رواية حب جنوني الفصل الستون 60 - بقلم سوزان ليث

ماعرف شنو داحس بي بس شك من يدخل بين اثنين الحب يطلع من نفس الباب
اخذت تليفوني وكتبت الرقم بسرعه قبل مانساه ياربي اني جاي اسوي  ليش هيج ديصير ويايه ...

قررت اتصل بالرقم بس احس كلبي حيوكف هلكد مدك سريع
اتصلت بالرقم واني ماعرف الي داسوي صح لو غلط
دك دك دك جاوب صوت اجاني صوت بنيه ..

ظليت اسمع صوتها وهي دكول الو الو حتى اتاكد اي صوت بنيه بسرعه غلقته
جسمي صار كله يرجف ايدي رجلي كلشي احساس بارد حقير ظليت كاعده واحاول استوعب مره ثانيه معقوله صوت بنيه جان اي صوت بنيه خاف نقلت الرقم غلط  لا صح ليش مداصدك
بس محمد هيج هنت عليه
ظليت مصدومه حتى منزلت دموعي مثل كل مره يمكن انصدمت بي
وره فتره من التفكير كمت طلعت من غرفتي شفت رجلي ماخذتني لغرفه اسد دكيت الباب
وسمعت غرام دكول ادخل

دخلت شفتهم كاعدين  يتفرجون تلفزيون ونظراتهم موجهه الي ينتظروني احجي بس احس لساني ثكل مداكدر انطق كام اسد عليه كلي

اسد... شبيج
نبأ... باوعت على اسد بسرعه حاوطت خصره ودفنت راسي بصدره ونهاريت اشهك وابجي هو ظل مصدوم ظل يمسح على شعري ويبوس براسي ويكلي اهدئي

وخرت راسي باوعت على اسد كتله  ماريده كله خل يعوفني

اسد... تعالي كعدي ..
نبأ... كعدت وغرام جابتلي ماي بس ايدي ترجف وحتى الكلمات احجيها احس حلكي يرجف

اسد... شكو صاير
نبأ... حجيت لاسد كلشي هو ظل صافن وبعدين كال انطيني رقم نطيته الرقم وهوكلشي محجى ولا حسيته نصدم كلي كافي كلشي ينحل عافني وطلع

اجتي غرام عليه خطيه ظلت تحجي ويايه وميخالف ويجوز اكو غلط والمفروض تحجين وياه هواي حجي حسيتها تحجي بس حتى تريحني
نداريت عليها كتلها اذا اسد اكتشفتي يحجي ويه وحده جان سويتي

غرام ... مجرد تخيل صعب كتلها صراحه اعوفه

بالاثناء دخل اسد باوع على غرام كللها تعوفين منو

غرام ... انت اذا تحاجي بنات شعندي باقيه وياك
اسد... مسكتين لخاطرربج ... نبأ هسه حيجيني وافتهم منه تريدين تحجين وياها انتي
نبأ... لا ماريد كله يعوفني ويروحلها اني مو لعبه عنده
اسد... كافي تبجين لخاطر الله دموعكم شكد ينزلن روحي غسلي يله

راحت نبأ ندار على غرام الي عيونها مدمعه على نبأ

اسد... ابجي انتي هم عالواهس
غرام ... اسد نقهرت على نبأ خطيه ليش هيج محمد سوى
اسد... خل يجي وافتهم منه انتو بسرعه تحكمون عالشغله استغفر الله
غرام .. ماعرف ليش اذكرت فراس وشون عزمنا ذاك اليوم كتله لاسد
اكلك اسد  اذا اذا بنيه تحجي ويه واحد جان يريدها وهي مزوجه تعتبر تخونه لرجلها.. اني حجيت هيج اسد ندار عليه بسرعه وخازرني كلي بنبره عصبيه وحاده
اسد... طايح الحظ ديحجي وياج
غرام ... لا لا مديحجي بس داسئل والله هيج  .. شفته تقرب عليه وكعد يمي وعيونه تجدح
اسد... وشمدريج اني على منو اقصد بالطايح الحظ
غرام .. ظليت ابلع بريكي واحس بطني كامت تلويني ظليت امتمت بالحجي كتله مو مو وماعرف شحجي  الحمدلله تليفونه دك ونقذني
ندار عليه كلي

