رواية حب جنوني الفصل الخامس والعشرون 25 - بقلم سوزان ليث

جده ... باعي عمتج نضال جانت بعدها بالمدرسه ومن اجه ابن عمها خطبها كتلت نفسها استقتلت الا هو كتلها ولج كملي دراسج الزواج مو كلشي لاصيرين مثلي بس هي ماقبلت وعندت الا تزوج وتعوف دراستها
وروح ابوي شهر واحد وجتي زياره النا كعدت هاي كعدتج تبجي دكولي متندمه اريد ارجع اكمل كتلها ولج كتلج لاتستعجلين
بس ابقي هيج هذا قرارج

غرام ... جده اني ماكدر بدون اسد كلي اذا تركتي دراستج نزوج
جده حكمه... وهو منو الملك شهريار يمه لاتسمعين كلامه وتكسرين نفسج بعدين تتندمين وتعضين اصبعج ندم

غرام ... ظليت ساكته ماعرف شسوي وحايره
جده ... ها يمه شقررتي شحسوين

غرام ... جده ماكدر بدون اسد ولا اكد بدون دراستي بس والله ياجده اني مظلومه وماسويت شي حتى هيج يتصرف ويايه وهاي مو اول مره يظلمني بس اني اسكت لان احبه وماكدر بدونه

جده حكمه.... والله يابنتي انه مادري شصاير بس مادامج تعرفين نفسج مظلومه لا تمشين على هواى

غرام .... ليش ماسئلتيني صاير

جده حكمه... مادام سالفه تخص الكليه يعني غيره شابه عند اسد عليج ويريد يكعدج

غرام ... بس والله اني مامسويه شي
جده حكمه... يمه ادري تعرفيني بيج وبااخلاقج لاتخليه يتمادى بالغلط وياج اخذيها مني يوم يومين تتحملين بعدين ماتكدرين لاصيرين مثل عمتج شكريه لحد هسه دكول لومكمله

غرام ... زين بيبي احجي وياه هو يسمع كلامج
جده حكمه .... ماشي يمه احجي وياه ولو اعرف الكلام ويه اسد ضايع لان الي براسه يسويه

غرام ... اي ميخالف هو يحبج وانتي الي تكدريله

وراها رجعت للبيت بس ارتاحيت من حجيت ويه جده حكمه هواي تحب البنيه تكمل دراستها ودايما دكول رجال مو كلشي اهم شي انتي مع العلم هي ممكمله بس تشجع الي يكملون
رجعت للبيت واحس نفسي انفتحت اكلت شويه وصعدت ظليت افكر بكلامها واني صدك ليش اترك دراستي واذا احبه واني ممسويه شي حتى هيج يعاقبني اذا يحبني يشجعني حتى استمر مو يطلب مني هيج
بس يربي والله ماكدر بدونه زين ليش ماهو مايكدر بدوني
صرتي مخبله ياغرام وكمتي جاوبين نفسج وسئلين
ظليت افكر وافكر لحد ماغفيت

اسد... الغيره موت بطيئ مو عدم ثقه بالي تحبه لكن من حبك بي تريده بس الك ماتحملت من صاحبي خابرني يكلي خطيبه مو صي عليها ميت الف سؤال اجه بالي اول شي تجذب وظم عليه واني محذرها من هذا الشي ثاني شي راح يوصي عليها ليش على اي اساس واصلا شعرفه بدرجاتها غير هي مسولفتله يعني تحجي وياه
زين من تكتشف حبيبتك الي تريدها صير ام بيتك وجهالك جذب وظم وتحجي ويه رجال خال عينه عليها شنو يكون رد فعلي
ماكمت اشوف غير بس اريد ابرد كلبي اذيتها بس اذيتي جانت اكبر من اذيتها متعرف شكد احبها متعرف شكد احبها لو بيدي اظمها من عيون كل البشر تحبني لو تحبني ماظم عليه تخاف مني اني لو تصارحني ماسويلها شي بالعكس تكبر بعيني اكثر لان اعرف بوقتها تخاف على زعلي
ادري تحبني بس ردت اعرف تحبني اني لو دراستها اكثر لمن خيرتها جان بالي بس دكلي طبعا انت دراستي شنو بس من سكتت عرفت اني الخسران لان عمرها محتفظلني على دراستها
كتلها فكري لان شفتها متردده وبعيونها حيره اكذب لو كلت قوي بس من اشوفها كلشي يروح واظل بس لهفتي الها ماكدر اقاوم قربها الي وره المشكله التحقت لان اعرف نفسي بس تجي عليه حاذيها بكد حبي الها وماكدر اشوفها تتاذى سواء بكلام جارح او امد ايدي عليها ماكدر اسيطر على اعصابي اعرف هذا غلط بس ماكدر مو بيدي
احبها وماتحمل تروح مني

