رواية ??هجير الشتاء?? الفصل الحادي عشر 11 - بقلم Shaqraa

هجير الشتاء
الجزء التاسع

صار سيوان بوجههنا..قدمته عهد لحسام وتعارفو..
بس حسام لاحظته حجه معلك...
ورد السلام ببرود...
هو سلم عليه حسيته يريد يبين لحسام اني ويا معرفة..
يعني يحجي بميانة..
بس حسام كله نتزخص..
وحط ايده ورا ظهري ومشينا..
من فتنا للسيارة سالوني سماء وحسام بنفس الوقت..
اشو هذا ذاب ميانة وياج؟؟
جاوبتهم واني مالي خلك ..
اي شفته من رحنا للعشار اني وعهد ..
جابت منه محبس لبابا..
كال حسام..
اهااا يعني هم صايغ...
اكول ابوج مو مال محابس بس الظاهر ميرفض لعهد طلب..
صراحة كلش عجبني محبسه..
شتاء بلكي من ينام تخمطي ويبتسم...

لفتت نظري كلمة هم صايغ....من كالها حسام..سالته..
شنو تكول هم صايغ؟
انت تعرف احد من اهلها؟
لا بس سمعت عمامها صاغة..فما توقعت ابن عمها هم..
طبعا جوابه ماقنعتي لان اصلا مو مقنع..
يعني بديهي اذا عمها صايغ اكيد ابنه وياه..
صفنت بجوابه وقاطعتتا سماء..
اكلكم يعني الصاغة بيهم اسلام؟؟
اي هم بيهم بس قليل ..
الاكثرية صابئة..وعهد اصلهم صابئة وجدهم مستسلم...
شفت اندهاش سماء وبقت تناقش..
بس حسام امبين يعرف..
كلت بعدين اسئله شنو يعرف عنها ومنين عرف...

وصلنا لبيت خالي وخطية محضرين كيك وعصير وكرزات..
اول ماشافتني مرت خالي بوستني وحضنتني...
شكد ماخالي طيب الله رزقه بمرة وردة...
ميقات وبسام التمو ويشاقون وياي ينسوني..
وخالي طلع من الغرفة جان نايم..
بوسني براسي وباركلي..
سالت بسام عن معدله شفتهم بهتو...
بس اني ماحسستهم اني ضايجة..
كتله بسام ليش خانس اخاف مصخمها..
ترى لتنسى انت مواعدنا لو جبت الطب تغدينا ببيت المندي والتحلية والموطا بفستقة..
بشرنا يمعود كلبي يم الاكل اني..
شفته ابتسم كال تدللين بت عمتي ..ماانسى الوعد..
رحت يمه ..صددك شكد ولك شكد جبت..
شفته دنك راسه كال..97..
طبعا بسام صح حيييل ذكي بس ماجان اله واهس يدرس..
يعني بضغط اهله واهتماهم ومساندتهم اله طلع معدل عالي..
اتذكر جانت مرت خالي تكله لتهرب من الدراسه ..
دشوف شتاء تخبل درجاتها وبلا محد يجبرها تدرس..
وهو يضايق وميقبل يدرس..
بس هسه هم وياه وساندوه ووصل..
تمنيت اني امي وياي جان ساندتني وجبت معدل احلامي..
لو ابوي يعوض بمكانها ويتباهى بيه ىبذكائي..
كل سنة اطلع الاولى ع المدرسة ويكرموني..
وهو لا يدري ولا يبارك..
وهالسنة مدرستي جانت عشمها بيه اطلع من اوائل العراق..
بس للاسف لا طلعت اولى ولا ثانية..
بقيت متاخرة بكلشيييي .....

