رواية حكايات من بيت جدي الفصل الثاني عشر 12 - بقلم مريم اماسي الليل

#حكايات_من_بيت_جدي
الجزء الثاني عشر
اماسي الليل
وليد: شبيك يا رساله
سلوان : مريم تعرف .
وليد: عندي الرساله والزنجيل من قبل كم يوم  اخذتهن من مريم
سلوان: وليش ما وصلتلياهن
مريم : ليش هيج مهمه هالغراض عندك وصاير اعصاب
سلوان :فطنت على نفسي مريم اخت هويده  جاوبتها لا بس استغربت ما وصلتيهن  وقلقت اخاف شوفتيهن لهويده  وتصير مشكله على شي يخص الماضي قبل ما اخطبها
وليد: لاتخاف مريومه عاقله وتعرف تصرف اجتي انطتنياهن الي تعال اكل حتى وراها نطلع نروح على الولد  ( أفتهم قصدي اكعد وبعدين نطلع ونحجي )
مريم : ضجت منه وبقلبي بين اريد احجي لهويده وبين اخاف عليها اخاف تعرف وتنقهر وهي سالفة شباب ،اكيد كلهم عدهم نفس السوالف قبل الارتباط بس الي قلقني دخلته بعصبيه
ومبين محروك دمه والموضوع هامه مو شي عابر
سلوان : يله دنروح للولد اخاف نتأخر عليه .
وليد: صعدنا بدلنا وطلعنا اول ما ركبت السياره التفتت عليه
بله انت عندك ذره عقل فتت هالفوته انت عبالك مريم غبيه  متنتبه وترى  عرفت عندك علاقه بهيام يعني المفروض
متحسسها الموضوع هامك مهما كان هويده  اختها  يا غبي
ثانيا اني تقصدت ما انطيك الرساله والزنجيل لان مردت اذكرك بيها وتأثر على علاقتك بهويده كافي سوالف مزعطه
انت بعد كم يوم تعقد وتصير الشغله رسميه اذا راح تبقى بهالحال متعرف شتريد واقل شغله يحن قلبك على هيام  عوف هويده بحالها  تروح  لقسمتها وانت اخذ هالهيام وفضها
سلوان : ليش هو لو الحظ عدل وحالها حال هالبنات من عائله محترمه مجان اخذتها غير حظي مصخم  لك وليد احس نار بقلبي من الكلام الي سمعته منها احس شلتها وخليتها بالنار بأيدي لك والله قلبي يوجعني على كل كلمه عاتبتني بيها لك تحجي ويايه بصلافه بس اني اعرف وراها ضعف ومنهاره هي هيج شخصيتها تغطي على حقيقتها بهالصوره
وليد: وانت وين حجيت وياها
سلوان : اففففففف لك دك التلفون وجنت بالهول يمهم جدو گلي شيله شلته من سمعت صوتي گالت الو
((جاوبتها  الو منو تخبلت )
هيام : منو والله ضحكتني نسيت صوتي بكم يوم
كلشي اتوقع منك
سلوان : هلو محمد ، ( بصوت ناصي دقيقه احجي وياج من الصاله ،رحت رفعت السما عة من الصاله ورجعت سديت سماعة الهول ) الو
هيام : بالخير الخطوبه مراح تباركلي اني هم هالايام خطوبتي لو ترهم جان عزمتك بس شغلة المستوى متسمح
حضرتك تختلط بناس مثلنا والحقيقه الناس الي راح يكونون موجودين من نموذجنا .
سلوان : هيام المن تنخطبين  خلي افهمج الي صار
هيام : اني افهمك انت حبيتني بس مو اني الي اشرفك كدام العالم  وتصلح تصير مرتك  بس اختيارك صح
لان اول مره ادري بنفسي اني صدك بت ناز وكلش مرتاحه
لسوالف هاني وفرحانه اكثر لان عرفت اكدر  اطيح حظ اكبر شارب اذا عينه عليه اما انت  فاذا تعبت لان اتحملت وما كدرت تحصل شي انتظر ايام واتزوج هاني
ساعتها اذا تريد ثمن المساعده الي قدمتلياها اني حاضره .
