رواية ??هجير الشتاء?? الفصل الثالث عشر 13 - بقلم Shaqraa

هجير الشتاء
الجزء الحادي عشر

قريت رسايله واني مصدومة من جرأته..
ليش عود كل واحد يطلع بطريقي هيج جسر..!
كرار جان يحوم عليه من الاسد وللكي فريسة..
وهذا اضرب من كرار الف مرة ..
غلقت الفون وغطيت وجهي ونمت ابجي..
شدعي عليج عهد..
ماريد اكول الله يحرمج من عزيز قلبج مثل ماحرمتيني امي..
اخاف الدعوة تصير باخواني..
وهم اطفال مالهم ذنب..
بس حسبنا الله ونعم الوكيل بيج ..دعوة يتيمة ومظلومة..
ودمعة اليتيم مترد خايبة..
بعدها دخت من ابجي راسي يلزمه صداع مو طبيعي..
اني اتذكر امي جان عدها شقيقة..
واتذكر مرات نشوفها تبجي بسوك من الوجع..
ومن نسالها تكول عيني تدمع يمكن مصخنة..
وجع راسي ذكرني بحالتها..
ممكن تكون عندي شقيفة لان نفس اعراضها..
لازم اشوف طبيب ولو هي مالها علاج جذري..

بقيت افرك براسي الى ان نمت..
كعدت الصبح ب8 ع فتحة باب غرفتي..
اني نومتي خفيفة كلش ..
بس اسمع صوت اكعد ومنا قلقلة..
يعني نومتي تصير نص ونص..
كعدت بسرعة خفت لان محد يفوت غرفتي ابد بس سماء تفتحتها بلا متدكها..
شفت ابوي بالباب..
فتح الضوا كال..
كومي حضري نفسج فد شويه ويجي الولد..
اوكي هسه اكوم..
راح طلع واني كمت كارهة نفسي وكارهة هالصباح الاكشر..
فتت سبحت وشعري خليته بلا سشوار..
اصلا هو ميكفش لان نوعه دهني..
شعرايته تصير ناعمه ..
بقيته مفتوح وبلا قراصة هيج مجرد نازل..
ردتلي شي البسه مبهذل ماكو..
هو اني اللبسة الاشتريها افتر السوك واخذ خيرة يلا اخذها واقتنع ..
وكاعده ادور مبهذل تهي ..

لكيت تنورة قصيرة سودة مقفلة برمادي..
ولبست وياها بدي نص ردن وبي ع الصدر طبعات فضية ناعمة..
دنكت البس الكولون اللحمي ..
دخل ابوي فزيت..
استغفر الله شبيك حجي ناوي تجلطني كل شوي ومسوي القاء قبض...
هو اني منا طاكة روحي وانت كل شوي تفززني..
باوعلي كال..
استعجلي ترا جاي بالطريق..
اي خلصت هسه طالعه..
راد يطلع ورجع..
شنو خلصتي لعد شعرج يبقى هيج؟؟
ليش شبي شعري..
اكلج انت مستهزاة. بالولد طالعة شعرج هيج..
رتبي يلا...ترى احشه الج من اصله..

طلع واني صافنة عليه ..اصلا تروح فدوة لشعري انت وسيوان ابو النسوان..
ولا غيرته بقيته ع حاله..
بس خليت كحل ورتبت وجهي ولبست حذاء ..
وكعدت انتظر الباشا يوصل..
ورا شويه سمعت الجرس عرفته اجه..
ماطلعت لحد ماعهد اجت دكت الباب كالت..
ابوج ينتظركم بالاستقبال تعالي..
تحجي وتمسح بكصتها..
صفنت عليها..
اكلج اشو تعركين هواية ووجهج احمر شنو فلمج تلعبين رياضة؟
ههه شوفي البطرانة انوب رياضة..
جاوبت بتوتر وطفرت بسرعة..
كمت وراها رحت للاستقبال..
وشعري شمرته ع جهة وحدة..
لان من حنت كاعدة انتظر بنزل ع عيوني وافتل بي..
لو اظفر الخصله التنزل ع عيني وافتحها..
فتت سلمت ..
ابوي رفع راسه صارت عيونه تحوم ويتوعد ينظراته..

سيوان كام بكل ادب سلم عليه وهو واكف..
وكال استريحي..
ياا عشتو هذا سيوان ابو لسان الزفر لو مبدلي..
كعدت وفتح ابوي الموضوع..
كال الولد رايدج ومشتريج ..وسيوان والنعم منه اهل السوك كلها تعرفه حتى اسألي اهل امج...!
واني كدامه جاي احجي..
لو ماواثق بي ماادخله بيتي وامنج يمه..
بس هو حساب ابني ..
اباوع سيوان الهدوء والثكل يااا...
جاوب ع كلام ابوي..
الله يعلي قدرك ابو سماء..
اتشرف اني بيك وبنتك والنعم منها ذهب 24..
ضحك ابوي كله..
حتى مديحك بالذهب ..
جاوبه بابتسامة ..بنتك ذهب وتستاهل بكد وزنها ذهب..
كام ابوي ويطبطب ع كتفه ويخزر بيه..
بارك الله بيك وليدي ..
كال اني اترخص وطلع..

