رواية حب جنوني الفصل الحادي وسبعون 71 - بقلم سوزان ليث

غرام.... ظل تليفون يدك بس مجاوبني ظليت لازمه تليفون مالي واهس وضايجه وماعرف شسوي
انتظرت مر شويه وقت ورجعت دكيت هم دكه طويله بس بنهايه يله جاوب
... نعم
.... انت وين
.... اكو شي
.... لا ماكو بس اريد تجي تاخذني للبيت
....ليش
.... شنو ليش اريد ارجع
..... اي رجعي انتي طلعتي انتي ترجعين
.... كدام امي عالاقل تعال مره مريضه وماريد تنقهر
.... العندي كلته
.... تمام يله باي

سديت تليفون منه واني خانكتني العبره احس نزلت نفسي اله ظليت كاعده اباوع على جمال
دخلت عليه رونق اجتي كعدت مقابيلي كلتي ... شبيج
غرام ... هزيت راسي ماكو شي
رونق... وجهج ميكول ماكو صاير شي
غرام .... لا ماكو
رونف.... اذا ضايجه على الي كاله اسد فاانتي تعرفي لاسد شويه ويهدء ويرجع مثل قبل
غرام.... تعرفين مشاكلنا الي صير اغلبها لان اني اخاف منه
رونق.... حتى اني اشوف هذا الشي انتي هواي تخافين منه مرات سالفه تافه اشوفج تحسبين الف حساب حتى تحجيها اله

غرام.... اني دايما اخاف من رده فعله على اي شي احجيه لان دايما رده فعله ضدي صير
تعرفين انتي وجلال علاقتكم حلو احسكم اصدقاء كلش ابد لتتغيرون

رونق.... ابتسمت الها كتلها جلال كلش متفهم ويحب يناقشني يقنعني لو اقنعه بتفاهم ها مو بزعل وبصوت العالي ودايما رده فعله تكون ايجابيه ميخليه الحق عليه  يكعد يدور حل للمشكله ويايه
اني وياه كلشي نحجي وماخاف منه بالعكس بكل مره احجيله فد موضوع اصور حيعصب مني  يصدمني بتفاهمه ورده فعله الايجابيه

غرام.... اني دايما رده فعله ضدي اني صرت اخاف احجيله يومي العادي الي يصير بالكليه من خوفي لايفهم شي غلط
حتى سوالف تافه مرات صير ويايه ماحجيها لان اكيد حيحجي عليه

رونق... ليش متحجين وياه يغير اسلوبه يبطل اسلوب ترهيب وياج يعني اني وجلال شكد صير مشاكل بس ماوصل مرحله اخاف احجي شي وياه

غرام ... ميفيد هواي حجيت قبل جنت اسمع يكلون التفاهم اهم من الحب جنت اكول شنو التفاهم
اهم شي الحب بس طلع حجيهم صدك اهم شي تفاهم

رونق....من شفت عيونها ملت دموع متت قهر عليه كتلها ... لا ضوجين حبيبتي اعرف مهمومه ومنا امي مريض بس هسه انتي متعلمتي عليه

غرام .... كرهت نفسي هلكد ماخاف منه اني ممرتاحه طول الوقت افكر شون احجيله اي سالفه صير ويايه واشيل هم اذا صار عندي فد موضوع معين
تصورين كلام امي صدك مجان لازم ازوج اسد

رونق.... كافي تبجين مخبله اسد يموت عليج صح هو عصبي شويه وميتفاهم شويتين بس كلبه طيب بس انتي اكعدي احجي وياه يعني هو المفروض  هو الوحيد الي متخافين منه وتحجيله كلشي مو باي سالفه تحسبين حسابها شون تحجيها اله غير هو الي يحتويج

غرام .... ظليت ساكته

رونق... تعالي نزلي جوه لاتبقين هنا وحدج
غرام ... لا حنام راسي يوجعني
رونق... ماشي حاخذ جمال حتى تنامين

