رواية حب جنوني الفصل الثامن عشر 18 - بقلم سوزان ليث

امي كالت صعدي صيحي رونق حتى تتغدون صعدت شفتها نايمه ومتغطايه لحد وجهها اجيت كشفتها صايره دم من البجي تخبلت
شبيج حبيبتي ليش تبجين منو ويا ج

رونق... غرام مصيبه

غرام... ولج شكو احجي

رونق ... انمار انمار حيخطب
غرام.... ولج شيخطب
رونق.... غرام حتخبل ليش هيج سوه بيه زين مو يحبني
غرام... رونق شبيج شنو يخطب منو كلج
رونق... هوهو كلي
غرام ... خاف ديشاقه وياج يولي
رونق... لا ميشاقه قبل كم يوم جلال كلي هم بس ماصدكته ماصدكته كلي ديجذب عليج بس ماصدكته
غرام... جلال وشمدري ليش يعرف بعلاقتكم انتي وانمار
رونق... احجي واحس نفسي ماكو حينكطع وكلبي سجاجين بي
.... هو كايله انمار كايله غرام كليلي شسوي والله ماكدر ماكدر بدونه
غرام... ظليت مصدومه شنو انمار يخطب زين مو داز امه قبل فتره عساس يحجز رونق من تتخرج يتقدملها
... حبيبتي كافي تبجين لتجي امي وشوفج هيج كافي حبيبتي اكيد اكو شي غلط هسه اخابر انمار واشوف شنو الموضوع
رونق .... لا لتخابري لتخابري داكلج حيخطب حيخطب جان يقشمر عليه غرام جان يجذب عليه
غرام... حبيبتي لتبجين كافي ولج اذا صدك هالحجي لج يعني الله خلصج منه لان ميستاهلج والله هو الخسرج خل يولي

رونق ... ولج شون  هو العلمني احبه هو هو الي خلاني احبه اذا ميريدني ليش خلاني احبه واتعلق بي ولج كلشي سويتله جان شيريد اسويله لابسي غيرته كله علموده حجابي حتى مكمت اطلع علموده مكمت احجي ويه اي واحد من ولد عمي علموده ولج دمرني دمرني

غرام .... حبيبتي كافي هسه خل نفهم صار  لتبجين ياعمري كومي اكلي امي ددتنتظرنا خطيه

رونق... ماريد ماريد اكل شي عساني اموت واخلص
غرام... ولج اسم الله عليج ان شاءالله هو واهله واج يروحلج فدوه ارتاحي حروح انزل جوه خاف امي شك واكلها راسها يوجعها وحتنام ماشي حبيبتي شويه واجيج

نزلت جوه امي واكف عالدرج دتصعدنا  لان بزعت وهي صيح علينا

ام غرام ... ادري مدكليلي وين رحتي
غرام ... اي امي جيت رونق متريد راسها يوجعها  تعالي ناكل

ام غرام... دخل تنزل تاكل حتى انطيها دوه
غرام ... دكول ماكله بالمدرسه متشتهي تريد تنام عود من تكعد تاكل
رحت اكلت عالسريع ولملمت الماعين وغسلتهن بسرعه وصعدتله جان على وضعها مغطيه راسها وتبجي  شكد حاولت احجي وياها كاظيتها بس بجي طلعت منها اريد افتهم السالفه كلت ماكو غير جلال خابرته كتله تكدر تجيني محتاجتك بموضوع
كال هسه اجي
نزلت انتظره بطرمه سمعت باب بيتهم انفتح اني فتحت بابنا لان ماريد امي تسمع
-هو اجه فات ها غرام شونج
-هلو الحمدلله انت شونك
-زين
-جلال صاير صدك انمار حيخطب
-اي خطب
-يمعود كول غيرها خاف ديشاقه
-لا ميشاقه ابوه خابر ابويه وكله الخميس الجاي المشيه
-عزه بعيني
-غرام اني ياما حذرت رونق منه يامه كتله ميفيدج هذا مايمشي بشوره
- جلال يعني اني هسه كلش مصدومه باانمار رونق شلون والله وضعها يبجي
-خل يولي ميستاهل الي دسوي علموده واحد نذل
- اني حخابره واحجي وياه
- انتي مخبله ليش تردين تنزلين من مقام اختج لا تخبليني والله اروح احركه هو واهله

