رواية ??هجير الشتاء?? الفصل العاشر 10 - بقلم Shaqraa

هجير الشتاء
الجزء الثامن

شفت كرار واكف بالباب..
رحت اصيح لعهد ..لكيتها جاية تريد تطلع..
وكفتها سالتها..
عهد هذا ابن عمج بالباب؟؟
كالت ايي ادري هسه رايحتله..
وعافتني قبل لا اكمل كلامي واسألها شلون تدخله وابوي ممجود..
بقيت اباوع بالشاشة..اشوفها سلمت عليه ودخل!!
بقيت كاعدة بمكاني متحركت..
فاتو هو ووياها ..
وكف سلم عليه ونظراته منجل ويحصد...
كلتله ادخل جوا هو مقبل...
كال..رح انتظرج هنا لان مستعجل ..
فاتت هي جوا وهو بقى ..
كمت قدمتله بطل ماي وكاس عصير موز جنت مسويته قبل ليجي بشوية..
قدمته ورجعت بمكاني ومهيمن بحضني..
هو شرب الماي والعصير شفطه وحده..
ياا شكد عطشان لعد هذا..

باوعلي وابتسم..
عاشت ايدج العصير كلش طيب..
انشالله نشرب شربت نجاحج..
يحجيها ويبتسم باستهزاء.!
كتله شكراً..سكت ماحجيت شي..
رجع كال..
صدك ع سيرة النجاح عاد ناجحة انت لو لا؟
ماعرف بعدني مااخذت نتيجة..
ليش الثوالث طلعت نتائجهم صارلها فترة...
لبسته ماحجيت شي ...
اشو هذا طكها ضحكة...
اباوعله عيونه حمر من الضحك ..!
ههههههه لج شتاء اخاف انت سادس ابتدائي وناصبة علي...
ترى اعرف تجذبين مو ثالث..
غثني كلش..
واني منا طاكة روحي...
ضربت ع الميز كدامي..
انت شيخصك؟؟؟؟
سادس اول ابتدائي رووووضة...شيخصك!!!؟؟؟
لا يمعودة اعصابج شسالفة...
ليش تضوجين هو شكلج صغير...
صفنت عليه بهدوء...العمر مو بالحجم عزيزي..
اكو حجمهم جبييير بس عقلهم صغيييير...
ركزت عليه وحجيت هالكلمة ..
عدل كعدته وعقد حواجبه يريد يجاوب ودخلت عهد...

كصتها تصب عرك ووجها احمر ..
رغم البيت كله تكييف واصلا بارد ..
بس الاحظ عهد بسرعة وجهها يعرك وتصير حمرة..
راحت طلعت بطل ماي واجت كعدت..
اففف ياسيوان عفست الغرفة ومالكيته..
جاوبها ببرود..
اي مو مشكلة اني هسه اروح..
بس تلكي خابريني امر اخذه..
اني صافنة عليهم شيدورون ذولة؟؟
اخذني الفضول الا اعرف..
كتلها شنو تدورين؟
هو كام من سمعني حجيت وكف..
كالت..الكف مالت مريام المحبس مالته جبير..
وردت سيوان يصغره بس دورت الغرفة كلها ماكو..
اني متاكدة مخليته بجرار يم الجرباية..
اني اصلا شفت الكف بغرفة الاطفال ..ترددت اكول لو اخليها ادور وتحتار..
تالي كتلها ياا مادري ماشفته..ردتها تدوخ تستاهل..
بس هو حس عليه اني اندله..
ومنا مقهور من حجايتي اباوعله يمثل الهدوء..
سلم وطلع طلعت وراه عهد...

بقيت افكر هذا حيجي مرة ثانية..
بس لا يتعود يجي عزا..
لازم بعد مااخلي يشوفني لو اجه..
لان نظراته حقيرة كلش..
ومدام من طرف عهد ميتأمن...
ورا يومين عهد لكت الكف بالغرفة وفرحت..
كالت حتصل عليه اذا قريب يمر ياخذه يسوي..
صادف دنيا عصر هيج بالخمسة..
سماء طالعة وي رافع وابوي بالشغل...
اني عرفته حيجي..
كتلها رح اخابر حسام يجيلي اروح لبيتهم..
كولي لابوج عيني مو بعدين تطيح براسي ..
معليج اني اخابره هسه ..
عفتها ورحت للغرفة..
خابرت ابوي كتله اريد اروح لبيت خالي..
كالعادة ماقبل..
من توفتت ماما لهسه ميقبل ابد نبات يمهم..
وحتى زياراتنا قليلة...
توسلت ردت ماكو..
كلت انام احسنلي حتى لا اتصادف وي الي مايتسمى..
سديت الاضوية والباب وتمددت بسريري...
ورا شوي سمعت صوت الجرس..
اف لا هلا اجه...

