رواية حكايات من بيت جدي الفصل الحادي والثلاثون 31 - بقلم مريم اماسي الليل

#حكايات_من_بيت_جدي
الجزءالواحد والثلاثين ................
اماسي الليل
حقوق النشر محفوظه
عذراء: لاول مره ادخل محاضره ميكون بالي يم الشرح
صح نظري يم الاستاذ واحاول اركز بكلامه لكن ركزت بقميصه الخطط بنيلي وبنطرونه البيج وشعره المسحوب للخلف لان خفيف خليت ايدي على خدي احجي ويا نفسي شنو هالعشوائيه يا عذراء اول تالي انت ادققين بتفاصيل ملابس استاذ لو بتسريحه شعره ،اتفاجئت اني صارلي كم سنه ادرس ما بيوم انتبهت على هيج تفاصيل شنو الي صايرلي التفتت على الطلاب والطالبات الي بالقاعه احس هاي اول مره انتبه واركز بيهم بتفاصيل معقوله جان حبي لسنان مسوي غشاوه على عيني وقلبي لدرجه عايشه بالدنيا وما احس بيها ولا بلي بيها احتمال مشاعر تمار خلت هالغشاوه تنزاح ويجي يوم يزيح حب سنان من قلبي ويحتل مكانه ياربي انت اعلم بصالح الامر وكلتك امري ،من خلصت المحاضر عرفت الاستاذ جان ماخذ باله مني ما منتبهه من ديطلع طلب يشوفني رحت ورا بالممر
استاذ يحيى : ان شاء الله ما عندج مشكله بنتي
عذراء: لا الحمد لله ليش دكتور
دكتوريحيى : لان هاي اول مره صار كم سنه ادرسج انتبه عليج سارحه وبالج مو يم المحاضره اتمنى تبقين على نفس المستوى .
عذراء: اعتذر يمكن لان عندي صداع مكدرت اركز ، ان شاء الله انتبه شكرا دكتور
دكتور يحيى : اني اعتبرج بنتي واتمنى اشوفج من الاوائل مثل كل سنه
عذراء: ان شاء الله اوعدك ما اخيب ظنك وصلت مسافه انتبهت تمار واگف على صفحه  ابتسم .
تمار: بعد تطلعين من المحاضره تلگيني متنتظرج
عذراء: لا اليوم من وراك اخذت تنبيه .
تمار: عكدت حاجبي بأستغراب ليش
عذراء: سرحانه بكلامك ما انتبهت على المحاضره دكتور يحيى نبهني .
تمار: ههههه فرحتيني والله يعني بديت اشغل بالج .
عذراء: ابتسمت صار بيها تنبيه وغرور راح ارجع وياك بكلمتي .
تمار: لا ماكو تراجع الاتفاق هو الاتفاق، يله كملي انتِ وعرفيني عن نفسج .
عذراء: بهاليوم عرفته عن اغلب امور حياتي من عائله الى اطباع
سنان : حبيبتي  اذا تريدين اوديج باتي يم اهلج ماطول اني ما موجود عندي خفاره
شهد: اي افضل  حتى التهي وياهم هاي شغلة الخفارهماخذتك مني .
سنان: والله من الصبح لهسه اني على وگفه وحده صدگ حبيبتي جبت دوا لهويده عود انطيهياه .
شهد: وينه خلي اللبس حجابي واودي اخاف سلوان رجع هسه دكيت باب الغرفه
هويده : فتحت الباب شهد .
شهد: هذا الدوا جابه سنان يگول بعد لاتاخذ القديم ،جربي  هذا بلكت ترتاحين عليه
هويده: شكرا تعبتكم ويايه
شهد: ادللي ماكو اي تعب رجعت للغرفه لكيت سنان نايم اجتني فكره اسويها جبت ورقه صغيره وكتبت بيها وخليتها بمحفظته شفت ملامح التعب على وجهه بحيث متمدد وساند وجهه وخده على ايده وغافي كعدته سنان عدل نومتك قلبي .
سنان: تعالي نامي على ايدي حتى نكعد العصر اوديج واروح .
