رواية حب جنوني الفصل التاسع وثلاثون 39 - بقلم سوزان ليث

رجعت للبيت كلت خل اسبح واروح لمرت عمي احاجيها ماسمعنا غير الباب الخارجي نهجمت بالدك ويصيحون الحكوا جلال.

طبعا طلعت اركض للشارع شفت هوسه ليغاد من بيتنا ركضت عليهم لكيت جلال وانمار يتعاركون وناس تفاكك بيهم
بالكوه فاككناهم وسحبتهم اثنينهم للبيت
الحجي استلمهم رزايل 
احجي ويه جلال ليش تعاركتوا مايحجي وانمار مايحجي وجهه خريطه صاير وكلسع جلال يريد يهجم على انمار
اخذت جلال ودخلته للاستقبال
كتله احجي ليش تعاركتوا
جلال... هذا واحد ساقط والله بالحرام اذا ماربيه ماسمى جلال
اسد... صل عالنبي اول شي واحجي صار
جلال... ماكو شي شغله بيني وبينه
اسد... جلال انت جبير شنو هالتصرفات مال جهال صدك جذب
جلال... اسد ودين محمد وهذا شاربي مو عليه اذا ماكسر خشمه اني مو ابن ابوي
اسد... هسه غير افهم شبي شمسوي
جلال ... ماكو شي شغله بيني وبينه

اسد... طبعا ماقبل يحجي اي شي طلعت لكيت انمار رايح وابويه ظل يسئلني كتله ماقبل يحجي كلي انمار هم محجى
كتله حجي مادام انمار وجهه خريطه صاير يعني هو المجاوز على جلال           سوزان ليث
طاح حظهم كل واحد شطوله ويتعاركون عفتهم وصعدت شفت غرام  داكه جم مره اكيد سمعت بالهوسه
دكيت عليها بسرعه جاوبت
الو اسد
ها حبيبتي
اسد شكو والله كلبي حيوكف
ماكو شي حبيبتي هذا جلال وانمار متعاركين وفضت
ليش تعاركوا
ماعرف ماقبلو يحجون
اكلج عيني فد شويه اجي احجي ويه امج
عزه لا عفيه ماريد بطلت
شنو المتريديه بت الاوادم
شو خفت عزه
على شنو تخافين المهم شون مزاج امج اليوم
زين يعني قبل شويه كعدت من النوم راسها جان يوجعها
زين سويلها جاي حتى صحصح يله خل اسبح واجي
اوكي حب باي
باي

رونق.. شكو منو متعارك
غرام ... جلال وانمار متعاركين
رونق... عزه ليش
غرام ... ماعرف اسد يكول مقبلوا يحجون
رونق... خاف تعاركوا بسببي
غرام ... لا معقوله ماعرف والله

رونق.... ظليت خايفه يربي ليش تعاركوا همه صايرين بس واحد يشوف الثاني يتعاركون
اخابر جلال لا عيني قابل شكله ليش تعاركت ويه انمار هسه عباله ظل بالي على انمار. سوزان ليث

ندك الجرس رحت فتحت الباب
هلو
هلو دبدوب شونج
زينه
عمتي كاعده
اي جوه تفضل

غرام ... اني سمعت الجرس اندك صعدت فوك عزه كمت ارجف ماعرف رد فعل امي شنو
شويه ونزلت جوه وكفت عالدرج اسمع كلامهم
بالبدايه جان حجي اسد عادي ودحجيلها ليش فصخ وهيج وامي دكله كلشي قسمه ونصيب ومن هالحجي

جان يكله
اسد ... عمه تعرفين اني من يوم الي جنت صغير واني تقريبا كله يمكم وانتي مو مرت عمي انتي امي والله شاهد عليه

ام غرام ... يا بعد عمري وانت ابني حبيبي
اسد... اليوم جاي اطلب منج طلب وان شاءالله مترديني
ام غرام ... ياا عيوني الك
اسد... تسلم عيونج عمه اني جاي اطلب ايد غرام الي
ام غرام .... سكوووووووت
اسد... اعرف فاجئتج ويجوز ممتوقعتها بس عمه وروح امي اذا وافقتي او لا انتي تبقين مثل امي ولا يتغير شي
ام غرام ... والله يا اسد ماعرف شكول يعني والله انت ونعم منك اني بالنسبه الي اكلك كبع واخذ مالكه واحد احسن منك لابنتي
بس لازم اخذ رئيها بالاول

