رواية حكايات من بيت جدي الفصل الثاني والثلاثون 32 - بقلم مريم اماسي الليل

#حكايات_من_بيت_جدي
الجزء الثاني والثلاثين
اماسي الليل
حقوق النشر محفوظه
مريم : من يوم الي سافر احس غابت شمس حياتي ...
بنفس اليوم الي بيبيتي نامت بغرفته زعلانه اتحججت انام يمها جبت فراش وفرشته بالكاع مجرد احساس اني بغرفته واتنفس من نفس الهوا الي يتنفسه بيها يخليني اشعر براحه كل قطعه تاركها وراه تخليني احس بوجوده
بهالمكان طول فتره زعل بيبيتي ونومها بهالغرفه جانت الي حجه حتى ابقى انام بيها
الى يوم مجتمعين كلنا على السفره جان جدي واصل مرحله الاشتياق لبيبيتي لان زعلانه منه وبس تلتقي
ويا وكت الاكل على السفره بدون ما تنطق ولا كلمه الثوره الي بداخله رادت تحرك مشاعرها حتى يتصالحون وترجع لغرفتها اتذكر قبل ما نصب  الغده اجى عليها للمطبخ جنت اني وياها وعمه أمال .
ياسر : محاسن تعالي رايدج بحجايه
محاسن : گول ابو معن ذني بنياتك ماكو احد غريب
مريم : شفته ابتسم متفاجئ بزعلها وبعدها قافله عليه
ياسر: اي هم صدك كلهن بنياتي لعد ماطول هيج اجيت اگلج اذا ما رجعتي لغرفتج من باجر اروح اتزوج .
محاسن : اي تسويها هو الي قلبه ما يرف على وليده راح يرف على محاسن روح اتزوج منو لازمتك بس لا عبالك تزوجها بغرفتي .
ياسر: اذا على الغرف خير من الله البيت واسع كلش كلش ابنيلها مكان وحدها حتى تاخذ راحتها .
مريم : شفت عمه أمال تضحك بأبتسامه مكتومه
محاسن : أمال صبي الغده عمه عمج من يجوع  يدور مشاكل
ياسر : عمو صبي الغده حتى دا اتفق ويا ولدي نروح نخطبها للي بالي
مريم : ورا ماخلصنا اكل
ياسر : ماطول الكل ملتم اني  رجال بعدني بصحتي احتاج مره اداريني وتونس وحدتي حضروا نفسكم راح اخطب ( الوجوه كلها بقت باهته مو مفتهمه السالفه )
محاسن : ها ردتها من الله اصعد فوگ حتى تلگالك حجه مو اني قلبي لعب منك من جبت سيره الحديثات اثاريك مخلي عينك على وحده روحوا يمه اخطبوله وانتوا بيبي عيب عود نادوا لمرت جدكم بيبي وانتن عمه شوفوا لعمكم نوعيه صبغ زينه ولو هو الشايب حتى لو صبغ شعره يبقى شايب .
ياسر: الشباب شباب الروح والرجال مايعيبه  بس جيبه
واني الحمد لله جيبي عمران ام معن بس حگ العشره اخليج انتِ تختاريها على ذوقج
عذراء: گام من الاكل وجان اسلوبه جدي معرفنا ديشاقى لو صدك يحجي
بس بيبيتي اخذتها رجلها وقلبها المحروگ وراحتله للغرفه
محاسن : وعزه الله اذا دخلت وحده للبيت يا ياسر اني ما ابقى دقيقه وحده بي .
ياسر: انت مو زعلانه شعندج اجيتي ورايه .
محاسن : هاي غرفتي انت تصعد تنام فوگ وعود شوف روحك بالمرايه اخاف ما شايف الشيب التارس راسك واخاف ناسي حفيدتك وحفيدك بعد كم شهر يجيبولك حفيد.
ياسر: البيت بيتي بكل متر منه وهاي غرفتي تريدين ترجعين لغرفتج هلا بيج ما تريدين  النسوان تارسه الدنيا
باجر اتزوج ثانيا ما شفتي شيباتج بالمرايه الي تحجين عنهن ما استحيتي كدام جناينج زعلانه ونايمه فوگ گولي لروحج راح يجي حفيد بعد كم شهر
محاسن : يمه منك گضيت عمري العالم عبالها احل واربط ميدرون بيك الي براسك براسك الولد من ما راد مريم اول مره لان سمعها مره تحجي لاختها
(لان جدي ما ينطينا ا لغريب اني وافقت على وليد لان ادري بجدي
من احنه صغار مسمينا واحد للثاني وله اني ما اريده )  الولد ما هانت عليه كرامته يشوف بت عمهماتريده نزل عليك جانت زغيره ومتعرف مصلحتها تالي من كبروا وعرفوا واحد رايد الثاني رجعلها گومت الدنيا وماكعدتها مرمرته للولد تالي هج من وراك حتى وانت ظالمه ما هان عليه ما يجي يسلم عليك تالي ترجعه مكسور الخاطر وتدري ورا سفر لاخر الدنيا
ما رف قلبك عليه حتى بعد ما دز اخته تقَبلك  من ايدك وراسك بالنيابه عنه شنو هالظلم ... ( عگد حاجبه )
ياسر: واني اخر من يعلم انت وحفيدج تشتغلون من راسكم وفوگاها عندج عين وتحاججيني وطلعت البنيه ما رايدته زين من گلتيلي اخاف عبالج بكلامج هذا كحلتيها
عميتيها بالزايد لان العذر اقبح من الصوج وتدرين بيه الي يغلط ياخذ جزاته عندي وجزاته ما انطي مريم دا اخليج واخلي عبره للي يصرف من راسه بدون علمي ،وحق الله اذا ما رجعتي لليل للغرفه واتعوذتي من الشيطان
ما يبقى عليه شارب اذا ما اتزوجت عليج ،انام واكعد الگاج منزله ملابسج ومرجعتها للكنتور وتالي الليل تنامين بغرفتج .
مريم : طلعت بيبيتي والكل بقى بالمطبخ يريد يفتهمون شنو الي صاير
محاسن : ماكو شي هاي متعرفوا يگب من ضايج
سعد: ادري يمه هسه هو هذا موضوع يستاهل انت اسويلج مشكله عليه صلي على النبي .
