رواية حب جنوني الفصل الثالث وثلاثون 33 - بقلم سوزان ليث

اسد... لتبجين احجيلي غرام لتخافين شنو بينج وبينه
غرام ... والله ماعندي شي وياه وداعت امي
اسد... لتخبليني مترديه تحجين وياه شنو معناها تحجين ويه شنو وين كاعدين
غرام ... مجرد زميل والله
اسد... احجيها عالبطه هاي مو عليه ولج مو عليه افتهمتي كليه بعد ماكو وحق الله اكسر رجلج اذا عتبتي باب بيتكم زين ودين محمد هالمره محد يخلصج مني
غرام .... خرب يومها هالكليه كل شويه يريد يبطلني من الخوف هزيت راسي ب اي بس اريد  اطلع من هذه غرفه الاعترافات

اسد... خلي بالج شي واحد انتي حلالي و الي يفكر يوصلج والله احسب الله ماخلقه وهذا الحيوان ابن .... اني اعلمه

غرام ... اني ابجي واهز راسي  اخاف اعترض عصبيه عصبيه عصبيه اول مره اشوفها شكد متعصب قبل بس هالمره مو مثل كل مره

اسد... كافي تبجين

غرام .. اي
اسد.... كافي داكلج
غرام ... اي مدابجي
اسد... وهاي دموع شنو دموع الفرح مثلا
غرام ... ظليت امدنجه وابجي واحس نفسي حاصره البجيه الثكيله بس متحملت خليت ايدي على وجهي وكمت ابجي من كل كلبي
ماحسيت غير اني مجروره لحضن اسد اني مثل الي وصلت لبر الامان جلبت بتشيرته وبجي بجي بجي هو ساكت ماحجه شي بس يمسح على راسي
جان يبوسني من راسي كلي كافي داكلج بخشونه
كتله واني ابجي واشهك انت انت ليش عفتني اني حجيت لان جنت فاقده واحس شكو بجيه ضامتها طلعتها من حجيت هيج حضني اقوه وظل يبوس براسي
ويكلي اش ما عفتج
وخرت منه واني احس عيوني توجعني من البجي وراسي كمت امسح بدموعي هو يباع عليه كملت جان يرد يجرني لحضنه احلا حضن حضنته اله حضن جان مليان اشتياق ولهفه وحب وخوف وكله مخلوط ظلينا واحد حاضن الثاني بس صوت انفاسنا تنسمع بعدت عنه جان يلزم راسي بيديه الاثنين ويبوسني من خدي وظل يباع بعيوني كلي

اسد... احبج وعمري ماحبيت غيرج وماكو دقيقه تمر اذا مو انتي بيها مو حب هذا طركاعه ولج طركاعه

غرام ... ظليت اباع عليه وكلبي دكاته تركص
اسد ..... شكد تحبيني
غرام ... اكثر من روحي
اسد... لا كليلي شكد بيدج هلكد👋🏼. 👋🏼.
هلكد👋🏼. 👋🏼

غرام .... ضحكت عليه هاي الحركه شكد قديمه فتحت كل ايدي كتله هلكــــــــــــــــــــــــــد
جان يلزمني من خصري ويرفعني ويكلي ولج احبج والعباس احبج

غرام .... ظليت اضحك مثل الممصدكه نزلني بالكاع واني ضحكه منا لهناك

اخذني وكعدنا عالجربايه ظلينا واحد لازم ايد الثاني
سولفنا اني وياه كلشي حجيتله على كلشي صار وكلشي سويت حجيتله عن فراس ماضميت عليه كلمه كلت يعصب ميعصب بعد ماضم بس تفاجئت بيه ظل يبوس بيدي حجالي هو كلشي حجالي عن سرى وشون هو مشايفها مره اله وميريد يظلمها اكثر حجالي عن خوفه من سويت العمليه حجالي عن غيرته من يشوفني كاشخه ورايحه للدوام كومه شغلات حجينا
ماعرف شكد مر وقت بس ندكت الباب اني بسرعه وكفت

اسد... شبيج فزيتي حبيبي

غرام رحت فتحت الباب شفت نبأ سوتلي وينج صالج ساعه كتلها هسه اجي نداريت على اسد كتله يله لازم اروح

اسد.. ماشي حبيبتي امشي اوصلج

غرام ... نزلنا اني واسد ونبأ طلعت ويه اسد وطبيت لبيتنا ظلينا واكفين شويه بالطرمه نسولف وكل شويه اكله احبك
ويردلي اموت عليج مثل الوحده تريد تشبع منها يربي شكد حلو طلعت وجهي يبجي رجعت واني طايره من الفرحه شكد احبه جذب احب واحد غيره اخذت تليفون منه وسلمت عليه يمكن بال100مره كلسع اكله هالمره صدك باي ونرجع نسولف
طبيت للبيت واني فرحه مسايعتني صعدت فوك دخلت على رونق كتله هلوووووو كلتي
رونق... يمه رجعتي ضحكين واني  خابرت نبأ اسئل عليج كلتلي صارلها ساعه بغرفه اسد وجان صوته عالي بعدين سكتو فاني خفت كتلها دروحي شوفي خاف موتها ودفنها بالغرفه

