رواية حب أناني ( روايات ليبية ) الفصل التاسع 9 - بقلم MBC LIBYA

#حب_أناني ❤...9

ريناد:تنهدت بصدمه...حسن خطيب سهام
جود:اي نا متأكده
ريناد:انتي عارفه لكلام الي تقولي فيه لو طلع صح شن بيصير؟
جود:اي عارفه وعارفه انه سهام حاتنصدم بكل شي
ريناد:لكن انا مستحيل نرضى انه سهام تتزوج شخص حقير وحاول يهددك
جود:بعيون يدمعو...واغتصبني😭
ريناد:ضروري تحكي لي سهام كل شي انتي مش ذنبك شي!
جود:لا ريناد ردي بالك سهام ممكن تنتحر
ريناد:انتي بعقلك؟...كيف ترضي انه اختك تتزوج واحد زي هدا!
جود:اءءء....لالا خليها تتزوج ردي بالك انتي حادمري العيله هكي!
ريناد:افهمي انا مستحيل نسكت بعد الي سمعته ي جود خليها تعرف حقيقته وحاتنساااه
جود:لا ريناد حتى انا اختي منرضاش انها تاخد واحد زيه بس نا عندي فكره !
ريناد:كيف؟
جود:توا لا انا ولا انتي حانديرو شي بس بعد زواجهم حانفضحه !
ريناد:بي توتر...فهميني انتي تكدبي عليا؟ وله ع شنو ناويه؟
جود:بلعت ريقها...انا خسرت كل شي بالله عليك اوقفي معاي وافهميني منبيش عيلتي تدمر بسببي نوعدك نلقا حل 😭
ريناد:اوكى انا مش راح نتكلم واني نوعدك مش راح نخلي يوسف يكلمك ولا يضربك..لكن اوعديني انه نفضحو حسن
جود:تمسح في دموعها...اءءء تت تمام ..شكرا ريناد رغم كل شي درته معاك وقفتي معاي
ريناد:ابتسمت...لا حبيبتي نا معاك المهم نوصلو لحل واي شي
جود:تمام🥺
ريناد:طبطبت ع كتف جود وابتسمت ابتسامه خفيفه...وطلعت!!❤

🔥مـــيُـــلــو حــــسسـٰـــن🔥
🔥مـــــيُــــلــــووو حــــسـٰــن

سهام:اكيد الحقيره غفران عندها يد
كريمه:اي نا عارفه مشياتها وتصرفاتهم وراهم مصيبه
سهام:وربي لو نشدها لما نفتتها
كريمه:زعما شن صار في ريناد وصلت لحل
سهام:راح تحكي اكيد لكن اشبح يوسف يسكت او لا؟
كريمه:ربي يستر شن ناقصها باش ادير هكي
سهام:عادي لو مافيش مصيبه تانيه حانعرفوه وحايتزوجها وتمت الحكايه
كريمه:هدا لو جي ومقتلاش خوك
سهام:افففف ...جت عيونها ع ريناد كيف نازله؟
ريناد:تشوف لي سهام...عارفه انكم تستنو فيا وتبوني نحكيلكم ؟
سهام:اي احكي ريناد شن في؟
ريناد:لا سهام اسفه جود متبيش حد يعرف وو
سهام:تي خوها بيقتلاها شنو الي منسمعوشي مازال في حاجات يعني بعد الي سمعناه
ريناد:لا متلخبطيش الموضوع في بعضه...الموضوع حساس ونا حانحكي مع يوسف
سهام:دوختوني بصراحه شن القصه الي بدساها علينا؟
ريناد:افهميني سهام حبيبتي وخليك واثقه فيا ..يوسف حانحكي معاه ومنبوش الموضوع يكبر
كريمه:اي ريناد لو تشوفي هكي حل ديريه المهم فكوني من المشاكل لانه عمك مش ناقصه
سهام:تمام تمام خلينا نشوفو الي بيصير؟
ريناد:اوكى...💔

جود:اي حكيت مع ريناد زي ماقلتلي
حسين:وهوا يصفر...حلو حلو!
جود:وتوا شن بيصير فيا؟
حسين:نبي نشوفك!
جود:مستحيل مش حايخلوني نطلع!
حسين:هههههه ....المهم
جود:بصوت يرعش...🥺..شنو؟
حسين:حانحكو وحانتلاقو يااا جميله
جود:امتا؟
حسين:بعد عرس يوسف وحسن حانتفاهمو ع كل شي
جود:تتت ...تمام!
حسين:وو متنسيش لو مصارش زي مانبي حاتدمرري انتي وعيلتك!
جود:بصوت يرعش...حح حاااضر!
حسين:قوود باااي...وسكر الخط!
جود:😭

ساعه 1ونص :-

مافيش حد من العيله قدر يرقد يستنو في يوسف ع نار لما يروح شن بيدير لي جود!

