رواية حب جنوني الفصل الرابع والعشرون 24 - بقلم سوزان ليث

وصلنا لشارع نهايته مسدوده وكف السياره وطفاها
كلي
اسد... وين تليفونج
غرام ... تليفوني جان بيدي كتله هذا ... سحبه مني بقوه وفتحه لان هو يعرف الرمز مالته ظل ماعرف شيسوي بي مثل الواحد ديفتش بي كتله اسد شكو كلي ترى خوفتني
باوع عليه جان يشمر تليفون عليه
اني باوعت عليه كتله فهمني شكو
كلي دشوفين فراس
اني سكتت من الخوف بدال مااكله اي كتله لا
جان يضربني راشدي فر وجهي فر ولازمني من حنجي ورجعني عالجامه كلي وهو يصيح عليه
ولج تلعبين بيه انتي
اني دموعي تنزل ومداكدر احجي مداعرف شكو وعصبيته تخوف
كتله واني ابجي واشهك كلي شمسويه

كلي ولج ادز الولد يوصي عليج يخابرني يكلي خطيبها موصي عليها

غرام ... اني ظلت بس دموعي تنزل بالكوه اطلع الكلمه وايده الي حاصره فكي حتى كمت ماحس بالوجع

اسد... ولج اكله منو خطيبها يكلي مرحله ثالثه اسمه فراس ولج هذا نفسه فراس مو احجـــي

غرام .... ظليت ارجف منه واني اشوفه صار وجهه دم من العصبيه الصياح
.... اسد بس خليني افهمك والله مادري بهذا الحجي

اسد.... ولج لتخبليني غرام لتخبليني شايفتني جاهل كدامج بت الكلب احجيلي صاير بينكم لاشرب من دمج ودمه

غرام... والله مصاير شي احنا امتحاناتنا ويه الثالث وصدفت هو ويايه بشعبه لان اسمه بحرف ف واني غ فصدفت سوه بس والله ماصار شي
واول بارحه شفت سعي ماتي دكتوره خالتلي سعي مو زين ودانزل درج وردت اوكع هو جان واكف اجه ساعدني وشافني ابجي
وهو كلي احجيلج ويه دكتوره لان يعرف

اسد.... ولج شعرفه بسعي مالتج مو زين غير انتي حاجيتله
غرام... قبضت ايده ليدي رادت تنكسر ابجي واحجي ... والله هو مقبل ينطيني ملازمي الا اكله  شبيه بس والله اني مانطيته مجال

اسد.... انتي حقيره حقيره جم مره كتلج لاتظمين عليه لان اكشفج تعرفين الله يخليني اكشفج لان يريد يعرفني بحقارتج وجذبج

غرام... كمت ارجف منه واني اشوفه يضرب عالاستيرن قوي ويصيح عليه كمت احجي واني ابجي واشهك وروح بابا ماصار بينا شي والله ماجذبت عليك كل الصار صدفه وماردت اضوجك على شي تافه ليش مدصدكني

اسد.... كافي ماسمع صوتج من اليوم ياغرام انتي بحالج واني بحالي كافي شالع كلبي وحارك اعصابي وانتي متحسين بيه ولج كلشي سويتلج كلشي بس انتي سويتي رايحه تصادقين وتضربين سوالف وياه

غرام ... اسد والله بيش احلفلك بعد ماسويت شي وداعت امي ماسويت الي دكول عليه اني سلام على طلاب شعبتي ماسلم شصادق

اسد.... كتلج كافي ماسمع حسج ذيج المره كتلج غرام هاي اخر مره جذبين عليه وكتيلي وعد ماجذب ولا اظم عليك بس انتي جذبتي وظميتي

غرام ... ظليت بس ابجي لان شحجي ميصدك ليش ماعده ثقه بيه ليش شايفني طفله وبسهوله يخدعوني حرك السياره ورجع للبيت وطريق كله ماحجه ويايه شي واني بس ابجي وصلني للبيت نداريت عليه كتله اسد