غرام ... اي اجتني ☺️😊😁
رونق ... شنو شبيج عبالك دسوين دعايه مال معجون هيج ضاحكه
غرام ... رونق اني واسد رجعنا سوه
رونق... كولي والله
غرام ... والله والله
رونق...واخيرررا زين اوكفي مو خاطب هو شون رجعتوا
غرام ... اي بس كلي حيفصخ لان ميكدر يظلمها للبنيه وياه
رونق... بس خطيه شنو ذنبها هي
غرام ... ماعرف والله بس رونق تزوج واحد يحبها احسن متزوج واحد يحب غيرها
رونق.... وانتي هسه خايفه عليها لو خايفه لاسد يعوفج
غرام ... باعي هسه اني فرحانه عوفيني  هسه اخذت التليفون ودزيتله رساله لاسد📱 اشتاقيت ترى
جان بسرعه يدكلي ظلينا نحجي نحجي نحجي  لحد ماذن الفجر سدينا  وصلينا ونمت بس شنو مداكدر انام اتكلب واني مبتسمه
لحد ماغفيت
كعدت صبح رونق تكعد بيه كومي كومي تاخرتي كمت بالكوه كتلها ماداوم اليوم ورجعت نمت جنت كلش نعسانه
ب11 دك تليفون حسيت عليه شفته اسد يتصل جاوبته بسرعه
الو ها حبيبي
لك صح النوم ياحلو
شونك
من اسمع صوتج اصير بخير
وين انت اسمع صوت سيارات
اي طالع عندي شغله خلصتها وهسه راجع الج اجي اتغده يمكم
اي تعال اشتاقيتلك كلش
شو انتي طالعه عينج كلسع دكليلي مشتاقتلك عيب ترى اني اخجل
هههههههههه. فديته لليخجل
شويه واوصل كومي يله

سديت التليفون وظليت صافنه عالسكف اذكر صار البارحه وكلسع ابتسم
كمت دخلت سبحت ومشطت وخليت شويه مكياج خفيف ونزلت
امي جانت كاعده تباع تلفزيون رحت كعدت يمها كالت

ام غرام .... ها يمه شونج ليش مداومتي متوجعه
غرام ... لا ماعندي شي اليوم اكلج امي اليوم اسد يجي يتغده يمنا خابرني قبل شويه
ام غرام .... صدك ولج مامسويه غده اليوم شكد عيب كلت اطلع مال البارحه
غرام ... هسه ديله واذا مال البارحه
ام غرام ... لا شون عيب حكوم اسوي شي
غرام ... علميني اسوي فد حلويات عاجبني اسوي
ام غرام ... دكومي خل نشوف شعدنا مواد

غرام ... رحت اني وامي للمطبخ هي سوي غده واني اكلب بالنت على وصفه حلويات
خابرتني ساره فكمت بره المطبخ جاوبتها
كتلها هالايام ماداوم وحجيتلها على اسد بس كلتلي اليوم لامحه واحد يشبه اسد جان بكليتنا
طبعا اني مشوفتهم صوره اسد
كتلها لا ممعقوله شيجيبه للكليه واني ممداومه كالت والله ماعرف بس شفت واحد يشبه ولابس عسكري عبالي هو كتلها لا مو هوه
سديته ورجعت لامي شويه دك جرس طلعت افتحله لكيت اسد وتقاجئت لابس عسكري اني ظليت اباع عزه هذا صدك يجوز جان بكليتي بس ماسئلته نطاني علاكه كلي هاي حلويات ابدل واجي
اني طبيت وظليت افكر معقوله جان بكليتي شيسوي هذا
هو شويه اجه مبدل سلم على امي وراح كعد بالهول بس شنو اني احوص اريد اسئله بس ماسئلته ظليت كاعده يمه واسولف وياه
كتله وين جنت انت شو جنت لابس عسكري

اسد .. عندي شغله جان
غرام .... مممم عبالي اسوي حلويات بس همزين انت جبت
اسد... اي دنحتفل برجعتنا
غرام .... ههههه اش امي لتسمع
اسد... والله حتى لهذا خوفج اشتاقيت
غرام .... ههههه واني هم
اسد... هاج تليفوني خلي عالشحن حيطفه
غرام ... اخذت تليفونه وصعدت فوك لان شاحنه خليته دانزل اذكرت كلت بله خل اشوف مخابر سرى
فتحته وطبيت للسجل داك على رقم اخير شي بدون اسم
وماكو اسم سرى بس هي داكه مره بس ممجاوبها