مريم : حسيت ابويه ميريد يوضح اكثر رفضه لطلب وليد لان عمي معن گاعد .
معن: يعني والله دا اتعجب من موقف ابويه ادري هو مو ابني المفروض يعزه من معزتي شنو الي بدر منه والكل صاير ضده
قيصر : معن سعد مو وكتها هالحجي بعدين نكعد وحدنا نحجي امشوا بالصاله .
عذراء: طلعوا ابويه وعمامي للصاله وما عرفنا شنو دار بيناتهم لكن شفت بيبيتي تبسمر بالحجي عرفت دتقصد  بي عمتي نجاه
محاسن : هاي تالي تصيرلنا مشاكل من ورا النسوان والزن بروس الزلم
أمال : يله ماما گوموا ( سلوان وميثم ) وانتن عمه ( مريم وعذراء) اصعدن للغرفه خلي الحجي للكبار
سلوان : يعني الاولى ابن العم ياخذ بت عمه لو الافضل تنطوها للغريب شو انتو كلشي عدكم صاير بالعكس ،گوم ميثم وانتن يله كلها تصعد اخاف نبقى نسمع حجي  الكبار تالي نتخارب بيناتنا
مريم : سنان وشهد صعدوا قبل مترجع بيبيتي من يم جدي عرفت ميريد مرته تطلع على مشاكل العائله صعدنا اني ووسلوان وميثم وهويده وعذراء وسلوان يدردم على الكبار بقيت اريد اسمع شنو الي ديصير ورا شويه صعدت بيبيتي شافتني گلتلي .
محاسن : نزلي بيبي ملابسي بالغرفه هذا جدج يريدله حجه وهاي امج عبالها تسوي نفسها كدامي متفتهم الحجي عليها خليها لو تنطبگ سما على الكاع ما اخليها تنطيج لاحد من اهلها اظاهر ما عرفتني زين .
مريم : بيبي عوفي الموضوع خلي جدي يهدأ لاتبقين  عصبيه وتالي يعاند بيج ويروح صدك ينطيني لاحد غريب
محاسن : لاتخافين بيبي هسه راح اسكت دا اشوف تاليها شلون ويا هالاثنين انوب ابوج هم طابگ ويا امج اني ادري بي من يومه وسبع ايامه امره بيد امج ،بس جنت اسكت لان اعرف جدج يحكمهم هسه كلها صايره عصابه متفقين على الولد ما اتسمى محاسن اذا خليت احد يحرگ قلبه انتِ الهماتصيرين  لغيره لو اعرف اكعدج گبالي بدون زواج ،انت اخاف فد يوم يسألج جدج مو ترتبكين گليله جدو هو ابن عمي احسن من الغريب واني ما الگى افضل منه يخاف عليه ويداريني فهمتي ولو ادري بيج جبانه ومابيج خير
مريم : والله بيبي اخاف واستحي منه انت احجيله
محاسن: اخ منج ما طلعتي صلفه على امج بس اللسانج يمي ويم هالولد الي سافر ودماغه يجيب ويودي .
مريم : للعصر جدي نادى  عمامي وابويه بالصاله وبقى يحجي بصوت عالي كلنا سمعنا وافتهمنا ديگلهم هذا الموضوع منتهي وبعد ما مسموح لاحد يحجي بي بيومها حقدت على امي جانت فرحانه ب كلام جدي واتوقع من يومها بدت تتفق وتخطط وعمي معن انقهر
ورا شهر ونص من سفر وليد كملوا البناء وانتقلنا كل واحد للمشتمل مالته من يومها عمي معن ماخذ على خاطره من البيت واهله زعلان من جدي لكن احترما اله يجي يوم الجمعه من نلتم على الغده كلنا بس متطلع منه ولا كلمه من  يخلص الاكل يروح لبيته .
بهالفتره صار بكل بيت خط ارضي اول ما سافر وليد لان كلنا گاعدين ببيت جدي يتصل على الرقم القديم مال البيت  واكثر المرات مجرد بس اجاوبه اسلم عليه وانطي التلفون لبيبيتي واهله لكن من انتقلنا كل واحد لبيته من يريد يتصل على اهله ينطي خبر لعذراء بفلان وقت اروح يمهم حتى اكدر احجي وياه ويسمع صوتي
وليد: اول يوم وصلت شكد ما جانت الدوله حلوه بس ما اتكيفت ويا الوضع من اول يوم حسيت بغربه ووحده اشتاقيت للبيت واهلي متعلم على اللمه على الولد والسوالف والضحك متعلم على سلوان ميفارگني حتى بالفتره الي كعدت بيها ببيت بيبيتي يوميه التقي بي ويوميه اشوف اهلي وحبيبتي
حياتي صارت اطلع للدوام الصبح ويا جماعتي وبعدها ارجع انام ونطلع العصر نفتر بكل مكان اروحله اتمنى هي ويايه ما ارتاحيت ولا يوم ،جان قلبي مقبوض احس راح اسمع خبريغثني  بقيت فتره قلق بالاخص من اتصل عليهم بالبيت احس اكو شي من كلام بيبيتي وتحاول اطمني بالحجي ومريومه ما اكدر اطول وياها اكثر من دقيقتين اذا طولت فخمس دقايق من يكون ماكو احد يمها، وتعرف  ما اكدر اطول لان المكالمه دوليه فتحولني احجي ويا اهلي وبيبيتي اول يوم وصلت اتصلت على البيت ما طلعتلي
لكن ثاني يوم اتصلت على نفس الوقت حسيتها جانت كاعده بصف التلفون لان بسرعه اجاني جواب الو
مريم : الو شلونك ولودي
وليد: يا روح ولودي هسه ارتاح قلبي يبطه بعدني هاي ثاني يوم واحس مشتاقلج عبالك صار سنه مشايفج
مريم : اني هم مشتاقه اشوفج الحمد لله لحگت اسمع صوتك البارحه بقيت گاعده يمهم من ديحجون وياك واطمئن عليك من كلامهم دير بالك على نفسك عرفت هناك الجو بارد ..
وليد: لاتخافين حبيبتي مريمتي كل ميصيرلج مجال انت جاوبي اني على الاغلب هيج وكت ادك ...
