رواية حب وحنين🔞🔞 الفصل الخامس 5 - بقلم Nada hs

#حب_وحنين

الجزء الخامس

nada hs
اكرم
خليت الچاي ع الطباخ ورجعت اسأل حنين اذا تحب البيض سلگ او بالدهن.. شفتهه گاعده ع التخم ولازمه بطنهه تتلوى..
اقتربت منها وگوه حاچتني..
-حنين؟! شبيچ؟
حنين:بطني ..بطني دتوجعني!
-ليش شنو سويتي؟ خلي اشوفهه!
باوعتلي مصدومه..
-شبيچ حنين هذا شغلي!
باوعت لأمي وعرفت هي تستحي منها..
-تعالي للغرفه..
مشت گدامي للغرفه وبقت واگفه..
-نامي..
حنين:ها؟
-راح تبقين هيچ؟ حنين انتي مو اول وحده افحصها! ولتنسين الي سوولج العمليه همين اطباء مو طبيبات!
حنين:دير وجهك..
-هههه وبهذا حالچ! يله درت..
حنين:كملت..
انداريت عليها لگيتها مغطيه رجليها وبطنها ورافعه بس الدشداشه..رفعت الدشداشه اكثر وهي مغمضه عيونهه.. ماعرفت خجل لو الم..
رفعت البلاستر عنها وشفت قطرات دم متسربه من الضماد..
-حنين!
حنين:ها؟
-شايله ثگل او متحركه خطأ؟
حنين:لا .. بس..
-بس شنو؟
حنين:سندت امك حتى تروح للحمام ..
-صدك تحچين؟! وليش مگلتيلي! شلون تجازفين هيج!
مطلع صوتهه بعد.. باوعت لوجهه شفتها مغمضه ودموعهه نازله
مادري شنو صار بيه بلحظتها.. تمنيت اگدر امد ايدي وامسح دموعهه بس مگدرت.. چانت مثل الطفله وهي فعلا طفله بين اديه وماالومها لو بچت.. ع اهلها لو ع زوجها لو ع اخوهه الي ضربها بدون رحمه.. رجعت افتح البلاستر الي مخليه منه مدري شكم طبقه:. وصلت للشاش وشلته عنهه... بدايه الخيط مأذيه الجلد وخارمته واله شويه يمكن چان طلعت امعائهه.. نظفت الدم المتسرب والجراحه الطالعه وعقمت الجرح بيود وشاش نظيف وخليت ضماد جديد..nada hs
-شوفي راح احچيلج شنو صاير مو لحتى اخوفج.. لا.. حتى تمتنعين من كل شي مضر.. اله شويه چان شفتي امعائج واگعه بالگاع ونسبة الالتهاب راح تزيد عندج من هسه لان محافظتي ع الجرح وتحركتي هوايه.. راح ابدي وياج من اليوم مضاد حيوي ولازم نغير الضماد يوميه او مرتين باليوم..
حنين:يكون احسن اذا اموت..
حچتها وهي بعدها مغمضه عيونها وتبچي ماادري شنو احچي حتى اواسيهه واخفف عنها...
-راح اكمل الريوك وتعالي.. ابقي هسه نايمه..

رحت احضر الريوك وكل بالي يمهه... يعني اله شوي طلعت امعائه ونرجع نخيط بطنها من جديد وترجع كأنها اليوم طالعه من العمليه.. اتصلت بوصال بس مردت عليه.. ردت احچيلها عن حاله حنين .. كملت الريوك واجتمعنه كلنا سوا.. بقت حنين بس تشرب چاي ومتاكل ..
من كملنا الريوك رادت تغسل مواعين بس مخليتها وقبل لتطلع من المطبخ سألتها عن الامساك لان مثل حالتهه كلش وارد الامساك خدودها صارت دم من سألتها ههه ماادري ليش تخجل لهل درجة واني هذي شغلتي من الاساس.. اصريت عليهه وگالت عدها علاج وحچتلي البارحه عن الالم والنفخه الصارت عدها وفوكاهه تقيأت... علما خلصت كلامهه يمكن مر ساعتين ههه واول مخلصت شردت مني ...

