رواية جيت مابيك تحقرني جيت أبيك تعز شاني الفصل الحادي والخمسون 51 - بقلم r010ee

فتح عينه وهو مايدري متى غفت عينه
مد يده وأخذ جواله عقد حواجبه ..وهم يشوف
الساعة باقي شوي وياذن الظهر ..طالع عبير بعدها نايمة.. رجع دق
على الشموخ هالمرة الجوال مقفل .. حس بقلق
ابعد المفرش ..وبسرعة لبس ثوبه وطلع ..
اتجهه لشقته ...أول ماوصل نزل وهو يمشي
بخطوات ‏سريعة ..دخل الشقه وهو يدورها بعيونه ..
مالها أثر بالصاله .. أكيد نايمة ..بسرعة
تحرك صوب غرفتها ..أول مافتح الباب لفحه
برودة التكيف ..جاء بيرجع يقفل الباب مايبي يزعجها بس وقف يوم سمع صوت انيين خافت فتح النور ..وقرب منها وعقد حواجبه ..وهو قلقان
كان وجهااا أحمر ومعرق ...مد يده لسعته حرارة
خدها ..قال بخوف : شموخ بس ماردت عليه رفع شعرها عن وجها وقال بخوف شموخ تسمعيني
ارتاح يوم فتحت عينها وطالعته قال بسرعة : عندك حرارة قويه يالله اوديك المستشفى

كانت تسمع صوته وهي تحس إنها تحلم جالسه فيه
إلا عناد الحين ماهو يمها أبد تحس جسمها مكسر وتعبانه حدها أول مره تكون بهالتعب ..بس يوم سمعت صوته يتكرر عليها رجعت فتحت عينها وهي تتأكد من وجوده فعلاً
كان جالس قدامها ويكلمها ..بس ماتدري وش يقول
رجعت قفلت عيونها ...

وقف وأخذ العبايه وقال وهو حزين عليها: بساعدك تلبسين عباتك
وجلس جنبها ومسك يدها شموخ تسمعيني
يالله بساعدك عشان تقومين

الشموخ رجعت فتحت عيونها وهي يالله قادره
قالت بتعب :ودني لأمي مابي المستشفى

عناد هز رأسه ونزل نفسه عشان يساعدها تقوم وقال : ماعليه اوديك المستشفى أول
وبعدها بوديك لأمك أوعدك ...

الشموخ أول ماحطيت رجولي على الأرض
حسيت الدنيا تلف فيني ولا أنا قادره أوقف مسكت فيه وقلت بتعب :والله مافيني حيل على روحة المستشفى ودني لأمي بس وبأخذ مسكن وبطيب بعدها صدقني لو شفت أهلي بطيب وبنسى كل شيء يوجعني

عناد قلبه وجعه من كلامها ..هز رأسه مايبي يأخذ ويعطي معاها وقال : أبشري ولا يهمك
ساعدها تلبس العبايه ومشاها معاه وهو يسمع ‏اعتراضها على روحة المستشفى ...
=======
===
=
بالفندق
صحت من النوم ..ابعدت المفرش وهي تدوره
بعيونها ..ماله أثر بالغرفة ..انصدمت صدمة عمرها
توقعت أول ماتصحى تشوفه قدامها او تصحى
على صوته ...مثل ماحلمت هاليوم يكون مميز بس خاب أملها ...مدت يدها وفتحت جوالها ودقت
رقمه ...مارد ..بعدها أخذت شور وغيرت لبسها
وجلست تنتظره ..رجعت دقت أعطاها مقفل .. عضت شفتها بقهر وغيض ..جلست تدور بالغرفة رايحه جايه ..وهي مره تسبه ومره تدعي على الشموخ ... طول حيل ..فكرت تدق
على أمه ايه مافيه غيرها تعرف له ..دقت
رقم الجوهره أول ماسمعت صوتها قالت وهي تصيح :جوجو بموت والله من الي سواه فيني ولدك

قالت بصوت ثقيل من النوم : بسم الله ايش فيه

:صحيت ماحصلته أمس موصلها معي
والحين أكيد راح لها ورجعت تصيح بقهر

حطت يدها على راسها الي يوجعها آه الي مرت فيه امس شيء كثير عليها قالت بطفش من صياحيها : خلاص بيبي الحين بدق عليه وبربيه لك
وأخليه يرجع لك

عبير وهي تصيح : مدام ميت عليها كذا ليه تزوجني

الجوهرة عضت شفتها وقالت : ي عيوني والله لا اجيب لك حقك منه ولا يهمك والحين يالله ي حلوه
اطلبي لك شي تأكليه ودلعي نفسك وماعليك فيه وصدقيني بيرجع يدور رضاك

عبير بقهر : يدور رضاي قولي يدور رضاها ودي اعرف على وشهوو ميت عليها لاجمال ولا ‏أخلاق

