رواية حب جنوني الفصل الرابع وسبعون 74 - بقلم سوزان ليث

غرام.... كعدت مفزوعه عبالي تاخرت عالدوام باوع ساعه ٦
كلت همزين دك المنبه حتى ماذكر اني سويته البارحه
شفت جمال واسد نايمين
رحت غسلت ورجعت حتى ملابس ممحضره للدوام بدلت وكملت رحت يم اسد الي جان حتى هو نايم تحسيه يريد يتعارك
ردت ابوسه بس كلت خاف يحس عليه نزلت جوه لكيت عمتي وايمان رحت كعدت يمهم انتظر الخط عمتي خطيه سوتلي لفه مثل ايمان كالت اكلي شضعفج صايره
بكلبي كلت من يوم الي شفتج انتي وامي دكلولي هالكلمه
عمتي كلتلي البارحه اسد بالليل نزل جمال شكد لعبنا وياه كال امه نايمه

غرام... اي والله بارحه ميقبل ينام تالي اني غفيت مدري شون

عمتي ... اي خطيه كال اسد

غرام.... اجه الخط ورحت للجامعه  دزيت رساله قبل مادخل محاضره لاسد 💬حبيبي الحلو اني حدخل محاضره

اني بالمحاضره اجاني مسج 💬ماشي

غرام ... اني قريت المسج كلت مبين ضايج لان عفته ونمت بارحه بس اجتني ضحكه من يهددني اذا عفته ونمت
من يوم الي جبت جمال واني بالكوه ابقى كاعده الا اذا جان عندي امتحان شي وممكملته اسهر بس من ماعندي شي استغل وقت وانام من وكت وخاصه اسد من يجي اذب جمال عليه
وهو خطيه ميحجي شي واصلا يحاول يعوضني غيابه بدوام من يرجع بمساعدته الي

كملت المحاضره الاولى ودخلت بثانيه وجان عندي بس اثنين نزلت اني وصديقاتي كلنا روح ناكل لان الخط بعد ميجي هسه

بس نزلنا صديقتي كالت .. ولج غرام هذا مو اسد

غرام ... من كالت هذا اسد كلبي نقبض كتلها وينه
اشرتلي عليه جان كاعد كبال النزله مالتنا بس مدنج يلعب بتليفون
اني عبالي صاير شي بحيث بسرعه رحت عليه هو ممنتبه عليه بسرعه كتله جابك هنا

رفع راسه كلي ... جيت اشوفج

غرام ... ظليت اباع عليه كتله شنو مشايفني ... وكف عدل نفسه باوع على صديقاتي سلم عليهن
نوب شكد مجامل كاعد ويعزم عليهن عساس يعرفهن من زمان نوب شون حلو طالع كاسر على ولد الواكفين بالسنتر
بس هنا يستحن سلمن وراحن اني كتله ... يله كملت محاضرات
اسد ... اي تعالي نفتر شويه صار هواي مجاي لجامعتج

غرام.... اني صدكته كتله يله امشي لزم ايدي وظلينا نفتر ونسولف وين مانمشي الكه يباعون عليه  تقريبا بساعه  ظلينا نفتر واماكن مرتين عدناها تالي كتله امشي نطلع تعبت وحاره
قبل منوصل لباب الرئيسي  صار بوجهنا فراس
اني  شفت فراس كلت مستحيل اسد يذكره هو شايفه مره وحده بس صار بوجهنه اسد  لاايراديا ايدي جعصها بيده  باوعت على اسد خازر بفراس بس
فراس باوع علينا وغير اتجاه
اسد ظل يمشي وكانما مشافه  اني محجبت شي وصلنا للسياره و مشينا
اني باوعت عليه باوع عليه كلي شبيج هيج تباعين
كتله ... شعدك جاي اليوم
اسد... كلت اشوف وارجعج اني ميصير
غرام... ها خطيه يشوفني اسد ادري بسوالفك ... من حجيت هيج ضربني على خده عالخفيف كلي ... غير مشتاقلج وانتي عفتيني ونمتي بارحه مكلتي رجلي صار هواي مو يمي اكعد اسولف وياه اضحك وياه اسويله شغله منا منا

