رواية حب جنوني الفصل الرابع عشر 14 - بقلم سوزان ليث

اني مجنت جايبه عبايه بسرعه لابست بنطروني وقميصي ولفيت شال وطلعتله جان بسياره كاعد فتح جامه
كلي بعد وكت جان ظليتي جوه طبعا اني مدنجه عالجامه كتله جنت ابدل قابل اطلع بالبجامه

اسد... صعدي
غرام... لا وين اصعد ماكلت لبيبي

اسد... منا لل 3 اذا ماصعدتي اعوفج واروح 1 .
غرام ... قبل ميكول 2 صعدت
شو هذا حرك كتله وين بيبي ماكتلها هسه يظل بالها
اسد.... طلعت تليفون دكيت على امها كتلها ترى اخذت غرام لان اكو شغله معجبتها ورادت تغيرها ماتاخر نبدلها وارجعها بس كولي للحجيه لان متدري امها مكالت شي وسديته طبعا اباع عليها صافنه عليه ومصدومه

غرام... وين موديني
اسد.... اخطفج
غرام... باوعت عليه كتله لا صدك وين رايحين
اسد... مو كتلج اخطفج
غرام... باوعت عليه ورفعت حواجبي ونداريت عالجامه جانت شوارع مو كلش زدحام وكف سياره كلي يله نزلي
باوعت منطقه حتى مابيها محلات عماير بس كتله وين رايحين

اسد.... عفتها ونزلت نزلت الجياسه ولفتلها اشرتلها تنزل هي نزلت تتلفت منا ومنا عبالك صدك حخطفها

غرام... وين احنا خبلني ولا يكلي وين خله ايده وره ظهري ومشاني دخلنا بالمصعد كتله وين رايحين

اسد... خرب يومج شكد حجيتي وسئلتي
غرام... سكتت وصلنا طابع الرابع وكف المصعد وكلي يله تعاي شو هذا فتح باب شقه وكلي فوتي
فتت واني مثل الاطرش بزفه اتلفت منا ومنا نداريت عليه .. هاي مالتمن الشقه

اسد... اويلي عليج مالتي مالتي بس اسكتي
غرام... مالتك ظليت اباع عالشقه شون ماته يعني
اسد.... تعالي فوتي خل نكعد شلعتي كلبي
غرام..... فتنا لمكان كعده بي تخم عادي يعني مو كلش حلو حتى فرشها محبيته كعدت عالتخم واني ماعرف ليش جابني هنا اصلا
طبعا الافلام شتغلت عندي كلت اكيد جابني هنا بمكان محد بي من اهلي حتى يغتصبني مادري ليش تجيني هالافكار

اسد... طبينا للهول خليت جياسه بالكاع وخليت السويج وباكيت الجكاير عالطبله وجيت كعدت يمها هي طبعا مبين عليها متوتره على خايفه

شبيج.
غرام... مابيه بس شوكت ترجعني
اسد... وواحنا لحكنا نكعد بعدين عندي موضوع وياج
غرام... شنو ..بالي كلت معقوله حيعترفلي 🤭

اسد... اول شي كومي كدري ذني الملابس جبتهن الج للدوام صديقي عده محل ملابس نسائيه واختاريتلج جم شغله يله

غرام... هزيت راسي وكمت اخذت العلاليك كتله وين اكدرهن
اسد... فوتي بهذا الممر اكو غرفتين فوتي عالاولى
غرام... اخذت الغراض ومشيت خطواتي بطيئ لان اتفرج عالمكان شقه جبيره بس متربه فتت للغرفه جان بيها غرفه نوم كامله
قفلت الباب وطلعت الهدوم اريد اشوف جابلي فجايبلي تنوره بيجي وياها بدي نيلي وبي مثل اللفاف منه وبي لبست جان حلو طلعتله كتله ها حلو شال راسه وجكاره بحلكه واشرلي بيده عود فتري
فتريت

اسد... اي حلو شوفي الباقي
رجعت بدلت جايبلي كيلوت اسود وستره طويله سوده وجايبلي تنوره سوده وقميص ابيض كلش حلوات صراحه الملابس يعني ذوقه يعجبني يعرف شحب

رجعت كعدت يمه بعد ما كدرت الملابس كلها اكو شغلات بيها كبر عليه بس عادي اكدر اضبطها كتله من شوكت عدك هاي شقه