مريم : يله راح اصيحلك عمه سعاد
وليد: يله لان ما اكدر اطول بقيت فتره مجرد اسمع صوتها بذاك اليوم ارتاح حتى من اطلع ويا جماعتي نفسيتي غير شكل بعدها بفتره انتقلوا اهلي صرت اتصل احجي ويا اهلي وبيبيتي وراها اتفق ويا عذراء على وقت تروح اصيحها تبقى يمهم احجي وياها
مريم : اخاف نسيتني ابو خالد من شفت الاجنبيات

وليد: لا ما اكدر انساج ماعدهم بطه مثلج ماخذه عقلي وقلبي مريومه امج مستهديه شو احس اكو شي صاير ورايه من سافرت الكل وضعهم معاجبني
مريم : لا سلامتك ماكو شي بس ضايجين على فراگك مكانك خالي بيناتنا ...
وليد: والله حبيبتي اني هم ما مرتاح على بعدكم ما متعلم على الوحده بكل مكان اروحله اتمناج ويايه ذاك اليوم رحت للبحيره كعدت كم ساعه ما حسيت على الوقت اتذكر كل سوالفج وخبالاتج اعد الايام حتى ارجع بينكم .
بعد مرور فتره
مريم : بهالفتره لاحظت  اهل امي يجون لبيتنا بكثره، ومره ورا شهرين تقريبا من سفر وليد مروا يمنا بيت خالي ومعتصم وياهم بيومها طلعت بس سلمت عليهم حسيت الجيه مو خاليه من اسلوب معتصم من   قدمتلهم  الجاي ...
معتصم : ترى اني ابن خالج مو غريب حتى تخجلين مني ومتكعدين ويانا
مريم : ما جاوبته من طلعت اتصلت على هويده تجي تبقى يمهم ويا امي وابويه حتى تسمع حجيهم بالاخص من مرت خالي گلتلي چنتي اتخبلت 
من طلعوا افتهمت من هويده حجوا بموضوعي ويا ابويه وابويه گايللهم ماعنده مانع لكن لازم يشوف جدي من لحظتها واني  بقت ادموعي تنزل، بعدها صارت بيني وبين امي مشكله   تعاركت ويايه تقنعني بمعتصم واني اگلها ما اريد اتزوج اريد اخلص كليه
هويده وميثم مسانديني وما  قابلين على الموضوع لكن ما بيدهم شي اذا امي وابويه موافقين بقت بس موافقه جدي .
هويده : لاتبقين  تبچين هسه نبلغ بيبيتي  وهي تحجي ويا جدي تخلي يرفض وبالفعل صار عد بيبيتي علم، ورا كم يوم عرفت جدي طلب  يشوف معتصم ...
بهاليوم رحت لبيت عمي قيصر على هويده وسولفتلها الي عرفته محد يدري الاتفاق الي بين امي وابويه وجدي حتى بيبيتي متدري
هويده :  هسه يجي سلوان واخلي يتصل على وليد يحجي ويا ونشوف شنو راح يگول .
مريم : رجعت لبيتنا مسطوره ما الي خلگ الدنيا انتظر خبر من هويده اول ما دگ التلفون للمغرب شلته اتوقعت هي .
وليد: الو مريومه جدي اذا يسالج تگليه ما اريده بين ما اشوفلي حجز واجي فهمتي .
مريم : من سمعت صوته لزمتني العبره وگمت ابچي جاوبته تدري بيه ما اكدر اوگف بوجهه .
وليد: بعياط يعني شنو متكدرين تگليله احجي الي گتلج عليه لاتخبليني
مريم : الله يخليك انت تعال بسرعه والله اخاف منه تدري بيه جبانه وامي وابويه هم موافقين يعني ماكو احد يوگف ويايه حتى اتجرء واگله ما اريده ( گام يعيط متهستر)
وليد: قسما بالله اذا گتيله بكيفك يا مريم اشوفج شي بحياتج ما شايفته مني ماطول مابيج خير اسكتي وكلشي لاتحجين  من يسألج وحسابنا بعدين دخلي اجي دا اكلب الدنيا على راسج وراسهم .
مريم : سد الخط بوجهي رجعت اتصلت بهويده افتهم شنو اتفق ويا سلوان
فهمت گايله راح يشوف اقرب موعد طيران ويجي عليه
وسلوان باقي يهدي لان فقد  وباقي يحجي على جدي واهلي .
وليد: من رجعت من الدوام نمت كعدوني الولد على تلفون من بغداد رفعت السماعه سلوان
من گلي على موضوع مريم وجدي رايد يشوف ابن خالها حسيت نار وشبت بجسمي ما اعرف شلون راح اتصرف شوكت الحگ اقدم اجازه شوكت احجز فقدت ما  اتذكر شنو حجيت يمكن حتى مسبه سبيت اهلي بساعة الغضب ما فكرت بس شلون اوصل للمدير واقدم اجازه طارئه
الولد الي ويايه عرفوا اكو شي گتلهم واحد من اهلي راح يسوي عمليه ولازم ارجع بأسرع وقت اتصلت بالمدير من عرف عندي ظرف ساعدني لان يعرف بيه كرايب اخو بيبيتي ( جدو فريد) انطاني اجازه اسبوع حجزت ثالت يوم من تلفون سلوان وصلت الفجر لبغدادفقط سلوان عنده علم بجيتي وهو الي استقبلني من وصلت رجعنا للبيت اول ما دخلت لبيت اهلي
اتفاجئوا امي وابويه وعذراء بجيتي كعدت حجيت لابويه الموضوع واتفاق جدي ويا عمي سعد ...
معن: ميخالف بابا خلي ناخذ الموضوع بهدوء هسه انت اجيت أُعرف تصرف وشلون تحجي ويا جدك بدون مشاكل
وليد: ابويه يحجي واني اجاوبه ان شاء الله بس النيه الي براسي
لا بيها هدوء ولا تفاهم جاي اخذها غصبا عنهم كلهم بقيت اباوع على الساعه انتظر يكعدون صارت ٨:٠٠ طلعت دكيت الباب على بيت جدي فتحتلي بيبيتي من شافتني فزت بين فرحانه وبين قلقت من جيتي جان جدي بعده نايم
محاسن : الحمد لله على سلامتك بيبي .