الجوهرة ابتسمت بسخريه : ايه مره مابها جمال اقول بيبي كلي وعيني من الله خير وصدقيني بيجي وبيطلب رضاك وماوصيك أثقلي لا تسامحيه
على طول عشان يعرف غلطه
وقفلت من عندها وهي تقول أكبر همي انتِ الحين
آه أنا وين وانتِ وتفاهتك وين وعضت شفتها بقهر كل ماتذكر كلام خويي مصعب تموت من القهر
كله من غباء زيد وصالح ...ضيعوو عليها فرصتها

=======
===
=
بالمستشفى
مركبين لها محلول عشان حررتها تخف رفعت عينها بملل: خلاص خلهم يبعدونه مافيني شي الحين

عناد أخذ نفس وهو يصبر نفسه : شموخ اصبري شوي عشان صحتك وبعدين ليه مستعجله كذا
هو بينتهي وبنطلع خلاص

الشموخ بوجع طالعته وقالت : طيب وجع قلبي وش يخففه

جاء بيتكلم قاطعته وهي تقول بضعف : لو تبي راحتي اطلع وصدت وهي تلوم نفسها ليه قالت له كذا بس والله غصب عنها ..زواجه وجعها أكثر من الوجع الي تحس فيه ..ليه ماعطاها فرصه
وهي رآح تثبت له ..صدقها معاه ..رفعت يدها اليمين ومسحت دمعتها وهي تردد وش يفيد الحين العتب ي الشموخ طار من يدك خلاص ...
قفلت عيونها يوم سمعت صوت الباب
ودها تصرخ وتقوله اطلع من حياتي كلها ..
كافي الي صار لي منك ..حتى صحتي معادها مثل أول ..
بعد ساعة رجع الغرفة ...وقرب منها بعد ماابعدت
الممرضه المغذي من يدها ..ساعدها تقوم
ومسكها وطلعوا من المستشفى ..
اول ماحرك السيارة قال : وشلونك الحين
ان شاءالله ارتحتي بعد المغذي

الشموخ من غير ماتطالعه : أحسن بكثير

عناد : اممم مدام تحسين نفسك بخير وش رأيك نمر مطعم ونتغدى ميت جوع من امس ماأكلت شيء قال كذا يبيها توافق عشان يطمن انها أكلت قبل يروح لعبير

الشموخ طالعته بصدمه وقالت بسخريه : ي هوو تراك عريس لو كنت ناسي وش مطعمه الحين

عناد طالعها وقال :متذكر مايحتاج

الشموخ سندت راسها بتعب : ودني لأمي بس

عناد بيعترض قاطعته الشموخ : عناد أنت هالفتره
جالس مع زوجتك خاف ربك فيني مجلسني بلحالي بهالشقه والحين تعبانه مافيني أجلس فيها وحيده

عناد قاطعها وقال: بجلس معك

الشموخ طالعته وسكتت شوي وقالت بغصه : ورحلتك لشهر العسل عضت شفتها تمنع دموعها
تذكر وشلون أول ماتزوجها كيف كان مدلعها
وهي ماهي طايقته والحين تعض اصابعها ندم

عناد طالعها ورجع طالع الطريق وقال : تتأجل لما تطيبين

الشموخ وهي تحس دموعها على خدها : عناد لا تزودها علي ودني لأهلي وقت ماترجع من سفريتك تدل بيت أهلي وبعدين كلها حرارة وخلاص الحمدلله الحين مافيني شيء وبرتاح أكثر لو جلست عند أهلي وبصوت مخنوق والله محتاجتهم حيل

عناد قبض على الطاره بقهر .... يالله الحين وش يسوي بعمره ماغير ظلم الثنتين معاه
قال بجمود : بوديك وبخليك ترتاحي هالفتره عندهم بس أول مارجع ترجعي معي على طول ولا..

الشموخ وهي تقاطعه : تطمن برجع معك وبتكمل انتقامك مني على الأخر

عناد طالعها ورجع طالع الطريق ...آه ليت مثل ماتفكري ي الشموخ ...

الشموخ قالت بتعب : أول ودني الشقه بأخذ كم غرض

عناد هز رأسه بدون صوت ..اتوجهه للشقه وكلها دقائق وصلو ..وأول مادخلووا قال عناد وهو يشوفها اتجهت لغرفة النوم :طيب انزل أخذ شيء تأكلينه قبل تروحين لهم

الشموخ من غير ماتطالعه : لااااا بأخذ بس أغراضي وبطلع بسرعه

عناد وده يقول لها تكفين لا تروحين ..خايف من روحتها ..أبد ماهو مطمن لها ..بس قال بقلة حيله وهو يجلس على الكنبه : انتظرك

الشموخ
دخلت الغرفه بسرعه جمعت .. أغراضي
الي بحتاجها ..هالفتره طالعت الجوال المرمي بالأرض طنشت .... ..وطلعت شفته
متمدد على الكنبه وحاط يده على عيونه
قلت بهمس : جاهزة انصدمت يوم طالعني كانت عيونه حمرا.. وبها حزن غريب أول مره اشوفه بعيونه دايم اشوف العناد والقوة ..بدون حس سألت وأنا احط يدي على رأسه اشوف حرارته : فيك شي تعبان لا يكون عديتك بس سكتت يوم حسيت بحرارته طبيعيه

