رواية حب جنوني الفصل التاسع والعشرون 29 - بقلم سوزان ليث

مو هيج اتفقنــــة العـــــرس بي شــــروط......

                    ردت اكعــــد بصفـــك مو اصفكــــلك......

غرام .... بعد مااسد التحق صار روتيني كلش ممل كليه قرايه وماكو شي 
مرات جنت اضوج اكعد انشر بالفيس صور ساصبح دكتورا وساضع (د) قبل اسمي واشكال جنت بس اريد اغث اسد يعني عود دراستي اهم منك هو مجان يعلق
بس كمت يوميا انشر هيج سوالف طبعا قصي وفهد بس يقلدون عليه بالتعليقات ويفشلون اكبر واحد هذا الي يكلي الله يساعد الي يجيج
وهذا الي يكلي ثبرتينا وانتي بعدج اول تتخرجين شسوين
يبوووو كومه حجي

وراها رجع اسد قبلها باايام جنت ناشره (ربي وفقني لكي اعوض امي تعبها واصبح فخرها بين الناس )

يعني جان هيج شي فهذا البوست يعني قبل ايام ناشرته وراه نشرت مدري شكد اسد علقلي على هذا البوست بس كاتبلي ان شاءالله

اني قريت ان شاءالله عبالك كاتبلي احبك اموت عليج اشعار ظليت كل شويه ارجع اقره التعليق وبكلبي اكول  فات لصفحتي يعني ديقرا الناشرتهن وكلسع ادخل لصفحتي اراجع المنشورات ههههههه شايفين واحد من يجي خطار مفاجئ ويكعد يشوف البيت مرتب لا اني هيج كلسع ادخل لصفحتي اراجع المنشورات

طبعا ماشفته حتى من رجع ابد ومرتين اروح للبيت عمي بحجه نبأ وهم ماكو وهو اصلا مكلف نفسه يجي يسئل عليه كلش تغير وره خطوبته
ماعدا خطيبته كل يومين جايه لبيت عمي على كولت نبأ دكول مره دخلت للبيت جنت راجعه من المدرسه شفتها واكفه تغسل اماعين دخلت اسلم عليها كلتلي روحي بدلي حتى اصبلج غده دكول ظليت اباع عليها شو هاي ماخذا راحتها كلش ومنطلقه

عدت فتره طويله وشوفتي لاسد قلت كلش واذا نشاوف صدفه وهو ميباع عليه حتى من يشوفني جنت اموت قهر من اشوفه ممهتم الي وارجع ابجي وحالتي تدمر  حتى كمت مااشتهي اكل ومالي واهس وتعبانه دايما وبين فتره وفتره الم بطني يصير يموتني وحده من رجلي احسها تنشل ويه الوجع مره مرتين مره ثالثه كمت اصرخ الم مو طبيعي بطني صرت مثل السمجه اليطلعوها من الماي
خطيه امي حارت شسوي جانت دنيا ظهر محد فاتح يعني ظلت تقرا عليه ايات وتمسح بطني واني دانازع من الوجع
حتى نفسي كامت تلعب وكمت اذب من راسي ماعرف صار
امي خابرت اسد كلتله غرام مدري شبيها حتموت

اسد.... محد يكدر ينسى حبه كمت اتهرب منها كل ماشوفها اظل اسوي نفسي لو ملتهي بتليفون لو اسوي نفسي احجي وممنتبه عليها بس هي مابطلت ظل تباع عليه بكل مره اريد اضعف واباع عليه بس عيوني تفضحني ماقلت لهفتي عليها بالعكس زادت
اما سرى جانت وجودها وعدمه واحد ماحس اي شي تجاهها
كلشي يعدي بس بيوم جنت نايم وتليفوني يدك باوعته مرت عمي
جاوبتها صوتها يرجف ودكلي اسد غرام حتموت
اني جنت نايم بس كلتلي هيج طفرت من فراشي وسويت درج خطوتين بحيث طلعت اركض فهد شافني كلي شكو اني دامشي كتله غرام مدري شبيه طلع ويايه رحنا لبيت عمي شفت غرام كاعده وحانيه ظهرها ولازمه بطنها وتبجي بس شفتها مدري صار بيه جسمي كام يوجف عبالك بيه الوجع
رحت كعدت بالكاع كبالها ظليت مسح بوجهه نسيت الواكفين كلهم

