رواية حكايات من بيت جدي الفصل الحادي عشر 11 - بقلم مريم اماسي الليل

#حكايات_من_بيت_جدي
الجزءالحادي عشر
اماسي الليل
حقوق النشر محفوظه
سنان : صباح الخير
شهد: صباح النور .
سنان: اي ساعة امتحانكم
شهد: على ال١٠ ورها ماعندي شي
سنان: لعد انتظرج
شهد:ان شاء الله ( نظراته تعبر بكلام احلى من الي يطلع من شفايفه)
سنان: اكو احد مضوج عصفورتي
شهد: والله مابيه شي بس صار كم يوم احس بدوخه دتضوجني حتى تركيز بالدراسه ماعندي
سنان: ليش مرحتي للدكتور .
شهد: من ورا الامتحانات هالايام تخلص واروح اصلا لو ما محاضراتك ومأشر على الاشياء المهمه جان مكدرت البارحه ادرس حلوه الاشعار الي كاتبها بنهاية كل ورقه
سنان: من قبل ما اشوفج هالاشعار الج بس جنت راسمج بخيالي هسه انت ويايه وتبادليني نفس الحب الكلام يطلع من الروح للروح
شهد: انت حتى من تبين مشاعرك عندك ميزه ومرادفات خاصه بيك لكن الكلام الي اشوفه بعيني احلى
سنان: ابتسمت يمكن لان ما احب اعبر بالكلام نظراتي تعبر الي بداخلي ثانيا  عيني اول جزء تعلق بيج من اول يوم لمحتج ويا عذراء
شهد: سنان تدري احسدك واحسد عذراء لان انتو عايشين بنفس البيت وعلاقتكم كلش حلوه اني اكو فتره من هلكد ما جانت عذراء تحجيلي عنك اتوقعت اكو علاقة حب بينكم لكن  من اعترفتلي وهي هم حجتلي عن مشاعرك تجاهي اتأكدت ما بيناتكم شي .
سنان : ابتسمت اني وعذراء مثل التوم وصديقتي من الطفوله
هي اقرب الي حتى من سلوان اخويه يعني اختي اثنينكم الكم مكانه بقلبي وحده اخت ووحده حبيبه اصلا من اشتاقلج
اكعد اسولف وياها احس دا احجي وياج صفاتكم متقاربه
شهد: اني هم احبها مثل اختي وبحياتي ما مصادقه بنيه مثلها
سنان متريد تعرف امور عني وعن اهلي
سنان: الي عرفته كافي بالنسبه الي اكيد الي عدهم بنيه بهالاخلاق ناس محترمين ومستورين
شهد : لازم تعرف
ابويه استاذ جامعي وامي موظفه ببنك الرافدين كانت مسيحيه ومن ارتبطت بوالدي صارت مسلمه بقيت ما يقارب ال٦ سنوات وحيده اهلي بعدها نولدت اختي هاله وبعدها اخوين محمد والدتي بالفتره الي ولدتني بيها تمرضت فعمتي رضعتني ويا ابنها ومن يومها عمتي صارت امي الثانيه تأثرت بشخصيتها ورزانتها وما اتوقعت بيوم ممكن احب او انتبه لمشاعر شخص
لكن من اول يوم التقيتك  انتبهت على نظراتك واتذكر لحيت  بهالنظره
حسيت نفسي اعرفك  صار مده يمكن من خلال كلام عذراء
بالاول مجانت عندي مشاعر او ما حاسه بيها  لكن صفاتك المميزه  عدد قليل يمتلكون هالوفاء
وهالقيم والالتزام ويا كل يوم نلتقي نظراتك  توصلي كل الي بقلبك جانت مثل السهام تخترق قلبي وتخدره الى ان صحيت بيوم لكيت قلبي حبك وتعلق بيك لدرجه احس افهمك بدون كلام حسيت  علاقتنا بدت
جديه بين شخصين عدهم وعي واتزان بالتصرفات والمشاعر هالشي
خلاني اشعر بارتياح احيانا احس عايشين  بعالم وحدنا نفقد الاحساس بالناس الي حوالينا  يعني بالمختصر حكايتي صرت انت من ظمن تفاصيلها
وحاليا اروح للمحاضره واتركك تبقى سرحان بكلامي .