اسد... خل اشوف محمد وارجع اشوف سالفتج

اخذت نفس والله احس صار عندي تقلصات بطني من الخوف شحجاني امداني كمت طلعت رحت لنبأ  لكيتها تبجي وحالتها حاله رحت  يمها ظليت احجي وياها  وتليفونها بس يدك بس يدك
محمد يخابرها
وهي تباع على التليفون وتبجي

وره ساعه هيج جنت كاعده بغرفتي دخل اسد وجهه ميبشر بخير كمت وكفت كتلها ها حجيت وياه

اسد.. اي
غرام ... وشنو فهمك الموضوع
اسد.. والله ماعرف يعني محمد مثل اي شاب عنده سوالف بنات واني اعرف بي بس من خطب كلت تغير بس ابو طبع ميجوز من طبعه

غرام .. يعني شنو محمد يحجي ويه بنات
اسد... يكلي هيج جنت ضايج وماعرف شنو خريط ونوب خبلني احجي وياه وارزل بي وهو لازم تليفون يدك دك على نبأ
غرام ... وهسه شون
اسد.. مادري كلتله دكول بعد ماريده وهوعبالك سبيت امه يريد يدخل للبيت يصعدلها للغرفه
كتله شنو سالفه مو بعينك بعدين انت حتى المايدري حتخلي يدري
غرام ... يعني حيفصخون
اسد... لا شنو سالفه بس هي ازمه بيناتهم وان شاءالله تعدي
غرام ... اي ان شاءالله ... شفته باوع عليه وكلي
اسد...اي ست غرام ليش سئلتيني هالسؤال لازم الحيوان بعده يجيج
غرام ... ها لا يعني مرات اشوفه بس عادي يعني
اسد... يحاجيج
غرام ... لا
اسد... ممرتاحلج
غرام ... عزه شعندي قابل والله يالله ميرتاحلي عفته وطلعت خرب والله لو دقيقه باقيه جان اعترفت على نفسي
عفته ونزلت جوه

.....
رونق... عده جم يوم جلال ابد ميحاجيني ابد اني كمت احوص اريد احاجيه ضجت واشتاقيتله فرحت لبيت عمي عساس اشوف رونق
فدخلت شفت عمتي وفهد كاعدين بالمطبخ سلمت عليهم وكعدت اسولف وياهم  وره شويه ندكت الباب طلع فهد ورجع جايين قصي وعلي ولد عمي فسلمو وكعدو ديسولفون فعلي علاقته كلش ويه جلال اثنينهم نفس الاعمار لابس سوار كلش حلو جلد فاني كتله شكد حلو هذا سوارك فنزعه وكلي كدامج
فاني كتله لا والله حلو وماريد بس هو شمره عليه
فاني لابسته هو رجالي بس شكله كلش حلو
فصعدت للبنات شفت رونق
وكالبتها مناحه ظلينا نسولف وراها نزلت فشفت جلال كاعد يم الولد
فاني جيت وكفت وره هو مشافني واعرف بي مشتاقلي تقصدت اوكف وره فكلت لعلي
اكلك علاوي هذا سوارك بي اللوان اريد جلال ينتبه عليه
فعلي كلي اي بي جوزي اكو عود ادزلج واحد بيد جلال
كتله شكرا
طبعا جلال هو ناطيني ظهره بس يحرك رجله بسرعه عبالك شاد محرك
عرفته ضاج  فاني سلمت عليهم وطلعت رجعت للبيت وره نص ساعه هيج تليفوني اشتغل المسجات مسج وره مسج
قبل ماشوف المسجات عرفته جلال كعدت اقره
الرسايل كله رزاله من هاي توب
وراها كاتب خمس دقايق ادكلج طلعي احجي وياج بالكراج
فشويه ودكلي نزلت بالكراج فتحتله الباب ودخل
بالبدايه ظل يباع عليه وحواجبه معكوده عبالك حيضربني
فاني ظليت ساكته بس اباع عليه وارمش
فصعدت ايدي اعدل شعري هو انتبه عالسوار
جان يلزم ايدي
كلي
جلال ... شنو هذا
رونق... سوار علاوي نطانياه هنا نقطه تحول عنده صارت عصر معصم ايدي حيل ويحجي
جلال... اولا اسمه علي مو علاوي زين