ماحسستهم اني ضايجة..
لان هم هسه اكيد طايرين من الفرح بس يخفونه اكراماً لمشاعري..
بس اني بينتلهم راضيه بمعدلي..
ضحكت وتشاقيت ..
وخلال ماجنا نحجي اجو اوان وخالتي..
وانسجمت بالجو وتناسيت الهم شوية..
تالي من التهو كعدت يم حسام...
كتله ليش ضايج شبيك..
بالعكس مضايج غير فرحان بيكم..
دروح ع اساس انت تخرجت وصرت شخصية ها..
وتضوج ومتكول السبب..
شفته ابتسم وجر خصله نازله من شعري من كدام..
ام عطوب شوكت لسانج يكصر..
ولو ميكصر الا من تضمين هالعطوب الطالعة..
استغربت حجاية حسام..
عدلت كعدتي كتله ليش هيج تحجي..

فرك وجهه يحاول يرتب كلماته..
شتاء اختج رح تتزوج..
بس بالي يبقى وياج..
مرت ابوج مو ادمية وياج بالذات..
وابوج ميؤوس منه..
ابتسمتله..فديت الخايف عليه..تطمن اني موو طفلة..
اعرف ادافع عن نفسي ليبقى بالك..
بس ردت اسألك شنو تعرف عن عهد..
شفته تنهد كال..
ماعرف شي عنها بس سمعت من ابوي ..
عمامها صاغة وهي يتيمة ..
واخوها صديلي..
اها زينن خالو شمدري؟؟
مو من تزوجها ابوج وسولف عن عمامها صاغة..
ابوي سال خالي تعرفي بعد العشار شي تعرف شي..
وخالي فائق تاجر بالعشار..
من ساله ابويه كله اعرفهم..
خوش ناس معروفين وحجاله عنهم..
امم ..زين حسام شنو اليخلي شابة عمرها 29 تتزوج رجال عمره 57 سنة ؟
وهي حلوة وخريجة..
ماعرف يمكن حبها وحبته..
مو يكولون الحب اعمى..
اي بس اعمى ميشوف العيوب مو اثول ميفرق بين جبير وصغير..
تنهد كال..اووف وشوشة هو الحب اثول واعمى واطرش..
لتشغلين بالج بيها..
صح هي نذلة واذتكم بس لبسيها..
وباجر كلشي يتغير...

ماعرف كلام حسام حسيته الغاز..
وبقى بالي كلامه عن عهد واهلها..
هو يكول خوش ناس..
لعد كلام سيوان وتهديده الها شنو؟؟
جان يحجي عن صايغ اسمه زهير..
لازم اعرف هذا منهم لو غريب..
بس لازم الكى احد يساعدني..
بس خل يخلص زواج سماء..
بالليل رجعنا حسام للبيت..
جانو ابوي وعهد فوك..
رحنا لغرفنا وكل وحدة لفراشها......

اليوم زواج سماء..
ماسوت حفلة ولا عزمت احد بشروط ابوي..
مجرد لبست كوستم ابيض..
واجه رافع واهله اخذوها وهم الحمدلله ناس مثقفة الى درجة..
لان ابوي يرادله واحد يتحمله...
راحت والمفروض طيارتهم بالسته العصر...
ودعتنا وجانو حاضرين بس خالي عزيز وخالتي فدوى واولادهم وازواجهم..
بعد ماراحت راحو خوالي لان مو ع وفاق وي ابوي..
ميطولون يمنا..

بقيت لوحدي لان ابوي اخذ عهد وطلعو ورا طلعتهم..
جانت تقريبا سبعة المغرب ..
بقيت لوحدي بقيت وي وحدتي.. وي غربتي ..
وي يتمي...
جنت متصبرة بسماء ع فراق ماما..
بس هسه من راحت احس يتمت مرة ثانية...
سماء صح اكبر مني بسنة..
بس شخصيتها جبيرة وراكزة وعاقله حيل..
حيل تشبه شخصية امي..
بس الفرق سماء لسان وامي كتومة ولسانها مينطق ..
سمعت صوت الاذان ...
مسحت دموعي ورحت توضيت..
صليت صلاتي وصليت لامي..
وقريت قرآن ودعيت لسماء..

