليل أني جالسه و موضي بتسوي العرس هنا
ميسا وقّفت وهي تقول : عطيني روبي
شيهانة مدّت روبها لها ..
شيهانة وقّفت : وين بتروحين
ميسا مسكت يد شيهانة : تعالي نتمشى في البيت شوي
شيهانة بـ أستغراب : ليه ..أقصد أوكي
أبتسمت ميسا وهي تقول : أستغربتي ..
شيهانة مسكت يدها و طلعوا برا الـغرفة ..
ميسا توجهت لـ الدرج , ناظرت قدّامها وهي تقول : أوصفي لي وش مسويه موضي
شيهانة أبتسمت بسخريه : وش اللي ما سوّته , الجدران كلها ورود جوري بيضا , و الدرج حطي يدك عليه , ماليته ورود , أضاءه في كل مكان , لا و أبشرك حاطة كوشه ..
ميسا مسكت يدين شيهانة : أبغى أجلس معك اليوم
شيهانة أبتسمت : تبين تخففين عني ؟
ميسا هزّت راسها بالأجابه : لو شوي ..
شيهانة ضمّت ميسا وهي تقول : والله العظيم .. فجأة دخلتي قلبي ما أعرف كيف
ميسا وهي تبادل شيهانة الـضمّة : وش أقول أنا ؟
لينا طلعت وهي تناظر , لفّت على رنا وهي تقول : تشوفين
رنا ناظرت في لينا بـ نوع خفيف من الذهول : وش طلّعها
ميسا فكّت شيهانة وهي تقول : أسمع صوت خواتي ..
شيهانة لفّت عليهم : موجودين
لينا توجّهت لـ ميسا بفرح : تعالي أجلسي معنا
شيهانة بـ أبتسامة : بتجلس معي ..
ميسا تحسست وجهه شيهانة وهي تقول : لا تبينين لـ الناس حزنك لو فيك حزن يا شيهانة .. موضي .. بتنبسط بـ حزنك , أفرحي لو في قلبك أحزان العالم , عشان تحزنين من يبي يحزّنك
رنا بـ أبتسامة خبث : وانا اقول كذا .. لينا وش رايك ؟
لينا بـ نفس الأبتسامة : يمه لا تكونين تفكرين باللي أفكر فيه
شيهانة ناظرت فيهم : وش تفكرون
رنا بحماس : خلينا ننزل , و نرقص و ننبسط وناكل ولا علينا من أحد
شيهانة شهقت بصوت مسموع : أنجنيتي
لينا : تكفين شيهانة .. والله أن حركتك هذي بتجنن موضؤ
شيهانة هزت راسها بالنفي : لا .. مستحيل
ميسا بـ نفس الأبتسامة : بالعكس .. ليش لا ..
شيهانة : بس ذي موب حركاتي
ميسا وهي تبتسم : هذي موب حركاتك , لكن هذا رد على حركاتهم , يعني تردين عليه بـ أسلوبهم
شيهانة بتفكير : مدري
رنا : بننزل ..
لينا بحماس : بنزل .. و بنرقص ..
شيهانة توجهت لـ الصالة , ولينا مسكت يد ميسا , جلسوا
شيهانة نزّلت نظرها لـ جوالها , أبتسمت وهي تقول : بدوا يتصلون
لينا : من
شيهانة وهي تنزل جوالها : قوت .. وعادل .. كل واحد يتصل ..
رنا : يا عمري يبون يخففون عنك شوي
شيهانة وهي ترد على قوت : هلا ... بخير .... في البيت .... لا ما يحتاج .. قوت أبغى منك خدمة .... أدخلي غرفتي وجيبي لي أي فستان تحسينه حلو ............ لا تصارخين شوي شوي ............ طيب تعالي أنتي و الفستان ..... الفتسان أهمّ منك .... باي
شيهانة وهي تبتسم : بتذبحني .. قرت أفكاري
لينا ناظرت في شيهانة : بتجي ؟
شيهانة هزّت راسها : بتجي ..
رفعت جوالها من جديد شيهانة وهي تبتسم : عادل ..
ردّت : هلا حبيبي .... بخير أنت وشلونك ......الحمدلله
نزّلت نظرها لـ الجوال بعدها رفعته : رقمك سعودي ..... وش فيك .. أنت وينك .......... آآآآآآآآآآآه .. مجنون أنت ..... ياربي هالعايلة كلها بتجنني .... بخير ..... ما يحتاج نطلع والله ..... حبيبي أنت .... بتحضر زواج خالك ؟ .... عادي احضره يا عادل ما تفرق معي والله ......... براحتك .. فمان الله
رنا : بيحضر العرس ؟
شيهانة هزّت راسها بالنفي : لا ..
فجأة دخلت عليهم موضي وهي تلولش : لا اله الا الله ... وفي عين كل حسود ألف من ذكر الله
ميسا لفّت أتجاه الـصوت , بعدها صدّت بوجهها
موضي تكتفت وهي تقول : ماشاءلله حتى الـجربوعه اللي ما تطلع من جحرها طلّعتيها
رنا ناظرت في موضي : موضي .. أكفينا من شرك شوي ..
موضي لفّت بظهرها وهي تقول : موب جايه لكم أنا .. جايه لـ العرس
نقزت شيهانة سرعه وهي تتوجهه لـ الغرفه : قولي لي وش تبين وانا أقوله
موضي : وخري بـ ادخل أقومه
شيهانة ناظرت فيها : أنا أدخل و أقومه ...
فتحت شيهانة باب الغرفة , دخلت وهي تسكّر الباب
ناظرت اتجاه السرير , قرّبت من صقر ..
نايم ولا في باله شي , جلست في الجهة اليسرى , قريبه من صقر ,وهي تناظر فيه , بكره بينام جمب وحده ثانية , وحده بتنسيه شيهانة و عنادها و أسلوبها وكل شي فيها
حطّت يدها على ذراعه , وهي تناظر فيه , اليوم بيحق لـ ليال تلمسه وما أحد يقول لها شي , بيحق لها تتكلم معه , بيحق لها أشياء كثير .. دخّلت يدها في شعره , وش بيصير بكره , آه .. بكره ..
فتح عيونه بنعاس تام , لف عليها وهو يقول بـ أستغراب : وش فيك
شيهانة طلّعت يدها من شعره : ولا شي ..
جلس على السرير وهو يقول : الـساعه كم
شيهانة وقّفت بسرعه وهي تقول : صقر .. أرجع نام .. عادي الوقت يعني .. أرجع نام
من كثر ماهي تحس بـ وجع بـسبب زواجة , تحاول تسوي أشياء بسيطة ممكن أنها تأثر على الزواج بوجهه نظرها , مثل ما أنها تبي صقر ينام بعد , عشان يتعب من النوم الكثير , ويخرب يوم الزواج عليه
صقر وقّف وهو يقول : تأخرت ..
شيهانة ناظرت فيه : على وش ..
صقر ناظر فيها : على الـمكتب
شيهانة جلست على الـكرسي وهي تبتسم له : كويس ..
دخل لـ دورات المياة , طلعت وهو يناظر في وجهه في المراية
شيهانة وقّفت وهي تقول : ترى ما يحتاج تتضبط ..
لف عليها صقر وهو يناظر فيها , صد بوجهه وهو يقول : من قالك أني أبي أتضبط ..
شيهانة بـ اصرار : طيب ليه قايم الحين أرجع نام
صقر توجهه لـ دولابه , أخذ ثوبه و لبسه
شيهانة مسك يد صقر وهي تقول : صقر .. نام تكفى ..
لف عليها صقر , ناظر فيها وهو يقول بصدق : ودي أنام ولا أقوم الا بكره
شيهانة توجهت لـ السرير جلست عليه , وهي تناظر في صقر : واضح ..