وليد: الله يسلمج يمه جدي وينه
محاسن : ولودي بيبي خير خو ماكو شي بقيت بالي
وليد: عندج علم بي يريد يشوف معتصم ابن اخوها لمرت ابنج
محاسن : لا والله منو گلك .
وليد: وصلني خبر اني صاعد لغرفتي كاعدله اسبوع اريد اشوف منو يوصل للبيت .
محاسن : بيبي اتعوذ من الشيطان لتوگف بوجه جدك ترى يعاند اكثر
وليد: ليش هو خلى عندي عقل اريد اشوف شنو الي براسه شنو هالعداوه الي عادانياها من ذاك اليوم لليوم خبلني ما كو طريقه ما اتبعتها وياه اتحملت اهاناته وكلامه كلت بلكت يلين بس يتفق من ورا ظهري ويريد ينطيها للغريب ويدري بيها رايدها لا والله احرك الدنيا ما يوگف بوجهي احد وهذا الي اسمه معتصم اذا فات للبيت اطلعه جنازته .
محاسن : اوف منكم شلون مخابيل الله بلاني بيهم
وليد: على صوتي طلع جدي سمع گلامي ويا بيبيتي عصبي ويأشرلي بأيده
ياسر: هاي منو الي تحرك الدنيا عليهم وعلى منو جاي تتهدد
محاسن : على اهل نجاه .
وليد: على اهل نجاه وكل واحد يريد ينطيهم مره هاي اني كاعدلكم اريد اشوف شلون تنطوها لغيري (ترگني وراح للصاله عليت صوتي اسمعه )
لو اني اخذها لو متزوج حتى لو اعرف اكتلها ركبت براسي اذا ما رجعتولهم خبر ماموافقين وما خليتوني اعقد عليها اني مو رجال طالع من ظهر رجال اذا ما سويتها مثل ما انت وگفت بوجه عمك واهلك واخذت بيبيتي من بيتهم وعقدت عليها
اني مثلك كلشي اتوقع مني عفتهم وصعدت لغرفتي .
محاسن : الله لا ينطيج نجاه اني الج دخلت على ياسر للصاله
يا رجال استهدي لاتسويلنا طلايب هذا مثلك تذكر انت شسويت بيه وبأهلنا والمشاكل والطلايب الي صارت انت تريد
تموته للولد يله ترتاح مو تدري يحبها لبت عمه ليش عليك حلال وعليه حرام ليش تعادي ابنك الجبير من ذاك اليوم لليوم ماخذ على خاطره ومهضوم لان معادي ابنه ادري ابتلى خو ما ابتلى گلك متصير لغيري ليش انت من عرفت بأبويه انطاني لغيرك مو گلبت الدنيا وهديت عليهم بالسلاح واني مو بت عمك بت عم ابوك عاد هذا اذا قلبه يحترك ويتخبل حقه بت عمه رابيه ويا صار سنين وانت تدري بي صار كم سنه رايدها وصابر عليك كافي يا رجال متفكر بس لازم تمشي حجايتك يعني اذا كتل روحه وكتل البنيه وياه ترتاح ..
ياسر: بعيطه كافي ترى احرك البيت والي بي عليج وعلى ولدج
اطلعي بره .
محاسن : طلعت بقيت كاعده بالمطبخ مخليه ايدي على خدي شلون راح تنحل ويا هالمخابيل اندگت الباب رحت فتحتها
معن: صباح الخير يعني والله اني حتى روحي كرهتها ما الله ياخذني واخلص هاي تالي عمرنا صوتنا طالع من ورا عناد ابويه والله لو ادري بأبني ارعن وسالفته عوجه جان لزمته الباب يعني يريد بت عم ينطوها للغريب ويوگفون وياه على ابني ادري ليش شنو الي بدر مني لو من ولدي هيج ابويه گالب علينا بحياتي صوتي ما عليته ماكو واحد من اخوتي بار بيكم مثلي شكد عمري ابني بطولي ما اكدر اوگف بوجه ابويه واخاف الله بي تالي يصف ويا سعد ويستخسر مريم بينا شوفي يمه اذا مريم انطاها ابويه لاهل نجاة وكسرني كدام الكل ينسى عنده ابن اسمه معن اخذ مرتي وولدي واطلع منكم ما بيوم اشوفوني ...
محاسن : يمه حبيبي لتزيدها عليه فدوه لعبنك ترى ذولي كافيين عليه والله قلبي راح يوگف من القهر اني اكدرله لابوك هاي صارلي ساعه احجي ويا تالي طردني يمه انت عاقل وتعرف الله صلي على النبي وخلينا نفكر شلون نحل المشكله قبل لا تكبر هذا اخوك خلي يمي لابكيفه ولا بكيف مرته بس العله بأبوك اذا يشوفك تطبگ ويا ابنك حق باطل ميتفاهم غير يتخبل والله يحرك البيت علينا .
معن: اللهم صل على النبي ما شي يمه اني مراح ادخل دا اشوف وين تصفى ذاك الوكت اعرف شلوان اتصرف حتى لو اعرف اخذ مريم بيدي اخلي وليد يعقد عليها ساعتها خلي نارهم تاكل حطبهم يعني ماكو هيج ظلم
محاسن : دصبر وليدي خليني اني اتصرف ... عود اذا ما حليتها سوي الي تگول عليه ...
مريم : خابرتني هويده سولفتلي الي صاير مثل ما وليد مفهم سلوان
امي من عرفت بي راجع تخبلت بقت بالبيت وراها اتصلت عليها بيبيتي فهمت دترزلها من جواب امي .
نجاه :يعني عمه البنيه متريده شنو گوه من سمعت حجي هويده وشلون وليد صاير اعصاب كمزت جاوبت امي وهي دتحجي ويا بيبيتي بالتلفون حتى بيبيتي تسمع( اي ما اريده لمعتصم اني موافقه على وليد ،خزرتني امي وادري يجوز حتى راح انضرب لكن بيبيتي اظاهر استلمت امي وخوفتها بلي ناوي وليد يسوي لان دا افتهم من اجابة امي فهمت متحلف لمعتصم بس يوصل لبيت جدي صعدت لغرفتي وسديت الباب على روحي ما ادري بالدنيا لان خفت من امي وابويه وجدي على الحجيته ،للعصر دكت عليه الباب هويده .
