رواية حب وحنين🔞🔞 الفصل الرابع 4 - بقلم Nada hs

#حب_وحنين

الجزء الرابع

nada hs
لگيتها ع نفس گعدتهه طابكه نفسها طبك وظهرها مقوس متشيل راسهه..
-حنين.؟ تفضلي.. حاولي متضغطين ع مكان العمليه ورخي ظهرج بگعدتج..
حنين بخجل:شكرا دكتور..
اخذت المي مني وايدهه ترجف...حبيت اخليها تشوف امي بلكي تستقر شويه..
-تعالي شوفي امي.. اكيد راح تحبج..
گامت ورايه فتحت الها باب غرفة امي ودخلت.. سلمت عليها بس امي متگدر تحچي شي مفهوم..رحت اني لملمت الاوراق الي بالگاع وسديت اللاب وشلت ادويه امي خليتهن ع الميز..
گعدت حنين يم رجلين امي وبقت تباوع بوجهه ومركزه متحرك عينها.. مادري ليش حسيت بيهه حنيه ع امي حتى اكثر من اختي .. عفتهن سويه وطلعت لغرفتي .. اتصلت بوصال اني اقنع بيهه تاخذ حنين وهي تتوسلني ابقيهه يم امي ..
چان نقاش عقيم ويه وصال.. بس حسيت صوتهه بي نبره حزن وندم.. وهي فعلا چانت ندمانه وحست ع نفسه تورطت ..
رجعت لغرفة امي وقبل لاادخل سمعت صوت شهگات وكلمات متقطعه(خاله.. ظلموني .. والله اني ممسويه شي..) كلش انقهرت ع حنين.. يعني شچان صار لو الله خالقهه يم ناس واعيه وتفتهم .. الكارثه عرفت عدها اخت .. الله اعلم شنو سوو بحالهه بعد ماطلعو اختهه مو خوش.. nada hs
مادخلت للغرفه ورحت للمطبخ اشوف اكو مسواك لا... ملگيت شي غير الطماطه.. رجعت لغرفة امي بس بغير ماادخل صحت من الباب اني طالع اتسوك وارجع.. بدلت ورحت جبت مسواك كامل مخليت شي نقص.. گلت خاف تجوع وتستحي تاكل فخلي اترس الثلاجة حتى من اطلع تگدر تاخذ راحتهه...
نوعت الها بالفاكهه شكو نوع لگيته جبته.. والخضروات كذلك كثرت الها بالكرفس لانو نزفت دم هوايه وتحتاج تعيد بنيه جسمهه
اخذت عشا جاهز ورجعت للبيت... رحت لغرفة امي لگيت امي ع نفس گعدتهه وحنين نايمه ع الارض مقرفصه ولامه نفسها كوة..
رحت غسلت المسواك وخليته بالثلاجة .. وجهزت العشا بصينيه وخليته بالصاله.. رحت ع كيفي اجيب امي من الغرفه بديت ادفعها شوي شوي حتى متگعد حنين..
بس فتحت الباب فزت وگامت ع طولهه وبنفس اللحظه لزمت بطنهه وعقچت حواجبهه..
-موجوعه؟
حنين:لا.. بس لان گمت فجأة.
-اسف گعدتج...تعالي تعشي مدام گعدتي..
حنين:ها؟ لا موجوعانه!
عرفت بيها مستحيه مني بس مضغطت عليها.. خليت الها شوربه و قطعه صغيره صمونه وشوية معلاك بصينيه صغيره ووياهه گلاص مي لان اصابتهه بالامعاء ومااكدر انطيها اي شي اله اكلات خفيفه..
خليته يمهه بغير مااحچي وطلعت اتعشى اني وامي..
كملنه اني وامي واخذت امي غسلت اديهه ووجهه ورجعتهه ع غرفتهه لگيت حنين مخلصه اكلها وممبقيه منه شي.. هي مثل الي خجلت ودنگت راسهه من دخلت..
خليت امي بفراشهه وهي متعوده تنام من وقت بقيت يمها لحد ماغفت وحنين بس مدنگه گبالي ومتحجي...
من نامت امي صحت حنين..
-حنين.. ممكن تجين شويه؟
حنين:اي.. جايه..
گعدت بالصاله وهي بقت واكفه..
-استريحي.. اكيد هسه انتي تعبانه .وتردين تنامين.. بس لازم اوضحلج كم شغله لان باچر اني خفر ..
هي بس تهز براسهه اي... شوفي .. انتي راح تبقين هنا لحد ماتنحل مشكلتج.. والبيت بيتج..بس اريد منج شغله...
حنين:شنو هي دكتور؟
-امي.. تهتمين بأمي .. شكد ماتنطيها اهتمام راح ادفعلج و راح تبقين هنا معززه مكرمه .. ها ! ومدااكلج من هسه تهتمين بيها.. لا من اطيبين وتحسين نفسج تمام لتقصرين ويه امي.. تره ياما جربت ممرضات وعاملات يمهه بس كلهن ميشتغلن عدل..
حنين:اخليها بعيوني.. بس الله يخليك لتخلي احد يعرف بمكاني ولاتگول لاحد اني هنا..
الخوف الي بعيونها چان واضح ابتسمت الها وگلت: انتي بأمان هنا.. ومحد يعرف غيري اني ودكتوره وصال بمكانج هسه.. اطمئني.. nada hs
حنين:مااعرف شلون اشكركم .. شمااسوي ابقه مقصره بحقكم انته ودكتوره وصال..
-الشكر لوصال.. اني مسويت شي.. ها بالمناسبة؟ شلون صار الجرح؟ اخذتي ابرة اليوم؟
حنين:لا.. بس اخذت من الكبسول الي جابته دكتوره وصال..
-لااا! المفروض ابر.. يله ماشي اني باچر اجيبلج.. تكدرين تاخذين راحتج..
حنين:تصبح ع خير..
-وانتي من اهله..