صقر لف عليها وهو يرفع حاجبه : تكذبينني ؟
شيهانة رفعت كتفوها : وش يعرفني أنا باللي في نفسك .. الله بس يعلم اللي في الـنفوس
صقر ناظر فيها : أنا طالع ..
شيهانة تتبعت صقر لـحد ما طلع ..
نطلت نفسها على الـسرير من جديد , وهي تفكر , أيام قبل يوم كانت تقسم وتجزم أنها مستحيل تحبّه , صقر أناني , ما علّقها فيه الا بعد ما تزوج
دخّلت يدها في شعرها , يمكن قاصد أنه ينتقم منها , بهذي الـطريقة ..لكن لا صقر ماهو من هالنوع أبد .. جلست على الـسرير , ضربت قلبها بقوة وهي تقول : خلاص .. خلاص .. أهدى ..
أخذت نفس , توجهت لـ دورات المياة تروّشت
طلعت من دورات المياة , تفكّر , تفكّر .. اللي يوضح لها , أن صقر من حركاته بادي يحبها , أو بالأصح حبّها , يعني هي بكذا تكون متساوية مع ليال في نقاط المقارنة اللي قارنتها فيها , بس كيف تستغل حب صقر لها لـ صالحها , قلبت تفكيرها , عصف ذهني فضيع
بعدها أبتسمت بـ رضى عن تفكيرها , صلّت العصر
وماهي الا دقايق الا قوت تتصل , خلّت الخدامة تفتح لها , وجابتها لـ غرفتها 

قوت وهي تناظر في شيهانة : هذا فستانك .. شيليه يا مجنونه
شيهانة أبتسمت : تعالي سوي شعري ..
قوت فصخت عبايتها : أرتيريه أبوك ..
شيهانة جلست على الـكرسي وهي تقول : قوت .. تتوقعين صقر بيحب ليال ؟
قوت ناظرت فيها : وانا وش عرفني فيهم ..
شيهانة لفّت على قوت : هو يحبني , بس ..يصير الرجال يحب ثانية
قوت تكتفت وهي تقول : والله هو الوضع الطبيعي لا , بس هنا بقدرة قادر يقدر يحب 10 في وقت واحد
شيهانة ناظرت فيها : أنا جايبتك ترحيني ولا تروعينني
قوت أبتسمت : امزح .. كل الكلام هذا كذب , القلب ما يشيل الا حبيب واحد
شيهانة ناظرت قدامها : يارب ..
قوت مسكت شعر شيهانة وهي تقول : أنا مدري وش مصبّرك ..
شيهانة ناظرت قدّامها , أخذت نفس بعدها قالت بصدق : صرت أحبه
قوت وهي تشد شعر شيهانة : ماشاءلله وما حلا في عينك الا يوم تزوج
شيهانة بغضب : أمر الله وش أسوي يعني
نشّفت قوت شعر شيهانة
أنطق الباب , دخلوا لينا و رنا ,و ومعهم ميسا
سلّموا على قوت , وبدؤا بالسوالف , قدروا يطلّعون شيهانة من المود الغريب اللي جالسه تعيشه
,,
الـساعه 6 المغرب

رنا ناظرت في شيهانة : تمام ..بس ابي أركب لك رموش على الـطرف
شيهانة ناظرت في رنا : خلاص أحس ما يحتاج
قوت وهي تناظر في وجهه شيهانة : تصدقين يبي لها رموش على الأطراف
رنا وهي تناظر فيها : أي أنا أقول
شيهانة تأفأفت بملل : خلصوني .. صقر بيجي الحين يبدل
لينا وهي جالسه على الـتسريحه : ذابحها صقر ..
قوت : من الوريد لـ الوريد
شيهانة : برا .. برا أنتي وياها ..
قوت ناظرت في قوت : ترى بحظر معكم العرس الكلبي اللي تحت الوضع
شيهانة وهي تضحك : الوضع كله طماشه في طماشه .. تعالي ما نااقصنا الا أنتي
لينا ناظرت في قوت : جبتي لك فستان ؟
قوت وهي تبتسم : جبت لي واحد .. أحتياط
شيهانة وقّفت بعد ما ركبت لها رنا الـرموش , شافت الميكاج : تسلم هاليدين والله ..
رنا ناظرت فيها : الله يسلّمك
توجهت شيهانة لـ الفستان وهي تاخذه
فستان أسود هادي جداً شيفون ضيق على الـجسم وليه ذيل قصير جداً
ضيق لحد تحت الركبة بشوي , بعدين جاي سايب ..
لينا وهي تناظر في شيهانة : بروح البس و أجي
رنا : خذيني معك ..
طلعوا رنا و لينا
لبست شيهانة الفستان بـ مساعدة قوت
ناظرت فيها قوت , مدّت لها حلقها الألماس , وعقدها يأخذ نفس شكل الـحلق , لبّستها الأسوارة التابعه لـ الطقم , خاتمها , و الساعه
جلست شيهانة على الـكرسي وهي تقول : صح اللي جالسه أسويه ولا غباء ؟
قوت حطّت رجل على رجل : أنتي وتفكيرك .. ما أقدر أقولك أنتي ذكيه أو غبية ..
شيهانة ناظرت في قوت : صح لما أحد يبغى يستفزك أو يقهر , تبادرين أنتي أول ؟
قوت هي تدخّل يدها في شعرها : هذا قانون حياتي بحت ..
شيهانة : يعني صح ؟
قوت هزّت راسها : صح ..
وقّفت قوت وهي تاخذ فستانها النيلي , هادي جداً جداً قريب لـ ديزاين فستان شيهانة ..
لبسته , وتوجهت لـ التسريحه , حطت لها مكياج بسيط , فكّة شعرها الـكيرلي , تركته مفتوح ..
شيهانة فكّت شعرها , رجّعته كله على ورا , تعطّرت وطلعت متوجهه لـ غرفة رنا مع قوت...

رجع من الـمكتب ..
رقى لـ الدور اللي فوق , أول ما دخلت شم ريحه عطرها , متعطره قبل تطلع
نزّل غترته , دخل يتروش , بعدها طلع وهو لابس روبه
جلس على الـكبنه , أسند راسه لـ الكنب
وش هاليوم يا صقر ؟ من بدايته ودّه يشوف شيهانة , كيف بتكون نهايته
غمّض عيونه , يتمنى لو أنها تسوي شي يوقّف العرس كلّه لكن وش ؟ مافيه شي تقدر تسويه
وقّف , لبس ثوبه
لكن وينها تأخرت ما جت , بينتظر يشوفها وينها

في غرفة رنا
وقّفت شيهانة وهي تقول : بجيكم .. دقايق
طلعت من الـغرفة متوجهه لـ غرفتها
فتحت الـباب بشويش , لمحت روبه على الـسرير ناطله , يعني جاء
دخلت وسكّرت الباب
لف بـ راسه أول ما سمع صوت الـباب : شيهانة
شيهانة توجّهت له وعلى وجهها أبتسامة هادية
لف عليها صقر وهو يناظر فيها من فوق لـ تحت , جمال , أنوثه شي من الـتأمل فيها
قرّب منها وهو يناظر فيها , حط يده خلف ظهره , ناظر في عيونها وهو يقول بـصوت شبه هامس : وش جالسه تسوين ؟
شيهانة حطّت يدها على كتفه : ولا شي
صقر مسك يدها ودوّرها وهو يقول : هذا كله ليه ؟
شيهانة فكّت يده , بعدها ناظرت فيه
ضمّته وهي تقول : عشان أقولك .. مبروك
صقر فكّها وهو يقول : جالسه تستفزينني يا شيهانة ..