هويده : شبيج عيونج مورمه لاتخافين بيبيتي خابرت على خالي گايلتله سوتولنا مشاكل ترى البنيه متريد ابنكم وابن عمها رايدها ويحبها وهي هم اتحبه وجدهم ميدري من گلكم خلي يجي الولد وگايلتلهم احنه انخاف على ابنا وانتو هم اتخافون على ابنكم سدوا الموضوع من يمكم ليش يصير شي مو زين وتالي الكل تتندم، يعني تقبلها انت لو ابنك تاخذون مريم وهي تحب ابن عمها صار سنين هو رايدها اني لو ادري بيكم من البدايه رايديها جان فهمتكم السالفه لان بس اني ادري من البيت ونجاة وابن عمها من قبل لا يدخل جامعه گايلي رايدها وباقيه تحجي على امي( ... بما معنى هي سوت المشكله وبيبيتي منطيتها علم من قبل وليد يريد مريم )
وهسه خالي ديرزل امي بالتلفون الي افتهمته ديعيد كلام بيبيتي وامي دتكذب بيبيتي وهسه خالي يريدج على التلفون ديتأكد من كلام بيبيتي وأمي .
مريم : يعني شنو مراح يخطبوني
هويده : لا بابالاتخافين انت بس گليله ( خالوا معتصم مثل اخويه هي تفض )ترى اذا ما نهيتي الموضوع وليد گاعد بالحديقه گبال الباب گايللهم اريد احد يعتب خطوه لداخل البيت داسوي مصيبه انت بعد بكيفج الولد سوا الي عليه اجى من تلفات الدنيا علمودج وسلوان گلي خلي تگلهم معتصم اخويه هم يفتهمون
مريم : سمعت كلام هويده وگتلها تعالي ويايه حتى تشجعيني شفت السالفه بالتلفون اتجرأت من سألني خالي جاوبته خالو معتصم اخويه مثل ميثم .رجع سألني انت موافقه على ابن عمج صح ردت اموت من دا اجاوبه بس مثل الميت وينطوا اخر امل يرجع للحياه جاوبته اي موافقه عليه
انتهت سالفة الخطبه بدون علم جدي ،وبيبيتي اجتي علينا للمشتمل عصبيه حجت ويا امي وابويه ما ينطون علم بلي صار لجدي لان تصير مشاكل وعاتبت ابويه من بقت وحدها وياه لان عمي معن مقهور منه بسبب موافقته على معتصم ويدري وليد رايدني وبقت تنطي مواعظ عن الاخوه ونبهته ما يسمع كلام امي اذا بي تحريض على اهله واخوته ما اله غنى عنهم هم سنده بالدنيا بقيت اتصنط على بيبيتي خلت ابويه يحس بغلطه
سعد: هسه رايح اصالحه
مريم : الي فتهمته راح لعمي معن وماخذ عمي قيصر ويا حتى يصالحه عليه بقيت يومين مشايفه وليدولا هو شايفني ، العقبه الوحيده بقت شلون يخلون جدي يوافق
وليد: عرفت من بيبيتي ناهيه موضوع الخطبه ويا اخو نجاة ورايحه لعمي سعد گايلتله (خلي مرتك مثل ما سوت المشكله وتصرفت من راسها وعدها علم بتها موافقه على ابن عمها ومتريد ابن خالها وسوتها شغل عناد واني محذرتها هي تتحمل الغلط وحدها وتروح تحجي لابوك ( جدي) ابو معتصم اخوها سأل مريم على موضوع معتصم ومجاوبه خالها (معتصم مثل اخويه ميثم )
وافتهموا ماموافقه ولغوا الموضوع ) افتهمت ما مكتفيه بهالرساله رايحه بنفسها زارتهم للبيت فهمت عمي سعد هذا مخطط نجاة هي الله دخلت هالموضوع براس بيت اخوها في سبيل اني ما اخذها وگايلتله بأذني سمعت مريم تگلها لامها ما اريد معتصم ،وموافقه على وليد
كلام بيبيتي اثر بعمي بحيث اتفاجئنا بجيته هو وعمي قيصر على ابويه للبيت ، سلمت وطلعت ما ردت اكون حاضر بكعده الاخوه وهم يتصافون رحت لبيت عمي قيصر يم الولد .
سلوان : جدي مايوافق ماطول وگفت بوجهه هسه يعرف الموضوع اللغى  وانت ورا مو غشيم جدك يجوز راح يتوقع هددت الولد لو اهله وبطلوا
وليد: شيفتهم خل يفتهم المهم  هسه اريد اصفي بالي اله شلون اخلي يوافق
سنان : والله اني بالي سالفه بس انت تسويها ولازم ناخد رآي الكبار بيها
انت هسه لازم تقدم تنازل كدام الكل تخلي جدي يتراجع عن قراره بحاله يحس هو الي حجايته مشت عليك مو انت مشيت حجايتك 
وليد: شلون يعني انت تعرفه شلون يفكر احسن من عندي گول شنو الطريقه ...
سنان : باجر نسوي غده ونتفق ويا بيبيتي تگول فريد راح يجي يتغده يمنا وطبعا ننطي خبر بالاتفاق لابويه ولعمامي ولجدو فريد انخلي هو يصالحك على جدي بس لازم انت ورا ما نكعد بالصاله قبل او بعد الغده تستغل الفرصه اتفوت عليه تعتذر منه كدام الكل وكلنا نساعدك تتصالح ويا ونخلي جدو فريد يلين دماغه عليك وعلى طلبك .