سلوان : لاتلعبين ويايه هالدور اني اكثر واحد فاهمج لتقنعين نفسج بهذا الحجي مراح تسوين  شي منه اني من البدايه گتلج  انت اول حب بحياتي ومستحيل انساه ومن البدايه ما واعدتج بزواج لان اعرف نفسي حتى لو اتزوجج ما اتحمل الي اعرفه من قصتج ولا اكدر انسى موضوع اهلج معناها راح ادمرج بالشك واحتمال حتى انفصل عنج ساعتها راح ااذيج اكثر لذلك فكرت اخطب انسانه توالم قناعاتي
وهذا اسلوب الساقطات مراهملج  ولا جايده الدور اني الي كدرت عليه وياج ما قصرت بي  واذا اني خذلتج  وما عندي قوه تحمل انت لاتخذلبن نفسج  وصيري قويه گملي الي جنتي راسمته انت متصوره اني ما متعذب لا غلطانه اني بسببج
وبسبب دماغي مثل التايه ضايع حتى ما اعرف شريد والمن اريد بس كافي دا امثل  كدام الناس اني سعيد ومرتاح .
هويده : ها سلوان  انت هنا  تعال راح نطلع بالحديقه .
سلوان : ارتبكت ،حبيبتي اخلص التلفون واجي .
هويده : ها العفو ما اانتبهت عليك اخذ راحتك
هيام : حبيبتك !!يا مسهلها على لسانك معناها خطبت بت عمك حقك يادوب تناسب مستواك ان شاء الله مصارتلك مشكله من ورا الزنجيل والرساله دزيتها بيد مريم
سلوان : شوكت دزيتي
هيام : بستهزاء ليش ما وصلتك سلمتها لاخت العروس قبل كم يوم
سلوان: هيام عوفي هويده اسمعيني البنيه ما الها ذنب
هي هم راح تنظلم لان قلبي مو وياها  يعني مو بس انت ظلمتج اياج تحاولين تأذيها او تُوصليلها وتوَصليلها الي بناتنا لان ساعتها ما ارحمج .
هيام :  لتخاف ما عندي شي وياها بس اريد اعرف  شنو ذنبي تحاسبني على شي  اني انجبرت عليه من يوم النولدت ما اختاريت اهلي ولا مصيري
ليش خليتني اتأمل راح أشوفني غير عنهم  وبقيت تكابر وتخليني احلم وياك  وهدمت احلامي وكسرتني انت ممصدك اني وافقت على هاني عبالك دا اثير غيرتك
لا انخطبت وشغلة ايام البس الحلقه واعقد وافقت لان انت فهمتني غير هاني ميليق ولا يقبل بيه  گلت اختصر الطريق واخلص من معاناتي عاد اقبل بي على الاقل ما اخسر شي بقيت سنين محافظه عليه، اريد يجي اليوم الي انام مرتاحه بال واعوف الباب مفتوح جنت اتخيل هالامور راح تصير من اكون الك بس الواقع غير ، تدري اريد اكرهك ما اكدر اريد ااذيك لكن مكدرت بديت ااذي نفسي وانتقم منها تدري اني البارحه نايمه بحضن هاني صح كارهته بس على الاقل حسسني بقيمتي  ما خدعني
مثلك من زمان جان يگلي احبج بس مجنت اصدك بي جنت اتوقعه مجرد طمعان بيه ، طلع صدك يحبني على الاقل ما تحمل دمعه تنزل مني وحاول يهون عليه ويخفف حالتي
اما انت  بدون مقدمات تنهي كلشي بدون متفكر شلون راح يكون حالي من اسمع ما كرهتك سلوان بس دعيت عليك متشوف  الراحه ولا يهدالك بال وتعاني مثلي لان مراح انساك ولا راح اكدر اعيش وراك ولا راح ارتاح  لان اتخيلك  بهاني
وراح اعيش بكلامك ونظراتك راح تبقى بقلبي طول العمر  حلم  وكف بطريقه القدر  الي يشفعلك عندي ويخليني اعوفك بدون ما ااذيك  ولا اسببلك مشاكل مساعدتك الي حتى ارجع للمدرسه  وحتى تخلي رجلي على اول طريق الصح
مراح اگلك انساني لان مراح تنساني اذا مو بحب بتأنيب الظمير راح تذكرني من تصير عندك بنيه وتخاف عليها من هالدنيا ومن البشر الي مترحم وانت اولهم .
سلوان : هاني اتقربلج .