ترن ترن ترن:-
علي:الو
حسن:اهلين عمي كيف حالك توا؟
علي:الحمدالله وانتا؟
حسن:بنقولك ي عمي ..ولدك يوسف بدا يلخبط وداخل في مشروع وخسارته كبيره
علي::كيف ضد من؟
حسن:ضد شركه الرخام وانتا عارف لو خسرنا حانرهنو الشركه
علي:ي حسن انا الشركه سلمتها ليك ولي يوسف
حسن:اي عارف عمي ..لكن حاول تقنع يوسف ينسحب لانه المشروع مش ساهل
علي:انشاءالله حانحكي معاه
حسن:تمام عمي ونتمنا يقتنع منم لانه نا حاولت معاه سكر راسه!
علي:انشاءالله حانكلمه ولو رفض يعني هوا عارف النتيجه
حسن:ربي يستر راسه مسكر مفهمتش خيره
علي:من يومه هكي لكن حانكلمه ويصير خير!
حسن:انشاءالله عمي تصبح ع خير!
علي:سعيده!!

كريمه:من هدا الي متصل بيك توا؟
علي:حسن يتصل
كريمه:تنهدت بخوف...علاش شن في؟
سهام:😦😦
علي:مافي شي كلمني ع موضوع في الشركه
سهام:متأكد بابا؟
علي:اي اي مافي شي
كريمه:معقوله في وقت زي هدا يتصل!
علي:اي شافني فاتح النت هدا ليش اتصل!
كريمه:اهاا...انشاء الله خير يارب!!
سهام:ياااارب غير امتا يرجع يوسف!
ريناد:مش مركزه في شي لانه ترتب في لكلام الي بتقوله لي يوسف باش يسكت وميكلمش جود !
يوسف:فتح الباب وخش واضح عليه شاارب وعيونه حمر!
سهام:كملت🤦🏻‍♀
كريمه:شنو يوسف جعان نحطلك عشاء
عبادي:اي في عشاء ساعه 2عيله منافقه!
كريمه:🙂🙂
يوسف:قرب وقف قدامهم...خيركم؟
سهام:😅...قعدنا نهدرزو خدتنا الهدرزه مع بويا
عبادي:ان المنافقين تحت درك الاسفل من النار
سهام:انتا سكر فمك مش ناقصنا!
ريناد:اءءء...يوسف
يوسف:بصوت سكران...شن صار في الكلبه!
علي:اما كلبه يا يوسف ماهو لوحنها من السنه الي فاتت
عبادي:هههههه عندك كلبه من نوع بشري فووق😂
سهام:فنصت في ريناد!
ريناد:يوسف نبيك شويه بخصوص جود
يوسف:شاااف للكل وخدا بعضه وركب فووق!
سهام:ألحقييه بسسرعه!
ريناد:اءء...اي هي ...وناااضت!

سهام:ربي يستر زعما تقنعه؟
كريمه:اهااا ياربي
عبادي:عيلة خطيره انتم
سهام:انتا سادك فتنه خلونا نحلو الموضوع
عبادي:انا اخطرر واحد فيكم وعارف الي قعد يصير 🌚
سهام:حول من جنبي نبي نررقد !
عبادي:نوضي ارفعي راجلك يمااا قبل مايتعرف ع الكلبه الجديده😅
كريمه:والله لو متنوضش تاكل كف!