وليد: دمشي لعد هسه خلي نروح لبيتنا ماطول ابويه وعمامي موجودين نتفق وياهم بيبيتي سالفتها سهله ،اتفقنا على فكره سنان
ثاني يوم بقيت مرابط فوگ بغرفتي( ببيت جدي) دماغي يجيب ويودي
انتظر وكت الغده من جهه حتى اصالح جدي ومن جهه ثانيه حتى اشوف مريم من اول يوم دخلت لهالحظه لا هي مرت  لبيت جدي ولا لبيت اهلي ولا راحت للدوام البارحه بقيت قلق عليها اسأل عذراء وهويده عنها
يطمنوني ، اخ يا ياسر مرمرتني وذليتني فوگاها ادزلي
خبر بيد بيبيتي متريدني  يمك گايللها لحسونه خلي يروح يم اهله لبيتهم
عاد بلكت من گتلها بلغي هذا بيتي وانتو اهلي ذاك مو بيتي تغزر بيك بسالفه اليوم ( على گولت سلوان صاير ملطشه ابو خالد وعديم الاحساس القاضي يطردك وانت مجلب بي صدك البزون متحب الا خناگها )
ميخالف بس خلي يرضى عليه وينطيني مريم  تستاهل الملطشه بت نجاة
اخ يا نجاة شمتحلفلج بس خلي تمشي السالفه مثل ما اريد ،
للظهر سمعت صار صوت جوه مديت راسي سمعت صوت البنات بالمطبخ  ناديت 
عذراء: طلعت من المطبخ مديت راسي اباوع فوگ نعم ولودي
همس مريم وين صيحيها .
عذراء : اشرتله بأيدي يعني ماكو اشرلي تعالي اصعدي صعدت
وليد: وين مريومه .
عذراء: من سألت  بيبي   عنها هويده كالت مريم مريضه متكدر تجي وعمي وعمتي وميثم هسه على جيه
لكن بعدين فهمت من هويده مريومه تخاف تجي وانت موجود من ورا جدو وتستحي من عمامي وابويه والولد من ورا موضوعكم راح تبقى بالبيت ...
وليد: ابتسمت يعني مو مريضه
عذراء: لا
وليد: بس الزلم تلتم بالصاله كلهم اذا قبل الغده او  بعده انطيني خبر اعتمد عليج .
عذراء: ان شاء الله
وليد: قبل الغده صعدلي سلوان .
سلوان : ها ابو خالد هههه مستعد .
وليد: هههه كالاسد اريد اصيده بس گلي كلها موجوده
سلوان : لا جدو فريد هسه على جيه من يجي ادز وحده من البنات تنطيك خبر تنزل
وليد: دز عذراء لان وصيتها .
سلوان : نجاة حاليا وجهها ميتفسر لان شكلها حسونه عالنه عليها الحرب ههههههه خليها شويه تكسر خشمها ..
وليد: هسه اني ما مخليها ببالي،لان  حسونه ما قصرت بس اذا جدي انطاني مريم  اكبر ضربه لنجاة من اصير نسيبها هههه وهي تموت عليه .
سلوان : يويل لا تضحك  زايد ليروح ياسر يطلعها من خشمك
وليد: لو اعرف انزل على رجله اليوم ما اطلع من يمه اذا ما اصالحه بس يضحك بوجهي اگله على مريم
سلوان : سنان حاليا ديهيئه نفسيا تدري بي يرتاح من يكعد وياه عفتهم ديسولفون ويضحكون لحد الان. اوضاع جدك تمام تسمح بتنفيذ المخطط انت اعدم الاحساس والكرامه اليوم شيحجي عليك كدامنا اسكت واتقبل الكلام كلنا نعرفه من عصبي يفقد ويأذي بالحجي يعني انت عندك علم برد فعله
صير ذكي وامتص غضبه ...
وليد: اعرف ورا ما نزل سلوان تقريبا بنص ساعه
صعدتلي عذراء گالت سنان يگول خلي ينزل هسه كلنا كاعدين
نزلت لابس دشداشه بيضه بوجهي لباب الصاله حتى ما سلمت على الي بالمطبخ فتحت الباب
السلام عليكم ...
فريد: الحمد لله على السلامه جدو هسه سألت عليك گالو موجود بس نايم  وگف
وليد: أتسالمت ويا جدي كاعد بصفه جاوبته لا والله مو نايم بس الحجي زعلان مني وماعندي عين التقي بي نزلت على راس جدي بوسته يابه هاي كدام الكل اني غلطان بحقك وأعتذر منك انت چبيرنا وكلمتك على راسي حقك عليه شتحجي لو تصرف ويايه استاهل نزلت بوست ايده ودا انزل على رجله لزمني ما قبل .
ياسر: گوم بابا اكعد يم ولد عمك  بس
وليد: بس لتگلي ما انطيك مريم اذا صدك مسامحني وقلبك ما غضبان عليه گلي اخذ بت عمك ...
فريد: يمعود ياسر ثاريك شالع قلب الولد ايباه الدنيا دواره
يوم الك ويوم عليك ما ذكرك بروحك عاد المفروض انت حاس بي وهو بهالموقف .
وليد: شفت جدي ابتسم ردتلي الروح ها يابه ريح قلبي ماباقي على اجازتي بس كم يوم لاتردني عمي سعد ادخل
سعد: يابه اني موافقتي بعد موافقتك بس اني هويده مأمن عليها يم ابن عمها واكيد هم اامن على مريم من انطيها لابن عمها
معن: يابه اني ما تدخلت  بقرارك بس مريم اني عمها رايدها
لابني يعني اعتبرني ماخذ بنيه منك اداريني بكبرتي وامون عليها بنتي حالها حال عذراء لا تحسبها وليد رايدها اني رايدها لوليد
وليد: شفته منتبه على ابتسامتي وهو هم مبتسم بوجهي مثل الي ديلعب بأعصابي وديحسسني بأنتصاره نظراته بين اطمن وبين راح يرفض
حسيت صبري نفذ غمضت عيني ثواني وتنفست وعمي قيصر ديحجي وياه
سمعت كلمه بت عمه اله ويا فتحت عيني تأكدت الي سمعته صح من ابتسامة الولد وگلولي على الخير من الفرحه رجعت بوست ايده لجدي كعدت وياهم 
شفت طلع ويا دخلته سمعت الهلاهل عرفت راح انطاهم خبر فكرت اخليها حاره بحاره يابه باجر اعقد عليها حتى عقد المحكمه اوكل ابويه يمشي بي من اسافر .
ياسر: ان شاء الله اني اسهل شغلة العقد عندي قاضي صديقي
وليد:  ترخصت منهن طلعت رحت للمطبخ اريد اشوف شكل نجاة ورا ما سمعت الخبر  ومن راح تسمع باجر اعقد على مريم
محاسن : بالخير بيبي يمه قلبي هسه ارتاح
وليد: شكرا يمه باجر نعقد
سعاد: لعد اليوم نطلع نشتريلها النيشان وتحضيرات العقد .