شيهانة ناظرت فيه : لا .. أنتبه أستفزك .. اليوم لازم تكون رايق
صقر ناظر فيها بغضب وهو يقول : أنتي بتنزلين ؟
شيهانة ناظرت فيه و بـ نظره واثقه جداً : ب أنزل ..
صقر ناظر فيها بـ أستفزاز : كأنك تقولين لي و تقولين لـ الكل , ما تهمني يا صقر
شيهانة رفعت كتفوها : يفهمون اللي يفهمون
صقر ناظر فيها : لا تنزلين .. يكفي
شيهانة أبتسمت له : بـ أنزل ..
صقر ناظر فيها , بعدها قال : الوضع عناد ؟
شيهانة هزّت راسها بالنفي : كبرياء ..
صقر هز راسه : تمام .. سوي اللي في راسك ..
شيهانة رجعت على ورا وهي تقول : أشوفك متى ؟
صقر ناظر فيها وهو يقول و واضح على وجهه الـغضب : مالك فيه
شيهانة ناظرت فيه طوّلت النظر فيه , بعدها صدّت بوجهها وهي تطلع من الـغرفة ..
وش دقّات القلب هذي , ليه الأحاسيس توجع ؟ ليه الحب يوجع ؟ ليه الغيرة توجع ؟
نزلت لـ الصالة تحت , البنات موجودين
موضي ناظرت فيها , قالت بـ نوع من الـغرابه : نازله ؟ مافيه قلب ؟
شيهانة ناظرت فيها , بعدها تعدّتها متجاهله وجودها
جلست على الـكنب
رنا ناظرت في شيهانة : زين سويتي
قوت ناظرت في شيهانة , كيد الـحريم اللي بينها وبين موضي جالس يوجعها ويتعبها أكثر من أنها تعبانة , تعرف شيهانة كثير ..
وعارفة أن داخلها أنسان متدمره أحاسيسه , أنسان يحس نفسه مهدوم , مجروح أكثر من مره بسبب الحب .. تشوف أبتسامتها و سوالفها مع رنا لكن خلف كل هذا , خذلان , عشق , غباء حُب ..
بدوا المعزومين يجون , واللي أتضح أن موضي عازمة نص العالم ..
رنا وقّفت وهي تقول : أهل ليال جو ..
شيهانة ناظرت فيها : وين بتروحين ؟
رنا : باخذ كاس مويه و أجي ..
توجهت لـ المطبخ , أخذت كاس موية
طلعت من الـمطبخ , وهي تناظر في موضي واقفه عند غرفتها , وليال داخل , مدخّلينها من الباب الخلفي
ناظرت فيها , بعدها صدّت بوجهها
وهي ترجع لـ مكانها
جلست جمب شيهانة اللي تناظر في جوّالها تتصنّع اللامبالاة
رنا ناظرت أتجاه الدرج , أبتسمت وهي تقول : شوفي من جا يأزرك ؟
شيهانة رفعت نظرها , أبتسمت وهي تشوف ميسا لابسه فستان ناعم جداً فضي ومعاها الـخادمة ماسكه يدها
وقّفت وهي تتوجهه لـها , مسكت يدها وهي تهمس لها بكلام ..
جلست جمبها , وهي تحاول تبين أن الوضع عادي جداً مع نظرات المعازيم اللي عرفوا أن هذي الجميلة هي زوجة صقر ..
يتضح عليهم نظرات الـذهول , لو هذي زوجته الأولى بهذا الجمال , كيف زوجته الثانية ؟

بدأ الدي جي يشتغل
و موضي ما قصّرت في الرقص بكل انواعه
رنا ناظرت في شيهانة : نرقص ؟
شيهانة وقّفت وهي تاشر براسها : نرقص يالله ؟
رقصت رنا هي و شيهانة , وقوت دخلت معهم , لينا معهم , وميسا تصفق بيدينها
أما موضي , فـ هي تقريباً شبه منهاره من حركة رنا لينا بالرقص مع شيهانة مهما يكون في وجهة نظرها ما يرقصون معاها ..
بعض المعازيم اللي يعرفون أن شيهانة هي زوجة صقر الأولى تقريباً يعيشون في حالة صدمة , كيف لـه يتزوج على حسناء ؟
أما خوات ليال , لحد الآن يجهلون من هي زوجة صقر الأولى
صيتا وهي تناظر في موضي : وينها مرت صقر الأولى
موضي بغضب وهي تأشر على شيهانة : أم الأسود جعل ربي يسود أيامها   

صيتا ناظرت في موضي , ماهي مصدّقه : ام الأسود ... هذي شيهانة
موضي هزّت راسها : ايه هي
صيتا لفت على أختها الثانية : توقعي منهي مرت صقر
نسمة : من؟
صيتا وهي تأشر بعيونها لـ شيهانة : أم الأسوج
نسمة بعدم تصديق : كذّابه
صيتا : والله العظيم
نسمة : عز الله ليال كدّت خير ..
فجأة أنخفتت الأنوار , وصوت موسيقى هادية بدأ بالوضوح بالتدريج
قوت ناظرت في شيهانة : شكلها بتجي ..
شيهانة هزّت راسها بالخفيفه : ايه ..
وصدق القول ..
دخلت ليال , بـفستان أبيض منفوش جداً , و طرحة قصيرة , شعرها الأشقر مفكوك و مكياجها ناعم , مناسب لـ حدّة ملامحها
ناظرت فيها شيهانة بنظرات تقييم , جميلة مرتّبه ..
صدت بوجهها بسرعه , خافت دخل الخوف قلبها من جديد , ند قوي قوي جداً
قوت بـصوت هادي : نروح ؟
شيهانة هزّت راسها بالنفي : لا ما يحتاج ..
أما رنا , تناظر في شيهانة كل شوي , خايفه من الهدوء اللي عليها , وفي نفس الوقت مستغربه كثير قوة تحمّلها لـ الموقف القوي هذا , ولا كأن فيه شوية حزن
لفّت رنا على صوت موضي تسمعها وش تقول ! صقر بيدخّلونه !
شلون ! صقر ما يدخل .. كيف رضى يدخل
لفّت على لينا وهي تقول : تقول صقر بيدخل صح ؟ ولا يتهيأ لي ؟
لينا بـهدشه : ايه .. شلون بيدخل

قوت لفّت على شيهانة : بيدخل!
شيهانة ناظرت في قوت , كيف يدخل صقر ! قد سمعته عند موضي يقول أنه رافض يدخل , وش صار عشان يدخل ...
وقّفت بسرعه , بتدخل قبل يجي مافيه تشوف أكثر أبداً ابداُ
أنتبهت موضي عليها , قرّبت منها وهي تقول : وين رايحه ؟ جبروتك وين ؟
شيهانة لفّت عليها وهي تبتسم وبرد سريع : أنتي من اليوم مراقبتني , تشوفين كل خطوة أسويها , لا تخافين .. جبروتي موجود بس بيروح يعدل شعره ويجي
موضي ناظرت فيها وهي تبتسم : نشوف جبروتك لين وين بيوصل
توجهت شيهانة لـ التواليت , عدّلت شعرها أخذت نفس ..
طلعت , لفت أتجاه الباب الخلفي , هذا هو واقف
ناظرت فيه , قرّبت منه وهي تقول : وش غير موقفك ؟ موب كنت موب داخل
صقر ناظر فيها , لف براسه وهو يقول : لا تعكرين صفوي
شيهانة رجعت على ورا وهي تقول : جعل صفوك يدوم يا صقر ..
لفّت و رجعت لـ الصاله
أما هو , ما كان قراره السرير هذا الا نتيجه لـ أستفزاز شيهانة له , كيف تنزل في زواجه , كيف تبين لـ الناس أنها مبسوطة , صقر ماهو هامها , ولا يمثل شي لها ..