عناد مسك يدها وجلس وقال بغصه :مافيني إلا العافية يالله مشينا وطالع الشنطه
الي بيدي حملها منها وقال جوالك معك

الشموخ هزيت رأسي بلاااا

حط الشنطه وراح للغرفه وجاء وناولني وقال : اشحنيه اوكيه وخليه على طول مفتوح طيب اي وقت ادق عليك وردي تمام لا تخليني اقلق

صديت وقلت : ماله داعي تقلق وبعد الجوال ماحتاجه مدام عند أهلي

عناد أخذ نفس وقال بضيق : شموخي لا تعانديني الي فيني يكفيني والله تعبان حدي حسي فيني
لو مره

انصدمت يوم قال (شموخي ) أول مره ينطق اسمي كذا مديت يدي وأخذته .. منه بدون ماتكلم وتحركت قبله وطلعنا السيارة ..وطول مسافة الطريق ماتكلمنا مع بعض ....أول ماوقف ‏السيارة قدام بيتنا طالعت البيت وقلت بغصه : ماتوقعت بشوف بيت أهلي طالعته وقلت حرمانك لي من زيارة أهلي ذبحني والي سويته فيني ذبحني أكثر ي عناد بس أعرف شيء واحد ماعمري لمتك
تدري ليه لأني أنا مقدرت النعمه الي كنت فيها
وأقولها لك مااستاهلك وترى ( ممنونه لك وأنت سترت علي ) وعضيت شفتي امنع دموعي وقلت وشفتي ترجف الله يوفقك مع عبيررر وليت قلبك يحن وتطلقني صدقني ماراح أقدر اتحمل أشوفك معاها ولو تبي تأخذ ذنبي كمل الي ناوي عليه ..ونزلت بدون ما أعطيه فرصه يتكلم ..دخلت الحوش
... مسحت دموعي ..وقويت نفسي ودخلت البيت ..شفت أهلي
متجمعين على السفره يتغدون ..حسيتهم انصدموو من دخلتي عليهم ...ابتسمت ..على صراخ أميرة الي ركضت وضمتني وأمي وهي تقول راشد تشوف الي اشوفه ....
صحت غصب عني يوم أمي سحبتني من حضن أميرة وضمتني لصدرها قلت بوجع :آه يمه
ام الشموخ وهي تصيح :عيون أمك
ابعدتها شوي وهي تطالع وجهاا الذبلان قالت بحسره : ليه سويتي بعمرك كذا ليه قبلتي على حالك الذل وحنا موجودين ونقدر نكسر عينه
ونأخذ حقك يس صار العكس كسرتي عيونا ليه يمه خليتنا بهالموقف يوم وقفتي بصفه الحين وش مستفيده بالله ماغير حرقة قلب لك ولنا وقالت بقهر شوف ي راشد بنتك وشلون نحفت والله ماتردها له من الحين أقولك

الشموخ عضيت شفتي مدري وش أقولها لو عنادت وجيت مثل ماتقولين أتوقع فعلاً بصير ذليله أكثر وهالاستقبال ماراح تستقبلوني فيه وراح بنفسكم ترموني له بعد مايقول لكم بسواد وجهي ...طالعت أبوي الي واقف يطالعني بعتب
قربت منه ورميت نفسي بحضنه وصحت وطلعت
الي بخاطري كله وكل مايهديني ارجع اصيح
نفسي ‏أقول له ..وكاد يصدقني وانفك ..من الخوف
والرعب والتهديد الي مسويه لي عناد بس مافيني اصدمه ....
قال وهو مقهور عليها :اوشش يبه وهدي شوي
وقولي لي وش مسوي فيه ال****** والله
أطلع حقك من بين عيونه واعرفي شي واحد
حتى نومي ولقمتي ماهو متهني فيها وانا داري أن بنتي ضايقه بس مثل ماقالت أمك كسرتي عينا يوم وقفتي بصفه ومعاد قدرنا نسوي شيء وأنت راضيه

الشموخ حاولت امسك نفسي وقلت وأنا امسح دموعي :ييه تطمن هالصياح كله عشان فقدتكم بس إلا عناد ماقصر معي بشيء والحين
جابني لكم وبجلس عندكم شهرر وضحكت بمكابره بتملوون مني اخخخ وراح تدقون عليه تقولون له تعال خذ مرتك

أم أميرة بقهر :ايه هالشهر يبي يخليك هنا عشان ينفك منك ويقضي ذا الشهر مع زوجته الثانيه عساه مايتهنى ولد الجوهرة ‏آه الحافي المنتف
مايستاهلك والله

الشموخ نزلت رأسها وقالت بغصه : ماما انا طلبت منه يوديني لكم وبعدين عناد ماهو منقص عني شيء

أم أميرة بقهر ضربت كف بكف :اسمعو بعدها تدافع عنه متزوج عليك ي الخبله افهمي وش تبين فيه وطالعت زوجها من بكره تروحي مع أبوك المحكمه وتخلعيه
الشموخ ابتسمت بألم ..ليتها بهالسهوله يمه
مثل ماتقولين ...

