رواية حب جنوني الفصل السادس 6 - بقلم سوزان ليث

دخل اسد وبيده علاليك

رونق ... هلو عمو شونك
اسد... هلو روقه
غرام ... هلو عمو
اسد... هلا هلا تعالي هاج ذني دخليهن جوه
ام غرام... ليش جايب عشه جان سوينا احنا
اسد.... لا مو عاجبني كباب كلت ناكله سوه

غرام .... اخذنا العشه ودخلنا للمطبخ نحضره  اني ورونق
رونق....  شبيج كلبتي خلقتج من اجه
غرام.... هسه يرزلني لان بارحه خليته ينتظر
رونق ... لا مشوفي جان يضحك تلكي نسى
غرام... حصعد ابدل وانام
رونق ... محتتعشين
غرام.... لا ماشتهي
رونق.... دخيلك ربي شكد جبانه
غرام...  عفته وصعدت فوك بدلت وغسلت ومدت

اسد... اجتي رونق جايبه العشه وكعدنا ناكل كتلها وين غرام
رونق... متريد صعدت تنام
اسد... شتنام اجيت علمودها حتى العشه جبته لان تحبه طلعت تليفون دزيتلها مسج 💬 تعالي تعشي

غرام... شفت المسج كلت ماجاوبه بس هذا لوتي يعرفني مانام بهالسرعه جاوبته💬 ماشتهي

اسد...💬 حتجين لو اصعدلج

غرام... كمت عدلت نفسي جنت لابسه بجامه لونها سمائي وشعري شايلته كبايه نزلت شفتهم كاعدين يتعشون

رونق... ها شو نزلتي مو كلتي حنام

غرام... باوعت على اسد كتلها جعت  وكعت اكل بس طول مااني اكل اسد بس يباع عليه بكلبي كلت والله متحلفلي

اسد... مداكدر اسيطر على نفسي نظراتي الها دتفضحني كلسع اصفن عليها وارد انتبه على نفسي كافي شدسوي بس بداخلي شي مداكدر اسيطر عليه

غرام... تعشينا وكملنا فجنت كاعده امي ورونق راحو يبدلون ملابسهم اني ظليت كاعده والعب بتليفون عساس التهي

اسد.... تعالي

غرام... رفعت راسي شفت اسد ياشرلي بيده تعالي
لا اله الا الله كمت وكفت كباله كتله والله والله نسيت

اسد... شنسيتي
غرام... نسيت انت دتنتظرنا البارحه
اسد... منو كلج اني ضايج علمود البارحه
غرام... تنفست كتله يعني مضايج
اسد..... لا
غرام.... ابتسمت
اسد.... مدري ليش هيج تخاف مني الي يشوفها يكول يوميا اصبحه بكتله وامسيها بكتله... كتلها نطيني رقم هاله

غرام.... ليش
اسد.... رفعت راسي عليها بمعنى شنو ليش
غرام... لا يعني شتريد منها
اسد.... محمد يريد رقمها
غرام ... شيسوي بي
اسد... باوعت عليها كتلها يعني متعرفين
غرام.... ابتسمت كتله لا اعرف بس خاف متقبل انطيكياه
اسد... دنطينياه محياكلها
غرام.... نطيته الرقم كلي لدكولين لاحد على هالموضوع

اسد... رجعت للبيت دزيت رقم هاله برساله لمحمد كتله هذا رقمها

محمد... بس شفت رقم دكيت عليها هي جاوبت اني استغربت شون جاوب رقم غريب

هاله... الو
محمد.... شونج
هاله... زينه انت شونك
محمد .... عرفتيني منو
هاله... اي محمد
محمد... هههههه زين حافظه صوتي  اني كلت محجاوبين لان رقم غريب
هاله... لا مو غرام كلتلي انطيت رقمج لامحمد
محمد... خوما ضجتي لان اخذت رقمج
هاله... لا
محمد... ماتحمل اكثر بعد والله اني احبج ورايدج الي صيرين
هاله.... محمد بس اني هسه ممستعده وعندي دراستي
محمد... بس ننخطب عالاقل اضمن صرتي الي
هاله.... مادري
محمد... لدكوليلي متفاجئه بكلامي ترى ظلت عيوني تحجي بس شوفج
هاله.... هههه
محمد... اروح فدوه لهالضحكه