زي ما مثّلت , هو عنده قدرة عن التمثيل , بيمثل مثلها وبيشوف وش بيصير معه , ومعاها ..
توجهه لـ عند موضي وهو يسمعها تناديه , دخل لـ الصاله وسط لولشات الكثير الكثير
توجهه لـ ليال , اللي جالسه في الـكوشه منزّله راسها لـ تحت ..
ما بان منها شي ..
جلس وهو مبتسم , و متأكد مليون بالمية أن نظرات شيهانة الآن عليه
أما شيهانة , واقف جمب قوت اللي لبست عبايتها , تناظر فيه وهي تبتسم بقهر داخلي فضيع
يبتسم في وجهها , ويجلس جمبها بشكل طبيعي ..
أما بالنسبة لـ ليال
جالسة وسط الـكوشه وهي تحس نفسها في دائرة من الرعب , كيف جا هذا اليوم بسرعه , وليه هي ماهي مبسوطة زيها زي أي بنت وش السبب اللي خلا عجز أبتسامتها يقوى ؟
رفعت راسها بشويش , لفّت نظرها لـ صقر اللي لف عليها وفجأة أختفت أبتسامتة اللي على وجهه
أدرت الشي اللي جالس يصير , جالس و جمبه ليال , وشيهانة واققه تناظر فيه , لف عليها , بعد ما حس فيها تناظرر فيه
لف بوجهه عنها , الموقف صعب جداً عليه , كان يتوقع أن التمثيل أسهل بكثير لكن الـصدق أن الأحاسيس الداخليه , تطغى على الوجهه وتبان
ناظرت فيه شيهانة بنظرات تُغني عن مليون كلمة وكلمة , كأنها حسّت الحين أنه انوخذ منها , وراح , راح بعيد عنها , راح مع هذي الجميلة اللي تجلس جمبة , ونسى شيهانة بسرعه ..
تناظر فيه , كأن الدنيا اللي ألآن هي فيها مافيها احد , كلهم حولها , لكن مافيه شخص في عيونها الا هو , تناظر فيه كأن الـمكان مافيه الا هو وهي
يناظر فيها , تعلّقت عيونه في عيونها , الكل أختفى , الكل ماعاد له وجود غيرها , سيّدة الكل , سيّدة الجمال , سيّدة الحٌب , اللي في قلبه
يحس بـ لهفه لها , حنين غريب , مافيه مقارنة أبدا أبداً بينها وبين ليال , لا والله المقارنة بينهم حرام , حرام , شيهانة عند صقر الآن أعلى من الكل , شيهانة في نظر صقر الأنثى الوحيدة اللي في قلبه , الأنثى المطلقة اللي حلف أنها ما تدخل قلبه لو يسكّره بـ قفول , ما كان يدري أنها بـ أبتسامة بسيطة تفتح هذا الـقفل ..
وقّف صقر غير مبالي لـ اللي يسويه , أشر لـ شيهانة بيده تجي
ناظرت فيه , بعدها لفّت يمين ويسار , تشوف لـ من يأشر
أشرت على نفسها
صقر بـ صوت مسموع : شيهانة .. تعالي ..
رنا أبتسمت وهي تشوف نظرات أخوها , عارفة مليون بالمية أن عيون صقر تحكي شي جميل لـ شيهانة
لفت رنا على شيهانة وهي تقول : يناديك
قوت ناظرت في شيهانة : يناديك و عروسته جمبه .. وش جالس يصير
وقّفت شيهانة , ماقوت أنها تروح له أبد
ليال رفعت راسها أول ما سمعت صوت صقر ينادي على زوجته الأولى , بدال ما يكون أول مره تسمع صوته وهو يقول لها كلام رومانسي , يبين لها قد أيش هي حلوة اليوم , لكن الصدمة بالنسبة لها لما نادى على زوجته
جت موضي بسسرعه لـ صقر وهي تقول : وش جالس تسوي يا صقر
صقر لف على موضي , صد عنها وهو يناظر في شيهانة : تعالي ؟
ما قدرت تجي , ولا قدرت تصدق أنه يناديها
واقفه تناظر فيه , والعيون كلّها أتجهت عليها ..
فصخ صقر بشته , نطله على الـكرسي , رفع غترته على كتفه
توجهه لها وهو عارف أن في قلبها حزن كبير عليه , ونفس الـشي في قلبه هو
قرّب منها وهو يناظر فيها , قال بـصوت هامس : تدرين ليه ناديتك ؟
شيهانة أبتسمت , أبتسامة اللي ماهي مصدقه اللي جالس يصير
صقر بصوت هامس : عشان أقولك شي .. بس ..شي توه الآن يدور في بالي , توني أستوعبته
شيهانة نزّلت نظرها لـ الأرض ماهي مصدقة اللي جالس يصير ..
صقر بـ همس : أرفعي راسك .. أسمعي الـكلام اللي بقوله لك
شيهانة ناظرت فيه وبنفس همسه : وش بتقول ؟
صقر ناظر فيها : تذكرين سؤالك .. خذي أجابته .. أنتي يا شيهانة اللي في قلبي .. وانا اشوفك قبل شوي .. تدرين وش دار في بالي .. أنك أنتي بلحالك اللي في قلبك .. تدرين وش شفت فيك , سيدة قلبي الأولى , سيدة الحب , سيدة الجمال .. مافيه بعدك أحد .. و أبشرك .. ما جاء قبلك أحد
شيهانة حطّت يدها أعلى صدر صقر وهي ماهي مصدّقه , ناظرت في عيونه مصدومه من اللي جالس يقوله لها , أو ماهي مصدقه , أنه يترك ليال في وقت خاص زي هذا الوقت
نزّلت يدها وهي تقول : صقر .. ليال ... أرجع
صقر ناظر فيها , أبتسم في وجهها , حط يده ورا كتفه , شدها وهو يضمها بخفه , فكها وهو لازال يبتسم , لف وتوجهه لـ ليال جلس جمبها
وسط ذهول المعازيم من حركته وصدمة ليال من اللي جالس يسويه
قوت بـ هدوء : شيهانة .. يحبك
شيهانة لفّت عليه , أبتسمت في وجهه وجلست على الـكرسي
وش نوعك يا صقر ؟ وش نوع السحر اللي رميته على ورحت , وش نوع التعويذة اللي قلتها و غيّبتني عن الوجود ...
لينا لفت على رنا و بصوت هامس : شفتي وش صار
رنا لفت على لينا : قلت لك يحبها .. وهي تحبه .. وهذي جت وسطهم لا حول ولا قوة الا بالله
لينا : أنا لو مكانها ماراح اقدر اجلس
رنا رفعت كتوفها : نشوف وش يصير ..
جالسه على الـكوشة , مشبكة يدينها في بعض , أشكالهم ماهي قادرة تفارق خيالها ولا لحظة , ماهي قادرة تستوعب الـشكل اللي شافتهم فيه , اليوم يومها , ليش يخربه عليها , ليه يشمّت الكل فيها , ليه يتزوجها وهو في قلبه وحده ثانية .. اجتمعت الدموع في عيونها , ماتبي تبكي , تحاول تسكّت نفسها , تكتم الـدموع اللي في عيونها
وقّف صقر وهو يناظر في موضي : أنا طالع ..
موضي منجنّه من اللي صار وبغضب : وش اللي سويته يا صقر .. فيه أحد يسوي سواتك
صقر ناظر فيها : أقصري السالفه ..
موضي ناظرت فيه : طيب أخذها معك .. شلون تتركها بلحالها
صقر بصدق : ما ينفع تخلينها عندك
موضي بتنجن من صقر , ناظرت في ليال وهي تقول بصوت مسموع : يالله يا ليال بتروحين مع صقر
وقّفت ليال بقلّة حيله , ما تقدر تقول شي أكثر , يكفي اللي سواه صقر ..
