رواية جيت مابيك تحقرني جيت أبيك تعز شاني الفصل الرابع والستون 64 - بقلم r010ee

تقلبت وتقلبت بس عيا النوم يجيها كل ماتخيل
وجود عبير في بيتها تنقهر ..جلست وهي تمسك رأسها بين يدينها آه ياالشموخ كفايه أخذت رجلك قبل ماتأخذ مكانك ببيتك ....وقفت ونزلت نفسها شوي وعدلت المفرش على جدتها وتسحبت بشويش وطلعت للحوش ....شافت خالها بدر
داخل من البوابه قالت وهي تلف الجلال على جسمها : من وين جاي اعترف بسرعه

قرب منها وقال بتريقه :وش اسوي البيت صار زحمه
قلت خليني اطلع افك شوي

الشموخ صغرت عيونها وقالت : لا تلمح مافي فكه مني جالسه هالاسبوع كله وبسحب على الجامعه بعد اول يومين وبجلس على قلبك ....

بدر ابتسم وخربط شعرها وقال بحب : والله عسل على قلبي ومسك يدها وهو يمشيها معه لبيت الشعر تعالي تعالي بسوي لك حليب كرك
وأبيك تعطيني علومك .. مع المحامي

الشموخ جلست تطالعه وهو يحضر الحليب قدامها.. وش تقول له هي عندها علوم تقولها ماغير وجع القلب ..وسواد وجهه شافته يطالعها
بدون مايتكلم ..وبعد سكوت منهم الاثنين قال : بنت راشد ماتبي تعطيني اخبارها

الشموخ بتوتر وهي تبعد عيونها عنه : اخباري تسرك

بدر بقهر : رجلك ذا ليه تزوج وش ناقصه

الشموخ ماقدرت ترد عليه وش تقول له
بس يوم حست انه مصمم يعرف ردها قالت :يقول الشرع حلل اربع

بدر رفع حاجب وقال:مستغرب منك وشلون رضيتي يا الشموخ للحين أبد ماهو قادر اصدق

الشموخ رفعت كتوفها بقلة حيله وقالت : وش بيدي اسوي مقدرت امنعه

بدر صب لها كاس حليب ومده لها وقال بشك: احس وراك وراه شيء مدري وش هوووو لدرجة مغير شخصيتك مانتي الشموخ الي أعرفها أبد حتى دلعك الي اكرهه معاد صرت اشوفه فيك لهالدرجه عناد غيرك وخلاك كذا مكسوره

الشموخ بتوتر :ليه ماتقول الزواج كبرني وعقلني وبعدين مين قالك اني مكسوره بالعكس أنا مثل

قاطعها خالها بدر وقال :الشموخ لا تحاولي واضح كل شيء عليك

الشموخ صرفت نظرها عنه وقالت : لونمت اصرف لي من هالحليب بشربه مدري وشلونه طعمه بس ياويلك لو يطلع ماهو حلووو بحرش عليك مهاوي أنك فاشل بكل شيء إلا اخبارها المطفوقه وحشتني وماجت تسلم علي للحين

بدر عرف انها تصرفه قال بصدق : لو ماهو مرتاحه معه قولي بس وأنا أخذ حقك منه وسكت وهو يشوف أمه واقفه قدام الباب وتقول بحده :بدل شغل النسوان هذا الي تسويه وتحرش البنت على رجلها افلح وتزوج وشوف حياتك ماهو واصل الثلاثين وأنت ي حسرتي مقابلني
وطالعت الشموخ بحده :قمت ادورك قلقت عليك وأنتِ مع هالمخبول جالسه ماغير يقلب رأسك على رجلك الحين

الشموخ انصدمت ماتوقعت ميمتها بتقوم من نومها تدورها ..بس فرحت من قلب جت بوقتها تفكها من تحقيق خالها ابتسمت له وهي تشوفه متفشل وقفت وقربت من جدتها ومسكت يدها وقالت : اسفه يمه والله مادريت انك بتدوريني كان ماتعبتك وقومتك من نومك يالله يا قلبي نرجع للغرفه وتنامي

بدر : وين وين مخليني لحالي وهالحليب مسويه مين بيشربه

الجدة بحده طالعته : صدق انك فاضي
مين له نفس يشرب الحين ودنا نرقد وطالعت الشموخ بعتب