أميرة قربت من الشموخ وقالت بعتب وهي تطالع أمها وأبوها :اممم تعالي تعالي ي بعد قلب أختك
عندي سواليف واجد لك ومشتها معاها لفوق
وهي تقول آه وحشتيني حيل وهمست لها
انسي كل شيء يوجعك

الشموخ دخلت الغرفة وهي تطالعها بشوق
آه وحشتها حيل ..طالعت أميرة وقالت : ماهو مصدقه اني رجعت لها ..
أميره وهي تمسك يدها : ي قلبي انتِ والله
وش رأيك بعد نطير لميمه مدام باقي اسبوعين على الجامعه صدقيني راح نفسيتك تتغير

الشموخ بحماس : ياليت والله فقدتها واحس اني محتاجتها .....

{الديرة }
بعد الغداء
تجمعنا ...على القهوة والحلا وماشاءالله على خالة
عواد ي هي عسل..بس ماحبيت نظرات خالتي احسها تطالعني وترجع تطالع ابتسام‏ ..وتطالع الطاولة ..استغربت ‏.. همست لابتسام
وقلت لها : وش فيها خالتي معصبه شكلها علينا

ابتسام طالعت أمها وفعلاً كان تأشر لها بعيونها
وقفت وقربت منها وقالت بهمس : سمي يمه
قالت بحده وهي تهمس :وين الحلا
الي وصيت عليه عواد يجيبه

ابتسام عضت شفتها وقالت :نسيته والله

أم عواد بحده : روحي قربي كل شي الحين
خالتس بتروح بعد العصر لأهل رجلها

ابتسام هزت رأسها وقربت من شمسه
.وهمست نسينا الحلا الي أمي وصت عليه

عضيت شفتي آه الحين خالتي بتمسكها علينا الله يستر بس .. بس ابتسمت يوم قربت مني ..بنتها الصغيرة ..مديت يدي وحملتها وجلست ابوسها طالعت حياة يوم قالت : وينك عواد تعال خالتي تسأل عنك
قرب منهم وقال وهو يضحك: وش اسوي زوجك نشب لي ي خاله وبالعافية يبيني اشاركه مشاريعه الفاشله طول وقته يطرح ويجمع جننني

خالة عواد قالت بطفش: بعد أنت ابلشك معه
نصيحه وأنا خالتك لا تسمع منه ترى ماوراه
إلا الخسايرررر أسالني أنا عنه اصحابه يصيحون
من الي صار لهم بسبته

عواد جلس جنبها وقال :لا تخافين ولد أختس
حريص وماله بهاالشغلات وأخذ الفنجان من حياة وابتسم لها وقال : يجعلني ماذوق حزنك

حياة ابتسمت له بحب وقالت : الله يحفظك لنا

عواد طالع شمسه وشلون بنت خالته
متعلقه فيها قال :أجل بنأخذ عليتس أميرة ي خاله مرتي حبتها

شمسه ابتسمت له وقلت وأنا أبوس أميرة : ايه نأخذها‏ وبندلعها بعد بس سكتت يوم قالت حياة وهي تحط يدها على كتف عواد :وشهوله تأخذون البنت عن أمها جيبو لكم بنيه ولا ولد وخلوو البزران مع أهلن

عواد ابتسم وقال: هاا حياة مقهوره عشان ماعرضنا نأخذ بنتس الدلوعه

حياة وهي تضم بنتها : ايه بموت من قهري
وضربت كتفه عواد بنتي زينة البنات وجيب مثلها بس وقالت وهي تطالع شمسه والله اني صادقه ودي بشوفة ضناك يروح أختك

عواد طالع شمسه الي منشغله بلعب أميرة
قال :الله كريم

شمسه حسيت بكتمه ودي أقوم بس خايفه
يحسووون اني زعلت والست.. حياة توصل للي تبي
وبعد ماهو مرتاحه لجلسة حياة وعواد مع بعض
انقهر حدي يوم اشوفهم مع بعض ..ادري وراء جلستهم ذي بتصير مصيبه ..وحنا يالله نقول بسم الله ...نزلت أميرة وقلت لها : ي عسل يالله نروح نساعد ابتسام بس رفعت يدها تبيني احملها ابتسمت لها وحملتها وانا اضحك عليها يوم رفعت يدها تصفق يقال فرحانه بوستها وانا امشي يارب تحفظها
دخلنا المطبخ نزلت أميره وقلت وأنا مصدومه
:خالتي تحتري الحلا وانتِ جالسه تتكلمين بالجوال

ابتسام ابعدت الجوال وقالت بهمس: نشب لي
بسام لي ساعة احاول اصرفه ماقدرت خذيه بدالي

