رواية ??هجير الشتاء?? الفصل التاسع 9 - بقلم Shaqraa

هجير الشتاء
الجزء السابع

بعد الي سمعته من ميقات تحطمت امالي..
بقيت احسب بايام عمري ..على اي لحظة ممكن ينقام عليه الحد..
كرهت كرار اكثر واكثر..
شلون يكسر بختي واني ممأذيته بشي..
وبعد هذا كله يتركني...
بقيت بغرفتي واملخ بشعري..اخاف شلون بيه اخاف انذبح...
فكرت اني وحدي مااكدر اتصرف بشي..
لازم احجي لسماء الي صار..
هي اختي وحتساندني..
ورأيين احسن من رأي واحد..
مرات الانسان من خوفه من هول المشكلة..
الحل كدامه وميشوفه ..عقله يتغلف..
لهذا نحتاج طرف اخر يوضحلنا الحقيقة..
ويمكن ياخذ بينا لطريق النجاة........
انتظرت سماء جانت تحاجي رافع بالليل ورا العشا..
ورا شوي هي انتبهتلي بيه شي..
سدت الفون وكامت قفلت الباب..
اجت كعدت يمي وفتحت الT.V وعلت الصوت...
اني دنكت العب باللحاف ..
كعدت يمي ع السرير ودارتني عليها...

اشو رفعي راسج وشوشة شبيج؟؟
نزلت دموعي وذبيت نفسي بحضنها...
هي حضنتني حيل وتمسح بشعري..
احجيلي خياتي ليش هالبجي ليش ذبلانة وتعبانة..
رفعتني من حضنها ومسحت دموعي..
اباوعلها عيونها مدمعه..
فركت وجهي كتلها..رح احجيلج كلشي..
اني هسه مالي غيرج ..
وماكدرت احجي لماما من خوفي عليها...
هزت راسها ووجهها مبين عليه الترقب والحيرة..
بلشت احجيلها الي صار وياي مناول لقاء وي كرار..
وختمته الها بكلام ميقات عنه هو ومرته...
اباوع لسماء بقت صافنة تالي كالت..
انت حسيتي بوجع؟؟
اي حسيت بس ماشفت نازل مني شي ..
الدم شفته بالبرنص..
زين انطيني رقم كرار هسه...
فتحت فوني دزيتلها الرقم..
اتصلت عليه واني اباوع بوجهها..

بلشت تحاجي سلمت عليه وكلتله باجر اريد اشوفك ..
اتفقت ويا يجي للجامعة وتشوفه..
سدته منه واني صافنة شتريد تسوي...
سالتها ماستغرب من طلبج؟
ميستغرب لان يعرف سبب لقائي لي..
اصلا جان متوقع من حاجيته حسيت مثل المنتظر هالشي...
اففف سماء شنو حتسوين شتحاجي؟
لتفكرين معليج اني احلها..
شتاء خلي نفسج قوية..
امي تحملت المر بسببنا..
في سبيل نعيش احسن عيشة وتصير النا شخصية وكيان..
لتضعفين وتستسلمين..
امي روحها ويانا..تجي تزورنا وتشوفنا وتسمعنا..
لتخليها من تجي تزورنا ترجع مهمومة وتتعذب ..
الله كريم مدامج وياي اكيد مااضعف واريح ماما بقبرها..