غرام ... عده اسابيع على زواج اسعد ابن عمي فبيوم اجتي مرت عمي ام اسعد لامي عبالنا زياره عاديه بعدين عرفت مريه بحنه اسعد شايفتني وسائله عليه وتريد تخطبني لابنها وابنها شايفني من راجعه من المدرسه وعاجبته المهم امي كلتلها والله مامفكره ازوج غرام بعدها صغيره واريدها تكمل
عمتي كلتلها هو هم يريدها تكمل وامه دكول وين متريد تدرس نخليها هاي اول بنيه اني وابني نتفق عليها وريدها اثنينا
امي كلتلها والله ماعرف خليني افكر هاي سوالف يرادلها تفكير واسئل جدها وعمامها تعرفين الاصول

امي فاتحتني بالموضوع اني رفضت وكتلها اني مازوج اريد اكمل بعدين امي كعدت ويه ام الولد
وظلت ام الولد دكلها شتريد انسوي بس تصير النا دراسه تكمل بيت الها وحد تشتغل وره التخرج قابلين جانو كلش مجلبين بينا
امي قتنعت وحاجتني
على اني مدايمه الكم انتو بنات وماعدكم اخ واب ومن هالسوالف وبعدين كالت خل انطي خبر لجدج وفعلا جم يوم وراحت كلتله لجدي
جدي سائل عالولد وطلعو خوش ناس والكل يعرفهم وحالتهم زينه والولد متخرج وهسه لازم شغل ابوه  والكل موافق عليه كل هالحجي والاحداث واسد ميدري بسالفه لان جان اسبوعين منازل عده حال انذار وباقي بدوام
اني بالبدايه جنت رافضه هالشي بعدين هالكد ماامي حجت قبلت
امي كالت بقى بس اسد من يرجع نكله

اسد... وره عرس اسعد التحقت لان عدنا حاله انذار وهوسه بدوام حتى مكالماتي كلش قليله كل يومين ادك اسئل على الاهل وهاهيه بيوم الي نزلت للبيت جنت منتهي تعبان وحالتي حاله يادوب سبحت واكلت لكمه ونمت من ساعه 11 لل5 يله حسيت جنت تعبان كلش غسلت ونزلت جوه امي كعدت تكشرلي فواكه وتنطيني
فكلتلي مسمعت اخر خبر

اسد ... شنو
الحجيه ... مو غرام جاييها خطابه وجدك وافق
اسد.... جنت داكل اختنكت ويه حجايتها 
الحجيه ... يمه اسم الله عليك هاك اشرب ماي
اسد... شنو خطابه شدتحجين  ماعرف شصار بيه بس احس نفسي كمت ارجف ماعرف خوف غرام حتروح مني لو عصبيه لان محد اخذ رائيه عفتها لامي وطلعت على بيت عمي جمال دكيت الباب طلعت رونق فتحتلي

رونق... هلو عم
اسد... وينها عمتي
رونق... يمه شبي هذا عصبي كتله جو بالمطبخ
اسد... طبيت كبل حتى ماحمحمت ولادكيت الباب
ام غرام... هلا حمدلله عالسلامه
اسد... شنو جايين خطابه على غرام
ام غرام... ياالله درد السلام  دتعال اكعد خل احجيلك
اسد... كعدت واول حجايه كتلها مموافق اني
ام غرام... زين شنو سبب جدك وعمامك وافقو
اسد... عمتي من يوم الجتي غرام للدنيا شكتيلي تذكرين
ام غرام... والله ضحكتني شون ماذكر
اسد... اي خلص كتيلي غرام مالتك وانت تحميها ومن صغيره لحد هسه اني مقصر وياها
ام غرام... لا حشاك من القصور بس ترى البنات اول تالي كل وحده تروح لبيت رجلها ومادام القسمه زينه ليش نوكف بوجهه
اسد.... خرب عمتي لتخليني احجي واطلع لساني وتعرفيني 
ام غرام... يعني شون شكول لجدك
اسد... معليج اني احجي وياه  غرام مالها زواج بهذا عمرها وبعدين وين شافها حتى نعجب بيها
ام غرام... هي امه شافتها بحنه اسعد وهو شايفها من راجعه من المدرسه
اسد.... احس ضغط علك كتلها وهي موافقه

