رواية حب جنوني الفصل الثاني وسبعون 72 - بقلم سوزان ليث

غرام..... كعدنا ناكل وكعده حلوه جان جمال بحضني واني من يكعد يحضني ماكدر اكل احير بي
جان الكل يسولف وملتهي ماشوف الا جمال انسحب من حضني باوعت اسد كعده بحضنه عرف اني ماكدر اكل وهو بحضني كعدت اكل جنت اشرب عصير وجنت لازمته واسولف ويه نبأ ورونق ماشوف الا العصير نسحب منيه التافيت اشوف من اخذ عصيري لكيته اسد يشرب  منه باوع عليه رافعلي حاجبه عود شكو  اني عفته ورجعت اسولف ويه البنات
كملنا عشه لنا الماعين وجبنا فواكه وكرزات وعصاير وظلينا كاعدين نفس كعدتنا

اني ونبأ ورونق وجلال وفهد فريق وعمي وعمتي وامي واسد فريق
فريقنا يسولف ويضحك ويصنف وذاك الفريق كله عالاخبار والوضع يحجون
رونق كالت لجلال اريد ايس كريم جلال بسرعه كال ترحون ناكل ويباوع علينا نبأ كالت اي اروح وفهد هم كال اروح اني التافيت على اسد شفته يسولف وممنتبه النا
كتلهم لا اني ماروح لان حصعد انوم جمال خطيه تعب
ظلوا يتوسلون بيه بس اني ماقبلت
جلال راح يم امي يطلب منها رونق تروح وياهم امي بالبدايه ماقبلت خاف جدي يعرف بس عمي كلها خل يرحون
اني جنت اباوع على جلال شون يحاجي امي من قبلت أشر لرونق يله بسرعه رونق لبست عبايتها ونبأ لبست حجابها وطلعوا اسد ظل يباع عليه استغرب ليش مارحت
عمتي التافت عليه من شافت فريقي كله راح كالت .. شو مارحتي وياهم
غرام... لا عمه مو اريد انوم جمال
عمتي... جان رحتي وياهم وبقيتي يمي
غرام.... لاعمه ماريد
كمت  لملمت الاغراض ودخلت الملم بالمطبخ وجنت اغسل اماعين مشفت الا اسد دخل المطبخ فتح ثلاجه ورد سدها  اجه وكف يمي وساند نفسه عالكاونتر يباع عليه كلي... ليش مارحتي وياهم

غرام ....  شويه نصدمت لان حجه هيج بس ظليت مركزه اغسل اماعين وجاوبته كتله... معاجبني

ظل واكف ويباع عليه  كملت عفته وطلعت بره رحت كعدت بصف امي هو ورايه اجه كعد مقابيلي اني جنت لازمه تليفون اصفح رفعت راسي شفته يباع عليه ويدخن وحتى من انتبهت عليه ظل مستمر يباوع بحيث اني الي درت وجهي منه
ظليت اسولف شويه ويه عمتي وعمي بعدها جمال تنحس كلت خل اصعد انومه
اخذته وصعدت غسلتله وبدلتله ونومته سمعت صوت بشارع عبالي رجعوا رحت اشوف من شباك اذا همه دخل اسد للغرفه اني ظليت واكفه اباوع عالشارع
اجه وكف يمي يباع عليه  اني جنت اعرف يريد يحجي  بقيت واكفه نفس مكاني ونظراتي عالشباك
شفته خل ايده على شعري المفتوح وظل يباع عليه ويلعب بي
كال بصوت هادء ... ليش هيج كصيتيه

غرام.... هاي اول مره انقهر لان كصيته من وره نبره صوته حسيته مقهور عليه بدون ماباوع عليه
كتله .... عجبني

اسد.... كلبج ماكلج اسد يحبه شون تكصيه

غرام.... ظليت ساكته شويه بعدين كتله ... اول مره اسوي شي اني رايدته

اسد.... بعدني مستغرب شكلج والمشكله بشعر الطويل تموتين وبشعر القصير تموتين

غرام.... ظليت ساكته رجع يلعب بشعري كلي.... رسالتج البارحه مخلتني انام معقوله انتي هيج شوفيني

غرام... باوعت عليه لاول مره ماخاف من رده فعله كتله ... اي

اسد.... اني هواي امور غيرتها علمودج حتى عصبيتي وياج احاول اسيطر عليها حتى لاذيج بكلمه بتصرف
ليش اني ماعرف انتي متحجين شي الي ترى اعرف
انت اصلا تحجين الامور بس الي انتي تردين اعرفها.