وليد: ورا الغده اخذكم نكمل الامور وعمتي نجاة ومريومه ويانا
نجاة : مريم اليوم مريضه خلوها على باجر بعدين يعقدون
محاسن : لا اليوم نطلع هي من تسمع انخطبت اتصير زينه اني لو عليه هسه اخذهم يعقدون يم الشيخ بس ما اريد احرمها من كعدة العقدوتحضيراتها ...
وليد: شوكت تصبون الغده
محاسن : نص ساعه بيبي .
مريم : من سمعت هلاهل بقى الفضول كاتلني اريد اروح اشوف شنو الي صار وراها رن التلفون شلته .
هويده : اختي اريد البشاره ابو خالد خطبج
مريم : الله عليج جدي قبل
هويده : والله وهسه جان ديحجي ويا بيبيتي وعمه سعاد باجر تعقدون والعصر تطلعون تاخذون النيشان تعالي هسه ترى امي گلتلهم مريضه .
مريم : هويده وليد وين .
هويده ما ادري يله تعالي حتىتساعديهم  مابيه حيل اساعدهم حبابه
مريم : هسه جايه سديت التلفون طلعت من الهول دا اطلع من الباب المشتركه بين بيوتنا تودي على الكراج والحديقه الخلفيه اول ما فتحت الباب فزيت لگيته بوجهي لزمت قلبي .
وليد: وين رايحه يبطه واني جاي عليج صرتي الي .
مريم : الحمد لله على السلامه فززتني احس قلبي راح يوگف ما ادري من الفزه من الفرحه من اشتياقي لشوفتك .
وليد: سلامة قلبج ياعلة قلبي اخ شكد مشتاقلج  حضري نفسج ورا الغده نطلع ناخذ النيشان .
مريم : ميخالف لو تدري شكد مشتاقتلك يله خلي ندخل للبيت دينتظروني سد الطريق عليه
وليد: مو بكدي ولو جنت حاقد عليج من گلتيلي ما اكدر احجي ويا جدي من يسألني ردت ادخل من التلفون اطلع روحج بس شفعلج كلامج ويا خالج وصلني من بيبيتي
مريم : ابتسمت ابو خالد ...
وليد: شنو
مريم : اموت عليك
وليد: يا علة قلبي ماكو شيخ اليوم يعقدلنا
مريم : ههههه خليني افوت .
وليد: امج على دگاتها ويايه ما اكدر اكرهه من اشوف خلقتها عبالك تصيرين كدامي بس مع ذلك اتذكرني بالساحره الي بقصة قطر الندى
مريم : ههه لا تحجي  على امي ترى ما اقبل والله ازعل عليك
وليد: حسونه مكفيه وموفيه تنتقملي منها يله فوتي .
مريم : اول ما فتت رحت للمطبخ تلگتني بيبي .
محاسن: يمه مريومه صارت عروس لولودي من تزوجون تكعدون ويايه فوك
مريم : تلكون عمه سعاد وعذراء وعمه أمال ...
وشهد قُبَل على الخد
سعاد: عمه ماكو فرق هنا هناك .
محاسن : لا هو گلي اني اتزوج بنفس غرفتي واتفقنا  اذا يريد يكبرها  افتحها  الهم على غرفه سلوان القديمه تصير چبيره .
نجاه: وهو كلشي يريد بكيفه غير يسأل العروس ويشاركها
بالاختيار ..
محاسن: لا طبعا كله على مرام مريومه هي وابن عمها متفاهمين تدري بي يدور راحتها ...
عذراء: اني هم اجي وياكم ،ماطول باجر بيها عزيمه وصور اريد اخذ ملابس
مريم : بنفس اليوم من رجعنا جدي دز الولد على اقربائنا الي
يعزموهم على العقد والبعض عزمهم بالتلفون ، وافتهمت  جدي اتصل بالقاضي صديقه طلب منه يعقدلنا جانت عادات عقد القران الي تعرفها بيبيتي جدا حلوه
اشترت لوازم كاسات المهر وكعدنا بليل كلنا البنات والنسوان حضرناها ... حتى كم وحده من جوارينا من عزمتهم بيبيتي اجوي يقدمولها مساعده لان افتهموا  الشغله صايره بسرعه لان العريس عنده سفر .
ثاني يوم .... يوم عقد القران .
مكان العقد ببيت جدو الرياجيل بالصاله والنسوان بالهول
رتبنا الكراسي بصف القنفات لان عدد الزلم الي راح يحضرون من الگرايب اكثر  حتى بالحديقه هم خلوا كراسي ، اما الهول جان لكعده النسوان
تممنا كل شي بعدها  توجهنا  للصالون سويت  مكياج  بسيط وشعري سشورته وبقى مفتوح لان قبل ما اطلع وصاني لا اكص ولا اصبغ ولا اسوي تسريحه يبقى مفتوح ،عذراء  طول الوقت جانت ويايه
اول ما  رجعت طلبوا مني اللبس سيت ابيض طويل  بدون ردن وفوگاه روب طويل وخليت على راسي وشاح ابيض ستن دخلت للهول جان الكل حاضرين خلولي بين اصابعي حبات هيل وكعدت على القنفه
وبيدي القرآن الكريم مفتوحاَ على سورة ( أنا فتحنا لك فتحناَ مبيناَ ) تضرعاَ اليه عز وجل أن يجعل زواجي فاتحة خير على العائلة وأن يكون مقدمي على بيت الزوجيه مقدم خير .
بدت مراسم العقد ...