هيام : مرت ايام وسلوان اختفى فجأه بقى بالي يمه
احس مضيعه روحي بدونه ،صوته يهون عليه ويوم الي يكون عنده اوف يمرلي من اشوفه اشوف الدنيا بغير شكل
كلشي حلو يزيد عندي الطموح والامل ايقن راح يجي اليوم
الي تتغير بي حياتي مثل ما اريدها يجي يوم يصير سلوان الي
ساعتها اترك كلشي يذكرني بالماضي واهلي،
لكن اختفائه فجأه بدون مقدمات ،بالاول  اتوقعت صار عليه شي او ديمر بظرف لكن من بقيت فتره اتصل ويردون الي بالبيت واغلق السماعه .... بدا الشك يدخل قلبي، مجرد افكر ممكن سلوان اختار يفترق عني ويتركني بوقت اني محتاجته بي ينقبض قلبي وتألم وصلت مرحله انهاريت من الفكره 
حالي وياه مثل الطفل الي ابوه ماسك ايده ويعبره الشارع حتى يوصله للامان ،وبلحظه اتذكرت عنده بت عم ويايه بالمدرسه اسمها مريم قررت ثاني يوم اروح اسأل عنه يجوز اطلع ظالمته
جان اكوشعور بداخلي يعرف اني اريد اضحك على نفسي وسلوان طريقه انتهى ويايه بهالفتره جانت نهاية السنه بعد ايام ناخذ اجازه الاربعين يوم قبل الامتحانات الوزاريه
ثاني يوم رحت للمدرسه من وكت امشي بالشارع واتخيل كل الذكريات اتخيله من يمشي ورايه اتذكر كلامه
واهتمامه مستحيل سلوان اصدك جنت تضحك عليه كل هالمده، لا متأكده جنت تحبني ما سويت شي يخليني اشك ولو لحظه طماعن بيه لبسي غيرته خليتني احتشم اكثر حتى اخلص من العيون القذره حتى للمدرسه رجعتني اعرف كل فلس جنت توفره الي ورا تقصير على نفسك نظراتك كلها حب وعاطفه تخيلي سمعت صوته ورايه ، التفتت وقلبي يتراقص على امل يكون هو صوته يرن بأذني
(ما حبيت ولا احب غيرج )
الشارع فارغ مابي احد غيري نزلت دموعي بقهر
ازيحها عن خدي واحجي ويا بداخلي
معقوله خلص بعد ما اشوفك ولا اسمع صوتك راح ارجع لمعاناتي ماعندي الي يسمعني ويرشدني
معقوله تكون مليت وجنت صابر على امل تحصل مني شي
ومن شفت ما مني امل تركتني ،لا بكلشي اقتنع لكن
ما اقتنع كل لحظه وكلمه منك جانت كذب اكيد اكو سبب
اقوى منك
وصلت للمدرسه بقيت يم الاداره انتظر بت مريم اول ما لمحتها من دخلت ...توجهت الها صرت كدامها
صباح الخير عفيه اريد احجي وياج
مريم : صباح النور( مستغربه) بشنو
هيام : انت بت عم سلوان  اريد اطمئن عليه
مريم : رفعت حاجبي متفاجئه اي بت عمه انت منين تعرفي
هيام : صديق اخويه .