غرام ..... نهيت الكلام ويه جلال الي جان حاله مو احسن رونق بس رونق تنزل زعلها بالدموع بس جلال جان احسه صلب وماعرف شنو سبب ليش هيج مقهور على رونق شدعوه
طبيت جوه اتسحب خاف امي تحس صعدت على رونق شفتها تحجي بالتليفون تشهك وتبجي ودكلها والله احبك ماكدر بدون بوكت كلبي نكسر عليها ماحسيت على نفسي غير ماخذا التليفون منه وحاجيه ويه انمار لك انت واحد متستحي حقير متستاهل ظفرها حسبي الله ونعم الوكيل بيك ياانمار تتلكاها بعافيتك مثل ماكسرت كلب هالمسكينه كون الله يكسر كلبك ويطلع حوبتها وسديت التليفون بعد ماشفت رونق حتموت من البجي فوكاها دكلي لاتدعين عليه لا تدعين عليه خبلتني علتها ونزلت واني احس جسمي كله يرجف رجف

وره يومين الوضع ماتغير رونق لا تاكل لا داوم واني جنت اداوم وبالي يمها امي ظلت متعرف شبيها لرونق وعجزت وهي دكللها اوديج للدكتور
وماكو اي فايده

جلال صار مثل الطير المذبوح يروح ويجي وكام يستحي من امي كام يخابرني يسئل عليها لو يدز نبأ جنت ماعرف شنو افسر تصرفه
اما اسد ماكدرت احجيله الصار لان اعرفه مخبل وحيروح لانمار احتمال يموته

رونق.... حياتي جانت عاديه  اروح للمدرسه ارجع اتغده وابدي اقره وشويه اخابر انمار وقبل مانام نظل نحجي مسجات جنت كلشي اسمع كلام مجان عندي دلع وسوالف البنات هو اول حب بحياتي كلشي يكوله اسوي واني فرحانه فجاه كل هذا بده يروح مخابراته كامت تقل حتى بالليل مسجات لو يجاوب لو ميجاوب وكل ماحجي يتحجج بشغل ومشاكل هذا انمار مجان يعدي اسبوع اذا ماشوفه ينتظرني يم المدرسه بس حتى يشوفني كام يعدي الشهر ومايجي ماعده كام على اقل شي يتعارك ويزعل مجنت اعرف شبي وكل مره اكول شغل خطيه وتعبان
لحد مافديوم جنت بيت عمو يم نبأ دنقره رياضيات بوكتها دك عليه انمار فطلعت من الغرفه لان ايمان جانت يمنا كاعده ومتدري بعلاقتي باانمار فوكفت بالممر الفوك احجي وياه طبعا جان بالكوه يحجي ويايه وطبعا خابرني لان يمكن 100 مكالمه دكيتله انهيت المكالمه واجان وجهي مبين عليه الزعل والحيره نداريت ارجع للغرفه البنات لكيت جلال واكف ورايه ويباع عليه بوكتها جفلت كلت بسلا سمعني احجي ويه انمار ظليت ارجف فتت من يمه واني جنت خاتمه القران مسامعني محسيت الا لزم زندي واني هنا وكع كلبي نطق بصوت خشن ويحاول يكتم عصبيته كلي

جلال... مايفيدج عوفيه

رونق.... صدمني بكلامه ماعرف شسوي ظليت صافنه بوجهه ماعرف شحجي  كلت خل انكر احسن حل خاف سمعني احجي ويه ولد وعباله احد غريب وديقشمرني
كتله منو هو
تفاجئت من كلي

جلال ..... اكو غير انمار

رونق... بوكتها حان صدمتي اكبر هذا يعرف اني وانمار نحجي مجان شي بيدي غير وخرت ايده الي عصرت زندي وكتله مشكور عالنصيحه وعفته ودخلت للغرفه
ظليت ماعرف شسوي بقيت واكفه وره الباب  نبأ انتبهت الي

