#حكايات_من_بيت_جدي
الجزء٤٦
اماسي الليل
حقوق النشر محفوظه
سلوان : رجعت ... للبيت ...لكيتهم نايمين بس سنان كاعد بالهول ... ضارب صفه وبأيده كتاب محس عليه من دخلت
الله بالخير .... التفت وكعد
سنان : الله بالخير ... شعجب راجع من وكت
سلوان : ابتسمت ... لتگلي جنت تنتظرني
سنان: ابتسمت لا والله بس دا اقرا ... بكتاب جبران خليل جبران وسرحت ويا
بس كلت بلكت الحجي جاب فائده
سلوان : ان شاءالله بعد اخفف السهر وارجع من وكت ....
سنان: الله يهديك ... انت اذا تنغث مني ... لان انصحك اني اكبر منك ولو ما اتهمني وحياتك ومرتك وبَنَاتِك يهموني ما ادخل تدري بيه ما احب ادخل بخصوصيات احد ... بس وياك ما اكدر
اكو امور يجوز انت ما شوفها ... لكن اني ... شايفها وحاس بيها ... انت عندك نعمه ... ومامقدرها ... مرتك وبَنَاتِك هالنعمه
حتى لو المقابل عنده عيوب انت هم عندك عيوب ولازم تفكر ماكو انسان كامل ... مثل ماهي قانعه بيك انت هم لازم تقنع ...حتى حياتكم تستمر اذا مو الكم لخاطر بناتك ... ركز بحياة امي وابويه اتصور انت هم جنت متذمر من اهماله لامي بينما امي مابيها عيوب بكد الي يمتلكها ابويه بصفاته ... شكد عانت
وتحملت لخاطرنا... المفروض هالشي يخليك تتعض وتكون
واعي لتأثير علاقة الاب والام على نفسيه اطفالهم ...
سلوان : ان شاء الله ... انتبه منا ويجي ... يله اخذ راحتك اني اصعد تصبح على خير ...
سنان: وانت من اهله ....
سلوان : طلعت من الهول ... صعدت الدرج ...حكيت رگبتي ..
نزلت ايدي انتبهت اصابعي ما تحسست الزنجيل ورجعت صعدتها أتلمس رگبتي ... الزنجيل مختفي ... رجعت نزلت كم درجه ... وگفني صوت بداخلي كافي سلوان انتبه على حياتك ومرتك وبناتك انسى هالحب وصاحبته وترك كل شي يذكرك بيها واطوي هالصفحه من اليوم ...
رجعت صعدت ... فتحت الباب لگيت هويده كاعده تگلب مجله
تنتظرني ... هلو ... شعجب كاعده
هويده : هلو قلبي ... جنت انتظرك .... كمت من الفراش ... ورحت يمه حتى اعلك ملابسه
شعجب راجع من وكت ...
سلوان : والله رجعت علمودج ... اريد اخفف السهر وما اتأخر ...
بالرجعه بعد ... شوكت نامو البنات
هويده : لفيت ايدي على رگبته ... رانيا نامت من وكت الا ريمه صدعت راسي تسأل عليك بقت تنتظرك تجي ... لحد ما غفت
سلوان: لفيت ايدي حضنتها ... باجر اطلعكم وين تريدين اوديكم ...
هويده : بكيفك وهم بدربنا اخذ ملابس للبنات ..
سلوان : ان شاء الله ...
صباح يوم جديد
مريم : فزيت الصبح على صوت خالد ... ملگيته بصفي ...
گمت من الفراش... لگيت وليد... متمدد على القنفه ومخلي على صدره يلعبه ... رجعت تمدد واتذكر كل الي صار البارحه .. تندمت لان راح تصير لهويده مشكله من ورا راسي وامي نبهتني ما احجي طلعت من حالة السرحان .... من صار وليد كدامي ... إجى جايب خالد ...اظاهر عباله نايمه وراد يكعدني ...