حنين
يبووو شكد عيب.. فوگ ما كشف ع بطني وغيرلي الضماد بده يسألني اسئله محرجه متت بدمي.. بس گلت احجيله احسن لان هو اعرف .. گعدت يم امه وهي بس تباوع متحچي..وهو بعد مشفته اخذ اللاب ودخل غرفته مطلع بعد.. للساعه ب12 ونص تقريبا طلع.. گال طلبت الكم غدا واكلو سوه وللعصريه تجي ام ضياء.. باوعتله بتساؤل وخوف عن منو تكون ام ضياء؟!
حچالي عنها بس هم بقيت خايفه لا تطلع تعرف اهلي منا منا واروح بيهه.. طمني هو وگال لتخافين منها وهي مريه حبابه بس مو معناتهه احچيلها كل شي..
وصل الغده وخلاه بصينيه وجابه يمنه بالصاله.. هو دخل لغرفته طلع وره دقايق.. مبدل وشنو من كشخه وشنو من طول ولبس..
عطره سبقه قبل ليطلع.. گلي شويه واجي..

اكرم
طلعت للصيدليه وجبت ابر التهاب وكانيولا وهمين جبت الها مسهل حتى متتأذى وتگدر تاكل... رجعت للبيت لگيتها واگفه ع السنك ودتغسل الگلاصات والصينيه..
-شحچينا! عوفي كل شي من ايدج.. ام ضياء جايه وراح تسوي كل شي..
حنين:شويه وگلت ليش يبقن..
-تعالي انطيج الابره..
بقت صافنه بوجهي هيچ😳 هههه .. لتخافين بالوريد...
رحنه للصاله ومدتلي ايدها..خليت الكانيولا بيدهه ومن دااسوي بيهه مااعرف ليش ايدي تحسست نعومه ايدها ... ياما لمست ايدي بنات ونسوان بس ما تهيجت ولافكرت بغير شغلي.. بس حنين لا.. تمنيت ابقه لازم ايدها واتقرب منها اكثر واكثر... تعوذت من الشيطان وفتحت الابرة خليتها الها وگمت ضايج من نفسي لان هي امانه ولازم احافظ عليها.. بس شسوي الشيطان شاطر...
طلعت لدوامي بعدهه لان چنت خفر بيومهه .. وخابرت ام ضياء حتى اتأكد من جيتها.. وصلت للمستشفى وشفت وصال متغيره حيل وحتى گوه تحچي..
-وصال شبيج؟nada hs
وصال:اكرم راح اموت من التفكير والقلق.. كلهه دتسأل عن حنين ويردون يعرفون منو طلعهه والمدير متخبل وبس يريد يعرف منو
-مراح يصير شي لتخافين .. هنا كلها بوخه .. لو بيهم خير خل يشوفون حل للغيابات لو للي دياخذون الادويه ويخلون الناس تشتري من برا .. اطمئني يومين وينسون السالفه...
وصال:شلونها حنين؟
-اي صدگ مگلتلج عنها.. شويه الجرح مفتوح من البدايه..
وصال:لاا! ليش هيچ؟
-متگعد راحه هل بنيه.. مريلها باچر لان تستحي مني ومدااخذ راحتي من اشتغل..
وصال:هاا.. ماگدر اجي..
-ليش؟ صاير شي؟
وصال:أمي.. أمي متخبله من عرفت ولهسه.. ومااريد اكسر كلامهه ع الاقل هل فتره..
-ماالومها .. ع كل حال صارت بعد..
بدو المراجعين يجون والتهينا بشغلنه...

