الفصل الثالث

رواية جثة مروة الجزء الثالث 3 بقلم محمود الأمين جثة مروةرواية جثة مروة الحلقة الثالثة شخص فاهم كويس هو بيعمل ايه؟! .. لابس كاب وعارف ان في كاميرات في المكان، راجعت الكاميرات من بداية ما دخل المستشفى عشان نحاول نشوف وشه، ولكن للاسف كان حويط وفاهم وعارف هو بيعمل ايه كويس

الشخص ده قرب من العسكري اللي قاعد عند الباب، وفضل يتكلم معاه وهو منزل الكاب على وشه والغريب ان العسكري مشكش فيه خالص وبعد شوية الشخص ده طلع فلوس ولقيت العسكري بيسيب مكانه وبيروح الكشك اللي قدام المستشفى وبيجيب منه سجاير وبعدها رجع، وطبعا كان الشخص ده دخل الاوضة وخلص على مروة… طبعاً العسكري اتحول للتحقيق وغالبا هيتحاكم بسبب الموضوع ده

الدنيا كانت مقلوبه في المستشفى، اهل مروة واهل سعيد متجمعين، والشك رايح جاي ما بينهم، اهل مروة شايفين ان سعيد هو اللي عمل كده في بنتهم قبل الجواز، واهل سعيد بينفوا الكلام ده وبيقولوا على ابنهم انه محترم وميعملش كده

لحد ما واحد من اهل مروة رمى الاتهام على ابنهم شريف ومن هنا الموضوع كان هيكبر وكان هيوصل لخناقة كبيرة ما بين العيلتين.. تدخلنا طبعاً وطلبنا من الناس دي كلها تمشي، وفي الوقت ده وصل رجاله الطب الشرعي والمعمل الجنائي للمستشفى عشان يتم فحص الجثة ومسرح الجريمة، وفي الوقت ده، دخلت معاهم الاوضة عشان اركز في كل تفصيلة بيعملوها وافهم من دكتور الطب الشرعي اي حاجه ممكن تفيدني

قرب الدكتور وبدأ يفحص الجثة اللي كانت مضروبة بسكينة في منطقة الصدر.. وبعد شوية اتكلم دكتور الطب الشرعي وقال _القاتل هنا هو هو القاتل اللي حاول يخلص عليها في الشقة، وهعرفك بقول كده ليه؟!

اول حاجة القاتل خاف مروة تفوق وتشوفه او تصرخ في اللحظه اللي بيطعنها فيها وعشان كده اول حاجه عملها ان رفع جهاز التنفس عنها ومسك المخده الصغيره اللي موجودة تحت راسها وكتم نفسها وبعدها خرج السكينة وضربها ضربتين في منطقة الصدر، وهرب من الشباك المفتوح ده

واللي خلاني اقول ان هو هو نفس القاتل، السكينة المستخدمة في جريمة القتل ودي مش سكينة عادية.. دي سكينة من نوع حاد جداً واللي بيتعامل بيها هو عارف بيعمل ايه ومتمرس كمان، ومن الواضح ان في المرة الاولى في حاجة حصلت خلت القاتل يهرب بسرعة ومقدرش ياخد وقته عشان يخلص عليها، لكن في المرة التانية كان عارف كويس وهو بيعمل ايه

بعد ما الدكتور خلص كلامه، خرجت من الاوضه وانا شكي بيزيد في شريف اخو سعيد العريس.. تقرير المعمل الجنائي اللي اثبت ان في نقط دم غير متطابقة مع عينة المجني عليها، وجريمة القتل اللي تمت دلوقتي واللي بيستخدم فيها سكين حاد، واظن انه هو اكتر واحد بيتعامل بالسكاكين، عشان هو شغال في جزاره يعني وده هو اقرب احتمال وبنسبة كبيرة هو اللي حاول يقتل مروة في المرة الاولى، وهو اللي خلص عليها في المره التانية

وعشان كده طلع اذن بالقبض على شريف، واتحركت انا ومعايا قوة من المديرية عشان اقبض عليه، واول ما وصلنا عنده كان مذهول من قرار القبض عليه ولكن في النهاية اتمسك وبعد اقل من ساعه كان واقف قدامي في المكتب، واول قرار اخدته هو سحب عينه دم منه ومضاهاتها بالعينة اللي وجدت في شقة سعيد اثناء محاولة القتل الاولى، وبمجرد ما هتتأكد تطابق العينة هيلبس شريف جريمة القتل وهتكون متفصله عليه

واللي كنت مستغربه وقتها هي ثقه شريف في نفسه، شريف كان متاكد ان العينة هتكون سلبية بس واحد زيي ياما اتعامل مع مجرمين عارف ان ساعات بيكون القاتل مش عاوز يتكلم وبيسيب الامور لحد ما تضيق عليه تماماً.. ولما بيلاقي الادله كلها ضده بيتكلم وبيعترف.. وانا كنت شايف نفس الحالة دي مع شريف، الشخص اللي متملك منه جنون العظمة وفاكر نفسه هيهرب من العقاب