ام غرام ... ليش ماتقبل صدك جذب
اسد.... كتلها ماشي عفتها وطلعت رحت كبل لبيت جدي
نزلت طبيت جانت بس جده كاعده اول مشافتني

كلتلي ... هلا هلا حبيب
رحت بستها من راسها وكعدت يمها كتلها وين جدي
جده... جدك عده شغله ويه عمك راحو عليها  شمالك انت
اسد... باوعت عليها كتلها شون جدي يوافق  على الي جاي الغرام
جده... ها ولك جم مره كتلك اخطبها الك وانت ماتحجي شوف اجه واحد اخذها عالجاهز
اسد... جده لا تخبليني غرام وينها وين زواج شعرفها هي شنو الزواج  المسؤوليه
جده... تعرف كلشي بس انت نايم ماتدري بشي
اسد... والله لو اعرف انهي عليها ولا اخليها تزوج
جده.... باع وليدي من اجتي مرت عمك كالت لجدك اني كلتله البنيه لاسد شون تنطيها لغيره
بس جدك كلي هو محاجي بيها ومنوكف قسمتها بس اني كتله من يجي اسئله شوف يريدها لو لا

اسد... ظليت امسح وجهي واستغفر الله كتلها جده دخيل ربج شون اخذها وهي صيحلي عمو شدكولين انتي وهي معتبرتني مثل اخوها جبير ترجف اذا وكفت يمي
جده... ماتعرف تصرف انت  خابرلي عمتك كلها خل ادزلي
غرام
اسد... شسوين بيها
جده .... جا غير احجي وياها وافهمها
اسد.... اويلي يابه شتحجين وياها
جده... لزمت عوجيتها وضربت لاسد ولك لا طلعني من طوري شكو لعد جاي هداده علينا اذا ماتريدها
اسد... بعدها صغيره مو مال زواج
جده... يعني تريدها انت لو مالك رغبه بيها وشايفها مثل خواتك
اسد.... ظليت ساكت
جده... اعرف تريدها انت ملعون اعرفك من عيونك من شوفها ظل بس تبصبص عليها
اسد.... هههههه والله ضحكتيني جده دتراقبيني

بقيت شويه واجه جدي ونفس الحجي حجيته وجدي بسرعه طبك ويايه رجعت دكيت على مرت عمي كتلها كولي للعريس ماعده عروسه يمنا 
سديته خابرت غرام كتلها تعاليلي اني بالبيت

غرام... صح اني وافقت بس هيج ماجنت قابله كلش عليه يعني من وره حجي امي وشفت جدي وعمامي قبلو اني هم قبلت بس مره جنت كاعده سمعت صوت اسد يحجي بصوت عالي نزلت وكفت عالدرج سمعته مموافق على زواجي بصراحه ماضجت منه ماعرف ليش لان اول مره احسه خايف على مصلحتي ودراستي لليل خابرني كلي تعالي لابست عباتي فوك البجامه ورحت لبيت عمي دخلت سئلت على اسد كلولي بغرفته وخواته يخافن يصعدن كلولي عصبي وميتحجه خافن لايترزلن صعدت دكيت الباب جاوب بصوته الخشن منوو كتله اني صاح تعالي
دخلت شفته مدد عالجربايه اول مشافني كام كعد كلي تعالي رحت وكفت كباله هو ظل يباع عليه من فوك ليجوه بنظرات مثل واحد معاجبه الشخص المقابيله