نبأ.... الو شبيج  تعالي عاد خل نكمل
رونق.... تقدمت كعدت عالجربايه بصف نبأ وجان بودي احجيلها بس لان ايمان بالغرفه ماكدرت
رجعت للبيت واني سالفه توديني سالفه جيبني جلال شعرفه اني جنت اخابر انمار اني حتى ماكلت اسمه من حجيت
شون عرف 
خابرت انمار كلتله شون عرف جلال اني اخابرك صدمني من كلي جلال عنده علم من البدايه بعلاقتنا ظليت ماعرف شسوي
عدت ايام وتكررت تحذيرات جلال الي على ميفيدج عوفيها بلاخير طفح الكيل بي كلي جاي يلعب عليج ابوه خطبله ترى اني ظلت مصدومه وماعرف اصدكه لجلال عفته وتهمته انه هو جذاب ويريد يوكع بيني وبين انمار خابرته لانمار للاسف مانكر وكال صحيح ابوه خطبله بس هو مموافق وميريدها ونجبر عليه اني كلامه الي جان ماكدر اوصفه من داسمعه حسيت نفسي انازع الموت معقوله
طلع جلال صدك حجيه وانمار يقشمر عليه معقوله زين ليش اني من لحمه ودمه هيج يجذب عليه حجيه وينه خوفه حبه كله جذب
خابرته لان متحملت خابرته لان داريده يصحى احس مو انمار الي ديحجي ويايه خابرته اذكره بحبنا وكلامه ووعوده الي بس جان كانما احجى لفراغ ظليت بحسره ارد عليه بس الكلمه ماتطلع مني بس اجتي غرام شافتني اشهك وابجي والتليفون على اذني اخذته منه حجت كلشي اريد اكول كلشي بس مجان كلبي يقبل يدعي عليه

غرام .... ايام عدت واسد التحق صح هالفتره تغيرت عليه قلت مكالماتي  مو بيدي جان وضع بالبيت حزين امي الي اجاها خبر وفاه خالي الجبير ورونق الي صار بلا روح مجان الي نفس اسوي كلشي حتى بالكوه اداوم جان اليوم  اسد بده يتذمر من اسلوبي واصلا يمكن صارت عندي خوفه لان انمار جان هم ابن عمنا بس هم عافها رونق صح ماكو جهه مقارنه بين الاثنين بس مجان بيدي فجان بيوم النيشان مال انمار طبعا رونق جانت تدعي القوى وتسوي نفسها ممهتمه بيوم النيشان امي مراحت لان حزينه على اخوها واني ورونق لكيناها فرصه وهم مرحنه حتى نبأ مراحت وبقت تواسي رونق

بيوم رجعت من الدوام شفت رونق وجهه اصفر وهي من سالفه انمار صار اكلها قليل وجانت اصلا مرات متاكل جانت سولف ويايه وبالكوه طلع الحجايه كتله شبيج ليش وجهج اصفر