كتلها .. كليلي شبيج
غرام ... اسد حموت بطني احسها دتتكطع عفيه حموت والله
اسد... اااش كافي هسه روح للمستشفى
نداريت على عمتي كتلها لبسيها شي بس اروح ابدل واجي وكتله لفهد يطلع سياره حتى نستغل الوقت رجعت للبيت بدلت وطلعت رحت عليها امها ملابستها عبايه كتلها كومي يله خل روح

غرام ... ماكدر والله ماكدر رجلي هاي احسها مشلوله
اسد... خبلتني  نوب بس تبجي كتلها ماشي شلتها وطلعت وهي مابطلت بجي
كعدتها بصدر بصفي امها ركبت ليوره هي وفهد
وطلعنا

غرام ... اني ابجي من الوجع وهو كلسع يلتفت عليه يمسح دموعي يكلي هسه حنوصل اتحملي
بعز الوجع من شفت خوفه عليه فرحت كلش
وصلنا للمستشفى اهليه قريبه جانت علينا طبعا اسد ميمشي يركض اجه بسرعه شالني ودخلني بسرعه جان اكو دكتور بطوارئ اجه فحصني وظل يضغط بطني من جهه اليمنه واني اصرخ  ظل يسئلني جم سؤال عندج لعبان نفس تقيئتي حراره جسمي اسئله المشكله كل ميكول شي اكله اي
ندار على اسد كله هذا التهاب الزائده الدوديه
اسد... زين شنو الحل انطيها مسكن شي
دكتور ... ميفيد مسكن لازم عمليه
غرام ... اني بس سمعت عمليه كمت ابجي بزايد اكلهم ماريد عمليه ماريد  واني ميته وجع اكلهم راح الوجع مابيه شي

دكتور ... لتخافين ترى بسيطه وبعدين ميصير هذا التهاب حاد كل الاعراض عندج

ام غرام ... زين دكتور شوكت تسوي العمليه
دكتور العصر يجي دكتور اختصاص يفحصها وهو يكللكم

غرام ... ظليت اكلهم ماسوي عمليه ماسوي وامي تحجي وتهديني وماكو اجه اسد ظل يمسح عيوني ويعدل حجابي اني بيا حال وكلي

اسد...باعي مابيها شي كلش بسيطه عاجبج الوجع هسه وبعدين ميصير لازم سويها

غرام ... اني ظليت اباع عليه من يحجي بكل هدوء وجهه مبين خايف عليه نوب كلسع لازم ايدي  عسى يوميه اتمرض حتى اشوف هذا الخوف بعيونه
هو من حجه ويايه بكل هدوء اقتنعت جان فهد يقطع ابو الرومانسيه
كلي
فهد... لازم سويه بعدين ينفجر بطنج وتموتين
غرام ... عزه هو كال هيج رجعت ابجي جان اسد يندار عليه كله
عاشت ايدك صالي ساعه اقنع بيها
رجع مره ثاني يحجي ويايه
للعصر اجه دكتور هم فحصني ونفس الشي كال التهاب الزائده الدوديه ( مصران اعور) وكال لازم عمليه طبعا اسد كله اي شوكت تسويلها العمليه هو كله خل سوي جم تحليل بس نتاكد ويطلع التحليل والله كريم

وراها اني ظليت الوجع يزيد عليه ويرجع يخف ويزيد سويت تحاليل وطلعت دكتور كال هاهيه  جانت ساعه 6 كال بتسعه نسويلها
اني عزه كال بتسعه كمت ابجي عبالك حموت بتسعه
وطبعا بعدين عرفت الدكتور كايل العمليه باجر بتسعه بس اسد هو الي مسويها بتسعه بالليل ودافع فلوس اكثر