اسد.... من زمان
غرام... وليش محد يدري بيها
اسد.... اكو شغلات ماحب احد يعرف بيها
غرام... لعد ليش جبتني هنا اذا متريد احد يعرف
اسد.... انتي حاله خاصه ست غرام
غرام... ممممم شوكت ترجعني
اسد... شبيج بنتي ثبرتيني كتلج احجي وياج وارجعج
غرام... شنو التحجيه
اسد... باعي غروم اعرف انتي هسه شوفين كلامي صعب او ضوجين منه بس  هسه انتي صرتي بمرحله جديده يعني كبرتي و حياه الجامعيه مو مثل المدرسه يعني ننتبه لتصرفاتنا حشوفين كومه ولد وكومه بنات وشوفين ولد مصادقين بنات والي عدهم علاقه وحبيات بينهم كلها هاي ماريدها تاثر عليج اكيد من حدخلين حيجوج شباب يردون يتقربولج 

غرام... اسد شنو هالحجي شايفني
اسد... باعي لانج على نياتج وبسرعه صديكين وهذا مو عيب لان كلبج ابيض ولان ماعندج تجارب فصدكين بسرعه ماريدج تنخدعين بالوجوه التضحك وتشاقه من البدايه تخلين حدود ويه الكل خاصه الولد مفهوم  وبعدين هذا الحجي مو بس عالشباب همينه اكو بنات مو زينات تنتبهين زين وتهتمين بدراستج مفهوووووم

غرام... عبالك داخله حرب ... اي مفهوم

اسد... ماريد احد ياخذ غرامي مني

غرام... اني هنا كلبي طربك طربك طربك طربك باوعت عليه هزيت راسي اي ... بكلبي اكول يعني شنو هسه اعترفلي لو شنو

اسد... ماريد اعيد هذا الحجي مره ثانيه

غرام... اي ...

اسد.... يله روحي جيبي الملابس حتى ارجعج

غرام.... اي هسه.. كمت رحت للغرفه كعدت اصفط بيها واخليها بالجياسه فاانتبهت اكو فشي لونه وردي معلك بتعلاكه كتلني الفضول شنو الوردي ذاك رحت سحبته وجان اشوفه قميص نوم اسقيات اني هلكد ماتفاجئت بسرعه ذبيته بالكاع ظليت اباع عليه زين هذا ليش هنا معقوله اسد مزوج وهذا بيتهم صاح اسد عليه يله غرام شدسوين
اني بسرعه شلته ومن الغبصه ماعرف تعلك لا بسرعه اخذت الغراض وطلعت من الغرفه واني احس كاشه ومالي نفس اباع على اسد طلعت جان واكف يم باب  الشقه كلي هاي كملتي كتله اي وطبعا حتى ماباع عليه نزلنا ورجع وصلني للبيت واني ولا حرف نطقت بالي كله يم هذا الشفته واشكال تخيلت اشكال لعبت نفسي منه وصلت اريد انزل لازمني من ايدي كلي ماريد احد يعرف بشقه مفهوم
هزيتله راسي وسلمت ونزلت طبيت جوه جانت امي بعدها مجايه واخذت رزاله من بيبي لان من رحت ماكتلها بالرغم امي خابرتها بس حقها طببت الغراض بالغرفه وكعدت ظليت افكر معقوله مزوج وهذا مال زوجته لا مستحيل يجوز مال صديقته هو كومه عده صديقات كلش نقهرت من شفت هذا معلك وجنت فرحانه اكول اني اول بنيه ادخل هالشقه اكيد لان يحبني دخلني 
رجعت امي ورونق امي كلتلي ها جابلج اسد فكعد افرجها بس اني حتى من الملابس لعبت نفسي منها  طلعت امي رونق طبعا عرفت اني مو على بعضي حاولت تعرف ماكتلها عاد عافتني عادي صار الليل دكلي اسد مرتين بس مجاوبته

اسد... صديقي عده محل ملابس نسائيه رحت اخذتلي جم قطعه لغرام ورجعت للبيت جدها حتى انطيها الغراض مادري خطر بالي اخذها لشقتي حبيت تعرف شويه عن حياتي الخاصه صح شقه محد يعرف بيها بس اصدقائي بس ردتها هي تعرف رحت اخذتها ورحنا للشقه مابطلت اسئله لحد ماوصلنا ظلت مستغربه لان عدي شقه واعرف صار عدها كومه اسئله تريد تعرف اجاباتهن مني بس ماسئلت جنت اتمنى تسئل تحجي بس كالعاده سكوت