هيام : بعياط انت هذا الهامك كل تفكيرك بالشرف متعلق اذا بعدني بنيه او لا وانت شعليك افتهم خلص لو تبقى اخر رجال ما اقبل بيك اذا مو لخاطر نفسي لخاطر بت عمك الي هم ضحكت عليها وراح تبقى تخونها بقلبك
وحتى ترتاح لا ما اتقربلي  مجرد يواسيني ميدري يواسيني على حبيب خاين
سلوان : كافي هيام اذا جان غرضج من المكالمه تنتقمين مني  دا اكلج ارتاحي بعد كلامج هذا مراح اشوف الراحه وصح مراح اكدر انساج تدرين ليش لان جنت صادق وياج وحبيتج لدرجه مرات انسى الكدامي هويده مو انتِ حتى الكلام الي يطلع من گلبي  يطلع الج موجه الها اذا عندي حب ومشاعر اكدر اطلع منها كلمات حب واهتمام الها  فهي بسبب مشاعري وحبي الج تصورين لو بيدي شي والقدر بأيدي اضيع هالحب وما اعيش مرتاح  حالي حال هالشباب الي من يحب ياخذ حبيبته ك بس حتى لو اني اختاريتج  اهلي والمجتمع يوگفون بطريقنا واني عمري ما جنت جبان او ضعيف الشخصيه والاراده لكن وياج حجتي ضعيفه ك اذا اني عقلي ما مستوعبها ومتقبلها اعتب على غيري يتقبلها ادري مو ذنبج بس هاي الحقيقه الناس الها الظاهر ومترحم .
هيام : بقيت اسمع كلامه ودموعي تنزل ما ادري اكرهه ما ادري اعذره بس كلامه صح اذا اني ما متقبله اهلي شلون اريده واهله والمجتمع يتقبلوهم
بعده مستمر بالكلام گتله سلوان لاخر مره اسمع صوتك
اياك بيوم تحاول اتشوفني بقصد لو تسمع صوتي لان ساعتها ارجع عن كلامي واسببلك مشاكل ابتعد عني
وخليتي بحالي جنت محتاجه اتصل بيك  حتى اصدك انتهينا وهسه صدكت  وفتهمت شي انت نفسك مو فاهمه واهم نفسك بي
انت ما حبيتني انت تحب بت عمك
راح  ابدي من جديد بعيد عنك،غلقت  التلفون بعدها )) كملت  القصه
التفتت على وليد بربك شسيوي دبرني والله ضايع واعرف دعوتها مراح تنزل الگاع وهاي اني بأولها ما شايف الراحه وگاظيها بس امثل  حتى تعبت صارت الحبسه بغرفتي منفذ ارتاح بي  لتكلي وهويده گتلك احبها لان راح تصير مرتي بس مو مثل مشاعري ويا هيام ويا هويده الشغله مثل الي دا اتعلمها واجبر نفسي عليها ويا هيام شي صار بدون علمي على غفله لكيتها بقلبي وكل مشاعري الها
انت تدري اني يوميه بليل ابقى افكر بيها الى ان انام وحتى مرات احلم بيها  والمشكله هويده تنطيني مجال افكر بهيام حتى لو ما اريد افكربس ساعة الي  اختلي ويا نفسي
واريد احس بالحب والاهتمام تجي هيام على بالي تخليني احس بهالمشاعر .
وليد: لك والله سالفتك ما ادري  شنو حلها اني عن  نفسي ما عندي اي حل الك ولا اكدر افيدك غير اگلك  المشاعر الي واهم نفسك بيها تجاه هيام مو حب مشاعر رغبه ببنيه شكلها ووضعها غير عن بناتنا والتزامهم
اما بالحقيقه الي اني ملتمسه انت تحب هويده لكن الفرق انت متعلم عليها فما حاس بهالحب ولا راح تحس بي الا اذا فقدتها حاليا انت تحس فقدت هيام فعقلك لا اراديا يرغبك بيها ويحليها بعينك لكن لو تزوجها تعرف كل هذا الي انت بي حاليا جان طيش ووهم بالحب او تعاطف ويا حالتها  راح تتندم وتنفصل عنها
حاول تنسى هالعلاقه واستعجل بشغلة العقد حتى من تصير هويده زوجتك تقتنع بعد ماكو خط رجعه الك ويا هيام حتى اذا ما كدرت تنساها صفحه تطويها وتتناساها  بمرور الوكت .
سنان : شهوده اريد اخذ هديه لعذراء لعيد ميلادها بعد كم يوم والصدك ما اعرف اختار لان اغلب المرات اخذلها كتب ولان انت ِقريبه منها اكيد تعرفين شنو ايناسبها .
