رواية حب جنوني الفصل الخامس وأربعون 45 - بقلم سوزان ليث

مرحباااا
حبايب اني مو كل جمعه مانشر لان اجازتي ليش التعليقات ورسائل التجريح اليه ميصير يوم الي راحه 😔 مو تعرفون اني الاسبوع كله انشر عدا الجمعه يدزون  مسجات يكلولي شنو هالغرور وتكبر بربكم ياغرور واني احرص اجاوب واحد واحد من عندي مجال لان حاسبتكم اصدقائي والله
حتى حافظه كل الي يعلقون وبيوم واحد منكم ميعلق اكول ليش معلق هذا الشخص والله زعلت 😔😔 مكهوووووره😞 مكهوووووروره حيل
ورجاءا لحد يغلط عالابطال فدوه حبايبي والله دسولي احراج وياهم
&&&&&&&&&&&&&&&

وره العشه صعدت دكيت على اسد هم مغلق كعدت اقره بس بالي يم اسد اقره كلمه وارد الزم موبايل ادكله
نزلت جوه وصلت لنص الدرج سمعت رونق دكول لامي
يعني شنو ظل متدري

اني طبعا شنو احسن رجلي كامت متحملني بسرعه اجه بالي اسد مخطوف مثل ذيج المره بحيث بالكوه كملت نزله الدرج دخلت عليهم بسرعه تفاجئو بيه لان مطلعت صوت من نزلت

كتلهم شكو
واني احس اخاف من جوابهم اخاف من الي حيحجوا ظليت اباع مره على امي ومره على رونق اريد احد يجاوبني
امي كالت يمه غرام ماكو شي تعالي
كتلها امي شكو احجي اسد بي شي

ام غرام ... يمه مابي شي بس شويه واكع ومتعور
غرام ... شنو واكع شون واكع ليش ادك ميجاوب
ام غرام ... ها اي مو تليفون نكسر
غرام ... طبعا كلشي مصدكت من حجي امي كتلها امي اسد بي شي كلبي يكول بي شي
اني بس شفت امي بجت اني كلت اسد بي شي اكيد رحت يمه ظليت اكلها امي احجي شبي لتخبليني
كالت يمه مفجوره سياره مفخخه عليهم وهو جان طالع واجب

طبعا هيج حجت هيج احس كل حيلي راح ظليت اباوع على امي اريد استوعب
بسرعه كمت من مكاني كتلها اريد اروح اشوفه ظليت افتر بالهول ماعرف شريد
امي تحجي بس ماسمع شتحجي شفت تليفون امي اخذته ودكيت على جلال مجاوب رجعت دكيت على فهد جاوب
عباله مادري بعدني بسرعه كتله فهد وديني على اسد

فهد ... غرام بس اهدئي مابي شي والله
غرام ... فهد توديني لو اطلع هسه اني اروح وحدي
فهد... وين ترحين اسد بغداد مو هنا باجر اوديج
غرام ... لا هسه وديني الله يخليك
فهد ... لج والله قبل شويه رجعت يصير الفجر واخذج

غرام ... سديت التليفون وظليت كاعده وابجي واخاف اسئل امي شونه اخاف دكلي بي شي
ظلت امي تهدء بيه ودكلي مابي شي بس اني ماكدر صعدت  رجعت دكيت على جلال لان امي كالت هو هناك
حجه ويايه وحجيه ممقنع بس واحد يريد يطمن واحد
ظليت اللوب ماعرف شسوي اكله لجلال انطينياه احجي وياه اذا زين يكلي ماكدر وميقبلون ندخله اني متت
ظليت الليل كله ادعي مابي شي اذن الفجر كمت صليت وظليت كاعده عالسجاده وابجي بسته دخلت امي كالت يمه فهد يكول تحضروا
اني طبعا بسرعه بدلت حتى ماعرف شلبست
ونزلت جوه طلعت ركبت بسياره شافني فهد كلي شبيج شمسويه بنفسج انتي يابه كتلج مابي شي حتموتين نفسج
رحنا لبغداد
وامي ورونق وايمان ونبأ لان ماكو احد بالبيت
طبعا اني ظليت الطريق كله دموعي منشفت بس ابجي وصلنا بيت بيبي وداد نداريت على فهد كتله ليش جبتنا هنا
كلي
ادري كلنا روح للمستشفى كافي الهناك عاد نزلوا البنات وامي اجتي ويايه بس نبأ
رحنا للمستشفى وصلنا للمستشفى واني كلبي احس حيوكف
نزلنا فهد ظل يمشي واني ونبأ وراه وصلنا شفت عمي وجدي وجلال ومحمد ولد عمي وعمامي اثنين وام اسد خطيه كاعده وتبجي واكفين عمي ابو اسد بس شافني كام على حيله وكام يهز براسه لفهد عود ليش جبتها
اني بس بس شفت عمي بسرعه ركضت عليه هو شافني منهاره خطيه ماحجه شي ظل يكلي مابي شي لتخافين
محد يقبل يكلي شبي اسد ياهو اكله شبي يكلي مابي شي اكلهم اريد اشوفه يكلولي بالانعاش ميقبلون احد يدخله اني من سمعت انعاش ردت اموت كلت اكيد حالته خطره ومدخليه العنايه المركزه