رونق... شفته نزعني السوار وكلي
جلال ... ثانيا... متاخذين شي من احد غيري افتهمتي
رونق... اني ابتسمت اله كتله مو زعلان مني شون اخذ منك
جلال... رونق لتخليني اتخبل عليج وتعرفيني من طك عندي شسوي
رونق... تهددني
جلال... اي اهددج واكسر راسج لعد شنو تاخذين من عنده وفوكاه يريد يدزلها واحد ثاني بيدي حتى اشدهن واكعد المع بيهن
رونق... هههه عادي هو هم ابن عمي شفته كام يعض شفته ضحكت كتله والله اشاقه شبيك
جلال... يله دخلي جوه
رونق... صالحنا يعني  شفته ابتسم
جلال ... بس والله اذا ضميتي عليه شوفي شسوي بيج
رونق... شسوي تعوفني
جلال ... اي اعوفج واشوف وحده ثانيه تسمع الكلام
رونق... عادي اني هم اشوف واحد ثاني ميعيط عليه
جلال ... دخلي جوه لاكسره لراسج
رونق... دخلت جوه واني الابتسامه منا لهنا
........
رونق... وره محجيت لاسد كلشي هو قرر يحاجي محمد من صدك ماريده ولا اريد اشوفه بس كومه مسجات صار يدز نص يتوسل حتى اجاوبه نصها يهدد حتى اجاوبه
بس الحلو بالموضوع هو منكر لا بكل قباحه  يحجي شكيت رجع لهاله بس هذا الرقم مو نفسه رقم هاله يعني يجوز هاي وحده ثانيه
زين منو صاحبه المسجات
قررت اترك هالموضوع رغم جان قاهرني ومقهوره على نفسي لان من كل كلبي حبيته واصلا جان يكلي محبيت بالدنيا كد محبيتج زين وين كلامه كله جذب زين لهفته من يشوفني غيرته عليه شنو كلها تمثيل

رجعت احاول اقره مرت ايام واني مشايفه محمد ومغلقت الجهاز بس حتى اقهره واذله من يتصل وماجاوبه
اسد قبل ميلتحق كلي انسي هسه محمد اهتمي بدراستج لان شافني قافله حيل الا افصخ
فاني قررت التهي بالقرايه وو ه ماكمل امتحانات افاتح اهلي بسالفه محمد ماريد هسه مشاكل وتاثر عليه كافي الي اني بي
وره فتره شهر امي كالت شو محمد من يجي مدتنزلين شوفي اني كتلها مو تفقنا وره الامتحانات يله اشوفه ماريد التهي المهم امي قتنعت او لا مادري بس شنو بهاي الفتره محمد مظل شي مسواه
جان يجي يوميه لبيتنا بس حتى يشوفني او يلمحني  وايمان جانت تنقلي الاخبار
بمره دزلي 📱 ادري غلطت ادري قهرتج وجرحتج بعملتي هاي بس نبأ من اول غلطه انتي تريدين تعوفيني ولج والله احبج انتي حبيبتي وطفلتي لاتحرميني منج كافي تعبني غيابج

اني اقره الرساله ودموعي تنزل مجاوبته عفته وراها سمعت مسافر وهو بيومها ظل هواي يدك مجاوبته
فوره مسافر جم يوم امي كالت ام محمد مريضه وروح نشوفها اني ماقبلت بس بعدين ترزلت من امي على انتي جنتها وانتي لازم دايما سئلين عليها
المهم كلت همزين هو مسافر حتى ماشوفه
فالعصر رحنا كلنا فدخلنا وعادي سلمنا على امه واخته وكاعدين يسولفون فاخته صاحتني للمطبخ فكمت عليها اشوف شتريد
تفاجئت تعرف بسالفه ومحمد كايللها

