رواية حب جنوني الفصل التاسع وستون 69 - بقلم سوزان ليث

غرام... اي عمو
عمي... هسه امج مريضه موكت هالحجي بس اني وياج النا كعده خاصه نحجي بالصار

غرام ... اي عمو رجعنا لبيتنا وديت امي لغرفتها وطلعت جانت نبا ورونق بالصاله يسولفون رحت كعدت يمهم
نبأ..... اكلج غرام هسه انتي حتبقين هنا
غرام ....اي
نبأ... انتي متاكده من اسد خاينج لو شك
غرام.... مادري
نبأ....لا لازم تدرين اذا متاكده خاينج يعني محمد وياه
وهمه ميسون شي اذا مو سوه

رونق.... نوب كلبت على محمد
غرام.... ههههه لا لتخافين محمد ميعرف شله اركان هاي شلته من دوام شله تعبانه

نبأ..... اي محمد ميعرف اركان بس الحرص واجب هذا محمد عنده سوابق

غرام... اي كلشي يطلع منهم رياجيل خل عينج عليه
رونق.... باع شتعلمها وانتي ثانيه معليج بحجي اختي هاي متعرف شتحجي

غرام.... اني حروح اسوي عشه خاف امي تكعد رحت للمطبخ جنت احضر العشه ندك جرس طلعت صحت منو اجاني صوته ماكدرت اروح افتحها رجعت لرونق هي تفتحها
رجعت رونق شايله جمال جنت انتظر هو يدخل بس جاب جمال ورجع

اني التهيت بين عشه وامي وجمال ولازم اداوم لان عندي تقرير لازم اسلمه للدكتور و حايره شون اداوم وامي وجمال
جنت كاعده ابدل لجمال ونبأ ورونق يسولفون التافيت على نبأ كتلها ... اكلج شنو حتباتين عدنا شو ناسيه نفسج باعي ساعه بيش

نبأ .... اي غير من يرجع محمد يجيني
رونق.... ليش وين رايح
نبأ... مادري طلع ويه اسد اكلج امي دكول ابويه حجه ويه اسد علمود طلعتج من البيت بس اسد كايله ماريد احد يدخل بالموضوع هذا

غرام... اي طبعا ميريد احد يعرف بسوالفه
رونق... هو هم حجه عليج لان طلعنا بدون منحجي
غرام.... عادي رزل وهدد وعافني وراح
رونق... هو اسد هيج تلكي خايف عليج بس هو هيج مايكدر يطلع مشاعره
غرام.... اي يعرف يطلع بس الرزايل وتهديد وانتي جلال حجه عليج
رونق... لا محجه بس عاتبني لان ماجيت عليه واصلا جان خايف عليه لان عباله مختنكه بالبيت

نبأ .... ولج ايمان سولفي دكول اسد صار بي مثل المخبل ميعرف شيسوي ومن شافكم ماكو بالبيت دكول كعد عالرصيف بشارع يرجف عباله ميتين بالبيت

غرام... مادري ليش من حجت نبأ هيج كلبي رجف على اسد ونقهرت عليه بس اظاهرت انه الموضوع عادي عندي بعدها راحت نبأ واني ورونق اتفقنا باجر هي تبقى بالبيت  واني اداوم وبعده هي داوم واني ابقى بالبيت حتى امي متبقى وحدها
حضرت ملابسي ونومت جمال رونق نزلت تنام يم امي
اني بقيت فوك لان جمال يكعد بالليل هواي خاف يضوج امي
جنت اعرف اسد باجر يداوم حسيت الفجر كمت بسرعه عالشباك اشوف سيارته جانت بعده بالكراج يعني بعده مطالع
ظليت انتظر شويه  سمعت صوت باب بيت  عمي تنفتح  ركضت عالشباك شفت اسد يطلع بسيارته بعدها نزل سد الباب
اني جنت اباوع عليه قبل ميصعد السياره صعد راسه على شباك غرفه اني جمدت حسيته شافني

بس هو بعدها ركب سياره وراح

رجعت اباوع عالتليفون شفته كلشي مداز اني بعد ماكدر انام كمت غسلت وتحضرت حتى اروح للدوام نزلت جمال ويايه خليته يم رونق كتلها من يكعد بدليله ودي يم عمتي