حنين
بعد ماراح الطبيب مددت ع التخم وامه گاعده بكرسيها وتتفرج تلفزيون.. شويه وانفتح الباب ودخلت علينه ام ضياء.. متفاجئت بوجودي .. توقعت يكون خبرها عني.. ماگعدت من اول مااجت دخلت للمطبخ تشتغل... كملت وجابت ماعون فاكهه واجت يمنه
چانت تصرف كأنها ابيتها.. يعني ماخذه ع الوضع.. بدت تشيف تفاح وتخلي بحلگ الحجيه واني هم ناوشتني وحده وگالت اكلي
-لاشكرا..
ام ضياء عوجت حواجبهه ونزلت راسهه وگالت:لا تستحين..اكلي!
اخذت من ايدهه واكلت شويه وهي مستمره تسولف ..
ام ضياء:اليوم ماسويت غده للجهال.. خابرت ابوهم وگال راح يجيب من برا واني بوجهي اجيت هنا.. گلت خطيه الحجيه والدكتور اكد عليه اجيكم من وقت اليوم... هو بالعادة اني اجي ب4 او 5 العصر .. اي؟ شسمج انتي؟
-حنين..
ام ضياء:بت حماتي اسمهه حنين.. بس شنو عينج لاشافت.. وكحه وكحه! ياريت كل الاسمها حنين مثلج.. انتي طالبه مو؟
-اي .. چنت..
ام ضياء:يله ماعلينه.. اكلج ابقي يم الحجيه وكليها اني راح احضر الحمام للحجيه.. صار ثلث ايام ممسبحتها..
-ماشي..
بقيت انطي للحجيه شياف تفاح صغار واتصفن واحس التعب ماكل جسمي اكل..
ام ضياء:يله.. خل اخذهه بعد.. هم يله اسبحهه وانشف شعرهه
اخذتهه ودخلن للحمام.. گمت اني لميت الفاكهه ورجعتها للثلاجة.
افتريت بالمطبخ شويه چان حلو بس ممرتب.. طلعت للگراج شفته چبير وكله تراب ووسخ.. الحديقه مو كلش چبيره بس حلوه ومرتبه يمكن هي المكان الوحيد بالبيت مرتب.. باوعت للسما ولباب الشارع واگول بداخلي يمكن بعد مااشوف شنو شارع وشنو طلعه وناس... رجعت لداخل البيت بس من باب الخطار.. هم كلش چبيره الاستقبال وبيهه اثاث كلش حلو بس التراب عادم كل شي.. طلعت من باب الاستقبال الداخلي للصاله الي هي مقر گعدتنا.. تفحصت المكان براحتي.. اكو طابق ثاني بس مااعرف شنو بي.. تمنيت اشوف شكو بس ماجازفت وصعدت...
ظليت اباوع لغرفه الحجيه وگبالها غرفه اكرم.. ذبحني الفضول اشوف شنو غرفته.. دخلت وچانت كلش حلوه.. بس هوسه.. اوراق مطشره بكل مكان وملابس ع الچربايه وشي ع كرسي ..
سمعت صوت ام ضياء سديتها بسرعه ورجعت خطوه ليوره لان اساسا مدخلت بس فتحت الباب ومديت راسي...
طلعت الحجيه وام ضياء تدفع بيهه.. گعدنه بالصاله كلنا وجابت ام ضياء المشط وبدت تمشط بيهه وسوتلها اثنين ظفاير.. من شفتهن اتذكرت امي هيچ چانت تمشط.. طبعا ام ضياء تمشط ومستمره تحچي بس مچنت مركزه وياهه واگوللها اي بغير ماافهم بشنو تحچي...
مر الوقت بملل فضيع ومااكدر اسوي شي الهي نفسي بي.. لا ممنوعه من الحركه الزايده.. ام ضياء هم التهت رتبت غرفه الحجيه والحمام وطبت لغرفه الدكتور هم رتبتها وطلعت.. صار الليل ووصل ابو المطعم جايب العشا.. ام ضياء نزلت فد نزله بالاكل ونست حتى توكل الحجيه ههه خطيه تعبت من كد ماشتغلت.. وكلت الحجيه اني وشويه ودك تلفون ام ضياء..
جاوبت(اهلا دكتور.. اي اي وصل.. الله يسلمك.. كل شي تمام.. هااا خوش راح ابلغها.. ماشي ماشي.. الله وياك.. وانته من اهله)
ام ضياءوهي ايد بالاكل وايد لازمه التلفون:حنين..يگول دكتور اكرم لتاكل شي ثگيل وبس الشوربه وشويه صمونه..
حنين:هاا.. اي ماشي..nada hs
اكلت مثل ماوصه اكرم وچانت الشوربه كوه تنجرع وماادري شلون البارحه اكلتها .. بس چنت بوقتهه جوعانه والجوع كافر.. شويه وجابت ام ضياء موزايه اليه وگالت اكليهه زينه الج..
كملنه عشه ولمت المواعين ورجعت گعدت يمنه ودارت التلفزيون وبقت تتفرج واني مو يمهه فاصله بعالم ثاني.. اتذكر شلون من چنا نخلص عشا لو ندرس لو نبقه ننظف البيت ونسوي چايات ويجون اصدقاء اخواني يبقون يتعللون يمنه.. اكيد هسه محد راح يوصلهم بعد ما كلهه عرفت بسالفتي.. كلش اشتاقيت لحضن امي وريحتهه.. واختي هديل من نگعد نلعب وهي تبقى تصنف عليه وتگلي اخذي لعاباتج وياج من تعرسين واني اخجل منها واضربها بالشقه ونتزاعل .. اوووه يا ذيچ الايام ..
كل شي بيه حن لأهلي بذيج الليله.. حتى ناصر .. حسيت گلبي مفطور بفراگهم.. لمت حظي الاسود وقدري الي خلاني شاذه من دون البنات.. شچان صاير لو ماانخلقت هيج.. لااعتراض ع حكمك ياالهي الك بيها ارادة..

يتبع...