رواية حب جنوني الفصل الثامن والعشرون 28 - بقلم سوزان ليث

جنا دنسولف لمن فاتت علينا نبأ بسرعه وتتنفس سريع والا شويه تبجي وكانما صاير شي جوه كنالها شكو كالت الحكوني انفضحت لحكولي

رونق .... ولج شكو
نبأ..... لكم عزه بعيني انكصت ايدي ولا هالعمله
غرام.... نبأ احجي والله وكعتي كلبنا صاير
نبأ..... لكم صدك السناب اذا اخذ سكرين يبين عند الي اخذتله
رونق ... اي يبين
نبأ ... الله يكسر ايدج يانبأ كل مره تتفرجين وتنجبين هالمره الا طكين صور
غرام ... حتحجين لو اركعج بهذا
نبأ... محمد جان ناشر بالسناب صور مال خطوبه ويه اسد وجم واحد من ولد عمنا واني جيت واخذت صوره للناشرها

رونق... اي شكو بيها اذا كلج كليله اسد طالع حلو بصوره
نبأ.... ولج الصوره بس وحده الي اخذتلها صوره
غرام .... هسه عادي شكو بيها
رونق... وانتي ليش تاخذين سكرين لصوره
نبأ... عادي بدون مااقصد
رونق... نبأ باعي بعيوني ترى خابزتج وعاجنتج الي معجبه بي محمد مو
نبأ.... لا انجبي مو هو
رونق... صدك عبالي جان سوينا طريقه هو هم ينعجب بيج
نبأ... صدك شسوين يعني
رونق... شكو تردين تعرفين مو مو هوه
نبأ.. امداج يارونق اي هو بس الله عليكم لدكلولي يحب هاله ترى ادري
غرام ... عزه محمد
رونق.... ادري بيها ولج صالي فتره شاكه بيها
نبأ.... كلولي شسوي
رونق.... عادي حبيبتي لتخافين ميزوج هاله انطي يومين ويجي يخطبج علمود السكرين

غرام ..... اي عفيه همه ولد عمنا ميزوجون الي يحبوهم

رونق..... هههههههه اي عفيه عود ليش
غرام .... والله مادري يمكن عدوى منتشره بالجو
رونق... ههههههههه اي فايروس

غرام .... ههههههه اي اي بالكي يعديني
نبأ ..... بلا لواكه اثنينكم مو صوجكم صوجي الحجيتلكم
رونق... لا جديات خل نحجي
غرام .... جديات لو بيبيات ههههههه
رونق.... هههههههههه
نبأ.... شنو هالسخافه امداكم
رونق... لا لا كافي غرام خل نحجي من صدك يعني نبأ انتي من دون ولد عمج وشباب المنطقه كلهم ملكيتي غير محمد واني من هالصغرني اعرفه يحب هاله

نبأ.... ادري والله يحبها واني ممسويه شي والله حتى الج محاجيه هذا الشي احبه من بعيد
غرام ... ادري حب من طرف ثالث هذا

رونق... هههههه انجبي غرام دنفهم البنيه
باعي يعني هو يحب هاله وهاله بت عمج يعني مترهم دخلين نفسج بيناتهم

غرام .... بس ترى هاله ومحمد اعتقد متفاركين
نبأ... صدك والله
غرام ... اي اخر شي من جنا بالمدرسه هو عايفها
رونق.... لعد العدوى بدت بمحمد
غرام .... هههههه اي والله ... بس باعي ترى هاله متحبه هي اكثر من مره كايلتلي هي باقيه وياه لان هو يحبها وبس
رونق.... لنفرض متفاركين شون الج نفس تاخذين واحد جان خال عينه على بت عمج  لنفرض نعزمنا كلنا بيت جدو وهاله اجتي شنو ردت فعلج
نبأ.... هسه يمه شفتيني زوجته بسرعه تخيلي ولكم والله بس اعجاب مو اكثر
غرام ... اني برأيي  استمري بالاعجاب محمد مووووز
رونق... ولج لا شجعيها بعدين تتندم
نبأ.... ولكم مادام عاف هاله هاهيه
رونق... شحسوين يعني
نبأ... ماسوي شي حتى انعجب بي براحتي بدون مضميري يأنبني
رونق.... عبالي حتروحين تعترفيله
غرام ... باعي اذا تحبين تاخذين رأينا بشي يمج اني ورونق مستشارات علاقات الفاشله
رونق.... ههههههه اي شي سوينا لاسوي
نبأ.... كلولي شسوي هسه
غرام ... كل مينزل بالسناب صوره اخذيلها سكرين
نبأ... لا عزه ولج يشوفها
غرام ... هو هذا المطلوب خبلي كل مينزل اخذيله صوره من شوفي ظلي صافنه عليه حسسيه بالاعجاب بدون متكليله