سلوان : اول ما رجعت للبيت صعدت للغرفه ماكو هويده
طلعت تلگتني راجعه من الحمام ووجهه مبين  تعبان بيها شي
هويده: هلو شوكت اجيت .
سلوان:هسه دخلت  ،من طلعت لحد هسه انت على هالحاله ؟
هويده : لا مجان بيه شي بس هسه لان اتغديت معدتي متحملت الاكل
سلوان : اليوم سألت گلولي بهاي حالتها تاخذ مغذي .ماطول متكدر تاكل اي شي .
هويده : هسه جابلي سنان غير دوا خلي اجربه بلكت ايفيدني
سلوان : فوتي ارتاحي بس اسبح واجي اتمدد بصفج
هويده : انزل اصبلك غده
سلوان : لا ما اشتهي اكلت لفه اذا اريد اخلي مريومه تصبلي
سبحت ورجعت للغرفه لگيتها نايمه تمددت بصفها جانبيا ومسند راسي على ايدي اتمعن بملامحها مرتي حلوه والله يا بت عمي شكلي بديت احبج هالمره صدك مو شغلة اقنع نفسي بدليل بقيت طول الوقت بالدوام افكر بيج)
تحركت ونمت على ظهري وايدي جوه راسي غمضت عيني يمكن لان شايله ابني ببطنها ولان راح تنطيني شي اني جنت متمني، واني الي لحيت عليها حتى نسوي طفل وهي لخاطري قبلت ودتتحمل كل هالتعب يعني لو ما تحبني وتريد ترضيني مجان وافقت تحمل وتأجل هالسنه حسيت بأيدها صارت على صدري فتحت عيني
هويده : بشنو دتفكر .
سلوان : ابتسمت شلون عرفتي جنت افكر
هويده : لان بالاول جنت صافن بوجهي مجنت نايمه بس دايخه فمن اغمض عيني تخف حاله الغثيان فتحت عيني من حسيت بيك اتحركت عرفتك كاعد ولان مغمض فهمت دتفكر
سلوان : طلعتي حافظتني هدهد
هويده : انت رجلي صارلك بالسنتين لكن ابن عمي صارلك سنين وعايش ويايه يعني حافظة اطباعك
سلوان : رجعت على جنبي الحمل واكعلج هدهد  صايره احلى
هويده : خلى گف ايده على جانب وجهي سلوان انت من يوم الي گتلك ما اتحمل ريحه الشرب بطلت .
سلوان : وداعت الي ببطنج مشارب من يوم الي رجعت بليل وشفتج متحملتي ركضتي للحمام بعد ما شربت مو دشوفيني يوميه مكابلج من ارجع من الشغل مدا اسهر
هويده: قصدت يعني اني منتبهه على تصرفاتك وادري مدتشرب ما قصدت اسأل او اشكك بيك انت من يوم الي عرفت بيه حامل احسك تغيرت للاحسن ..
سلوان : ليش هويده اني جنت مقصر وياج بشي حتى تحسين بيه اتغيرت للاحسن
هويده : لا مامقصر بس اكو شي جنت احس بي هسه تغيرت فكرتي ( من اتزوج سنان وشفت حبه لمرته صار عندي شك قلب سلوان مو الي اكو بي وحده ثانيه هالتفكير جان يخليني اتعامل وياه ببرود حتى مشاعري اتحكم بيها اتمسكت بأسلوب وروتين حياتي من جنت بنيه ما ردت اتغير لخاطره وهو ماخذني مجرد زوجه بالاسم )
سلوان : شنو الي چنتي اتحسي
هويده : جنت احس قلبك مو ويايه صح توصلي الي بداخلك بالكلام لكن من اتزوج سنان اتأكدت احساسي صح افعالك غير كلامك النظره الي اشوفها بعينك من تتوددلي نظره اعجاب و رغبه مو حب مو مثل نظره سنان لشهد .
سلوان : يعني لو ما احبج اخذج ليش اكثر من مره تقارنين بيني وبين سنان هو اخويه كل واحد من عدنا يختلف بأطباعه بتصرفاته يعني مو لازم اني اعبرلج بنفس الطريقه الي هو يعبر بيها لشهد ولا لازم حياتنا تشبه حياتهم  لان لا انت شهد ولا اني سنان وكافي مقارنات لخاطر الله ترى هالمرضوع ديغثني كل كلمه احجيها و كل تصرف جبتيلي سيره سنان وشهد اكو يوم اني قارنتج بشهد .