غرام .... مادري محسيت والله الا صبح جان كعدتني
اسد... نقهرت عليج شفتج شون نايمه منطاني كلبي
بس ابنج مقصر هو الكعد ويايه

غرام.... هههههه خوش لعد لكيتلك احد يكعد وياك
اسد... ليش هي كل كعده كعده انتي كعدتج ويايه غير
غرام... ابتسمت اله كتله ..... شكد احبك بس بعد ممنوع تجي للكليه... التاف عليه كلي ... مو بكيفج هي ماجي

غرام .... زين احلف بداعت جمال انت جاي للكليه بس شوفني ... من حجيت هيج شفت ابتسامته بس بسرعه عقد حواجبه يظاهر  عود عصب كتله ... لسوي نفسك عصبي .. هو متحمل كام يضحك كلي ... والله منو يكدرلج انتي اي جيت اشوفه شرايد

غرام... عزه رحت عليه؟ اسد شكد عيب هسه هو سوه

ظل ساكت ومنتبه للطريق عود كتله ...اسد احجي رحت عليه والله عيب اذا رحتله

اسد....  خل يولي ماشفته من جنت  وحدي صادفته من اني وياج ااااخ ردت اروح اكسر مناظره الي بوجهه بس كلت خلي هو بس يشوفني يذكر اني شكلتله من اجاج
ذيج المره

غرام.... شكلتله
اسد.... شعليج بالسوالف هاي حبيبتي
غرام.... صار شكد اريد اعرف ومتقبل تحجي الله يعلم شحاجي وياه انت

......
نبأ.... جنت بالدوام دك عليه محمد باوعت عالتليفون  اوف هاي خامس مره يدك عليه يسئل من بيها
هالايام مدري شبي شاد ويايه كلش بحيث ختنكت هو ماعنده هاي تصرفات صح يغار عليه بس هاي الايام زودها
جاوبته ... الو ها عيني
..... ها حبيبي شونج
.... الحمدلله
.... كملتي اجي عليج
...... لا ممكمله مو تدري ساعه بيش اخلص
..... ها مو قريب عليج اني عبالي اخذج
.... لا هسه شويه ودخل للمحاضره

سديته منه كعدت اسولف ويه صديقتي بين متبدي محاضره
اجتي بنيه كالت دكتورا اسراء سئلتني عليج وكالت خل تجيني للغرفه

نبأ.... ليش شتريد مني
نور .... مادري بس هسه شافتني كالت نبأ وياكم كتلها اي. كالت... خل تجيني لغرفتي

نبأ.... اني شون خفت كلت بس لا سالفه الانذار ولان مو كلش ادخل جنت للمحاضره مالتها
رحت دكيت باب عليه ودخلت
سلمت عليه كتله دكتورا نور كالت  تريديني

دكتورا.... ها انتي نبأ
نبأ.... اي
دكتورا.... بس ردت اشوف وجهج لان من نزلت درجات انتي حضورج مو كلش

نبأ.... اي دكتورا لان شويه مريت بظروف وهسه الحمدلله التزمت
دكتورا ... اي زين  .. انتي مزوجه
نبأ... اي دكتورا ... من كتلها اي مثل الي نصدمت ردت عادت سؤال مزوجه؟

نبأ.... هزيت راسي بي اي دكتورا مزوجه ... دكتورا مثل الي معرفت شتحجي بس كالت  اوكي اخذي راحتج

