رواية حكايات من بيت جدي الفصل الثاني والخمسون 52 - بقلم مريم اماسي الليل

#حكايات_من_بيت_جدي
الجزء٤٧
اماسي الليل
مريم : اجتي ورايه بيبيتي ...
محاسن: اي سولفيلي ... شصاير
مريم : يمه ماكو شي ... بس هو تدرين بي نحس ويخاف على خالد
من غص بقى يرزلني ...واني ما عرفت أتصرف بقيت بس دموعي تنزل ... مقبل عليه رزلني بنفس كلامج الي حجيتي ... (اني وحدي بالغربه ولازم اتعلم أتصرف بسرعة ... )
منا حجايه منا حجايه ... كبرت بيناتنا ... وتدرين بي لسانه متبري منه
محاسن: ادري بي ... يله اذا على هالسالفه بسيطه ...
وحقه لازم تصيرين سباعيه وتقوين قلبج ... لاتضوجين هسه يومين يصالحج ... هذا مثل جده ميكدر ... يطول بالزعل ...
مريم : ان شاءالله ....
محاسن : ديله صبي الغدا ... خلي اروح اكعد جدج ... وانت صيحي وليد
مريم : بداخلي حاقده عليه ... من اتذكرت شغله الزنجيل ويدندن
طلعت مني الكلمه (كذبت )
گلي لاتصيحوني على الغدا ... متغدي .... اريد انام
محاسن: اي صح اتذكرت ... گال اكلت ... وجاب ويا كيك ... خليته بالثلاجه
هاج شوفي مو اكلج ميتحمل زعل ... جايبلج كيكه يدري بيج تحبين الكيك
مريم : فتحت الثلاجه شفتها نفسها الي جنت اوصي عليها قبل من الرباط ...
بداخلي انبت نفسي ... لان حقدت عليه ... خلي اصعد اصيحه يتغدا ...
صعدت ... دخلت للغرفه ... بهدوء... لا ابني يكعد ...
انتبهت على وليد ... مخلي ايديه جوه راسه ... اعرف هالحركه .. معناها ديفكر بشي ...
يله انزل اتغدا .... التفت عليه ... گام من مكانه ... طفى الصوبه ....
وليد: شغلي الكهربائيه شمعتين ...
مريم : نزل ... وبداخلي احجي
اكثر شغله احبها بيك ... دماغك يشتغل بكلشي ... طول الوقت .... بس لو تبطل هالاعصاب
اوووف
دفيت ابني ... ونزلت ... لكيتهم كاعدين على السفره .. يسولفون
ياسر: وينه خالد ... لعد
مريم : بعده جدو نايم ... من يكعد اجيبه الك
محاسن : تعالي اكعدي يله اكلوا .... صدك سلوان مر عليك من جنت طالع وبقى ينتظرك
وليد: عود العصر اروحله
ياسر: بعد كم يوم عيد ميلاد .... عذوره
مريم : بعدك جدو تذكر ... التواريخ
محاسن: لاتخافين مينسى عزيزات قلبه ... حافظ ميلاد كل وحده
بيكم
مريم : شفت جدي مركز ويا وليد لان ساكت ... وملهي نفسه بالاكل
ياسر: مرات من المحبه والخوف الانسان يغلط ... واني غلطت من انطيتهن لهذا وذاك
مريم اشر على وليد ... وقصد ذاك على سلوان ... وليد ... رفع راسه ابتسم بوجه جدي ... وبيبيتي هم ابتسمت ...
يدرون بي ميفوته شي يقرا كل واحد بينا من وجهه ... عرف بيناتنا مشكله
وليد: يابه ترى انت مخدوع بيهن ... اذا عبالك فقيرات ...
لو ماخذيهن غيرنا ... جان متحملوهن ...
بس احنه بعد منكدر نرجعهن ... هههه
ياسر: ابتسمت من تريد ترجع رجع لا تتحجج وانت متكدر بلياها
وليد: ابتسمت ... الحمد لله والشكر .. شفت بيبيتي مبتسمه غمزتلها ...
محاسن:  من طلع ... التفتت يا رجال انت ليش تحب تستفزه للولد ... ليش انت عبالك
بنات نجاة خيرات ... ترى ولدي كلشي يسولفولي
ياسر: جدو مبينه ... مجفصه بمصارينه ... وساكته ...