مريم : وليش انت الي دتسألين عليه اذا صديق اخوج خو اخوج يسأل على صديقه
هيام : مو اخويه عسكري  وطلب مني اسألج عليه لان يدري انت ويايه بنفس المدرسه وديتصل عليه ميحصله
مريم : (ما اقتنعت بالحچي)لكن جاوبتها الحمد لله زين ويمكن ميجاوب تلفونات لان ملتهي بخطوبته  قبل ايام تمت
هيام : متحملت صدمة الكلمه كدام مريم دموعي نزلت تركتها حتى بدون ما اشكرها او اترخص منها عرفت المخاوف الي جانت ملازمتني دائما صارت حقيقه
سلوان حبني لكن ما فكر بيوم يرتبط بيه ، يوم الي فكر يرتبط اخذ وحده من بيئته ومن مستوى مياخذ وحده امها سمعتها سيئه ومن بيت الكل يعرف الي عايشين بي ساقطين
العتب مو عليه العتب عليه صدكت اكو احد راح يستثنيني من هالبيئه الي اني منها رضيت او ما رضيت اني بنظر العالم ساقطه مثل اهلي واول الي قنعني وأكدلي هالنظريه اكثر انسان حبيته بهالدنيا جان بداخلي حقد بس مو عليه على نفسي انطيتها اكبر من قيمتها وخليتها تحلم بعيد عن الواقع شكد جنت واكعه وكعتها اكثر من رفعتها ويا سلوان
وصدكت نظرته الي ،  من كثر الالم الي بقلبي والدموع الي نزلتها حسيت اغتصب   احلامي واخر امل اعيش حالي حال بنات الناس ،الي سمعته من مريم مثل الي تلقى صفعه صحتني على زماني شفت حتى الشرف لوحده مثلي من عائله مثل عائلتي
ماكدر يثبت اني غير عنهم لان الناس الهم الظاهر ويحكمون
على الانسان بدون دليل، بمجتمعنا يضيع الاخضر بسعر اليابس واني رحت ولا جيت بنظرهم بت ناز يعني مثلها كافي اضحك على روحي واخلي الكل تضحك عليه من اليوم اني اضحك على الكل
رجعت للبيت مذبوحه مثل كل يوم من ارجع انظف ويبدي هاني  يمر من يمي يطخطخ بيه  لكن هالمره التفتت عليه
بألم احس اريد انتقم من سلوان بنفسي  شكد ما گلي حافظي على نفسج اريد ارخصها اريد اخليها تعرف مقامها الحقيقي اني بنظر العالم وحده الكل تطمع بييها وبجسدها
لان محسوبه على الرخيص والمستباح ،بعصبيه وعياط
هاني انت ما مليت  شنو الي تريده مو كر هتني بروحي
كافي اخذ الي تريده وخلصني مو كرهتوني بالدنيا
ولكم اني ادميه مو حيوانه الكل تريد ترتاح براسي الكل تريد تنتقم مني على شي ما سويته على سمعه (امي وابوك وانت واخوك سببها ) بلحظتها مابقى عندي حيل
كعدت وثنيت رجلي اضرب على خدي بحرگه ،الله ياخذني وارتاح منكم.
هاني: لج شبيج لزمت ايدها ( بعصبيه ) بعد ما اتقرب منج لحد ما نتزوج( جريت راسها على صدري ) لج والله اموت عليج ..
هيام : جنت بحاله مثل الميت ما ادري شلون فكرت ولا شلون نطقت بالكلام جان عندي اخر امل اتزوج واني بنيه
واكول حافظت على نفسي ، خلي انهي معاناتي بدون ما اضحك على نفسي هالمكان مكاني من انولدت الى ان اموت حتى لو اطلع منه الناس ونظرتهم اتذكرني بي ،هاني گله لابوك خلي نتزوج بس اخلص امتحانات
هاني: اليوم اگله اريد اعقد وورا الامتحانات عود نتزوج
هيام : بكيفك حسيت بدا يتلمس لكن هالمره اني مستسلمه
اريد اخلص اريد اتعايش ويا الواقع الحقيقي لحالتي
اريد اتقبل هالانسان الي هو من نفس بيئتي ومستوايه ،اتقبل فكره
بعد فتره راح يصير رجلي بكل عيوبه راح استلم لقب اضافي
مرت فلان بالاضافه الى بت فلانه من بيت فلان
هالاقاب كلش كافيه تخليني اقتنع اني محسوبه عليهم ومنهم .