هويده : لان سنان عاطفي اكثر منك يعني اني بت عمه منتبه على وضعي اكثر منك وتذكرني  اليوم جابلي الدوا
سلوان : غمضت عيني  بتعجب ! سنان منتبه على وضعج اكثر مني  ؟
صح منتبه بس اني وصيته على الدوا بعد ما شرحتله وضعج وسألته على دوا بديل يخفف الحاله واني الي گتله اذا متكدر اجيبه لان عنده خفاره امر عليك اخذه گلي لا اني امر الظهر اجيبه ويايه
يعني انت لازم تفكرين هو افضل مني واني الموزين والي مقصر وياج
هويده : ما ادري بيك انت الي موصي عبالي هو من كيفه .
سلوان : سدي الموضوع وهاي اخر مره تستعملين ويايه اسلوب المقارنه انطيتها ظهري ونمت .
هويده : اهو سلوان ابتلي  احجي وياك كلمه زعلت
سلوان : لان هالاسلوب مستفز يمكن لو اقارنج بفلانه وعلانه جان فهمتي شنو مغثته ما اريد اسمع كلمه اريد انام
سنان : يله شهوده خلصتي دنطلع
شهد: خلصت قلبي يله من وصلني لبيت اهلي دخل سلم وطلع بسرعة طلعت اودعه من ركب بالسياره ،ناديته سنان اكو شي بالمحفظه بليل شوفه (ابتسم ).
سنان: ماشي حبيبتي
ما اتحملت ابقى لتالي الليل  اول ما وگفت السياره بكراج المستشفى طلعت المحفظه ... لگيت. ورقه صغيره مال ملاحظات
لونها وردي ...
فتحتها ... الله لا يحرمني منك ولا من حضنك وضحكتك
ابتسمت ... اتمنيت اشغل السياره وارجعلها اخذها للبيت
ونبقى سوا طول الوقت
هالبنيه خلتني احس نفسي محظوظ بيها
بعد ايام
وليد: حضرت اموري وجنطتي وطلعت العصر لبيت جدي اسلم عليهم
وصلت للبيت فتحلي الباب ميثم
ميثم : شلونك ابو خالد ..
وليد: الحمد لله جدي وين دا اسلم عليه باجر اني مسافر
شوفه يستقبلني
ميثم : هاي شبيك دفوت وانت روحله .
وليد: لا اخذلي الاذن منه بالاول اخاف يسمعني حجايه
ميثم : براحتك دخلت للهول الكل كاعدين ،وليد بالحديقه يريد يدخل يسلم عليك يابه
ياسر : لا اريده يسلم عليه ولا يودعني ولا اودعه .
محاسن : يارجال شبيك ويا الولد بله الي يشوفك هيج تعامله مو يگول
هذا مسوي مكسوره وطارده خطيه باجر يسافر لاتكسر بخاطره لخاطري
ياسر : بعيطه محاسن بدون حجي زايد ...
مريم : گامت بيبيتي وعمتي سعاد طلعوا للكراج يشوفون وليدوجدي دخل لغرفته
من شفت وليد ما دخل وكلهم طلعوا طلعت لگيت بيبي تتوسل بي يدخل رفض
وليد: خلص يمه خليني اسافر بدون ميصير بيني وبين جدي سوء فهم
اني ادري اذا افوت راح يسمعني حجي ما اريد اسمعه انتِ وصليله سلامي همستلها بلغي عن لساني (الامانه الي عندك الي اذا تنطيها لغيري
اتأذيني واذا تحس اني غلطت بحقك ماعندي مانع اعتذر وابوس ايدك
كدام الكل هاي دنيا ما اريدك تبقى غضبان عليه )
مريم : بيبيتي گامت تبچي من ديحجي بأذنها على صفحه  وهو حضنهاوقَبل راسها بعدها سلم على عمي معن وعمتي سعاد والكل اني جنت مودعته من الصبح مرلي للكليه لان يعرف ميكدر يحجي ويايه كدامهم لكم من حضن عذراء واني بصفها جرني من عكسي وقَبل راسي كدامهم همسلي بصوت ناصي بس عذراء تسمع يا علة قلبي روحي باقيه يمج التفتسلم على هويده هم باسها من راسها   وسألها على سلوان .