طلعت منها وعادي ماكو شي رجعت لكيت داخلين للمحاضره
دكيت الباب جان دكتور حباب هذا يسامح طلاب اذا تاخروا
دخلت كعدت من خلص صار يعدد اسماء الحضور من كال اسمي الثلاثي كلت نعم بس رد كال وينها نبأ
رفعت ايدي كال ها تمام وعادي رد كمل الاسماء

رجعت للبيت لكيت محمد موجود جان كاعد جوه بس صعدت اجه ورايه
كلي ... تاخرتي
نبأ.... والله زدحامات اليوم .. رحت ابدل هو ظل واكف يباع عليه وهاي مو عادته بدلت وكملت طلعت للحمام اغسل اريد رجعت للغرفه شفته كاعد  كملت وكتله يله حنزل احضر الغده
كلي اي ... سئلني وين تليفونج كتله بجنطه عفته ونزلت حضرت الغده هي عمتي محضرته بس اني من ارجع احميه الي ولمحمد وكملت صعدت مره ثانيه شفت محمد لازم تليفوني اني ماهتميت يعني عادي هو مرات يلزم تليفوني يشوف صوري بس ميطلبه مني يعني اذا شافه يمه يلزمه

صحته تغدينا وكملنا وصعدت اني رحت سبحت ومحمد كعد يشتغل بالابتوب
كملت ورجعت لكيته هو نفس كعدته وكفت امشطت اجه حضني من وره ووجه بركبتي
محمد ... تحبيني
نبأ.... اموت عليك ... ظل حاضني وكلشي ميحجي كتله شبيك حبيبي
محمد.... مشتاقلج
نبأ... ابتعدت عنه ولزمت ايده كتله تعال نمدد رحنا نمنا هو سحبني نومني على ايده
حتى خوفني حسيت نفسي حموت فدشويه 🤣
كتله .... محمدنا شبيك
نبأ... مادري بس احس راجع مثل قبل
محمد... يعني شون
نبأ.... يعني هواي تخابرني باليوم ومادري بس وره زواج حسيت تغيرت بس هالايام حسيتها مثل قبل من ترجع من دوامك متلهف عليه

محمد.... ماتغيرت نفس مااني بس ظروف ومشاغل مرات تخلي بالج مشغول دايما وهالشي يأثر على حياتج

نبأ.... ممكن
محمد.... نبأ هم فديوم تندمتي لان زوجتي
نبأ ... لا لحد الان
محمد... يعني مثلا شوفين صديقاتج ممزوجات وبدون مسؤوليه مدكولين اتمنى ارجع مثلهم
نبأ.... ظليت ساكته شويه افكر كتله بشقه ... لحد الان ماكو ندم يجوز بالمستقبل الله اعلم ... من كملت جان يكرصني ابتعدت عنه كتله اخ محمد والله تاذيت وخر بعد مانام يمك
بس هو رد جرني ونومني على ايده
ظلينا نسولف بس اني غفيت كعدت المغربيه كمت شفت محمد ماكو رحت غسلت وبدلت ونزلت جوه
شفت اخت محمد بالمطبخ رحت يمها سئلت على محمد  كالت  طلع هو وابويه هسه يجوز
ظليت كاعده يمها اسولف وياها جان دكلي ... اكلج سمعتي بصار

نبأ.... شنو
هديل ... محمد كلج عالجماعه الي سائلين علينا بالمنطقه
نبأ.... ليش سائلين عليكم
هديل.... اكو جماعه جايين سائلين بيت جوارينا علينا كايللهم اريد بنيه منهم وشونهم وهاي سوالف

نيأ.... صدك خطابه يعني
هديل .... اي
نبأ.... الله حيصير عرس عدنا..... طبعا اني جنت اشاقه ويه هديل لان هي بعدها ممزوجه
هديل.... ولج هو مو عليه
نبأ.... لعد عليمن
هديل .... عليج
نبأ.... من كالت عليج لا اراديا صرت اضحك كتلها لتشاقين
هديل .... ولج والله لان ابن ابو علي مو صديق محمد كايله ناس جايين سائلين عليكم وظلوا يسئلون على عدهم بنيه طالبه جامعيه ومدري شنو
بس علي ميدري كللهم والله مادري اذا طالبه بس اعرف عدهم بنيه ونوب علي يكول والله حمدنا بيكم ومدري شنو