بدر عض شفته بحسره : متى تجي مهاوي وتسمر معي بدون ماذل روحي عند بعض العرب

الشموخ ابتسمت وطالعت ميمتي وقلت وأنا احذره: اركد ياخال صدقني ماهو بصالحك وأشرت على عصاها

الجدة :يالله يمه وديني الغرفة معاد فيني اتحمله
بدر : آه اشك أني ولدك

الشموخ ضحكت على خالي ومشيت معاها للغرفة وأنا اشر لخالي شوي وبرجع له ...وأنا بنفسي أقول مستحيل ارجع لتحقيقك أول ماوصلنا الغرفه وميمه تمددت غطيتها بالمفرش وتمددت جنبها حطت يدها على شعري حسيت بحنان الدنيا كله همست لي :لا تسمعي كلام خالك بدر وصدقيني عناد مافي مثله ومصيره يصلح هالغلط الي مدري وش حده عليه

الشموخ عضيت شفتي وأنا امنع دموعي وهمست بغصه :وشلون يصلحه يمه وهي زوجته خلاص
رفعت عيني وطالعتها وقلت مستحيل يطلقها عارفه عناد رجولته ماتسمح له يكسر قلبها

الجدة بحنان :ماعليه يمه اصبري مثل ميمتك
صبرت والحمدلله جدك بالأخير عرف غلطه ورجع لي وأنا الحمدلله لا ضحكت علي أحد ولاصرت مسخره لحد قفلت على نفسي بابي مع ورعاني وكل ماجت وحده وقالت وشلون متحمله الي يسويه فيك وليه تزوج وش ناقصه كنت اقول لا اي وحده عندك كلمه زينه قوليها بس لو تبين كلام عشان بعدها غير تعبثين بالحكي من بيت لبيت لا ماراح تطولين شيء مني بعدها الوحده تستحي وتسكت
وأنتِ خليك مثلي مهما قلبك انكسر خلي عقلك يكون أكبر ولا تشمتي حد فيك

الشموخ خبيت راسي بصدرها وقلت وأنا اصيح بقهر : حرقة قلب يمه ماقدر اتحملها ليتني مثلك

الجدة بغصه :حاستن فيك ي بعد قلبي
مجربه والله وشلون حرقة القلب بس صبرت والحمدلله وأنتِ اصبري ربي يعوض صبرك وبيدك ترجعينه لك بس لو نولتيها رجلك هنا صدق بتكوني خسرانه خليك فطينه يمه معه لا تقابليه إلا بالزينه
وصدقيني ماراح يشوفك غيرك بس لو كثرتي عتابك ومشاريهك عليه بينفر منك وبيميل لها

الشموخ وهي تصيح بحرقه : يمه السالفه ماهو بهالبساطه السالفه كبيره ومقدر ارجعه وأنا الي ضيعته وعضت شفتها خايفه من رد فعل جدتها وهي كذا كشفت نفسها قدامها بس تطمنت يوم جدتها ضمتها وهمست لها لا تحملي نفسك هذا قدر وربي كتبه خلاص ومهما كنتي غلطانه الحين لا تجلسي تلومي حالك وتضيعي عمرك بكثرة اللوم لاسوي العكس واثبتي له انك غلطتي وقادره تغيري من نفسك عشانه ...
@
@
@

اليوم الثاني
من أمس وهي تكلم نفسها ..ومقفله على نفسها الغرفه ماتبي تكلم أحد ... خلاص شوي و تفقد عقلها ...وبعد قلقانه عليه لايسوي مشكله كبيره مع عادل وهو مظلوم مفروض تقول له ...بس وقتها فعلاً رآح تخسره طالعت الباب يوم دق قالت بطفش : شموس مافيني والله تكفين بجلس لحالي ولو تبوون تروحون لسميره روحوو انا ماراح اروح معكم بس صدمها أخوها يوم قال : اصوله بسرعه مصعب هنا
وقفت مثل المجنونه وفتحت الباب وهي ..
مصدومه
: والله اني صادق مصعب عند أبوي بالمجلس ...ويقول تعالي يبيتس ..همست صدق صدق ذا انجن وش جابه ...تحس عمرها لعبه بيده وعلى مزاجه ...امس يوم قالها انه بيجي ماصدقته بس معاد فيها تتحمل الي معيشها فيه لازم تنهي هالمهزله وتعرفه قدره سكتت كثير وجت على نفسها بعد ...نزلت تحت شافت شمسه بوجهاا قالت قبل تتكلم : أبد ماهو وقتس خليني اشوف المجنون وارجع لتس