هديل ... انتي متعرفين محمد شكد يحبج والله هالايام متخبل واعصاب والله ميتحجى لان انتي مدتحجين وياه والله هو كلش يحبج وماعرف ساعه شيطان وسوه هيج ونطي فرصه ثانيه
نبأ... اني ظليت ابتسم بس ابتسامه استهزاء من كلامها وينه حبه وهو يروح يحجي ويه غير شنو ياخذ استراحه مني مثلا
كتلها ... اني مانطي فرصه واذا فعلا يحبني مجان هيج سوه

هديل ... بس هو والله يكول اني ماحبيت وحده مثل نبأ والله يكول هاي طفله مالتي
نبأ... هديل شك دخل بينا وياريت جان مجرد شك لا ترى كشفت خيانته بعدنا مخطوبين يحاجي بنات نزوج شنو يزوج عليه
واصلا اذا هو عباله اني ساكته لحد هسه فهو غلطان وياريت دكليله نبأ دكول بس انتظر اخلص امتحاناتي وشوف شسوي

هديل ... هيج ظالمه انتي لعد مو دكولين احبه اليحب شخص غير يسامحه لو ميصدك يلكه عليه شي

نبأ... لا احبه ومحبيت غيره وهو يعرف هو شنو عندي بس كلشي ولا احس نفسي ماعندي كرامه
هديل... تعالي ويايه اراويج شي

نبأ... صعدت وياها دخلتني لغرفه محمد اخ كلبي احس هو موجود بيها عطره شغلاته كلشي بيها حسيت محمد يمي وقريب عليه اظاهرت كدام هديل عود ضايجه كتلها

ليش صعدتيني هنا شفته كالت اوكفي اشوفج شي راحت عالميز تواليت شالت عطر كلتلي هذا مو نفسه عطرج

كتلها اي نفسه

هديل...ههههه عرفت مالتج لان كل مادخل الغرفه اشم ريحته يملي الغرفه بي
ولج روحي شمي المخده الله عليج

نبأ... ابتسمت لااراديا ورحت شلت المخده اشتمها بيها عطري
هديل... ولج كام ينام على عطرج وانتي متدرين
نبأ... ظليت ساكته مادري شحجي كتلها خلينا ننزل
نزلت بس هي معافتني حجي حجي حجي عليه هو موصيها ماعرف هي من كيفها تحجي

وره ايام بديت امتحانات اخير سنه بدت بس شنو صح جنت تعبانه من القرايه واكلي قليل حتى جوه عيني تعبان بس جنت مشتاقه لمحمد اشتياق طفله لابوها قبل مانام اطلع اطلع صوره واكعد اتفرج عليه لحد مانعس وانام كلش اشتاقيتله حتى من يجي لبيتنا انزل اوكف يم باب الاستقبال اسبع صوته من يحجي
اول يوم اسلاميه عدنا فاني كعدت من الفجر راجعت وكملت فصار وقت الدوام فبدلت وكفت كبال المرايه الف شالي اخترعت وجه عجوز كلت يله اني رايحه للامتحان شسويله
نزلت جوه انتظر الخط يجي ماجربن سياره تودينا اني ورونق واثنين بنات بالمنطقه المهم اجه وصعدنا توتر وقلق والكل خايف وكلسع وحده كايله اقرو هاي مرشحيها اقروا هاي صبح نشروها
وصلت للمدرسه فداحجي ويه رونق داسئله بشي بالامتحان كالت عزه باعي منو واكف هناك
نداريت شفت محمد بس هو مشافني لان احنا مجموعه مال بنات ماانتبه علينا اني بسرعه دخلت للمدرسه وكلبي يدك سريع احس كلشي نسيت مجرد لمحته من بعيد
دخلت جوه واني احس توترت بالزايد من شفته صار فتره كلش هوايه مشايفته ولا هو شايفني
بس طول هاي الفتره يوميا يدك يوميا يدز مسجات  ماكذب جنت افرح بس بنفس الوقت اكول هو خاين ميحبني زرع الشك بيه مو بيدي