شهد: ميخالف بعيني  حتى اني هم اخذلها هديه همزين ذكرتني .
سنان : ورا يومين جابتلي تمثال بنيه لابسه قبعه قش وبيدها سله تنثر الورد وعصافير بقاعدتها .
والهديه الثانيه ورده جوريه قديفه غصنها اخضر مثبته على قاعده دائريه  قديفه  خضره  مخليها بزجاجه بيها سائل ينطي ألوان على ضوه الشمس عجبتني رفعت راسي ،جانت تنتظر رآيي بأختيارها  التمثال عاشت ايدج راح انطي لعذراء هديتها
لكن الورده راح اخذها الي احتفظ بيها تذكار منج .
شهد: ابتسمت  عجبتك ؟
سنان: اي شي منج يعجبني .
❤️ياسيدتي انت خلاصة كل الشعر
ووردة كل الحريات
يكفي ان اتهجى اسمكَ حتى اصبح ملك الشعر
وفرعون الكلمات
يكفي ان تعشقني امرآة مثلكِ
حتى ادخل في كتاب التاريخ
وترفع من اجلي الرايات ❤️
مريم : ردت احجي لعذراء موضوع سلوان بس خفت لا بعدين تصير مشكله من يعرف وليد حجيت لعدراء بقيت حايره الى ان دخلوا الولد قبل العشا جنت ويا البنات وعمه سعاد دنحضر الاكل سأل وليد 
وليد: يوم شوكت يصير العشا
سعاد: هسه ماما ميطول ربع ساعة ونصب
مريم : من التفتت اشرلي اصعد فوك من طلع شفته راح للهول  ورا شويه صعدت  لگيت سلوان بالهول .
سلوان : اكعدي مريومه هيام جانت عندي علاقه بيها  شي عابر بس انغثيت لان قلقتلا تكونين  مشوفه الرساله لهويده وانت تعرفين اني احبها وما اريدها تزعل على شي تافهه وشغله صارت قبل ارتباطنا فاريد منج هالموضوع محد يعرف بي غير احنه ال٣ ماشي
مريم : ماشي التفتت على صوت وليد اثاري جان منتجي على الباب وديستمع
وليد: گتلك متحتاج توصيها هي تعرف  تصرف .
مريم : لا ميحتاج توصيني واني هم متأكده ميحتاج اوصيك على هويده لان ادري بيك تحبها
وليد: يله خلي ننزل هسه يصيحونا على العشا .
مريم : نزلنا بس وليد حس اني ضايجه ومغثوثه من هالموضوع من صعدنا للغرف ورا العشا  دگ باب الغرفه گلي بنتر تعالي انتظرج بالهول كدام هويده وعذراء اتفاجئت هذا شبي شنو الي صار رحت ورا للهول
قلبي يدگ نعم
وليد:  تعالي مريومتي لتخافين تحججت كدام البنات حتى اصيحج ليش مضوجه نفسج علمود شغله مابيها معنى ترى سلوان يحب هويده وهاي سوالف العلاقات كلنا عدنا بس من نفكر نتزوج  اكيد وحده نحبها ومتأكدين من اخلاقها وسوالف البنات واللعب  تنتهي 
مريم: خرعتني من نترت بيه اتوقعت  اكو شي لا والله ضايجه لان اريد انبه هويده واخاف تصير مشكله من ورايه ويتخاربون  اريدك تفهم سلوان يعلم هويده شلون يريدها تتعامل ويا وينبهها
على الامور الي يحبها يطلبها منها حتى تنتبه عليه
وليد: حبيبتي الاهتمام  مينطلب المفروض اختج تهتم بي حتى  تحصل قلبه و تحسسه بحبها المفروض مشاعرها  هي تخليها تهتم بي وتنتبه على الامور الي  تفرحه ساعتها امورهم تمشي عدل
انت احجي وياها خليها تتقرب منه اكثر تشغل باله تدلل عليه
مريم : ميخالف انبهها هالايام تهتم بي اكثر  بس انت نبهه ميلعب من وراها
وليد: اطيح حظه  اذا يسويها بس اعرفه ميسويها لان يحبها
مريم : ان شاء الله ولودي عندك بعد شي اريد اروح انام ورايه كعده الصبح
وليد: لاحبيبتي  روحي نامي اني هم  جنت نعسان ورحت تمددت بس بقى بالي يمج .