مريم :والله جدو هو مينحمل ... من ورا عصبيته ... كمت احجي
ما اسكت
ياسر : زين تسوين بي ... لاتسكتيله وراج جدج شحده يحجي وياج
محاسن: انتَ اليوم لگيتلك سالفه تتونس عليها ... عوفهم لا
تحرضها عليه ... هذا ميتحمل طالع عليك ... ليش اني الي شفته منك قليل ....الله راد يراويك بناتك حتى تحس شكد اذيتني
ياسر: ادري انت مشمته بمريومه ... مو هاي هم بت ابنج
شفتيها جدو طلعت حقدها وغيرتها ... بيج
خلي ولدج يفيدوج
اني بنياتي .... الي يوصل يمهن ... مايلوم الا نفسه ...
محاسن: بيبي مالج شغله بي ... يريد يحركج عليه
تدرين انت عندي ... اعز وحده بيهن ...
مريم : ههههه ادري اني هم احبكم انت وجدو نفس الشي
ياسر: الحمد لله والشكر ... لعد زين يسوي بيج ابو زايد...
البزون متحب الا خناگها ...
سلوان : طبگت السياره يم الباب ... شفت سنان ديطلع من للبيت
بيده اوراق ... هلو وين رايح
سنان : هلو للمكتبه ... استنسخ لعذراء ... وارجع اليوم اتغدا ب بيت عمي معن ... رايد شي
سلوان : لا ... لعد تعال اوصلك وارجع وياك .... بداخلي فضول ... سنان
صاير ميعجبه الكعده الا بيت عمي معن ....اول ما شغلت السياره وطلعت ما ...
كدرت اسكت
اكلك انت من ترتاح لعذراء ... ليش متفكر ... تزوجها ... على الاقل بت عمنا ... والبنيه شخصيتها قريبه منك واكثر انسانه بعد المرحومه توالمك
سنان : ابتسمت متفاجئ بكلام سلوان ...
شكرا على النصيحه ... ان شاء الله من افكر اخذ بيها ...
سلوان : هههه صاير اريحي ... ترى فهمت ناصب عليه ...
سنان: ابتسمت لعد شجاوبك ... كلت اخليك بواهسك تردلي ... نصيحه البارحه ...
سلوان : فكر بلي حجيته متخسر ...
سنان:يويل عذراء اختي من احنه صغار ... هم لو فكرت اتزوج ما تكون كخيار ...
ذكرتني ... هي اتقدملها ولد وياها بالجامعه .. طالب ماجستير
إجى عليه فاتحني بالموضوع ... يريد يتقدملها راد مني احجي ويا عمي معن ... ( اهلها)
اليوم احجي ويا بيبيتي هي توصللهم خبر ... وهم تسأل عذراء
سلوان : من كلامك ... نصيحتي مابيها فائده الك
سنان: انت المفروض ما تنصحني هيج نصيحه ... لان تدري
موضوع الزواج شغله منتهيه ... مابيها مجال للتفكير ...
وماممكن اخذ عذراء او اي انسانه ثانيه ... اظلمها ويايه .. واني ما بقلبي ولا بحياتي غير المرحومه ...
سلوان : بس هاي سنة الحياة ... يعني شهد راحت لدار حقها انت هم لازم تعيش حياتك وتزوج وتكون عائله ...
لعد تتعب وتشتغل ... المن بعدين ... من تكبر منو يعينك ... منو يملي عليك وحدتك ...
سنان: انت موجود ... من احتاجك متقصر
وامي الله يحفظها مامخليتني محتاج شي ... ومرتاح على لمة اهلنا ...
هي قناعات واعرف مراح اكدر اوصل الموضوع من جانبي حتى اقنعك بلي بداخلي ...
سلوان : براحتك ... عوفه للموضوع لاتضوج نفسك بي ...
اني قصدت بهالحديث عذراء ... وعرفت نظرتك الها اخويه
فهمت ..
نزل يستنسخ ... بعدها رجعنا لبيت عمي معن ...
اول ما دخلنا تلگتني عذراء
عذراء: يا هلا شعجب ابو ريم متذكرنا اليوم ...