شمسه : شوية كرامه اصايل عشان يعرف قدرتس

اصايل ماتحتاج توصيه او وشيه من أحد هي طالعه وهي مقررره ...طلعت بدون ماترد عليها اتجهتت للمجلس وهي ودها تذبحه ومعصبه حدها وبنفس الوقت فرحانه بجيته ....دخلت المجلس شافته بوجهااا قربت منه وهي تشوف ابتسامته الحقيره الي تكرهاااا وبنفس الوقت وجهه تعبان وتحسه يأخذ نفسه بالعافيه قالت وهي تحاول تقوي نفسها وتدوس على قلبها : يبه هالرجال رخصتني له قبل
لا ترخصني تالي
.........

طالعها بصدمه وقال : وأنا ولد أبوي وش تقولين يا بنت

اصايل وعينها من مصعب الي يطالعها ببرود طالعت أبوها وهي حالفه لا تأخذ حقها كله وقالت :ايه يبه والله انه مرخصني
وهذا هو قدامك مايقدر ينكر وطالعته بتحدي
وبنفس الوقت خايفه من رد فعله تحس بنظرة البرود تحولت لمكر وخبث

مصعب عض شفته بقهر ماتوقع أبد تقول كذا
يكذب لو يقول مانصدم حاول يتصنع البرود وهو يطالع أبوها الي ينتظر منه الجواب وقال بخبث وهو يهز رأسه بحسره : ي عم بنتك ذلتني ليه اعطيتني هي عطيه وطالعها وهو يشوف الصدمه بعيونها وقال بخبث أكثر وهو يحاول يقلبها عليها كم مره قلت لك أبوك مارخصك وخلينا نعيش مثل اي زوجين وطالع ابوها وقال تصدق ي عم كم مره عرضت عليها مبلغ وقدره تعتبره مهر وارتاح من هاللأسطونه بس بنتك رافضه كل مره تعيد وتزيد بسالفة اعطتيني هي وكل مره تسمعني اني ماهو قد المهر وانك شفقت على حالي واعطيتني بنتك ماتدري وش الي بيني وبينك من معزه وكح أكثر من مره وهو يقول أنا انسان مريض بالربوو الله يبعده عنك مافيني على المشاكل بس خلاص صبري نفذ كل مره أقول عيب ومنقود لو رديتها لك وش بتظن فيني ماهو قد ‏المسؤولية بس ارجع واقول أصبر الرجال وثق فيك واعطاك بنته هديه بعد
ومنقود عليك لو تردها له بس هنا خلاص ياعم أقولك اسف مدام بنتك لهالدرجه كارهتني
وقف وأشر عليها وهو يشوف الصدمه بعيونها وفاتحه فمها بطريقه غبيه طالع أبوها وقال والحين هذي بنتك مدام اختارت تبعد وماهي راضيه عن العيشه معي بسب شيء انا مالي ذنب فيه أنت بنفسك بهالمجلس قدام الرجاجيل اعطيتني هي تكون زوجه لي الحين بقولك يشهد علي الله قبلت هديتك وفرحان فيها بس مع الآسف مالي نصيب فيها وطالعها ورفع حاجب

أبو محمد وقف وقال بحده : وقف يالسنافي وطالع بنته بعتب هذي سواتس بالرجال ماتحشمين

اصايل من الصدمه الي هي فيها تحس عمرها انخرست بس طالعت أبوها يوم صرخ عليها وقف بطريق مصعب يمنعه يطلع وهو يطالعها بزعل صرخت بقهر : آه ي الكذوب وهي تحرك يدها والله يكذب يبه والله هو لي ذلني ومنزل قدري وكل ما ....