شويه واندگ الباب وطلعت اشوف منو.. چان السايق مال ام وصال.. بيده جنطه ..سلم عليه ونطانياهه..وگال.. دكتوره وصال تعتذر مكدرت تجي بنفسها.. گلتله:ماشي .. ماكو مشكله..
اخذت الجنطه ودگيت الباب ع غرفة امي.. لان حنين يمها..
طلعتلي حنين.. وبوجهه نظره تساؤل..
-هاي من وصال..
حنين:شكرا
-اذا تحبين ادخلين حمام ..
حنين وهي تأشر ع بطنهه:بس؟
-لتخافين ماعلي شي بس خلي بلاستر ولتخلين المي يلوحه..
حنين:ماشي.. شكرا مره لخ..
دنكت راسي بمعنى عفوا ورحت لغرفتي.. خليت راسي وبقيت افكر بأمي وسالفه وصال ويه حنين ودوامي الى ان نمت...

حنين
صدك لو گالو لو خليت قلبت.. فضل وصال ويايه ابد ماانساه طول عمري.. بعد ماخلتني بالمبيت يومين طلعتني وگالت راح اخذج لمكان امين ومحد يلگاج بي .. وفعلا اخذتني ودخلنه مناطق راقيه كلش بحياتي مداخلتهه ولاشايفتهه.. چنت اباوع لوصال واگول هنيالهه عدها اهل يحبوهه ومخليهه تسوق سياره وتمشي ع طولهه.. واني ماصدگو تجيهم هيج سالفه حتى يقتلوني.. صدك خنگتني العبره بالسياره وكوه سيطرت ع نفسي مابچيت.. وصلنه لبيت الطبيب واستقبلنه بنشافه شويه وبقه بس يباوع بوجه وصال.. اني كلش خجلت لان صرت ثقل علي وهو لا بيهه ولاعليهه.. گعدت شويه بالصاله وبقو هو ووصال يحچون بس مااسمعهم من خجلي مكدرت اركز بشي.. راحت وصال واجه عرفني ع امه.! انصدمت من شفتهه.. گاعده بكرسي ومتحرك بس ايد وحده وحچيها ممفهوم.. مادري ليش من شفتها تجمع الدمع بعيني . تذكرت امي واشتاقيتلها .. وام الدكتور هم حالتهه صعبه وزيدت همي .. من طلع الطبيب وخلانه وحدنه دنكت يم رجليها وشبعت بچي.. من طلعتني وصال اني مخنوگه ومااكدرر ابچي.. لحد مالگيت المكان المناسب ويم الشخص المناسب حتى اشكيله.. ظليت ابچي واسولف ويه ام الدكتور عن مصيبتي...
طلع هو تسوك ورجع جاب عشا اليه.. چنت جوعانه وبنفس الوقت احس بنفخه ووجع خفيف ببطني.. اكلت بشراهه بغير مااهتم للألم الي احس بي.. شويه زاد الالم بعد مااكلت بس تغاضيت عنه وگلت هسه يروح هاي لان مماكله زين بهل اربع ايام..
حچه ويايه الطبيب بموضوع امه واني كيفت.. حتى مااحس نفسي عاله وبس ثقل علي.. من رجعت للغرفه باوعت لامه خطيه صايره هلكدودتها من نايمه.. واعدت نفسي من باچر ارد الجميل الهم وشگد مااكدر اعتني بيهه ...
اندگ باب الغرفه علينه وطلعت شفت الطبيب بيده جنطه مال سفر صغيره.. گال من وصال.. كلش فرحت واخذتهه منه حتى اطلع ملابس وادخل حمام لان من يوم العرس ماداخله حمام وسابحه عدل .. بس اغسل رجليه واديه ووجهي.. كيفت واخيرا راح اغسل شعري وكل جسمي بعد ماكال الطبيب عادي بس خلي بلاستر.