صار يوم ثاني وراحت سماء..
اني انتظرها ع نار..
نزلت عهد مبدلة والاطفال وياها ..
كالت..
بدلي وامشي وياي اريد اخذ لابوج محبس..
وصيت عليه صياغة.
اففف روحي لوحدج مالي خلك اطلع..
دكومي عاد اريد احتفل اليوم ميلاده وانطي الهدية..
واريد تعاونيني بالاطفال..
ماروح تريد تروحين ولي لوحدج..
بسيييطة هيج صارت!!
الا اخابر ابوج هسه اكله بتك الجبيرة طالعة وي خطيبها من وراك ...
عزا تذكرت سماء طلعت بلا ميعرف ابوي..
خلاص كافي لتمصخيها عاد..
رايحة ابدل واجي...
يلا استعجلي لنتاخر والشمس حارة..
كمت منها واني مالي خلك روحي..
لبست اوفر كابوي اسود بس مسحات ..
وعليه قميص نص ردن اسود وينشد من يم الخصر..
شعري اصلا رافعته ذيل حصان عالي..
اخذت جنطتي والفون وطلعت..
هي واكفه تنتظر..
مخليه الاطفال بعربة مال توأم..
شافتني نفخت ..
ديلا فضيها استعجلي ..
درت خزرتها ..شبيج جنج متواعدة دكافي فهمنا رايحة تجيبين هدية...
مو معناها تخبصيم الدنيا...
غلست هي ماجاوبت..

وصلنا للسوك ورحنا لسوك الذهب مباشرة..
وصلنا لمحل ..
دخلنا جوا ..دخلت هي قبلي وسلمت..
شلونك سيوان شخبارك...
كام طلع من ورا الجامخانة مالت العرض ..
تقدم يردلها السلام..
اني واكفة وراها..
كال تفضلو استريحو..
ماعرفتينا منو الانسة؟
اندارت عليه ورجعت باوعتله..
ا..شتاء بنت زوجي الصغيرة..
اممم يااهلا وسهلا والف مرحبا نورتي المحل ..
واني دايرة وجهي كلت شكراً..حجيتها من ورا خشمي..
بدون ماالتفت عليه او اباوع واركز..
بقت عهد تحاجي ع المحبس واني صافنة ع الباب..
اباوع الناس التعبر ..
لحد ماعهد حاجتني..
شتاء اني حروح اجيبه من المحل الثاني واجي..
التفتت عليها باستغراب ..
شنو؟واني وين ابقى؟؟
ابقي انت والاطفال يم سيوان مو غريب هو ..
بس اجيب المحبس لان بالمحل الثاني..
اهااا..اوكي لتتاخرين..
اذا تأخرتي اخذهم وارجع..
رفعتلي حاجبها وراحت..
بقيت اني كاعدة وهي طلعت وسدت الباب وراها..
لان حارة موت ..والمحل بارد ..بقيت كاعدة..

شفته فتح باب صغير بداخل المحل وشويه واجه..
جابلي عصير وبطل ماي واجه حطه يمي..
كعد ع التخم الثاني الي بصفي..
اييه شتاء اشو مخليته ع الصامت شسالفه..
جانت حجايته بيها نبرة استهزاء..
درت وجهي عليه ..
عفواً شتريد؟؟؟شنو هالميانة اعرفك تعرفني؟؟
اباوعله من درت وجهي عليه نظرات...!
خلتني ودي اضم نفسي او اكوم اطلع وماابقى لحظة يمه..
جان يباوعلي بتفحص..بحيث تفتر عيونه من راسي لاجزاء جسمي بالتدريج...
قشعر جسمي من تصرفه..
وعيونه هو كبار بحيث نظرتهم بارزة..
يذكرني بعيون كرار بينهم تشابه بالعيون وجرأة النظرة...
بس هو عيونه لونهم مثل لون الحنة..بارز ومميز..
بس باقي الملامح تختلف..
هو شكله حلو..ومرتب نفسه لحية بنية وشعر عالي..
طوله عادي وجسمه مرتب بي خشونة ..بس بي كرش حيل صغير..
وتوقعته يشرب..لان يشبه بابا قبل هيج جان عنده كرش صغير..
اتدكر مرة يكول لامي..
جان مبدل وواكف ع المراية..
اوف هذا الشرب مطلعلي كرش صغير..
لازم احاول اعادل باكلي والعب رياضة...
فهذا جسمه ذكرني بي...