كملت امتحان ورجعت للبيت  شفته دازلي مسج 📱 شون جاوبتي بالامتحان

وهم داك كومه مجاوبته عرفت من غرام مخابر اسد يسئل شون مجاوبه
امتحاناتنا جانت بين يوم ويوم بيوم اللغه العربيه كمت بدلت وخليت شويه باودر وكحله كلت خاف اشوفه رحت للمدرسه اتلفت منا ومنا ماكو. طن فشلني
كملت امتحان ونفس الشي رجعت للبيت كاتب شون جاوبتي
وهم مخابر اسد سائل عليه ظل هيج الامتحانات كلها ماعده امتحانات جان يجي بالليل لبيتنا جايبلي مرشحات وينطيها لاسد يوصلها الي
ظل هيج لحد اخر امتحان
اني بيومها لابست تنوره وقميص ابيض وخليت كحله
رحنا للمدرسه وبطلعه شفت سيارته طابكه قريب المدرسه مالتنا
اني من شفت سيارته احس كمت اتعثر بالمشي المهم وصلت للخط فابو الخط كل منطلع من الامتحان يسئلنا شون جاوبتو جان ولد شاب بس حباب ومؤدب
فهو جان واكف يمسح الجامه فاني وصلت يم الخط سلمت على ابو الخط وداركب فسئلني شون جاوبتي فاني كعدت اكله زينه وسئلني على بنات الخط اذا كملو كتله مادري والله هو الي يكمل يطلع ميخلو بالمدرسه وصعدت يعني  مطولت خمس دقايق بالحجي  نداريت اشوف محمد شافني لو لا شفته يباع بجهه خطنا اني تبسمرت كلت شافني واكيد شافني من حجيت ويه ابو الخط بس احسن خلي هيج يموت من القهر
فالبنات تاخرو جنت بس اني وبنيه مكملين رونق وبنيه بعدهم جوه
فكتلها للبنيه تجين روح نشتري من المحل جوعانه وممتريكه
كالت يله
نزلنا كلنا للخط روحي نشتري فاني امشي وعيوني صفح اباوع لمحمد شفته فتح السياره ونزل اني ركض دخلت للمحل اخذت عصير وبسكت واخذت عصير لابو الخط من داطلع من المحل وكف مقابيلي محمد اني شميت عطره يمه احس كلبي يريد يطلع من مكانه
شلت راسي شفته ورجعت باوعت بغير جهه حتى اعبر هو كلي اوكفي خل احجي وياج
بس اني ماوكفت جاوزته ورجعت للخط بنيه الي ويايه دكلي منو هذا كتلها ماعرفه
رجعت للخط قدمت العصير للولد مقبل كلي اني صايم كتله من تفطر تشربه عاد اخذه
وصعدت بسياره اني والبنيه
نداريت شفت محمد صعد بسياره وحركها ومشى كبب الترابه وراه اني ضحكت بخبث عرفته ضاج
بس يمه شو هذا صاير حلو بزايد نوب مربي لحيه فدوه يجنن
ظليت مبتسمه واني خالته يموت قهر هسه اجوي البنات ورجعنا للبيت طبعا عبالك جنت بسجن وخلصت منه صادف رمضان ويه امتحاناتي فاني جنت ماصوم لان ماكدر اذا اصوم لازم اظل نايمه وماكدر اقره عاد كلت بعدين اصوم طلب
رجعت غسلت وكعدت اكل وجنت فرحان كلش لان خلصت امتحانات لو لان شفته وسمعت صوته بالحالتين فرحانه صعدت نمت العصر ايمان اجتي تكعدني كمت كالت كومي يله امي دكول دنحظر الفطور
فاني نزلت بالبجامه وشعري واكف امي شافتني كالت ماما رجلج جوه حدخليله هيج اني باوعته كتله رجلي منو
كالت ليش انتي جم رجال عندج كتلها ها لا محمد جابه
كالت حيفطر يمنا امشي غيري هدومج وعدلي شعرج وخليلج شويه كحله حمره مصوفره امي قصفتني
صعدت فوك رحت سبحت ولابست بنطرون وقميص فوكاه وشلهت رداناتي للعكس ورفعت شعري كبايه ونزلت خصل شويه مكياج خليت ومليت نفسي عطر دانزل بله اني شكو هيج مهتمه كلت لا اولا اهلي ميعرفون اني ومحمد مزااعلين ثانيا اريد اشوفه اني مهتمه بنفسي بوجوده او بغيابه
نزلت امي كالت اخذي الماعين وزعيها عالميز بالاستقبال
فاني اخذت الماعين ووصلت للباب الاستقبال استحي ادخل
بس شجعت وفتحت الباب دخلت شفت جلال واسد كاعدين ومحمد كلت السلام عليكم همه ردو اني كمت اوزع بالماعين حتى ماشلت راسي على محمد سويت نفسي مشايفته
طلعت وكمنا اني وايمان وغرام ننقل بالاكل لحد مكمل اجه ابويه كعد وصاح الكل يكعد فااهلي كعدو محمد وبصفه اني