بعدها اجه الخط ورحت للكليه جان مالي واهس كلش اداوم وتعبانه احس البارحه جان يوم شاق رحت سلمت
التقرير وجان يوم عادي كلش رجعت للبيت جان جمال بيت عمي وامي نايمه ورونق جانت تحضر الغده صعدت بدلت ومن نزلت لكيت رونق تحجي بتليفون
شويه سدته
كتلها منو ... كالت اسد يسئل على امي وجمال
كتلها .... اي زين
رونق ... الصبح هم خابر سئل
غرام... عرف اني مداومه
رونق... هو ماسئل بس صبح من خابر عباله مداومه فكتله لا اتفقنا اليوم غرام داوم وباجر اني حتى امي لتبقى بوحدها

غرام.... اي زين

.....
رونق كعدت من صبح لان استاذ جمال كعد بس طلعت امه
بدلتله وظليت العب وياه بعده كعدت امي خليته يمها ورحت سويت ريوك وكعدنا نتريك
بعدها صرت انظف البيت وجمال كاعد عالكرسي يباع عليه شويه انظف وشويه اروح لجمال وجنت دحضر الغده اركض منا واركض منا كملت تنظيف كعدت اقره للامتحان كلشي مافتهمت لان جمال يريد اشيله وافتر بيه

صارت ب ١١ جرس البيت دك رحت افتحها جانت عمتي جايه شوف امي شون صارت اخذت جمال مني واني رحت اكمل الغده
جريت كرسي وكعدت تعبت من صبح اني بس اركض الله يساعد غرام شون متحمله
بعدها عمتي اخذت جمال وراحت لان شافتني شون تعبت
واجتي غرام وتغدينا للعصر جرس الباب دك راحت غرام تفتح الباب سمعت صوت جدي

غرام...من فتحت الباب وشفت جدي وجده حكمه صراحه نصدمت بجيتهم دخلوا جوه وطلع عمي ابو اسد كايل لجدي على امي متخربطه جايين يشوفوها
اني ماحجيلكم الخوفه من جدي كلت بس لا عمي كايله اني عايفه البيت
طلعنا من الصاله اني ورونق نحضر ضيافه ومانحجيلكم الارتباك واضح عليه وعلى رونق
دخلنا قدمنا ضيافه وكعدنا يمهم جانو يسولفون عالضغط وشون ياذي الشخص ولازم واحد ينتبه لنفسه وصار كل واحد يكول هو شون ضغطه ميسيطر عليه ويادوه يستخدم الحجي العادي عند اكثر الكبار
ظلو يسلفون سوالف عامه اني ارتاحيت شويه لان جدي محجه شي عليه كلت ميدري
رادت جده حكمه تتوضئ حتى صلي المغرب جدي دخل للاستقبال يصلي اني اخذت جده تتوضئ بعده كالت اريد اصلي بغرفه امج اخذتها لغرفه امي من دخلنا ماشوفها الا ضربتني بالعوجيه جان
دكلي... ولج بالكوه صابره عليج الكعده كلها من فتحتي الباب واني اريد اضربج

غرام... ليش جده شمسويه
جده حكمه... شمسويه يالماتستحين هاده بيت زلمتج وطالعه غضبانه وماخذه امج ورايحه بيها للمستشفى وحدج انتي واختج ماكلتي اكول لزلمتي يجي وياج اكول لعمي وج اخابر جدي اكله ليش هيج يمه جنكم مكطوعين من الشجره ليش هيج سويتي

غرام... ظليت صافنه عليها وبكلبي اكول عفيه عمي ابو اسد ممبقي شي بكلبه كلشي خارط لامه  واني اكول ايمان عليمن طالعه

كتله... جده انتي غير سئليني ليش زعلانه
جده حكمه... وعليش زعلانه انه خابرت اسد بس كلشي محجه وكال شغله بيني وبين مرتي ماريد احد يدخل انه احلها

غرام...اي جده ميريد احد يدخل حتى ليعرفون بسوالفه

جده حكمه... وشنهي سوالفه يمه
غرام... جده لعد تقبليها اسمعه يححي ويه وحده وحتى شفت رسايل بتليفونه