شالت فستانها بـهدوء ..
شيهانة طول ماهي جالسه كانت تناظر في صقر , وفي عيونها شي من الفرحة , وشي من الحزن , كان يناظر فيها طول هالوقت , وهي تناظر فيه
وقّفت لما شافته وقّف , عرفت أنه بيطلع مع ليال
أخذت جوالها من على الـطاولة ما تبي تشوف الـموقف
توجهت لـ الدرج بتروح لـ غرفتها
جوا وراها البنات
لفّت عليهم وهي تقول : انا بخير .. ما يحتاج تجون
قوت ناظرت فيها : أكيد
لينا : طيب .. تبين شي تاكلينه
شيهانة : لا بس .. بجلس شوي مع نفسي و أجيكم
رنا ناظرت فيها : نننتظرك
رقت شيهانة لـ غرفتها , جلست على الـسرير نزّلت خاتمها وهي تناظر فيه , تسترجع كلام صقر بكل أحساس قاله
رفعت نظرها لـ الباب بعد ما أنفتح
وقّفت وهي تشوف صقر داخل عليها ..
ناظرت فيه وهي تقول بلهفه : صقر ..
صقر ناظر فيها :...............

قرب منها وهو يقول بـ هيام : كنت ناوي أمثل عليك .. لكن من يوم ما شفت نسيت اللي كنت بسويه
شيهانة قربت منه وهي تقول : ليه تبي تقهرني أكثر من أني مقهورة ؟
صقر حط يدينه ورا ظهرها وهو يقول : أسف .. رضيتي ؟
شيهانة ناظرت فيه , تناظر فيه ماهي قادرة تنطق كلمة وحدة حتى
صقر نزّل راسه على خدّها وهو يقول : شكلك ما رضيتي ..
باس خدّها بعدها ناظر فيها : رضيتي ؟
شيهانة تناظر فيه أقل ما يقال عنها في مرحله الأغماء الـعقلي من اللي جالس يصير فيه
صقر رفع حاجبه وهو يقول : شكلك ما رضيتي ؟
نزّل راسه لـ جهة خدها الأيمن , وطبع قبله عليه
ناظر فيها : رضيتي ولا للحين ؟ شكلك ما رضيتي
نزّل راسه لها من جديد
شيهانة ناظرت فيه و بسرعه : رضيت .. لحظة .. رضيت
صقر أبتسم لها : لا أحسك زعلانة للحين , يبي لك بوسه ثانية
شيهانة أبتسمت له : لا شكلك أنت اللي زعلان ..
باست صقر من خدّه بعدها ناظرت فيه : رضيت ؟
صقر ناظر فيها وعلى وجهه أبتسامة رايقه : للأسف أني زعلان زعل قوي قوي قوي
شيهانة حطّت يدها على خده : بس رضيت الحين
صقر ناظر فيها : رضيت والله يا شيهانة .. رضى كامل
شيهانة أبتسمت في وجهه , بعدها رجعت على ورا وهي تقول : انت كيف جيت هنا
صقر ناظر فيها : برجولي !
شيهانة وهي لحد الآن حاطة يدها على خده : والله ... غريب
صقر أبتسم : خليتهم ينتظروني .. وجيتك
شيهانة فكّته وهي تقول : طيب .. يالله عشان ما تتأخر
صقر ناظر فيها : ترسلينني لها ؟
شيهانة ناظرت فيه : اذا انت رحت لها برجولك ! أنا اصير أرسلك ؟
صقر لف بظهره وهو يقول : راجع لك ..
شيهانة وهي تتاظر فيها : أن شاءلله ..
طلع صقر من الـغرفة متوجهه لـ ليال ..
أخذها وتوجهه هو وياها لـ الفيلا الخاصة بـ صقر ..
...
يدور في الـشارع بسيّارته , فاتحها كلها من الـفوق و مشغّل أغنيه يتسمّع فيها , وصدره ضايق من اللي جالس يصير في شيهانة ..
طلّع جواله , أتصل على محبوب : جبت قوت من بيت شيهانة ؟..... خلاص أنا أجيبها ....اوكي
لف بسيارته متوجهه لـ بيت جده نادر أبو متعب ..
وقّف سيارته عند الباب , يبغى يكلم رنا , وفي نفس الوقت جاي ياخذ قوت
طلع جواله أتصل على رنا .. بعد الـسلام و السؤال عن الحال
عادل : وينك ؟ أبي أتكلم معك
رنا جالسه في غرفتها هي و لينا و قوت : أنا في غرفتي ... البيت كله معازيم وين تجي ؟
عادل نزل من سيارته : انا عند باب الحديقه .. أنزلي لي بلحالك
رنا وقّفت وهي تقول : طيب .. أنتظر بجيك
لينا ناظرت في رنا : وش فيك ؟
رنا : عادل يبيني
قوت ناظرت في رنا , وش يبي فيها عادل ..
نزلت رنا لـ الباب الخلفي ..
فتحت الباب , دخل عادل وهو يسلّم عليها
رنا ناظرت فيه : وش فيك .. أقلقتني
عادل تكتف وهو يقول : فيه شي مخوفك ؟
رنا ناظرت في عادل بـ استغراب : زي وش ؟
عادل ناظر فيها : احد مضايقك ؟ فيه شي حسيتي أنك غلطتي فيه ؟
رنا بـعدم فهم : وضّح طيب ..
عادل ناظر فيها , بعدها قال : مافيه شي تبين مساعدة أحد فيه
رنا : عادل شوّشت راسي .. وش فيه
عادل ناظر فيها : لو حصل شي في يوم ومالقيتي احد يساعد .. كلّميني
رنا : عادل .. وش هالكلام ليه تقوله
عادل أبتسم , بعدها قال : أمزح
رنا حطّت يدها على قلبها : ريحتني .. قلت وش فيه هذا
عادل هز راسه : طيب روحي نادي قوت .. قولي لها عادل ينتظرك تحت
رنا ناظرت فيه : نعم ! .. وش تبي فيها
عادل بكذب : جدي أمرني أرجعها لـ البيت
رنا هزت راسها : ثواني و أجي
توجهت رنا لـ قوت وهي تقول : قوت عادل يقول أن جده موصيه يرجعك .. ينتظرك تحت
قوت ناظرت في رنا : جدي ؟ .. ما قال لي
رنا رفعت كتوفها : يقول ..
قوت وقّفت وهي تلف طرحتها عليها , سلّمت على البنات
و توجهت لـ غرفة شيهانة تتطن عليها , دخلت عليها و أرتاحت أنها بخير , بعدها توجهت لـ الدرج و نزلت
وقّفت وهي تشوف عادل واقف ينتظرها
قربت منه وهي تقول : نعم ؟
عادل ناظر فيها , أبتسم وهو يقول : ماتبين ترجعين البيت ؟
قوت رفعت حواجبها و بـ أسلوب مستغرب : جدي قالك توصلني ؟
عادل حط يده في شعره وهو يقول : لا ..
قوت ناظرت فيه : طيب ليه الكذب ؟
عادل ناظر فيها : في سبيل اللقاء ..
قوت ناظرت فيه : في سبيل اللقاء . .
أبتسمت له : طيب .. يالله نرجع لـ البيت .. مع أن جدي محذرني منك ..مدري ليه .. بس نروح
عادل وهو يمشي وراها : انا غلطت في شي .. بس بـ أصلحه
قوت لفّت عليه : وش ؟
عادل : أركبي السيارة .. طيب
ركبت قوت في السيارة , في المقعد الخلفي
ركب عادل الـسيارة , طلع من جيبه علبة دخانه طلّع وحده وحطها في فمه
قّربت قوت جرّتها و نطلتها مع الدريشه : ......
