الجزء التاسع عشر
هجير الشتاء
ماجاوبته بقيت دايرة وجهي..انغث اكثر..
لتغلسين من احاجيج فاهمة؟؟
انداريت عليه حجيت بيأس..سيوان ارحمني عفية..
تعرف كلامك وحرصك ماله مبرر..
لان انت ممهتملي ولا حاسبلي حساب...
اسكتي بلة ووفري كلامج الماله معنى ..المفروض تخافين ع نفسج وتحرصين ع لبسج...
يعني متستحين وانت تمشين بهالتنورة بنص الكلية؟؟
كم واحد باوعلج بنظرة شهوانية وكم واحد تخيلج؟؟؟
ليش تخليني افووور ؟؟؟؟حسيته تعصب...ركزت بوجهه وحجيت...
انت لتقيس الناس عليك...
مو كل واحد يشوف وحده كدامه خلاص باوعلها بنظرات فاسدة..
وهم يعرفون المن يباوعون وويامن يحاولون...
جنت احجي وهو مركز وياي...
من خلصت كلامي تنهد وسكت ماكال شي....
بس اخذني للبيت كال العصر امرلج نشتري الغرفة...
رجعت تعبانه حيل لكيت عهد طابخة...
هي طلبت مني اعلمها بس بعد ماجربت طبخها الله يستر...
دخلت سبحت ونمت لان ضايجة مالي خلك..
العصر فززني اتصال سيوان..
كمت غسلت ولبست عباية وذبيت الشال ..
اجه وطلعتله سلمت وكعدت...
ابتسملي وكال..حيل شكد نايمة ههه...
اي لان دوام شوي دوخة وكعدة من الصبح...
عادي حبي فترة وتتعودين ...
هاج هذا جبته الج كون يعجبج!؟..
انطاني علبة حمرة ع شكل وردة...
فتحتها لكيت محبس ينلبس ع ثلث اصابع..
ع شكل اوراق شجر متفرعة ..شي نازك وفخم نفس الوقت..
شكرته وسديت العلبة خليتها يمي..
بقينا ساكتين لحد ماوصلنا لمعارض الاثاث...
شفنا هواي غرف متنوعة بس ماحسيت شي ملفت للنظر...
اخر شي شفت وحدة لون تفاحي على وردي خفيف وياها ابيض...
موديلها مرتب ونازكة مو هوسه...
كتله شنو رايك بهاي..
هو كلش انعجب بيها ..وكال صدك لفتت نظري بس ماردت افرضها عليج..
كلت بداخلي اول مرة يفكر بيه...
تالي حجزناها وطلعنا ..
جانت مغرب الدنيا..كال..
اريد اسولف وياج شوي خلينا نفتر وين يعجبج نروح؟؟
ماعرف كيفك...
ترحين للتايم سكوير...نكعد بكوفي نسولف ..
وهم نختار اشياء للغرفة ...
اوكي نروح...سكتنا وراها الى ان وصلنا...
اني حروح اصلي واجي...
هو باوعلي متفاجأ.!!تصلين؟؟
اي اصلي ...اها اوكي اني رح ابقى هنا انتظر..
جان اكو كراسي موجودة برا..
كعد واني دخلت هو المسجد قبل الحمام يصير..
دخليت صليت وطلعت ...هو جان يلعب بالفون مالته...
ها تقبل الله...
منا ومنك...انت متصلي؟؟
لا اصلي بس متقطعة مو كلش اضبطها...
اهاا انشالله تضبطها..بس ليش هسه مارحت صليت؟
ما متأكد اذا يصير اصلي او لا...
ها!؟ها يلا امشي نروح...
ضلت تمتمت هههه امشي....
رحنا دخلنا لكوفي..كعدنا وسالني ..
شنو تشربين لو تاكلين؟
لا مو هسه اكل بعدين بس اريد كوكتيل ..
ليش متجربين الرمان مالتهم كللش طيب...
لا مو ممتغدية اخاف معدتي تتاذى...
لعد امشي نصعد ناكل..
لا خل افتح معدتي بالعصير وبعدين اكل احسن...
كيفج..ردت اقنعج بالرمان هههه متنكدرين...
لا اصلا احبه اني بس غيرمرة اشرب..
تدللين...
بعدها حط ايديه ع الطاولة ...تنهد ...
اييييه مشمش...
بعدج ع قرارج ماحنيتي علي؟؟
بقيت العب بطرف الشال مالتي ..
سيوان احنا ممتراهمين...
اني ماكدر اعيش وي شخص رايدني جسم وبس...
راح التزم الهدوء واناقشج...
بس كليلي يا ابن ....رايدج بس جسم؟؟؟
ولج اني احبج...
صح بالاول ماانكر ردت العب عليج..
عبالي مو راحة..
بس صدج الي ثبتلي العكس...
اني كدامج كلي عيوب...بس ماكدر العب بوحدة شريفة...
صح عندي علاقات اشكال..
بس ماوهمت وحدة بالحب ولا عشمتها...
اهاا وليش تتباهى كدامي مثلاً؟؟؟بعلاقاتك؟؟؟
اااخ شتاء..كبري عقلج ولتلزمين السالفة من ذيلها...
جاي نتناقش بحياتنا والشيء بالشيء يذكر...
اني اوعدج اذا بادلتيني الحب وصار زواجنا طبيعي ..
اتغير لخاطرج واترك حياتي السابقة كلها...
شتاء الرجال شما يصير تبقى نقطة ضعفه مرة...