ظليت اللوب واتوسل بالعيون اريد احد يحن عليه ويدخلني اشوف حبيبي

للظهر اجه جلال كلي تعالي اني كمت وره كلي

جلال ... باعي حجيت ويه وحده ممرضه حدخلج جوه ماشي بس شوفي وطلعين بسرعه ماريد احد يشوفج
اني عبالك كلولي حدخلين الجنه ظليت امسح دموعي وامشي وره جلال والله لو هسه يكلولي انطينه روحج ودخلي شوفي انطيها

وصلنا باب مكتوب عليه العنايه المركزه  اجتي بنيه ممرضه جلال كلها هاي البنيه حتدخل طبعا البنيه كالتله ماشي بس بسرعه اذا شافج الدكتور يحجي عليه كتله والله بس اشوفه
كالت ماشي مشيت وراها دخلنا بقاعه جبيره وراها دخلنا بغرفه بيها اربع اسره  ظلت تمشي اخير سرير  فتحت البرده يمه كلبي شفت اسد نايم جمدت بمكاني بس دموعي تنزل رحت يمه اباع عليه يربي صاير بي صدره بطنه لافيها كلها ايده ملفوفه راسه وجهه كله مجرح واجهزه خاليها على صدره
اني ظليت صافنه ماعرف نصدمت ظليت واكفه يمه والممرضه سدت البرده اني ظليت اتلمس ايده اخاف المسه خاف اذيه
اباوع عليه ودموعي تنزل شويه وجتي الممرضه كالت يله كلتي بس شوفيه
هزيت راسي تقربت على وجهه اخاف ابوسه خاف اذيه همست كتله حبيبي اسدي بس ماحس عليه
الممرضه كالت ناطيه مسكنات ونايم هسه ميحس عليج

طلعت  شفت جلال واكف يم الباب اول مشافني كلي ها
اني طبعا ظليت اشهك وابجي
هو خله شي بجيب الممرضه كلها تعبناج يمكن فلوس  لان دخلتني

مشيت اني وجلال كلي ها شونه
كتله جلال نايم ومحس عليه بطنه كلها شاش وايده وجهه وجهه الحلوه كله جروح
ظل جلال يكلي ميخالف ايصير زين همزين طلعو الشظايه وظل يريد يهدئني قبل منوصل كلي لدكولين دخلتي شفتيه ترى هسه الكل يريد يدخل هزيت راسي ورجعت كعدت يمهم وكلسع اذكر شكل اسد وارد ابجي جدي وعمامي رجعو لابيت ابن عمه لجدي عايش بغداد

طبعا اصدقاء اسد كلسع مجموعه جايه بالاخير اجه جلال نطاني علاكه كلي هاي غراض اسد خليها يمج اني اخذتها وخليتها بجنطه
عمي ماقبل ابقى لان من صبح اني جايه واصلا لان عرفوا النايم رتبته( نقيب ) فشويه تساهلو واصلا اصدقائه اليجون كلهم ضباط
فكلي رجعي عود باجر تعالي بالكوه قتنعت
رجعت اني وعمتي ونبأ رجعنا لبيت بيبي وداد طبعا دخلت لبيت بيبي احس راسي طبل خطيه جتي مرت خالي جابتنا اكل لان مماكلين بس اني مااشتهي اكل بس واحد يحجي ويايه دموعي تنزل كتلهم حروح انام طبعا اريد اكعد وحدي تعبت

رحت لغرفه بيبي ظليت كاعده اني وملابسي كاعده وصافنه ظليت ادعي اكله ربي اذا تريد تاخذه اخذني اني بداله ربي لتحرمني منه
رجعه اليه والله بعد مااعانده ولا ازعله
طلعت علاكه مال غراضه جانت صغيره فتحتها لكيت محفظته ظليت ابوس بيها فتحتها لكيت باج مالته وهويته وفلوسه اكو خانه شفافه خال صورتي من جنت صغيره
ومن الداخل خال صورتي واني جبيره اخذتها من دخلت الكليه