شمسه قربت من الثلاجه وطلعت الحلاااا
وانا اقول بخبث : الله يخلف بس يقال هو الي نشب ماهو الابتسامه شاقه الوجه والخدود مورده بعد
واشرت لأميره تلحقني طلعت من المطبخ بس
وقفت مصدومه من الي أسمعه
: صدق عواد والله كبرت لمتى بتصبر عليها
ولا ناسي السنوات الي ضيعتها من عمرك عشانها

: حياة ترى ياللا الحين اموري زانت تكفين لا تخربينها

خالة عواد : بسم الله ليه وش فيه بينكم صار بعد ذيك السالفه

حياة : شايفه حالها بقوه عليه وكل ماهاوشته يشوف مصلحته قال ماعندي إلا أصبر عليها بنت عمي وملزوم فيها

خالة عواد : من مبطي رادها على قول أمك
ي عواد وبعد أموركم مازانت غريبه وش الي مكدرها للحين

ام عواد :على قولتس من مبطي بس شمسه ماهي راضيه ومضيقه على نفسها وعلى ولدي والله وأنا اختس قلبي منحرق عليهم الأثنين لا أنا راضيه فيها ولا راضيه بولدي كلهم على قلبي غالين بس ولدي موجعني حاله

خالة عواد : ماعليه مصير حالهم يتعدل
وطالعت عواد اصبر يمه عليها وكاد تعقل وتتفهم
الي صار

شمسه حسيت بقهر ..وهم يحكون عن مشاكلي
مع ولدهم ...وبعد عواد ماقصر ..معاهم بدل
مايسكتهم ..الولد جالس يفضفض ويسمع لهم ... تمنيت مايعطيهم فرصه ...بذات حياة بس خاب ظني فيه ...قربت منهم وطبعاً الكل سكت
جت عيني بعين عواد حسيته ارتبك وتوتر حده
آه أنا استاهل صدقتك ..ي الكذوب توك امس
توعد أن الحياة كلها معاك سعاده بسعاده
حطيت الحلا على الطاولة ..وأنا ودي انسحب
بس مابي منقود علي ...جلست ورجعت حطيت ‏أميرةبحضني وهمست لها: ودتس نلعب بالحوش
هزت رأسها ..وقالت بحماس : ايه

عضيت شفتي وقلت وأنا أتذكر أبوها : بس ابوتس بالمجلس ولد خالتس بيهاوشنا وأنا أشر على عواد

أميرة بوزت وقالت بدلع : مابي بلعب برا هنا طفس

شمسه بوستها وأنا أقلدها : صادقه هنا طفس ولا يهمتس يالله نطلع غرفتي ونلعب
حملتها وطالعت خالة عواد وأنا مبتسمه ابتسامه مزيفه: بأخذ الحلوة ذي لغرفتي
قاطعتني أميرة وهي تقول : بنلعب كثيرر وهي تفتح يدها
بوستها وقلت : كثير كثير
واعطيتهم ظهري وطلعت وأنا اقول بنفسي حشوو
على راحتكم ...خليت لكم المكان بعد وصلت لشقتي ونزلتها
على الأرض وأنا أقول : هااا وش ودتس نلعب فيه
ي عسل

نطت بفرحه وهي تروح وراء الكنبه وتقول : يالله دوريني وقفلي عيونك

شمسه مت ضحك عليها قلت : وشلون ادورتس
وانتِ متخبيه قدامي ..زحفت شوي وقالت بحماس : طيب الحين تسوفيني

سويت عمري ماشافتها وقلت وأنا اضحك عليها وعلى نطقها لحرف الشين :لا قفلت عيوني وجلست احوس بمكاني ادورها ...
كلها ثواني ومسكتها وقلت وهي تصرخ معترضه : مسكتس وبأكلتس الحين

اميرة وهي تصرخ معترضه : لا لا ماقفلتي عيونك
غساسه مثل بابا

شمسه عضيت شفتي : اخخ طولتس شبر
وهذي لسانتس طيب أنتظري أروح أجيب
ربطه ونربط بها عيوني وقلدت صوتها عسان مايصير فيه غس ابتسمت على حماسها
ورحت جبت ربطه وربطت على عيوني ..
وأنا أقول يالله تخبي بسرعه.. بس تكفين ابدعي وغيري المكان الي تتخبين فيه والقهر وين يوم تعترضين عشان مسكتس ..وتحطينا غشاشين وأنتِ ماعندتس إلا نفس المكان

أميرة وهي تتلفت بحماس تدور مكان ....
: خلاص أسكتي عسان ادو مكان

شمسه : اخخ آسفه أنتظرت شوي وقلت هااااا تخبيتي بس مردت علي ..
وباب الشقه انفتح معقول طلعت برا تدور لها مكان
ابتسمت وسندت يدي على الكنبه وأنا أمشي بحذر وقلت وراتس وراتس لو فين بطلعتس ..بس خبطت في اللي قدامي عرفته من ريحة عطره ..عضيت شفتي وصديت عنه ...
بس سحب الربطه من عيوني عصبت عليه
وقلت : وش جابك خليك معاهم تأخذ وتعطي
بأمور حياتنا ....