اسد... عمه يعني جاي اطلب ايديها وماعرف جوابها صدك جذب
ام غرام ... يعني موافقه
اسد... عيب عليج شنو سالفه

غرام ... اني سمعته هيج حجه يمه كلبي راد يوكف يعني ليش هيج فضحتني كدام امي وكتلها اني موافقه عزه بعيني

ام غرام ... وجدك
اسد... جدي قبل بس كلي اخذ موافقتج
ام غرام... والله يااسد اذا هي موافقه ورايدتك اني شريد اكول غير الله يسعدكم

غرام .... هذا اللحظه من كل قلبي تمنيت كل بنيه تعيشها مشاعر جميله جدا والاجمل حتعيشين ويه شخص تحبيه ويحبج
من كل كلبي تمنيت كل شخص يعيش هذا اللحظه الجميله

ظلو يسولفون طبعا اني ماكدرت انزل ظليت شويه عالدرج شويه اصعد شويه انزل
لحد ماطلع جنت كاعده بالغرفه دخلت عليه امي طبعا الخجل والمستحى نزل عندي ماكدرت ارفع راسي
اجتي كعدت يمي كال
ام غرام ... اول شي اعرف انت تعرفين اسد ليش جان عدنا بس ياغرام ادري اسد يخاف عليج وحيسوي المستحيل حتى يخليج سعيده وياه بس يمه اسد عصبي وانتي عناد مالي راسج والاعصاب ويه العناد ميتراهمون
وهذا زواج يعني مو لعبه اني جاي اسمع موافقتج لاتنطيني جواب بسرعه يمه فكري زين سوي استخاره طلبي من الله هو الي يختارلج الصح وزواج ترى مو جم يوم ويخلص هذا يظل وياج العمر كله حبيبت كلبي مو بعدين شفتي يعيط عليج تجين دكليلي ماريده

غرام ... ماما هيج اني تافه علمود عيطه ارجع

ام غرام ... لا يمه مو تافه بس انتي مرات تختارين بكلبج مو بعقلج
فكري زين قبل لا جاوبين

غرام عافتني  واني ظليت افكر اني احبه لاسد وهذا كافي شريد بعد صح تجي فترات عصبي ويعاند بس اني ماكدر بدونه

خفت اسوي استخاره بالبدايه كلت خاف يطلع مو زين الي وبعد ماكدر
خابرني اسد كلي سوت امج من رحت حجيتله الكالته هو ظل يكلي سوي استخاره
شايفين عريس يكول لعروسته سوي استخاره شوفيني اني زين الج لو لا اسد كلي هذا الشي

بالليل صليت صلاه الاستخاره وظليت ادعي
ربي اذا اسد مو زين الي خلي يصير زين الي واذا مو من نصيبي خلي يصير من نصيبي
ظليت ادعي دعيت كومه نمت كلشي محلمت 😂
ثاني يوم نفس الشي هم صليت استخاره وهم محلمت
ثالث يوم حلمت حلم ( كاعده بغرفتي وجانت دنيا تمطر عود اني خفت رحت طلعت حذاء جان مثل البوت لابسته كلت حتى من اطلع ماتبلل وفعلا طلعت وجنت امشي براحتي مخايفه من المطر )

كعدت من النوم اول مافتحت عيوني الحلم بالي نزلت ركض على امي جانت كاعده تتريك اول مشافتني كالت ها خير شحلمتي كتلها شعرفج

كالت مبينه من نزلتج وانتي مكفشه
كعدت حجيتلها حلمي امي ظلت مبتسمه الي ودكول خير خير ان شاءالله بعدين كتلها شنو يدل كالت الحذاء رجال بالحلم وبوت يعني يحافظ عليج بعتبار البوت يحفظ القدم من المطر  هيج شي
كتلها يعني اسد زين الي
كالت ان شاءالله

وراها اجتي ام اسد اتفقت ويه امي علمود الخطوبه
بدا دوامي وبديت اداوم اسد جان بالدوام هالفتره كالو من يرجع صير الخطوبه
نبأ... رجعنا نحجي اني ومحمد مثل قبل وكامت تكثر جياته لبيتنا مرات اني افتحله الباب هو يظل مبتسملي ويكلي صيحيلي اسد ويغمزلي
ههههه جنت عايشه ايام كلش حلوه
مرات يسولفلي على هاله واني جنت اصير مصالحه اجتماعيه اظل اكله خطيه وخطيه عود اني صديقته
مرات احسه يحجي هيج حتى يضوجني
بمره خابرته جان مشغول ظل هواي مشغول بعدين دزيتله مسج حنام اني تصبح على خير