رونق ...كلشي مابيه

غرام .... نزلت رونق جوه وسمعت صوت امي صيح وتكول  غررررررام الحكي اختج طبعا كمزت مثل المخبله نزلت لكيتها واكعه وامي بصفحه صحي بيها ركضت جبت ماي رشينا عليه ماكو فاقده كلش كتلها  خل نوديها للمستشفى لان صار وجهه شاحب عبالك جثه بلا روح امي بسرعه لبست عبايتها راحت لبيت عمي شوف احد يودينا للمستشفى شويه وخطيه اجه فهد وجلال يركضون ومرت عمتي والبنات كلهم فوكانه جنت داحاول اشيل رونق بس هي اثكل مني ماكدر اشيلها شو هذا جلال ادفعني وكلي روحي جيبيلها شي تلبسه ركض رحت جبت عبايه لبستها هذا شو شالها اني منا حايره بااختي لو بهذا جلال الي تصرفاته مدري شبيها حسيته واكف يمي يرجف والا شويه يبجي اكو شي غلط ركض ركبنا اني وامي ورونق وجلال وفهد ودونا للمستشفى  عزه جلال يركض ويصيح بالمستشفى عبالك جايبين واحد مصوب وهو ضخم وعضلات اجوي ركض فحصها دكتور وسولها تحاليل كالو عده فقر دم حاد اصلا مبين من وجهه خلولها مغذي  وراح طلعت للولد لان جانت ردهه بس نساء كتلهم مابيها شي فقر دم وهسه دصحصح كال يخلص المغذي واخذوها
طبعا جلال مثل الساعه يروح ويرجع يروح ويرجع واول مره اشوفه يدخن
فهد كال حروح اجيبلها شي تاكل يسند كلبها وراح اني بقيت واكفه اباع على جلال الي جان امره عجيب وبداخلي شكوك كومه بس مداكدر اركز
باوعت على نفسي عزه اني جايه عزه بنعال  والعبايه للنص مسدوده خرب شون بهذله
اجه عليه جلال والعصبيه بحيث تقدم عليه اني رجعت ليوره خطوات عبالي حيضربني مدري ليش
كلي
جلال ... غرام طبي شوفيها شون صارت

غرام ... هزيت راسي ودخلت شفت رونق دصحصح وامي خطيه واكفه يمها تمسح بوجهه

رونق .... نزلت جوه واني احس الم صار بمعدتي قوي ودخت وبعد ماحسيت بشي كعدت شفت نفسي بالمستشفى وامي يمي وغرام مدري صاير بس عرفت اني تخربطت ظليت ساكته وامي الي بس شافتي فتحت عيوني مدري تتحمدلي سلامه مدري ترزل بيه لان هامله نفسي ظليت ساكته وغرام سكت بيها

غرام .... شويه وطلعت داشوف جلال  اكله كعدت ماشوف الا لازم انمار من ياخته ويجرجر بي عزه اني ركضت عليهم اريد افاككهم الممر جان بي جم مريه وعزه اسمعهن يحجن يابه صلو عالنبي
اني بسرعه كمت اوخر جلال من انمار
بالكوه وخرته شكبره نداريت على انمار ... انت جابك هنا
انمار ... غرام كليلي شبيها رونق اريد اشوفها
جلال ... ولي منا لاسحلك وحق محمد اسويك فرجه للناس ولي
غرام... انت بيا عين جاي هنا واصلا منو كلك
انمار ... خليني اشوفها غرام لا تزيديها علي

غرام ... ماشفت غير نفسي اندفعت ووجلال وانمار صار واحد يدفع اللخ عبالك ديوجه فتت عليهم ادفع بيهم بزعت روحي انداريت على جلال كتله والله حخابر اسد عليكم تعبتوني وانت انمار روح لخاطر الله مناقصين مشاكل لتطلع امي وشوفكم هيج شدكول
ورونق مابيها شي فقر دم وحتطلعها قد شويه
روح الله يخليك

انمار... ماشي غرام ماشي اني واكف بره اذا حتاجيتيني خابريني
جلال .... ولي لك مريد من شكولك شي
انمار ... جلال الزم حدودك والله اطيح حظك
غرام ..... اووووو كافي ترى انتو مو جهال وجاي تتعاركون كل واحد شكبره فرجتو المستشفى علينا عفتهم ورجعت للردها فتت امي كالتلي ولج شكو شو مريه فاتت دكول اكو ولد ديتعاركون
كتلها اي مدري منو بس فضت فضت نداريت على رونق الي تفتح عيونها بتثاقل
شويه ودكلي فهد طلعت شفته خطيه جايب اكل لرونق
كلي ذني لفات معلاك خل تاكل
اخذتهن ونطيتهن لامي توكلها خطيه شون هبطت عليها
وره ساعه ونص تقريبا طلعنا طبعا بس شافنا جلال طلعنا جانه ركض

جلال ... ها رونق تكدرين تمشين لو اشيلج
رونق... باوعت على جلال حسيته نظراته كلها شماته كتله ميحتاج اكدر امشي منشليت