وبعد ما اتسحبت منه العينة امرت العسكري يرميه في الحجز لحين ظهور نتيجة العينة، وفي نفس الوقت عرفت من دكتور الطب الشرعي نوع السكين وعرفت ان هو نوع مغمور ومش بيستخدم كتير.. وبدأنا رحلة بحث مع كل المحلات اللي بتبيع السكاكين دي عشان مثلا يصادف اسم واحد من المشتبه فيهم في القضية، الموضوع مكنش سهل خصوصا ان المحلات اللي بتبيع النوعية دي، متوزعين في كذا مكان في مصر وفي الوقت ده لقيت الدكتور صفوت بيتصل بيا وبيقولي

_ايوه يا باشا، انا مش عارف اتصرف ازاي؟! .. في رسالة وصلت على تليفوني من رقم دولي غير الرقم التاني، الرسالة فيها تهديد ليا ولبنتي بالقتل والشخص ده بيقول انه هينتقم مني عشان بلغتك بموضوع الرسايل.. انا مش مهم لو جرالى حاجة، المهم عندي بنتي، مش هسمح لحد يأذيها.. ولازم حضرتك تتصرف وتحميني انا لو حصلها حاجة مش هعرف اعيش = طيب اهدى يا دكتور وانا هتصرف، وابعت الرسالة والرقم التاني على الواتساب

قفلت مع الدكتور صفوت واتصلت بمباحث الاتصالات عشان اسالهم عن الرقم اللي بعته، والاجابة كانت متوقعة ان ده رقم مربوط بابلكيشن وللاسف الرقم وهمي والموضوع اخره حيطة سد كنت هتجنن وعاوز اعرف مين الشخص اللي مخليني الف حوالين نفسي ده، مين الشخص اللي بيعمل ده كله؟! ومكنش قدامي غير اني احقق مع الاتنين المشتبه فيهم، وهما وليد اخو مروة المدمن اللي كان عاوز فلوسه منها وده دافع للقتل خصوصا انه مدمن مخدرات

والشخص التاني وهو صفوان صاحب الحضانة اللي كانت بتشتغل فيها مروة واللي حاول يعتدي عليها وهو سكران ولكن هي قدرت تدافع عن نفسها واتسببتله في عاهة مستديمة

في الوقت ده، وصل تقرير العينة الخاص بشريف واللي هيثبت اذا كانت العينة متطابقه ولا لا، كنت ماسك الملف في ايدي وعاوز افتحه ولكن هديت نفسه وفتحته واتصدمت من النتيجة مع الاسف العينة كانت سلبية وغير متطابقة وده معناه ان شريف براءه من تهمة القتل وكده باقي اتنين مشتبه فيهم اتنين وليد وصفوان

كنت تعبت من كتر التفكير في القضية، وعشان كده قررت افصل شوية طلبت من العسكري ما يدخلش حد عليا نهائي، وفضلت باصص للسقف وسرحان ولكن دماغي مش مبطلة تفكير، وفي اللحظة دي افتكرت حاجة كانت غايبة عن بالي، الشخص اللي بلغ القاتل ان الدكتور صفوت بلغ عن الرسايل وبعدها لقيت نفسي بفتكر اليوم اللي كنت براجع فيه الكاميرات في المستشفى الشخص اللي لابس كاب وبيحاول يخبي ملامحه واللي وقف يتكلم مع العسكري واداه فلوس يجيب سجاير، وده معناه ان الشخص ده كان عارف ان الدكتور اتصل بيا واشتكى من العسكري عشان كان بيشرب واستغل النقطة دي لصالحه عشان يبعد العسكري عن الباب.. للاسف تفكيري وداني في حته وحشه جداً وخلاني فكرت في الخيانة

تليفوني رن واللي كان بيتصل كان صاحب محل من المحلات اللي بتبيع السكاكين

وطلب مني اروح عنده المحل عشان عاوز يوريني حاجة، اتحركت بسرعة على المحل ولما وصلت لقيت الراجل بيديني فاتورة شراء سكينة وكان فيها حاجة غريبة، الفاتورة دي كانت باسم شخص اسمه علاء حافظ مفيش مشكله في الاسم ولكن المشكله الكبيرة ان علاء حافظ ده يبقى جار صاحب محل السكاكين والراجل ده توفى من سنتين وهنا طلبت اراجع كاميرات المحل في اليوم اللي اشترى فيه السكينه عشان نشوف مين الشخص ده.. خصوصا ان التاريخ اللي موجود في الفاتوره قبل محاوله القتل اللي حصلت في شقه الاستاذ سعيد بيوم واحد، ولكن في اللحظه دي رن تليفوني واللي بيتصل كان الدكتور صفوت فتحت الخط ولكن…

لو عايز الرواية كاملة اضغط على : (رواية جثة مروة)