رواية ??هجير الشتاء?? الفصل الرابع عشر 14 - بقلم Shaqraa

هجير الشتاء
الجزء الثاني عشر

اني قرييت المسج انصدمت!!هذا شيحجي؟؟
طلعت ومترددة اصعد فوك لو لا..
بس عيب اخاف اصعد واشوفها هي وابوي بوضع عيب...
لا مااصعد...
بس شلون والفضول البية.
صعدت الدرج بهدوء ...
كدامي غرفة الاطفال وبالزاوية غرفة ابوي..
بعدني بالممر وسمعت الصوت...
جمدت رجليه ماكدرت امشي..
اول مرة اسمع هيج شي ..جان شي صادم يعني خجل خوف قشعرة..
واسمع ابوي يتغزل بيها...
وهي مخبلته بجوابها..
ماعرف شلون حملتني رجليه ونزلت من الدرج..
دخلت لغرفتي ..
رغم الجو صيف بس حسيت بالبرد..
بدلت ملابسي وتغطيت ...
حظنت نفسي وبقيت صافنة..
ماعرف يمكن افكر لو فعلا تزوجت سيوان؟؟حكون مضطرة اسوي هالشي...
اففف شتاء شبيج تخبلتي..اصلا سيوان فترة وتخلصين منه..

فكرت اخابر سماء لان كالت خابريني وطمنيني...
خابرتها خطيه جانت نايمة..
صوتها مقفل كتلها رجعي نامي كالت لا زين كعدتيني..
ههه كلتي حشبع نوم وصدك شبعتي ولج...
شكد بطرانة ولج نايمة بالستة الصبح..
يااااا انطو نفسكم مجال مطايرين ترى...
الصمي طلعنا ورجعنا متاخر وتاخرت نومتنا..
هههه ليش مرتبكة وتبررين ترى عادي..
انجبي واحجيلي شصار وياج..'
سكتي غير هذا الحقير اليوم سواني طوبة ولعب بية...
عزااا شسوالج ولج كولي نطقي..
ولج رزلني ع الملابس وسوا نفسه مستر غيور ..
التنورة القصيرة لابستها فشلني وخلاني انزعها..
والفستان البينصل ابو الورد طلعت بي وياه وذبله حجاية تخزي ولج هذا لسااانه زفرررر....

هلا هلا اشو احجيلي هاي اني صحصحت ..
حجيتلها كلشي وهي تسمع ومهتمة بالموضوع...
تالي من خلصت كالت..
طبعا حتى لو ميحبج بس اسمج كدام الناس اله..
وميمشي وياج بهيج لبس ..
هو صراحة هم حقه انت لبسج ماصخ زيادة..
شكم مرة انصحج بس متاخدين كلام..
ع العموم انت طيعي بالوقت الحالي..
حتى تكسبي وتعرفين عهد شنو وراها..
وشنو تهديده الها جان..
مدامها فترة وتعدي استفادي منها..
بس صيري ذكية ولتخلي يستغلج..
ولو انت متتوصين ..
بس الحذر واجب...
بقينة نسولف اني وياها تالي سديته..
سمعت صوتهم جوا يحجون..
طلعت لكيت عهد وابوي يتغدون..
استغربو من شافوني عبالهم ماراجعة..
بس كتلهم سيوان عنده شغل ورجعنا..

العصر اني بغرفتي واسمع عياط عهد..
شتاااء لحكيييلي رح امووووت..؟؟!!!
طلعت اركض صوتها خرعني..
لكيتها بنهاية الدرج كاعده وملابسها كله دم وتبجي..
صعدتلها ركض..
شبييج شصااير؟؟؟
جانت وجهها يمطر عرك وكوة تحجي..
خابري ابوج يمكن سقطت..
ودربالج ع الاطفال عفيية شتاء اذا متت لتظلميهم!!!
حجيها مكطع كوة افهم منها شي..
بس الي جاي افهمه هي توصيني!
شتاء انت طيبة واعرفج تحبيهم..
عفية لو مهما صار دربالج عليهم..
اعرف ابوج يذلهم وميريدهم تاالي...
هذا بس الفهمته منها...
اسمع الاطفال يبجون..
رحت شلتهم منا واحد ومنا واحد..
ونزلت خليتهم بعربتهم وخابرت ابوي..
بس سمع ضل يمتمت كال اخذيها للمستشفى واني جاي..
صعدت لعهد كومتها..
تبجي من الالم بس كوة فاتحه عينها..
استعجلت لبستها خفت توكع منو يشيلها...
نزلتها كوة واخذت الاطفال للشارع..
وكفت تكسي وصعدنا بسرعة..
بالطريق ابوي خابر ..
كتله رح نوصل كال انتظركم بالمستشفى...