غرام ... رونق نزلت بقيت كاعده نفس كعدتي وصافنه مر وقت واني نفس كعدتي كل الي اسوي بس ارمش
لزمت تليفوني كعدت اكتب رساله وطويل لاسد جنت مخنوكه اريد اطلع الي بكلبي كتبته
💬 انت دايما دكول اني اصير الج  الاب وصديق وسند والامان
بس تعرف انت عمرك مصرت صديق الي
الصديق من يوكع بمشكله يركض على اقرب صديق اله حتى يلكاله حل لان يعرف ميعتب عليه ويكله  ليش سويت هيج
ولا صرت امان الي لان شون انت الامان واني دايما خايفه منك وصلت مرحله حتى اموري التافه الي صير ويايه ماحجيها الك
صرت احس اني ماعندي حقوق بالحياه بس اسوي الي انت تريده
واذا تسئلني ليش محاجيه هذا الكلام قبل جوابي يكون لان اخاف منك

دزيتها وانتظرت يشوفها حسيت براحه من حجيت الي بداخلي بعدها سويت تليفون صامت وخليته عالكومدي لان جنت مرحله شيصير خل يصير
مر وقت بربع ساعه سمعت صوت الباب نفتح ورونق صيح غرام غرام بصوت هادء بس مجان الي واهس ارد عليها اظاهرت بنوم
سمعتها كالت  لكيتها نايمه من تكعد اكلها تخابرك
عرفت جانت تحجي بتليفون يمكن اسد اتصل عليه
سحبت تليفون شفت مكالمات هواي من اسد رجعت تليفون ورجعت غمضت عيوني احاول انام  مر وقت حسيت رونق خلت جمال بصفي نايم
بعدها ماحسيت الا صبح
كعدت شبعانه نوب شفت جمال ورونق نايمين كمت غسلت ونزلت جوه جانت ساعه بتسعه خليت الجاي عالنار  وحضرت ريوك جنت جوعانه  كعدت انتظر يكعدون سمعت صوت رونق تنزل درج دخل للمطبخ
باوعت عليه كالت ... شهالنشاط

غرام... ابتسمت الها كتله يله شوفي امي كعدت حتى ناكل راحت رونق ورجعت كال هسه تجي امي
كعدت يمي كالت ... بارحه اسد خابر بالليل راد يحجي وياج بس اني صعدت لكيتج نايمه

غرام .... هزيت راسي ب اي
رونق... عاد كتله لكيتها نايمه .. صاير شي
غرام ... ماكو شي
رونق... هو جان هادء محسيته عصبي
غرام .... ظليت ساكته لان امي دخلت علينا تريكنا وجان امي ورونق يسولفون  جنت مستمعه مجنت اشاركهم الحديث مالي واهس
كملنا ريوك وصعدت على جمال لكيته كاعده غسلتله وبدلتله سمعت صوت جرس الباب ندك شلت جمال ورحت اباوع من شباك لكيت اسد وطلعت رونق فتحتله الباب ودخل
ظليت على وكفتي اتفرج عالشارع شويه ودخلت رونق
كالت... غرام اسد جوه كلي اصيحج

غرام ... التافيت على رونق كتلها اوكي نزلت جوه ودخلت للصاله جان هو وامي يسولفون من دخلت اثنينهم صار انظارهم الي
سمعت امي كالت ... تعالي حبيبتي كعدي ليش واكفه هناك
دخلت رحت كعدت يم امي وكلشي محجيت امي اخذت جمال من ايدي كلتلي ... غرام اسد اجه ياخذج للبيت خلص يابنتي رجعي وابدي صفحه جديده عدكم طفل لازم تفكرون بي ها ماما شكلتي

غرام. .... باوعت على امي حسيتها بس تريد تحل المشكله حتى مباوعت على اسد هزيت راسي ب اي
شفت امي ابتسمت كالت يله كومي حضري غراضج حتى ترجعين وياه وندارت على اسد كلتله وانت هم اسد بعد ماوصيك عليه اني كمت حتى منتظرت اسمع جوابه

صعدت فوك جنت اتحرك بدون اي مشاعر لا فرحانه ولا زعلانه هاهيه ارجع المهم امي ترتاح

رونق باوعت عليه شافتني جبت جنطه كالت حترجعين

غرام... اي
رونق... صدك والله صالحتوا
غرام .... اي
رونق .... شو ممبين شكو ترجعين اذا ممصالحه وياه
غرام .... لعد انتظر امي يصير شي وياها من ورايه عندي عيون واشوفها شون شايه همي خلص ارجع وخلص
رونق.... غرام اني ماراح حرضج على اسد بس لازم تحجين وياه
غرام.... ماريد احجي شي بعد جديات ماريد اني حرجع لخاطر امي وبس