نبأ..... لا ترى يجوز عادي يسئلون يشوفن البنيه طالبه لو كاعده بالبيت يعني شدخلتي اني بالموضوع

هديل .... ولج سمعت محمد يكول لامي متاكدين عدنا بنيه طالبه
وامي كلتله ... خاف عبالهم نبأ بتنا لان يشوفوها يوميه تطلع للدوام

نبأ.... والله مادري هاي شوكت صار الحجي
هديل... صار اسبوع اقل هيج
نبأ....والله مادري شو محمد محجالي
هديل .... اني هم كلت شو نبأ مجتي سولف بالموضوع بس كلت يجوز محمد ميقبل تحجين
نبأ..... هههههههه والله كلشي محجه
هديل..... بس كلشي لتحجين لعد بربج خاف يحجون عليه
نبأ..... لا ماحجي ولو موضوع ميستاهل .... كمنا نسوي العشه نجهزا سمعت صوت باب الخارجي نفتح طلعت اشوف طلع محمد وعمي دخل عمي للبيت
اني طلعت على محمد
كتله... هاحبيبي وين جنت
محمد.... ابويه نازل راتبه راح يجيبه
نبأ.... ها ... دخلنا جوه وكملنا العشه والهوسه مالته بعد العشه  كعدنا بصاله
جان محمد يلعب بتليفون واني وهديل نتفرج مسلسل
اكو بالمسلسل وحده مزوجه رجلها معذبها ويرجع حبيبها القديم  وتبدي تحن اله
فاني وهديل صرنا نحجي على رجلها وطبكنا ويه البنيه وحبيبها يعني مجرد حجي وهو مسلسل
ماشفنا الا محمد يحجي علينا شهالمسلسلات التافه وحجي عليها
وعافنا وطلع من صاله اني وهديل وحده صافنه عالثانيه
هديل كالت هذا شبي
نبأ.... والله مادري وصرنا نضحك على تصرفه الغريب

شويه وصعدت فوك سويت كم شغله عندي
وبعدها كعدت العب بتليفون واصفح دخل عليه محمد باوع عليه ومعاجبه يمشي بالغرفه ويدردم
اني مستغربه هذا شبي الظهر كلشي مابي كتله ... شبيك

شو هذا نفتح عليه انتي دايما لازمه تليفون وكل ماصعدتي للغرفه ميوكع منج اني جنت صافنه عليه حسسني هو امي وجان يحجي بجديه اني دانتظر شوكت يضحك عبالي يشاقه

وعافني وطلع من الغرفه واني نفس صفنتي جاي استوعب
طلعت اشوفه وينه رحت من شباك الي بالممر لكيته كاعد بالحديقه ايد يدخن وايد لازم تليفون كلت هسه انت شلازم لعد مو تليفون عفته ورجعت للغرفه حضرت ملابسي مال باجر ونمت حسيت عليه دخل الغرفه بس يمشي وينافخ ويتعارك ويه نفسه
نوب اني من اشوفه عصبي ماتحمل بسرعه اضحك عفته ونمت
كعدت صبح بدلت وجهزت هو هم كعد بس كالب وجهه
اني اباوع عليه اكول هو غير افتهم شبي كالبها
رحت البس حجابي هو اجه وكف ورايه يعدل بنفسه عالمرايا وجان تركيز على وجهي جان يكلي ادري رايحه عرس شكد خاله مكياج
كتله ... هو يوميا اخلي هيج شنو جديد

محمد....  واحد ميكدر يحجي وياج محضره جواب بسرعه

نبأ.... ظليت ساكته هو شمر فرجه الشعر عالميز قوي وطلع
اني مجان مكياجي هواي بس خففته حتى ليظل يتعارك