كدرت الملابس وحجت وياها شويه عالكليه كلت ابدي امهدلها شويه شويه عن حبي الها  ماريد احد ياخذها مني
بالليل دكيتلها مجاوب كالعاده صارت امنيتي من اول دكه جاوب
طبيت امدد بالغرفه جنت تعبان خابرت مرت عمي ام غرام... لان باجر نرجع خابرتها اتفقت وياها على باجر ساعه بيش اجيهم وراها  نمت

غرام... حضرنا غراضنا لان باجر نرجع الكل يسولف ويضحك واني بالي يم هذا الشفته المن هذا زين ليش مسئلته معقوله يجيب بنات لشقته لا ممعقوله اي عادي هو شو ميخاف من احد وقابل ليش عده شقه محد يعرف بيها ياربي ليش ماسئلته اوووف كمنا نمنا وطبعا مخي يخيلي شغلات
صبح كعدنا تريكنا واجه اسد علينا طبعا اني صعدت خليت السماعات وظليت اباع عالطريق فجان اكو ازدحام بشارع فنداريت جان اشوفه يباع عليه من المرايه هو ديسولف ويه امي وعينه عليه
اني انداريت نوب راسي كلسع يندار يباع عليه وبس اندار هو بساع يباع عليه ماعرف شون يعرف داباع عليه

وصلنا عاد نزلنا غراضنا وفتنا للبيت عادي مر اليوم كلش طبيعي ظل اسبوع ويبدي دوامي بس اني بكل فرصه اشوف اسد اريد اسئله واتراجع اكول خاف يفشلني
فاني ماكدر اكعد واسكت لازم اسوي فد مصيبه شون
فجان يوم خميس والاحد يبدي دوامي فاامي بعد ما بست ايدها اخذتني للصالون حفيت حواجبي واني حواجبي من نوع منها وبيها شمره يعني مجرد تنظيف تطلع كلش حلوه عزه سويتهن شون غيرت شكلي  وعدلت اطراف شعري ام الصالون يعني تعديل الاطراف ظل دكول لا الجوه كله يابس ومنهاي سوالف المهم عدلته شفت قل من طوله بس كلتلي ترى الاطراف كل متقصف واذا طويل وهو مابي صحه المهم قنعتني

رجعت للبيت طبيت سبحت ووسشورت شعري وخليت مكياج خفيف  غير اجرب حواجبي وهي محفوفه المهم اكعد واسكت لا بدلت ورحت لبيت عمي اني ورونق داشوف حواجبي لنبأ وايمان

طبيت نزعت شالي  واني جنت مسوي ذيل احصان المهم كاعدين بالهول دنسولف وكلسع يكلولي شكد مغيره شكلج وصايره كلش حلوه واني طبعا الغرور كتلني هههههه فجان يفوت فهد ديخابر وبسرعه صعد كتلهم هذا شبي

نبأ....  ديحجي ويه الحب
رونق.... فهد يحب يابه من شوكت
نبأ..... هالايام عيني صاير العاشق الولهان  تعالو نصعد نصنت عليه بارحه اني وايمان شكد صنطنه عليه عزه ولكم يخرب ضحك
غرام.... لا عزه عيب ليحس علينا ونترزل
ايمان... ولج لا يصير بغير عالم تعال نصعد بربكم نضحك شويه

غرام... المهم صعدنا وكفنا يم الباب ولزكنا اذانه عالباب يعني مجنا نسمع شغلات بس جم كلمه بس شنو بالكوه كاتمين الضحكه  مانسمع غير صوت خشن كال هاي شنو

اسد.... طلعت من الغرفه لكيت البنات لازكات على باب فهد
عطت عليهن هنا بسرعه عدلن نفسهن وحده وره الثانيه صارت تنزل الدرج اخير وحده جانت تمشي غرام فدتنزل كتلها اوكفي

غرام... لتافيت عليه كلي تعالي باوعت البنات نزلن
رجعت كتله نعم

اسد.... لزمتها من شعرها ولفيته على ايدي كتلها هاي شمسويه بشعرج

غرام... والله ممسويه بي شي بس عدلت الاطراف  طبعا احس شعري حيتكطع بيده بحيث هو لافه على ايدي واني خاله ايدي فوك ايده