جده حكمه ... وماواجهتي
غرام... واجهته وكال هاي وحده شافتني وجلبت بي وهو اكثر من مره رزلها حتى بعد متتصل بس مجوز منه

جده... ومادام حجاالج وفهمج ليش ظاله هنا .
غرام... مامصدكه كلامه
جده... وليش مامصدكه كلامه يمه زلمتج خوش زلمه ماعده سوالف مكسره والكل يعرف بي شكد يحبنج ليش ماعندج ثقه بي مايجوز يمه لازم تكون عندج ثقه بي

غرام... جده اني عندي ثقه بي بس من سمعته يحجي وياها وشفت رسايل ماعرف صار بيه تمنيت هي كبالي واملخها وحتى من حجالي القصه وافتهمت زادت نار البكلبي بزايد يعني شنو مجلبه لرجلي وتريده

جده حكمه ... يمه حافظي على رجلج هو صح عصبي والله مايجرعه من تقفل عنده بس كليبه طيب ويحبج وصاينج اني اكلج لو واحد غير اسد وكايلي عليه هيج سالفه اكول يجوز صدك بي اسد لا ولا اصدك

غرام... بعد صار شسوي وماكو مره شك رجلها يخونها وشوف بعيونها وتسكت

جده حكمه ... لا تسكت وتحافظ على رجلها وترجعه الها انه اكلج رجال ميملي عينه شي بس يتقشمر بالكلمه الحلوه

غرام .... الا اسد كلشي ميقشمره
جده حكمه.... لا يتقشمر هو هذا جدج انه بكلمتين اجيبه بصفي

غرام... هههههه هو منو يكدر يقاومج جده  ... من حجيت هيج ضربتني بالعوجيه على رجلي

جده حكمه ... خابري رجلج وحجي وياه كلام حلو الرجال رايح دوامه وهو مهموم لان زعلانه ودوام مو سهل يمه حتى رجعلج سالم غانم

غرام.... جده هو غير يخابرني يسئل عليه بجذب راح للدوام وماسلم ولا كال وحتى اليوم يخابر رونق يسئل على امي وجمال

جده حكمه... وانتي ليش ماخابرتي شفتي وصل بسلامه لا

غرام... والله جده  كرامتي متسمحلي  من حجيت هيج جده رفعت العصا تريد تضرب بس اني لزمتها كتلها كافي كلسع ضاربتني

جده حكمه ... تستاهلين اكسرها عليج بعدج بز وينج وين كرامتج

غرام... ههههههه واذا بعدني بز يعني ماعندي كرامه

جده حكمه ...  ماكو كرامه بين رجال ومرته هو يحبج وانتي تحبيه ليش تخلين هيج امور ماتسوى تخرب بينكم واليوم الي يروح مايرجع

غرام.... هزيت راسي بي ميخالف عود اخابره ماكتله لجده اني زودت بالكلام وياه وهو اصلا مايريدني كلت هسه نوب صدك تكسر العصا عليه عفتها صلي واني طلعت بره

.....

رونق ..... امي اشرتلي حتى ابدي اجهز العشه لان جدي وجده حكمه اجوي عدنا
اني جنت ملتهيه احضر الاكل اجتي غرام ساعدني حتى نكمل بسرعه لان جدي يحب يتعشه من وكت سمعت صوت جدي يكول لامي وهي وياه بعدهم ميتحاجون

اني وغرام ظلينا جامدات بمكانه ا ريد نعرف هو عليمن يحجي عليه على غرام  جنا ننتظر امي شنو جاوب

سمعنا امي دكول والله حجي يصالحون لا تشغل بالك

غرام تباع عليه تاشرلي هاي عليه واني اشرلها اش خل نسمع

رد جدي كلها ... لا هاي بعدهم مامزوجين سولهم مشكله ويريد كل واحد يترك الثاني احسن صار هيج هسه حتى كل واحد يشوف الثاني شوم هو ممتمسك بي
الواحد من يختار شريك حياتك يختار الي يكمل وياه بقيه عمره مو من اول سالفه كالو مريد نكمل