اسد... نزلي غرام
غرام .... نزلت من السياره لان مديقبل يتفاهم ويايه وهو حرك وطلع بسرعه اني طبيت للبيت امي بس شافتني شهكت لان عيوني حمر من البجي  ظلت تسئل عليه  بس كتله ممجاوبه بالامتحان ونقهرت وبالكوه صدكت صعدت فوك بس اريد الزم فراشي حتى اشكيله الي بيه نزعت وحتى ماغسلت طبيت بالفراش وتغطيت وظليت ابجي ابجي لحد ماعرف شكد مر من الوقت الغطه رفع

رونق... عزه بعيني شبيج غرام
غرام ... احجي واني ابجي رونق اسد عافني
رونق... ليش صاير
غرام ... عباله اني عندي علاقه ويه فراس رونق مديقبل يصدك ماعندي شي وياه
رونق... ميخالف حبي لتبجين كافي اسد يحبج بس هسه تلكي عصبي وحجه هيج خل يهدء وشوفيه هو يحاجيج
غرام ... لا متعرفيه لاسد من يكول كلمه متعرفيه رونق والله مامسويه شي
رونق... كافي لتبجين اني اروح احجي وياه واكله انتي معليج بس كافي حتموتين نفسج

غرام .... عده اليوم واني لاكل ولاقرايه وبس بالغرفه حابسه نفسي وابجي واسد ميجاوب على اتصالاتي ومسجاتي
ثاني يوم صبح كمت بالكوه رحت غسلت اباع عيوني وارمات وحالتي حاله نزلت جوه خطيه امي شافتني كلتلي

ام غرام ... خرب بالامتحان ولج طز بي شمسويه بنفس يمه عليمن

غرام ... ظليت اهز براسي امي عبالها عالامتحان زعلانه بس متدري اني كلبي ديوجعني
بالكوه شربت بس حليب كمت ادك على اسد ماكو مغلق كله
رونق جانت ماكو امي كالت بيت عمج
صعدت فوك فتحت ملازمي لان باجر عندي امتحان واني لحد الان مقاريه شي بس مالي خلك اقره تعبانه ومزاجي سيئ لدرجه ماكدر اوصفها
اجتني رونق للغرفه
رونق... هلو غروم حبيبتي شون صرتي
غرام ... تعبانه ومالي واهس كلشي اسوي شفتي اسد
رونق ... رحت احجي وياه بس كلولي اللتحق
غرام ... اني بس كلتلي التحق كمت ابجي عرفته واصل مرحله كلش اعصاب وميتحجه تليفونه مغلق وراها الايام البعدها كملت امتحاناتي واني اصلا اروح للامتحان بس حتى ماعرف شون جنت اجاوب اسد لو مغلق جهازه واذا صدفه دك ميجاوب دمرت نفسيتي كلش
كظيتها بس بجي حتى اكل مااشتهي اكل وكل ماذكر كلامي ارد ابجي

رونق...الفتره الراحت اني كلها ماشفت انمارابد ومن افترقنا بمره رحت ويه امي للسوك لان اريد جم شغله فبسوك احنا نمشي امي كلتلي باعي ذاك انمار هو وخطيبته اني بس سمعت انمار وخطيبته اني تخربطت احوالي كلبي دكاته صارت سريعه واحس عيوني غوشت هو شافنا اجه علينا سلم على امي وامي سلمت على خطيبته. اني جنت مدنجه ماريد اشوفهم بس من سمعته يكلي هاي شنو رونق ضعفانه اني هنا حسيت مثل الي ديشمت بيه بمعنى يكلي من عفتج صاير بيج رفعت راسي اله واني مبتسمه كتله احسن من السمن
نداريت على خطيبته جان زينه مابيها شي سلمت عليها
وظل اني اوصلكم اني اوصلكم امي كلتله لا بعدنا ممكملين
رد كلنا كملو ماعدنا شي ننتظركم وغربت الدنيا شون ترجعون اني هنا حسيت امي حتوافق بسرعه كتله ماكو داعي عود نخابر جلال يجينا لتخلي خطيبتك تنتظر خطيه سلمنا اني وامي وعفناهم ورحنا
ماعرف ليش جبت سيره جلال مع العلم مجان بالي بس يمكن ردت اضوجه مثل مديضوجني
مشيت واني طريق كله بس افكر بي مشتاقتله بس بنفس الوكت كارهته هو وخطيبته ملايكين على بعض كملنا شغلنا امي كالت دخابري على جلال يجينا كتلها لا امشي نتمشى كالت مابيه حيل بعد
اضطريت ادكله هو بسرعه جاوب
هلو جلال
هلا والله
اكلك جلال انت بالبيت
اي رايده شي
اي والله اني وامي بسوك وامي تعبت تكدر تجي ترجعنا
اي هسه اجي اكفولي عالشارع
اوكي يله باي
باي