ظليت واكفه اسوي نفسي املي بكلاصات لبن ابويه كلي تعالي كعدي يم رجلج عوفي فهد يصب اني رفعت راسي شفت محمد حاصر الضحكه
شون نرفزني نداريت على اسد واني مخنزره اسد سوالي ميخالف واشرلي على ابويه المهم اني جريت الكرسي وكعدت بصفي ايمان اني تقريبا نص جسمي كاعد على كرسي ايمان ماريد المس محمد كارهته  وايمان مايله على جلال

فجلال صاح باايمان لان تقريبا كعدت بحضنه من ورايه كلها كعدي عدل
فهي ندارت عليه كالت ماخذه كرسي مالتي وعايفه كرسي مالتج فاني كعدت عدل بس مو كلش طابكه على محمد اذن وبدينا ناكل محمد كلسع مسوي نفسه ياخذ شي من الميز ويتقرب عليه لحد ملزك بيه
وكلسع ماد ايده جوه الميز يمشي اصبعه على رجلي واني اف اف واستغفر ربي

فرفعت راسي كبال غرام كتله انطيني كلاص عصير فمحمد بسرعه شال كلاصه خلاه كبالي اني كمت من السفره ورحت اخذت كللاص عصيروكعدت هو همس باذني ترى نظيف لتخافين ماشربت منه
نداريت عليه كتله ماستنظف شي منك
ونداريت هو حسيته يريد ينفجر قليل بحيث شويه وكام كال الحمدلله شبعت
اني ظليت كاعده اكل امي كالت روحي وره محمد جيبله خاولي نداريت عليها كتله معلك خاولي بصف المغسله
ابويه كال كومي بنتي وياه كمت واني اتافف ادري اروح اغسله ايده طفل هو
كمت رحت وكفت قريب المغسله ومجتفه ايد هو يغسل ويباع عليه
كمل نشف ايده واجه وكف يمي كلي
متستنظفين شي مني مو

نبأ... اي والله ماستنظف لان ماعرف هاي ايدك المن لازمه وانت ضايج
عفته ورجعت للسفره كملت اكل الولد كملو وكعدو يمه
وره مكملنا فطور كعدنا كلنا نشرب جاي جان جنت بعيد على محمد واباوع عالتلفزيون امي كاعده بصفي كالت شنو مزاعلين انتي ومحمد
كتلها اي مزاعلين كالت ليش اكيد مو وره لسانج ضوجتي الولد نداريت عليها كتله ترى محمد مو ملاك نازل من سما 24 ساعه تحمدين بااخلاقه
كالت ليش شمسوي واستحي لاتحجين هيج عليه كتلها حقج متعرفين شمسوي
كالت شمسوي كتلها بعدين امي مو وكت هذا الحجي
اني ظليت كاعده اتفرج تلفزيون اسد كلي اكلج احمد نطيتي فلوسه اليوم يقصد على ابو الخط كتله اي والله نطيته مقبل ياخذ بالكوه

اسد... اي هو خوش ولد
نبأ... اي والله كلش حباب خطيه كل منطلع من الامتحان يسئلنا شون جاوبتوا
اسد... اي يله عود بالكليه اخذيه خط مضبوطه مواعيده