غرام.... وليش هيج اسوي لان اخاف من رده فعلك  حتى امور اكو اريد اسويها انت متقبل لان بتفكيرك شوفها متسوى ومال صغار بس اني بتفكيري اشوفها تسوى ومناسبتني
بدال ماانت تنزل لتفكيري صرت اني احاول اصعد لتفكيرك
صرت اصرف اكبر من عمري واني ماريد هيج اسوي

اسد... محد كلج سوي هيج اني ماطلبت منج سوين هيج

غرام.... انت طلبت بس مو بالكلام طلبت من خلال مواضيع تنفتح من خلال امور صير
اني ماعندي رأي من اني وصغيره انت وامي تتاخذون قرارات بدالي اني بعد ماكدر هيج
اشوف رونق  شون جلال فاهمها وحتى لو مصيبه مسويه يكعد ينصحها ويحتويها مايعصب عليها ويحملها مسؤوليه الصار اكول ليش مو اسد هم هيج تعرف كم مره ارجع من دوام اريد احجيلك اشياء صير ويايه بس اخاف من رده فعلك
كم مره تمنيت اسوي شغلات حابتها بس اخاف منك
اسد اني تعبت اني احبك اي بس مداتمتع بهذا الحب
.. اني احجي ودموعي تنزل وهو صافن عليه اول مره من بحياتي اني احجي وياه هيج خله ايده على خدي يمسح دموعي

اسد.... هيج اني وحش طلعت لعلمج اني كلش زين اعرف انتي مو كلشي تحجيلي ماشوف نظره التلمع وضحكه الي تطلع من كلبج مثل ماشوفها من تكعدين تحجين ويه نبأ لو جلال لو فهد لو رونق
من تسولفين وياهم ضحكتج تطلع من كلبج وافرح من اشوفج هيج منطلقه وياهم وسولفين بس اغار لان مسولفين ويايه مثلهم

غرام.... لان من الي ذكرتهم ولا واحد يحملني مسؤوليه الي اسويه راضين بيه مثل مااني ولا واحد حجيت وياه و اخاف يفهم سالفه غلط

اسد ... لان غرام ذوله مثلج نفس تفكيرج اعماركم متقاربه  شوفين نفسج مرتاحه وياهم وسولفين لذالك بطلت اكلج لاتشاقين ويه فهد لو جلال لان اعرف انتي ترتاحين سولفين وياهم اشوف مودج بعد مسولفين وياهم يتغير للاحسن ليش ماضوج من اشوف هيج اضوج واغار بس والله ضحكتج عندي من اشوفها افرح مني يمي

اني وياج يجوز  اسلوبي وعصبيتي هي الي تخوفج مني بس غرام اكو امور مابيها صغير او جبير اكو امور بين زوجين لازم مصير

غرام.... مثل شنو

اسد.... مثل اي مشكله بينا التاف الكه الدنيا كلها تدري بيها ابسط مثل الي صار من شكيتي اني خاينج
مظل احد معرف

غرام.... اني محجيت لاحد
اسد... لا حجيتي نبأ تدري بسالفه ومحمد كلي غرام حاجيه لنبأ
جده حكمه تدري

غرام ... جده حكمه هي الي اجتي لبيتنا واكتشفت هي تعرف

اسد... غرام اني مو عاليعرف  هسه اني هنا من طلعتي ابويه وامي مو رادو بس يعرفون ليش وصاير بس كتلهم سالفه بيني وبين مرتي ماريد احد يدخل
وحتى حكمه من خابرتني ورادت تعرف صاير لان واصل حجي انتي طالعه زعلانه اني كتلها مشكله بيني وبينها ونحلها ان شاءالله مانطيت بيج كدام اي احد اني حتى لرونق حجيتلها بس ردت ساعدني حتى احجي وياج ولان اعرفها متحجي لحد ومتاكد حتى جلال محجتله الي حجيته الها

غرام..... اني اذا حجيت لنبأ لو رونق فلان ذني المرايا مالتي احنا كلشي نحجي من احجي وياهن ارتاح

اسد.... ليش ماصير اني المرايا مالتج ليش ماني الي ترتاحين بالحجي وياه

غرام... ظليت اباوع عليه جنت مستمتعه واني احجي وياه لان مخايفه منه ماعرف لان هالمره اسلوبه مختلف عن كل مره

قطع حديثنا دكت الباب رحت فتحتها لكيتها نبأ
كالت ....تعالو ملكينا ايس كريم جبنا حلويات
وباوعت على اسد كلتله محمد جوه يريدك