اسد... وين تعرفيه ؟
غرام... منوه
اسد..... الي اجه خطبج
غرام.... ماعرفه
اسد.... يعني وافقتي عليه وانتي متعرفيه ولا شايفته
غرام.... اي
اسد... شون شافج وانت من البيت للمدرسه ومن المدرسه للبيت
غرام ... مادري كالو شايفني من راجعه من المدرسه
اسد... وشون شافج ست غرام وانتي الخط يوكف كبال البيت
غرام ... قبل اسبوعين الفاتن  كظيناها كله روح ونرجع مشي جانت سياره الخط عاطله
اسد.... اي اي  غردي
غرام.... اوووف شبي هذا صدك جذب كتله عمو اسد ترى مامسويه شي غلط
اسد.... لا مامسويه لعد رجعتج بدون خط شسميها
غرام... مارجعت وحدي اني اختي وخواتك ويايه بعدين كومه بنات ماعدهم خط بالمدرسه ويروحن ويرجعن مشي
اسد... عفيه عفيه شون لسان صاير عدج عفيه بغرام
غرام ..... ظليت ساكته لان بعد شويه اكتله كلامات المستفزه وطريقه كلامه الي تحسسج مسويه شي غلط
اسد.... مدرسه بعد ماكو وتكعدين بالبيت... طبعا حجيت هيج لان شفتها ممهتمه وحتى مخايفه مني مثل قبل ردت اخليها ترجع تخاف فكتلها هيج داشوفها شسوي

غرام.... ومنو انت حتى تكعدني بالبيت
اسد... صدمتني صدمه مو طبيعه من حجت هيج بحيث جنت كاعد وكفتلها وهي خافت ورجعت ليوره ... كتلها اني منو غرام

غرام.... اووو شحجيت اني يربي ... بس ماكدر لازم اكمل اي انت مو ابويه ولا عمي ولاجدي ولا اخويه حتى تتدخل بحياتي

اسد... تقربت عليها وهي ترجع ليوره مانكر اكو شي يجذبني الها لسانها الطويل شخصيته الي كل ماتكبر دصير اقوى لزمتها من ايدها ولويتها كتلها غرام هسه اني صرت مو ابوج ولاعمج ولاجدج ولا اخوج

غرام... اذاني من لوه ايدي واني مو مثله هو خشن وجبير اني ناعمه وشويه وايدي تنكسر بيده لا ايراديا من الوجع دفعته حيل وخرته هو ظل مصدوم بيه حتى اني جنت كلش خايفه وماعرف ليش هيج حجيت

اسد.... روحي للمدرسه وكسري كلمتي وشوفي شاسوي

غرام... رحت وكفت يم الباب كتله مو بت ابويه اذا خليت كلمتك تمشي عليه وفتحت الباب وطلعت بس طلعت واني ارجف من الخوف من العصبيه مادري شون حجيت ويه اسد الي الكل يخاف منه واولهم اني مادري بس كلشي ولا دراستي خط احمر وديعاقبني على شي تافه لان رجعت مشي زين مو خواته رجعن مو رونق رجعت ويايه ليش بس اني هيج تصرف ويايه طبعا نزلت شافتني عمتي كالت شبيكم ليش صوتكم عالي كتلها سئلي اسد وعفتها وطلعت رحت البيتنا اول مشافتني امي رحت حضنتها وابجي ظلت دكلي شبيج منو وياج اسد ضوجج كتلها الصار امي مقبلت على تصرفي كلتلي تعرفين اسد مايسويها لان هو اكثر واحد يريدج تكملين جان سايرتيه حجيتيلج جم كلمه وياه حتى يقبل نوب امي خبلتني بزايد كتلها هو منو حتى يدخل بيه امي ظلت ساكته وراها كالت
وشحسوي حداومين وتكسرين كلمته كتلها اداوم كلتلي لسويلي مشاكل اكعدي هو من يشوفج ممداوم يجي من كيفه يكلج داومي اني طبعا مقبلت كلام امي كتلها مسؤوله من اثنين انتي وجدي باجر اروح على جدي اكله بتصرفات اسد وخلي هو يتصرف وياه وانتي ويه منو طابكه تحسسيني هو ابنج مو اني عفته وصعدت فوك

اسد... ظليت مداستوعب هاي غرام هاي الي تستحي سلم عليه هيج تحجي وتعلي صوتها وتكسر كلمتي ظليت رايح جاي بالغرفه لاول مره احس نفسي ماعرف اصرف ظليت الوم نفسي اني السويت بنفسي هيج اني الي خليتها تتماده اني اعلمج ياغرام اذا مارجعت ربيتج من اول وجديد مااسمي اسد