محمد بسرعه حجه كال

محمد .... ماكو داعي اني اوديها واجيبها بالكليه لان حصير يمي
نبأ... اني نداريت باوعت على محمد رفعتله حاجبي ونداريت والله ياالله حصير يمه كلش متامل ابقى وياه الخاين

وره شويه كام ابويه وجلال راحو للجامع يصلون فهد طلع اسد اخذ غرام وصعد امي طلعت وعافتنا اني ومحمد اني
كلت لازم احجي وياه حتى نفصخ لان ماريده بعد
هو من امي طلعت هو جان بعيد عليه بسرعه كام وكعد يمي اني جنت دايره وجهي عالتلفزيون استحي مدري شبيه عبالك اني مسويه عملته
مد يلزم ايدي اني بسرعه دفعت ايده ونداريت عليه كتله
ديربالك تلمسني ماشي

محمد... نبأ لخاطر الله كافي ادري غلطت بس انتي حتى مفتهمتي شي مني

نبأ... شنو الفتهمه انت تسمع شتحجي لو اني بمكانك جان سامحتني
محمد... لتحجين شي متفتهمين معناه
نبأ... باع لعد خل اسوي مثلك حتى اخليك تحس بشنو حسيت
محمد... اسف وربج اخر مره نونو اشتاقيتلج كافي بعد
نبأ... شنو سبب محمد
محمد ... شنو
نبأ... شنو سبب خلاك تحجي ويه غير شنو قصرت وياك بشي اني وعيت عالدنيا شفت نفسي احبك وماشوفت غيرك جنت اشوفك ويه هاله واموت قهر واسكت اكول كافي هو فرحان ومرتاح والله جنت افكر بيك اكثر مافكر بنفسي
من جنت تجينا اظل ادور حجج حتى ادخل اشوفك واعرف انت مشايفني اصلا

محمد... اني غبي والله بس ورب الكعبه احبج انتي تمشين ويه هذا الدم ادري غلطت ساعه شيطان والله مو نفس الي بالج صح حجيت ويه غيرج بس وداعت امي كلام عادي بين اي اثنين مجرد اصدقاء

نبأ... احنا هم جنا مجرد اصدقاء ترى
محمد ... حبيبي كافي لخاطر حبج مو دكولين احبك وانت متستاهل حبي انطيني فرصه ثانيه
نبأ... بين الي جنت اريد اسامح وبين لا صراع بين عقلي وقلبي قلبي يكلي سامحي هو اول مره يغلط وبعد ميعيدها وعقلي يكلي شنو سامحيه نسيتي رسايل التجيج الله اعلم ويه منو بعد يحجي
كتله ... محمد هاي اخر مره اسامح تعرف ليش مو علمودك بس علمود حبي ماريد ينتهي هيج
بس وداعت حبي الك اخر مره اسامح
شفته تقرب عليه وجرني حضني قوي ويكلي ولج احبج ياروح محمد والله جنت ضايع بدونج
ظل حاضني قوي ويبوس براسي ويشم بيه ويكلي ولك اشتاقيت لريحتك حبيبي
.........
غرام ... جنا كاعدين بغرفتي اجتي رونق ونبأ يمي نسولف ونحجي ويحجون علمعدلات والنتائج والكليات  وحجي عادي فرونق كالت لازم اطلع طب اسنان

نبأ... ليش عود الا اسنان
رونق... ولدهم حلوين هههههههه
نبأ.... هههههه اي والله كلش حلوين

غرام ... شكد متستحن انتن ولا كانما عدكم رياجيل يسدون عين الشمس
نبأ.... هههه طبعا عمي انتي شبعانه يوميا شوفيهم
رونق.... كافي فروسي يومي يصبح عليج

غرام ... عزه بعينكم شنو هالحجي طاح حظكم اي والله شعندي وياه اني
نبإ... صدك كلتيله لاسد من عزمنا
غرام ... لا والله كل ماريد اكله ينعكد الساني والله
رونق... لدكليله بعدين تتعاركون وسالفه راحت وعدت
غرام ... ها لا اكله بس من اشوف صافي البال  بعدين الله ميوفقني وياه ويطلعها يجوز واني حامل عزه اخاف

بالاثناء نفتحت الباب قوي ........ يتبع ❤️