المهم هو كال..اشربي الماي والعصير لان حارة..
واخاف عهد اطول..
بالمناسبة اني ابن عم عهد ترى...
باوعتله باستغراب...
يعني عمها اخو ابوها!؟..
وهو نفس نظراته الي تروح يمين وشمال...
اي اخو ابوها ..ليش مستغربة..
لا مو مستغربة بس اتذكر اني الصاغة اغلبهم صابئة..
بس يمكن انتو مو مو صابئة مو شرط...
ابتسم هو وزادت نظراته..
لا يابه احنا قبل صابئة...بس ابو جدي صار مسلم..
تزوج مرة مسلمة واسلم بسببها..
ومن بعدها صارت خلفته اسلام..الي هم جدي..واخوه الثاني..
وابوي وعمامي واولاد جدي الثاني ..
تكدرين تكولين طلعو من العائلة..
صار اساس جديد وانتمو للاسلام...
اها..يعني انت وعهد اصلكم صابئي..
اي يعني متعرفين بعهد جانت صابئية؟؟
كلشي منعرف عن عهد..حجيتها بنتر ودرت وجهي..
حسيته تفاجأ بس سكت..
اني هم سكتت ..
الاطفال نايمين لحد هسه..
رجعت افكر بالصار وي سماء..
بس مااتجرأ واخابرها..
خايفة كلش..
رغم طول ماهو يحاجيني اني كل شوي اباوع ع الفون..

رجع كال...
شتاء بيا صف انت؟
درت عليه وهم نفس النظرات البيها كم جسارة
هائل..
تنهدت جان يكول..
اني حسب اعتقادي بصف ثالث متوسط صح؟
باوعتله من من جوا رموشي ..
مثل نظرة الممصدك..
كتله ..اي صح بهالاثناء دك الفون ..
شفته سماء..
جاوبتها بسرعة..وبنبرة ترجف..
ها شنو شصار متت من التفكير..
اجالي صوتها بي نبرة اطمئنان..
كمت وكفت بباب المحل واستمع لكلامها..
وشوشة اجه وحاجيته..
بس يكول مماخذها ..
بس وهمتها بهالشي حتى تقبل بيه..
عطت اني..
كذاااب يريد يخلص نفسه..نزلت دموعي ..
لج يحلف يكول ماخذتها شبيج اهدي..
لا اخذني كراار اخذني.....
بس يريد يخلص نفسه..
يعني الالم الحسيت بي لو الدم الي بملابسي هذا كله اكذبه..
واصدك بكلامه واقنع نفسي هو مماخذني..
اصلا مااصدك بي لو يحلف بالف قسم..
مثل ماوهمني بالحب وسوا نفسه مجنون ليلى..
مو بعيده هسه ينكر ويسحب نفسه حتى ليتزوجني..
جنت منهارة بالبجي والكلام...
نسيت اني بالشارع ونسيت كلشي..
كالت سماء..
اهدي خلاص اني جاية..
لتبجين بس كافي..
سديته ومسحت دموعي وفتت للمحل..
مو مهتمه لكل الي يمي..
دخلت لكيت الاطفال كاعدين..
وسيوان يمهم يلعبهم..
شافني وضعي مخربط..
ماسألني شي..سوا نفسه مشغول بيهم..
هالشي الوحيد الخلاني احترمه ..
ماتدخل بخصوصياتي..

بس كعدت اجت عهد..
وجهه احمر وكصتها تصب عرك..
عبالك جانت تحرر الموصل وهيج تعبانة..
دخلت كلتله سيوان فدوة ماي متت حر..
انطاها البطل ويضحك..لج عهد هالفرة والتعب كله لعيد ميلاد زوجج..
شكد تحبي لعد..
جاوبته..ايي فديته اموت عليه وهو يموت عليه..
شعندي غيره..
ابتسم وكال..
الله يديمكم ويرزقنا هيج حب..
كافي سيوان عينك لتحسدنا عابت..
صدك شخبار صاحبتك بت عماد الصايغ..
هههههاي ولج بشهر العسل شكد قديمة انت..
يااا شلون؟؟
بعد تزوجت حاولت وي ابوها كذا مرة يكلي الا ترجع صابئي..
وهي من رأي ابوها..
صارت ضدي وبعد اجتها قسمة وراحت..
انتن النسوان ماتتأمنن ههههههه..
انجب ولك مو كلنا..يلا شتاء امشي نرجع..
هالحجي اني مصفنة عليهم..
وبالي يفتر بمصيبتي المالها حل...