عادل لف عليها و بصوت شبه معصب : وش فـــيـــك
قوت ناظرت فيه : الدخان لا ..
عادل ناظر فيها : نعم ؟
قوت : زي ما سمعت ممنوع الدخان ...
عادل تجاهل كلامها طلّع الثانية وحطها في فمة
تقدمت قوت وهي تسحب الدخان من فمّه و تناظر فيه : قلت لك لا
عادل بغضب : تسستهبلين أنتي .. تبين تعصبين فيني
عادل بـ نفس الـأسلوب طلّع دخانين وحطهم في فمه : شيليهم لو فيك خير
قوت ناظرت فيه : طيب ... هذي اللي في يدي بـ أشربها
عادل لف عليها وهو رافع حواجبه : أنطليها
قوت : ماراح أنطلها الا لين تنطل اللي في فمّك ..
عادل ناظر فيها عن طريق المراية وهو يقول : الموضوع وش بالضبط تعاندين ؟
قوت : لا الموضوع موب موضوع عناد موضوع صحّة .. أنا ما أبي يجيك السرطان وياخذك .. ما أبي أفقدك في يوم و أنت تحسبني أعاندك
عادل طلّعها من فمه و رماها من الدريشة
قوت أبتسمت : صح عليك اللي تسويه كذا ..
عادل ناظر فيها وهو يبتسم : لا تجرينها ثاني مره عشان لا أنجن
قوت هزت راسها : طيب ..
شغّل السيارة عادل متوجهه لـ البيت
ــــــــــــــــــــــــ
دخل لـ الفيلا و معه ليال
شغّل اللمبات , لكنها ما تشتغل !
توجهه صقر لـ عداد الكهرب , رجع طفاه وشغله لكن ما يشتغل
لف على ليال وهو يقول : يوم جيتي أنتي و أهلك كان الكهرب مشتغل
ليال بصوت واطي : جينا .. الصبح ماكان يحتاج لمبات
غمّض صقر عيونه بقوة , الصبر يا صقر .. الصبر
ناظر في ساعة يده الساعه وحده , وين يلقى أحد يصلح العداد
جلس على الـعتبه وهو يتأفأف ..
لف على ليال وهو يقول : الكهرب ما يشتغل
ليال هزّت راسها بشويش :...........
وقّف وهو يقول : أمشي .. بنرجع لـ البيت
ليال رفعت راسها : أي بيت
صقر ناظر فيها بطرف عينه : بيتنا ...
ركب السيّارة وليال تشيل فستانها التطويل
ركبت السيّارة وحرك صقر لـ البيت
أما في البيت , بعد ما فضى البيت
في غرفة شيهانة , مسحت مكياجها
و بدّلت ملابسها لبست بجامة حرير ورديه ..
تركت شعرها نفس ماهو , طلعت من الـغرفة عشان ابليس ما يرجع و يفتح في راسها الوساوس الشينة
فتحت على لينا الباب وهي تقول : لينا .. تعالي الحديقه ..
لينا هزّت راسها : اوكي بقول لـ رنا و أجي
نزلت شيهانة لـ المطبخ , مليان من صحون التقديمات اليوم اللي ما أكلت منها شي , قطعت من الـكيكة ثلاث قطع حطتهم في الصينية , وركّبت قهوة على النار وطلعت لـ الحديقة حطت الأغراض
وشغّلت الانارة الملونة , جلست وهي تنتظر الباب
ماهي دقيقه الا وبانوا لها
رنا جلست جمب شيهانة وهي تقول : وش الطاري
شيهانة : المزاج ..
رنا أخذت صحن كيك وهي تصب لـها و لـ لينا و لـ شيهانة قهوة
لينا ناظرت في شيهانة : صدمني الـيوم صقر .. ما توقعته يسوي هالحركة
رنا ناظرت في شيهانة : حركته قوية .. يعني .. كـ معرس قوية مره
أبتسمت شيهانة : والله يا بنات ... مدري أفرح أضحك أبكي أزعل .. مدري
رنا : بس أقولك .. أتوقع عقب اللي شافته اليوم ليال بتعد الأيام عشان تتطلق
شيهانة بصدق : حرام .. مالها ذنب هي
رنا : الا لها ذنب
لينا : وش ذنبها يا رنا تكلمي بالمنطق
رنا : دامك تبيني أتكلم بالمنطق , المنطق يقول أن المره اللي تعرف أن الرجال متزوج ما تاخذه على زوجته .. ليه تتزوج واحد متزوج تستاهل .. هذي موب شماته .. هذا صدق
شيهانة رفعت كتفوها : مدري والله ..
شربت فنجان قهوتها
لفو البنات لـ الباب بعد ما سمعوا صوت الباب ينفتح
أنصدموا وهم يشوفون صقر يدخل , وليال وراه
طاحت عينه في عينها , بيخلف بالكلام اللي بينه وبينها , هي ما تبي تختلط في ليال لـكن لـ الضرورة أحكام ..
قّرب منهم صقر وهو يقول : الـسلام
رنا ناظرت في شيهانة , بعدها ناظرت في : وعليكم الـسلام
صقر لف براسه وهو يقول : تعالي ..
شيهانة ناظرت فيه : وش جابكم ؟
صقر ناظر فيها : البيت مافيه كهرب .. توني أنتبه
لينا ناظرت في رنا ؟
شيهانة : يعني .. بتجلسون هنا
صقر هز راسه بالأجابه :.............
شيهانة ناظرت في رنا , و بـ أسلوب تخفي فيه حزن الـخبر : خلاص .. أنا .. أنا بنام عندك
صقر : لا تنامين عندها .. نامي في غرفتك .. ليال بتنام في الـغرفة اللي جمب غرفة لينا .. دلّيها يا لينا على المكان
وقّفت لينا وهي تتوجهه لـ ليال ..
توجهت هي وياها لـ الغرفة , وتسحب معاها الـشنطة الصغيره
دخّلتها الـغرفة و نزلت ..
شيهانة وقّفت وهي تقول : أنا بروح لـ غرفتي بـ أنام تصبحون على خير
توجهتى لـ غرفتها , وهي تحاول تنسى الموضوع , ما تبي تفكر فيه أبد
على طول سكّرت اللمبات وقفّلت الباب , أنسدحت على الـسرير , غمّضت عيونها بتنام ..وفعلاً نامت و أنهت هذا الـيوم ..

ــــــــــــــــــــــــــــــــــــــــــــــــــ ــ
دخل صقر لـ الغرفة , جلس على الـكرسي ..
نزّل غترته من على راسه , ماهي الا دقيقه
طلعت ليال وهي عليها روب أبيض حرير طويل .. وتاركه شعرها مفكوك
ناظر فيها , بعدها صد بوجهه وهو يقول : تبين تنامين نامي
ليال بـ دهشه وصوت واطي : أنام ؟
صقر ناظر فيها : أيه نامي ..
ليال هزّت راسها بشويش , توجهت لـ السرير أنسدحت عليه وغطّت نفسها باللحاف , أنام في يوم الزواج ؟ جرح جديد يا صقر ..
ـــــــــــــــــــــــــــــــــــــــــــــــ
في بيت خالد ..
جالسة عند التلفزيون , من متى ما راحت الـشركة , ضاق خلقها من موضوع الشركة تبغى تنهيه لـ الابد , ماهي حقّت شغل أبد , لكن ما تدري كيف تفاتح خالد بالموضوع
دخل خالد وهو يقول : ما نمتي !
ديم : مافيني نوم .. وأنت
خالد : مصحصح .. كان فيك نوم .. ليه للحين صاحيه
ديم أبتسمت : أنتظرك ..
خالد أبتسم وهو رافع حاجبه : ليه
ديم وقّفت وهي تناظر فيه : عشان أنام معك
خالد قرب منها : تنامين معي كيف ؟
ديم شبّكت يدها في يدينه : كيف تنامين معي كيف .. بنام معك أنا وياك في الغرفة ..