ولكيت حلقته ومحبسه هم موجودات حلقه معوجه صاير بيها تعرجات ظليت لازمه غراضه وابجي دخلت عليه نبأ ورونق خطيه شافوني سحبوا مني الغراض وظلوا يحجون ويايه
هاي الدكلي يصير زين هاي الدكلي مابي شي
بس اني شفته همه مشافو حالته ظليت شويه اسكت وشويه ابجي اخذت حبايه راس ونمت
....
نبأ... لما عرفنا بااسد انصاب طبعا كلبناها مناحه الكل يبجي
حتى ابويه شكد نشوفه قاسي مرات بس من سمع بااسد دموعه نزلت وظل يكول استر يارب استر يارب

اجه فهد بالليل يريد ياخذ غراض جلبنا بي روح مقبل بعدين من غرام عرفت واصرت تروح عاد خلانه نروح وياه لان محد بقى بالبيت
طبعا محمد ماكو مختفي اكيد التهى بسالفه اسد لان هو كلش صديقه
رحنا اني وغرام للمستشفى شفت العشيره كلها هناك وامي بس تبجي
ظليت كاعده يم امي وغرام
شفت محمد واكف على صفحه بس مهتم لوجودي ظليت اباع عليه يمكن احس بالامان واني اشوفه
اجوي اصدقاء اسد فاني جنت كاعده يم امي بجانبها اجه صديق اسد بدوام جان لابس عسكري يحجي ويه امي ديكلها مابي شي حجيه وهو سبع ويكوم منها طبعا اني جنت صافنه عالولد وهو يحجي شخصيه جان
ماشوف الا محمد وكف بصفه وكله تسلم ومقصرتوا ومثل الواحد يريد يبعده
الولد سلم وراح رجع محمد ظل يباع عليه خازرني اني بسرعه نزلت راسي عزه خاف شافني واني عيوني عالرجال شكد عيب هسه عباله نعجبت بي
شفته حجه ويه فهد سمعت فهد يكله يمعود صار 100 مره اكللهم خل ارجعكم امي وغرام مديقبلن
عرفت محمد يريد نرجع  اني كمت وكفت صراحه تعبت من الكعده
ظليت اروح واجي امشي رجلي اجه محمد كلي امشي كعدي
كتله تعبت رجلي من الكعده
باوع عليه بحده كلي امشي اكعدي
طبعا اني بسرعه رحت كعدت ابد ماخفت منه ابد
تالي كمنا ريد نرجع فوكفت غرام ظلت توصي باابويه اني واكفه على صفحه دورت محمد ماكو يمكن طلع بره لان يطلع يدخن ويرجع
عاد طلعنا بالباب شفته واكف يحجي بتليفون شافنه رفع ايده سلم

برجعه اجاني مسج منه منه 📱ممنوع توصلين للمستشفى بعد

طبعا اني قريت المسج ظليت اباع عالتليفون وحاصره الابتسامه لا يعني هذا امر منه
دزيتله 📱شون مااشوف اخويه
دزلي 📱سمعي الكلام

اني بعد مجاوبته برغم هو ضايج على اسد وماله خلك كلشي بس غار عليه ظليت فرحانه بهذا الاحساس بعدين انتبهت لنفسي عزه شبيه اخويه بين الحياه والموت واني بهيج سوالف افكر امداني

رجعنا لبيت اهل مرت عمي بالليل فرشولنا حتى نام اني ظليت اتكلب ماكدر انام دزيتله مسج لمحمد📱شدسوي
شويه ودزلي 📱ماسوي
دزيتله 📱وين انت
دزلي 📱كاعد بسياره
دزيتله 📱ليش
دزلي 📱مقبلو نبقى كلنا بس جلال بقى جوه وعمي رجع
لان تعب
دزيتله 📱يعني حتنام بسياره
دزلي 📱اي خاف يصير شي بالليل حتى قريب عالمستشفى
دزيتله 📱ماشي تصبح على خير

بالليل ساعه بال3 هيج تليفوني جان جوه المخده جنت مسويته اهتزاز
فتحت تك عين شفته محمد يدكلي اني شنو بسرعه كمت كلت اسد صار بي شي بحيث الكل نايم يمي اني فتحت الخط عليه