______________________

يوسف:قدام لمرايا يرتب في شعره كأنه بيطلع لمكان
ريناد:خشت...انااا
يوسف:وقفي قبل ماتتكلمي...سسكر الباب وقعمز ع سرير
ريناد:مستغربه في تصرفات يوسف وهيا عارفه انه يوسف سكران بس تجاهلت ع خاطر جود ...المهم😅
يوسف:بعيون حمر...احكي!
ريناد:انا عارفه انك تكرهني ووعارفه انك مش راح تستوعب كلامي بس رجاااءا حاول تفهمني
يوسف:يرقص في حواجبه وحرك فمه بهزوه!
ريناد:بلعت ريقها بخوف....موضوع جود عندي ونوعدك انه حاينحل بس بعد زواجكم حانحكو فيه وكل شي حاينحل
يوسف:كيف يعني فسريلي هوا اسم شخص بس نبي نعرفه وانتهت القصه
ريناد:اي فاهمه عليك وعندك حق في كل شي تقوله بس قتلك افهمني واعطيني مهلة  حاينحل
يوسف:نااض وقف قدام ريناد....وحط صبعه ع فم ريناد...نفهم انك مازال ناوية تشوهي حتى سمعة العيله
ريناد:اءءء....لالا بس جود وثقت فيا وحكتلي ارجوك اعطيني فرصه لانه الموضوع مش زي ماانتا حاط في راسك
يوسف:بعيون مغلوله...شن اسمه؟
ريناد:حست انه مش حاتقدر تسيطر ع يوسف...اراهنك بي احتي مياسين لو نا محليتش القصه وحكيتلك كل شي نخلي مياسين عندك ونطلع من الحوش
يوسف:تلفت بسرعه وصفق بيديه...حلو حلو ..ورجع شافلها وقفنا في نقطة حساسه
ريناد:شنو نفهم منك حاتخلي الموضوع عليا!
يوسف:شافلها بعيون مليانه جمود....موافق بس كل ثانيه تفكري النقطه!
ريناد:علامات الخوف ع وجها لانه حطت مياسين قدامها....تمام!
يوسف:رجع ورقد ع سرير...وغطا روحه بالبطانيه!
ريناد:تنفست بعمق..وكيف جايه بتطلع!
يوسف:طفي الضي ومتنسيش النقطه!
ريناد:حست انه يوسف شد علاها شي كبير بس مع هدا منستش جود ...وطلعت!

____________
سهام:ريحيني جود وقوليلي ملمسكش يعني مافيش شي يخوف
جود:شادتها بكاء...شش شن صار في ريناد؟
سهام:قعدا تحكي معاه ادعي انه يسكت وتقدر تفهمه!
جود:يااااربي💔😭
ريناد:فتحت الباب وخشت....قعدا سهام نايضه؟
سهام:افففف يعني مازال تبو تنكرو؟
ريناد:اسفه سهام ...مش راح نقدر نقولكم شي توا المهم قنعته ووافق!
سهام:اوو ماي قاد صدمه يوسف اقتنع!
ريناد:قعمزت..اي اكيد وبشرط طبعا
جود:شنهوا؟
ريناد:لو محليتش القصه انا حانطلع من الحوش وياخد مياسين مني!
سهام:لا غلط ريناد مفروض محطيتيش مياسين رهن!
ريناد:شافت لجوود...مضطرا!
جود:اسفه ريناد سامحيني انتي وقفتي معااي!
ريناد:لا عااادي بس ادعولي!
سهام:حطت يدها ع فمها...انا خفت وزدت توترت اكثر!
ريناد:تنفست بعمق...انشاءالله خير!💔
جود:ربي يكوون معاااك!
سهام:لو تحكولي شن قعد يصير بس!
جود:شافت لي ريناد!
ريناد:نا توا بنرقد
سهام:عصاابه...وناضت !
ريناد:لحقاااتها وطلعت!!