خالد ناظر فيها وهو يبتسم : وش اللي غيّر
ديم ناظرت فيه وهي تبتسم : يمكن أني صرت أبيك أكثر
خالد رفع يددها وهو يبوسها : الله يديم هالروقان
ديم وهي تحط يدها ورا ظهر خالد : أنا دايم مروقة بس أنت ما تعرف لي
خالد ناظر فيها وهو يقول : جاني نوم ..
ديم ضحكت : مسرع ماشاءلله
خالد وهو يضحك : مزاجي غريب دقيقه مصحصح عشر نايم ..
ديم أبتسمت له : ولا يهون النوم .. يالله ننام ..
سكّرت اللمبات , ورقت لـ الغرفة
دخلت لـ غرفة خالد وهي تبتسم : تدري أني نمت فيها
خالد وهو يسكر الباب : شميت ريحتك
ديم لفّت عليه : أمانه ..

خالد حط يده ورا ظهرها : والله ..
ديم أبتسمت له بخجل واضح : أستحيت ..
خالد بـ نفس أسلوبه : من وش ؟ مني ؟
ديم رفعت نظرها : تقدر تقول ..
خالد ناظر فيها : طيب شلون نشيل السحا هذا ؟
ديم وهي تناظر فيه : من الله ينشال ..
خالد : يعني متى؟
ديم : قلت لك من الله ..خالد .. عندي أمنيه
خالد : صرت لك الفانوس السحري ؟
ديم ضحت : الأبريق .. ماهو الفانوس
خالد : وصلتك الفكرة ؟ موب مهم الفانوس الأبريق أهم شي الفكرة توصلك .. وش أمنيتك
ديم : بسيطة مره .. أبي أنام على رجلك و أنت تلعب في شعري وش رايك ؟
خالد أبتسم لها : ليت أمانيك كلها كذا
جلس خالد على السرير وهو يقول : تعالي نامي
حطّت ديم راسها على رجل خالد
مسح خالد على شعرها وعلى وجهه أبتسامة خفيفه
ديم تنهدت وهي تقول : الله لا يحرمني منك .. يدك حنونه يا خالد
حط يده على خدها وهو يبتسم : طيب نامي .. يالله
غمّضت ديم عيونها ..
حنان خالد مغطيها بشكل كبير , تحس بـ أنه يشكل جزء من روحها , جزء لطيف .. آمن , يده وهي تمسح على شعرها , تحسسها بـ أنها في آمان معه , أحن من يد أقرب الناس لها , أحن حتى من يد أمها بمراحل ..
غمّضت عيونها وهي تسرح بـ نوم عميق ..
وهو يمسح على شعرها , يحس بـ أمتنان لها , يحس أنها كمّلت جزء ناقص من حياته , جزء يحس بـ فقر في المشاعر , من يوم ما شافها وهو يحس بـ أنها أنسانة نقيّة السريره , أكتملت حياته الناقصة بوجودها , ملت عليه حياته , نسّته حزن موب أمه , والأهم خلّته يعرف يحبها من جديد ..
ــــــــــــــــــــــــــــــــــــــــــــــــ
جالس في الفندق , يناظر في الخاتم اللي تركته جمانة له , يفكر لو خطبها بتوافق ؟ لو تقدم لها بتقدر تبدأ حياة جديده ..
يفكر ويفكر و يفكر , لكن أستقر في نهاية الطريق أنه بيتقدم لها , لو رفضته بتنتهي حياته هنا , لو قبلت فيه كأنها رجعت فتتحت له صفحة لـ الحياة في الرياض ..
غمّض عيونه , دخل في نوم عميق , من سنين طويلة ما حس بـ لذّته أبداً
ـــــــــــــــــــــــــــــــــــــ

في الـيوم الثاني ..
صحت ليال من النوم , وهي ترفع نفسها من على الـسرير ناظرت اتجاه الكنبه , نايم عليها ..
أخذت نفس وهي تحس نفسها حزينة على نفسها ..
وقّفت فتحت شنطتها , أخذت بلوزتها و بنطلونها
لبستهم و جلست على طرف السرير , تقوّمه ولا تخليه نايم ..
لفت براسها تبغى موية , لكن الغرفة مافيها شي أبد ! واضح أنها خاليه ..
فتحت باب الـغرفة بشويش , طلعت من الـغرفة ..
شافت في وجهها موضي علطول
موضي وهي تبتسم : صباحية مباركة يا عروس توني أدري قبل شوي أنكم نايمين هنا
ليال هزت راسها بشويش : الله يبارك فيك
موضي قرّبت منها و بـ أسلوب وقح : وش صار ؟ صقر قرّب لك دخـ..
ليال لفّت عليها : موضي ..
موضي ناظرت فيها : وش فيك من حقي أعرف أخوي هذا ؟ صار شي ولا ماصار
ليال بخيبة أمل : نام على الكنبه
موضي ضربت صدرها وهي تقول : وش تقولين .. نام على الـكنبة
ليال هزّت راسها : ايه ..
موضي ناظرت في باب غرفة شيهانة : ساحرته بنت الـكلـ....
ليال ناظرت في باب غرفتها , وبحزن تام : يحبها يا موضي .. شفتي أمس وش صار
موضي ناظرت فيها : لا يا بنت الـحلال لا يحبها ولا شي .. بس صقر طيب يخاف أنها تاخذ بخاطرها
ليال : قولتك ؟
موضي بـ أسلوب أقناع : اعرفه أخوي .. الله يهيدك بس .. تعالي تعالي نفطر
نزلوا لـ الصالة ..وجابت لهم الخدامة الـفطور
صحت من نومها , وهي تناظر لـ الساعه 11 ونص
وقّفت وهي تتوجه لـ دورات المياة ..
طلعت منها و بدّلت ملابسها , لبست بنطلون قطني رمادي , و تيشيرت وردي
فرقت شعرها من النص و تركت مفكوك .. تعطّرت وطلعت متوجهه لـ الدور التحتي , دخلت الـ مطبخ
قطّعت لها خيار , بعدها توجهت لـ الصاله
دخلت وهي تقول : الـسـ.... الـسلام عليكم
ناظرت ليال في شيهانة بنظرات تفحص من فوق لـ تحت
جلست شيهانة هي تحط صحن الخيار على الـطاولة
ناظرت فيها موضي وهي تقول : ما أنتي مبرك لـ ليوله ؟
شيهانة تقصر الشر : مبروك
ليال ناظرت فيها و بصوت واثق من نفسه عكس ماهي عليه : الله يبارك فيك
طلّعت جوالها تتفرج فيه شيهانة
دخلت لينا , معها رنا : الـسلام ..
الكل : عليكم الـسلام
جلست رنا جمب ليال , ولينا بجانبها الثاني
ناظرت فيهم موضي كيف حاصروا شيهانة كأنهم حرّاسها
ناظرت فيهم ليال , واضح أنهم يحبون شيهانة كثير ..نزّلت راسها بهدوء تام ..
موضي بـصوت شبه عالي : عاد يا ليال لا أوصيك على صقر ترى صقر حبييب , و أكيد أنه بيحبك مع الوقت , بسم الله عليك كاملة و الكامل وجهه الله , بنت توك , ما أنتي مطلقه , وفوق هذا جميلة تبارك الرحمن
رنا ناظرت في شيهانة : بقوم أفقّع وجهها
شيهانة ضحكت بصوت مسموع : أتركيها يا بنت الحلال
لينا ناظرت في رنا : خليها ..
وقّفت رنا وهي تتوجه لـ الشاهي : تبين شاهي شيهانة ؟
شيهانة : ايه تكفين ..