اجتي رونق تعدل ويايه غراضي بعدها لابست عباتي وشالي ونزلت خليت غراضي يم باب المطبخ ورجع وكفت يم صاله اسد باوع عليه وكف كال لامي ... يله عمه روح

ام غرام ... الله وياكم بعد ماوصيك عليها لاتخلي بالي يمها

اسد... بعيوني عمه لاتشغلين بالج بينا
غرام ... رحت يم امي اخذ جمال امي حجت ويايه بهدوء يمه على كيفج انتي هم وياه وديري بالج عليه
هزيت راسي اي
اخذت جمال ومشيت وره اسد الي جان شايل غراضنا طلعنا من بيتنا ورحنا لبيت عمي فتحلي باب ودخلت
دخلت للمطبخ لكيت الكل كاعد والكل مبين على وجههم الصدمه سلمت عليهم والكل رد السلام
ومبين كلهم فرحانين بجيتي
ايمان بسرعه جتي اخذت جمال من ايدي
عمي كلي .... نورتي بيتج بعد ماقبل طلعين وتعوفين البيت

غرام... ابتسمت اله كتله ... اي عمو

شفت اسد اخذ غراضنا وصعد فوك اني ظليت واكفه اسولف ويه عمتي شفته نزل كعد يمهم اني صعدت للغرفه نزعت عباتي وصرت ارتب بغراضي بعدها رتبت الغرفه
بدلت ملابسي لبست كلابيه وفتحت شعري وعدلته خليت شويه مكياج خفيف
نزلت جوه اول مادخلت للصاله عمتي شهكت شهكه خلت الكل يندار يباع عليه
كالت... هاي شمسويه بشعرج
غرام.... ابتسمت الها كتله تغيير
ايمان .... كلش حلو وشكد لايكلج احلى  من شعر طويل
غرام.... دزيتلها بوسه لايمان باوعت شفت اسد يحجي ويه عمي اني رحت كعدت يم ايمان اصير مقابيل اسد
شفت ايمان تقربت مني حيل كالت ... تعرفين حسيت بارحه بالليل انت حترجعين

غرام... شون
ايمان .... سمعت اسد بالليل مشغل اغاني وكلها مال اشتياق كلت هذا للصبح ميتحمل حيروح يرجع غرام

غرام.... ههههه عود رومانسي  اكلج شخبار قصي بعد يدزلج شغلات
ايمان... لا من ذاك اليوم بعد مدز
غرام.... هههههه نداريت فجأه شفت اسد يباع عليه بس من باوعت عليه بسرعه ندار
رجعت اسولف ويه ايمان  وبعدها رحنا نساعد عمتي بالغده
وجنت اسوي زلاطه شفت فهد اجه جر كرسي وكعد يمي
يباع عليه كتله خير اكو شي بوجهي

فهد.... شبيج شو مو على بعضج
غرام .... مابيه شي
فهد...حنسوي كعده مال مهر امي كلتلج
غرام.... صدك لا مكالت شوكت
فهد.... ننتظر جدي وجده حكمه يرجعون ونحدد
غرام.... من كصيت شعري حسوي حفله
فهد... منو شار عليج وكلج كصيه يازمال
غرام .... محد شار عليه اني عجبني وكصيته
فهد.... خاف جنا نكول اسد مبين جبير يمج هسه اصلا صار ابوج على هالكصه
غرام..... ليش
فهد.... طالعه صغرج جنج سادس ابتدائي
غرام..... هههههههه والله انت محد يخلص من لسانك
جنا نسولف اجه جلال هم جر كرسي وكعد يمنا
وصرنا نسولف ثلاثتنا ونضحك من اكعد يم جلال وفهد سوه دموعي صير تنزل من ضحك

صار الغده وكعدنا ناكل عادي وراها لملمنا المطبخ اني وايمان
من كملنا رحت كعدت بصاله جان الكل كاعد
شفت فهد بحضنه جمال ويحير شون يلعب وياه
رحت كعدت يمه كتله جيبه لابني خبلته

فهد... ديله هاج من جماله لو اشكر شسوين
غرام... يخبل احلا منك
فهد... خل يجي ابني شوفي شونه الا يكسر ابنج
غرام.... خل تجي امه بالبدايه بعدين عود يجي ابنك