كعدت صبح شفت تليفوني شبي هذا ممعبرني شو
دكيتله
فحجيت وياه فكتله وينك البارحه ماكو وليش مدكيت صدمني صدمه عمري من كلي جنت احجي ويه هاله ويمكن حنرجع سوه
اني ظليت امتمت بالحجي ظليت اكله ها اي احسن اي زين
تحججت باامي صيحني وسديته لان ماكدر بعد احجي ظليت ابجي على حظي
لليل ظل يدكلي اني ماجاوب ابد دزلي مسجات وينج ظل بالي هم مجاوبته
كلت هاهيه خل اعوفه علاقتنا غلط اني مامعتبرته صديق اني احبه وهو ميحبني والمشكله اعرف بهذا الشي
كلت خل غلق جهازي والتهي بدراستي واني هالسنه سادس
غلقته ظليت يومين غالقته
ندك الجرس طلع اسد يشوف منو دخل وياه محمد طبعا محمد ماعرف ليش حسيته اجه علمودي من نظراته جانت عليه بس اني منطيت اهميه اله طلعت من الهول وصعدت فوك .

رونق... هالفتره طبعا غرام متخبله حارت شتريد سوي مره دكلي اسوي عرسي بقاعه مره دكلي بدال القاعه نسافر شهر عسل مره دكول اني اسمي ابني شبل اشكال اشكال حجت وهي خطوبه بعدهم ممخطوبين
وره عركه جلال وانمار اني بعد ماشفت جلال من بدا الدوام فاني ونبأ سجلنا انكليزي  بمره جلال هو الي وصلنا بس جلال كلش متغير ويايه تخيلو صعدت كتله هلو جلال مجاوبني
كلت يجوز مسمع
مره ثاني هم من ديرجعنا هم مرد عليه السلام وكالب وجهه عليه كلش

وراها صارت جم مره اروح لبيت عمي هم يشوفني وميسلم ويايه ولا يحجي فد انقهرت يعني ماعرف ليش هيج ديعاملني
واني مامسويه شي وياه
اكثر من مره اريد اسئله بس اكول لا ماكبر راسه حتى غرام ونبأ انتبهو عليه

بمره خابرتني نبأ كالت جلال وانمار هم متعاركين وجدي واصله الخبر وهسه خابر على ابويه كله دزلي جلال
طبعا اني كمت ارجف يعني مبينه سالفه عليه لان جلال وره العركه ميحجي ويايه

راح جلال لجده حتى يشوفه شيريد وهو اصلا يعرف جده ليش داز عليه لان اكيد وصلوله عركاته ويه انمار والكل يريد يعرف السبب
لما وصل لبيت جده اتفاجئ باانمار موجود وكاعد يم جده
جده بدا يحجي وياهم بااعتبارهم  كبار لا رزل ولا صيح

الجد... ذيج المره  سمعت متعاركين ومتلازمين بيناتكم بشارع وماحجيت شي كلت ولد عم يوم يومين ويصالحون مع العلم انتو اول اثنين من احفادي هيج يسون
بس ترجعون وهم تتعاركون لا هاي مو حاله
كلي انت انمار شنو سبب العركه

انمار ... جدي تعارك ويايه لان كتله اني اريد ازوج رونق

الجد ... وشون تزوجها وانت  عاقد على وحده وحتزوج بعد جم يوم

انمار ... جدي اني ماريدها وابوي هو الي جبرني عليها

الجد.. وانت جلال ليش تعاركت وياه

جلال ... جدي هذا واحد جذاب ومايحجي الصدك مو علمود راد رونق اني تعاركت وياه

الجد... كلي انت على شنو تعاركتوا

جلال... جدي سالفه ماتنحجي بس جدي اني طالب منك ايد رونق

الجد .... والله ماعرف شكول ولد العم يتعاركون على بت عمهم وين صايره هاي

جلال ... جدي انمار ماله حق بيها هو خاطب وحيزوج ورونق تريدني ماتريد انمار

جد .... نسئل البنيه ونشوف ردها بس قسما بالله اذا تعاركتو مره ثانيه ماتلمون الا نفسكم ويله انت روح بوس ابن عمك وبطل سوالف صرت رجال
انمار تمشى لانمار صح جان مجبور هو يروح يسلم عليه بس عرف يلعبها صح راح تقرب عليه كله
شون الك نفس تزوج وحده غيرك لمسها