فتحت الجنطه ولگيت كلشي مخليتلي.. تراك سود اثنين ودشاديش اثنين وشالات وداخليات جدد وحتى شامبو وغسول ومعجون وفرشه اسنان ومنشفه وحتى الشغلات الي احتاجهه شهريا.. من شفت الي دازته تمنيتها يمي واكدر ابوسها واشكرها.. بس حتى لو بستها وشكرتها راح ابقه مقصره.. هل وصال الله خالقهه ملاك ورحمة اندزت اليه..
اخذت المنشفه والدشداشه وشامبو وبلاستر ورحت للحمام.. بديت الزك بلاستر ع الاطراف لان اصلا جان اكو بلاستر وجواه قطن وشاش.. كل ما اخلي اصبعي يطخ بطني اتوجع اكثر.. لوما استحيت من الطبيب وامه چان صرخت بعالي صوتي من الوجع.. مااعرف شنو صارلي.. دخت ولعبت نفسي.. ذبيت كل شي اكلته ع العشا.. گوة گدرت اسبح .. منا موجوعه ومنا خايفه لا المي يدخل ع الجرح الي لسه ماشايفته شگد حجمه ..
كملت وخليت المنشفه براسي وگبل ع الغرفه.. طلعت غطه ومخده من كنتور الحجيه... اخذت مسكنات ومضاد التهاب ومشطت شعري كوه واني اباوع ع الميش الي بي واتذكر قبل ليله الحنه شلون چنت ومكيفه بحياه جديده وميشن شعري بكم خصله مو هوايه لان اني ردته هيج.. وحفولي وجهي وچانت اول مره اشيل بيها شعر وجهي ومن كملت باوعت لنفسي بالمرايه گلت اكيد محسن راح يحبني من يشوفني بشكلي الجديد.. محسبت حساب هيج يصير بيه ابد.. مرت ابالي ذيج الايام وشلون چنت اخجل من يجيبولي طاري العرس وبنفس الوقت افرح وشلون قبل لا انام ابقه افكر بمحسن وعن الحچي الي يجيبنه النسوان ها اليوم محسن هيج جاب ها اليوم هيج تسوك ويگول مرتي ادللها ومااخليهه تحتاج احد وشلون خالتي طول فترة الخطبه تجيبلي المكياجات وملابس الطلعه وسيتات النوم الي چنت استحي اگلبهن... بلعت ريگ وتذكرت الاني بي.. كل شي تبخر هسه.. مابقه يمي لا محسن ولا امي ولا اختي ولاخالتي ولااي احد
نزلت الدمعه من عيني واني اتذكر هذيج الايام الي مرت بحياتي مثل الطيف... لفيت شعري شلون مچان وخليت راسي ع المخده
ويمكن اول مره من بعد اسبوع كامل نمت مرتاحه واحس نفسي بمكان امين..nada hs
گعدت ثاني يوم شوي نفسيتي مطمئنه تقريبا.. باوعت للحجيه لگيتها گاعده..
-خالتي؟ صباح الخير! ترحين للحمام؟
گالت آآآ فهمت يعني تريد تروح للتواليت.. ساعدتهه بيه مابيه خليتهه ع كرسيهه.. لزمت ايدي وشدت عليها معرفت ليش هل حركه بس يمكن حبتني ويمكن اطمئنت اليه.. اخذتها وهم گوه گدرت تشيل نفسهه من الكرسي للغربي.. خليتهه علي وطلعت
كملت صاحتني .. سندتهه حتى ترجع لكرسيها .. من سندتها كل ثگلها صار عليه حسيت بطني رادت تنفتح.. من دنطلع من الحمام لاگانه دكتور اكرم..
اكرم:صباح الخير.. شلونكم اليوم؟
-صباح النور.. زينه..
اكرم:شبيج؟ ليش لونج مخطوف؟
-لا مبيه شي..
استحيت اگله ع الالم الصار عندي من سندت امه.. ومثلت علي مابيه شي بس هو مااقتنع بقه يتفحص وجهي..
خلينه امه بالصاله وفتحلها اكرم التلفزيون وبقت تباوع وهو راح گال راح اجهز ريوك.. عاد اني هنا ردت اطك من الوجع والبزات الي احس بيهه...

يتبع..