اسد عافنا ونزل نبأ باوعت عليه كالت ...شبيج باجيه

غرام... لا مباجيه

نبأ.... اكيد.
غرام.... اي شبيج جنا نسولف عادي يله ننزل لابست حجابي ونزلت لان محمد جوه طلعت بره جان الكل كاعد سلمت على محمد ورحت كعدت عالمرجوحه يم رونق
ظليت بس اتفرج اجه جلال وكف يم رونق وظلوا يسولفون اني جنت بس اهز المرجوحه واذكر الي حجيته واسد استغربت نفسي اول مره هيج اصير واحجي الي بكلبي
ماحسيت الا رونق تلزم ايدي فزيت جنت بغير عالم

رونق.... ها وين وصلتي
غرام... شكو
رونق.... صار ساعه نحجي وياج وين صافنه
غرام ...  افكر شلبس باجر
رونق.... مممم حرامات لو جايه ويانه تونسنا وغيرنا جو شويه
غرام.... مو نومت جمال خطيه نعسان جان
رونق .... ولج لو  تعرفين المن شفنه
غرام.... منو
رونق.... قصي بس عزه مدري شبي هو شافنه بس غلس بس فهد صاح عليه يله عود شافنه
غرام..... صدك خاف صدك مشافكم
رونق.... لا شافنه بس غلس
غرام.... عاد هذا يوميه بحال .. محاجيه اني لرونق على سالفه ايمان ويه قصي ومردت احجي

ظلو الكل كاعد ويسولف جنت اباوع على اسد الي جان كاعد يم محمد ويحجي وياه بس اعرف اسد باله مو يم محمد تدخين ماوكف عنده
امي وؤونق سلموا ورجعوا محمد اخذ نبأ وراحوا
اني وايمان لملمنا الكعده وعزلناها كملت صعدت فوك جانت بعدها ساعه ب ١٠ غسلت وبدلت ودخلت للفراش اريد انام باجر ورايه دوام
دخل اسد باوع عليه وتوجهه لكنتور طلع ملابس اله وبدل
اني جنت صافنه عليه لان عرفت حيروح لصديقه بحيث اني مانتظرته يحجي شي بسرعه نمت ودرت  وجهي وغطيته كلش ضجت يعني منتظر نكمل كلامنه
سمعته كال رايح شويه يم صديقي
مجاوبته عافني وطلع ظليت اتكلب بالفراش ماكدر  انام لل٢ سمعت صوت الباب نفتح عرفته رجع اني بسرعه سويت نفسي نايمه
حسيت عليه دخل الغرفه وجان يتحرك على كيفك حتى لانحس عليه
شويه واجه نام اني ظليت اظاهر نايمه حسيت  عليه تقرب عليه باسني من راسي ورجع لمكانه
اني بعدها نمت حسيت صبح عالمنبه كمت بسرعه رحت غسلت ورجعت للغرفه جان اسد وجمال نايمين بدلت وخليت شويه مكياج لفيت حجابي ونزلت جوه شفت ايمان بالمطبخ كاعده تراجع دروسها قبل متروح للمدرسه
كعدت يمها شويه وبعدها اجاني الخط وطلعت
اني متعلمه من اسد ينزل هو يصير الخط مالت بس هالمره محس عليه يمكن لان تاخر يله نام

وصلت للجامعه وظليت شويه يم البنات
دك تليفوني شفته اسد ايتعدت شويه عن البنات وجاوبته

.... الو
..... صباح الخير
.... صباح النور
.... شونج ماحسيت عليج صبح من طالعه ليش مكعدتيني اوصلج
.... مادري شفتك محسيت كلت اعوفك ترتاح
.... اكلتي شي من طلعتي
.... لا ماشتهيت كلت اشتري شي هنا اكله
..... مو كايلج ماطلعين اذا متاكلين شي
.... ماشتهيت اكل شي صبح
..... اكلي شي قبل مدخلين محاضرات حتى تركزين زين
..... اوكي جمال كعد
.... اي كاعد واكل وامي خالته يمها
.... اي زين
.... من تخلصين دكيلي اني اجيج
.... لا ماكو داعي مو لازم ارجع اليوم ويه الخط نسيت انطي فلوسه صبح
.... باجر انطيها
.... لا خطيه خاف محتاجهن اليوم
.... ماشي
.... يله حروح اني حتبدي محاضرتي
.... يله باي

..... بعدها التهيت بالمحاضرات  يوم متعب
نزلنا اني وساره كالت حروح اجيب ملازم ناقصتني
كتلها اني حكعد انتظرج بالسنتر
رحت كعدت وجنت اتفرج عالطلاب حسيت واحد كال سلام عليكم
رفعت راسي اشوف منو هذا لكيته فراس