ثاني يوم اخذت الزنجيل وطلبت من مريم توصله لسلوان
وطلبت منها توصله هالورقه
(شكرا لمساعدتك وشكرا فتحت عيني وقنعتني على شي اني جنت ما متقبلته و بفضلك عرفت هذا واقع وحاليا كلش مرتاحه عليه وسلمت بي اتمنى الله يجازيك على هالمساعده ماقصرت )
مريم : بيوم الي حجت ويايه هيام رجعت للبيت خفت احجي كدام هويده لتصير مشكله وتالي تطلع صدك اخت صديقه
ولا اكدر احجي ويا سلوان اخجل منه خطر على بالي وليد كلت من اشوفه وحده احجي وياه
صعدت بقيت انتظرهم يرجعون من الكليه ،من التفكير غفيت كعدت سألت عليه عذراء گلتلي نايم
بقيت انزل واصعد كل شويه انتظره يصحى اخر شي رحت دكيت عليه الباب اكثر مو مره ما حس نومه ثگيل فتحت الباب اتقربت من الفراش بطرف اصابيعي اهزه
وليد اكعد وليد وليد
وليد: فتحت تك عيني شي خفيف بس متخيل نفسي بعدني نايم ودا احلم ويا اخر هزه بأصابعها لزمت ايدها لا والله هاي صدك يعني قبل شويه جانت صدك ويايه بالحلم وهسه هي ويايه بالحقيقه ردت اللعب عليها شويه
بقيت مغمض عيني اسمعها وليد كوم اريد احجي وياك
جاوبتها مريومه يله تعالي نامي بصفي
مريم : اوف شلون تنبل كاعد يحلم وليد اكعد عاد
فتح عينه يضحك يعني
مجنت تحلم من حجيت مراح تبطل هالاسلوب اموت منها..
وليد: ليش يبطه متبلي عليج مو جنتي تنامين بصفي نتفرج كارتون افتهمتيني غلط
مريم : لا والله مفتهمتك صح وعينك هاي رايد افكسها گوم عندي حجي وياك
وليد: مريومه ترى اكوملج كايلج متنطين عين بس احبج لا ن سباعيه ومتنطيني مجال تصيرين شرسه .
مريم: واني هم ادري بيك أتحب اداهرني بس بالحقيقه انت تخاف عليه كوم الله عليك شغله مهمه
راح انتظرك بالهول
وليد: يله هسه اجي .
مريم : التفتت عليه من قبل لا اخذ الباب بأيدي مو ترجع تنام .
وليد: لا طلعت للهول ملگيتها نزلت دورتها لگيتها دتاكل زيتون وجبن اباوع عليها شلون اتشيل الزيتونه وتخليها بحلگها ( يعني هاي الخلقه تصير مرتي وهاي الشفايف والخدود تصير الي )
دخلت للمطبخ صار ساعة ادور عليج
مريم : من شفتك اتأخرت كلت انزل اكل مد ايده على الطاسه باقي بيها زيتون شاله كله خلا بحلگه گلي هيج ياكلون الزيتون
ضربني على خدي وبأيده الثانيه يطلع النوه
وليد: اذا الزيتون يسوي هيج خدود يوميه اكل طاسه .
مريم : اكو واحد ياكل هيج .
وليد: اني قلبي واذا تخافين كدام العالم افشلج انت وكليني
مريم : ترى والله مو وكت شقى ضايجه
وليد: شكو ؟ صدمتني من گلتلي منو هيام وشلون تعرف سلوان
جاوبتها بكذبه اخت صديقه طلعت الكذبه عدله
مريم : ها عبالي لعد تكذب كلتلي اخت صديقه
وديسأل عليه ويتصل وميجاوب
وليد: خو ما جبتي سيره لهويده .