ابومحمد قاطعها بصرخه : بعد وقدامي تقولي عنه كذوب تسذا تفشليني ي اصايل
طالع مصعب وقال الحين تتجهز وتطلع معك وغصب عنها وطلع من المجلس وهو يقول يالله خذي اغراضتس والله يستر عليتس مع رجلتس وصرخ بعصبيه يالله

مصعب ابتسم على جنب مر جنبها وهمس لها وقال : قلت لك ميه مره انا مصعب ومافي وحده مثلك ولا عشره يقدرون يهزموني فاهمه شافها مقهوره حدها ابتسم وقال وهو يقلد لهجة ابوها انتظرتس بالسياره ي حلوه وغمز لها

اصايل حست الدنيا تدور فيها دخلت وهي ناويه عليه فجأة تبدلت الادور وشلون جلست على الكنبه وهي ماهي قادره تستوعب الموقف الي انحطت فيه طالعت المجلس حولها كان فاضي ..كان تبي بس تأخذ حقها منه ..وتعرفه قدره ..بس الي صار
العكس ...طالعت أخوها محمد الي دخل وقرب منها وقال :حرام فشلتي مصعب وهو مايستاهل
والله تعبان يقول يحبك وأنتِ ماهو معطيته وجهه
حرام عليتس تراه ماقصر معي نقذني

اصايل لا لا هنا صدق صدمه صرخت بقهر : مين الي كان بس يحش ويذم فيه الحين حلي بعينك
وتذكرت دوره البطولي الي سواه معاك

محمد بتوتر بلع ريقه : كنت ظالمه بس والله طلع صدق حبيب وطيب مره وطلع 1000 ريال من جيبه شوفي وش اعطاني أول ماشافني وأعتذر لانه ماجاب لي هديه ماهو مثل رجل شموس البخيل ماغير نافخ ريشه علي وعلى العيال

اصايل قالت بقهر : آه يا الوسخ بعت أختك بسبة فلوس صدق مابك خير وانا الي أستبشرت فيك

محمد عقد حواجبه وقال :وش فيتس عليه بالله والله انه يقطع القلب من شوي تعب قبل ينزل من السياره ويالله قدر يحصل نفسه بعد مااخذ من ذا الي كان تستعمله خالتي أم شمسه وش اسمه افف نسيت يالله ذكريني فيه

اصايل وقفت ودفيته عنه طريقي وانا اقول : ابعد عن وجهي الحين

محمد اعترض طريقها وقال : طيب وش اسم الي يأخذه

اصايل حسيت ودي اولع فيه من القهر جالس على راسي بتفاهاته مشيت لصاله وانا ادور أبوي بعيوني ..بس مع الأسف ماحصلته قدامي قربت مني أمي وهي مفزوعه :وش مسويه ي بنت أبوتس يتحلف فيتس والله يقول انتس غبنتيه وفشلتيه مع الرجال قولي وش الي صار وبعد محمد يقول
رفعتي صوتس على الرجال قدام أبوتس

اصايل عضيت شفتي وأنا امنع دموعي وقلت بحسره على حالي : الحين أنا الي غبنته والحق طلع علي طالعت شمسه وهي متسنده على باب المطبخ وبيدها ليمونه قالت ببرود :هذا أبوي وهذا عادته وهزت رأسها بحسره مايتغير ابدواشرت للدرج اختصريها على عمرتس والبسي عباتس والحقيه وربي يسهل عليتس وحقنا ضاع وأنا اختس خلاص ولو صدق مره تطلعي حقتس بنفستس وماعليتس بحد

اصايل صادقه ي الشموس حقنا ضاع مدام ابونا تسذا طالعت أمي الي قالت :الله يأخذه قريب ويفكنا منه مثل حرق قلوبكم وقلبي قبلكم

حسيت قلبي وجعني عليه يوم دعت عليه عشانا
قلت بسرعه : لا يمه تكفين لا تدعين وبطلع حقي بنفسي مثل ماقالت شمسه

ام اصايل وهي تصيح بقهر :كل مره وحده فيكم تطلع من هالبيت وقلبها محروق مافي حد طلع وهو راضي وش ذا الأب الله يجعلنا نبكيه اليوم

اصايل قربت منها وضميتها وأنا اقول : يمه حرام

أم اصايل بحرقه : من حرقة قلبي

اصايل قويت نفسي شوي وقلت لها ولا يهمتس يمه بناتس يعرفن يأخذن حقهن ومسكت وجها وأنا امسح دموعها يجعلني بالسل مدام هالدموع نزلت بسبتي