اسد.... عفته كتله تعالي فوتتها للغرفه وهي واكفه كباله حاصره دمعه
كتلها فتحي شعرج

غرام... فتحت شعري كلي نداري
نداريت

اسد.... من خرب عشيرتج غرام ولج شمسويه بشعرج

غرام... والله اطراف تعبانه ويوكع هواي بس عدلته حتى يطول اسرع

اسد.... كلش ضوجتني واني مانعها تكصه كتلها منو صخم وجهج كلج كصيه

غرام... ظليت ساكته

اسد... باوعت عليها اكو شي بوجهها متغير بس ماعرف شنو كلت يجوز لان خاله مكياج بس شون طالعه كيكه
تقربت عليها وهي ترجع ليوره

غرام.... يمه شكله يخوف صار ... شكو  محسيت على نفسي الا لا زكت على ميت التواليت وهو واكف كبالي صافن بوجهي

اسد.... بعد متكصيه ترى اشعل اهلج والكعبه
غرام... اي والله بعد ماكصه
اسد... يله روحي
غرام... فتحت الباب وركض نزلت لكيت بنات بالهول بس شافوني خربو ضحك عليه كمت افشر عليهم

اسد... خابرت محمد كلي تعال عازمك على عشه المهم رحتله ورحنا تعشينا وكعدنا نسولف

غرام... رجعت للبيت وعادي جانت ايام عادي وبين التوتر لان حداوم جامعه وبين الفرح يوم سبت بالليل دكلي اسد بسرعه جاوبته
الو
ها غروم شونج
زينه
باجر ساعه بيش تروحين
بسبعه يعني لان امي دكول خاف زدحامات
ماشي من تكملين دكيلي حتى اوصلج
اوكي حتعبك ويايه
ولك انت تعبك راحه الي
طبعا ابتسامتي من الاذن للاذن
يله روحي نامي حتى تكعدين من وكت

ثاني يوم صبح كعدت مثل الجهال بطني توجعني خايفه ماكو صديقاتي لاول مره ويايه واروح مكان ماندل منه شي خوف طبيعي
بدلت لابست تنوره بيجي والبدي النيلي الجابهن اسد وشال ذهبي ومكياج وشغلات نزلت امي ورونق فرحانات اكثر مني
دكيت على اسد رفضه شويه ودكلي يعني طلعي
المهم سلمت عليهم وطلعتله
فرحت صعدت وياه
صباح الخير
صباح النور ولك شنو هالجمال
-هههههه  يعني طالعه حلوه
-لج انتي بعيني دايما حلوه حتى وانتي مكفشه
-ههههههه هاي شنو خجلتني
-تريكتي لو لا
-لا ماشتهيت بطني توجعني من كعدت والبارحه بالكوه نمت
-لان اول يوم دوام

مشى شويه جان يوكف يم ابو فرن نزل جابلي منه جرك بي جبن وكرفس كلش احبه حار جان بعده اجه صعد

هاج اكليها مادام حار يله
والله ماشتهي
دلزمي والكعبه اذا ماخلصتيها كلها ارجعج للبيت
لا لا اكلها كعدت اكل فقسمت منها قطعه نطيته اله كال ماريد
جان قربت اللكمه من حلكه هو باع عليه وفتح حلكه اكلها

المهم وصلنا كلي تندلين منين تفوتين
كتله لا كلي امشي وره ذوله الطلاب همه ذوله كلهم بالكليه ماتج

غرام... اسد تعال انزل ويايه وصلني جوه والله استحي وحدي امشي
اسد... شكو تستحين بابا .. ماشي خل اوكف سياره عدل

غرام... نزلنا اني واسد طبعا يمشي ويايه وهو ضخم وطويل واكو ولد يمشون اباع عليهم بكلبي اكول عزه ذوله صغرهم حتى شوارب ماعدهم فتنا جوه  واو مكان اول مره افوتله كومه طلاب وطالبات
وصلني جوه ورحنا اني وياه سوينا مباشره ودلوني على شعبتي وصلني لباب الشعبه طبعا اباع عالبنات كلهن يباعن عليه لان مبين مو طالب

اسد.... هاي شعبتج ماشي دخلي وتعرفي على بنات وبعد شويه تبدي محاضرتج  ماشي

غرام... طبعا اني حاسه بالامان واني وياه ... كتله اي ماشي بس اسد منو يرجعني اني

اسد.... من تبدي المحاضره الاخيره دكيلي واني اجيج اوكي اصلا اصور اليوم متاخذون كل المحاضرات كلها تعارف تكظوها اول اسبوع