مريم : لا خفت احجي وتصير مشكله همزين ما حجيت.
وليد: اصلا لاتجيبين سيرتها كدامها خليهم فرحانين ومتوالمين سوا اني انطي خبر لسلوان يسأل على اخوها
مريم :ثاني يوم انطتني الزنجيل والرساله وطلبت مني اسلمها لسلوان
عرفت وليد كذاب
من رجعت للبيت بقيت انتظره بس لمحته  صعد صعدت ورا ديفتح الباب هاك ابو خالد
وليد: التفتت بيدها زنجيل شنو هذا
مريم : مال ست هيام دترجعه لصديق اخوها ودزتله رساله.
وليد: تعالي افهمج
مريم : ليش كذبت البارحه
وليد: وشنو يعني ولد جانت عنده علاقات شنو عجبه كل الشباب هيج .
مريم : ها وانت هم ان شاء الله مسطرهن وتالي من تريد تزوج تذكرني
وليد: اي مسطرهن قابل كلولج عليه نبي بس هسه كلهن زميلات مو علاقات المهم قلبي يم منو والمنو .
مريم : هذا الحجي ميصرفلي اذا تحبني ماكو لا علاقات ولا قشمره
وليد: اذا تقبلين أقبل هالخد والله ابطل ههههه
مريم : ١٠٠ مره كايلتلك ما احب هالاسلوب بطله .
وليد: انت هم بطلي تحلوين وتركضين ورايه .
مريم : لا والله شفتني اجيتك اليوم والبارحه علمود سوالف صاحبك التعبانه صرت اركض وراك
وليد: لاتحجين لهويده شغله وراحت هسه بعد خطب.
اخذت الزنجيل والورقه منها حتى اوصلها لسلوان .
مريم : لا ما احجي مو لخاطرك ولا لخاطره حتى اختي متنغث وهي المسكينه مكيفه .
وليد:مريومه اليوم ميذكرج بشي
مريم : لا شنو
جاوبني سلامتج
للمغرب دا اغسل وجهي على المغسله شايله شعري گبايه حسيت شفايف على رگبتي شي سريع عرفته هو بس  بلحظتهابعيني صابون مكدرت ارزله للحذر كلت اخاف يطلع  جدو لو ابويه لكن بداخلي متأكده هو
نشفت وجهي ونزلت ادور عليه افور  شفته من شباك الصاله بالحديقه الخلفيه يدخن من ينفث الدخان يصعد وجهه
ويطلع الدخان بهدوء
بقيت بين ارزله لو اسكت بس اخاف يكررها طلعت
صرت كدامه كالبه وجهي ، ابتسم
وتالي وياك ترى والله اكرهك من تسوي هيج .
وليد: سويتها قبل ٣ سنوات بنفس هاليوم واليوم كررتها بس المكان اختلف بعد ٣ سنوات اخذها برضاتج
اخ يا مريمتي بس الي خلقج يعرف مكانج بقلبي .
مريم : مو تعيدها بداعتي والله اضوج احسك تسترخصني
وتحسسني متحبني تحب هالسوالف
وليد: ما اعيدها والله الا من تصيرين الي .
...........
مريم : بفتره الاربعين يوم جان ينتظر الامتحانات تخلص اكثر مني كل شويه مادلي راسه من يشوفني ادرس بالهول الفوك ويبقى يتوسل اقري زين حتى اطلعين كليه يمي
ورا كم يوم جان مهر بت خالتي ولان عدهم ولد من عرف تخبل بقى مرابط بالبيت ما طلع كل شويه متحجج وصايحني لاتلبسين هيج لاتخلين هيج لاتحجين ويا احد من ولد خالتج ماردت اضوجه سويت مثل ما وصاني من شافني هيج ارتاح هو وصلنا واتفق ويا امي هو يرجع علينا
وليد: من اتصلت عليه عمتي نجاة كالت تعال رجعنا للبيت  جنت ماسك السويج بأيدي انتظر بالهول تتصل حتى اروحلهم اذا ما اشوفها تفتر بالبيت كدام عيني ما ارتاح من تغيب بسرعه افتقدها .