من شافني كاعده ... گلب وجهه وخلى الولد .. على الفراش
راح على الكنتور فتحه .. شفته ديفتش على شي .... التفت بيده
جنطة المستمسكات (جنطه دبلوماسيه بيها رمز السر) سندها على حافه السرير وجهه عصبي ... منزل عينه بداخلها
قلبي كام يدك ملامحه ابد ما يبشر بخير قلقني ليش ديدور بجنطة المستمسكات
رفع وجهه وبيده اوراق شمرها ... على الفراش بس حسيته متحامل عليه وكارهني
وليد: شوفي هاي الاوراق ....وباجر نروح للمحكمه
مريم : من سمعت نروح للمحكمه ... قلبي وكف ... وأطرافي خدرت من الخوف ما همتني الاوراق .... سألته ليش
وليد: حتى كلشي يرجع لمكانه ... شوفي سوايتج البارحه خلتني
اتندم على اليوم الي رجعت بي من سويسرا ... وخطبتج بس يصير خير خلي كلام امج يفيدج .... شفت دموعها تنزل ...طلعت من الغرفه ونزلت جوه
مريم : اسمعه وبداخلي الوم غبائي الي وصلني ويا لنهاية الطريق ... من سمعت ندمه ادموعي نزلت بألم ... ولساني انعكد معرفت احجي كلمه ... من نزل خليت ايدي على وجهي وطگيت بچي خلص ناوي يطلگني ... مرت فتره من الوقت مسحت دموعي ... دا انزل من الفراش ... التفتت مديت جسمي جريت
الاوراق ... فتحتها عقد تمليك ....
اتفاجئت وقلبي انقبض من شفت اسم المالك مريم سعد ياسر
اتأكدت من المعلومات مصدومه ... القطعه بأسمي ... ضربت خدي اويلي عليج مريم ... خربتي حياتج وكرهتي رجلج بيج من ورا قطعه وتالي طلع مسجلها بأسمج ... ياربي شوكت راح اتوب من هالتسرع والغباء .... شراح يخلصني من امي وهويده ... كلها راح تصير عليه اخذت كلينسه مسحت عيوني ... شلت ابني خليته بفراشه. ونزلت ....لنص الدرج صار گبالي ديصعد ....
وليد: اصعدي ...
مريم : رجعت صعدت ... دخلت للغرفه دخل ورايه .... سد الباب
وليد: بعصبيه ... شوفي موضوع البيت هذا متفتحين حلگج بي كدام جدي وبيبيتي ... لان الصدك لا انت ولا اختج ولا امج ولا حتى سلوان تهموني ... بكد ما مهتم لايزعل جدي وبيبيتي تنقهر ... من يسمعون فاهمه
ومن اليوم انت مرتي بس بالاسم ...وباجر نروح للمحكمه
تسويلي توكيل عام ....
لان المثلج يكون الواحد غبي من يسجل بيت بأسمها وعندج هيج ام تزن براسج و تمشين وراها ...
على العموم انت جنيتي على روحج ...لان يوم الي اخذت هالقطعه واجيت أسجلها لكيت عليه ضريبه ( لان خالي جان يشتغل بالمعارض يبيع ويشتري سيارات حتى متصير علي ضرائب جان يسجلها بأسماء ولد أخواته واخوته ... واني من ضمنهم فلگيت عليه ضريبه بسبب هالموضوع )
فكرت أسجلها بأسمج لان ماكو فرق بيني وبينج ومحسب اني وياج واحد
بس البارحه اكتشفت شكد جنت غلطان ... علمود بيت صار سلوان احسن مني
يعني احترامي الج وتقديري لمشاعرج مو بعينج الي وكف بعينج وقيمتيني عليه ماديات ...
مريم : والله اسفه انقهرت لان عرفت عندك گاع ودتبنيها واني ما ادري
وليد: (بعصبيه)ما كتلج لان اني رجال صاحب كلمه ورجل اختج وصاني حتى الج ما احجي وتالي طلع هو حاجي لهويده .... والله اليوم
لا اطيح حظه اني اعلمكم...وانت الافضل بعد مافتحين حلگج
ويايه لان شفت وجهج الحقيقي نسخه امج واختج ... بس الفرق اني لا السلوان ولا عمي سعد
وليد: نزلت ... لگيت بيبيتي كاعده
صباح الخير يمه
محاسن : صباح الخير مريومه بعدها نايمه
وليد: لا كاعده هسه تنزل تسوي الريوك ....جدي وين
محاسن : بالهول ديصلي الضحى...