بقيت بمكاني واستمع الهم شنو يحجون ولان البيت هدوء ومحد الصوت واضح...
سمعته يحاجيها بالصالة ..
وهي انطته مريام لان سمعت صوتها تبجي..
كلتله هاك الزمها اروح اجيب الكف واجي..
جاوبها ...
شعجب وحدج لعد ماما انيسة وين ؟..
اسكت راحت لبيت خالها ..كالت رح اخابر ابن خالي يجي..
العببب وهذا ابن خالها شنو وضعه!؟؟
وضعه هزاز هههههههه...
لك ذني فالتات..
ذيج كل يوم تطلع وي خطيبها ع اساس يجهزون الشقة..
وتلكاها هسه حبلت ومندري بيها..
هههههه طبعاً عيني اذا رجلج ملتهي يحوي بالفلوس..
وامهم ميتة ..منو يدور وراهم بعد؟؟
لا غير اني كتله الحك بتك زوجها لتروح تصخم وجهك ..
وخلاهم يستعجلون بالزواج..
بس بعد بقت هالقزمة ام لسانين ..

اووف اني اسمع بكلامهم بقيت افور..
قررت اطلع اطرده من البيت ..
بس السكتني وخلاني متحنطة حجايته لعهد...
كتلج ام لسانين اني الها..
بس تحركي شوية سويلي واسطة ..
ولك ياواسطة غير تاكلني وتشربني..
اني ولساني ووكاحاتي مااكايش وياها ام الرياجيل..
لو تشوف بالعشار واحنا نمشي..
الارقام من جهة والكلام والغزل ..
تكول شاكيرا تمشي مو هالشبر ونص ام عيون الطافية..
يابه دروحي غير عيونها تسكر بدون مشروب..
ولج هيج عيون نقطة ضعفنا احنا الزلم..
عشتو لعد من باجر اسكر حتى اصير مرغوبة ههههه...
تدللي هسه اجيبلج بطل من السيارة توني مشتري...
طاح حظك ..
وحظج بت عمي..

ترى خلص صبري شوفيلي حل..
كليلها يحبج وذابح نفسه عليج ويريدج زواج ومن هالكلاوات الي تخلي البنات تمشي مغمضة ويانا...
اووف سيوان ماابتلش بيها ملسونة وعدها كلشي ولا واحد يجيب يمها هيج سيرة..
اني صح اكرهه هي واختها..
وهي اكرهها اكثر اموت منها..
بس ماشفت شي عليها لا تخابر لا تطلع ماريد اتورط..
واني اعرفك محد مشت وياك وطلعت منك صر مهر..
اكول عهد لتسويها شريفة براسي..
ترى بت رجلج لاعبة بذيلها لحد مكايلة بس..
وتجيبيها الي برجلها وبرضاتها متفقين..
متجيبيها اكدر بكل سهولة اخذ الاريدة ولا من شاف ولا من درى..
بس مو لمصلحتج اذا ماجبتيها..
ترى خليل كلشي ميعرف عن زهير الصايغ..
ولا يعرف عن زواجج من واثق..
ولا حتى موضوع حملج...
خلي الطبك مستور ومشيها الي بمعرفتج...

سمعته سلم وطلع..
بس انشلت رجليه ولساني..
من السمعته ومن الي اتوقع اشوفه بالايام الجاية...
شتريد مني الدنيا بعد شتريد!!!!!
اشو ابوي من صغري لحد ماكبرت مايوم حسسني اني بنته..
تيتمت من ابوي وهو عايش...
لو امي الي فقدتها وهي بعدها بالاربعين ..
حتى ماتهنت بشبابها..ولا تهنينا بحنانها...
ااااااااااخ يا اميييي ...ليشش عفتينا ليششش.؟؟؟؟؟؟؟
حضنت نفسي بقيت ابجي بقهر..
احس الدمعة تنزل من عيني حااارة..
بس من تنزل ارتاح...
يأست وكرهت حياتي..
حسيتها ضاقت فد مرة..
واذا كرار بدا بمأساتي سيوان ماعرف شسمه هذا حيخلص علي فد مرة...

لحظات تسلل اليأس لقلبي..
بس بداخلي صوت يكلي اليأس كفر..
وانت بدل متكفرين كولي الف الحمدلله..
المفروض تسجدين لله تحمدي وتشكري كد متكدرين..
لو ربي ميحبني مابقاني بالبيت وسمعت حديثهم ونيتهم تجاهي..
ابوي رفضه بروحتي بي صالح..
ربي نبهني واني لازم اخذ حذر..
قررت ماابين لعهد شي واكون حذرة من كل تصرف..
بس بقى كلام سيوان عنها مامفهوم..
شنو صايغ اسمه زهير وشنو متزوجة قبل..
وكله كوم ومن كال حملج كوم..
بقيت محتارة شنو متزوجة قبل بابا لو عدها اطفال!!
الله يسامحك بابا ع هيج زيجة كلها بلاوي..
بقيت بغرفتي بالليل اجت سماء..
ابد ماحجيت كدامها..
اخاف تكول لبابا وعهد تتهمها وتخرب زواجها كلشي اتوقع..