التافيت لكيت اسد ماكو بصاله يمكن صاعد اني شويه وصعدت حتى انوم جمال
فتحت الغرفه لكيت اسد مدد وايده على عيونه
اني دخلت ورحت بدلت لجمال وظليت احاول انوم بي شويه ونام
ارحت طلعت ملازمي وكعدت اقره وكلسع ارفع راسي اباوع عليه من رجعت لا اني حجيت وياه ولا هو حجه ويايه
ظليت اقره هو شويه وتليفونه دك بس بسرعه حس عليه يمكن جان منايم بس هيج مدد اني سويت نفسي مركزه وممنتبه عليه بس اذاني يمه رفعه تليفون جان يحجي ويه واحد بس اسد كله لا مالي خلك ماجي
وبعدين سمعته يكول وين بالمزرعه مادري منا لليل اشوف يله مع السلامه

اني بس كال مزرعه كلت اهووو هذا صديقه اركان اكيد مسويله كعد ويجوز حيجيب بنات شمدريني اني شيسون هناك
اعرف اسد ميسوي شي بس اني اموت من هذا صديقه  ابو البنات

سد التليفون ولتاف باوع عليه اني جنت اباوع عليه من طرف عيني رد خله ايده على عينه ونام
اني غير ارجع اقره لا ظليت اكول هسه يروح للمزرعه وهسه عناد بيه يبقى يمه
اني كمت كلت ولا اخليك تطلع اليوم رحت اخذت ملابسي ورحت سبحت كملت ورجعت للغرفه لكيت جمال كاعد وجايبه يمه عالجربايه يلعب وياه
اني رحت للكنتور طلعت دشادشه عندي قصير وصير ربع ردن فتحت الكنتور وبدلت هو من افتح الكنتور بعد ميكدر يشوف شي وتقصدت افتح الكنتور حتى اضوجه
بحيث بس سديت الكنتور انتبهت عليه جان يباع بااتجاهي بس بسرعه سوه نفسه يلعب ويه جمال اني
اني بكلبي اكول عساس ماشفتك تريد تباع
رواها رحت وكفت يم المرايه امشط شعري وخرت الخاولي من على شعر سمعته تنهد  يمكن علمود شعري وخاصه من يتبلل يصير اقصر
اني مشطت شعري وراها طلعت اسشور بي اني اباوع عليه من المرايه يباع عليه
كلت اليوم حلعب بيك طوبه اني دكلي انتي طلعتي انتي ترجعين بسيطه

كملت شعري وكعدت اعدل بي وراها جبت المرطب صرت ارطب بيدي ورجلي عبالك اصور اعلان
اني واسوي نفسي عود مشغوله والمحه يباع عليه
كملت جبت عطر رشيت  وكعدت اخلي مكياج خفيف كملت جبت ملازم ورحت كعدت عالجربايه من الجهه الثانيه  اقره والعب بشعري اعرفه يباع عليه ماظلت حركه دلع ماسويتها

هو ابد ميشرب جكاير بالغرفه من يوم الي جبت جمال
شفته راح فتح شباك وكف يمه يدخن
جمال بس يشوف ملازمي يجي عليه يريد يلزمهن اني لزمت جمال وصرت العب وياه وجمال من نوب الي فطير بس يضحك ويضحك بصوت ظليت اخلي الملزمه على وجهي واكله ماكو ماما واسويله هياني وهو يخرب ضحك
ظليت العب وياه رفعت راسي شفته صافن علينه
اني عدلت نفسي وكتله يله كافي خل تقرا ماما شويه
هو شفته سد الشباك واجه كعد سحب جمال وكعد يلعب وياه بس جمال ميضحك ويه اسد
اسد يكله انت تعرف ويامن تضحك عود يسمعني
اني سويت نفسي ممنتبه ومركزه بالقرايه واني جمله ماقريت
تالي هو اخذ جمال وطلعوا من الغرفه اني كلت همزين طلعوا اريد اقره شويه
قريت شويه وبعدها رحت اريد اكوي ملابسي لباجر عندي دوام جنت اكوي جان يدخل اسد  بس جمال مو وياه
راح كعد عالجربايه اني مهتميت لان اريد اكمل كوي شفته شغل اغنيه بتليفون 
ممنتبه يعني عبالي هو عاجبه يسمع بس من سمعتها للاغنيه عرفت الي
جانت اغنيه هيثم يوسف (زعلان اراضيك  بعيوني اخليك برموشي اغطيك شوف الحنيه)