🔥مـــيُـــلــو حــــسسـٰـــن🔥
🔥مـــــيُــــلــــووو حــــسـٰــن

يووم جديد:-

ع سفرة لغذاء:-🥂

ريناد:مقعمزه تتفرج بعيونها ع الكل في خاطرها....كيف ممكن يتقبلو العيله انه حسن واحد حقير؟ وانه بنتهم جود مغتصبه وخسرت شرفها بسببه ؟ وعلي مريض يعني مش ناقصه يعلم بي لمصيبه هادي؟
كريمه:ريناااااد!
ريناد:بي انتباه...انعمم!
كريمه:حطت قدام ريناد السلطه...كنت بنقولك تبي سلطه لكن انتي ترا وين تفكري!
ريناد:اءءء...لالا مش عارفه خيرني اليوم من لما نضت راسي يدور
كريمه:سلامتك!
سهام:حقا ماما نسيت نقولك يوسف خلاص سكت وخلا الموضوع كله ع ريناد
كريمه:التاريخ اليوم شنو اكيد هادي كدبة ابريل!
سهام:لااااااااااعع...😂😂
ريناد:ضحكت من وسط وجعها.....لا متبصرش اي انا قدرت نقنع يوسف ومتساليش كيف لانه الموضوع عندي !😅
كريمه:انتم البنوت من يقدركم؟ باهي فرحتيني اقل شي الواحد يفكر في العرس وهوا مرتاح
سهام:😂...وربي نسيت انه عرسي بعد اسبوعين في جرت لفضيحه
عبادي:صباااح الخير بي توقيتي ي منافقين
كريمه:صباح خير قهرتك توا غذاء
عبادي:بتوقيتي نا مختلف ع جميع!
كريمه:اصلا شكلك امبدلينك في المصحه بي واحد اهله من الماغول!
عبادي:😅...وبنتك جود شنو وله متوحمه ع كلبه 😂
سهام:مش طبيعي🤦🏻‍♀
ريناد:وين مياسين؟
مياسين:نااا جيتت😅
كريمه:متخليهاش تقعد معاه هلبا لانه احتمال يكونو اخطر من كورونا😂
عبادي:يأشر ع بووه...متخلينيش نعرفه ع الكلبه!
كريمه:اسس اسس ي خراا
عبادي:اربيكم انا😅
سهام:😂😂
جود:السلام
كلهم:عليكم السلام
كريمه:قعمززي تغذي وجهك اصفر بلا ماكله
عبادي:راهو لكلاب عندهم ماكله خاصه!
سهام:استغفر الله !
جود:بصوت هادي...وين يوسف؟
سهام:متخافيش طلع لشركه عنده اجتماع لساعه 4 ومش فاضي بيك!
عبادي:نفاااااق😂

_______________

في الشركه:-

حسن:انتا قعد موصر ع شي الي ادير فيه
يوسف:يطقطق بي بالبيرو ع طاوله...اي وعلاش لا؟
حسن:مازال في وقت انك تنسحب فكر راهو حانخسرو الشركه !
يوسف:لااا...شنو صار فيهم كلهم اجتمعو
حسن:اي يستنو فيك كلهم !
يوسف:اسف انا مضطر انوافق
حسن:القرار يرجعلك بس انشاءالله مووفق😊
يوسف:اوكى..هيا خلينا نمشو!
حسن:طلع!
يوسف:لحقهه!

_______

كريمه:بوك قال انه يوسف خاش في عناد مع شركه تانيه
سهام:فمها معبي فوشار...شنو المشكله؟
كريمه:يعني لو خسر بتقعدي في الشارع
سهام:لا حبيبتي انا بنتزوج انتي بتقعدي في الشارع
عبادي:باهي يعني بنعيشو عندك بنحرموكم من شهر العسل
كريمه:واااو فكرره
ريناد:انششاءالله خير يارب💔
عبادي:😂..خيرك ريناد منكدتها ع روحك تقولي انتي حصلو عليك مع واحد
جود:اففففف...لوحت لبخده وركبت!
عبادي:حاينعررض احلا فيلم
ريناد:وين؟
عبادي:في تلفزيون لما يجي توا نكلمك!
ريناد:🙄🙄
عبادي:😅😅

في الاجتماع:-
يوسف:يوقع ع كل الاوراق
حسن:يشوف للكل بتوتر..لانه الي كانو في الاجتماع كلهم اجانب وواضح انه عندهم خبره
المحامي:يعني لو مرهنتش الشركه حاندفعو مبلغ مالي
مدير الشركه 2:اي لكن حايكون استفادة الشركه لمدة 3سنوات
حسن:اءءء...كيف؟
مدير الشركه2:قصدي انه لفلوس الي حاتربحهم الشركه خلال 3سنوات حاتتحول عندنا!
يوسف:وهوا داير الحوله...هادي الاوراق!
حسن:امتا نبدو الشغل!
محامي لشركه2:سيد يوسف يقرر
يوسف:انا حانشتغل ع الاوراق بس بعد شهر حانبدو في الخدمه معاكم!!
مدير شركه 2:اوكى موافقين..ومد يده لي يوسف
يوسف:اوكى 😊
حسن:طلع مغلول ومش راضي ع شي !