طلعنا من يمه وهو عيونه تاكل بيه..
رجعنا لكيت سماء بالبيت..
طبعا اني دزيتلها مسج اني وي عهد..
بس من رجعت سالتني ..شعجب طلعتي وياها..
لخاطر الاطفال خطية ..
هسه كليلي شكال هذا النذل..
اوف تعالي اكعدي وسمعيني عدل...

شوفي يكول اني ردت بالاول اخذها حتى اضمنها الي..
بس تقربت منها ردت اخذها بسرعة ابتعدت..
ماكدرت اخذ شرفها بهيج طريقة وتبقى تكرهني..
بعدت عنها...واني ومتاكد مااخذتها..
بس شفت حمرة على ميز بالغرفة..
لطخت بيها ملابسها..
كتله بس هي تكول حسيت بوجع..
كال اي صح بس لان تقربتلها بس شلون اشرحلج ..
يعني ماكملت شي بس برا..
وهم لان ضربتها على رجليها حيل..
هيج حست بالم..
واني حاولت وي ابوج هواي وماقبل ابد..
ومرتي حامل ..
كلت ارجع لعائلتي وخلاص اترك شتاء واخلصها مني..
لان هي متريدني ولا تطيقني..
حلفته وكتله حاخذها للدكتورة..
واذا طلع عكس كلامك احجي لابوي كلشي..
وتعرف ابوي شنو وميتفاهم..
حتى لو اضطر اشردها لشتاء المهم انت تاخذ جزاءك..
واروح لمرتك واحجيالها كلشي..
ورسايلك وتهديدك لشتاء كلشي موجود...
جان يحجي بثقة كال..
اخذيها وتاكدي منها..
ولو طلعت كذاب سوي التردي...
اني ماغدرت بيها ولا فرطت بيها..
بس ماردت اخسر كلشي..
خسرت شتاء وشكد حبيتها..
بس ماكدرت افلس حتى من مرتي وطفلي الجاي بالطريق...
طبعا اني رزلته وطيحت حظه ..

وخابرت رافع واجه رجعني..
وحجيتله ماردت اضم شي واحنا نحتاج رحال ويانا...
تعرفين ابوي مو بحالنا..
رافع راد يروحلها وتخبل من حجيتله..
بس كتله لخاطرها حتى لتنفضح بشي مموجود وتالي محد يصدك...
واني هم من حجتلي شكيت هو ممسويها..
لان مهما صار ..احنا اهل وميكدر يدك الناقصة بينا...
عاد ارافع هدا شوي وسكت...
اووف كلامج طمني بس هم ابقى خايفة..
الله كريم لتشيلين هم...

مرت الايام وسماء نجحت..
وبابا دز ع رافع وكله تتزوجون ..
بالاول سماء رفضت الا بعد السنة مالت ماما..
بس ابوي كلها اختاري لو تتزوجبن لو كل واحد بحاله..
ماعندي بنات كل يوم ياخطيبها اجه..يا طلعت ويا...
تالي استسلمت سماء وقبلت تتزوج...
بس يسافرون بدون لا حفلة ولا اي شي..
ورافع هم لخاطرها كال ميخالف..
بلشت تجهز واني وياها وخالتي مرات..
ومرات ميقات واوان ومرت خالي..
تقريباً كملت كلشي..
بقت تطلع هي ورافع حتى يكملون اثاث شقتهم..
كل يوم يجهزون شغلة..
واني بالبيت ومخلصتها وي الاطفال..
عهد ماتدري عنهم شي..
بيوم الصبح ..
سماء طلعت وي رافع وابوي بالشغل..
اني كاعدة اسوي ممه لمهيمن واندك الباب..
باوعت بالكاميرا..
شفت سيوان واكف يم سيارته ويخابر!

للحكاية بقية
بقلم شقراء(قمر كانون)