وصلت لبيت خالتهم  نزلت دكيت الباب طلعت هويده وعمتي وميثم ..
وگفوا بالباب يكملون سوالف النسوان ميثم صعد التفتت
انزل صيح مريم گلها وينج يله وگلها لعمه نجاة ينتظرونا بالبيت
ميثم : مريومه راح تبات اليوم ويا بنات خالتي .
وليد: التفتت عليه  متفاجئ والدم صعد لراسي
لك انت عار شلون تقبل اختك تبات بيت خالتك
امشي گلها خلي تبدل وتجي بسرعة
ميثم: امي وابويه قابلين اني شنو، هاي امي يمك گلها متبات مريم ،مو بس تعرف ترزلني .
وليد: من صعدوا گتلها لهويده  كدام عمتي انزلي صيحي مريم باجر ما اكدر امرلها
نجاة : لا عمه خليها تتونس ويا البنات شويه ترتاح من ضغط الدراسه .
وليد: ما اكدر اجادلها اخجل  منها بقيت ساكت حسيت د يطلع دخان من راسي ورا ما وصلنا للبيت بشويه صحت
هويده ، مدت راسها من باب الصاله
تعالي  خابري مريم اريد اسألها على شغله .
هويده: هسه ،دا اروح للهول صاحني  لا من الصاله دخلت يمه  اتصلت
وهو واگف بصفي طلعلي ابن خالتي طلبت منه يناديلي  مريم اول ماجاوبت گتلها وليد يريدج اخذ السماعه مني
وليد: الو انتظرت هويده تطلع .
مريم : هلو ( نتر بأذني )
وليد: ليش بقيتي  دتعالي باجر والله متحلفلج لا اطلعها من خشمج انوب تعلوم جديد اتبات بالبيوت
مريم : شكو شبيك وين بايته غير بيت خالتي وامي وابويه قابلين
وليد: ا بعصبيه)يصير خير باجر أتخابرين من الصبح تگليلهم تعالوا عليه واني اجي اجيبج فاهمه وهسه روحي نامي لاتبقين كاعده وياهم ولا تحجين ويا ولد خالتج
مريم : فهمت سد التلفون بوجهي بعدني مامكمله الكلمه) ثاني يوم للظهر يله اتصلت يجوني مر عليه ابويه وصلت للبيت اثاري هو موجود مرايح للدوام والبقيه كلهم بالكليه
دخلت لغرفتي دقايق ونفتحت الباب بدون حتى ما يدك الباب ويستأذن .
وليد: اني مو گتلج اول متكعدين من النوم الصبح تتصلين اجي ارجعج .
مريم : اصلا كعدت متأخره
وليد: يعني البارحه سهرتي ما رحتي تنامين مثل ما گتلج .
مريم : بنتر ترى اني مو صغيره ولازم كلشي تحجي انفذه تدخل حتى بوقت نومتي مسكني من ايدي بقوه تألمت
(عيديها وباتي برا البيت وشوفي الي يجرالج )
طلع (شكد اكرهك مخبل )طلعت كتبي كعدت ادرس وراها رجعوا  البنات اول ما فاتوا استلموني نقل اخبار
عذراء: ولج البارحه ورا ما رجعكم نزل لجدو جنت كاعده وعمه أمال وسنان وبيبي موجودين
گله يصير مريم بايته يم بيت خالتها شنو معناها بنيه تبات برا البيت
وجدوا تدرين بي مؤيد لسوالفهم گله ليش من شفتها راح تبقى ما
گتلهم صيحوها ما تبات گله مو استحيت لان عمتي وعمي موافقين وراها من التمينا كلنا جدو گلهم مريم رايدها ابن عمها وما انطيها لغيره
جان يبسمر لعمه نجاة اخاف احد من اهلها حاجي بيج .