رديت عليه عليكم السلام
فراس .... شونج
غرام... الحمدلله
فراس ... شونج بالدوام
غرام.... زين ماشي الحال
فراس .... اي شي تحتاجين تعالي عليه اشرحلجياه ترى شعبتج اغلبها يجون علينا يسئلونه وياخذون من عده ملخصاتنا ماشوفج انتي تجين ابد

غرام.... مو لان اي احد يجي عليكم من شعبتنا يخليهن بالمكتبه الي يريد يروح ياخذهن

فراس ... ها زين

غرام... ظل ساكت شويه بعدها كلي... شنو صار عندج

غرام ... شنو . مفتهمت سؤاله
فراس ... يعني صاار عندج ولد لو بنيه

غرام...ها صار عندي جمال
فراس ... ماشاءالله سميتيه على اسم ابوج
غرام... هزيت راسي ب اي .. بكلبي اكول حتى اسم ابويه تعرفه
فراس... الله يحفظه الج
غرام... شكرا
فراس .... اني بس حبيت اسلم عليج قبل فتره حلمت بيج وكل مره اريد اجي اسئل عليج اتراجع بس هسه شفتج وحدج كلت خل اروح اسلم
غرام....ظليت اباوع عليه ماعرف شجاوب كتله ان شاءالله حلم زين .. شفته ابتسم كلي

فراس....ان شاءالله
غرام... اجتي صديقتي وكفت يمنا بعد ما سلمت عليه
هو كال..  يله اترخص اني بس حبيت اسلم واي شي تحتاجون ماده تعالو عليه اني اشرحها الكم

غرام... شكرا الك متقصر
ساره ... شكرا

غرام... عافنا وراح ساره التافت عليه كالت ....هذا جابه صدمني من شفته واكف يمج

غرام.... اجه يسلم وكلي تحتاجين شي بدراسه تعالي عليه

ساره.... خطيه شكد حباب غرام من اشوفه مدري ليش انقهر عليه

غرام.... اي هو حباب الله يوفقه
ساره... اكلج حدكولين لاسد اجه سلم

غرام.... باوعت على ساره كتلها ماعرف

رحنا اكلنا اني وساره ورجعنا عدنا محاضره اخيره
كملناها
ووطلعنا للخط ةصلت للبيت ملكيت سياره اسد موجوده دخلت للبيت لكيت عمتي بالمطبخ سلمت عليها وجمال كاعد عالكرسي
بس شافني كام يسوي حركات حتى اشيل رحت شلته وظليت ابوس بي احس من ارجع من دوام يكون مشتاقلي لان من اشيله ينام شويه على جتفي مثل الي يحضني
سئلت على اسد عمتي كالت مو رجعوا المعتمرين وراح  يجيبهم خطيه من صبح راح

صعدت فوك غسلت وبدلت ونزلت ساعدت عمتي بالغده وحضرنا عمتي كالت اتصلي على اسد شوفي يجي عالغده حتى ننتظره
كتلها ... عمه تليفوني فوك اتصلي انتي من تليفونج
عمتي دكت عليه كلها تغدوا اني اتاخر

كملنا غده وصعدت فوك  اني وجمال نومته  بدلت رحت للفراش اريد انام  راسي يوجعني غفيت شويه بس حسيت صوت بالغرفه باوعت لكيت اسد فاتح الكنتور لاف المنشفه جان هسه طالع من الحمام
من شافني حسيت كلي ... صح النوم

غرام... شكرا شوكت رجعت
اسد ...قبل شويه
غرام... اجوي جدي وجده حكمه
اسد ... اي اجوي وديتهم للبيت
غرام.... اي زين متغدي
اسد... لا بعدني
غرام... كمت من الفراش كتله حروح احضرلك الغده
نزلت حضرتله الغده وهو نزلت ورايه كعد ياكل اني جنت اسويله الجاي كلي... شونه يومج اليوم

غرام... اني جنت ناطيته ظهري التافيت اشوف ويه منو يحجي شفته يباع عليه كتله... زين

اسد... اي يعني سويتي مسويتي
غرام..... حسيته يريد يسولف ويايه صبيتله جاي ورحت اشيل الماعين
كتله ... يومي كله محاضرات.. شفته باوع عليه كلي ... اي زين شرب جاي وصعد اني لملمت المطبخ وصعدت
بعده
دخلت للغرفه لكيته مدد  كعدت اقره شويه
بس بالي اريد اكله على فراس بس شي يكلي كليله وشي يكلي لدكليله هسه يعصب عليج وشيخلصج
شويه وجمال كعد جبته يمي لان اسد نايم انطيته لعبه ظل ملتهي بيها اني كملت قرايتي
ندكت الباب صحت ادخل دخلت ايمان كالت ... ابويه كال اكللكم حنروح لبيت جدي نشوفهم تجون