الو
هلو نونو شونج (صوته جان تعبان )
اسد بي شي
لا مابي شبيج فززتج مو ( بس حجه هيج يمه احس كلبي راد يطلع كلش خفت )
عبالي اسد بي شي
لا مابي بس مجاني نوم وحبيت اسمع صوتج
دقيقه ( كمت اسحبت من الغرفه على كيف طلعت البيت هدوء وكفت يم الباب )
الو ليش منايم
تعبان نونو والله
ضايج علمود اسد
اي والله هد حيلي اسد انتي جنتي نايمه
اي كعدت من دكيت
نونو عوفي الخط مفتوح وروحي نامي
بس
ماحجي بس احسج يمي
اوكي (طبيت رجعت لفراشي خليت التليفون مفتوح )
طبيتي بالفراش
اي ( بصوت  هادء)
نامي يله

طبعا ظليت شويه مفتحه عيوني واني اسمعه يتحرك ويتنهد ويمكن يشرب جكاره لان اسمعه من يزفر الهوى
شويه ونمت ماعرف بعد شوكت غلقه

كعدت على صوت امي بسبعه تكعد بيه  كعدت شفت الكل شايل فراشه بس اني نايمه بالغرفه ذوله شوكت كعدو
كمت بسرعه شلت فراشي عدلت نفسي تليفون مسدود يمكن خلصان شحنه خليته عالشحن وطلعت غسلت شفت غرام مبدله وكاعده تنتظر احد يوديها للمستشفى

كعدت بصف رونق الي جانت نايمه بصفي كلتلي
رونق... البارحه منو دك عليج بالليل
نبأ... فضحتيني اسكتي
رونق... ليش شكو
نبأ... محمد دكلي
رونق... شبي
نبأ... مابي بس خطيه تعبان كلش ونام بسياره وكلي بقي الخط مفتوح حتى احسج يمي

رونق... ياعيني ونمتي والخط مفتوح
نبأ... اي نمت على انفاسه
رونق.... كافي شكد اكره هاي سوالف
نبأ... اي نشوفج بعدين مرت اخويه
رونق... كافي ولج

غرام .... كعدت الفجر على حركه شفت بيبي وامي وعمتي ديصلن عاد كمت رحت غسلت وتوضيت ورجعت صليت وراها ظليت كاعده عالسجاده ادعي لاسد
خطيه عمتي شافتني ابجي اجتي كعدت يمي ظلت سولف ويايه
عساس تواسيني بالاخير ظليت اني الواسي بيها
مرجعت نمت كمت بدلت وكعدت امي كلتلي بعد وكت من هسه بدلتي كتله لا فهد كلي اجي عليج من وكت عاد ظليت انتظر للثمانيه وفهد ماكو ادك ميجاوب تالي دكيت على جلال كلي هسه حيجي فهد ويجيبكم وياه  بتسعه يله اجه فهد طبعا طلعت ادردم عليه خطيه هو محجه شي لان وضعي جان ميسمح طلعت امه حجت عليه لان تاخر
عاد رحنا اني وام اسد وامي
وظل طريق كله يحجي هسه ابويه يحجي عليكم وهسه جدي يحجي

طبعا اني مهتميت بس اريد اروح لاسد
وصلنا للمستشفى جان الكل طالع بالحديقه كالو مخاليهم يدخلون اني ظليت واكفه اكلهم شون كعد حجه شي محد يدري وكالو ماكو دكتور
جلال جان راجع
خابرت جلال كتله عفيه شوكت تجي حتى تخليني افوت لاسد كلي الا الظهر من تجي ذيج الممرضه

شويه دخلنا جوه خطيه صديق اسد يعرف مدير المستشفى عاد كتبنا ورقه نكدر ندخل
بالعشره هيج اجه دكتورين عمي  سئله على حاله اسد واحد من الدكاتره كله توقعوا اي شي طبعا اني واكفه بصف عمو ظليت اباع عالدكتور شنو توقعوا اي شي يعني احتمال يموت
عمي ظل يحجي وياه ودكتور يكله حالته حرجه وماعرف شنو
الدكتور الثاني كال للدكتور الاول
He said that he was in danger, and he entered )(his house

طبعا الدكتور الاول رفعله حواجبه يعني لا اني بدون وعي باوعت عالدكتور الاول كتله دخل بغيبوبه
هو ظل يباع عليه عمي لتاف عليه لان مفتهم الي حجاه
لان بطب من يشوفون اهل المريض الدكاتره يحجون بالانكليزي عساس محد حيفهم او يكلون مصطلحات طبيه علمود اهل المريض يمكن يخافون على مشاعرهم ..