هويده: هو البارحه تخبل من شافج مو ويانا گلي  بالسياره انزلي صيحيها طلع حجه ميكدر يمرلج باجر بس امي گلتله لا عوفها خطيه تبات ومن رجعنا يطب ويطلع للمطبخ اخر شي صاحني حتى اخابرج ويحجي وياج بقى گالب وجهه،انوب من جدي انطاه الاوكي كدام الكل وگلهم ميصير بنيه تبات برا البيت هالمره صارت بعد متتكرر،من شاف ابويه مو بالهول سأل  جدي  اروح هسه اجيبها اني وسلوان بس جدو گله لا بعد عيب فات الوكت وسلوان اكيد هم طابگ ويا بعد تدرين .
مريم:من هاي لعد استقبلني بعصبيه
للعصر نزلت يمهم بالهول شفته ديحجي بالتلفون ويا احد
بس عيونه ويايه نادى عليه  جدو اجي اكعد بصفه
ياسر: شلون البارحه كدرتي تنامين بعيد عن جدو والبيت
مريم: جدو مو ملتمين كل بنات خالاتي وخوالي كلهم بقوا مو بس اني
ياسر: حتى لو اول واخر مره بنياتي مكانهم ببيتهم
مو صح
مريم : اي صح  بوسته من خده ترى اني هم اشتاقلك
مو بس انت تشتاقلنا
ياسر: والله جدو ارتاح من انتو جوه عيني وملمومين
راح ازوجكم للعصابه حتى تبقون يمي ميجي غريب ياخذ وحده مني هويده صارت لسلوان وعدراء لسنان وانت لهذا اشر على وليد .
مريم : خجلت منه ردت اطلع من الارتباك
سألته  بقى بس ميثم المن أزوجه .
ياسر : هذا خلي ياخذ الي يريدها المهم انتو بنياتي تبقون يمي .
مريم: ورا شويه خلص وليد مكالمه اشرلي مفهمت
بيبي  فهمت (سويله كبة بتيته چاب معنى )
دخلت للمطبخ نفسي الدنيه اشتغلت اتذكرت الاكل سويت
اكل مال اربع نفرات مو مال اثنين من كملت ناديته  دخل
وليد: اليوم مدللتني لازم اشتاقيتيلي .
مريم : لا والله مدلله روحي انت بس الكبه الك الكباب والطماطه والبيتنجان الي كعد ولا كأنه سمع .
وليد: ام خدود طلعي زيتون وتعالي اكعدي گابليني ،
من كعدت تاكل بنزاكه سألتها مبتسم
مريومه هالنزاكه مراهمه ويا وحده تضرب ربع كيلو لحم وحدها وياه بيتنجان وطماطه هذا اكل مال وحده عظامه
مريم : خلاني اضحك وهو هم يضحك
جاوبته ساعة ام خدود وما اريد هالخدود تضعف وساعة عظامه
يله عادي تعلمت عليك مثل الظهر مردت ايدي  وحاليا اريحي ولا كأنه مسوي شي .
وليد: ابتسمت ليش هواكو واحد بهالبيت يحبج بكدي وبعدني اكلج ما اريد هالخدود تضعف اكلي بالعافيه
مريم: ميحتاج توصيني على بطني مد ايده ديوكلني وعينه على باب المطبخ لايجي احد
وليد: اكلي قلبي .
مريم:  اكل وصافنه بحاله
على خبالاته بس احبه لان حنين وبسرعة يتندم وميعرف يعتذر بس بتصرفاته يبين اعتذاره ويبقى يرضيني حتى انسى سوالفه خلاني احس  صدك جان مشتاقلي ،ورا شويه دخل  سلوان  يمنا عصبي
سلوان : وين الرساله