العصر جنت كاعد خابرني عمي كلي جدتك تريدك
ماجنت مصور غرام عدها جرئ تروح تحجي وياها بموضوعنا تفاجئت من شفت جده تحجي بي صح احب جده حكمه بس جان قراري نهائي لو اني لو كليتها يمكن لو بس دكلي انت اخذها بحضني واطلع ضيم كله بيها

غرام .... كعدت صبح ظليت بالفراش ماكمت ظليت اباع عالسكف بس جنت مقرره اسد يحبني اي بس يحب نفسه اكثر كرامته عده اهم مني واني يريدني بدون كرامه على اي اساس لان هو رجال مثلا واني بنيه ماكدر اترك دراستي اولاً لنفسي لان تعبت ولان حلمي هذا من اني صغيره ثانياً فرحه امي من نجحت وطلعت طب عمري مانساها وحجيها من نحجت وهي دكلي رفعتي راسي بعده عالق باذني احب اسد بس لازم احب نفسي اكثر منه يريد يزوجني ويكعدني بالبيت حتى يرضي غروره اعرف يجوز هذا القرار حيخلي اسد يعوفني ويبعد بس ارجع واكول كلشي ولا دراستي خط احمر
بعد مارحت لبيت عمي بس جنت لازم اكله بقراري لازم يعرف اني ماتخليت عنه هوالي تخلى عني من خيرني الحب مابي تخير الحب بي الشي الي احبه مو شي الي انت تحبه
رحت لبيت عمي سئلت عليه وصعدتله دكيت الباب وفتت مانتظرت يكلي دخلي شفته مدد عالجربايه شافني كام عدل كعدته رحت كعدت يمه ظليت فتره ساكته وهو نفس الشي لحد ماهو حجه وكلي

اسد... شقررتي
غرام ... قررت اتخلى عن دراسي ومستقبلي لاجلك بس اني هم عندي شرط
اسد... اي كولي
غرام ... تترك الجيش واني بالمقابل اترك دراستي
اسد... ظليت صافن عليها اول مره احسها قويه كدامي ... صدمتني بصراحه بطلبها

غرام ... شكلت تترك شغلك علمودي
اسد... واذا اتركه بيش نعيش
غرام ... عادي دور شغل اشتغل بشهادتك افتح مشروع كومه اشياء تكدر سويها
اسد... بس هذا حلمي من جنت صغير
غرام ... ابتسمت اله كتله ودراستي هم حلمي من جنت صغيره
اسد... يعني افهم كلامج محتتخلين عنها لاجلي
غرام ... من تتخلى عن شغلك لاجلي
اسد.... واني محتخلى عن شغلي
غرام ... واني محتخلى عن مستقبلي
اسد... ماشي غرام الي شوفي مناسب الج سوي بس لازم تعرفين كلشي بيناتنا انتهى من هاللحظه
غرام .... ظليت اباع بعيونه ماعرف بالكوه كتمت دموعي ماريده يشوفني ضعيفه ... ماشي عالعموم شكرا على كلشي سويته الي ولازم تعرف شي واحد عمري محبيت غيرك مثل ماانت مصور
.... عفته وكمت طلعت ركض نزلت رحت لبيتنا صعدت لغرفتي واطلقت سراح دموع الي نزلت بدون تردد ظليت اشهك وابجي مامصدكه كلشي انتهى  ماعرف سويته صح لو غلط بس كلبي ديوجعني اريد ارجعله واكله اعوف كلشي لاجلك بس ابقى يمي بس كرامتي مدتخليني نظرات امي من ادخل واني اشوفها شون فخوره بيه مدتخليني اريد يكلون على امي صح رجلها متوفي بس هي طلعت بناتها احسن البنات اريدها ظل رافعه راسها بيه
ظليت ابجي وحس طاقتي هاهيه خلصت ماكدر اكمل كلشي صار اسود بعيني
عدت جم يوم على موضوعي اني واسد وبهاي الايام ماشفته ولا شافني كانما واحد ميريد يشوف الثاني حتى ليضعف كدامه
وراها بدا الدوام ورجعت داومت مر اسبوع واني اداوم اكذب اذا جنت افتهم شي من دكتور يشرح احس كلشي مداشوف بكل مره انزل بالخط راجعه للبيت جنت اتمنى المح اسد كل مايدك جرس بيتنا جنت اتمنى يطلع هو

وره شهر على فراقنا خلال هذا شهر ماشفته ولا مره شكد مشتاقتله يمكن لو بس اشوفه اروح ركض بدون تردد احضنه
بيوم جنا كاعدين اني ورونق اني داقره ورونق هم امي فاتت علينا للغرفه وجهه مبتسم
كنالها خير شو فرحانه
صدمتني صدمه عمري الي عمري ماجنت مصورتها صير من كالت
ام غرام .... اسد حيخطب
غرام ... يمكن توقف عندي الزمن ظليت بس صافنه على امي واني مداستوعب الكلام الحجته واحس نعقد اللساني