ام اصايل بفزع : بسم عليتس يمه لا تدعي تسذا على نفستس ماغير تحرقين قلبي زود

اصايل ابتسمت بحزن وهمست لها : سلامة قلبتس
وطلعت الدرج ورحت غرفتي وأخذت عباتي
وجيت بطلع شفت شمسه بوجهي والدموع بعيونها قلت بغصه: تكفين لا تزيدينها علي

شمسه قربت منها وضمتها وهمست لها : لو ضامتس ادبليه بسبده وهو بنفسه بيرجعك لنا بس لو راجع نفسه وتأدب وخاف الله فيتس وعزتس عزيه وحطيه على رأستس

اصايل ابتسمت وانا اصيح على كلامها
همست :أجل بدبل سبده لان مابه أمل به
واعطيتها ظهري وطلعت من الغرفه مابي اضعف
أكثر شفت أبوي قدامي وهو معصب ويهاوش أمي
الي معترضه على طلوعي قربت من وسلمت فوق رأسه وقلت بغصه :ليتك نصفتي لو مره عشان يعرف أن وراي سند
وطلعت بسرعه بدون ماعطيه مجال يرد علي
حسيت قلبي وجعني على صياح أمي طلعت شفته قدامي بالسياره ومحمد معشلق بالباب يتكلم معه
بس يوم شافني قال : ماوصيك على صاحبي طيب
وطالع مصعب لو سوت لك شيء دق بس علي اجيك خطار يم بيتك واربيها عديمة التربيه فشلتنا فيك
حسيت بقهر منه باعني سبة فلوس الخايس
اخخ وصلت اني عديمة تربيه بقهر ضربته على ظهره وقلت بعصبيه : تقلع بس ذاكر يا الفاشل

محمد وهو يتالم طالع مصعب بفشله : اخخ ياااالمتوحشه والله لو زوجك بس ماحلف علي كان مردغتس هنا وخليتس تعضين الأرض

مصعب رفع حاحب وقال وهو يبتسم :متى حلفت أنا وأشر عليها خذ راحتك وطالعها شاف نظرة القهر بعيونها وراء النقاب توسعت ابتسامته

محمد قرب منه وقال بهمس : تكفى احلف
ترى والله ماهو قدها لا يغرك قصرها تنشب فيني نشبه الله وكيلك مافي حد يقدر يسحبني من يدها

مصعب ضحك بصوت عالي وقال : ابشر تكفى
يا محمد هالمره امسحها بوجهي هالقزمه مارضى عليها تمردغها قدامي

محمد رفع نفسه وقال :عشانك بس والله
وطالع اصايل وقال وهو يضخم صوته :يالله مع رجلتس يالي ماتستحين ويالله مع السلامه
ياصاحبي

اصايل عضيت شفتي بقهر من سخافتهم سحبت محمد من تشيرته ودفيته وأنا اقول تقلع ادخل

ركبت وقفلت الباب بقوه طالعت مصعب بستفسار يوم قال : وش ذنبه بالله

رفعت حاجب يوم فهمت عليه قلت بعصبيه : ليتني اسوي فيك مثل محمد

مصعب بيرود : ماقصد أخوك اقصد باب السياره

اصايل بقهر : آه صدق هنا ليت اسوي براسك كذا وكاد قلبي يبرد وصرخت بعصبيه ليه سويت كذا ماتخاف ربك

مصعب حرك السياره وقال بحقد :يقال تنتقمي مني الحين يوم تستقوي في أبوك غبيه صدق

اصايل صرخت منهاره : وش تبي مني لا تحاول تفهمني انك ميت علي لا نيتك تقهرني وتعذبني معك

مصعب ابتسم على جنب وقال بسخريه : طيب ليه تظنين ظن سوء فيني يمكن فعلاً اكون ميت عليك

اصايل طالعته وهي تدور الصدق بكلامه بس لا كل شيء يثبت لها انا يلعب معاها لعبه خبيثه
وماتدري وش وراه من اصله جيته كلها ماهي مطمنه لها ..ماردت عليه صدت ..خلاص تحس بتعب وعارفه الكلام ماراح يفيدها ماغير يتعب اعصابها