غرام طلعنا من المستشفى شفت  فهد جاب سياره صعدنا بيها طبعا رونق كاعده يم الجامه واني بنص وامي من الجانب الثاني وفهد بصدر الطريق كله جلال عينه بالمرايه على رونق كانما رونق تخصه نظراته نفس نظرات اسد الي وكلسع اصحه على نفسي وابطل افكر بهيج طريق وصلنا للبيت وطبينا خطيه شويه جتي مرت عمي والبنات وعمي ورونق كاعده بنصهم مثل العصفوره وعمي جايبلها معلاك كال اشولها خل تاكل ليش هيج وجهه اصفر
كتله عمو فهد جابلها واكلت بالمستشفى

لليل الكل راح رونق صعدتها فوك وامي دخلت صلي اني سويت عصير رمان لرونق وصعدت جانت كاعده وتباع عالموبايل

كتلها منو ديدك

رونق.... رفعتلها جهاز داشوفها اسم انمار
غرام .... وشعده مخابر مكفاة السواه
رونق... شمدري اني جنت بالمستشفى
غرام ... لان هو اجه وتعاركو هو جلال بالكو فاككتهم
رونق... منو كله اني بالمستشفى انتي
غرام .... لا والله مواني جلال مخابره مرزله وغاسله غسل برزايل هو وراها جاي للمستشفى ولج فرجو عليهم المستشفى ناس عبالهم ديتعاركون عليه لان اني دافاكك

رونق... مسوي نفسه يخاف عليه تعالي اقري رسايل ماته شون يتوسل بس والله ياانمار لاخليك تبجي دم على السويته بيه
مثل ماكسرت كلبي لاكسر كلبك واخليك تتندم ندم عمرك

غرام ... اباع على رونق شون تحولت من انسانه ضعيفه الى انسانه قويه وتتوعد لانمار محبيت احجيلها على جلال لان هي بوضع ميسمح تسمع خرابيطي
رجعت للتليفون الي ناسيته بالبيت شفت اسد داكلي كومه ورسايل
دكيتله بسرعه جاوب
-الو
-ولج حبيبتي وينج ظل بالي
-والله يااسد لاتسئل رونق تخربط وديناها للمستشفى
-ادري خابرت للبيت وكلولي لان ظل بالي لاانتي جاوبين لا رونق خبلتوني شونها هسه انطينياها احجي وياها

- الحمدلله اي هاك
رونق... الو هلو عمو اسد
اسد... ولج دبدوب بيه ولابيج شنو يابه فقر دم شنو لعد الخدود وين راحت
رونق.... ههههه عمو اسد
اسد... ولج وصيت جلال يجيب معلاك يوميا تاكلين صبح وليل
رونق... والله خبلتوني بالمعلاك ماكو غيره للفقر الدم
اسد.... من ارجع اجيبلج كباب شوي يسند كلبج
رونق... اي هذا الحجي تمام ههه

رونق سديت التليفون ويه اسد من صدك اكثر انسان ينطيني ثقه وطاقه هو اسد الله يخلي النا
رجعت مددت واني اصفن ليش هيج مسويه بنفسي هامله دراستي ونفسي اباع عالتليفون الي ماسكت من مسجات انمار الي
دزيتله رساله

هاهيه انتهت كــــل المواضيــــــــع
ولاتفتـــــح بعد وياي صفحــــــــــه
ياصفحه البقـت ظل بس الجــــــلاد
وعليه مكتوب حبك راح امسحــه

واخذ الباب لمن تفوت ولاترجينا من دك نفتحه
وارض صحراء اصيراً وارتجي الموت
ولاقبل تبوس بجسمــي مسحـــى

واضحك مو علي عالعايزه البيك
يامن مافاد بيك الزاد ملحـه........
......... يتبع ❤️

شنو رايئكم بالبارت احجولي تتوقعون وره جلال قصه !!!!؟؟؟؟
رجاءاااااا ادعمو القصه وسوو تاكات لجماعتكم حتى يقروها
احبكم ❤️