رونق... المن
ام غرام .... بيت ام امير الي بيتهم بدايه الفرع حنخطبله بتها الجبيره سرى
رونق... وشعجب هاي
ام غرام .... هو مايعرفها هو كال لامه خطبيلي اريد ازوج وامه فكرت بسرى خوش ابنيه ومؤدبه

غرام ... اني مداحس بشي احس كلشي متوقف اسمع كلام امي بس مداكدر انطق بكلمه مثل الي كصو لساني امي طلعت واني بس باوعت على رونق شون تباع عليه ونظره القلق بعينها نزلت دموعي حسيت كلبي محروك مكسور متحطم الف قطعه ماجنت مصوره يجي يوم ويخطب جنت اعتقد فراقنا ميطول جم يوم ونرجع بس ليش هيج سوه بيه ليش حبه الي وينه وهو رايح يخطب غيري ظليت احجي ورونق تبجي ويايه
هسه يله عرفت احساس رونق من سمعت خبر خطوبه انمار هسه يله عرفت ماكو اي كلمه تواسيج او تخفف عنج
ظليت حاضنه رونق وابجي كتلها رونق ليش هيج حظنا ليش الي نحبهم يعوفونا ويزوجون ليش ماعدنا حظ

رونق... حبيبتي لاتبجين مو جنت دكليلي الله يسويلج الخير دايما
.عسى ان تكرهوا شيئاً وهو خيراً لكم .

غرام ... رونق ليش هيج ليش والله ماسويت شي حتى هيج يعاقبني والله ماسويت شي يخلي يعوفني

رونق... كافي حبيبتي والله اعرف والله هو الخسرج لا ضعفين وتنكسرين هو يريد شوفج مكسوره لاتخلي يحس هو انتصر عليج

غرام ... غرام راح راح لغيري ماكدر ماكدر حخابره اكله لتزوج وتعوفني اكله اترك دراستي وكلشي بس لتزوج والله ماكدر اموت اموت

رونق... لا لتنزلين نفسج اله لاتخلي يشمت بيج تذكرين من خابرت انمار واني اتوسل بي ولج جان جوابه الي كلشي قسمه ونصيب
لا تنزلين نفسج اله عوفي خل يروح ميستاهلج

غرام ... ظلت كلمات المواساه من رونق بس كلشي مديفيد ويه كلبي ولا ويه دموعي نار بصدري احس
ماعرف شون مر هذا اليوم عليه ثاني يوم ماداومت لان جنت منتهيه

رونق... طلعت صبح من البيت شفت اسد واكف بالباب باوعت عليه ودرت وجهي ماسلمت عليه وصعدت بالخط ظل يباع عليه هاي اول مره هيج اسوي بس ماكدر اني كارهته وضايجه منه لان سوه بغرام هيج وهي متستاهل هذا كمت اشوفه مثل انمار خاين العشره ومايستاهل ولا اي شخص يحبه
صعدت يمي نبأ جانت مبين عليها ضايجه سئلتها كالت اسد حيخطب دريتي
كتلها اي عرفت سرى
نبأ... والله صدمني حتى ماباركتله ولا اباركله شونها غرام عرفت بالخبر
رونق... شونها اليوم مداومت كل عين هالكبره من البجي والله تكسر الكلب
نبأ... يمه الله يساعدها والله كرهوني بالحب لا احب ولااريد احد يحبني شو الي يحبون صايرين يحبون وحده ويزوجون غيرها

رونق ... دنجت راسي لان حسيت كلامها الي هم شافتني ضجت
نبأ... رونق والله ماقصدج بس من حركه كلبي حجيت هيج
رونق... عادي مكلتي شي غلط كلامج صحيح يمكن احنا منعرف نختار
نبأ... اني الي ياخذني اخلي بس هو يحبني حتى لو اني ماحبه المهم هو يحبني
رونق... والله احسن على كولت بيبي حكمه اخذي الي يحبج وعوفي الي تحبيه
نبأ... بس صار لو اخذ واحد يحبني واحبه
رونق... عادي حبيبتي لتتعقدين من بنات عمج اكو الزينين
نبأ... كلهم حقراء الله ياخذهم
رونق... ههههههه امين