سلوان : شلونج عذوره ... ولج قبل يومين جنت يمكم انتِ طالعه ويا عمتي سعاد ... بقيت ويا عمي ...وسنان شفنا اللعبه
انت وينج متمرين
عذراء: اي صح ابويه گال والله نسيت .... والله سلوان ...
رايد تسويلنا سفره جماعيه ....نطلع كلنا ... ماطول وليد ومريم موجودين قبل ما يسافرون ....
سمعت امي صاحتني ... حتى نصب الغدا ... طلعت من يمهم
سعاد: منو إجى
عذراء: سلوان ويا سنان
سعاد: لعد لو يجي اخوج خطيه يتونس وياهم
خلي اروح اسلم واگلهم ... يتصلون عليه
سنان: اي ... نروح للمزرعه ... خوش فكره ... اني وياك نتفق ويا البقيه ونحدد اليوم
معن: اي والله صارلنا فتره طويله ما طالعين كلنا نغير جو ... لعد قيصر وين
سلوان : ان شاء الله ......(لسنان)
والله عمو ابويه ماموجود بسلمان باك ... راح بشغله
سعاد: شلونك عمه ... لو صايحين وليد ماطولكم ملمومين
سلوان : الحمد لله ... مريت عليه الصبح جان طالع ... هسه ما ادري بي رجع بعده ... خلي اكوم اتصل عليه
الو شلونك يابه
ياسر: الو .... هلو بابا
سلوان : يابه متجون انت وأبو خالد ب بيت عمي معن ... نتغدا سوا
ياسر : بالعافيه ... احنه تغدينا
التفتت
مريومه جدو .... شوفي وليد يجي ويايه نروح لبيت عمج
رجعت لسلوان ... جدو انتو أتغدوا ... اني شويه واجي ... ان شاء الله
سلوان : ان شاء الله لعد ننتظركم
مريم : من التفت عليه جدي گلي صيحي
(جنت قبلها ضاربه صفنه بالكلام الي گاله وليد على الغدا
انغثيت منه ... )
صعدت ... لگيته كاعد يقلب .... بألبوم صوره ايام الكليه
التفت عليه من دخلت ورجع يتفرج على الصور .
جدو يگول تروح ويا لبيت عمي معن ... الولد هناك ينتظروكم
وليد: انزلي گليله ... هسه اجي ...
مريم : شوف ترى اني ما مجبوره اتحمل كلامك الي حجيته جوه على الغدا ... مال بعد متكدر ترجع ... من متريدني شكو مبقيني
هسه ارجع يم اهلي ... وكل واحد يروح لحال سبيله
وليد: بداخلي اريد ابتسم لان شكد احبها من تكون طبيعيه احبها اضعاف من تصير عصبيه وكلامي يأثر بيها ... تجيني حاله اريد اروح احضنها مثل الطفل من يصالحوا ...
بس اعرف هالمره السالفه تحتاج تأديب ...
التفتت عليها ... جان رجعتج لو وحدج بس بعد مترهم ... وهذا النايم
ما اكدر افارگه ...وشغله ثانيه قلبتها للسالفه شفت نفسي مستفاد منج بسالفة الراتب ... بالممثليه بسويسرا ينطوني عليج وعلى ابنج راتب ...
يعني كم سنه ... اجمع الرواتب ....اصمد خوش فلوس وراها
اجدد اعوض ايام المغثه ...
مريم : يعني تقصد تزوج ... ازوج ولا يهمني ... اصلا وقتها ما ابقى وياك دقيقه ... تزوج منا اطلگني منا ....
وبعد هذا كلامك ... لو اشوفك بعيني ويا وحده ما اهتم
لان فهمت ... علاقتنا شلون صايره ... ووين واصله ... اني هم مجبوره ابقى وياك علمود ابني ...
وليد: ابتسمت ...الله يريح قلبج سهلتيها عليه واني صارلي فتره
حاير بموضوع ... وخايف على مشاعرج ...
بعد انطيتيني الموافقه بلسانج ... راح اخذ راحتي بعد ....
مريم : نزل وعافني ... مسطوره بكلامه واي حجايه يقصد الي حجيتها ... وبشنو يأخذ راحته ... ويا موضوع الي حاير بي ...
بقيت اكل بروحي ... اخاف هذا عنده وحده ... ماكو غير معنى لكلامه ...