حسيت راسي وجعني من البجي..
تمددت ع السجادة وبقيت اسبّح..
الى ان غفيت ...
وشفت امي بالحلم..لابسة دشداشة خضرة وبيها ورد ابيض..
وشعرها مرتب وشكلها مرتاح حيل.
اجت من باب غرفتي فاتت...واني ايدي ع راسي وابجي..
اجتلي واخذتني بحضنها..
مسحت دموعي بيدها وتبتسم..
ييما كافي بجي ..هالعيون الحلوة ذبلت ..
كومي شوفي شنوجبتلج...
كمت من حضنها فرحانة..
شنوو ماما شنو جبتيلي..
كامت وجابتلي حمامة بيضة شكلها يجنن..
حطتها بحضني..
وحضنت الحمامة وفرحانة حيل..
دكت ع جتفي..
كومي وديها فرحي بيها الي صارله سنة ينتظرها ..
لزمتها من ايدها ..
ماما هاي مالتي ماانطيها لاحد ..
وخرتي ايدي ومشت..
لا ماما روحي وردي قلبه مثل ماورد قلبج وزرع بي فصل الربيع..
انتو انكتبتو لبعض..انت شتاء وهو فصل الربيع ..
مايج وي هواه رح تزهر حياتكم...
بقت تمشي وتردد هالكلمات..
الى ان طلعت من الغرفة..
ركضت وراها ..مالكيتها..
صحت ماااما وين رحتيي...
فزيت من نومتي ..
بعدني نايمة ع السجادة...

بس احس نفسي مرتاحة..شفت ماما وحجيت وياها..
بس منو هذا الي يزرع الربيع بروحي..؟
وين مااباوع الكى اليريد يدمرني..
ماشفت احد يريدني اورد...
بس يلا ماكو حال يدوم..

سمعت اصواتهم برا..
طلعت لكيتهم كاعدين بالصالة الاطفال يمهم ..
وهم مخلين كرزات وموطا ويسولفون وبكامل سعادتهم..
طلعت شافني ابوي..كال..
جبنالج عشا ويانا بالمطبخ ..
كتله مشكور ..مااشتهي..
رحت لمهيمن مخلي بالكرسي الهزاز شلته..
حضنته وبوسته..
كال ابوي..
شوفي شلون يريدج ..هذا اذا اجه اخو وشلتي يمكن يتعارك وياج ههه...
ضحكت عهد..صدك شتاء باركيلي اني حامل...
باوعتلها ببرود ..
مبرووك..
عفتهم ورجعت مهيمن بمكانه ودخلت لغرفتي...

تمددت اباوع تلفزيون ..
شويةوخابرتني سماء..
تطمنت عليها ووصتني مااضوج وسدته..
جانت تقريبا ساعة 11 بالليل..
اني شبعانه نوم لان نمت المغرب..
كعدت اباوع فلم اجنبي جان طالع ...
دك فوني..شفت رقم غريب..
مجاوبت..دك مرة ثانية..
رديت..
بس ماحجيت..
جان الفلم صوته واضح يمي ..لان احب اسمع كلامهم يفيدني تعلمت منهم لغتي تحسنت..
جنت ساكتة وهو ساكت..

ورا شوية سمعت تنهيده بس بصوت ناصي..
اااااه منج..شنو جاي تباوعين فلم؟؟
جاوبت باستغراب!!
منو !؟؟؟
نصه صوته اكثر وحجه بهدوء..
جانت نبرته حلوة ..ويحجي بصورة مثيرة..
اريد اركز بالنبرة سامعتها بس منووو!!
شتاء اريدج يمي هسه بفراشي...اووف احرك عشيرتج!!!
صخاام هذا منو وشيحجي!!!!
سديت الفون مرعوبة..

بقيت اباوع للرقم..طلعته بالكاشف ماطلع..
حفظته بالجهاز..
رحت للواتساب!!!
شفت الصورة هذا سيوان؟!!
عزا العزاك مراح اخلص منك..
بقى يدك كلساع..
انطيته حضر وخفت بداخلي..
هذا شلون هيج يسوي وياي !!
بس لحظة هو جان صوته هادىء وحجايته بيها لحن..
معقولة يكون شارب!!
اي اكيد مو معقوله من اول مكالمة يكلي هيج..
جان ممكن يحاول يظهر بصورة زينة..
او يلبس قناع الادب لحد ميكسبني..