عواد وهو منحرج : شمسه تكفين لا تفهميني غلط
الي صار ..كله ...

شمسه حسيت بضيق قلت : تكفى عواد لا تبدأ
مابي أسمع شيء خلاص مليت والله وتدري كنت متوقعه أنك مسمعه لأختك بس ماتوقعت تتكلم قدام اي أحد باللي يصير بحياتنا انصدمت صراحه

عواد رفع راسه لفوق وقال : يالله وشلون الحين تفهمين وأنا يالله قلت زانت بينا أقولك م ..

شمسه رفعت يدها وهي تقاطعه : مابي أسمع اي تبرير منك لو سمحت عواد لا تضغط علي
وسكتت وأنا أسمع تذمر أميرة :يالله دوريني تعبت أنتظر ابتسمت لها وقلت وأنا أرجع أربط عيوني :‏آسفة كله من ولد خالتس ‏أشغلني وقربت من الكنبه ومسكتها وانا اضحك : يعني حتى بعد ربطة عيوني ماغيرتي مكانتس ... يالله خلاص تعبنا صح نغير اللعبه

أميرة وهي مبوزه تكتفت : كله من هالدب هوو ‏زا وخرب علينا افف ليه زيت

شمسه طالعت عواد الي صغر عيونه وقال : انا دوب وابوتس وش يصير بالله معي

أميرة بقهر : بابا صعير ماهو مثلك كبير وهي تطلع على الكنبه وترفع يدها انت كذا كبيرر
عواد صغر عيونه وقال وهو يقلدها : بابا صعير انزلي بس لا تطحين وليت بس لسانتس زينه إلا الحروف مضروبه وبعدتس تتريقين فيني

شمسه ضميتها لصدري وقلت وأنا ‏اضحك : وهي صادقه صاير دوب ي عواد يبي لك تخفيف وزن
مع طولك مخليك عملاق

أميره : يفزع صح
شمسه ماقدرت أمسك نفسي ضحكت بصوت عالي : هههههههههه وكل ماشوف وجهه عواد المصدوم أرجع اضحك قلت وأنا أشر له يالله
ي الدوب أطلع لا تعطلنا ...

عواد رفع حاجب وقال: الحين يقال تقهريني
مع النتفه ذي ورفع كتفه وهو يبرز عضلاته وقال وش يفهكم هذي تعبت لما وصلت لها

أميرة بطفش : حلاص يالله روح بنتمل لعب

شمسه مغرور بجسمه المعظل طنشته وأنا مقهوره منه ... مابي أخذ وأعطي معه بالكلام ابتسمت يوم ردت عليه أميرة تعحبني فيه المغرور
همست لأميره وقلت : هذا مايسمع الكلام خلينا نكمل لعبنا بالغرفه ونطنشه الدوب ولعبت بحواجبي اغيض عواد الي قرب مني وحمل أميرة وهو يقول :الدوب ذا ضغطه ارتفع ويالله بوديتس لامتس وخلينا نرضي الزعول ذي

أول ماطلعوا رحت لغرفتي ..الي توقعت ماراح ارجع
لها ثاني ....بعد الكذب والوعود الي قالها لي
امس ..كلها دقايق وفتح باب غرفتي قرب مني
وقال وهو معترض :اوه شمسه ماتصل لكذا
أبد الحين وش الي صار وخلاتس ترجعي تعتكفي بذي الغرفه ترى والله صاير أكرها وشكلي بجيب عمال يهدونها ...وبخلي بهالشقة غرفة وحده عشان تعرفين وشلون تنثبرين فيها معي

صدعت من تفاهت الي يقوله جالس ..وقفت وقلت وأنا انهي السالفه :اعتراضك على جلوسي هنا اوكيه ولا يهمك بروح لغرفتك ..وطلعت من الغرفة
ودخلت غرفته وجلست على السرير وانا احس بضيق وبعد شوي واصيح بس قويت نفسي وقلت :خلاص انتهى الموضوع وياليت تطلع وتخليني انام والله تعبانه حدي ورفعت يدي
يومين وحنا نكرف

عواد رافع حاجب وقال بزعل وهو ناقد عليها: والله لو تعبتي ترى أهل رجلتس مابها شي لو ساعدتي
و بكره بعد الغدا أمي تبي الذبيحه بالبيت تنطبخ ماتبي من المطعم مثل اليوم بيضي الوجه

شمسه ابعدت المفرش وتمددت وقلت وأنا أفتح شعري وقلت ببرود وأنا مطنشه كلامه عارفه يحاول يقلب الزعل له :ماعليه مالك غير ابيض وجهك

عواد انقهر من برودها يكرهه هالصفه فيها
قال بسخريه :ماتقصرين من يومتس مشرفتني
شمسه قفلت عيوني بصبر ..مابي أزيد وأعيد
بالكلام ... انصدمت يوم قفل النور وقال حتى أنا بنام مافيني ارجع لزوج خالتي سندر رأسي...
طالعته وقلت : عواد عيب الرجال بالمجلس جالس لحاله

عواد ابتسم وقال : أخذ خالتي وراحوا يم أهله وبنام بس ساعتين وبقوم على صلاة المغرب ...