ظلينا ننتظره جان توكف سياره انمار وخطيبته بالصدر نزل كلنا ها شو واكفين هنا

امي كلتله اي والله دننتظر جلال كللها تعالو اني اوصلكم شكله حيتاخر ويضحك مستفز
امي كلتله لا عيب بعد خابرنا كلها اي خابرو كله لايجي
امي باعت عليه كالت ها تخابريه هسه داكللها لا سمعت واحد يكول ها ابن العم اليوم هنا لتافيت شفته جلال ماعرف ليش ابتسمت اله مثل الجه نقذني
لتاف عليه انمار سلم عليه ومبين شكلهم واحد ميحجي ويه ثاني بس يمثلون كدام امي

جلال ... ها كملتو نروح
رونق... اي كملنا طبعا احجي ويه جلال واني مبتسمه اله حتى هو باع عليه وضحك يمكن كال هاي شبيها الخبله
جلال مشه واني وراه امي بقت سلم على انمار ويوصل سلامها للاهل ركبت وره جلال
جان يكلي شبي واكفلكم
كتله يريد يوصلنا
جان جر حسره وباوع عليه بالمرايه اني بسرعه لتافيت عالشباك
امي اجتي صعدت ورجعنا للبيت دانزل كتله جلال شكرا
هو باع عليه ديريد يحجي اني نزلت وطبيت للبيت

غرام ... بعد كم يوم اجتي رونق عليه تنهد حتى خوفتني كتلها شكو صاير

رونق... اسد جاي هسه جنت احجي ويه ونبأ وكلتلي
غرام ... كمزت من مكاني كتلها اريد اروحله احجي وياه بعد ماتحمل حطك واموت

رونق... اي امشي اني وياج
غرام .... رحنا اني ورونق لبيت عمي اول ما فتت عيوني دور عليه نبأ كالت بغرفته بعده منزل ظليت اللوب اريد اشوفه
صعدنا فوك ويه البنات واني سحبت نفسي لغرفته دكيت الباب كال فوت ياصوتك شكد مشتاقه اله فتحت الباب وفتت لكيت واكف ديمشط فتت وسديت الباب هو اول ما فتت صفن عليه شويه ورد سوه نفسه ممنتبه
كتله ... شونك ظل يلعب بشعره ومجاوب اقتربت منه لزمت جتفه كتله اسد اشتاقيتلك
هم ظل ساكت عافني وراح كعد عالجربايه رحت يمه كتله احجي ويايه والله ماكدر بعد صالك جم يوم لاجاوب عليه ولاتحجي ويايه تريد اموت  ...اعرف هو يضوج من اكله اموت او ان شاءالله اموت

من كلتله تريد اموت التاف عليه تنهد بس ماحجه شي

رديت لزمت ايده كتله اسد والله اسفه بعد ماضم شي عليك
ظليت كومه احجي وياه وهو ماكو صنم ولا حجه ويايه بالاخير تعبت منه ردت استفزه حتى يحاجيني
كتله كول مصدكت صير بيناتنا هاي المشكله حتى تعوفني لو صدك تحبني مسوي هيج
جان بسرعه يباع عليه كلي
اسد... انت ليش متعرفين تحجين
غرام ... يمه حجه صح بعده عصبي بس عادي كتله اي انت مصدكت تصير بيناتنا مشكله وكمت متحاجيني