موضي ناظرت في رنا : صبي لـ ليال معك
رنا ناظرت في ليال : تبي تقوم تصب لها ..
رجعت رنا وفي يدها بيالتين لها و لـ شيهانة
شيهانة ناظرت في رنا و بـ صوت هامس : تكفين رنا .. خلاص
رنا : وش سويت !!
شيهانة سكتت وهي تناظر في جوالها
دخل صقر وهو يسلم : الـسلام
وقّفت ليال بسرعه : وعليكم الـسلام
ناظرت فيها شيهانة , وش فيها وقّفت كأنها مقروصه
جلس صقر وهو يناظر في شيهانة , بعدها ناظر في الشاهي وهو يقول : شيهانة الله يعافيك عطيني شاهي
موضي بسرعه : ليال قومي صبّي له
ناظرت شيهانة في موضي , كأنها هي الـضرة لها موب ليال
وقّفت ليال وهي تصب الشاهي , مدته لـ صقر : تفضل
اخذ الشاهي من ليال : مشكورة .. تسلمين
ليال وهي تبتسم : الله يسلمك
أشرت موضي لـ ليال تجلس جمب صقر , وليال تحت قيد التنفيذ
نفّذت على طول و جلست جمب صقر
لف صقر عليها بعدها طلّع جواله من جيبه يشيك عليه
شيهانة بدون أستيعاب وصوت واطي : بـ أذبحهم والله
رنا بنفس مستوى الـصوت ونفس القهر اللي في شيهانة : أنا قبلك بـ أذبحهم
شيهانة لفّت على رنا وللحين ماهي مستوعبه اللي تسويه : حتى ما قال لي تعالي أجلسي جمبي .. وش هذا ..
لينا ناظرت فيها : هيه .. أستوعبي .. وقصري صوتك
شيهانة لفت على لينا وهي تناظر فيها , بعدها ناظرت قدّامها بدون ولا كلمة
وقّفت شيهانة وهي تقول : انا بروح أشوف وش الغدا
دخلت شيهانة لـ المطبخ وهي تبي تطلع حرتها في شي , هذي بدايتها تلصق فيه كذا ..
أخذت السكين الـكبيرة وهي تناظر فيها ..
دخل صقر وهو يناظر فيها : شيهانة
شيهانة لفّت عليه ومعها السكين : نعم
صقر ناظر في الـسكين : وش تسوين بهذي
شيهانة بقهر : بـ أحطها في رقبتك بعدها بـ اقطع فيها وريدي
صقر ضحكت وهو يقول : وش فيك من الـصبح
شيهانة جت بتتكلم بس دخلت ليال
وقّفت جمب صقر وهي تناظر في ليال
ليال : فيه شي تبينني أساعدك فيه
شيهانة وهي تحاول تضبط نفسها : لا مافيه
صقر ناظر فيهم ثنتينهمم
توجهتت شيهانة لـ الموية المغلّية تبي تسوي أي شي يشغلها
أخذتها وهي تفتح القدر : وش هذا عايشة ؟
عايشة : هذي اللحمة .. للحين ما بعد أستوت
شيهانة جت بتصب الـموية
جتها ليال وهي تقول : لحظة ما يسير تحطين الموية كلها واللحمة ما أستوت لازن تشيلينها
شيهانة لفّت عليها وهي تقول : أعرف ما يحتاج تقولين لي
ليال ناظرت في القدر : على فكرة كذا بتحرقين الأكل و ما أحد متغدي
شيهانة تكتّفت : أحرق ؟ وش تبين الحين أنتي .. أنا اشتغل بكيفي .. وقت ما تسوين أنتي شي ما راح أتدخل
ليال ناظرت في صقر : بس صقر يبي ياكل
شيهانة ناظرت فيها بقهر : قلت لك مالك دخل ...
ناظرت شيهانة في صقر اللي متكتف و واقف يناظر فيهم : لو سمحت صقر يعني سو شي
صقر رفع كتوفه : وش أسوي .. يعني مدري وش بيصير لو حطينا الموية و مدري وش بيصير لو تركنا الموية .. انتي تصرفي
شيهانة بـ أستفزاز : موب في اللحم .. في هذي اللي قدامي
ليال ناظرت فيها : عزيزتي شيهانة هدي
شيهانة ناظرت في صقر : تقولي عزيزتي ... تفاهم معها
تركت شيهانة الموية , لفت على عايشة وهي تقول : عايشة كملي
طلعت من المطبخ وهي مسسستفزه من تدخل ليال القوي ..
رنا قربت عندها : وش فيك
شيهانة قالت لها السالفه
رنا شهقت متحمسه مع شيهانة لـ السالفه : يبي لها جلد شكلها
شيهانة تكتفت : لا تخيلي تقول لي صقر يبي ياكل !!! بـ أموت صقر أنا , فففففففففف لا وهو ساكتت عمي .. أستغفر الله
طلع صقر وطلعت خلفه ليال
رنا ناظرت في ليال , بعدها صدت تشوف شيهانة
شيهانة لفت على ليال : وش صار ضبطتوا اللحم .. أكلّتي صقر
ليال تكتفت وهي تقول : للحين
شيهانة ناظرت في صقر بعدها لفّت بظهره موجهه لـ الصالة الثانية
و البنات معاها
و صقر جلس في الصاله مع ليال و موضي ..
ماودّه بالجلسة معهم لكن مضطر ...
تغدى صقر مع ليال و موضي فقط , اما البنات فـ طلبوا من المطعم
بعدها طلع صقر لـ برا البيت ..

ــــــــــــــــــــــــــــــــــــــــــــــــــ ـــــــ
في بيت أبو أحمد
جالس عبدالعزيز , خطوته هذي يا تقدمة مية خطوة لـ قدام يا ترجعه مية خطوة لـ ورى , بيخطبها , ويتوكل على الله , بينتظر الرد و أن شاءلله ما يكون رد سلبي
أبو أحمد وهو يبتسم : كمّل فنجانك يا عبدالعزيز
كمّل فنجانه عبدالعزيز وهو يبتسم : تسلم .. والله يا عم عندي موضوع صغير جاي انا وعمي أبو راشد بنفاتحك فيه
أبو راشد وهو يبتسم : و بـ اذن الله , أنه موضوع يفرح
احمد أبتسم , ممكن يكون توقّعه صحيح
أبو راشد ناظر في أحمد : بالنيابة عن عايلة عبدالعزيز جعل مثواهم لـ الجنة أنا بـ صفتي أعتبر أبو لـ عبدالعزيز , والأبو دوم هو اللي يخطب لـ ولده , ودنا بـ بنتك ربي يحفظها لـك لـ عبدالعزيز
عبدالعزيز ناظر في أبو أحمد وهو يقول : والله يا عم بنتك ما شفت منها الا كل علم طيب , وكل شي يشرف , وانا ما تقدمت لها الا وأنا واثق فيكم قبل أثق فيها
أبو أحمد أبتسم : الله يعلي مقامك يا عبدالعزيز
أحمد أبتسم : تسلم ما عليك زود
أبو راشد : معكم وقتكم بالربع , تشاوروا و أستخيروا و ردوا لنا ..
وقّف أبو راشد ومعه عبدالعزيز : و أن شاءلله ان رجعتنا الثانية بـ أذن الله بيكون فيها خير واجد
وقّف أحمد وهو يمسك بـ عربة أبوه : بـ أذن الله ..
عبدالعزيز و أبو راشد : فمان الله ..
طلعوا عبدالعزيز و أبو راشد ..
وعبدالعزيز متفائل جداً , يحس أنها بتوافق عليه , و بيبدأ يعيش حياته بشكل طبيعي بعيد عن كل شي شي في هالحياة ..
ــــــــــــــــــــــــــــــــــــــــــــــــــ