صدك وصلنا هو تلكانه بالباب..
كتله اخذ الاطفال برا واني اخدها..
دخلتها وبعد الكشف تبين الطفل ميت ببطنها وهي تنزف..
لازم ينزلو بس يحتاج اجراءات..
رحت لابوي ودزيته يكمل الاجراءات واني يمهم..
فكرت ذوله خطية صغار ومستشفى اخاف يتمرضون..
كلت اخابر مرت خالي واخليهم يمها..
خابرتها وخطية ماحجت كالت بالعكس يونسونا ..
كالت حدزلج حسام هسه وانطيهم اله..
تشكرت منها وسديته..
طلع ابوي ورا شوي كال عهد بالعمليات..
كتله ع مود الاطفال كال كيفج ..
ورا شوية اجه حسام ..
سلمت عليه واخذنا الاطفال وصعدنا بالسيارة..
كتله نمر لبيتنا اخذلهم اغراض..
كال اوكي وطلعنا...
سالني عن عهد كتله..

ماعرف سمعتها تصرخ ومن طلعت هذا وضعها..
لان الظهر مابيها شي وابوي يمها ..
بس ورا طلعته بشوية هيج صار..
لعد ابوج شعجب الظهر بالبيت ؟
تذكرت اني حسام واهل امي ميدرون بموضوع سيوان..
وابوي ماكلهم لان اصلا خوالي ميحجون ويا ..
ورا ماتوفت امي وصارت مشاكل لان بسببه وقطعو..
خالو عزيز خطية لخاطرنا بقى يتواصل ..
رغم ابوي هم مو ادمي ويا..
بس هو خالي يكول حتى ترتاح امكم بقبرها اني ماترككم..
وانتو ربيتو عندي وبغلاوة اولادي...
بس هسه شلون رح احجي لحسام ..
وخصوصا انه ماعاقده واطلع ويي سيوان ويجي لبيتنا..
بس كلت اول وتالي لازم يعرف..

جاوبته ..مو ابوي اليوم مراح الصبح للشغل..
لان سيوان ابن عم عهد خطبني منه واني بالاول رفضت..
بس بعدين كالو كعدو واتفقو واذا متفاهمتو خلاص ..
القرار يمكم ...
اندار عليه باستغراب!!
وكعدتو سوا وشنو صار بلة؟؟
اي كعدنا بس...
اني ممرتاحتله وخلاص اعتبره فد امتحان ويخلص..
اممم ليش ممرتاحتله؟؟
لان اصلا طريقة هالخطبة مو عاداتنا..
ليش مو خطبج من ابوج واجه وتشاوفتو ..
وراها اذا وافقتو يتم العقد بعد شنو الغريب..
الغريب ياحسام هو يريد يبقى فترة نتعارف يلا يعقد..
اهاااااا ...
وابوج موافق !!
لج هذا ابوج فد واحد زبااالة وعار هيج مشايف...
يا حسام لسانك ترى يبقى ابوي وماقبل تغلط...
ولج هو ابوج هم ابو؟؟
اريد اعرف ذولة الصبة شلون لحسو عقله هيج مجاي افهم..
بالاول يتزوج عهد من وراكم وتالي يفاجئكم..
وهسه يجيبلج اين عمها ويلبسه براسج هاك لا هناك..
ههههههههههه شبيك حسام اليوم جنك عجوز...
لج هو ابوج يخلي عقل بالراس..
اي بلة كملي وبعد ليش متردي لهذا ابو الذهب..
ترى حسب مسالت عنه عمامي ذاك اليوم ..
مدحوه كلش ويكولون ماكو منه والسوك كله يحسبله حساب ..
من صغره هو وي ابوه..
اهاااااا !!!!
اي حتى اني استغربت لان شكله ملعب ونسونجي للنخاع..
اي هي الناس عليها بالظاهر ..
بس محد يعرف الخفايا شنو...
صح كلامج..المهم انت جربي طريقة ابوج عشتو..
وبلكي تتفاهمين وي سيوان ..
اسمه يفر الحلك فر..
هههههههههه....
فطيرة ضلي ضحكي..
بس ها اذا احتاجيتي شي اني موجود ..
تعرفيني برسم الخدمة..

وصلنا لبيتنا فوت السيارة بالكراج ..
ونزلت بسرعة اخذت اغراض وجبتهم وهو يم الاطفال ينتظر...
رجعتله ..ها عريسنا تعبناك...
اكلج صدك شوكت نفرح بيك بلة؟
اووه اني مطول مو هسه..
ليشش؟؟
هي وحدة ردتها ومرادتني..
وبعد قفل هذا ...دك بيده ع قلبه..
لا يمعود قابل مرادتك تموت وراها..
تخسي هي الخسرانة..
انجبي لتحجين عليها..
هي معليها اني بنيت اوهام..
وهب راحت الله يوفقها ويسعدها..
بس يحتاجلي شويه فترة حتى انسى واحب من جديد...