مريم : لا خلص بعد ما افكر بشي واشغل دماغي هو اني اصلا ما عايزني ورايه امتحانات
وليد: يله تصبحين على خير راح اشتاقلج مريمتي منا للصبح ابتسمت اكو احلى من واحد يصبح بهالوجه
مريم : وانت من اهله من دخلت للغرفه استلمني البنات يريدون يعرفون شبي جاوبتهم رزاله كالعاده يتحجج
ثاني يوم
جنت كاعده بالهول الفوگ ادرس ما ادري بي موجود بالبيت مامداوم  الا من مدلي راسه من الباب يغني ومتأنق لحظتها فطنت اني اصلا جنت دا اسمع هالاغنيه وجاي الصوت من غرفته بدون ما انتبه
وليد: (لاتلوموني ترى  مكدر على فراگه روحي متلهفه عليه  وعيني مشتاگه انا مكدر ابتعد ويفارك عيوني ولا اكدر احتمل حرگة فراگه
لا تلوموني  محبوبي وأنا ريده والله سلمت القلب والروح بيده )
ها عيني راح اطلع تريدين اجيبلج شي ويايه
مريم : ابتسمت  لا سلامتك وين راح تطلع
وليد: اودي السياره للحي الصناعي
مريم : والي يروح للحي الصناعي يتأنق .
وليد: ابتسمت  لا طبعا راح نطلع اني وعلي ابن خالتي  سيارتين اذب السياره وراها نطلع متواعدين ويا الولد بعدها نرجع لبيت بيبيتي الغده سويه
مريم : يعني مراح تجي على الغده
وليد: لا حتى تحسين بيه من اغيب عن هالبيت  وتشتاقيلي
يله مريومه راح اروح .
مريم : الله وياك من نزل ركضت ورا ناديت  بهمس عليه وهو بوسط الدرج
وليد: جاربتها بهمس ها قلبي
مريم : گول والله مو سوالف بنات .
وليد: وداعتج ويا ولد خالي نكعد بالجادريه وراها نرجع نتغدا
والعصر ارجع  والله طالع وعايف القلب  يمج راح اجيبلج ويايه كيكه من الرباط
مريم : لا معناها اكابلها واني اريد اضعف
وليد: بس اني اريد هالخدود من ارجع امر اجيب كيك تريدين شي لاخ
اني قابل تسمنين .
مريم : ابتسمت يله روح الله وياك  وجيبها محشيه نستله
غمزلي واشرلي على عيونه ( من هالعين  )
صدك مكانه خالي من التمينا على الغده كرسيه فارغ
حتى بيبيتي افتقدته
محاسن: اليوم ولودي مكانه خالي الله يحفظكم بيبي وتبقون ملتمين سوا طول العمر .
مريم :صار عندي فضول ورا الغدا من ينامون  افوت لغرفته
اللعب بغراضه اشوف عنده شي
صعدت فتحت الكنتور لگيت هديه مغلفه  وألبوم صور فتحته بي صور هو وبنات اكو قديمه مبين من جان بالمدرسه واكو حديثه لفتت انتباهي بنيه حلوه عنده صور وياها منفرده وجماعيه بالجامعه هي الوحيده الي ثارت غيرتي عليه
وخلتني اشك اكو علاقه بينهم اتسائل ليش بكل الصور واكف بصفها !
بقيت بين اواجهه بين اسكت ولا كأنه شفت الصور احساس الغيره خلاني اشگگ كم صوره حلوه هي موجوده ويا كاعدين وواكفين سوا بالاول ردت اذب القصاصات بالزبل بس من بديت اغلي وقلبي احترك خليتهن اول ميفتح الكنتور يشوفهن خلي يفرح بالهديه مالتي  مو بس صديقته تهدي   اريد اغثه مثل ما غثني وحتى يعرف  شفت الصور وميكدر يضحك عليه
رجعت للهول اكمل دراستي للعصر سمعت صوته رجع للبيت
لمحته من صعد شفته جاي بأتجاه الهول وگف يم الباب
وليد: اشتاقيتيلي لو لا
مريم : لا و انت وين غبت حتى اشتاقلك (رفع حاجبه مستغرب )
وليد: غمزتلها يا حلو شو مگلوب عليه شكو
مريم : كلشي ماكو لاتلهيني خليني ادرس .