طلعنا من البيت وهو يوصلني لان اني خطي بس رجعه
صعدت وياه وهو من صبح جكاير مالته كتله ... محمد من صبح جكاير

محمد... بله بطلي هالسالفه كل مشفتيني ادخن حجيتي هالجمله

نبأ.... عفته مجاوبته لان بديت اضوج من تصرفاته وصلني للجامعه وراح
المهم دخلت وبدت محاضره ثاني محاضره جانت محاضره استاذ علي
واستاذ علي محاضراته كلها ضحك لان انسان فرفوش وطلاب يحبوه وهو صغير فطلاب مصادقته
بس هالمره دخل متغير يعني لا يضحك لايشاقه كلش جدي جان حتى طلاب استغربوا شبي هيج
اني عادي مهتميت بس صراحه من كمت اداوم كمت افرح من تجي محاضرته لان يشاقه ويضحك تحبين محاضرته
خابرني محمد يسئل بس هم عصبي هو اني يوميه اروح اكل شي ويه صديقاتي
هالمره من كتله حروح اكل شي حجه على شكو رايحه تاكلين  وهسه حترجعين للبيت اول مره محمد هيج يصرف يعني محمد هو جان يسويلي واهس للدوام ويكعد يسولفلي جان يسوي من جان طالب وشون يطلعون هو وجماعته وشون عنده كروب بس هاي تصرفات ذكرتني بااسد حتى اسد بطل هالسوالف
كتله غير الخط ميجي هسه

محمد .... اي بعد اني ارجعج شو انتي تخلصين وتكملين وخطج وره ساعه يجيج

نبأ.... غير ويايه بنات من غير اقسام
محمد.... اي هاهيه هسه اجيج  ادكلج وطلعيلي

نبأ... سديته من محمد كتلهم للبنات اني حرجع انتو روحوا
اني ظليت واكفه انتظر محمد يدك واعرف حيتاخر لان ازدحامات هيج وكت
شافتتي بنيه ويايه بشعبه اجتي وكفت يمي سلمت وكالت اكلج مصطفى الي ويانه بشعبه البارحه سئلني عليج
كتلها.... شسئلج
كالت.... كلي نبأ مزوجه لو لا  وكتله مزوجه حتى عبالي هو خال عينه عليج بس كلي لا جماعه سئلوني عليه وجنت اريد اتاكد لان اني هم كتلهم الي اعرف مزوجه

نبأ.... شنو هالايام الكل يسئل اني مزوجه لو لا
كالت.... والله مادري كلت اكلج خاف متقبلين احد يدري مزوجه

نبأ... وليش يمه ماريد احد يدري قابل شمسويه غير مزوجه على سنه الله ورسوله

كالت... اي مو تعرفين هاي سوالف خصوصيه
نبأ... لا حبيبتي اي احد يسئلج كولي مزوجه ... دك عليه محمد ترخصت منها وطلعتله
صعدت للسياره سلمت عليه جان شويه اهدء من صبح
اني كلش صريحه ويه محمد يعني اي شي يصير اسولفله ماخاف منه لان  متعلمه اسولفه من قبل

كتله ... قبل شويه بنيه ويايه  بشعبه اجتي كالت ولد ويانه سائل عليه بعدني ممكمله التاف عليه وعاكد حاجبه

محمد ... وليش سئل عليج شيريد

نبأ... كايللها نبأ مزوج لو لا لان جماعه سائليني عليها
محمد ... منو ذوله
نبأ... ماعرف المهم البنيه كايلتله مزوجه .. محمد وره هالكلام رجع مثل الصبح ظل يحجي عليه انتي يوميه ناسيه تلبسين حلقتج وتلكيج محاجيه لاحد انتي مزوجه ووحجي الي يسمعه ميصدك هذا محمد يحجيه
كتله .... محمد شبيك شنو هالحجي وليش ماكوللهم اني مزوجه قابل بايكه