اسد.... تريديني احجي وياج وارجع مثل قبل
غرام ... ابتسمت اله كتله اي
اسد... اي ماشي نرجع ومومثل قبل احسن هم ونزوج هم وصيرين قريبه الي واني اصير قريب اكثر الج
غرام ... اني ظليت اباع عليه وابتسامتي كتله صدك
اسد... اي بس بشرط
غرام .... هزيت راسي بالموافقه
اسد... عرفي الشرط اول مره بعدين وافقي
غرام ... اي شنو شرطك
اسد...  تتركين دراستج
غرام... ضحكتي بسرعه راحت ظليت اباع عليه كتله شنو اترك
اسد... لو اني لو دراستج وانتي اختاري
غرام .... نعقكد اللساني ماعرف شحجي ظليت بس اباع عليه كتله اسد انت دتخيرني بين مستقبلي وبين حبي واثنينهم واحد اصعب من الثاني

اسد... هذا العندي تردينا نكمل سوه وعلى حب الله تخلي عن دراستج
غرام ... ظليت ساكته ماعرف شحجي لان خلاني مشلوله ذكرت من جنت بالمدرسه هم كلي لو اني لو المدرسه ليش يحاول يحطم مستقبلي خاصه هسه يعرف بيه احبه وماكدر لا بدونه ولا بدون دراستي

ظليت مدنجه وكومه افكار مرت عليه ماعرف شسوي ربط ايدي ومداكدر اسوي شي

اسد... حنطيج مهله تفكرين حتى لدكولين عليه ظالم بس بيوم الي داومين بي تنسين واحد اسمه اسد وبعد لو تنكلب الدنيا منرحع سوه

غرام... عافني وطلع من الغرفه اني اتمنيت مجايه ولا حاجيه وياه تمنيت باقيه بيتنا ولا سامعه الي حجاه كمت رجعت للبيت واني مثل الي حاكمين عليها بالاعدام

رونق ظلت ساكته من حجيتلها بس كلتلي شي واحد كالت لتخلين احد يخرب الي وصلتيله حتى لو تحبيه

ظليت حايره ماعرف شسوي ماكدر بدون اسد وجنت مستعده اتخلى عن كلشي بس ميعوفني
اذكرت بيبي حكمه مره اسد كلي ماكدر ارفضلها طلب فكرت بيها اروح احجي وياها مثل الغركان الي يتعلك بكشايه ثاني يوم خليت فهد يوصلني لبيت جدي كتلها لامي مشتاقه لجده حكمه
رحت لبيت جدي اول مافتت جان جدي وعمي وجده كاعدين كلهم سلمت عليهم وتفاجئو بجيتي ولان وحدي بس كتلهم ضايجه واشتاقيتلكم

بس جده حكمه تلكفها وهي طايره كامت وكلتلي لحكيني رحنا اني وياها لغرفتها
وكعدت وهي كعدت تباع عليه واني جنت ماعرف شحجي وشكول بس هي اختصرت عليه السالفه كلتلي

جده حكمه ... منوه مزعلج وخالج شردين علينا اليوم
غرام ... مزعلانه من احد بس اريد احجي وياج بموضوع
جده حكمه.... اي شبي اسد وياج
غرام.. باوعت عليها مصدومه منين عرفت اسد الي ويايه
جده... لا تباعين هيج ترى ادري بسالفتج انتي وذاك هذا اسد ابني مايضم عليه شي
غرام ... لعد ياجده تقبلين يخيرني بين دراستي وبينه ويعرف اني كلشي ولا دراسي وبنفس الوكت ماكدر بدونه
جده حكمه... ذوله العشيره مايبطلون هاي سالفه
غرام... ليش اكو غيره هم هيج يخير
جده حكمه... هذا اسد طالع على جدج يشابه حتى بهاي سالفه
غرام ... جدي هم هيج يخير
جده ... هاي كبل مو هسه
غرام ... وجنتي سوين من يخيرج