اسد جاوبها كلها ... روحوا انتوا احنا بعدين نلحكم
ايمان راحت اسد باوع علينا كال ... عندج امتحان

غرام... يومي
اسد ... كملتي
غرام ... اي شويه هو
اسد ... عاجبج تروحين لبيت جدي
غرام.... اي خل روح نسلم عليهم
اسد...يله كومي تحضروا

غرام ... كمت بدلت لجمال ونطيته لاسد حتى ابدل اني
اجتي ايمان كالت حيرحون كلهم  تعالوا قفلوا  باب ورانا
عاد اسد نزل يقفل الباب وراهم شو صعد جمال مو بيده
كتله ... وين جمال
اسد... امي اخذته وياها
غرام ... ليش هسه يضوجها
اسد .... هي شافته مبدل مكدرت تقاومه اخذته
غرام... يله اصلا اني حكمل ونلحكهم  ...
جنت لابسه بنطرون قماش وبدي ابيض وستره صيفيه وردي لونها
جنت اخلي مكياح واسد جان يبدل كمل اجه وكف يمي يمشط شعره صاح والله حلوه بدون هالسوالف

غرام .... باوعتله صفح كتله ... ادري بس احب اخلي
شفته سكت رش عطره الي احبه  ومغرمه بي

بعدها كملنا وطلعنا من البيت بيت جدي قريب علينا مشت السياره بس انتبهت طلعنا من المنطقه
كتله... وين رايحين ... باوع عليه كلي .. اخطفج وغمزلي

خلاني ابتسم لان كالها بطريقه حلوه ظلت تمشي السياره وصلنا لمطعم حلو جبير وبي كعدات صير خارجيه
وكفنا يمه كلي .. يله نزلي

غرام... وين وجمال شون
اسد... كتلج يم امي معليج بي
غرام.... نزلنا ودخلنا كعدنه بره لان الاجواء حلوه
بالبدايه جنت اتفرج ووممنتبه لاسد التافيت شفته يباع عليه كلي

اسد... اي البارحه ماكملنا كلامنا

غرام... ظليت ساكته منتظرته هو يحجي 

اسد....شنو شغلات الي متحبيها بيه

غرام .... سكتت شويه افكر نوب هو صافن عليه وكعدته شون حلوه ونظراته تخليج دكليله ماكو شي ماحبه بيك بس كلت لا خل احجي الي بكلبي كتله... عصبيتك وغيرتك وتحكماتك

اسد... زين عصبيتي هسه لو قبل اقوى

غرام... ظليت افكر كتله يمكن قبل

اسد....  انتي كلتيها قبل اقوى يعني اني احاول اسيطر عليها شكد ماكدر علمودج
وغيرتي هاي كلشي يتغير بيه الا هاي ماكدر اسيطر عليها واعتقد مشكله الصارت لان انت هم غرتي عليه وعبالج عندي شي

وتحكماتي بشنو متحكم   تلبسين وتكشخين بكيفج ولان اعرف انتي مطلعين خارج المعقول
متحكم بكلامج بكعدتج بمشيتج بشنو متحكم بيج فهميني

غرام.... من شافني ظليت ساكته كلي عوفج من هذا الكلام كله بارحه كتيلي اخاف من ردفعلك

غرام .... اي اني اخاف احجيلك اي سالفه صير ويايه اخاف تفهمها غلط وتعصب مني

اسد.... لان انتي ماحجيتي ويايه الا سوالف تعصب

غرام .... اي حتى لو سالفه  تعصب اسمعني لاتخليني اشيل هم شون احجيلك هواي سوالف اتمنى احجيها وياك واسولفها على طبيعتي بدون ما ازينها الك

اسد.... ماشي خل نتفق اتفاق اي شي يصير وياج تجين تحجيه الي اول واحد وتحجيه بدون ماتنقصين حرف منه اني ماريدج تخافين مني لان اني الوحيد الي مستحيل اسوي شي ياذيج اني مو بس اشوفج مرتي اني اشوفج بنتي هم اخاف عليج واتمنى الج احسن شي

غرام.... تمام سكتت شويه بعدين كلت خل افجر القنبله مادام نفتح الحجي
كتله ....اليوم اجه فراس حجه ويايه....يتبع ❤

.........
هذا بارت هديه الكم ياحلوين ولو متاخر بس كملته وكلت انشره لعيونكم