نبأ... اكللكم بطني كامت توجعني خاف يكول لاسد
غرام .... لا قابل زعطوط مثلج باعي هو اول وتالي حيعوفج ومحيزوجج بس يكفيج شرف المحاوله
نبإ..... شكد بومه انتي تهبطين معنويات اكبر واحد

غرام ..... هذا اليحجي صدك يكلوله بومه

رونق.... انتي تلوكي من شوفيه صدك جذب اذا انتي بعدج تلبسين جواريب ام الكركش بالمدرسه
نبأ.... طاح حظج هي مره وحده لابستها وبعد ماعدتها
رونق... ترديني احجي الصدك عوفيه خل نتخرج ونداوم كليه ونشوف حياتنا شمصخمه بالسوالف
نبأ.... سديتو نفسي الله يسد نفسكم بطلت
غرام ... لا عوفيها معليج بيها سوي الي ترديه
نبأ... زين شون اعترفتو انتو لاسد وانمار
غرام ... بالنسبه الي هو الي اعترف
رونق... حتى اني
نبأ... لعد اني حروح اعترفله نسوي تغيير
رونق... هههههه اي عفيه

غرام ... نزلنا جوه جانت امي جايه وعماتي كلهم جوه فتزلنا كعدنا يمهم وديسولفون ويضحكون فات اسد جان يهلهلون اني ظليت اباع عليه بس ابد مباع عليه وره رجعنا للبيت ثاني يوم ماكو دوام كعدت احضر للكليه باوعت على هدومي نصهن اسد جايبهن الي رحت لامي كتلها اريد اروح للسوك اشتري ملابس
صح ظلت دكلي عندج كومه من هالسوالف بالاخير اقتنعت
كالت بيوم ماعندج شي روح
لليل حضرت ملابسي ونمت كعدت صبح بدلتوحضرت نفسي جنت متاكده اسد واكفلي مثل يوم بس من اجه الخط وطلعت مالكيته فشلني رحت للكليه فتنا محاضره وكملنا نزلت جوه اريد اروح للمكتبه
داشتري ملزمه طلعت فلوس جان واحد من وره يكول لاتاخذ منها
نداريت لكيته فراس
كتله لا عفيه لتاخذ منه بس هو جان اسرع انطه لابو المكتبه
طلعت وره واني بيدي الفلوس اريدها ياخذها

عفيه تفضل هذه الفلوس
فراس ... بالحرام ماخذها
غرام .... لا عفيه ماريد
فراس ... عزميني بيها
غرام ... عفيه حتبدي محاضرتي اخذ الفلوس
فراس ... والله ماخذها حلفت  كتلج عزميني بيها
غرام ... ماشي ... عفته ومشيت طبعا ضوجني رجعت بسرعه لان محاضرتي حتبدي
كملت محاضره رحت للكافتريا اشتريتله لفه وقوطيه ونستله ام ربع
على كد فلوس الملزمه رجعت ادرو عليه ماكو بالاخير صعدتله للشعبه مالته لكيت جماعته وهو ماكو استحيت اروح اسئل عليه فشفت بنيه ويايه بالخط هي وياه فرحت سلمت عليها وسئلتها عليه كالت راح لغرفه الدكتور فنطيتها الاكل وفهمتها السالفه وكتلها من يجي كليله بعد متطلبني هي ظلت تضحك عفتها ورجعت لصديقاتي وصار وكد الطلعه وجيت الخط فطلعت رحت ركبت بالخط فجتي البنيه نفسها اسمها كوثر الي نطيتها لغراض
كلتلي ترى انطيته الاكل عباله اني جايبتله بس كتله هاي غرام جابته ودكول بعد ميطلبني ولج بسرعه اخذ الاكل وضحكه شكت حلكه
نوب اصدقائه شافو دياكل هجمو عليه وهو حضن الاكل حتى محد يمد ايده عليه ويكللهم هذا بس ريحه الحب