وليد: دخذي استراحه بين ما ابدل ملابسي ننزل سويلنا چاي واي شي حتى ناكل سويه
مريم : ما اشتهي اكلت قبل شويه اكو كعك وجاي  انزل اكل
وليد: يله براحتج دخلت لغرفتي مستغرب من حالها
خلعت الساعه وطلعت المحفظه ومفتاح السياره  خليتهن  على الميز فتحت الكنتور  اطلع ملابس صارت كدامي كصاكيص حركتها بأيدي صوري
ها هنا الحجي هذا سبب گلبت وجهها بعيطه صحت مريم .
مريم: سمعت عيطته على كد ما اخاف منه بس فرحت وارتاحيت
انصدم وانغث رحت اترنح ،مديتله راسي  نعم
وليد: تعالي ليش لاعبه بالصور واصلا ليش فايته تفتشين بغراضي
مريم : انت تگلي احنه بحكم المخطوبين وتتحكم بيه براحتك ومن يمي تحاسبني ليش دخلتي لغرفتي وليش لعبت بغراضك اني هم اگلك فتت اشوف خطيبي شعنده ولگيت الحمد لله هالصور ووضعك هسه اكدلي عندك شي ويا هالبنيه لاتكذب  ،راد يحجي عفته وطلعت رجعت للهول لحگني بعصبيه
مسك ايدي بقوه
وليد: شلون احجي وياج تعوفيني وتطلعين وبأي حق أشگين الصور وتدخلين غرفتي يصير اني ادخل غرفتج وافتش وراج
مريم :روح فتش ماعندي شي اضمه واذا انغثيت على الصور اتصور بسهوله تروح اطلع نسخه ثانيه  هاي اذا ما حبيبتك عدها نفس النسخ عود من تزوجون وحدوا الالبوم
وليد: بقت تحجي بعصبيه  واني مبهور بهالعصبيه والغيره وبهالوجه يا الله شكد احبها احسها قطعه من قلبي
(ما اريد اوضحلها ماعندي شي حبيت اثير غيرتها اريدها تبقى أتفكر بالموضوع وتتخيل امور ما موجوده .)
هاي اخر مره تصرفين هالتصرف تركتها ورجعت للغرفه احس براحه من اشوف اي تصرف منها بدافع الحب والاهتمام
لليل ناديت هويده اتصعد الكيكه ناداني سلوان
(  تعال كلنا كاعدين هنا)
دخلت ميثم وسلوان وسنان وعذراء ومريم ملتمين عرفت كلهم متذكرين عيد ميلاد عذراء  مثل كل سنه بعيد ميلاد اي واحد من عدنا  نلتم ومن تصير الساعة ب١٢ يصعدون كيكه نحتفل وحدنا، ومن صغار جانوا الاهل يسوولنا عيد ميلاد ويعزمون بي الكرايب
بقيت گالب وجهي على مريم حتى ما وجهتلها اي نظره
دخلت هويده هي والكيكه خليت ايدي على چتف عذراء قبلتها من خدها
كل عام وانتِ بخير حبيبتي .
عذراء: حضنته وانت بخير ولودي الله يحفظك ويحفظكم  الي .
مريم : من شفت الهديه حسيت نفسي ثوله شلون نسيت هاي هدية عذراء مو من صديقته فوكاها گالب وجهه .
سنان : كل سنه وانت سالمه عذوره انطيتها الهديه
عذراء: وانت بخير مجرد بعده يذكرني ويهتم بيه يخليني اعيش ويا قصة حب من طرف واحد واني مرتاحه لان اعرف الي مكان بقلبه وذكرياته وحتى راحته تكون ويايه من نكون قريبين
حتى لو مشاعره اخويه لكن هالمشاعر تشبع حاجة قلبي للعاطفه
اما هويده ومريم وسلوان وميثم محبتهم غمرتني بسعاده وهم  ملمومين بجانبي داير مداير الكيكه وهج الحنيه الي بيناتنا كان يشع من وسطنا شايفته واني مغمضه عيوتي اتمنى بعد ما طفيت  الشموع نبقى طول العمر قريبين ومانفترق لكن بالاول والاخير هي امنيات غير عن القدر ما نعرف شنو مخبيلنا , بعد منتصف الليل تركت فراشي وتوجهت للكنتور طلعت هديه سنان جانت احلى هديه من بين هداياه السابقه مجرد ما اتفرج عليها احس بسعاده وراحه نفسيه حسيت بالتعب والنعاس رجعتها لمكانها ورجعت لفراشي خليت راسي على المخده وعيوني بدت تستسلم للنعاس همست بداخلي تصبح على خير .