مريم : دخلت للمطبخ صباح الخير يمه .... شفت بيبيتي ركزت بوجهي
محاسن: صباح النور ...متعاركين من الصبح
وليد: لا بس خالد غص ...واختنك ... وهي خافت عليه
محاسن: يا وهسه نام ....بيبي صير سباعيه
انت هناك وحدج لازم تتعلمين تصرفين بهيج مواقف مو تبچين
مريم : اي نام ..... ان شاء الله بيبي
وليد: كعدنا نتريك ... شفتها مرتبكه ... وتصفن وتخاف تخلي عينها بعيني ... اتصرفنا طبيعي حتى لا يحسون بيبيتي وجدي ... بس قلبي يغلي اريد اشوف سلوان وارزله
للظهر( قبل الغدا) شلت التلفون ... دكيت على بيت عمي ...
طلعتي هويده ...سلامي وياها ثگيل ... طلبت سلوان
سلوان: الو
وليد: لك انت تبقى زعطوط ... شوكت تصير رجال ...
سلوان : شكو يويل شبيك ...
وليد: شبيه نجاة شمعرفها بموضوع الكاع والبارحه حاجيه لمريم عنه
من انت متكدر أضم شغله على مرتك وتدري بيها راح تحجي لامها
شكو نبهت عليه بوكتها ما احجي لمرتي وتحججت من توصل لنجاة معناها توصل لبيبيتي وجدي ويزعلون وينقهرون ...
سلوان : يويل هسه اجيك وافهمك ...
وليد:لا تجي ولا اريد افتهم ...عرفتك فد واحد ماعندك كلمه
سلوان : لك ترى دجفص ... شبيك متخبل عليه
وليد: لان عبالي حوك طلعت خرگه ... حلك وربطك بيد النسوان سلوان : سديت الخط بوجهه .... طلعت من الهول صحت هويده
تعالي ....
صعدت للغرفه انتظرها
هويده : نعم
سلوان : ( بعيطه ) تعالي من گتلج حجيتي لامج على موضوع البيت وخنتي الثقه دخلتي بعيني وگلتيلي محد يعرف ومحاجيه كدامها عن البيت ..
جنت مقرر أسجل البيت بأسمج ... بس على سوايتج هاي طلعتيني زعطوط وماعندي كلمه كدام وليد ... وخليتيها بحلك امج ام المشاكل ... راح اخليها حسره بقلبج يصير البيت بأسمج وترى انت الي خسرتي ... لان مريم اصلا قطعتهم بأسمها ...
يوم على يوم دا اكتشف بيج امور ... تخليني احس اني ما ظالمج ... وماكو داعي اتغير ... لان انت نسخه من امج وأنانيتها
وطمعها ....
هويده : انت شصير مشكله تذبها براسي ... كله حتى تتحجج متسجل البيت بأسمي
يعني واذا گتلها لامي ... قابل حجيت لاحد بغريب ... وما ادري بيها راح تحجي لمريم ... ولا راح توصل لوليد ...
سلوان : ( بعصبيه) لاناخذيني بلسانج ليش اني مو منبه عليج متحجين لمخلوق ... بس العتب مو عليج العتب عليه ... خليت السالفه بحلك النسوان ... دخلي يوصل خبر لجدي وبيبيتي .. دا اندمج من صدك .... بدلت وطلعت من الغرفه بوجهي ... لبيت جدي .... دكيت الباب ... فتحتلي بيبيتي ... دخلت سلمت عليهم
وكعدت شويه
سألت مريم ... ابو خالد وين
مريم : ما ادري طلع بشغله ...
سلوان :بقيت انتظره شفته تأخر ... ترخصت وطلعت ... رحت لبيت خالتي يم فائز ....
هويده :اول ما طلع سلوان ... نزلت للصاله ... دكيت على اهلي
طلع ابويه ... طلبت منه يصيحلي امي
نجاة: الو
هويده : بله هاي سوايه تسويها تحجين موضوع البيت لمريم وتدرين بيها ... متضم شغله من يم رجلها جبانه ...شحاجيتلها
وخربوا عليه ... بعد لو اموت ميقبل يسجله بأسمي كله منج ومن بنت الغبيه ...
نجاة: ولج شكو اخذتيني حاصل فاصل
هويده : شنو حاجيه لمريم الي خلت وليد يتصل بسلوان كايله انت مو رجال ... وهاي عود اني وصيتج گتلج حتى لمريم لتحجين ...
نجاة : شلون ما احجي ... اخليها متدري ... لعد غير هي هم بنتي ... واريد مصلحتها ...
هويده : اي خوش لعد استاهل لان حجيتلج تالي مريم استفادت طلع وليد مسجل الكاع بأسمها واني الي اكلتها
دخيله لالله بعد لاتحجين لاحد ترى سلوان هددني ... اذا توصل
لجدي وبيبيتي حتى يطلگني ... خربتيلي هالسالفه .... عاد لا تخربين بيتي ...