رحت للرسايل شفته داز رساله لرقم نفس الرقم الداك عليه فتحت المسجات كاتبله وصلت للكليه انت وين
والرقم مجاوبه دقايق واجيك

اني ظليت صافنه منو هذا بالكليه رايح عليه اجه بالي فراس كلت معقوله راح لفراس زين شعرفه برقمه لا ممعقوله لعد منو هذا الراحله للكليه علموده

عفت التليفون ونزلت جوه امي كاعده دسولف واسد واني كعدت صافنه دافكر منو هذا  الراحله للكليه

اجتي رونق صعدت وياها للغرفه لازم اكللها كتلها اكلج ساره خابرتني دكلي شايفه واحد بالكليه يشبه اسد ولابس عسكري ومن رجع شفته جان لابس عسكري وبتليفونه رسايله تاكد جان بالكليه

رونق... عزه خاف راح لفراس
غرام ... لا شعرفه برقمه
رونق... انتي غبيه  يجوز دخله بالفيس
غرام ... لا خرب تليفونه جان خاله عشحن قبل شويه نزلته جان دخلت على الفيس مالته وشفت
نزلنا تغدينا طبعا اسد منطلق مظل شي مسولف بي حتى على دوامه واني بس خاله ايدي على خدي ومبتسمه رونق ضربتني برجلي دكلي شبيج حتاكليه للولد

رونق... وره سدت التليفون بوجهه  جلال بعد ماشفته مره جنت راجعه من المدرسه مشي اني وايمان ونبأ لان ابو الخط عاطله سيارته فوصلنا لاسواق جان اكو مجموعه ولد احنا مشينا عالرصيف جهه ثانيه ومشينا سريع حتى نعبرهم همه جانو يحجون حجي يتحرشون بس احنا شغلنا المحرك وسريع  مشينا  وعبرناهم وظلينا نمشي وصلنا لفرعنا جان سياره طبكت يمنا طلع جلال فتح الجامه جان يصيح صعدن بصوت عالي اني والبنات منعرف  كمنا نتراكض عالسياره اني ونبأ ليوره وايمان ليكدام جان يكول

جلال... شكو راجعات مشي وين الخط
ايمان... عاطله سيارته
جلال... صبح منو وداكم لعد
ايمان... اسد
نبأ... هذا شبي حيطك
رونق... ضحكت كتلها مادري جان يكلي
جلال... ضحكينا وياج ست رونق
رونق... باوعت عليه بالمرايا كتله وعقدت حواجبي كتله ماكو شي
رجعنا للبيت ونزلت كلت باي وطبيت للبيتنا

نبأ جتي العصر كالت جلال رزلنا اني وايمان رزاله غسل ولبس وبهذل احوالنا فاني كتلها شنو هذا كادر بس عليكم 24 ساعه يرزلكم كالت لا مو حتى فهد مرزله لان اسد كايله انت جيبهن بس فهد نسى
بالليل كاعده داكلب بتليفون لكيت صوره عجبتني سويتها مشاركه لصفحتي وكتبت مقصوده جانت صوره  👇🏻

كعدت انتظر جلال يقراها دخلتلي خاص نبأ دكلي خرب بيج شنو هاي ناشرتها ترى  مبينه تقصديه فكتلها لجلال حتى يبطل يطلع مراجله عليكم

لليل كاعده اقره تليفوني عالشحن بعيد عليه اجتني مسجات فايبر مسج وره مسج بحيث كلت عااا شكو شكو كمت رحت يمه هذا جلال
فتحت المحادثه دازلي صوره الي ناشرتها وكلي شنو هاي شتقصدين بيها  ست رونق
تردين اشوفج الزلمه شون يصير

اني خربت ضحك دزيتله اي بله شون يصير
جاوبني كلي طبعا متعرفين اللزلم لان اظاهر ذاك جان مره
اني من صدك ضجت كتله شتقصد انت
كلي تعرفين شقصد كتله والله عالاقل لحد هسه كاتل نفسه عليه ويتمنى ارضى
كلي منو هذا الي كام يخاف يفتح عليه خط من اخابره
كتله مو فاضي يجاوب ياهو اليجي
كلي لسانج طولان بس كصه على ايدي
كتله لابله ومنو انت حتى تكص لساني
كلي الايام جايه تعرفين اني منو

عفته وبعد مجاوبته ظليت اضحك يربي ليش احب اضوجه بس هو هم يضوجني بس دايما هيج اعامله بقسوه