قال بقهر :أشوفك سكتي

اصايل عضيت شفتي ومارديت عليه بس صعقت من كلامه يوم قال :أبوك ذا ي طيبة قلبه بسرعه يصدق اخخخ توقعت يطردني ولا يسوي فيها من نوعية الأبهات الي يفزعون مع بناتهم ويسوون النون ومايعلمون صغر عيونه وطالعها
ولا يكون صدق يبي الفكه منكم ومايهمه مين الرجآجيل الي يعطيهن بناته وبسخريه لاذعه تسع بنات من حقه جالسين على كبده ودبل كبودنا معه الله يسامحه هالشايب إلا صدق طلق أم محمد
والله محمد مايستاهل يتشرد بينهم

اصايل حسيت بكمية قهر ليت أبوي يسمعه
حاولت امسك نفسي واصير اخبث منه قلت
:صادق في ذي أبوي الله يسامحه يعطي بناته للرجاجيل ماهوو كفوو الي متسلط والي مجنون .....بس ماقدرت أكمل من صرخته الي فجرت رأسي ومن يده الي تمدت ناحيتني بس بسرعه قال وهو ينزل يده قبل تنمد لي :المجنون الي ماهو عاجبك
تراه متحملك على الأخر بس والله لا ينتقم منك ويخليك تبكين بدل الدموع دم وهذا الي انتي فيه وتشوفيه ظلم بقولك من الحين ولا شيء مقابل الي بيحصل لك والله لا اخليك فعلاً تفقدي عقلك وتعرفين مين المجنون وقتها

اصايل نزلت رأسي وانا حاطه يدي على فمي أكتم صياحي عارفه انه مصيبه وجت على رأسي هالمصعب ...كنت اسمع هواشه وصراخه علي حسيت ان بطني بدت تقلب علي ..أبد ماهو وقته الحين دورت فاين بعيوني ماحصلت ...بس هو مثل الي فهم علي بسرعه مد يده لوراء وسحبه وناولني وقال : تطمني لسى على وعدي و بطلقك وراح تنسين ذا كله حصلك معي

اصايل أخذت منه وانا مصدومه من كلامه يالله توه يبي ينتقم والحين يقول بيطلق
حطيت الفاين على شفتي معقول ضميره عذبه وبيردني لأهلي يارب يسويها فعلاً لأني خلاص كرهت عمري معاه توقعت يلف ويرجع بس مع الآسف باقي مكمل الطريق للرياض قلت بغصه :ليتك الحين فعلاً تطلقني وتردني لأهلي ويارب انسى فعلاً الي حصلي منك لأنه كثير والله علي ومعاد فيني

مصعب طالعها بدون مايتكلم ورجع طالع الطريق
وقال :ماهو الحين وتأكدي انه راح يجي وقته

اصايل بهمس : متى طيب

مصعب بحده : وقت ماانا اقرر افهمي الكلام وخلاص اسكتي مابي اسمع صوتك يكفي الي صار منك للحين حاقد عليك وطالعها ماراح اسامحك اصايل على سويتيه قدام أبوك أفتكرتك أعقل من كذا بس طلعتي مع الأسف كل يوم ثقتي تخيب فيك

اصايل صديت وانا ادعي الله يصبر قلبي
على المصيبه هذي احس فعلاً انه مجنون
وأبد ماهو طبيعي ...على الأخر هالمره اثبت لي
بعد صمت وقف قدام محطه نزل واخذ اغراض معه ..رجع ركب وطلع عصير ناوليني هووو صديت ماأخذته منه قال ببرود مستفز :اوك على هواك
وطلع كودرد وفتحه وشربه احسه يغيضني لاني دايم كنت امنعه يشربه واهاوشه لو شربه قدامي
وازعل منه ...بس طنشت ولا قلت شيء خلاص
مصعب اصايل الي تعرفها وكانت تخاف عليك من كل شيء خلاص تغيرت ..كسرتها على الآخر ...