نجاة : ولج انت شلون تحجين ويايه هيج ... انتِ مابيج خير اني شعليه ... وهو رجلج جذاب يريدها حجه ... لو يريد يكتبها بأسمج صدك جان كتبها من شاف وليد كتب القطعة بأسم مريم ...
هويده : هسه بعد ميفيد الحجي ... شوفي بنتج شحاجيه
ووصيها ما تحجي كدام بيبيتي ...
نجاه : هسه اتصل عليها ...
مريم : اتصلت عليه امي ... وبقت ترزلني ... وتحجي عليه خربت على هويده وسويتلها مشكله ويا سلوان ... وصتني ما أحجي كدام بيبيتي ... ورادت تعرف شنو سويت وحجيت ويا وليد ... سولفتلها ... استرسلت بالسوالف ونسيت نفسي الى ان
انفتح باب الصاله ... صار كدامي وليد.. شايل خالد يبچي
وليد: (بعصبيه )مكابله التلفون وملتهيه بسوالف مأمنها بس المشاكل ... وعايفه الولد ...يبچي ...بس على منو تطلعين ماجايبتها من بره
مريم : فزيت ... اسمع امي تگلي دروحيله لهذا المكروه
وتركيزي كله ويا وليد ورزالته ... سديت السماعه ... اخذت منه خالد
شفته صعد للغرفه ... صعدت ورا ... من دخلت
ترى الي حجيته ما اله داعي ... انت مو احرص مني على ابني ... من دخلت للصاله تركته يم بيبيتي ... ثانيا تقبل احجي ويا امك نفس الحجي الي انت حجيته وسمعته لامي
التفت عليه ... ببرود
وليد: اني اسألج اكو يوم امي مدخله بحياتج لو مسببتلج مشكله ويايه حتى ابنج الي هو حفيدهم ... من يريدوا ... يسألوج
يجون ياخذوا ... فديوم فرضوا عليج شي
مريم : لا
وليد: خلص معناها الانسان هو يجبر المقابل يحترمه من تصرفاته واحترامه للاخر
ومتأكد مراح تكدرين تحجين الي حجيته ... لان امي تختلف عن امج من السما للكاع...
مريم : ترى انت تغثني الي من تحجي على امي ... يعني على الاقل لخاطري ...
وليد: من تعرفين تخلين خاطر واحترام لرجلج ذاك الوكت گليلي لخاطري ... وبعد لتفتحين ويايه مواضيع ... هالمره جاوبتج لان
حاججتيني بأمي ...
مريم : اخذ المنشفه ودخل للحمام ... بين ما غيرت لخالد ... وشبعته خليته بحضني حتى ينام ... اسمع الاب من اول ما دخل للحمام يغني ...
وطربان كله اغاني حب .... طلع و صدره عاري ... وگف كدام المرايه ينشف شعره بالمنشفه ... سويت نفسي ملتهيه ما اباوع عليه ... لكن كأنه جان ينتظر نظرتي تصوب باتجاهه ... حتى ينزع الزنجيل الي بي حرف m ويشمره على الميز ... وكعد
يدندن ويمشط... صح انقهرت من نزع الزنجيل بس
عرفت يريد يضوجني .... بدل ولبس روبه ... طلع من الغرفه ...
خالد نام ...گمت دا اخلي بفراشه ... دخل وليد شايل صوبه
نفطيه ... دخلها يمه للهول ... ... سمعته شغل التلفزيون ...
طفيت الضوه ... ونزلت
للمطبخ ... فورت ممات ابني ورحت للهول سمعت حركه
لكيت بيبيتي ... هسه دخلت وكعدت على القنفه ...سألتها .. وين رحتي يمه
محاسن: والله رحت لام حسن ( جارتهم) ضغطها مرتفع واجتي بتها رادت جهاز الضغط ... رحت وياها اطمئن على امها ....
ولج مريومه انت ويا متعاركين وتضحكون عليه ليش اني ما اعرفكم
وهسه اتأكدت لان من دا اطلع لگيته بالهول يلعب خالد...وعرف اني وين رايحه وانت متدرين معناها متتحاجون
شكو احجي شصاير بينكم
مريم : هسه اجي اسولفلج ... بس اروح اطفي الجدر ( بي المميات)
تم
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!