ثاني يوم بدلت ونزلت تريكت اجتي نبأ عليه وطلعتلها شفت جلال كالت جلال حيوصلنا اني صارت كعدتي  وره جلال فحتى ماسلمت عليه جان يكلي متعرفين سلمين كتله اي ماعرف ونداريت عالجامه
وصلنا للمدرسه من جهتي شارع لازم انزل من الباب الثانيه دانزل كلي والله بيج كتله نداريت عليه كتله يربي شكد مكروه عفته ونزلت نبأ ظلت دكلي شكلج وشكتيله

برجعه طلعنا شفناه واكف فصعدت كلت هلو هو مجاوبني فد ضجت عباله اسكت باوع عليه بالمرايه وابتسم ابتسامه جانبيه كتله موصوجك البنات ندارن عليه كلولي شكو كتلهم ماكو ونداريت عالجامه من وصلنا للبيت واني افور شنو فشلني ومجاوب دانزل جان كرصته من جتفه كرصه قويه  وبالكوه لان هو عضلات ونزلت بسرعه سمعته يكول احتركت عشيرتج
طبيت لبيتنا احس نفسي انتصرت عليه

وره يومين امي كلتلي روحي ودي هذا الغراض المرت عمج اني اخذتها ورحت دكيت الجرس طلع فهد فتح الباب وطبيت خليت الغراض عالميز ونداريت اسولف ويه فهد كتله وين البنات كال فوك
فاني كلت خل اشوفهن قبل مارجع اني جايه جايه
صعدت فوك للبنات سلمت عليهن وسولفنا شويه وبعدين ايمان نزلت جوه كعدت بس اني ونبأ جان الباب تندك فتحها طلع جلال حتى ماسلم عليه
كلها لنبأ وين التراك النيلي كلتله بسطح شارته كلها صعدي جيبيه فاكامت طلعت من الغرفه شو هذا جلال ظل واكف باب الغرفه يباع عليه
كتله خير مضيع شي بوجهي
جلال... اي مضيع كرصه
رونق... باوعت عليه وهزيت ايدي عود معاجبني كمت كلت خل افلت داطلع جان يلزمني من ردن العبايه كتله ها شكو

جلال... ترى لسانج طولان
رونق... لا صدك
جلال... باعي بمزاجي دافوتلج
رونق.... صدك عود اشكرلياه
جلال.. منوه
رونق... مزاجك الي ديفوتلي
جلال.... هههههه بيج شي والله مو صاحيه انتي

رونق... عفته وصلت للدرج نداريت عليه كتله مكرررروووه ونزلت سريع الدرجات الاربعه الاخير نزلتهن اني كاعده شون مادري بس العبايه طويله وصارت جوه رجلي باوعت نفسي كاعده بالكاع وعلى عيطتي عمتي وايمان جوي عليه خطيه وجلال نزل بسرعه  ونبأ كوموني  كعدت على الدرج وعمتي رفعت بجامتي شوف رجلي لان بالنزله صار جوايه شنو اني حاصره البجيه بس مستحيه ابجي وكظيتها ماكو شي متاذيني متاذي
كمت كتلها حروح كمت امشي اعرج طلعت للطرمه ورايه جلال سمعته يكلي

جلال... ديري بالج ترى اشور اني

رونق... نداريت عليه كتله تشمت بيه مو

جلال... صراحه اي والله

رونق... عفته ورجعت للبيت دخلت جوه امي شافتني كالت شبيج تعرجين كمت ابجي  كتلها وكعت من الدرج
خطيه جابتلي دهن ودهن ركبتي

وره شويه ندكت الباب طلعت غرام ورجعت بيدها علاكه مال صيدليه
كالت هذا دهن جابه جلال يكول خل تدهن بي رونق حتى لتورم

بكلبي كلت هذا مختل عقليا يشمت بيه ويجيبلي علاج

نبأ.... سويت مثل مكالتلي غرام ظليت كل كل شغله ينشرها محمد اسوي تاك والله مرات صور عاديه لاكل لسياره كلشي اسوي سكرين فمره نشرت صوره بنيه طفله مدبدبه وكتبت فدوه هو سوالي سكرين للصوره عزه اني كمت اكمز وصار كل مانزل شي يسويلي سكرين واني نفس الشي مره رحنا اني وامي وايمان لبيت جدو دخلنا تفاجئت بي هو هناك اني شنو كمت امشي واتعثر كعدت وره امي ختلت حتى مباع عليه فهو كام دك تليفونه وطلع اني وايمان رحنا للمطبخ يم مرت عمي الصغير صغيره ونحب نسولف وياها وكفت يم باب المطبخ ادور محمد وينه جان ......... ❤️

££££££££

اليوم البارت نزل من وكت لان بالليل عندي شغل
وطولت البارت والي يكول قصير 👊🏻👊🏻👊🏻
صوتوا للقصه حبايبي ❤️