اني جنت مركزه على كلام جدي غرام التافت عليه تاشرلي هاي عليج  هزيت راسي ب اي

سمعت جدي يصيح عليه اني كمزت مجلبه بغرام تدخل ويايه  غرام مجلبه بالكاونتر دكلي روحي وحدج ليروح يلزمني الي نوب

رحت ركض دخلت كتله ... نعم جدي

جدي ... اكعدي اريد احجي وياج
رونق.... رحت كعدت واني نظراتي على جدي

جد... انه فكرت بسالفتج انتي وجلال ولكيت مادام انتي متردين تكملين فخلص يابنتي انه بعد  يومين رايح للعمره انه وحكمه من ارجع انه انهي كلشي

رونق... اني من سمعت كلام جدي كلبي احس دكاته صرت اسمعهن شنو ينهي كلشي ظليت ساكته وفشلت من جدي اريد بس اطلع اخابر جلال يجي يحجي كمت اباوع على امي تنقذني بس امي جان جوابها

ام غرام... والله حجي انه هم اشوف هيج مادام بعدهم عالبر

رونق... ظليت اباوع على امي ليش حجت هيج اني ظليت ساكته واسمعهم يحجون الدمعه بطرف عيني بس مطمئنه جلال موجود هو يجي يحجي ويه جدي

طلعت من الصاله للمطبخ غرام كالت ليش ماكلتي شي لجدي

كتلها... مادري خفت منه وامي هم منا ايدته خاف احجي وهم يصعد ضغطها مشفتيها سوت لان حجيت ذاك اليوم ويه جدي

غرام... عزه بعينج لعد شسوين غير دكليله اني اريده بعدني

رونق..... هسه اخابر جلال اخذت تليفوني دكيت على جلال جاوبني فهد كلي... عيني ست الحسن بالحمام الرجال كلت اجاوبج خاف عبالج مديرد

رونق.... فهد من يكمل كله ضروري تجي جدي هنا حتى يحجي وياه

فهد... شكو صاير هسه جدي خابر ابوي كله جيب جلال وتعال

رونق .... اي زين خل يجي

تقريبا مر ربع ساعه جرس الباب دك طلعت ركض افتح حتى احجي ويه جلال فتحت الباب دخل عمي وجلال سلمت على عمي ودخلوا بس اني ماكدر لا اشر لجلال ولا شي قبل ميدخل للبيت جريته من تشيرته حتى يبقى
التاف عينه عليه كلي ... شبيج
رونق ... جدي يريدنا نفصخ
جلال... شنو
رونق... والله هو حجه ويايه كلي الي ترديه خلص حنسوي بس من ارجع من العمره احلها
جلال.... وهو شنو الي ترديه مكتيله شي انتي اني رايدته وماريد افصخ

رونق.... جلال ماكدرت احجي امي نوب هم مايده جدي ادخل احجي وياه ... دخل جلال وهو ينافخ مني اني دخلت وره بس ظليت اسمع شنو حيحجون
جانت سوالف عاديه سمعت جدي كله الجلال  منا لحد مارجع من العمره لا تعتب هنا ورونق هم ماتوصل يمكم مفهوم

جلال.... ليش جدي صاير ترى سالفه نحلت
جدي.... نحلت خوش شقررتوا يعني
جلال... بعدنا ماقررنا بس
جدي... بس شنو لعد شحليت اذا مقرروتوا اروح للعمره وارجع وبعدها تنطوني قراركم بس لحد مارجع لاشوفها ولا شوفك وان سمعت جايها لو هي رايحتلك متلمون الا نفسكم

جلال ... جدي شنو سالفه غير اني وياها كاطعين مهر

جدي .... الكلام يتنفذ واذا متنفذ تعرف شسوي اتحمل منا لحد مارجع

جلال ... صار جدي

رونق.... اني اسمع وغرام تحضر بالعشه التافيت عليها كتلها هذا جلال وافق على كلام جدي

غرام ... مشفتي شون ظل يحجي ويه جدي وجدي معاند هسه اكلج هو جدي مكال تنفصلون كال لا انتي شوفيه ولا هو يشوفج وهسه جدي عايش ويانه حتى هيج ضجتي

رونق.... ظليت ساكته حضرنا العشه ونصبنا جلال مقبل ياكل طلع بس لحكته للكراج بس شافني امشي وراه التاف عليه كلي ... شفتي جدي شون معاند .