والتغيره مرة...
تشوفين ابوج؟قبل جان مثلي ورغم بينا فرق جبير بالعمر...
بس علاقتنا حلوة ونعرف عن بعض هواي...
بس ابوج من تزوج عهد لليوم صار سخص ثاني..
تعرفين ليش؟؟؟
لان يحبها شاف دنيته بيها وهي بادلته الحب وهالشي خلاه يكتفي...
خلينا نفتح صفحة جديدة...
وصدكيني لخاطرج اترك الشرب والنسوان ...
اني ماريد لخاطري..
اريد لخاطر ربك لان هو احق بهالشي تترك لاجله...
اي بس انت السبب ..
مو يكول الزواج نصف الدين...
معناها انت تقربيني من ديني...
واريد تنسين الفات والصار...
بقيت متوترة وماعرف شلون افكر...
بس احسه صادق بكلامه...
اوكي...نبدي من جديد بس بعد متجاوب اسئلتي وعندي طلب ..
حتى تبثت انت مرايدني كجسد ومجرد رغبة...
استغفر الله ...بعدج؟المهم احجي...
انت ليش سويت خطبتني بالاول؟؟وليش بعدين سويت خطبتنا رسمية...
اممم..ماشي..شوفي من خطبتج جنت بعدني اريد العب عليج...
ومالكيت غير هالطريقة اوصلج بيها..
ومن رزلتيني وكتيلي لتوصل للبيت الا بعلم ابوي..
فكرت بهالطريقة..
اما رسمياً ليش سويتها...
هنا اكتشفت نفسي رايدج من شفت هذا الحيوان...
خفت تروحين مني...
بس ميهمج ذاك كله كتلج ننساه...
انتي وكعتيني وبعد...نفذ الكلام...
وهسه كليلي شنو هالشرط العندج..وانت جملتي وحطيتيله مكياج وسميتي طلب...
اممم انت مو تكول ميهمني جسمج وتريدني لان تحبني؟
صح...
اذن لتتقربلي من نتزوج لحد مااقتنع....
ضرب كصته بيده..ااخ يابه..لزمتيني من ايدي التوجعني...
بس نشوف تالي منويزحف لمنو؟
بقى يلعب بلحيته ويبتسم ..
احنا ببوسة وحدة شفنا الوشم...
دنكت متت خجل يبووو...
تعالي صدك لزمتج..اني سامع بسالفته بس احجيلي عنه.؟
اوو انت مينضم عليك شي..
لا طبعاً عندي عيون بكل مكان..
ايي بلة احجيلي ..ليش مابقيتي الوحمة وشلون سويتي تاذيتي لو لا؟
كافي سيوان معليك معليك...
اشو رفعي راسج وحاجيني..مو عيب اني زوجج ومتحجيلي؟
ما...
تحجين لو ابوسج هنا هسه..
رفعت راسي بوجهه متفاجأة..
غمزلي فديت الخدود ..يلا احجي ولج...
بقى يلح خبلني الى ان استسلمت...
شوف هي وحمة مال باجة ماما الله يرحمها مالكت غير الباجة تتوحم عليها..
وممتدة ع نهاية بطني جبيرة...
جنت مرات ابقى ابجي اكلها رح اشلعها منظرها مقزز...
تالي اقترحت اسوي عليها تاتو..
ومن رحنا لايران سويت صقر ويمه ابنه ههه...
زين بما انه البلبل الوحشي من فصيلة الطيور متنظرين بامره؟
ههههههه...كتمت ضحكتي كوة احس اختنكت...
كومي حبابة كومي ترى مااتحمل ...
رحنا وراها اختارينا فرشة واكسسوارات للغرفة...
وصعدنا اكلنا وتمشينا وراها رجعت للبيت..
بس شبه مرتاحة..
مااعرف شنو الي غير تفكيري ...
بس احسه شي محتوم ولازم احاول اصلحه حتى اكدر اعيش...
يوم ثاني جان عنده سفر وراح ..
اني ضل رافع وسماء يوصلوني...
الى ان اجه قبل زواجنا بثلث ايام...
بيوم حنتي اجه...
سويتها بقاعة واجالي تعبان كال وصلت الظهر...
كصينا صور وركصنا شوي...
بس احس نظراته فعلا مو مثل قبل ..
صح نظراته وكيحة متتغير..بس مو مثل قبل ...
خلصت الحنة وجانت كلش حلوة ..
يوم ثاني استراحيت..
وهو كلساع يخابر..
تالي صرفته لان البنات تجمعن يمنا واريد اتونس وياهن...
بقينا متجمعين ونسولف..
تالي ميقات خلال الحديث كالت...
زوجة كرار ماتت الطفلة ببطنها وكلش تعبانة
وهو متعارك وياها يكلها بسببج..
وهالمرة قافلين ع الطلاك...
صراحة انقهرت من كالت صح مااحب كرار واحتقره..
بس صعب طفل ينتظره هواي تالي يموت...
جنا نحجي ودك سيوان ..
جاوبته هلو كرار....
للحكاية بقية
بقلم شقراء(قمر كانون)
تدرون كاتبة الجزء ونشرتها وفشل يمكن اكثر من خمس مرات ..
بعدين فتحت البرنامج القصة ماكو..موجودة ومتتحمل..رجعت حاولت الكى البارت ممسوح وكعدت اكتب من جديد يعني هذا البارت ثالث مرة اعيد كتابته من امس لليوم
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!