يله فوتي  اني حروح

غرام... اي ماشي يله باي

اسد... يله باي

غرام... فتت للشعبه جانت جبيره وبيها طلاب كومه نوب ماعرف وين اكعد شفت مكان رحت كعدت بي بصفي طالبتين ديسولفن والغريبه الكل ديسولف زين شوكت لحكو يتعرفون ذوله

بدت المحاضره الاولى جان دكتور ياخذنا رحب بينا وسولف ويانه وعرفنا شنو نظامه مانطانه محاظره كظاها سوالف كالنا من المحاضره الجايه نبلش

وراها اخذنا بريك تعرفت على بنات اثنين طبعا شافوا اسد ويايه اول متعارفنا كلولي هذا خطيبج الي اجه وصلج كتلها لا ابن عمي
بس مرتاحيت لوحده بيهم كومه تسئل عبالك عدنا تحقيق

اخذنا ثاني محاضره نفس الشي خلصنا دوام اني مجنت اعرف بعد ماكو محاضرات اليوم فكلت لهاي البنيه خل روح ناخذ الجدول
فرحنا اخذنا ونزلنا جوه جان جو حلو وطلاب كومه ويعني اول مرحله من يشوف ولد وبنيه يمشون سوه بسرعه يكول عليهم ذوله مصادقين هههههههه
خابرت اسد حتى يجيني شويه ودكلي كلي يله طلعيلي
المهم طلعتله فشفت سيارته وكفه رحت صعدت بيها
-هلو
-هلا بيج
-شونك
-انتي شونج شونه دوامج
-مممم زين ماخذنا محاضرات يعني ظلو يتعارفون وهيج
-اي تونسي هالايام بعدين متعرفين تحكين راسج
-ههههههه اي همه هم كلونا هيج
-تعرفتي على بنات
-اي تعرفت على اثنين بس وحده بيهم محبيتها عفتها بقيت بس ويه وحده اسمها ساره حبابه

ظل اسبوع يوديني ويرجعني بعدها كلي اني حلتحق فخلاني بخط اروح واجي وياه بس من يرجع من دوام هو ميقبل الا هو يوديني ويجيبني علاقتنا قوت هالفتره صح محد كايل للثاني شي بس سوالفنا صارت هواي مخابراتنا رسايلنا كلشي صرت اشتاقله من يروح للدوام ومن يرجع اظل فرحانه صرت احب اهتمامه بيه بعد ماجنت احسه خانكني

اسد.... صح جنت اروح للدوام واعوفها جان كلبي يظل يمها زاد خوفي وغيرتي عليها اكثر بكل مره انزلها بيها من السياره واني اوصلها جان بودي انزل ارجعها يمي صارت ويايه سولف وتضحك وتحجيلي يومها كله حتى من اروح للدوام من ادك عليها كانما منتظره مكالمتي تكعد تسولف صار وياها  وشحجت حتى الاكل الي تاكله جنت احب اسمعها سولف مره صار عند صديقي ظرف حاله وفاه فاخذت اني بمكانه وجان المفروض نزلتي بس خليته هو ينزل  فخابرتها كتلها ماكدر انزل طبعا ظلت ليش وليش وشون

غرام... جنت انتظر نزلته يوم يوم فمره ظل اسبوعين تقريبا ماكو منازل يعني هنا اني صرت حتى دوام اكره حتى مخابرته جان مطوله دقايق بس يسلم وهاهيه
وكل ماسئله شوكت تنزل يكلي هالايام هلايام
فمره رجعت من دوام شفت سيارته واكفه اني هنا بس اريد انزل من الخط بسرعه نزلت رحت لبيت عمي مرت عمي اول مشافتني كلتلي فوك فوك قبل شويه اجه كانما تعرف جايه علموده اني خليت غراضي جوه وصعدت ركض دكيت الباب وفتحته قبل ماسمع رد جان يمكن هسه طالع من الحمام واكف يمشط شعره

اسد... دكت الباب وفتحت باوعت هاي غرام هلا ياكلبي شكد مشتاق لهلا عيون اروحلن فدوه ... ابتسمتلها كتلها هلا بغرامي

غرام.... بدون اي تردد جنت كلش مشتاقتله بس شفته رحت حضنته  يمكن هاي ثاني مره احضنه هيج بادلني الحضن مثلي جنت حاضنته ومغمضه عيني اريد اشبع من ريحته