رونق... يعني هسه شنو يريد
جلال.... منا لحد مايرجعون من العمره ننطي قرارنا نزوج لو انتظر لحد متكملين واذا ظلينا معانديين اني وياج هو حينهي سالفه من اساسها

رونق... كله من وراك ليش دخلت جدي
جلال.... من ورايه لو من وره راسج اليابس
رونق... لا من وراك كم مره كتلك جدي لدخله
جلال.... شوفي هسه حالنا كمنا احنا نتوسل بجدي وهو المعاند

رونق.... جنا نحجي اني وجلال اجتي علينا غرام كالت رونق جدي يريدج مدري منين عرف انتي وجلال واكفين تحجون بس اني كتله بالمطبخ سوي جاي وجلال راح

التافيت على جلال كتله... جدي من صدك سواها
جلال... دخلي يله اني من يرجع اروح احجي وياه

رونق... راح جلال واني وغرام دخلنا جوه كملنا عشه ووراه جاي وفواكه بعدها رادوا يرحون قبل ميطلع جدي كلي ... الكلام الحجيته يتنفذ من اليوم مفهوم

رونق...اي جدي

راحوا بيت جدي واني غرام لملمنا البيت ردت اروح احجي ويه امي بس غرام كالت مشوفيها مريضه عوفيها هسه هي ١٠ ايام بزايد ويرجع جدي تحملوا
دكيت على جلال بس انطاني رفض مرتين يعني ميكدر بحجي
اجاني مسج منه 💬اني يم جدي
ظليت انتظر جلال يدكلي تقريبا بساعه يله دكلي اول مفتحت خط عاط بوجهي كله من وره عنادج جدي حلفني ماشوفج ولا اوصل يمج لحد ميرجع

رونق.... من كال حلفني اني كمت اضحك كتله جلال يعني جدي من نخطبنا وكطعنا مهر منعنا نشاوف

جلال .... جدي ومن يعاند ولج اني من هسه شتاقيتلج
رونق.... ههههههه همزين مكال عالتليفون متتخابرون
جلال .... من ظليت احجي وياه كلي تسكت لو حتى المحمول ماخليكم تحجون بي
رونق... صدك جدي قافل
جلال .... هاهيه هي كم يوم ويرجع ونشوف تاليتها

رونق.... لو باقي عالعشه جان شبعت منك
جلال.... وانه ادري هذا اللقاء الاخير
رونق..... هههههههه
جلال.... ضلي اضحكي وانه المشلوع كلبي

........
غرام .... بعد مراح جدي كعدت اقره شويه وجمال يمي جان يلعب ظليت اكلب بالملزمه ومالي واهس ظل كلام جده حكمه بالي كلت خل اخابره واعاتبه لان من راح مسئل عليه
لزمت تليفون واني اباع على اسمه ادك لو لا شي يكلي دكي دكي دكي وشي يكلي هسه دكين ويفشلج وميجاوب
ظليت حايره اجتي رونق يمي كتلها .... اسد مدكلج بعد

رونق ... باوعت عليها رافعتلها حاجبي كتلها ها حنينه

غرام.... لا نجبي بس ظل بالي عليه
رونق....لا مدك
يمكن جان يسمعنا لان بس سكتنا تليفون رونق دك باوعت عليه رونق كالت يمه لو ذاكرين مليار هذا اسد
اني لزكت يمها اريد اسمع فتحت خط سمعت صوته يمه كلبي صح زعلانه منه بس مشتاقتله
سلم عى رونق وسئل على امي وجمال واني ابد مجاب سيرتي
اني بعدت عن رونق ضجت عالاقل كول شونها سدت منه باوعت عليه كالت ها رتاحيتي هسه

غرام ... شفتيه ولا سئل عليه
رونق... انتي مخبله لعد من يكول شونه جمال واني كلسع اكله زين سبحته غرام وكلته غرام جابته غرام ودته غرام مشفتيني كل كلمه وجبت اسمج