وليد: نزلت ما لكيت جدي ... صحت يمه وين جدي
محاسن : راح بيبي قبلك من شاف مريومه ما ردتله خبر ... طلع
وليد: يله اني رايح ....
دكيت باب اهلي .. فتحلي سلوان ثكلت وجهي عليه ودخلت بدون ما اسلم عليه ...
سلوان : يا غراب ... متعرف تسلم
وليد: من تصير رجال اسلم عليك
سلوان : ابتسمت ليش تخليني اشبعك كتل واشوفك منو الرجال بينا
يا غراب... اليوم اروح للحمام تجي ويايه
وليد: شوكت ...
سلوان : المغرب ....
وليد: خليها على باجر ... تعال فوت واكعد بصفي اريد اطيح حظك
دخلنا ... الله بالخير ... ردوا السلام
كعدت بصف سلوان ....
سلوان : همست ... احجي شعندك
وليد: بصوت ناصي ... لك انت متستحي ... ماعندك كلمه
شكو حجيت لمرتك وانت منبه عليه حتى لمرتي ما احجي ...
سلوان : يول فد يوم ... صارت مشكله بيناتنا ... وبقت ادردم
انت متفكر بيه وشكت عندي وحده ... گتلها على البيت حتى أأكدلها ماعندي شي ومن كمل البناء اخذتها تتفرج عليه ... والله نبهتها متحجي لامها ... طلعت حاجيه ... هددتها بس يوصل الخبر لجدي أتصرف تصرف ثاني وياها هسه تلگيها خابرت الحيه سولفتلها دتنبهها متحجي ...
وليد: يعني سويتلي مشكله ... وهاي نجاه محشيه دماغ مريم ...
عود اجيت ارتاح ... نغصت عليه ... الله يطيح حظك ...
سلوان : اعوضك ابو خالد ... بس انت شويه سلم نفسك للشيطان
وليد: خلي الشيطان الك اني رجال ... احب الحلال نفسي ما تتقبل غير مرتي
لك انت شلون تتقبل وحده يوميه ويا واحد ...
سلوان : ابتسمت غير اني مثل نمونتها هم يوميه ويا وحده ... هسه لا تصير واعظ براسي ... تجي لو لا
وليد: ضحكت اي صح انت هم قذر مثلهن ..... لا ما اجي ... ما احب هاي الكعدات بلكت فد يوم يكبسوكم الأمن ... وتنفضح
عاد ربك يمهل ولا يهمل
سلوان : الله يطيح حظك ... عرضتلي ... اني مجربك غراب ... بس تحجي تصير مصيبه ... ما اروح ... بس امشي
نطلع نتعشا برا ويا الولد ...
وليد: اذا ويا الولد اروح .... صحت بصوت عالي عذراء ...صبيلي جاي
عذراء: شو مجبت مريومه وجركايه وياك .... هاك الجاي
وليد: عفته نايم اليوم يركص عَلِينا بالليل مراح ينام هسه شبع نوم ... عود اخذو بيتوا يمكم ...
سعاد : اتصلي على مريومه شوفي كعد حتى تروحين أجيبي ...
عذراء: لا راح اروح ... يمهم ... ومن ارجع اجيبه ويايه

امال : عمه ...سلوان بعده بيت عمه ...
هويده : والله ما ادري بي ... هو اني اعرف وين يروح وين يجي ... لو ما سنان يتصل ويگول راح نتغدا ... ببيت عمي معن
جان .. لهسه مندري سلوان وين
أمال: انتو صايره بينكم مشكله ... ؟؟ وبسببها طلع ....
هويده : والله عمه اني سلوان تعبت منه ... ومن تصرفاته وحياتي ويا ... نسوان وشرب وسهر ....
أمال: ميخالف عمه. اتحملي ... لخاطر بناتج ... اني مثلج اتحملت عمج لخاطرهم ...
انت اشوفي سئ بس لو شايفه سوالف عمج جان شفتي سلوان يمه ..لاشئ
عذراء: يا اهل البيت وينكم .... بابكم مفتوح
يوم وينج .... افتريت بالبيت ماكو احد .... صعدت لغرفه مريم دكيت الباب مريومه وينج
مريم : تعالي عذوره ...
عذراء: فتحت الباب ودخلت لعد بيبيتي وين
مريم : راحت لجيرانه مريضه تشوفها شلون صارت ...