يوسف:واحنا وقفنا كل الخدمات باش كل الموضفين يركزو ع اعمالكم
محامي شركة 2:حلو حلو وحانكونو سعداء لانه خدمنا معاكم
يوسف:ونا اسعد والله!!

🔥مـــيُـــلــو حــــسسـٰـــن🔥
🔥مـــــيُــــلــــووو حــــسـٰــن🔥

#تسسسريع_الأحداث:-

بعد مرور اسبوعين :-

ريناد:كانت مش مرتاحه طول الفتره كانت خايفه من كلام يوسف الي مقدرتش تنساه ورهن الي حطاته وهيا عارفه انه يوسف مش ناوي ع خير معاها بككل يعني هيا شبه ضحت بي اختها ع خاطر العيله متتشتتش وع خاطر جود لانه نضلمت واول مره تطلب منها شي زي هدا طول الفتره وهيا تفكر واغلب الوقت في دارها وتفكر كيف بتتجاوز الموضوع وانها تحاصرت وضروري تلقا دليل ضد حسن وتحل كل شي بهدووء وبدون ماتشك في جود يعني متخيلتش انه جود بعد الي صار معاها ممكن تكدب وتتبلا ع شخص !🤷‍♀️

برغم انه الحوش مقلوب بي تجهيزات عرس يوسف وسهام الشي هدا خلاهم ينسو قصة جود شوويه وميتأثروش هلباا!

اما يوسف طول الفتره وهوا يخدم لدرجة انه سكر المصحه واهتم بي شركه والمشروع ودوبه يهتم بي ميار ومكالماته معاها بس برغم هدا كله قصة ريناد والاتفاقيه كانت اكبر مشروع ليه ومع هدا مش موضح لي حد انه مهتم بي شي زي ريناد او اي حد في العيله حاااس انه يوسف يستنا يشوف خسارة ريناد باش ينتقم منها بطريقته لانه مننكرش انه يوسف مش حاب ريناد خاصة بعد قصة الشنطه!🤷‍♀️

ميار:تجهز في روحها زي اي عروسه بس كانت متخيله انها حاتعيش مع يوسف في حوش بعيد ع عيله وهكي بس يوسف قرر انهم حايعيشو مع العيله من اول اسبوع ليهم لن ريناد توصل لحل وبعدها ينتقلو!

سهام:وحتى هيا فرحانه بزواجها من حسن وتوتي في روحها ومش متخيله فرحتها ❤

اما جود كانت اكتر وحده بينهم مرعووبه لانه هيا حاطه قدامها اشخاص حايدمرو بسبب انها تنقض نفسها من حسين وتفكر في تخطيطاتها وبس 🔥

اما عبادي ومياسين : يخططو لحاجات اجراميه 😂😈....!!

______________

خلوني نحكي ع يووم الحفله الي هوا يووم الدخول ❤

الحوش كان مليان بالجيران كلهم وعمامهم واقاربهم وصحابهم وهكي اما العيله كانو كلهم عند لكوافيره !!

عبادي:ماشي جاي يكحل وخلاص ومياسين كانت توزع في رقم عبادي ع الكل 😅

ريناد:تي خير امك مجيتيش باش عزماتك سهام
جوري:وهل يخفى القمر تي انا شويه ونوصل للموزين ونكون معاك
ريناد:راهو في الصاله العرس
جوري:باهي خلي نمكيج وهكي وبعدها نتصل بيك ناخد منك العنوان
ريناد:باهي نفاخه باااي
جوري:وحقا بنقعد مرات يومين وله اسبوعين
ريناد:اي اي اصلا نبيك هوا عارفاتك غبيه لكن عادي مرات عقلك يخدم شويه
جوري:ههههه شن في ؟
ريناد:هيا وجهك نتلاقو
جوري:افففف...طووووط طوووط!!
عبادي:نسمع فيك تتكلمي ع تلفون وتعزمي من راسك
ريناد:😂..اي شن واجعك؟
عبادي:اعزمي عادي اهم شي طرف بس
ريناد:هوا اي وربي تمشي معاك نفس السيستم😅
عبادي:اقلبي وجهك من قدامي خلي نطلع القيتارا تي لخبطت دنيا بنوت
ريناد:دنيا قداش ليا معاش سمعتها الكلمه🤦🏻‍♀😅