وره متحددت العمليه اسد كال لامي روحي ويه فهد جيبيلها هدوم فامي راحت هي وفهد واني اكلها جيبي رونق وياج اشوفها عبالك داموت
فتحولنا غرفه فجنت مدده نطوني مسكن بس الم بعده اسد جان كاعد يمي عالجربايه يفرك برجلي خطيه  واني اباع عليه
كتله

اسد اذا متت بالعمليه تزعل عليه هو بسرعه جاوبني بعصبيه

اسد... شنو هالحجي كتلج عمليه بسيطه

غرام... اني هو حجه هيج كمت ابجي لان صرخ عليه جان هو يشوفني ابجي اجه عليه

اسد.... كافي حبيبتي والله ماقصد تعرفيني ماحب هذا الحجي ولج اني اموت اذا صار بيج شي

غرام .... ظليت بس اهز راسي وظل يمسح عيوني وكلسع يغمزلي ويفرك برجلي ماعرف ليش يفرك برجلي ونوب يطكطك اصابيع رجلي راد يشلعهن بس جنت مستمتعه

وراها اجتي امي ورونق وياها اجتي شافتي خطيه كامت تبجي واني ابجي
وفهد كلسع يكلنا كافي عاد هو مصران اعور هههههه
بس اني خايفه لان مامسويه عمليه قبل
صارت بثمانيه ونص اجتي ممرضه جابتلي صدريه مال عمليه فدخلت للحمام ويه امي لابسته
المشكله من وره بي خيوط ينشد بس ظهري طالع
واني ماجنت لابسه شي جواه السستر كالت ميصير فطلعت جان بس اسد ورونق بالغرفه رونق ظلت تضحك عليه لان شكلي مسخره
فكعدت عالجربايه كالت عشر دقايق واجي اخذها
اجتي جايبتلي عربانه كالت يله تعالي

اني يمه كمت ارجف كمت اباع بالوجوه داكوم جان اسد يشيل العبايه نطاها رونق كلها خلها على جتفها فالممرضه كلتله لاميصير
كلها شنو سالفه ظهرها طالع  عاد بس هيج خلوه على ظهري كعدت عالكرسي امي خطيه تبجي ويايه وتدعي بوستني ورونق بوستني
لا احلى شي نداريت على رونق كتلها رونق ديري بالج على امي كلت حموت هاهيه
وامي كامت تبجي بزايد طلعت من الغرفه اسد يمشي بصفي فوصلنا لباب مكتوب عليها العمليات اني ردت اخرب باوعت على اسد بتوسل ينقذني
جان يجي يبوسني من راسي يكلي سهله لتخافين اني ظليت لازمه ايده هو يكلي سهله وهو اشوف خايف اكثر مني

اسد... باعي متحسين بشي يضربوج ابره وتنامين وتكعدين وهمه مخلصين

غرام... شكد حلو من يقنع بيه عبالك طفله ... اسد ادخل ويايه
اسد... والله لويصير جان دخلت اني سويتها بدالج بس مايصير ياعمري باعي انتظرج هنا

غرام ... هزيت راسي وعفته نداريت عليه قبل مافوت جان يدزلي بوسه هوائيه خلاني اضحك
اني عبالي بس ادخل هاي الغرفه هنا العمليه شو دخلت مرر شكبره وبعدين غرفه شكبرها واكو دكاتر ملتمين على واحد طلع كومه ديسون عمليه هنا يمه اني شفت الكل لابسين مال عمليات عزه ردت اخرب والله نوب الغرفه بارده ثلج ماعرف ارجف من البرد لو من الخوف
وصلنا لسديه ممرضه كالت يله تكدرين صعدين لو اساعدج
كتلها لا اكدر فنمت وظليت اباع يمنه يسره هي ظلت تعدلني ولابستني براسي كب كتلها عفيه بارده عاد هي خطيه غطت رجلي بشي كلش خفيف