هويده : هسه على جيه من الظهر قبل لا يطلع وصاني (اذا يجي وليد خلي ينتظرني ) 
معن: بابا انتبه على نفسك وعلى صحتك لاتخلي بالنا يمك وانطي علم لواحد من الي وياك بحاله الربو مالتك كلشي يصير حتى يعرف يساعدك اخاف تتمرض وتتأزم حالتك لان سويسرا بارده
سعاد: اي حبيبي ماما مو تبقي بالي وكل متكدر اتصل طمني عنك .
ها عذوره جيبي الكليجه نسيناها خلي يخليها بالسياره
ميثم : جيبيها اني اخليها وين المفتاح
وليد: هاك ها مريومه اصعدي جيبيلي شكم رباط بالكنتور احتاجهن
مريم : صعدت جبتله الاربطه ونزلت صارت امي بوجهي طلعت من الغرفه
نجاة : منو اجى
مريم : وليد ديودعنا طيارته الفجر
نجاة : الله وياه .
مريم : ادري بأمي متحبه وحسيتها فرحانه راح يسافر، طلعت لكيتهم كلهم كاعدين بالحديقه يمه يوصون بي وبيبي وعمه سعاد مقهورات يمكن حسيت بيبيتي اكثر لان مهظومه ودموعها ما وگفت وهو يطيب خاطرها ويحاول يضحكها ،طلعت امي كعدت بصف عممه أمال شكد اكو فرق بيناتهم عمه أمال جانت مقهوره وكل شويه تدعيله يروح ويرجع بالسلامه لو الله يحفظه لكن امي فرحانه حتى شفته هو هم منتبه عليها
نحاه : شكو دتبچين يا عمه هو منو لاگيها يروح لسويسرا والله اني لو منه ولا ارجع
وليد: بقلبي انت تكيفين ما ارجع، ليش عمه اني رايح سياحه وما ارجع اني رايح شغل كم شهر وراجع ان شاء الله
ومراح اخليكم تشتاقولي متشوفوني الا داخل عليكم فجأه لان الشغله سهله الي يصير عنده طارئ يكدر ياخذ اجازه ويرجع كم يوم  للعراق
بقلبي يعني لاتأمنين عبالج اذا اروح ما اكدر ارجعلج .
مريم : ابتسمت لان عرفته ديبسمر امي وحتى ينطيها علم شوكت ميريد يكدر يجي يعني لاتفرحين حتى بيبيتي فهمت
محاسن : بيبي حبيبي تروح وترجع بالسلامه راح ابقى اتاني جيتك
وافرح بشوفتك حبيب قلبي ان شاء الله بس تخلص شغلك وترجع ازوجك
اتقصدت اباوع على مريومه حتى افهم امها
وليد: ان شاء الله بقيت انتظر سلوان ومريمتي گبالي احجي وياها بالنظرات ...
دخل سلوان بقيت ويا بالساعة بالحديقه ، و وصيته على مريم  لان عنده علم مسبق بموضوع معتصم وعمتي نجاة بلغته بس يعرف او يسمع شي ينطيني خبر ،ودعت الكل لكن بقت حسره بقلبي اشوف جدي قبل ما اسافر جان عندي احساس قفلته هاي شايل بقلبه مني وحاس اني غلطان بحقه يمكن لان گتله متنطيها تبقيها يمك ما اتقبل الحجايه واعتبرها مثل الي تحديته
ما خايف من احد بكد ما خايف من مريم لان ادري بيها جبانه ومتكدر توگف بوجه جدي ، اعرف اذا تقدملها احد وسألها راح تگله بكيفك جدو
وراها طلعنا اني وسلوان ما رجعت لبيت بيبيتي الا ورا١٢:٠٠بليل اول ما دخلت لكيت بيبيتي ام أمي( فوزيه )كاعده على السجاده تصلي صلاة الليل بالهول كعدت على القنفه انتظرها تكمل وتبدي تدعي جان بالي اخليها تدعيلي من سلمت التفتت عليه
فوزيه : ها بيبي شو بطيت بقى بالي مو وراك سفر غير ترجع من وكت حتى تنام وترتاح
وليد: والله يمه رحت سلمت على الولد جماعتي وبقيت ويا سلوان .