_______________

الساعه 8 في الليل:-

سهام:تشوف لروحها في لمرايا عيونها تسريحتها وتتمايل هني وهني ومعجبه بي جسمها وتفصيلة الفيلو والتاج 🤤
جود:تجنني تقتلي حاجه طلعتي
سهام:محسيتيش اني متغيره واااو
جود:تي قتلك تقتلي اليوم حسن حايقعد يتفرج بس😅
سهام:ي روحي محلاك🥺...وحضنتها ❤
جود:هههه سيبي سيبي مش حسن انا!😂
سهام:الفال ليك عمري ونشوفك احلا عروسه!
جود:💔...ياارب!

ريناد:لبست قفتان طويل فيه فتحه في الوسط كمامه شيفون ومفتوح من جهة الصدر اموضح مفاتنها كلها نسمي فيه انا قفتان سكسي 😂...المهم مع مكياااج اجرامي الي هوا عباره ع رسمة عين مقيومه فوف طوويله ورووج غااامق لوونه مووف ...لبست عبايتها ووشاحها وطلعت!!

يوسف:واقف يبخ في البرفان لقووي...وكااانت اللبسسه طالعه ع فيته يجلللطط
ريناد:مبروووك ي عريس😅
يوسف:انتي قعدا ممشيتيش لصاله؟
ريناد:نستنا في حضرتك امك قتلي خليك لانه في ناس قعدت هنايا
يوسف:باهي انزلي بسرعه اركبي السياره
ريناد:هي خلي البس ميسو ع سريع ونطلعو😅
يوسف:تلفتلها بيهزبها كيف ميتسين لتوا مش واتيه...ولمحح عيونها الي يجننو...اءء😮
ريناد:خيرك ؟ تقولي شفت ميار قدامك
يوسف:استرخا بهدووء ...انزلي ومعاش تجيبي سيرتها!
ريناد:قربت منها وريحتها كانت بريئه
يوسف:شنوو؟
ريناد:ربي يعينك عريس القهره😂
يوسف:بتسكري فمك؟
ريناد:عليك عار اليوم عرسك راهو ارخخي رووحك
يوسف:متعصبنيش ريناد!
ريناد:مذت خطوتين ورجعت...حقا نسيت نقولك انتا خلاص بتتزوج يعني حانمرح ونسرح في الورثه😂😂...ونزلت تجري
يوسف:رغم كل شي ...ضحك من قلبه ع تصرفاتها...ونزل...😄

_______________

في الطريق:-

كان الهدوء محاوط لمكان كله بس ريناد نست كل شي وكان تركيزها ع شخصية يوسف ومعجبه بيه بشكل مش طبيعي شبه ذايبه في كل ملامحه وتفاصيله
يوسف:سهام وصلت لي صاله؟
ريناد:اي اي كلمتني عمتي قتلي وصلت وصاله شبه تعبت
يوسف:باهي ..ورجع عيونه ع طريق!
ريناد:بجد حسسدتك عليه ميار😭😭😭

🔥مـــيُـــلــو حــــسسـٰـــن🔥
🔥مـــــيُــــلــــووو حــــسـٰــن🔥

ريناد:نزلت من السياره ..وخدت مياسين ونزلتها ...ودخلنا لصاله ...ومعانا هلباا داخلين واضح انهم عازمين هلبا لدرجه مبالغين لانه متشوفيش حد من حد من كثر الزحمه بس مننكرش انه الصاله كانت تحفه وكل شي راقي ...قعمزت نا ومياسين ع طاوله براحنا واتصلت بي جوري تسسكر عليا فهمت انهاا قريب توصل لانه حركتها هادي متبطلهاش 🙂...وزي ما توقعت دقايق بسس و صلت جوري ومقعمزتش وهيا ترقص ع كل اغنيه يفتحوهاا 💃💃

لحضات وبدو الوقافات يوزعو في كل شي واااو ع ذووق في كل شي كاان راقي وناززك ❤

ريناد:فتحت تلفونها وشافت رساله معلقه عندها...افففف مسمعتهاش من الدوشه....تنهدت من يوسف..فتحتها تقرا فها ....😨😨...يتبع