شمسه استغربت ماتوقعت يروحون أفتكرت ينامون هنا مثل ماقالت خالتي ... بس طنشت وماسألت ..تقلبت وتقلبت ..ماجاني نوم
توقعت احط رأسي انام ..على طول بس وجود عواد بنفس الغرفه موترني ..وانا ضايقه ودي اجلس لحالي ..يوم حسيت بنفس عواد أنتظم
عرفت انه نام ..ابعدت المفرش ..وقمت طلعت من الغرفة اتجهت للمطبخ ..سويت لي قهوة ..وجاء بخاطري الحلا الي جابه عواد ..بس من زيني أنزل عشان أخذ... وأنا ماجلست تقهويت معاهم .. فتحت الثلاجه واخذت توكس ..
طلعت للصاله وجلست اتقهوى واقلب بالسناب
بس وقفت يوم سمعت عواد يناديني ..رحت له
وقلت مستغربه :ايش فيه

قال وهو منزعج وصوته ثقيل من النوم : ابوتس داق علي يقول يبي يجي يزورتس

شمسه حسيت بصدمه من الي قاله
أبـــــوي
أبـــــوي
يبي يجي يزورني
بلعت ريقي وأنا اتذكر أخر موقف صار بينا

عواد ابعد المفرش وقف وقرب منها وهو يشوف
الصدمه بعيونها مسكها وجلسها على السرير وقال : مهما كان ابوتس ي شمسه وحقه عليتس كبيررر

طالعته وانا مصدومه للحين
عواد يفتكر اني مابيه يزورني بس أنا ‏‏
الي أفكر ‏ به..وشلون يتنازل ويجي لي ..بذات
وانا أعرفه قاسي ومايسأل عنا ....

وقف عواد وقال : بتوضى وبروح اصلي
وانتِ انزلي تحت بيجي معي بعد الصلاة خليتس جاهزة

شمسه هزيت رأسي بدون صوت ..
بعد ماطلع عواد وقفت ورحت توضيت وصليت المغرب ..وغيرت لبسي ...ونزلت ....اتجهت للمطبخ سويت قهوه وجهزت ضيافه ...
وجلست أفكر بجية أبوي الله يستر لا يكون وراها مصيبه ..
: وين وصلتي
طالعت ابتسام وابتسمت بتوتر ...
قربت مني وسحبت كرسي جبني وجلست
وهي تحط يدها على كتفي وقالت : لايكون الهدنه
الي بينكم اخربت ورجعتو وضربت على الطاولة وهي عاضه شفتها آه آه فيني قهر
قهر على الموهبه الي طلعت بأخوي بسبب الهدنه الحين مدام رجعتو زعلتوو بتحرمينا طبخ عواد

شمسه رفعت حاجب وقلت بقهر. : عساتس بحريقه انتِ وهدنة اخوتس فكيني بالله وخليني في الي أنا فيه

ابتسام عقدت حواجبها وقالت بجديه : شموس والله بديت اقلق

شمسه وقفت وهي تدور بالمطبخ بدون ماترد عليها

ابتسام بقلق : شمسه وش فيه

عضت شفتها تمنع دموعها وقالت بتوتر : أبوي جاي

ابتسام استغربت كل ذا التوتر والقلق عشان عمي
جاي : طيب يجي وش فيها يعني أول مره يدخل بيتنا

شمسه هزت رأسها : مافي أحد فاهمني والله
وسكتت وهي تشوف عواد واقف قدام باب المطبخ قال بجديه : عمي يحتريتس بالمجلس ...

عضيت شفتي وانا متوتره وجسمي يرجف
مريت من عنده بس وقفت يوم همس لي : هدي شوي ليه كل ذا الخوف واضح عليتس مره صدقيني راح يتضايق يوم يشوفتس بهالشكل

شمسه قفلت عيوني وتحركت بدون مارد عليه
توقعت يجي معي بس لا مالحقني اتجهت للمجلس ..وسميت
بالله ودخلت وانا احاول أقوي.. نفسي وابعد عني هالضعف ...رديت السلام وعلى طول أبوي
فز وقرب مني وهو يسحبني يمه وضمني لصدره ...انصدمت حدي همست وأنا مفزوعه : يبه
قال بصوت ضعيف : ي بعد قلب أبوك
طالعته وانا للحين احس بصدمه سلم فوق رأسي أكثر من مره وقال وهو منزل رأسه حسيت مايبي عيونه تجي بعيوني : جاي يمتس وأنا اطلب رضاتس علي