اسد... وره كلامي وبه غرام ومن عافتني وطلعت كمت وصلت يم الباب اريد افتحها حتى الحك عليه واخذها بحظني ماكدر بدونها بس ماكدر اكسر كلمتي حتى لو احبها جنت بس اريد اسمع كلمه منها دكلي اختارك الك يمكن جان خليتها تكمل دراستها ردت بس اتاكد من حبها الي ودايما اطلع اني الخسران انتظرت ايام جنت اريدها ترجع ودكلي ماكدر بدونك بس ماتنازلت ابد ورجعت داوم يوم عن يوم جنت احقد عليها لان خلت عمري كله يروح واني انتظرها
ردت اكسر كلبها ردت اشوفها هي خسرتني ردت احسسها ترى اني وراج عايش حياتي
كلت لامي تخطبلي اول وحده فركت بها غرام بس ماعرف بالكوه منعت نفسي اكلها اي غرام كتلها لا ماريد غرام مثل اختي اريد وحده اكبر منها
وصدك خطبتلي وحده بالمنطقه صح اني ماعرفها ولا شايفها بس عادي مو مهم اي وحده وخلص
من صارت سالفه خطوبتي واني ماشفت غرام ماعرف شنو جان ردت فعلها بيوم الي نشر خبر اريد اخطب كعدت من صبح ظليت واكف بره ردت اشوفها من تروح للكليه داشوفها اي خايف عليها اريد اطمئن عليها بس ظليت انتظر انتظر طلعت رونق ماسلمت عليه تجاهلتني حتى خواتي وجهم ثكيل عليه انتظرتها تطلع بس فات الوكت وهي ماطلعت عرفت محداوم اليوم ظل بالي عليها بيها شي
كلت تعبانه يجوز تاذت من سمعت بخطوبتها ظليت اللوب اريد اشوفها رحت لبيتهم شفت بس امها بالمطبخ ظليت كاعد اريدها تنزل حتى اشوفها بس ماشفتها سئلت عليها امها كلتلي والله ماعرف شبيها يمكن فلانزا دصير حبيبتي مريضه واني سبب مرضها ردت بس اشوفها او اسمع صوتها بس ماشفتها رجعت لبيتنا واني افوت من برنامج لبرنامج اريد اشوفها متصله لو لا بس كلهن ماكو

ردت منها بس دكلي لاتخطب والله افركش كلشي بس دكلي هيج ماعرف ليش هيج استعجلت وكتلها لامي خطبيلي ماعرف وين جان عقلي ثاني يوم كعدت من صبح ظليت واكف بالباب انتظرها تطلع اجه خطها كلت اكيد حداوم مادام اجه فتحت الباب وطلعت هاي اول مره اشوفها بعد ماافترقنا ضعفانه حتى مخاله كلشي بوجهه وجهه تعبان كانما منايمه ظليت اباع عليها لتافت عليه ونطتني نظره عتب عيونها جانت تحجي ودكلي ليش هيج سويت ليش عفتني بس دارت وجهه وصعدت بالخط

اول مره اشوفها بالحاله هاي حالتها اني الي وصلتها بيه ليش واني احبها ليش خليتها تروح من ايدي طلعت افتر وماعرف وين اروح كلت ارجع اكول لامي لتروح تخطب لان ماريد بطلت
بس اتفاجئت من امي كلتلي رحتلهم اني وام غرام وكلولي كبعي واخذي ظليت ماعرف شسوي اكتفيت بهز راسي وصعدت فوك
يمكن اول مره اتندم لان هيج صرفت حنت اتصور من اخطب حكسر غرام واذيها زين هسه اذيتها وكسرتها بس ليش كلبي بعده يحبها ومتعلق بيها واليوم من شفت حالها ردت اخذها بحضني واتاسف الها وضل حاضنها اشبع منها ومن ريحتها الي تخليني مثل الطفل يمها

غرام ... طلعت ماجنت خاله بالي اشوفها لمن اجت عيني بعيني حسيت عيونه تريد تطمئن عليه مبين عليه قلقان عليه او يريد يشوف انتصار سوه بيه جنت بحاله ماتحمل اي كلمه صعدت ورحت للكليه فتت ظليت كاعده ويه صديقاتي الي عجزو حتى يخلوني اضحك او اطلع من جو الحزن الي اني بي

جنت كاعده واكلب بالملزمه لمن اسمع واحد يكول صباح الخير صعدت راسي شفته فراس يمكن بوقتها ردت اكوم املخه اذبحه اكتله هو سبب الي اني بي هسه هو الي خله اسد يعوفني ظليت اباع عليه بحقد بس مادري ليش اجه بالي ......... يتبع ❤️
££££££££
هالمره طولت البارت ادري شويه حزين بس الاحداث الجايه كلش مشوقه خل يشوف اسد انتقام الانثى شون صير

برائيكم اختيار غرام لدراستها وترك الي تحبه صح لو انتو بمكانها جان شختاريتوا؟؟؟؟؟؟؟؟؟

سوزان ليث