يمه راح تبدين تدعين مو تنسين تدعيلي مريم بت نجاة تصير من نصيبي
فوزيه : الله كريم بيبي كلشي قسمه ونصيب هاي متجي بالدعاء هاي كتبت ربك من يوم الي يخلقك ويخلقها  مقدر هي المن وانت منو ألك ان شاء الله تكون هي ألك ...
وليد: ميخالف انت ادعيلي اني افتهم هي قسمه اخذيني على كد عقلي وريحيني .
فوزيه : ابتسمت ان شاء الله يا مريم بت نجاة تصيرين من قسمة وليد ابن سعاد بحول الله وبقوته .
وليد: هسه ريحتيني بوستها من راسها يمن راح انام ك مو تنسين تكعديني اعتمد عليج .
فوزيه : روح بيبي ارتاح اني اكعدك ان شاء الله .
وليد: نمت وكعدت على صوت بيبيتي لكن اسمع اصوات يسولفون بالهول
فوزيه : گوم بيبي يله بدل اجوي ابوك وامك واختك يوصلوك
وليد: ها هلو ليش بابا اجيت وتعبت نفسك .
معن: والله بابا لا اني ولا امك ولا اختك كدرنا ما نوصلك ونبقى وياك الى ان نودعك
سعاد: يله حبيبي بدل بين ما اسويلك ريوك ...
وليد: لا كلشي ما اريد ابدل ونطلع بدلت وودعت بيت بيبيتي طلعنا ركبت بصف عذراء
عذراء : اليوم بيبيتك سوت ثوره وراك
وليد: ليش شكو
عذراء: من انت رحت سمعناها بالغرفه تحجي على جدي گلتله
(انت تدري بيه شكد احبه جان حتى لو مو لخاطره لخاطري خليت الولد يسافر ومهظوم منك شنو هالقسوه الي عندك شلون ينطيك قلبك الولد رايح بطريق سفر وانت مقبلت يسلم عليك
بله قلبك ما وجعك بعد الرساله الي وصلتها الك عن لسانه ..بله ما انقهرت عليه من گلك ما اريدك تبقى غضبان عليه
جاوبها كافي سدي الموضوع راح الله يسهله بعد لاتبقين اتزنين براسي
منشوف الا بيبيتي گلتله اخذ راحتك راح اصعد انام فوك بغرفته حتى
لا ادوخك ههههه وجدي يگلها محاسن شبيج تخبلتي تجاوبه اي تخبلت انت خبلتني صارلي عمر متحمله مزاجيتك يزي بزعت هو يگلها استحي على شيباتج زعلانه حالج حال الحديثات
هي سمعت هيج تخبلت گلتله اي گول هيج صرت عجوز بعد مو بعينك صاير تحجي بالحديثات دبقى وحدك بالغرفه صعدت زعلانه نامت بغرفتك وهو خطيه ورا نص ساعة طلع يدور عليها من عرف صاعده فوگ ونايمه تخبل گام يدردم )
وليد: ههههههه لعد اني الله محببني بيها من بلاش ادري بيها تحبني
بس والله خطيه بيبيتي قهرتيني عليها وله جدي لا يستاهل بلكت يحس بحالي
من تبتعد عنه بيبيتي شويه تلوع قلبه هالشايب مرمرني من ترجعين
بوسي من راسه وايده هو وبيبيتي گليلهم هاي من وليد بلكت قلبه يحن
ومتكبر المشكله بينهم من ورايه
عذراء: ان شاء الله
جان اخر لحظه للوداع  وهو واگف على صفحه ويا الولد جماعته بالوزاره
اجى سلم علينا ووصى ابويه يحجي ويا جدي اذا تقدم احد لمريم
تركنا واحس قلبه ويانا ا وبالاحرى ويا مريمته الي گضتها تكت دموع