غرام ... عزه بعينه ياحب هذا شون مجلب خبلني والله ماكو هيج لزكه

كوثر ... ترى خوش ولد والله ماعده علاقه هواي بالبنات اغلب وقته ويه اصدقائه
غرام ... شسويله بس يلح هواي وديضوجني اليوم حرجني كدام ابو المكتبه والله
كوثر ... لا ترى عادي حتى اني ولد شعبتي اذا شافوني يم الكافتريا ييقبلون الا همه يدفعون هذا دليل على رجولتهم
غرام ...هههههه يله همزين سديت ديني حتى لايظل يجي ويروح

رجعت للبيت واسد ماكو بالباب يربي شبي طبيت للبيت سلمت على امي ورونق وصعدت ابدل اجتي ورايه ركض رونق
اول مافاتت كتلها خير

رونق... ولج تعرفين منو بيت عمو
غرام ... منو
رونق... سرى
غرام ... جذب جابها
رونق... ولج من دانزل من الخط لكيت اسد ديطبك وهي نزلت من السياره وفاتو حتى نبأ كالت هاي جابها
غرام ... ماعرف عبالك واحد ضربني بحديده على راسي نوب ظليت صافنه
رونق... باعي خابرت قبل شويه نبأ وكلتلي جايه تتغده لان باجر يلتحق اسد
غرام .... خل روح لبيت عمو نشوفها الله عليج
رونق ... يمعود خل يولون اعرفج تظلين تاكلين بكلبج بعدين تكلبيها مناحه
غرام ... والله ماسوي شي بس اشوفها
رونق... خل نتغده وروح هي باقيه اصلا

غرام ... غسلت بدلت ونزلنا تغدينا طبعا بسرعه بسرعه بس اريد اروح كملنا اكل صعدت فوك لابست بنطرون كابوي وقميص طويل فوكاه وخليت مكياج خفيف وعطر سبحت بي وعدلت شعري فاتت عليه رونق

رونق... يمه شبسرعه بدلتي هستوج صعدتي
غرام ... اكلج هذا حلو لو ابدله
رونق... اكلج يعني طول عمرج تروحين بالعبايه هسه حتبدلين خليج طبيعيه
غرام ... لا والله طبيعيه يله بدلي
رونق... شبدل هي عبايه وابوج الله يرحمه
غرام ... يله بسرعه
لابست رونق عبايه واني لابست عبايه فوك ملابسي ولابسنا شال ونزلنا امي كاعده بالهول فتنا عليها

ام غرام ... ها وين العزم
غرام ... حروح للبيت عمو
ام غرام ... يابيت عمو دنيا ظهر
غرام ... مو جايه خطيبه اسد دروح نشوفها
ام غرام ... امشن طبن جوه عدهم خطار شعدجن رايحات
رونق... والله منتاخر بسرعه نسلم ونزجع
ام غرام ... ماما عيب رايحات
غرام ... والله بس نسلم حبابه
ام غرام ... تروحن سلمن وترجعن افتهمتن
رونق... اي والله منتاخر

غرام ... طلعنا اني ورنق رحنا لبيت عمي فتنا جانت الباب مفتوح كبل للمطبخ لكينا مرت عمي ونبأ وايمان فتنا سلمنا
مرت عمي كالت ليش مجتي امكم مرت اسد هنا
كتلها مقبلت تستحي بالكوه خلتنا نجي كالت هسه اخابرها تجي تشرب جاي ويانه
رحنا للهول ماكو احد بس جلال وفهد وعمي سلمنا وكعدنا فهد ديلعب بتليفون كاعد بصفي كتله وين العروسه

فهد ... بغرفه الخطار هي والعريس
غرام ... يمه كلبي نوب وحدهم ظليت كلسع اباع على باب الخطار بالكي تنفتح وبودي افوت مداهمه عليهم
فهد ... حتنعوج ركبتج هلكد مدايرتها عالباب
غرام ... لا عادي بس اريد اشوفها
فهد ... شوفيها ححاول اصدك
غرام ... عزه فهد شديلمج رجعت كعدت عدل اجتي نبأ يمنا كتلها اريد افوتلهم حموت
نبأ... لتخافين مديسون شي هو كاعد على صفحه وهي على صفحه البنيه صراحه محبيتها
رونق... ليش
نبأ... مادري يااختي حسيتها خفيفه ولج بسرعه ضربت ميانه ويه فهد
رونق... شكو بيها
غرام .... هسه اريد افوت الله عليج
نبأ... امشي كومن ندخل عادي