اول ماطلع ابوي وسد الباب..
رجع سيوان بنظراته المفترسة..
رفعلي حاجبه..
ها مرتاحة هسه؟؟
كتيلي اذا انت زلمة متدخل للبيت بدون علم ابوي..
وهذا اني انطيت ابوج علم حتى افوت براحتي..
يبتسم بحقارة نرفزني هو وعيونه التزف جسمي من فوك لجوا..
كتله لتفرح هوايه..
مجرد مااسوي البراسي اخلص منك..
لتتوقع تربطني بيك وتورطني بزواج لو خطبه ..
ترى مو خايفه منك ابد بس قبلت بمزاجي ولغاية..
ضحك ويكركر كال..
البلبل الوحشي صاير عنده غايات!!!
فتحت عيوني وحلكي بثول ..
يااا.. بلبل وحشي بعينك وماغيرك..
اشو هذا زادت ضحكته ووجهه صار احمررر..
خرررررب يومج لج انت تصنييييف...
سكت ضحكته وفرك وجهه بيد وحدة..
كال..
وكلتيها اني بلبل وحشي ...وهو اكو احلى من الوحشي!..
گلبت بنظراتي اله..
انت مو طبيعي ع كلشي تضحك ..
اضحك ع جفصاتج ..طبعا يوم بعد يوم احس هالكڤر جوا ذهب..
استغربت من كلمته بس تالي كلت ..
جذاب يريد يوكعني عود ياخذني بلسانه..

باوعلي من فوك لجوا..
منو امشع شعرج من كدام..
هه متضحك ..واني متعمده اطلع مكفشة..
وحاكل رزالة من عمك المصون...
لان حذرني ارتبه بس عناد بيك وبي ماارتبه..
هههه زعطوطة بس مو مخربط لايكلج..
انت كلشي يلوكلج..
يلا كومي اني اتفقت وي ابوج نطلع نتغدا بباربكيو..
افففف صايمة اني ماريد..
باوع ع صدري ورجليه..
لااا وااااضح صايمة....
هو انت من دنكتي شفت حتى معدتج بعد ياصايمة متكليلي؟؟
تعرف انت شكد مقرررف...
عصر ايدي عصره حسيتها انجعصت بيده..
عدلي اسلوبج ترى اني محترمج..
وعيب انت بنية ورقيقة خلي لسانج نظيف..
وحسبي حساب كدامج زلمة لو تجاوزتي عليه رح يهينج فاااهمة؟؟؟
ترك ايدي وطفرت بسرعة مرعوبة منه..
صح اوكفييييي...
مابينتله اني خايفة وكفت بهدوء جريت نفس..
نعم ؟؟
روحي بدلي لبس ال.... ولبسي شي مستور..
ما طالع اك.... بيج اني ومتعرية وتمشين وياي...
احس كلماته تحفر بقلبي ..
ودي ارجع اعضه اضربه هيج اريح قلبي ...
سمعتي لو لا؟؟؟
اوكي...

عفته وطلعت فايرة اعصابي..
من اسلوبه لو الفاظه لو نيته الكشرة..
اني ماعرف شسوي ويا هذا..
ماعرف استمر ويا لو احاجي خالو وحسام بلكي يسوولي حل...
رحت للكنتور ادور لبس ومالي خلك انسق..
اني بالطلعات الاحبها ادوخ يلا اختار مو هسه بعد..
دورت بين الملابس..
باوعت فستان طويل بينصل اسود ..
الياخة مالته بيها ورد ناعم ابيض والردان طبكتها كذلك..
ردنه ثلث ارباع..
لبسته بس احسه حصر منرتاحه بي ..
ماعرف بس هالقماش من ينترك فتره يكمش يمكن...
لبست حذاء ابيض عالي وجنطة اسود وشعري رتبته بقراصه بجهة صفح..
طلعت وجان سيوان يم بابا وعهد بالصالة..
اندار عليه كال ها يلا ..
بس رجع كمل نظرته ورفع حواجبه..
ترخص من ابوي وطلعنا سوا..
اول ماصعدنا بس مشى شوي..
اشو هذا اندار عليه ووجهه مكلوب ازرك من العصبية..
بلة هسه من احطج وا.....اكو احد يلومنيييييي؟؟؟
بهتت من الكلمة الكالها جسمي ضل يرجف..
شبييك سسيوان ؟؟
بصراحة نبرته وعصبيته خلتني اضرب اخماس بسداس..
نفخ حيل ..
اني مو كتلج لبسي عدل وتعالي وياي؟؟
اي ولبست هذا طويل ..
لو ملابسه احسن بهواااي..
لج دباعي جسمج شحجي شحجي بعد اخ منك يلساني..
اكلج منو كلج انت كيم كارديشان ؟؟هااا؟؟؟؟
بلعت ريك خرب هذا شكد مكروووه ويخوف...
كتله..
اني هذا لبسي مو مجبور تتححملني ترى...
لا عيني لبسج هيج قبل لا اجي اني..
هسه انت صرتي تخصيني..
لبسج تغيري لتخليني اشوفج وجه ثاني..
طياح حظج ولبسج هذا انسي..
هسه اخذج لاقرب محل تشترين شي طوي وتلبسي فوكه..
واني منا وهيج اعرف شسوي...