بيبيتي ومرت جدوا فريد وكفوا على كل جانب فوگ راسي وبيدهن القند
من بدأ  القاضي يردد الايات هن يحركن القند فوگ بعضه حتى يتفتت ويوگع على الوشاح وينزل بحضني بعدين يلموا ويبقوا ليوم العرس يسوون منه حلو للعريس والعروس وامي خلتلي قطعه صغيره من القند بلساني من بديت اردد حتى حياتي ويا وليد تصير حلوه جان الميز الي كدامي عليه
ومرايه مرآة العروس تتوسط طاولة عقد القران المرآة للخير والبركة بعد عقد القران أول ما يحضرالعريس تكون العروس منزله وجهها ومنزله الوشاح عليه شويه بحيث تشوف  نفسها بالمرايه والعريس من يدخل ميشوف وجهها الا من يكعد بصفها يشوف وجه عروسته بالمرآيه
وقفل ومفتاح وكلوا مهمته لعمه سعاد من يبدي القاضي مراسم العقد تبقى تفتح القفل وتغلقه الى ان
يسألني القبول واحاوب نعم يبقى مفتوح لليلة العرس من اتم الدخله يقفلوا ويشمروا بالنهر حتى يكون عقد الزواج ابدي
وكان اكو على الميز زئبق خلوا هويده تحركه حتى حياتنا الزوجيه اني ووليد متكون راكده وممله
وكذلك جان على الميز السبع حوائج من الشغلات المهمه على ميز المهر لازم ا نحفاظ على موادها لان كلها مواد مباركه من الحرمل والمستك البخور الرحمانيه مع اضافات ثانيه حسب الطلب هذه تنحفظ في غرفة الزوجيه من يصير سوء تفاهم او ضيق حال او تعب او ارهاق نفسي تبخر قبل الغروب مع قرآءة المعوذات ولا يحبب ضياعها او احد ياخذ منها تبقى للعرسان فقط.
جانت الباب مفتوحه الي بين الصاله والهول سمعت  كل كلمه نطق بيها القاضي وسمعت وليد من جاوب نعم تم العقد من ردد عليه القاضي السؤال
وجاوبته بالاخير بنعم
انطلقت الهلاهل من شفايف النسوان وعذراء وزعت الكاسات دخل وليد يمنا من كعد بصفي شاف وجهي بالمرايه .
وليد: اليوم اكل هالشفايف .
مريم : من سمعته حسيت قلبي انخطف من الخجل والخوف، همستلي  بيبيتي لازم اطلع قطعه القند من حلگي
وانطيها اله ياكلها استحيت وادري بي نحس وما يتقبل كلشي حس بيه دا اتبسبس
وليد: شكو
مريم : بيبيتي گلتله لازم تاكل القند الي خلينا بحلگها حتى اتزيد المحبه بينكم شافها اخذت الهيل الي بين اصابعي وخلته بالعصير مالته گلتله هذا هم تشربه ضحك .
وليد: شعنج خرافات حسونه يعني هسه تريدون افضحكم واخلي شفايفي على شفايفها حتى اخذ القند
محاسن : ولك اثگل عيب من العالم .
مريم : خليتها بحلگه عض اصبعي خفيف كل الي يم راسنا شافوا وابتسموا
رجع شال كلاص العصير گلي اشربي منه شربت شويه شرب من نفس المكان الي شربت منه همسلي انتِ روحي واني اتقبل كلشي من روحي
محاسن : يله لبسها النيشان .
مريم : هو ديلبسني أتذكرت منظره من لبس لارا ابتسمت علىالقسمه شكد افترقنا وخطب وجدي عاند وفسخ ورجع رادني ونقفلت بوجهنا لكن الي كاتبه الله هو الي يصير بين ليله ويوم صرت مرته صعدت بدلت فستان ابيض قصير وبقيت ويا البنات الى ان صار وكت العشه بعدها بدوا المعازيم
يطلعون الى ان طلع اخر شخص جرينا نفس من التعب
عذراء: ولج مريومه صرتي مرت ولودي والله طلع گدها اخذج منهم
محاسن : اي والله بيبي اني اجتي ايام گلت بس لا متصير مريم لوليد حتى من افكر انقهر بس الحمد لله ربكم قسمها 
مريم:دخلوا جدي وعمامي والولد للهول اشرلي جدوتعالي وگفت كدامه بوست ايده
ياسر: اخذج هالملعون وقشمرني .
معن: هاي بَطريقه حبيبة عمها من هي صغيره اني گايل تبقى يمي مننطيها .
وليد: التفت عليه جدي .
ياسر : هالمره خليها بعينك خلي الي صار يكون الك عبره مو بس انتَ كلكم
وليد: ان شاء الله مريومه تعالي ،اجتي ورايه يم الدرج انتِ صرتي مرتي يعني حجايتي هي الي تمشي هيج لبس قصير وربع ردن ضيق بعد ميلبس كدام سنان وسلوان ولا اي احد روحي غيري وتعالي  ...
مريم : من باجر نبدي
وليد: روحي بدلي وتعالي لاتضوجيني 
مريم : دا اطلع من باب المطبخ حتى اروح للمشتمل
امي نادتني  كدام الكل 
نجاة :وين رايحه
مريم : ابدل واجي
نجاة : ليش تبدلين فد مره من نرجع بدلي
مريم : وليد ميقبل
نجاة : ها بدينا ويا العقد
سعاد: والله ابني مو معقد  هي من جانت بس بت عمه ميتحمل ويغار عليها عاد صارت مرته هسه بعد ما الكم دخل الحجايه حجايته روحي عمه بدلي .
أمال: غيره الرجال على مرته من المحبه انتو لا تدخلون  خلوهم هم براحتهم يتفاهمون سوا ...
سنان : الله يساعدكم ... ها مو هم يله نروح باجر ورانا دوام ...
عذراء: متروح تنام احد لازمك عندك يمنه شي
سنان : ابتسمت انت ِ هم روحي نامي يله شهوده
شهد: سنان دبقى عشر دقايق ونروح لو تروح واني اجي ويا عمه أمال .
عذراء: ههههه لا انت مصمم تخسر الرهان كل مره لا عمي روحي ترى يگوم يغار مني
سنان : ابتسمت تدري بيه وياج ما اغار ولا ازعل يله تصبحون على خير
شهد : يله تصبحون على خير / اجمعين
هويده : اني هم اروح اشوف سلوان لان هلكانه من التعب حتى رجلي دتأذيني .
عذراء: ولج هويده راح تجي مريومه ابقي ( درت احجيلهم على تمار. ) افتهمت
هويده : يله راح ابقى بس سلوان خطيه من قبل ساعه گلي خلي نروح
عذراء: لج بابا هسه تلگي ملتهي ويا الولد .
مريم : قصدج سلوان هسه شفته هو ووليد بالحديقه الخلفيه ووياهم ميثم ...مبين عدهم موضوع