جده حكمه...شوفي قبل من زوجت جدج جنت اطلع زعلانه اروح لبيت ابوي وهو مايجي يرجعني يجي يكلي لو ترجعين لو حزوج عليج وانه جنت جاهله اخاف اكول يروح يزوج عليه وارجعله وصار عدنا جهال وهم من اطلع زعلانه هم يجي يكلي لو ترجعين لو بعد ماشوفين جهالج واضطر وارجع مره مرتين بيوم جنت حامل بعمتج شكريه  جنت واصله بطني لخشمي جنت بنهايه يمكن لو بثامن لو بتاسع جنت تعبانه وطالع كلشي من عيني وهو يجي بالليل يريد اتكحل واتعطر واللبس وازين وجنت اسوي هيج بس مو كل يوم هم روح تبزع بيوم اجاني شافني ما لابسه وباقيه بنفس ثوبي العافني بي صبح كلي شمالج حكمه مريضه كتله لا ممريض بس الحمل تعبني
تعرفين شسوه

غرام ... اي سوه
جده حكمه... اجه يمي يريد حقوقه انه كتله ولك ياحقوق انه بطني واصله لخشمي وانت دور حقوق
وظل يحجي واني رجال واريد حقوقي والله يحاسبج بعدين واروح ازوج عليج انه هو حجه هيج ومنا جنت ماطايقه نفسي كمت كتله ماشي وديني لاهلي مابقى بعد هنا
كلمه مني وكلمه منا جنت لابسه عباتي واريد اطلع جان الكل نايم وكلي اذا طلعتي بعد ماترجعين ولاشوفين جهالج كتله وماريد اشوفهم عوفني وماجذب خبر وداني لاهلي وعافني هناك امي تحاجيني ماقبل ارجع ابويه الي كل يرجف منه يحاجيني ماقبل جنت ماطايقته اجه عليه وره يومين يتوسل بيه ارجع يكلي جهال يبجون عليج كتله باع رجعه مارجع زين لو انه مو كل كلمه وثاني تهددني بجهالي لو تزوج تريد تزوج روح انه تعبت

غرام ... اي وسويتي رجعتي
جده حكمه... اي رجعت بعد مايبست حلكه وعبالج رجعت للبيت عافني بحالي هم يريد حقوقه
غرام ..... ههههههههه وانطيتي حقوقه
جده حكمه... وانه اكدله اكلج يوميا ياخذها عاد بقيت بيت ابوي جم يوم
غرام ..... هههههههه عزه حموت مداتخيل جدي هيج
جده حكمه... كل الزلم هيجي وهسه ابن عمج مثله هم هيج
غرام... يعني ماترك دراستي
جده حكمه ... ولج هاي دراستج انتي الي تعبتي يله وصلتي وشكد حلو باجر يكلولج دكتوره غرام
غرام ... بس اني احبه جده ماريده يعوفني
جده حكمه... ولج مايعوفج حتى لو زعل جم يوم يرضى بس لاتتنازلين عن حلمج باجر عكبه حتى لو زوجتوا وانت مامكمله وشوفين الكل كمل وانتي لا حترضين عن نفسج
غرام ... لا عزه ماكدر والله يمكن اموت
جده ... باعي عمتج نضال جانت بعدها بالمدرسه ومن اجه ابن عمها خطبها كتلت نفسها استقتلت الا هو كتلها ولج كملي دراسج الزواج مو كلشي لاصيرين مثلي بس هي ماقبلت وعندت الا تزوج وتعوف دراستها
وروح ابوي شهر واحد وجتي زياره النا كعدت هاي كعدتج تبجي دكولي متندمه اريد ارجع اكمل كتلها ولج كتلج لاتستعجلين
بس ابقي هيج هذا قرارج

غرام ... جده اني ماكدر بدون اسد كلي اذا تركتي دراستج نزوج
جده حكمه... وهو منو الملك شهريار يمه لاتسمعين كلامه وتكسرين نفسج بعدين تتندمين وتعضين اصبعج ندم

غرام ... ظليت ساكته ماعرف شسوي وحايره
جده ... ها يمه شقررتي شحسوين

غرام ... جده ماكدر بدون ......... يتبع ❤️

&&&&&&

اسفه عالتاخير بس النت ماكو جان قراءه ممتعه تعليقاتكم حتى استمر ❤️