محمد.... والله اذا شفتج ناسيه حلقتج بعد متلومين الا نفسج واني رجال مانزع حلقتي

نبأ.... اي اني اصبعي يتحسس من ذهب شسوي انت لابس فضه

محمد.... دنزعيها بعد وشوفي

نبأ... التافيت عالشارع حاصره ضحكتي والله مدري ليش رب العالمين ينزل عليه ضحك بهيج مواقف وياه
جان بيومها جدي راجع
المهم رجعت للبيت تغدينا عمتي كالت حروح اشوف ابويه وامي لان راجعين من العمره كالت ... عود كولي لمحمد حتى تجون  راحوا كلهم محمد جان فوك صعدتله هو جان مدد
اني هم رحت مددت يمه غفيت شويه بس حسيت هو ماكو نزلت جوه لكيته كاعد بصاله يصفح بتليفون

رحت كعدت يمه خليت راسي على جتفه كتله ليش مكعدتني من كعدت

محمد... شفتج  تعبانه كلت خل ترتاح

نبأ.... ممم نروح لبيت جدي لان عمتي كالت اكلك
محمد... مالي واهس خليها غير يوم روحلهم
نبأ.... اوكي .. طبعا هو يححي ويايه وعينه بالتليفون بعدت عنه كتله ... ها هسه منو يلزم تليفون هواي اني لو انت ... هو ظل ساكت سد تليفون وشمره يمه

نبأ.... محمدنا شبيك ويايه صاير متتحجه
محمد.... مابيه
نبأ.... محمد احجي حتى افهم شبيك ماحب هيج تصرف ويايه

محمد.... مابيه شي
نبأ....بكيفك لتحجي عفته ورحت للمطبخ جنت اشوف شسوي عشه هو شويه واجه وكف يمي جر شعري عالخفيف كلي... شدسوي

نبأ... سويت نفسي عود زعلانه احجي بالكوه  كتله ... اسوي عشه

محمد.... وانتي وين تعرفين سوين اكل
نبأ.... شكرا.
محمد....لسوين خل اجيب من بره
نبأ.... عرض مغري بس مسويه نفسي زعلانه ماكدر كتله ...ماريد
محمد .... حوصي على شي تحبيه
نبأ.... ماريد
ومحمد ... وواصي وياه حلويات
نبأ.... ظليت ساكته كتله.... يله لعد  وصي وكمنا نضحك لان بسرعه اقتنعت
.........
غرام..... وصلنا للبيت اخذت جمال من عمتي وصعدت فوك بدلت وغسلت ونزلت جهزنا الغده وكعدنا ناكل دك تليفون اسد طلع من المطبخ يحجي شويه ورجع بس مبين ضايج
كعد محجه شي همست اله شبيك
اسد....لازم ارجع للدوام باجر
غرام.... ليش بعدها اجازتك
اسد.... الاوضاع مدري شونه

غرام. .... شون ضجت من كلي حيرجع بحيث حتى نسدت نفسي عن الاكل
كملنا غده وكعد هو يم اهله بصاله اسمعه يكللهم باجر ارجع للدوام ويحجي عالاوضاع وحيصير شي اكو ويجوز يدخلون انذار وحجي يخوف جان

اني اخذت جمال وصعدت نومته دخل اسد للغرفه اجه يمي كرصني من خدي
اسد... شبيج
غرام... ماشبعت منك شنو تروح
اسد....لعد اني شبعت منج تعالي
غرام..... رحت نمت على ايده جان يلعب بشعري ويسولف ويايه دك تليفون اسد باوع كال هذا  علي

غرام .... شفته بسرعه جاوبه لعمي علي بس اسد بسرعه وكف كله شبيها هسه انتو وين يله جايكم
سده كتله شكو