سكتت مناقشته اصلا..
احس عنده وجهة نظر..يمكن فعلا لبسي طمع الكل بيه واولهم كرار..
يمكن اصلا ماحبني بس حب جسمي..
ومن اخذ اليريده سوا نفسه ممسوي شي..
احس بطني خبطت من الخوف من تذكرت..
فزيت ع صوته وهو يحجي..
ابقي هنا اني نازل ..
ماحجيت بس هزيت راسي..
راح ورا شويه اجه..
جايب قميص طويل رصاصي..
انطاني لبسته بالاول خايفه يطلع جبير..
لو ميناسب الملابس..
بس بالعكس كلش مرتب..
يلا همزين من جابله شي بي حظ...

وصلنا للكورنيش ودخلنا مطعم ...
طلب اكل ومن سالني كتله ماكل ماشتهي..
راد يطلب من يمه..
كتله يبقى الاكل مااكل اطلب بس مقبلات..
كال اخذي تغدي بي بالبيت ..
غلست مجاوبت..
طلب هو مسكوف وكعد ياكل خرب يومك صارلك شهر مماكل شنو..
اباوع للسمجة تصيح الغوث النجدة...
بقيت صافنة عليه وهو ياكل..
اباوعله مرتب كلش ولا جنه حقير..
القميص رصاصي والبنطرون نفطي واللحية محددة عبالك لزك اشو لا تطول لا تكصر..
والساعة ذهب باليسرى..
والايد اليمنى بيها محبس ذهب شذره اسود وحوله مثل النقش..
معتني بنفسه حيل ابو النسوان..
كمل اكل وطلب حلو وهم سالني..
كتله اريد عش العصفور..
جابو الحلو واكل وشبع الاسير وبعدين طلعنا..
جانت حارة وشرجي لعبان نفس..
اني احس روحي مايعة من الحر..
كتله رجعني وغير يوم نسولف..
لان هو راد نسولف..
صدك مدري شعجب رجعنا للبيت..
وطول الطريق يسولف ويسال..
تالي كال..
ابن خالج ذاك اليوم وياج شخباره..
حسام..زين دوم نحجي بالكروب ..
علاقتكم قوية؟؟؟؟
اي من صغرنا احنا سوا..
اهااا ..زين اذا هيج ليش ميغار عليج ؟؟
شلون مافهمت..؟
ليش مخليج تطلعين بهاللبس كدام المايسوى..
اهاا..حاجاني كم مرة وهم كال تحجبي..
بس اني مااخذت نصيحة وسكت ماجرحني..
ههه اوكي يعني نشطبه من القائمة..
يا قائمة؟؟؟
قائمة الكهرباء هههههه..
الحمدلله..شبي هذا شارب شي؟؟

وصلني للبيت ونزل..
دخل وياي كال اريد احاجي عهد ..
البيت هدوء واني اصلا عندي المفتاح..
لهذا دخلنا بلا منضرب جرس..
مالكيت احد جوا معناها فوك بس شعجب وقت غدا..
ولو هسه دزو من برا واكلو لان المدام مو كفو طبخ...
جان وراي سيوان..
التفتت صرت بوجهه فزيت..
شبيج شبيج..
خرعتني صرت بوجهي..
تقرب اكثر..ليش ولج اني اخرع شنو؟؟
حاولت اخلي بالجو حتى اشرد منه..
نصيت صوتي كتله..
كلشششش...
رحت ركض لغرفتي..
بسرعة وقفلت الباب خطف..
سمعته ضحك عاابت..

ورا شويه دزلي مسج ..
اني طلعت..لان صعدت احاجي عهد ..
بس شفت الوضع ضيييييم!!!
واني منا ماكل حلويات..
مثل ملحكتي نفسج وشردتي مني.
دروحي لحكي ع مرت ابوج ..
هههههههه
للحكاية بقية
بقلم شقراء(قمر كانون)