غرام .. رحنا وكفنا يم باب الاستقبال دكت الباب وفاتت اني بسرعه مديت راسي اريد اشوفهم شديسون صدك مثل مكالت كل واحد بصفحه دخلنا نبأ كلتلها سرى بنات عمي جوي يسلمن عليج هي كامت  سلمت علينا اني نداريت على اسد الي عيونه حتطلع اعتقد ديسائل شنو الجرئ الي عندي بحيث جايه
كعدت وخليت رجل على رجل رونق كلتلها
رونق... شونج سرى
سرى ... الحمدلله
غرام ... ظلت تحجي هي ورونق طبعا رونق دتستجوبها مو تسولف وياها اني بس اباع عليها
جان تندار عليه دكلي
سرى ... اني شايفتج قبل بالمدرسه
غرام ... ها صدك اني مشايفتج
سرى ... اي مو اني اكبر منج بسنتين
غرام ... ها ماعرف هيج اني مشهوره وتعرفيني
سرى ... اي مو انتي هواي طلعين ويه المتفوقين بيوم الخميس جنتي
غرام .... ها اي صح
سرى ... قبل شويه جنت احجي لاسد عليج اكله شكد محبوبه غرام وره مرحتو كل اهلي يسئلون على ام الاحمر
غرام .... صدك ههههه حبيبتي من ذوقج اباع على اسد يكلب بتليفون
سرى ... انتي وين داومين هسه
غرام ... اني مرحله اولى طب اسنان
سرى ... شكد حلو يله حتى تعالجينا بلاش
غرام .... هههه اي تدللين ( بكلبي اكول بس تعالي لاشلع سنونج كلها )
رونق... انتي وين داومين
سرى .. اني بالكوه طلعت من السادس وكعدت بالبيت ماحب دراسه كلش
نبأ... حرامات ليش متكملين
سرى ... والله مالي واهس بدراسه

غرام ... ظلن البنات يسئلنها وهي جاوب بالاخير اسد مثل الحس علينا جان يكوم كلنا

اسد... عوفوا عاد مرتي ضوجتوها
غرام ... اني شنو كمت افور فور ظليت اعصر بيدي اريد اكوم املخه هو وياها نوب هي تضحك عبالها ديتغزل بيها متدري متعمد يحجي كدامي هيج حتى اضوج  شو هذا كام ومدلها ايده وكومها كلها تعالي اشوفج غرفتنا
وهي كامت وياه
اني اباع عليهم والله دمعه بطرف عيني وكلبي يوجعني اريد اصرخ بس طلعوا باوعت على رونق جان دكلي
رونق... كتلج حتكلبيها مناحه
غرام ... هذا لزم ايدها كدامي عادي
نبأ... تعالو نصعد فوك
رونق... انجبي انتي اللخ امشي غرام خل نرجع للبيت
نبأ... اكلج ترى مبينه سوه هيج كدامج حتى يغورج والله كل مافوتلهم اشوف اسد يباع بتليفون وهي تحجي وهو بس اي صدك لا
ابقو خل اشوفهم واجي

غرام ... راحت نبأ طبعا اني بالكوه لازمه نفسي مابجي جتي كالت اكلكم كلشي مديسون اصلا باب الغرفه مفتوحه كلها وهي كاعده عالجربايه وهو واكف يم ميز تواليت

رونق... عزه بعينج دخلتي عليهم
نبأ... لا سويت نفسي اروح لغرفتي همه اصلا فاتحين الباب
غرام ... امشي رونق نرجع للبيت ياريت مجايه
رونق... امشي نرجع كتلج منجي

اسد... قررت بعد معليه بغرام شتريد سوي خل سوي واني التفت لحياتي قبل لا التحق امي ظلت دكلي جيب خطيبتك خل تتغده ويانه جيبها لحت عليه المهم رحت جبتها وجيت تغدينا وهي شو انطلقت ويه اهلي سوالف وضحك اني مجان الي واهس احجي وياها بس جنت اجاوب لان خطيه مالها ذنب
جنت كاعد وياها بوحدنا وره الغده تفاجئت من لكيت غرام داخله علينا وظلت تباع علينا مثل الي دشوفنا اول مره سلمت عليها وكعدت بس ظلت خازره سرى ومن تحجي ويه سرى مبينه من وره خشمها بالكوه حاصر ضحكتي شفت سرى انطلقت وياهن فكلت خل اضوجها  كومتها لسرى بحجه اشوفها الغرفه صعدت فوك اني وياها هي ظلت تحجي عالغرفه حلوه ويرادلها تعديل ومدري شنو بس اني بالي يم غرام وتندمت لان سويت هيج كدامها اكيد هسه نقهرت مني فوك قهرها