اسد ... جده حكمه متخربطه وموديها للمستشفى بسرعه بدل راح نزلت وراه عمتي كالت عمج والولد كلهم راح وياه
ظليت ادعي لجده مابيها شي خطيه هي جانت تعبانه من راجعه من العمره حتى كالت هالمره كلش تعبت
ظلينا ننتظر احد يطمنه وكل مادك على اسد ينطيني رفض يخبلني بزايد
اجتي امي ورونق يمنا لان جلال كايل لرونق وجوي يشوفون اذا اكو شي جديد
رونق كالت جلال كايللها سكرها وضغطها صاعدات وبعد دكتور يمها وخابر اسد هم كال تعبانه كلش وفاقده
ساعه ب ٢ صبح رجع اسد وجلال وعمي اني جنت كاعده بالغرفه انتظر اسد يدك او يرجع
سمعت صوت باب الخارجي نفتح نزلت ركض فتحتلهم باب
دخل عمي خطيه مبين ضايج على امه
عمتي كلتله .. ها شونها
عمي... مو زينه

غرام. .... عمي من كال موزينه خنكته العبره بحيث عيونه دمعت بسرعه عافنا دخل جوه اجه اسد كال ... تعبانه وسكر وضغطها اثنينهن صاعدات وفاقده لحد الان محاسه بس ميقبل نبقى كلسع مطلعينا تالي بقوا يمها عماتي اثنين و عمي علي و وفهد ولد عمامي اثنين هناك الولد طلعوا كاعدين بره المستشفى  لان ميقبلون
بس اسد رجع لان لازم يطلع الفجر للدوام
صعدنا فوك دخل اسد كعد عالجربايه صافن رحت يمه كتله جدو شونه
اسد.... والله لوشوفي خطيه كاعد يمها كلش خايف عليها هو هم هسه من رجعنا ميقبل يرجع بالكوه رجعنا
لان وجهه اصفر صار لا دوه ماخذ لا متعشي ليروح يوكع هو هم

غرام.... خطيه الله يكومها بسلامه حبيبتي
اسد... ان شاءالله

غرام... كوم بدل حنزل اسويلك شي تاكله انت هم بلا عشه  ونام شويه وراك طريق ارتاح شويه

اسد ... ماشتهى بس خل انام
بدل واجه مدد رحت مددت يمه على ايده
باسني من راسي وحضني ونام
اني اعرف اسد مقهور اكثر واحد بينا لان هو وجده حكمه علاقتهم قويه كلش
حسيت على ايده ثكلت عرفت غفى اني ماكدرت انام افكر بجده حكمه ظليت بس ادعي الله يكومه بسلامه ساعتين ودك المنبه كمت بسرعه سديته كعدت اسد
كام يغسل اني نزلت اسويله ريوك
شويه ونزل مبدل لابس لبس الدوام  اجه كعد يمي اكل شويه كال دكيت على فهد جده حكمه بعدها فاقده وحالتها تعبانه
غرام.... الله يعافيها ويشافيها
   اسد... يله حروح
وصلته للكراج فتح السياره صعد غراضه واجه وكف يمي ظل يباع عليه

غرام.... ابتسمت اله كتله ليش هيج تباع عليه
اسد... اريد احفظ شكلج
غرام .... تخصرتله كتله ... ليش انت محافظ شكلي
اسد... اريد احفظ شكلج بشعرج القصير
غرام... حضنته قوي كتله دير بالك على نفسك حبيبي وانتبه عالطريق بادلني الحضن بقوه كلي ديري بالج على نفسج وعلى جمال ماشي

غرام .... ماشي حبيبي
اسد... يله دخلي جوه
غرام.... دخلت وكفت يم باب الداخلي هو طلع سيارته ونزل سد الباب ظل يباوع عليه شمرلي بوسه وراح..........يتبع❤
...............
مرحبا حبايب قراءه ممتعه

سوزان ليث🖤