بقيت افكر هذا مراح يعوفني ..
ناوي نية علي وصرت اخاف منه..
بقيت سهرانه ونمت متاخر..
كعدت سبحت ورفعت شعري كبة عالية..
شفت ثوب مرة اشتريته عجبني من ماكسي مول..
لبسته مرة وحدة طلعنا سفرة اهل..
بس حسام رزلني كال لتلبسي بعد..
بوكتها تعارك وياي كال عيب مو مال طلعه..
من وقتها ملابسته..
كلت البسه بالبيت احسن..
جان جوا الركبة بشوية..
ومن فوك مخروط وشويه دلعه..
ردنه ثلث ارباع وهم مخروطه..
بس حلو قماشه فيزون خفيف وبارد...

دخلت للمطبخ شفت عهد..
لكيتها تسوي سريلاك لمريام..
شافتني كالت..
زين اجيتي اخذي ميهمن وكلي ..
خليني اوكل مريام..
جان مهيمن هادىء كلش واريحي وحيل حلو..
ومريام نسخة منه بالشكل ..
بس وكيحة وهواي تبجي..
عكس اول مصارت هادئة..

كعدت اوكله واندك الجرس..
جانت الشاشة طافية مالت الكاميرات...
كتلها عهد تنتظرين احد؟
التفت بعدم مبالاة..
لا ممنتظرة ..تلكي فقير يمكن ..
كمت اريد افتح الشاشة اشوف منو..
فتحتها اشو سودا..
اففف الظاهر عطلانة..

كمت رحت للباب بيدي مهيمن..
فتحت الباب وصار بوجهي سيوان..
رجعت ليورا وبلعت ريك..
تذكرت موقفه البارحة جسمه كله رجف..
اشو هذا فات قبل لا انطق واخذ مهيمن مني..
بس من تقرب اخذه هيج صار تنفسه سريع يم اذني..
اني رجعت ليورا ..
بس ماحسيته اني عرفته .. هو الي خابرني البارحة..
رجعت ليورا وهو سلم وعيونه تاكل اكل..
كتله ..
تفضل عهد جوا..

مشى كدامي فات للمطبخ..
ومنو كال اني جاي لعهد؟
باوعت عهد مو بالمطبخ..
صفنت عليه واحاول مااظهرله خوفي..
لعد اذا مو لعهد المن ؟؟لابوي ترى مو هنا؟!!
ايي اعرف ابوج مو هنا..
جاي احاجيج الج..
شتريد مني ؟؟
تفضل احجي هاي اني كدامك...
طبعا هو كعد ..
واني امشي واحجي..
طلعتله بطل ماي وبطل عصير كوكتيل خليت كدامه..
ودرت جاي اخلي حلويات بماعون..كال..

انداري عليه حتى اعرف احجي..
بس بصوت خافت كال..
اذا تبقين هيج احتمال افهمج الاريده بدون حجي..
توقع اني ماسمعته..
وفعلا وهمته ماسمعت..
حطيت الماعون كدامه..
وهو نظراته عليه ..
باوعتله ..بس وترتني نظراته..
اي تفضل احجي لام مستعجلة حيجي ابن خالي ياخذني..
ردت احسسه مو لوحدي اخاف بباله شي..
جان يحجي ويباوع لركبتي..
لابسة كلادة صغيرة ع الركبة وبيها اسمي..
مركز بيها كال..
كلادتج حلوة ..
شكراً......
مو بس حلوة تجننن وركبتج هم تجنن...
فتحت عيوني بخزرة ..
ومشيت للباب..
مدام متحترم نفسك تفضل برااااا...
وكف بهدوء وباوع بوجهي..
غير تسمعيني؟؟
فضها احجي وروح لتخليني اتصرف غير تصرف..
فرك وجهه وجر شعره ليورا حيل ورجع باوعلي..
شتاء تتزوجيني؟؟

للحكاية بقية
بقلم شقراء (قمر كانون)