جلال ... وهو يعصر ايد انمار بكل قوه كتلتك على ايدي نذل

رونق ... رحت بيت عمي حتى اعرف صاير جان جلال بعده مراجع فاني جنت فوك يم نبأ دنسولف فجنا فاتحين الباب لان حتى نسمع اذا رجع جلال

ماحسينه الا باب الغرفه ندفعت وجان وراها جلال

جلال ... نبأ طلعي بره داحجي ويه رونق

نبإ.... اي

رونق... جلال جان جدا غريب وحاله اول مره اشوفها عصبي كلش
من دكوم نبأ لازمتا بس هي هدت ايدي وكامت وطلعت

جلال ... شنو الصاير بينج وبين انمار

رونق... ظليت مستغربه شنو كتله شنو الصاير

جلال... رونق احجيلي لتخافين مني ماسويلج شي

رونق... شنو شحجي مصاير شي اني حتى مشايفته صار هواي

جلال .... وهو يعصر ايده بقوه ومديكدر يكول الي بكلبه

رونق انمار كسرج

رونق... طبعا اخذت معنى كسرني غير معنى الي يقصده كتله اي طبعا كسرني وكل ماشوفه اذكر كسرتي وياه ماشفت الا جلال دفر الكرسي الجان يمه
اني شنو ظليت جامده بكلبي كلت شبي هذا مو يعرف انمار اذاني

جلال ... شوكت

رونق.. شنو شوكت ظليت صافنه عليه مدافتهم شنو الي شوكت كلت يجوز يسئل على علاقتي وياه شوكت بدت كتله بالمتوسطه
ماشفت الا جلال لازمني من شعري ويحجي بكل عصبيه كانما شخص يريد يقتل شخص

جلال ... شون تخلي هيج يسوي ولج كلي بس انه ماصدكته ماصدكته كتله مستحيل تنطيك نفسها

رونق... شايفين مثل الاطرش بزفه اني جان هيج شكلي من جلال يحجي ويايه
ظليت لازمه ايده الي لازم بيها شعري كتله جلال الله يخليك شبيك انت مو تدري بالنمار

جلال ... ولج شون تخلي ياخذج شون

رونق... والله مماخذني جان يتوسل بيه اطلع وياه بس اني ماقبل من حجيت هيج بسرعه هد شعري وظل يمسح بوجهه
جان يكلي

جلال ... رونق تعرفين اني وانمار ليش تعاركنا

رونق... هزيت راسي لا

جلال ... لج يكلي انت حتاخذ وحده مستعمله تعرفين شنو مستعمله

رونق... ظليت اباع على جلال كتله يعني شنو
جلال... يعني انتي مو وسكت
رونق ... اني خليت ايدي على حلكي مامصدكه الي افتهمته بس دموعي كامت تنزل واحس جسمي يرجف
كتله جلال والله جذاب والله ملامسني وروح بابا ملامسني
طبعا انهاريت ظليت واكفه واحلفله لجلال ودموعي شلالات صايرات

جلال ... كافي اش كافي ادري ادري بيج كافي
رونق... ظليت اشهك وابجي شون هيج يحجي ويتهمني بعد كل الي سواه هيج يحجي ويتهمني بشرفي

جلال ... فوكاها اكلج شوكت دكليلي بالمتوسطه والله يالله ردت اموتج

رونق... اني ابجي كتله اني عبالي دكلي صارلكم شكد علاقه معبالي تقصد غير شي وابجي

جلال ... كافي يربي شكد غبيه

رونق... ومشمدريني وانت تحجي بالالغاز
جلال ... انمار كال لجدي يريدج

رونق.. والله لو يظل اخر واحد بدنيا ماريده حيوان حسبي الله ونعم الوكيل بي شون يحجي عليه هيج

جلال ... هذا عباله اني وياج واحد يحب الثاني كال خل اكله هيج حتى اعوفج بس والله كتلته كتله شوهته

رونق... يستاهل الله يموته ان شاءالله جلال خاف يكول لجدي

جلال ... ميكدر يحجي شي بعد اني طلبت ايدج من جدي......... يتبع ❤️