رجع الدكتور الاول حجه كال اي هو هسه مثل الغيبوبه لان نضرب براسه وماعرف شنو
طبعا اني جمدت بمكاني يعني غيبوبه لو يكعد منها لو لا
رجعت كعدت وبس دموعي تجري اجه عمي كلي شحجه هذا افتهمتي شي
عاد كتله كال كللهم اصابته خطره ودخل بغيبوبه

وظل عمي يسئلني يعني يكعد منها يعني هو هسه ميحس كومه اسئله عساس اني طب وافتهم ظليت اكله ماعرف ماعرف
بس الي اعرفه الغيبوبه لو يكعد لو ميكعد

ظليت والله ابجي احس دموعي نشفت اجه جلال خطيه العصر توسلت بي يخليني ادخل اشوف اسد
بس كلي ماكو الممرضه مال البارحه بس يشوفها يكللها
المغرب عمي ظل رجعوا رجعوا رجعوا  خبلنا
كمت رحت لجلال كتله عفيه مشفت الممرضه كال والله ماكو

عاد رجعنا جلال اني وامي وامه وصلنا لبيت بيبي امي خلته يفوت جوه خطيه عاد خالي مقبل يروح جلال الا يبات يمنا لان بيت ابن عم جدي شويه بعيد عالمستشفى

خطيه ظل مستحي وكاعد

رونق... من صار الحادث ويه اسد واني بعد ماحجيت ويه جلال ماعرف استحيت ادك عليه واسئله من رجعو من المستشفى جنا كلنا كاعدين دخلت امي كالت جلال حيدخل اني بسرعه وكفت  كلبي يدك سريع عبالك اول مره اشوفه
هو فات سلم وكعد خطيه مبين عليه تعبان ومستحي ظل يسولف ويه خالو
عاد بالليل مرت خالي انطتني فراش افرش لجلال بالاستقبال فرحت دافرش لكيته ديصلي
دافرش شفته كمل كتله تقبل الله
جلال ... منا ومنكم
رونق... هذا الفراش الك نام ورتاح هو جان ديصفط السجاده اجه عليه اني شنو حسيت نفسي احتريت كلي
جلال ... ليش مسئلين عليه
رونق... مو مو كلت مشغول ويه اسد وخاف ماعندك مجال كمت الزك شكله اكله استحي منك لان كلتلي احبج

جلال ... محتاجج
رونق... ظليت بس ابتسم مثل الغبيه ماعرف شحجي
جلال ... تعالي كعدي يمي شويه خل نسولف
رونق... اي بس امي البنات خاف ظليت ادور حجج
جلال ... رونق شبيج قبل جنا هواي نسولف شتغير
رونق... متغير بس صراحه كمت استحي منك
جلال .... هههههه فديت اليستحي اني

رونق... كعدنا هو كعد عالفراش واني كعد عالتخم المقابيله شويه سولفنه بالاخير كتله يله اعوفك تنام

جلال ... تعالي نامي يمي
رونق... لا بله
جلال ... شكو بيها مو مخطوبين
رونق... بعدنا يله باي طلعت من الغرفه واني ضحكه منا لهنا صارت بوجههي بيبي وداد
كلتلي
شعدج يمه كاعده صالج ساعه
كتله بيبي دنسولف
عاد ترزلت منها ورحت للغرفه من دانام دزيت مسج
ارتاحيت اترزلت من بيبي لان جنت يمك كاعده📱
دزلي 📱ميخالف تكبرين وتنسيها

غرام ... بيوم الثالث جلال طالع من صبح للسوك ديجيب جم شغله
كال من ارجع اخذج طبعا كلسع اخابره كلسع خبلته للولد
من اجه اخذني اني وامه  جلال كال خابرني فهد وكال اسد كاعد بس مديقبلون احد يدخله
بس مدخلين ابويه وشايفه
طبعا اني ماكدر اوصف الفرحه احس روحي ردتلي ظليت الطريق كله اني وامه  نحلف بي وكلسع يكول والله الي اعرفه كلته وصلنا للمستشفى
شفت عمي خطيه ام اسد ظلت تسئله عليه وظل يكلها زين وماعرف شنو بس احس عمي انصدم مثل مااني انصدمت من شفته
العصر فتحو غرفه اله اصدقاء اسد كلهم يمنا بس عمتي دخلت شوفه
طلعت كالت تعبان سوده عليه اني اللوب اريد جماعته يطلعون اريد ادخله عاد طلعو اجه فهد كلي تعالي ماكو احد كمت امشي واحس ايدي ترجف فتح الباب ودخلت شف............. يتبع ❤️
&&&&&&&&
مكهووووووووره بعدني ترى 😞
اذا اكو كلام ممفهوم كتبولي بتعليق 😒