اسد.... ليش الجذب مجنت متوقع تجي تحضني اوف ياحضنك ياراحتي ياعافيتي

غرام.... همس باذني اشتاقيتلج حبيبتي

اني هنا احس كلبي صاعد على حصان وطربك طربك طربك طربك  مجنت مستوعبه الكلمه كالها متقصد او طلعت منه بدون قصد
كل الي اعرفه كتله واني هم اشتاقيتلك

بتعدت عنه وطبعا ظل لازم خصري واني ايدي على صدره

ليش هيج تاخرت
اسد... دوام وهوسه عدنا والله  شونج
غرام... هسه صرت زينه باجر انت توصلني ترى
اسد... عصرتها من خصرها كتلها اكيد
غرام... انتبهت ايدي على صدر بسرعه نزلتها وهو هم ابتعد مني طبعا ظليت افرك بيدي من الخجل بكلبي اكول هسه شيكول عليه
كتله اني حروح لان امي متدري بيه جايه هنا

اسد.... ابقي تغدي بعدين روحي للبيت
غرام... تعال انت تغده يمنا
اسد.... مو خطيه امي مسويه اكل وتحضر بي هسه تنقهر اذا اروح بس العشه اجي اكل وياج ماشي حبيبي

غرام... طبعا بكلبي اكول لا مجنت متوهمه من كال حبيبي بالمره الاولى عزه كالها مره ثاني اكتفيت بهز راسي وسلمت وطلعت
واني كلبي فرحان وابتسامتي واني ممصدكه كال هيج

رجعت للبيت واني كلش فرحانه كتلها لامي جنت بيت عمو سلمت على اسد لان شفت سيارته

ام غرام... جان كتيله يجي يتغده يمنا
غرام... لا حيجي بالعشه ياكل ويانه
عفتها وصعدت فتحت الباب لكيت رونق كاعده تلعب بتليفونها
ظليت افتر بالغرفه

رونق.... خيرج شبيج الدنيا مسايعتج
غرام... رونقتي احزري اسد شكلي
رونق.... ها ليش اجه اي شكلج
غرام... ولج كلي حبيبتي
رونق... جذابه كولي والله
غرام.... والله عزه رونق مرتين كلي بالبدايه كلت ميقصد بس مره ثانيه عادها عرفت يقصدها
رونق... غرام يعني خاف كالها عادي يعني مو اله يقصد بيها حبيبته حبيبته
غرام... انجبي رونق خليني فرحانه كلبي يكلي يقصدها فديته

لليل طبعا فتت سبحت وسشورت شعري وخليت كحل وماسكاره وشويه ملمع شفه ولابست بجامه ونزلت جوه كتلها لامي اريد اسوي كيكه عاد كعدت يمي بالمطبخ تعلمني واني اسوي خليتها بالفرن وكلسع اريد افتح الفرن امي متخليني دكول تنزل
وره نص ساعه ريحه البيت صارت كلها كيك امي طلعتها جكتها بسجينه دشوفها مستويه ورجعتها شويه وكالت طلعيها طلعتها واني احس نفسي لازمه كاس العالم هههههه مو كيكه بس هاي اول انجازاتي
امي سوتلي صلصه اخليها فوكاها بس كالت خل تبرد يله

دك الجرس واني كلبي دك وياه اجتي رونق كالت اجه اسد
امي راحت سلم عليه واني مدري شبيه استحي اطلعله
امي اجتي كالت روحي يمه بين مايكمل العشه اختج فوك صعدت تقرا
رحت يمه سلمت وكعدت
كعدنا نسولف اني وياه اول مره اكتشف هو كلش حلو شكله جان يعجبني اتلمس وجهه شواربه عيونه

فجان اكو مشكله بتليفوني ماكدر انزل شي من الابل ستوري ماعرف الا رمز يريد

فجبت تليفون كتله ليش مديقبل ينزل

اسد... هذا يريد الباسوورد اوكفي كاتبه عندي طلعت تليفوني وهي كاعده بصفي تتفرج شداسوي
كملته كتلها هسه نزلي منه بعد ميطلعلج هذا 

غرام... هو يشتغل بجهاز واني صافنه على وجهه جان كلش عاجبني الزمه ندار عليه كلي هاج كملته اني بدون تردد ولا خوف تقربت من خده بسته كتله شكرا نطيته بوسه على خده .....❤️