غرام.... اي هو مجاب سيرتي
رونق.... صدك نعكست الايه ويه الكل جدي الجان يتوسل بينا اني وجلال هسه صار العكس وهسه انتي واسد
خل اصعد احضر ملابسي
صعدت سبحت وحضرت ملابسي للدوام ومددت ماحسيت الا صبح من تعب باوعت تليفوني جلال كم مره داكلي ولا حاسه عليه
شفت غرام ماكو عرفت نايمه جوه
كمت غسلت وبدلت وجهزت للدوام نزلت لكيت غرام كاعده ومحضره الريوك وهي وامي كاعدين يسولفون صبحت عليهم وكعدت اكلت شويه واجاني الخط
طلعت للدوام مالكيت جلال منتظرني عفيه جلال مادام انطه كلمه لجدي بعد ميشوفني وجهه
بالخط دزيتله مسج 💬صباح الخير جوجو البارحه نمت وماحسيت عليك من داك

جاوبني 💬صباح النور حبيبي اي عرفت دكيت على غرام كالتلي نايمه

وصلت للجامعه وشفت صديقاتي وكعدن يسولفون الصار البارحه وبعدها دخلنا محاضرات وكان يوم عادي
...........
نبأ.... بعد مارجعت من بيت اهلي جنت كاعده اصفح بتليفون دخل محمد للغرفه اني انظاري صارت متوجهه اله رحت كعدت يمه كتله ... اسد حجالك شي

محمد .... لا
نبأ.... باوعت عليه كتله ... معقوله اسد محجالك شي انت وياه اسراركم تحطوها نفس الصندوك

محمد.... انتي كلتيها اسرار شون احجيها

نبأ ..... زين كلي اسد صدك خاينها لغرام

محمد... انتي من كل عقلج تحجين متعرفين اخوج

نبأ..... والله رياجيل مالهم امان حتى لو اخويه
محمد.... ها هيج هذا بسمار مو
نبأ.... ظليت ساكته وحاصره ضحكتي كتله خل اكوم احضر ملابسي للدوام

محمد .... اي عمي خل ندك عالخشب لاتنحسدين
نبأ.... هههههههه شجعني حتى استمر
رحت حضرت غراصي ورحت للفراش جان مجايني نوم باوعت شفت محمد بسابع نومه شبسرعه ينام بس يخلي راسه عالمخده غفه ظليت اتكلب بعدين باوعت على تليفون محمد حاطه عالكومدي الشيطان لعب بعقلي اكوم افتش تليفونه
كمت على كيفي صرت امشي على اطراف اصابيعي لان محمد نومته خفيفه بسرعه يحس
اخذت تليفون ورحت بره الغرفه لان تليفونه من ينفتح القفل صوته عالي رحت بره جان اكو مثل الهول بصف الغرفه كعدت افتش بتليفونه مابقيت برنامج يعتب عليه بكلشي فتشت حتى بالملاحظات بعدين كلت هسه شبيه اني هم صرت اشك بي
رفعت راسي واشوف محمد فاتح باب الغرفه ومجتف ايده ويباع عليه اني شون فزيت بحيث كلبي احسه طلع من مكانه
اشرلي بيده تعالي اني كمت ورسمت الضحكه الهبله بوجهي واني امشي باتجاه وصلت يمه
كلي ...كملتي تفتيش
نبأ.... اني الضحكه من الاذن للاذن كتله مجنت افتش جنت انقل صور لتليفوني

محمد .... صور وتليفونج وين
نبأ.... هسه غير اجذب جذبه يصدكها كتله ... بالغرفه

باوع عليه ودخل للغرفه واني وراه كلي ... شوكت حجوزين من هالسالفه

نبأ.... اني ردت اثولها كتله ...ياسالفه .. عساس ماعرف
محمد ... سالفه المتحري الي بداخلج سوكت جوزين منها
نبأ..... رحت للفراش نمت كتله .... مجنت افتش هاي شبيك

محمد... اني مو حذرتج من هاي سالفه ليش هيج ثقه ماكو

نبأ.... محمد والله ماكدر من اشوف تليفونك هو يصيحني يكلي تعالي فتشيني 🙄

محمد... ماشي نبأ ظلي هيج

نبأ.... عافني ونام باوعت عليه وهو ناطيني ظهره يمه شون يخوف من شفته يباع عليه يله المهم مالكيت شي