عذراء: بوست مريومه ... شلونكم .... يمه حبيب عمته ... مورم
شبعان نوم اليوم ابوك ... طردك گال بيتوا يمكم
مريم : الحمد لله .... والله قبل شويه عبالي امرلكم همزين انت اجيتي ... عاد اخوج لو بيده حتى اني هم يطردني
عذراء: احجي شصاير بينكم ....
مريم : ما ادري عذراء.... متغير عليه ... عمي بسويسرا
وضعه احسن ... اليوم گام يحجيلي ... بالزواج
عذراء: هههههه شكلها السالفه بينكم جبيره .... الي كاعد يقهرج بسالفه الزواج ... يبطه ماكو غيرج بقلبه ....
كلها تدري يموت عليج بس هو يضوجج ... تدرين امي تگول ( لو وليد ماخذ غير مريم ... واشوفه هيج يحبها جان اغار واصير عليها عمه بس مريومه تستاهل هالحب ... لان حبابه وبس هي تتحمله )ماكو مثل الام تعرف ابنها وشنو بقلبه ...
بس هذا يريد يضوجج انت هم ضوجي مثل ايام قبل شلون جنتي تخلي ... يفقد اعصابه من الغيره ...اتذكري فد سالفه .... وغيضي بيها ....
مريم : قبل اللبس ملابس قصيره واطلع ويا اهلي يتخبل ... هسه محجبه وملابسي طويله محد يشوفني غيره وحتى طلعه ما اطلع الا هو ويايه
بيش اغيضه ...
عذراء: لعد اسكتي مريومه ... وكلشي لاتسووين اخاف نصيحتي تنگلب ضدج ....بس شوفي شنو  الخلل الصاير  بينكم ... وشنو سبب المشكله وعالجي ...
لاتصيرين مثل هويده مدير بال ... هسه من فات الوكت بدت تذمر من وضع سلوان ... شكد نصحناها قبل ما اخذت نصيحه ....
مريم : ادري لعد اني ليش اخاف ... من يجيبلي موضوع زواج
لو سوالف النسوان ... يكوم الفار يلعب بعبي اكول اخاف صدك عنده شي
عذراء: لا ماعنده ... لاتخافين شو اتخيله مثل ابويه .... باله مو يم هالسوالف
مريم : شفايتلي يطلع مثل عمي معن ... ويرتاح قلبي ... من الشك والتفكير ...
عذراء: انت لان تحبي تغارين عليه .... وهو لگاها سالفه يضوجج بيها فينغزج بسالفه زواج ... لو يتقصد يجيبلج سيره فلانه ...
اه يا مريومه .... دارت الدنيا ... شلون جنتي مدوخته هسه هو مدوخج ....
مريم : دخل وليد....
وليد: شو عايفين امي وحدها جوه .... وانتن فوگ
عذراء: لا فتت ما لگيتها كالت مريومه يم الجيران .... خلي انزل
اسلم عليها
مريم : اجي وگف يمي ... لازگ رجله برجلي اخذ خالد ...
شمره بالهوا ...بقى يلعبه ... من رادت تنزل عذراء... صاحها
وليد: اليوم مريم وخالد ... يباتون يمكم .... اني ارجع متأخر ...
اريد انام ...وهذا شبع نوم هسه
مريم : والله الغرفه غرفتي ... تريد تشبع نوم روح يم اهلك
بات يمهم ... اني وابني انام بفراشنا ....
عذراء...عبرت عن ضحكتها بأبتسامه ....
وليد: اي افضل اني هم عندي ... تلفون بليل ... ما اريد صوت
هاج خالد ...
مريم : رجعلي خالد ... طلعت عذراء ...راح للكنتور ... فتحه بقى صافن شويه ... يختار
طلع ملابس عرفته راح يطلع ...
بالاول ردت انفجر ... بس گلت كافي تسرع .... خلي اتبع نفس الاسلوب الي يتبعه ويايه
اخذت ابني ... وصلت قريب عليه ... نام بالغرفه انت .... اني
راح اخذ خالد وابات يم اهلي ... التفت عليه رافع حاجبه
وليد: هالمره ان شاء الله وين توصلنا امج ... يم القاضي ...
مريم : تلفوناتك هم توصلنا يم القاضي ....
يتبع