اني سمعتها مدري صار بيه تاثرت  كمت ماعرف اكوي خاصه اسد ماعده هاي سوالف مال اغاني وهاي شغلات
اني ظليت اكوي واسمع لكلمات الاغنيه كملت كوي وعدلت ملابسي
ندكت الباب هو بسرعه وقف الاغاني وكال ادخل
نفتحت الباب ودخلت نبأ والضحكه مالتها من الاذن للاذن كالت ... هلو شونكم

اسد.... هاولج كرعه شجابج
نبأ.... محمد كال حطلع كتله دوديني لاهلي وبالليل ارجع

غرام....التافت عليه نبأ كالت ... ها ياحلو شطالع بالشعر القصير تموتين

ردت اروح ابوسه عالكلام الحلو هذا كتلها ... عيونج الحلو حبيبتي
اجتي باستني كالت ولج غرام كم مره كتلج انطيني اسم عطرج هذا شكد احبه
كتلها عود انطيج اسمه تدللين
اسد عافنه ونزل بس نزل اسد كلتلي ها ولج شو رجعتي بارحه رونق كلتلي اجه اسد اخذها وهي قبلت ورجعت

غرام.... اي لعد شسوي قابل نظل هيج
نبأ... وشنو صالحتوا يعني
غرام.... اي
نبأ.... اي زين حبيبتي الله لا يجيب المشاكل بعد بينكم
غرام ... الله يسمع منج .. تعالي كعدي
نبأ.... لا تعالي ننزل جوه لان بس سلمت عليهم وصعدتلج

غرام ... خل ابدل وانزل وراج ... نزلت نبأ اني بدلت ملابسي  لابست فستان مال بيت صيفي ورشيت عطر ونزلت
جان الكل كاعد بصاله اول مادخل اسد باوع عليه رحت كعدت بصف نبأ
جانوا الكل يسولف بس اني جنت اراسل صديقتي ساره نحجي عالامتحان وهي جانت تحجي بموضوع فاني جنت ممبتسمه واراسلها
نبأ تقربت عليه كالت اسد صافن عليج صفنه
اني بدون مباوع عليه كتلها صدك بعده صافن كالت اوكفي فتحت كاميره تليفون عليه كالت باعي
عود نبأ دكول باعي هذا الي اريد اشتريه حتى لاتنكشف كدام اسد
اني باوعت على نبأ كتلها يمه شون افكار منو اخوج ليش اتفاجئ
كتلها لانبأ  هذا اني اشتريه وضلينا نضحك اني وياها وهو جنا نباع عليه من كاميره تليفون يباع علينةوخازرنه واني على ضحك نبأ اضحك بالزايد
تالي سدينه الكاميره للنكشف
ظلينا كاعدين شويه سوالف عاد داسئل عمتي شسوي عشه سمعت اسد يكلها لاسون اني حوصي من بره
فهد من سمع كله ابو جمال خوبن اني من شفتوني سويت رجيم ماظل  شي مسويتوا

اسد... يله اكل بس اليوم وبلش من باجر
جلال.... هو يوميه ياكل ويكول لاباجر لازم التزم
فهد.... اي عمي انت شكد تاكل ميطلع كرش يطلعله عضله
جلال... اذا انت تاكل الاخضر واليابس اكل شغلات الي تفيدك والباقي عوفه
غرام.... انت لو ملتزم بنادي جان ضعفت اسرع
فهد... حقج مشايفه بنادي شون اكو مدرب يكرهج بنفسج
اسد.... لحالك شكو سوي رجيم هسه من سمنك انت هم من دكلك سوي رجيم كلها سوي خشمج بالاول

غرام.... عزه اسد حجه هيج خلانه كلنه نضحك هي خطيبته صدك خشمها جبير اسد ميكدر ميقصف احد
بحيث فهد ظل ساكت مايعرف شيكول

اجه عمي كال باجر  ابويه وامي حيرجعون مشوفون جلال الابتسامه مالته شون ارسمت على وجهه بحيث بسرعه لزم تليفونه مبين دز لرونق يكللها

شويه واجه العشه جنا نحضر بي دخل اسد علينا هو الحجي الي بس يباع على نبأ يكلها خل نتعشه بره بالحديقه جو حلو عافنا وراح
نبأ باوعت عليه كالت والله ممصالحين خلتني اضحك كتلها اي ممصالحين شتردين هسه