شويه ونزلت جوه اني وسرى لكيتها رايحه هي ورونق طبعا كلش ضجت لان اكيد انقهرت مجان المفروض اسوي هيج بس احب اشوفها تغار عليه شعور مريح اشوفها تحبني بعدها

رجعت سرى لبيتهم ومن رجعت مريت على بيت عمي بحجه اسلم لان باجر التحق واني اريد اشوفها
دكيت الجرس وسمعت صوتها دكول منو
كتلها اني فتحت الباب ومباوعت عليه ظلت تباع بالكاع
كتلها شونج

غرام ... بالكوه سكتت من البجي ندك الجرس وطلعت اشوف منو من عرفت هو بسرعه فتحت الباب طبعا ماكدر اباع بعيونه لان وجهي مبين باجيه لحد مكايله بس
بس كلي شونج خنكتني العبره وبالكوه لازمه نفسي مابجي بحيث بس هزيت راسي ماكدر احجي لان اعرف صوتي حيبين عليه الرجفه

اسد... غرام باعي عليه
غرام ... رفعت راسي اله  اظاهر بالقوه
اسد... شبيها عيونج حمر
غرام ... مابيها حساسيه يمكن
اسد... من شوكت عدج حساسيه
غرام ... ظليت ساكته كتله ادخل حظل واكف هنا
عفته ودخلت جوه هو يتمشى ورايه دخل جوه وكعد يسولف ويه امي اني ظليت بالمطبخ ماكدر اروح

اجتي رونق  كالت امي دكول سوو جاي فاني جنت واكفه خاله ظهري عالكاونتر رونق كلتلي غرام صرصر وتباع عليه اني كلت هذا اكيد صاعد عليه كمت اكمز واعيط وينه وينه وينه على عياطي اجوي اسد وامي دكول شكو
اني اكمز اكلها صرصر عليه  اسد بسرعه لزمني من جتفي

اسد... اوكفي خل اشوفه وينه
غرام .... طبعا اني حتى شعري فتحته واكمز نوب احس اكو شي بجسمي ديتحرك كمت انفض بجامه وهي دلعه بيها شويه واكيد اسد شاف صدري

رونق... ولج جذب ماكو ماكو داشاقهد
غرام ... اني بس كالت جذب بسرعه وكفت اني وامي واسد نباع عليها خرب اني اريد الزمها واذبحها

رونق.. مو شفتج عندج شهكه كلت اجفلج وتروح

غرام ... اني كالت هيج يمه رحت ظليت اضرب بيها  من كل كلبي
اسد يرزل بيها يكلها لو صاير بيها شي من وره هالجفله امي ترزل بيها

عزه فلم فلم وهي بس تضحك عزه رحت كعدت يمهم واسد احسه خاف عليه كلسع يباع عليه يكلي شون صرتي واني بس اهز براسي اتخبل من الحشرات عندي فوبيا منهن

اني ظليت ساكته ماحجيت شي وره التكمز الكمزته امي راحت للمطبخ بقينا بس اني واسد جان يكلي

اسد... غرامي بيج شي
غرام ... باوعت عليه اول مره وره متفاركنا يكلي غرامي عزه كلبي
كتله ردت اموت( داشوفه شيسوي)
اسد.. . شنو هالحجي اسم الله
غرام ... هي جفله راحت لحال سبيلها بس اني ظليت مسويه نفسي متاثره بيها من شفت اسد شون خاف عليه حبيبي بعده يخاف عليه

من ديطلع سلم وطلع فاني ورونق دنوصله للباب هو يمشي قبلنا رونق دفعتني وطبت بقيت بس اني وياه بطرمه فتح الباب ندار كلي ديري بالج على على عيونج من الحساسيه
اني باوعت عليه كتله اي ضحك وطلع ..... يتبع ❤️