مصعب طول ماهو يشرب يقول الحين تقول شيء
الحين تحاول تمنعه مثل العاده ..بس لا أبد ماسألت فيه ..جلس يتذكر وش الي يستفزها كان يسويه ايه الدخان بسرعه فتح الدرج وطلع البكت ورمى وحده بين شفته وشغلها وأخذ نفس وبدأ يكح ..فتح الدريشه
وهو يحاول يأخذ نفس ...يبيها تتتكلم تعترض تسحبها من يده مثل العاده ..تهدده انها تسوي وتسوي بس ابد طناش على الأخر حتى مالتفت صوبه ..لا لا كذا كثير ..حس بصدره وجعه ونفسه بيرجع يضيق عليه طفاها وهو يتنهد بعصبيه
صرخ بقهر : والنهايه طيب سكت يوم طالعته
رفع كتوفه بعباطه وابتسم

اصايل فزيت من صرخته المفأجاة طالعته بس ابتسم حسيت بقهر ودي ارمي بعلبة العصير هذي قدامي ..اهدي اصايل لا يتسفزك ..أخذت نفس وأنا ادعي بطولة البال
رجعت صديت وأنا عارفه كل حركاته ذي
بس يوم سمعته يكح بزياده طالعته ..بخوف وقلق
شافت وجههه بدأ يزرق وعيونه حمراء قالت بخوف : مصعب وقف السياره ماراح تقدر تسوق وأنت كذا هز رأسه بعناد صرخت بخوف : مصعب وقف لا نروح فيها هالأمور مافيها مزح

مصعب فعلاً يحس بضيق تنفس وماهو قادر يتحكم بالسيارة وقف على جنب
وهو يدعي حالة امس ماترجع له ...أشر للمويه وهو يكح بستمرار

اصايل بسرعه فتحت القاروره وناولته وهي مرتبكه وخايفه حدها قالت بقهر :دايم تذبح نفسك وتضرها
ليه ليه كذا تسوي بحالك وفيني سكتت تحسه أبد ماهو معاها ولا هو وقت كلامها الحين بتزيده كذا أفضل شيء تساعده او تسكت سند رأسه على المقعده ونفسه طالع نازله بسرعه رهيبه ويالله بالعافيه يقدر يأخذه حست بخوف طالعت حولها المكان فاضي مابه سيارات تقدر تساعدهم حتى قالت بتوتر وهي تطلع جوالها من الشنطه : بدق على ابوي مدام باقي قربين من الديره
مصعب مد يده وأخذ الجوال من يدها وقال بتعب
: لااااااا لا تخافين مافيني شيء

اصايل وهي تصيح بخوف : مصعب حالتك أبد ماتطمن جيب الجوال وخلني ادق

مصعب وهو يتعتدل بجلسته قال ببحه بصوته من التعب : الحين احسن خلاص تطمني واعتدل بجلسته ومد يده بيشغل السياره طالعها يوم مسكت يده تمنعه : لا لا مصعب انتظر شوي
حتى صدرك يهدا عليك وبقهر كله من هالدخان شربته ليه شربته الحين

مصعب طالعها وقال وهو يتبسم بتعب : لو منعتيني كان ماصار فيني كذا بس شوفي بسبة عنادك شوفي مجنونك وش صار فيه خليك أعقل مني هالمره وامنعيني

اصايل هزت رأسها بعض مرات تحسه طفل ويسوي الشيء الغلط عشان يلفت الي حوله قالت بغيض منه :مجنوني يبي له تأديب والله عشان يعرف وشلون يثمن حركاته

ابتسم وشغل السياره وقال :هذي تربيتك ادفعي ثمنها أجل

اصايل أكيد بفقد عقلي شوفووو كيف انقلب لشيء وديع يالله على كمية اللطافه الي هو فيها الحين أول ماحرك السياره قلت : مصعب لو تعبان عادي نتظر شوي لا تهور

مصعب قال بمكابره : مافيني شيء الحمدلله الحين احسن بكثير

اصايل سكت طول الطريق وانا عيني منه ..والله ماهو طبيعي طول الوقت وهو يبخ من بخاخ الربوو ويرجع يسوق

قلت بقلق : مصعب كثرته ماهي زينه مفروض جرعات بس افهم بيتعبك أكثر ماينفعك كذا

مصعب بتعب : وش اسوي احس بضيق بصدري ومابي الحاله تزيد علي اطر أخذه بكثره

اصايل بخوف وقلق :أول مستشفى على طريقنا ننزل فيه شافته بيعترض قالت تكفى مصعب
بعيد عن اللي بينا هذي صحتك مفروض تنتبهه لها
عشان نفسك بس

مصعب طالعها وقال بهمس : عشان نفسي بس

اصايل مارديت عليه وصديت مابيه يحس بخوفي ......