بدون شعور ضميته وقلت وأنا اصيح على صدره :ماهو أنت الي تطلب رضاي أنا الي اطلب رضاك عني تمسكت فيه وأنا اتذكر أمي ‏
صحت من قلب طلعت كل الي بخاطري صحت بسبب قسوته وبسبب الي سواه فيني عواد وبسبب فقدي لأمي ابعدني شوي عند صدره وقال وهو يمسح دموعي
:والله من يوم ماطقيتس وأنا متوجع ورفع يده يجعلها للقطع لو تمدت عليتس ولا على وحده من خواتس ظلمتكم كثير

شمسه ابتسمت بدون شعور ورجعت ضميته وأنا احس بأمان ابتعدت شوي يوم قال وهو يضحك
:مابه قهوه وأنا ابوتس

شمسه رفعت عيوني وقلت وأنا عادني متمسكه فيه :ابشر بعزك والله تجيك الحين القهوة

ابو محمد مسكها وجلسها على الكنبه وقال :
قبل تجيبي القهوة خاطرتس وشلون

شمسه
يالله الي أنا فيه حلم مستحيل يكون حقيقه أبوي جاي يمي ويبي يطيب خاطري بعد ...طالعت عواد
الي دخل وهو يرحب بأبوي وبعده ابتسام حامله
القهوة والحلا والتمر
عقدت حواجبي معقول ..هو قايل له ..يجي ويطيب خاطري بس أنا ماشكيت عليه ..بس هو داري
من شكل وجهي كان ... حسيت بخوف وقلق
لا يكون أبوي جاي عشان خاطر عواد لا لا ياربي مابي انصدم ...
وقفت وأخذت‏ الدلة ..وصبيت القهوة ومديت الفنجان لأبوي وبعده قربت من عواد وقت ماأبوي انشغل مع ابتسام يسولف معاها ..مديت له فنجان قهوه وهمست له:لايكون أنت قايل له يجي يطيب خاطري ويقال تبي تسوي فيها مصلح

عواد رفع حاجب وقال :بسم الله وش بينتس وبين أبوتس عشان اصلح بينكم

صغرت عيوني وانا شاكه فيه ..
قلت بسخريه : ليتك أنشغلت بمشكلتك معي

رفع الفنجان وقال بثقه مستفزه : خلاص تصافينا
انا وانتِ مابينا شيء اللهم لك الحمد

شمسه رفعت حاجب وقلت :ايه مره وطالعت أبوي يوم قال : عواد بأخذ منك شمسه الأسبوع الجاي
وبنروح لاصايل لمدة يومين بنشوف علومها

شمسه طالعت عواد بصدمه الحين تأكدت ‏ أن عواد ماله دخل ..عضيت شفتي متفشله يوم نزل نفسه شوي وهمس لي : ها قولي بعد أنا اللي بصلح بينه وبين أختس

ابو محمد وهو ناقد عليه : عواد وش تقول لها ارفع صوتك لو ماهو راضي قول عادي بدل هالمساسره
قدامي

شمسه حسيت بخجل من أبوي ...
عواد تفشل وقال : لو تبي تروح شمسه ماعندي مانع وطالع ابتسام الي ماسكه ضحكتها حذرها بعيونه وهو يتحلف فيها

شمسه بسرعه قالت وهي توقف وتجلس جنب أبوها: ايه بروح والله وحشتني حيل وطالعت عواد
الي انسحب من المجلس وبعده ابتسام
قلت بخوف وقلق وأنا امسك يده : يبه تكفى طمني قول مابك شي والله حدي قلقانه عليك وحاسه ان ...

ابو محمد قال بحسره وهو يقاطعها: ظلمتك كثيرر يبه وظلمت أخواتس و سجن زوج سميرة كسر ظهري وعرفت اني ماعطيت بنتي لرجآل يصونها وخفت عليكم لا يكون أنتم بعد متبهذلين على اني واثق بعواد

قالت بصدمه وهي تقاطعه : وافي مسجون من متى امس و سميرة تكلمني ماقالت لي

ابو محمد بقهر:امس بالليل مسكوه وهو معه حبوب وأختس حالتها حاله رفضت تطلع من بيتها عجزت فيها والحين جبت أمها لها عشان تهدي عليها وابيتس بعد تروحين لها

شمسه وقفت وانا اقول : يبه بجيب عباتي ... أنتظرني وبسرعه طلعت من المجلس
وانا اسمع أبوي وهو يقول احتريتس بالسيارة
بسرعه طلعت لفوق شفت عواد قدامي جالس
على جواله حسيته انفزع من دخلتي
قال بسرعه : وش فيه

طنشته ودخلت الغرفه وفتحت الدولاب ولبست
عباتي وأنا أشوفه واقف عند الباب
قلت بسرعه : رجل سميرة مسجون ليه ماقلت لي

انصدم وقال: مادري إلامنتس الحين
وبعدين وين رايحه مأخذه عباتس

شمسه بقهر من سؤاله : رايحه لأختي

عواد بسرعه قال وهو يأخذ مفتاحه من على الطاولة : يالله اودتس لها

اعطيته ظهري وقلت : أبوي يحتريني
وطلعت .......