غرام... صعدت لغرفتي واني خايفه من رد فعل اسد تعبت طول هالسنين واني خايفه لاسوي شي كدامه حتى لاترزل كافي كلشي ولا دراستي ظليت افكر شسوي يربي انطيني حل والله تعبت لو ابويه موجود جان ماكدر يتحكم بيه هيج وامي شيكول اسد دكله على امرك وصار كلت ماكو غير جدي اروح احجي وياه واكله هو الي يحجي ويه اسد ويوكفه عن حده تعبت اني

ثاني يوم جان سبت صبح كتلها لامي خل روح لبيت جدي
مقبلت وكالت طول سنين يداري بيج اسد هسه حتروحين دكولين لجدج عليه والله ماخليج اني احجي ويه اسد وافض السالفه
المهم امي خابرت اسد كلتله تعال عندي حجي وياج

اجه اسد واني جنت واكفه عالدرج اسمع شحدكله امي بكلامه التكبر والغرور مسيطر عليه كانما بس هو الملك واحنا الخدم عده

ام غرام .... عمه صدك الي سمعته انت وغرام متصايحين
اسد.... ليش بنتج ماخبرتج
ام غرام ... لا خبرتني بس يااسد انت اكثر واحد يعرف غرام شكد تحب دراستها تجي انت الي طول عمرك تريدها تكمل تجي هسه دكلها ماكو مدرسه

اسد.... والله العندي كلته ودين محمد اذا ماسمعت كلامي لساني مايطخ لسانها واشيل ايدي منها ومالي دخل بعد بشي يخصها

ام غرام... يعني انت لو طخه لواكسر مخه مايصير هيج هي زعطوطه ترى وانت جبير غير انت تحتويها وتعلمها

اسد.... كتلها علمت وحجيت بدال المره الف كل مره اغلس على اخطائها واكول ممتقصده بس كافي هالمره سوتها شغله عناد عيني عينك وداشوف وين تريد توصل عالزعطوطه

غرام .... كاعده عالدرج واسمع حجيه وجنت فايره ردت انزل ادخله احجي الي بكلبي كله بس رونق لا زمتني دكلي مريد مشاكل روحي لجدو كوليله
راح اسد اني نزلت كتلها لامي ها سويتي شفتي شون معاند

ام غرام .... كله من وراج انتي سالفه جانت هالصغرها عياطج عليه هيج سوه من يمتا وجاي تعلين وتعاندين اسد طول عمرج ترجفين منه من شوكت صايره كويه هيج

غرام..... كعدت ابجي واكلها لامي كلكم عليه اني محد الي ابويه وراح وعافني الله ياخذني حتى تخلصون مني امي نقهرت عليه جتي حظنتني كالت لا ياغرام اني امج واني ابوج هيج دكولين عليه كلنا ريدج صيرين احسن وحده بينا انتي تردينه شنو
كتلها اداوم واسد معلي بيه

كلتلي خلص داومي بس تنسيت عدج ابن عم اسمه اسد انت سمعتي حجيه وتعرفين اسد ان كال كلمه مايرجع عليه تردين سويها شغله عناد داومي تردين تكسبين اسد ابقي جم يوم ومن يشوفج سمعتي كلمته هو يجي لحد عندج ويكلج داومي
كتلها وبالكي ماجه كلي تروح عليه دروسي
كالت خلص الي ترديه سوي واني وياج حتى لادكولين انتي طابكه ويه اسد
ثاني يوم صبح بدلت لبس المدرسه واكفه عالمرايه وكلسع اداوم لا اداوم لا اذا اداوم اكسب دراستي ومستقبلي واذا ماداوم اكسب اسد اثنينهم محتاجتهم بس اختنكت من تحكمات اسد ماكو بالاخير قررت ما........ يتبع ❤️

&&&&&&&&
تفاعلكم ويه القصه ودعمكم الها حتى استمر مهم جدا
ونطوني توقعاتكم للبارت الجاي غرام اداوم لو تسمع كلام اسد ❤️