وره شويه اجه دكتور وكف يمي كلي شونج
كتله زينه كلي شسمج كتله غرام كلي عاشت الاسامي كتله شكرا
جان بيده ابره مد ايدي وظل يفركها ويحجي ويايه انتي وين داومين ومزوجه لو لا
ضربني الابره كلي غرام حسبي من 1 لل 10 هزيت راسي بديت 1 2 3 وبعد ماحسيت حتى 4 ماعرف كلتها لو لا حسيت على ناس تضرب بخدي وصيح غرام اني طبعا داحس عليهم بس مداكدر اجاوب وعيوني ثكال وظلو يضربون بس اذكر كتلهم اي اي بالكوه
وراه حسيت هوسه حجي حجي وراسي يوجعني حلمت ابويه فتح الباب الغرفه ودخل عليه ظل واكف يم الجربايه يباع عليه ويبتسم
اني كتله ليش عفتني خل اجي وياك

بعد ماعرف ماذكر بالكوه فتحت عيوني جانت رونق واكفه يمي سمعتها تحجي
فتحت فتحت
امي جتي تمسح راسي وتبوس بايدي اذكر كتلها ابويه اجه حروح وياه ونمت

اسد... اعرف عمليه بسيطه بس جنت مرعوب عليها ظليت واكف كبال الباب لا حسيت بتعب لا شي اجتي ام غرام تبجي كتلها عمه شنو سالفه ترى بسيطه
ام غرام ... والله مو بيدي
اسد... عاد اخذتها ورجعنا للغرفه كاعد على نار كلسع اطب وادخل فهد راح جاب امي والبنات
شويه واجه عمي وقصي وجدي كلهم خطيه حتى جده رادت تجي بس ماقابل جدي

اني طبعا يحجون بس اهز راسي بالي يم غرام
وره تقريبا مدري شكد جابوها اني بس شفتها شون نايمه ومحاسه بشي مدري صار بيها خلو ها. عالسرير وكالو شويه وتكعد البنج بعده
رادو اجيب دوه رحت اجيبه رجعت شفت عمتي تبجي رونق تبجي امي تبجي
كلبي وكع كتلهم شكو مرت عمي كالت ابوها جاي لغرام كعدت دكول حروح وياه اني سمعت هيج ماعرف صار بيه شمرت دوه عالميز رحت كعدت بصفها ظليت اضرب على خدها خفيف اريدها تكعد كلبي حيوكف وعلي
هي شويه وحركت راسها فتحت عيونها بتثاقل
ظليت اباع عليها واعدل شعرها كتلها حمدلله عالسلامه
هي بس ابتسمت
لزمت ايدها بستها نسيت امها وامي واكفين رونق نقذت اجتي عليها باستها وهي جانت بس تبتسم بتعب

كتلها دتتوجعين هزت راسها لا
كتلها يله نامي احنا كلنا يمج هي بسرعه غمضت عيونها

عاد كلت لامي ورونق والبنات يرحون اني وامها نبقى يمها اجه فهد
رجعهم عمي وجدي جانو راجعين
عاد اني وامها بقينا يمها ب12 كعدت ام غرام جانت مدده عالقنفه واني كاعد عالكرسي بسرعه كمت عليها كتلها شونج