نمت حسيت صبح هو بعده نايم اني كمت للحمام غسلت ورجعت للغرفه لكيته بعده نايم
نزلت جوه حضرت الريوك وصعدت لكيته كاعد اني بدلت وجنت واكفه اخلي مكياج دخل هو جان يغسل
باوع عليه ومشى للكنتور اني هو يمشي وعيوني وراه
كمت رحت يمه هو جان يلبس القميص وخرت ايده كمت اني اسد الدكم كتله ... شوف شون اساعدك

ظل يباع عليه بدون ميحجي  كتله ... محمدنا زعلان مني

محمد ... ششوفين انتي

نبأ.... بعد ماافتش وعد

محمد... والله لو احسب هاي الوعود شكد كايلتها 😒
نبأ.... محمد والله موبيدي اغار عليك ... من حجيت هيج حضني كلي .... والله ماشوف غيرج شوكت حتفهمين هذا شي

نبأ.... اعرف بس احب اتاكد 😁

بعدها نزلنا تريكنا واخذني للدوام نزلت  امشي حتى ادخل للجامعه بس هالمره ماخذه ويايه دفتر وقلم طالبه اليوم من صدك
دخلت رحت للقاعه مالتنا هم شفت بنات لازمات ملازم ويقرن باوعت عليهن كلت ذني شون وياهن رحت سئلت صديقتي كالت مو كتلج عدنا امتحان الاحد
اني ظليت صافنه عزه ولا اذكر كايلتلي
ظليت اكلب بالملزمه بالكي احفضلي شي بس كومه نقاط وشغلات ونظريات متنحفظ هيج
كتلها لصديقتي حروح للاستاذ بالكي يأجله الي
كالت روحي شوفي كاعد بغرفه الاساتذه
رحت للغرفه دكيت باب بس مسمعت جواب رديت دكيتها اقوى سمعت صوت يكول ادخل
دخلت للغرفه لكيت استاذ ابراهيم  سلمت عليه وكتله استاذ ميخالف اجل امتحان اليوم
جاوبني ... ليش ماتدرين بي اني من شوكت حددته
نبأ .... والله استاذ صراحه مادري بي
كلي.... يله ماشي اجله بس هالمره ترى

هو يحجي نفتحت الباب ودخل احد رفعت راسي لكيته استاذ علي يدخل اني باوعت على استاذ ابراهيم كتله تسلم دكتور ياريت كل دكاتره مثلك اني جنت اسمع استاذ علي
من داطلع جان رافع راسه يباع عليه بس اني سويت نفسي ممنتبه طلعت بكلبي اكول هسه شيكول عليه يوميه اريد اجل امتحان

عفته ورجعت للقاعه شويه واجه استاذ ابراهيم وزع الاسئله  بس الي ميمتحنون يطلعون بره القاعه حتى لياثرون على باقي طلاب اني الوحيده الي ماجله الامتحان
طلعت وكفت بالممر يم القاعه لان ماعرف وين اروح شفت طلاب يمشون ويه استاذ علي ويسولفون ويضحكون وياه اني ظليت اباوع عليهم اكول شون حلوه علاقتهم ماشوف الا استاذ علي يباع عليه ورسمت على وجهه ابتسامه عزه اني كلت بس لا عباله هذا اني معجبه بي وصافنه عليه باوعت اني ناسيه البس حلقتي
بس كملوا امتحان اني دخلت لزكت يم صديقتي
.........
غرام ... ظل الحال مثل ماهو عده على غياب اسد ٥ ايام وهو ابد ماسئل عليه اني صراحه صرت بس اريد احجي وياه لزمت تليفوني دكيت عليه وهاي اول مره ادكله وره الصار
ظل يدك بس مجاوب اني شنو ظليت اارزل بنفسي تستاهلين منو كلج دكي شوفي شون فشلج
مرت ١٠ دقايق لكيت تليفوني يدك باوعت لكيته اسد عزه اني كلبي يدك وبطني توجعني عبالك اول مره احجي وياه فتحت خط كلته ... الو هلو
جاني صوته يمكن جان نايم كال... هلا خير