سالتها ..سمسمة شنو الاخبار وين وصلتو ...
ها خياتي كلشي خلصنا اليوم ختمناها..
ايي الحمدلله الله يسهل..
انشالله..ولو بس افكر بيج وخايفة عليج تبقين لوحدج..
لتخافين تعرفيني محد ياكل حقي..
اعرفج ام لسان متشوفيني متطمنة..
هههه شلون سمعة عليه مسكينة..
المهم يعني تمام بعد اسبوع تسافرون؟
اي متشوفينا خلصناها ركضة بس حتى نكمل..
افف مااصدك انام كم يوم مرتاحة ..
متت من التعب والفرة والتنسيق ههه يرادله تركيز..
حقج الله يساعدج بس منو كال حتنامين!...هههه
باوعتلي صفح..
ياا عابت متستحين مثل رافع انت...
اممم رافع كال متنامين بعد هذا هو متنامين ههههه...
كمزت عليه تكفخ بيه وتحضني..
اووف رح اشتاقلج ولج..
دكافي يمعودة رايحة لليابان هسه انت..
اشو قريبة عليه شوكت ماريد نشاوف...
بقينا نسولف وماحسستها بقهري ماردت اخرب فرحتها..
اعرفها مقهورة وتتمنى امي وياها..
واشوفها من بالليل تحضن المخدة وتضل تنحب..
تشكي لرافع اشتياقها واحتياجها لامي..
وهو يسكتها ويطمنها...

مرت كم يوم واجه وقت النتائج..
اني حتى مابحثت عنها ولا شفتها لان حلمي وطموحي تكسر..
جنت رايدة طب هسه اجيب معدل خمسين ؟؟بشنو ينفع وشنو يعنيلي..
اصلا حلمي الدراسي دفنته وي امي بنفس القبر...
جان وقت ظهر واني وسماء جاي نصفي كم شغلة باقية بكنتورها...
لان نقلت اغراضها كلها بقى بس الاشياء الخاصة مثل كتب وهالامور...
خابرني حسام مالحكت اجاوبه..
رجع دك رديت..

ها ولج شلونج؟
بخير ههه مو مساع نحجي بالكروب اشو كلساع تسلم..
لا لج غير اداب المكالمة..
وتعرفين تخرجنا بعد لازم نثكل..
عشتوو يالثكيل كول شعندك..
اوف منج ..طلعتي نتيجتج لو لا؟
لا شكد فايخ الي خلكها اني..
انجبي ولج مستقبلج هذا..
اني طلعتها الج..
من كال طلعتها خفق قلبي واحس نغزة ..
للاسف حلم العمر هيج اخر همي ...
ترقبت كلماته شنو حيكول..
مبروك وشوشة ناجحة.ومعدلج 71...
من سمعت المعدل نزلت دمعتي...
جنت بالمدرسة لو جبت اقل من 97 اسويلي عزا واكعد..
وهسه جايبه بالسبعين امدا الدنيا...
صدك امداها ..
حس ع قهرتي حسام كال رح اجي عليج اجيبج يمنا نحتفل ..
كومي يلا بدلو انت وسماء حتى مانتأخر...
اها وبابا؟؟
معليج خليها يمي..
صدك شخبار نتيجة بسام ؟
ماجاوبني سوا نفسه ماسمع وسده..
اعرف ميكدر يكلي بنتيجته لان هو هم رايد طب ..
واكيد جايب معدل عالي بس حسام ماجرحني...

كلت لسماء وحضنتني بقت تبجي..
تذكرنا ماما وكعدنا نبجي ثنينا..
طبعا شكد ما قلبي مكسور بفراكها..
بس احس اكو شي مصبرني..
ويوم السولفت لخالتي ومرت خالي الحلم..
كالو امج تفكر بيج وتدعيلج..
لهذا صبرتي وكدرتي تتحملين..

تالي كمنا كاالتت سماء كشخي وتعدلي..
معدلج موقليل ..
اصلا بلا متقرين جبتي هالدرجات معتمدة ع معلوماتج..
انت عبقريةماكو منج..
بقت تشجعني وراحت للكنتور تدورلي لبس..
اني رفعت شعري ذيل حصان عالي..
طبعا تسريحتي المفضلة..
خصوصا من اضوج بعد الفه كبة بنص راسي..
هيج نفسيتي ترتاح..
المهم رفعت شعري جابتلي سماء بنطرون اسود ..
بي وردات بالاطراف ناعمة صفرة..
وياه قميص شيفون اسود ربع ردن وجواه بدي صغير..
لبسته وعدلت شعري ..
سماء بدلت وكعدنا ننتظر..
شوية واجه ابوي..
كال كومو حسام منتظركم..
طلعنا وعهد جانت بالمطبخ تغسل بالممات..
كالت..
مبروك شتاء ع النجاح..
اني جاوبتها بس شكراً ورحت بست مريام كاعدة بكرسيها..
وحسام كال يلا نطلع لنتاخر...

بس عهد كل شوي تطلعلها سالفة..
مرة شتقدمين..مرة شوكت تجون..
ابوي بقى جوا وحتى ماباركلي بنجاحي ...
عاد خلصنا نفسنا كوة وطلعنا ..'واحنا بالحديقة جاي نحش بعهد..
اشواجت تهرول...
فتحت الباب وتككول تفضل...
انداريت واشوف سيوان جاي!!!

للحكاية بقية
بقلم شقراء(قمر كانون)