غرام... زينه بس هنا يوجعني
اسد... اي مو هنا العمليه خلولج مسكن بالمغذي قبل شويه هسه يسكن
غرام ... اسد غطي امي خاف تبرد
اسد... فدوه للحنين كمت اخذت بطانيه خاليها وغطيتها
رجعت كعدت يمها كتلها خوفتيني عليج
غرام ... اني هم خفت دخلت لهاي الغرفه كومه ناس دسوي عمليه مو بس اني
اسد... يله المهم خلصتي
غرام ... ليش ماترجع
اسد... ماعندي شي واصلا باجر نطلع
غرام ... اباع عليه يربي شكد حنين وقلبه  طيب  شكد احبه وكلسع يجي يعدل الغطه لو يشوف المغذي ظليت اباع عليه لحد ماغفيت كعدت صبح لكيت امي كاعده ومرت عمي يمها
اجوي سلمو عليه وره شويه فات اسد باع عليه كلي ها شونج اليوم كتله زينه
كلي دكتور بس يجي حتى يشوفج ويكتبنا خروج
لل 12 يله اجه دكتور شافني وكتبلي خروج بعدين طلعت كعدوني بالعربانه كمت على كيف كعدت بسياره ورجعنا للبيت
طبعا اني اكدر امشي اجه اسد كلي تكدر تمشين كتله لا جان يكلي ماكو مشكله جان يتقرب عليه يشيلني وجهي صار قريب على خده همست باذنه احبك
هو شالني مجاوبني طببني جوه ورونق محضرتلي فراشي لان ماكدر اصعد فوك عاد كعدت عليه وهو مباوع عليه بعد فد نقهرت منه وتندمت لان كلتله احبك بس من كلتها من كل كلبي طلعت
هو ندار وحجه ويه امي كلها ذني دوايات كلشي مكتوب عليها وخل سويلها سوائل هسه خل تاكل
وسلم وطلع
اني ظليت اكول ليش هيج سوه لان خاطب زين البارحه الخوف الي شفته بعينه شنو حبيبي كلسع يكولها شنو مددت ورونق والبنات يمي ظلن يسولف واني مو وياهم
وره شوه جتي جده حكمه خطيه جايه علمودي كعد ت يمي تمسح عليه وتقرا معوذات ودكلي ولج حسدوج بخطوبه اسد
مرت عمي كلتلها والله عمه اني هم كلت لام غرام كتلها عوذه صابوها بالعين
اني ظليت اضحك على حجيهم بعد ماشفت اسد ابد سئلت نبأ عليه كالت سبح ونام كلت خطيه تعبان البارحه منايم
اني نمت شويه وكعدت جايين عماتي وعمامي وزوجاتهم خطيه كلهم جايين يشوفوني عماتي وعمامي كلش حنينين ويحبونه اني ورونق يعني لان يشوفونه ايتام يعني كلش مدارينا  وعلى حب ابويه

وره مراحو اجتي رونق
كالت
رونق...المطبخ مليان صناديك عصير وبيبسي حروح ابيعهن  وجدي جابلج طلكي ذبحلج على سلامتج ولو انتي دجاجه زايده عليج

غرام ... هههه انجبي اكلو لحم براسي
رونق... وين بقى غير امي وزعته كله بقى بس راس ذاك عالسنك
وهم مو النا امي دتنطي لبيت ام احمد
غرام ... ههههه شونج عساس انتي تموتين عراس
رونق... ولج من جنت بالمطبخ مبتسم ويباوعلي كتله فديت الابتسامه
غرام ... ههههه همزين اكو واحد ضحكلج
رونق... اي فديتني

غرام .. اسد مااجه بعد
رونق... اجه بس مادخل من الباب جاب فواكه وحلويات وراح
غرام ... ليش مفات
رونق... مادري يجوز عده شغل
غرام ... لليل واني الوب مو من الوجع لان اسد من جابنا من المستشفى بعد ماشفته
دزيتله مسج📱وينك ليش مجيت شفتني
مجاوبني وره ساعه هيج جاوب 📱 جان عندي شغل شون صرتي

جاوبته 📱الحمدلله احسن بس اريد منك شغله  دوامي شون
جاوبني 📱باجر اروح اسويلج اجازه مرضيه
جاوبته 📱 اوكي شكرا تعبتك ويايه
جاوبني 📱تعبج راحه يله نامي
دزيتله 📱تصبح على خير

مجاوبني بعد اني هم اخذت دوايه ونمت الصبح عادي عماتي جويه هم شافوني وجدي وجده حكمه هم مرو شافوني
للعصر ندك الجرس وسمعت امي دكول ياهلا بالي اجانه تفضلو تفضلو وفاتو نصدمت بالي اجه .......... يتبع❤️

££££££££
مرحبا حبايبي شونكم حبيت اشكر كل واحد ديتفاعل ويه القصه
واشكر الي تراقبنا بصمت (غ)
احبكم
سوزان ليث ❤️