نبأ... اي مو اكول واضح كلش غير تكليلي يااختي حتى نخلي يجي هو الي يصالح

غرام.... تحجي وتغمز كتلها داشتغل على هذا الشي
نبأ... عفيه تربيتي
غرام... بله اكو وحده تحرك بمرت اخوها على اخوها
نبأ.... اني مع المراه وضد الرجل ماعدا محمدنا
غرام .... ههههههه شونه وياج
نبأ.... زين شون شاد ويايه هالايام موتني
غرام...ليش
نبأ... مو اني مجنت اداوم بالاسبوع مره اداوم لو ماداوم بس شفت اسمي بقائمه الاذار صراحه خفت وكمت ادام فصار تقريبا اسبوعين هيج اني ملتزمه بدوام
قبل كم يوم كلي شو دداومين شعجب لان هو جان فاقد الامل اكمل
ابتليت على عمري كتله شفت دوام يسوى ولج لزمها عليه تعالي شنو تقصدين يسوى وصار يوميه يظل واكف فوك راسي يشوف لبسي ومكياجي يظل يدردم عليه

غرام ... واذا كتيله يسوى شنو يعني
نبأ... اني ادري عباله لان اكو حلوين بالكليه جاي اداوم اي نعم اني احب الحلوين بس هاي قبل هسه زوجت غير

غرام.... ههههههههه والله عدج سوالف
نبأ ... والله ذاك اليوم يكلي شكد عارف بنات بس ماكو بنيه شلعت كلبي غيرج
غرام..... ههههههه من هذا زوجج لان شلعتي كلبي
نبأ... ههههه اكلج خل نخابر امج ورونق يجون يتعشون ويانه
غرام....وجدي
نبأ.... هسه كلنا كاعدين حروح اكول لاسد حتى يخابر امج

غرام ... راحت نبأ واني ايمان طلعنا نحضر الكعده بره اجتي نبأ كالت اسد حيخابر امج يكللها
اني بكلبي كلت خاف عباله اني دزيت نبأ حتى يجون اهلي

حضرنا الكعده والاكل كله نقلنا بره وصارت كعده تخبل وشويه واجتي امي ورونق
رزنق تبوس بيه دكلي ...مدري اسد شكال لامي وخلاها توافق نجي الا جانت قافله متقبل نجي.

غرام.... والله مادري يله المهم قبلت كعدنا كلنا جان جلال فوك ميدري رونق جتي تتعشه ويانه اخذت رونق  جوه والكل جان بره كتلها صعدي صيح جلال هي كيفت صعدت ركض
.............
رونق...... وره مراحت غرام البيت ضوجه صار خاصه جمال مسوي اجواء من يجي
حتى من تغدينا اني وامي وحدنا امي كالت جمال جان مسوي صوت بالبيت
وره الغده امي ورى الغده دخلت سبحت وجنت ضايجه ماكو شي اسوي كعدت شسورت شعري وكعدت العب بالمكياج 
خابرتني نبأ كالت حتجي لاهلها بس كتلها تعالي انتي مو تعرفين جدي مسوي منع تجوال الي ولجلال

العصر جنت اراسل ويه جلال  كلي نبأ هنا والكعده ناقصتج فحس عليه اني ضايجه وخاصه لان اني ونبا كلش قريبات لبعض يعني متجي الا اني ابقى يمهم لحد متروح
شفته يدكلي مكالمه فديو استغرب هو كلش قليل يدكلي فديوم همزين جنت مسشوره فتحت الخط فموجهه الكامره على نبأ وجانت غرام كاعده يمها يسولفون واي واحد يحجي يوجهه الكامره عليه.
حسيت اني كاعده وياهم شويه و سديته لان امي صاحتني نزلت رادت اسويلها جاي رحت
رحت اسوي جاي اجتني رساله من جلال كاتب جدي باجر حيرجع
ماعرف افرح مدي اتوتر واني وجلال من راح جدي ابد ما قررنا شنسوي حتى مجبنا هذا الموضوع ابد
كتبتله اي واخيرا