سويت نفسي ابجي جذب..
يااا خطيه قهرتني ترى...
جرني من شعري..
ام عطوب ترى انتفج مو ناصبه عليه ترى بكد بنتي انت..
امم يلا عمو اسفين شتريد بعد..
بقينا نسولف وندردش لحد ماوصلنا..
بقيت يمهم شوية وشردت قبل ليجي خالو لان عيب اكله بهالطريقة..
لازم بعدين بالليل ارجع يمهم واكعد وياه واكله...
رجعني حسام للمستشفى ورا الغروب..
فتت ابوي بس شافني اشو نزلت دمعته!!!
يااا عزا بس لا ماتت صدك !!!
تقربتله بتردد..
ها بابا سلامات شلونها..احجيها وممقتنعة بسؤالي.،
لان امبين صاير شي جبير...
كعد وايديه ع راسة...
الطفل ميت طلعو من بطنها بس رحمها ماتحمل ونزيف ماوكف..
هسه استإصلو الرحم..
وهي بالانعاش....
تقربت منه لزمت ايده..
الحمدلله هذا مو اكثر بابا ادعيلها..
حال عن حال يهون..يشيلون رحمها ولا يصير الاعظم..
وانتو عدكم اطفال ثنين الله يحفظهم..
ماعرف شحجي وشكول ..
بس بنية بالعشرين فجأة تنتكس..
يكولون رحمها منتهي وزين ماانفجر!!!!
ساعة اشك بيهم اذوها بالعملية وصار بيها هيج ..
ساعة مدري شكول..؟
عقلي رح يوكف...
بعد هو قدر وصار بابا المهم تعيش..
هسه انت مو عندك اهم رحمها لو حياتها..؟
لاا طبعا حياتها طز بالاطفال...
خلاص احمد ربك وشكره على كل حال ..

بقى مدنك ويمسح بعيونه......
متعجبة اني عليه؟؟
يعني امي شكد شافت منه مرار وضيم..
وشكد جانت طايعته ومدللته..
بس ماشفته هيج متاثر عليها..
وهاي كاعد بالباب يبجي عليها..
ووجهه اصفر من الليمون يجر النفس كوة...
عجيبة الدنيا من تنطي حظوظ..
واحد تنطي بخت حديد ..وواحد تنطي بخت تخت..
واحنا كاعدين احت بنية حلوة ومرتبة..
وياها ولد بالثلاثين ووياهم سيوان..
تالي عرفتهم اخوها وزوجته..
اجت زوجته تبات وياها ...
بقى ابوي بيومها يمها..
واني بابا كال لسيوان يوديني لبيت خالو...

طلعنا من المستشفى وسيوان يسولف..
تالي بالسيارة كال ليش مجاوبتيني مساع؟؟
اني فركت ايدي ببعض مرتبكة وخايفة..
هذا شافني وحدي اخاف يأذيني...
جاوبته بارتباك..
مسجاتك بيها عيب واني مااتقبل هالشي..
هههههههه اكلج ليش تحجين مثل الاطفال ..مسجاتك بيها عيب...ههههههههه
ذكرتيني قبل من نشوف واحد يلعب بملابسه..
نجي لامي ..ماما هذا يلعب بالعيب ههههههههههههههههه....
خرب يومج طبعا شكد مضايج من اشوفج اضحك...
وجفصاتج هاي نكته لوحدها..
كلبت عيوني اله..ايي انت دومك تضحك ع كلشي يضحك او لا...
عض شفته ونفس الوقت غمز...
لتكلبين عيونج ترى هالحركة تخلي البلبل يتوحش اكثرررر....
نفخت ودرت ع الجامة...
سيوان الله يخليك احترمني ..لحجي كدامي اشياءات مادري شلونها..
يعني كلامك كله بتوحش وماعرف غيره ..

ليش هيج حاقد عليه انت ترى ولله ممسويتلك شي اني...
انت يمكن شفت لبسي عبالك مو راحة لو صاحبة علاقات..
بس مو كل مغلف صالح ولا كل مكشوف فاسد..
اني صح لبسي اوفر بس عندي شرفي اهم من كلشي..
بكد ما منطيني حريتي بلبسي اني احافظ ع نفسي اكثر...
كملت كلامي وانداريت عليه ..
باوعلي بنظرة مختلفة مو مثل نظراته الفاسدة..
كال..
شتاء محد كلج انت مو راحة..
بس لبسج يخلي الناس تظن هالشي..
وانت بيدج تثبتين انت شريفة لو لا...
ترى مرات الانسان يمثل دور الشريف بس هو لا...
بقلبي كلت ..شلون هسه انت مسوي نفسك شريف وانت ناوي عليه نية سودة..
واني مجاريتك عبالك ثولة ومااعرف..
بس بسيطة..
اذا ماادبتك مااطلع اني بت امي...

صار صمت شوية ..الى ان وصلنا لمنطقة بيت خالي..
لان اني وصفتله بس الفرع بالضبط مااندله..
وصفتله هذا الفرع ومنا ومنا..
عاد وصلنا الهم بالضبط...
كال..
حفوت وياج اسلم ع خالج ...واتعذر منه ع موضوعنا..
لان ابوج حاجاني كال هذا خالهم مربيهم..
وماكناله بالموضوع واخاف يزعل...
كلت ايي احسن نقذني ..
نزلنه اني ويا ودكينا الباب..
ورا شوية طلع حسام جانت تقريبا ساعة تسعة..
شاف سيوان وسلم عليه..
دخلنا جاي نمشي بالحديقة...
انفتح باب المطبخ..
درت ع الباب شفت كرار ....

للحكاية بقية...
بقلم شقراء(قمر كانون)