ماحجيلكم اني بس ارمش من الفشله كتله ... شونك
اسد... شرايده
غرام.... اني لازمه تليفون واحصر بي حيل اتخيله اسد كتله ... بس اريد اعرف شوكت ترجع علمود تلقيح جمال تعرف اني دوام ماكدر اوديه صبح
اسد... عود اكول لامي توديه اكو شي ثاني
غرام ... لا ماكو يله باي

سديته قبل لا اسمع باي مالته ظليت الوم بنفسي  وشكد اكره هذا اسلوبه ويايه
وكلت بعد لو تنكلب الامه ماخابره والا اخلي يتندم لان حجه ويايه هيج
العصر نزلت على امي كتلها اريد اروح للصالون عادي ابقي جمال يمج اخذ رونق منتاخر بسرعه نرجع كالت روحوا بس خل فهد يوصلكم
خابرت فهد خطيه مكال شي اجه اخذنا للصالون اني جنت ناويه بس اعدل حواجبي بس اكو بنيه كدامي جانت تكص شعرها وكصه شعرها تخبل كاريه ومسويه برجم الها اني هاي الكصه حموت واسويها عمري كله مكاصته هيج لا امي تقبل ولاسد
بس شي عاجبني اريد اسويه همه مو اي شي يعجبهم يسوه
كلت لرونق حكص شعري رونق كالت ... غرام لتتخبلين يجي اسد يسويلج سالفه

غرام... حموت على عالكصه هاي وهو اسد يايوم قبل على شي
رونق... هسه مو كايلج ممنوع تتقربين على شعرج ليش زيدين المشاكل

غرام ... معليج انتي رحت ... على ام صالون كتلها اريد اكص شعري مثل البنيه من فتحت شعري وشافته شون طوويل كالت لا حرامات تكصيه هيج كصه شعرج حلو وطويل كلش
بس اني قفلت الا اكصه جان عندي خوفه وهي بلشت تكص بشعري وماخفي عليكم اجاني شعور الندم بس من كملت شعري وسشورته باوعت على نفسي ماعرفتها الكصه تموت عليه طالعه وجهي حسيته سمن عالكصه رونق باوعت عليه كالت ... عزه الشعر طويل شون جان ظالمج

ظليت فرحان بشعري واسوي حركات حتى اهز شعري
اول مره اجرب شعور الشعر القصير
خابرنا فهد اجه اخذنا اني برجعه خفت من ردت فعل امي  دخلت للبيت نزعت الحجاب وعدلت شعري ودخلت على امي اني ورونق
امي ظلت شويه صافنه عليه جان تضرب على صدرها كالت عزه العزاج ياغرام هاي شمصخمه بشعرج
اني رحت يمها كتله ... الله يخليج لاتحجين شي هاي اول مره اكص هيج ويعجبني شعري ويعني شوكت اكصه من اصير عجوز وظليت اقهر باامي عليه ورونق هم تحجي ويايه قتنعت وظلت تلعب بشعري دكلي ماعرفتج من دخلتي كلت هاي منو دخلت ويه رونق
بعدين امي فجاءه سكتت كالت ... يامعزايه اسد شحيسوي بيج هسه عباله عناد بي كصيتيه

غرام... والله مو عناد بي وسئلي رونق بس اني عجبني يامي والله تعبت من شعري الطويل

امي خطيه ظلت ساكته هي عاجبها شعري بس تخاف من رده فعل اسد الي هو اطراف بالكوه يخليني اكصه
صعدت فوك اخذت صور الي دزيتهن لنبأ كتلها شنو رأيج باللوك  نبأ اول كلمه دزتها عزه العزاج والله سد حيموتج

شالعائله الكلها تخاف منه مهتميت جانت الفرحه بعدها ثاني يوم جمعه جانت ماشوف الا رونق دفرت باب الغرفه ونفسها مكطوع

غرام... وج شبيج جفلتيني صاير
رونق.... اسد جوه ......يتبع❤
-------------------
حبايب الظهر بالغلط نشر البارت وجنت بعدني ممكملته
والواتباد ثكيل كلش هاليومين موتني ماعرف شبي
ان شاءالله تتونسون بالبارت

سوزان ليث💚