رحت وديت لامي الجاي وكعدت يمها شويه وتليفونها دك كالت هذا اسد  حجت وياه ومادري جان ديقنعها بشي وهي رافضه رفض قطعي بعدين شو مدري شكللها وكلتله يله حنجي اني شنو بس اريد سده حتى اسمع شكو
سدته كالت هذا اسد كال تعالو يمنا نتعشا سوه اني

اني خوما ابين فرحانه كدامها كتلها ...وجدي خاف يدري

ام غرام... مو اني هم ماقبلت بس  كلت بالكي غرام شوفنا وتفرح كلنا منجمعين

رونق.... اني كتلها يا خطيه واني بس اريد اكوم ابدل حتى روح 😂

ام غرام...يله روحي بدلي خل روح عيب ينتظرونا

رونق... كمت وكفت حتى اروح ابدل امي
كالت.... ولج رونق انتي تدرين حروح
رونق ...لا والله مادري
ام غرام ... لعد شكو مكيجه ومسويه شعرج
رونق... والله هيج جنت ضايجه وسويت شعري ومكيجت يله حروح ابدل صعدت فوك ركض
لبست فستان لونه مائي وبي ورد وردي شلت شعري منا ومنا عدلت مكياجي وتعطرت لبست العبايه وشالي  ونزلت امي جانت لابسه تنتظرني  رحنا لبيت عمي جان مسوين كعده بره اباوع الكل موجود ماعدا جلال كلت خاف خلوا يطلع حتى لنشاوف معقوله وصلوا هيج مرحله ويانه
نوب حتى اني ماكلتله حنجي يمكم مالحكت احجي وياه
سلمنا وكعدنا شفت غرام صاحتني دخلت عبالي تريد اساعدها بس كلتلي صعدي صيح جلال حتى ينزل
اني عرفت من غرام هو مايدري نزعت العبايه وشالي بالمطبخ وصعدتله دكيت الباب بس مجاوب بس سمعت صيح الله واكبر
فتحت الباب لكيته يصلي ظليت وواكفه يم الباب كمل صلاه وكام التاف شافني واكفه نصدم بيه بسرعه ابتسم كلي ... ولج جابج
رونق.... متريدني اجي ترى جايه بيت عمي مو عليك
جلال .... ها بيت عمج
رونق... لزم ايدي سحبني عليه صرت قريبه عليه كتله اسد خابر امي كلها نجي نتعشى سوه
جلال...احسن شي سواه اسد بحياته
رونق.... يله تعال ينتظروك جوه
جلال... خل ينتظرون شويه
رونق.... شو طالعه عينك انت
جلال... شنسوي  الحصار بهذل احوالنا
رونق.... هههههههه جان يتقرب يريد يبوسني جان اسمع غرام صيح يله تعالوا اني بسرعه عفته ونزلت ركض لكيت غرام واكف يم درج عصبيه من شافتني كالت .... ادري وين صرتوا

رونق... جان يصلي هسه حيجي طلعت بره رحت كعدت يم نبأ شويه واجه جلال سلم واجه يريد يكعد يمي امي تباع على جلال بس محجت شي
فهد صاح جلال شكو كاعد يم رونق مو جدي ميقبل

رونق.... اباوع على فهد شون هسه اشمر كلاص الماي عليه  بس اسد باوع على فهد كله بلا لغوى زايده

باوعت على فهد اهزله حواجبي واضحك عليه
كعدنا كلنا ناكل وضحك وسوالف

............... ......
غرام..... كعدنا ناكل وكعده حلوه جان جمال بحضني واني من يكعد يحضني ماكدر اكل احير بي
جان الكل يسولف وملتهي ماشوف الا جمال انسحب من حضني باوعت اسد كعده بحضنه عرف اني ماكدر اكل وهو بحضني كعدت اكل جنت اشرب عصير وجنت لازمته واسولف ويه نبأ ورونق ماشوف الا العصير نسحب منيه التافيت اشوف من اخذ عصيري لكيته اسد يشرب  منه باوع عليه رافعلي حاجبه عود شكو  اني عفته ورجعت اسولف ويه البنات ..... يتبع ❤️

❤️💚💜💚💜❤️💚💜❤️💚💜❤️
حبايب الحلوين بارت طويل من هسه الي يكول قصير 🔪 بهاي ترى 😂😂😂😂😂

يله حبايب قراءة ممتعه

كم واحد متابعني بالانستا يكتب خل اشوفكم 🤔

سوزان ليث🥰