رواية حكايات من بيت جدي الفصل الخامس عشر 15 - بقلم مريم اماسي الليل

#حكايات_من_بيت_جدي
الجزء الخامس عشر
اماسي الليل
حقوق النشر محفوظه
وليد: جدو لا اني ولا مريم متوالمين انت تعرف شي واني اعرف شي
اني مريم ما اخذها اعتبرني فسخت الخطوبه وهسه اريد اخطب
بنيه لخ
ياسر: وهو لعب بكيفك اليوم تريدها وباجر متريدها
وليد: سديت الباب اذا تقبلها اخذ وحده وقلبي يم وحده ثانيه باجر اعقد عليها بس راح ااذيها ساعتها لحد يلومني
ياسر: بابا فهمتي انت شبيك ليش هيج متعصب وقلبك محروك اكو شي خلي افتهمه.
وليد: (ما هانت عليه نفسي اگله سمعتها بأذني تگلها لهويده ما اريده لو ما جدي ما اقبل بي . )
جاوبته لا ماكو شي بس اني جنت مخلي مريم كدامي ومن لگيت
البنيه الي تناسبني فهمت اني ومريم منتراهم وهالارتباط مابي مستقبل لا هي ترتاحلي ولا اني مقتنع بيها
ياسر: والله راح تخبلوني لكم والله مصدوم بيكم عبالي عندي زلم طلعتوا كلشي ماكو .
ذاك يگلي احب وانت تگلي تناسبني بكيفكم ماطول ماكو احترام للجبير وصاير كل واحد يوگف بوجهي ويريد يمشي الي براسه
لحد يرجعلي ولا اريد اشوف احد
وليد: ماشي براحتك بس حتى اذا ما اخطب اني مريم ما اريدها
طلعت من غرفة جدي صار بوجهي ابويه گلي تعال
شصاير
جاوبته ماكو شي اريد اخطب بنيه ويايه بالكليه وجدي رافض
معن: بأستغراب المن تخطب؟ ليش وبت عمك مو حجينا بموضوعها ويا جدك وعمك شنو هو لعب انت خاطبها
مو معناها ما لابسين حلقات تكمز بكيفك انت متفهم بالاصول
وليد: بصوت ناصي بابا البنيه متريدني بأذني سمعتها
انت تقبلها اخذ وحده مجبوره عليه هي متكدر تواجه اني اكدر انهي هالموضوع ماكو قسمه ولا تفاهم بيناتنا
معن: استغفر الله انت متأكد البنيه مراغبه هالخطبه
وليد: بابا مريم لان تعرف جدي مقرر ناس تاخذ من ناس
وافقت ومثلت عليه الموافقه بس الي سمعته اكدلي ماعدها رغبه واني ما اتحمل اكمل وياها ولا اتغاضى عن الي سمعته
وما اريد احد يعرف  السبب الي ذكرتلكياه  لان ما اريدك تزعل مني بلغتك والصدك كرامتي متسمحلي ابين كدام احد هي مرايدتني 
خلي الشغله تصير بوجهي اني الي اريد غيرها حتى
لحد يضغط عليها ويواجهوها بلي سمعته وتنكر وتنجبر تكمل ويايه .
معن: ماشي اني اعرف شلون احجي ويا عمك وابويه
ونحل الاشكال
وليد: براحتك اني اترخص راح اطلع صعدت كاره البيت اخذت ملابسي وكتبي ونزلت بلغت امي راح ابقى كم يوم بيت بيبيتي 
سعاد: شكو ماما شبيك
وليد: مابيه شغله بيني وبين جدي كم يوم وارجع .
سعاد: براحتك ...
وليد: لحد ما طلعت من باب المطبخ وضربني الهوا صحيت
من ثوره الغضب الي بداخلي  حسيت الي سويته يأذيني وحدي
اذا هي طلعت كل هالوكت تضحك عليه بكد الحب الي بقلبي الج اكو ألم وكره سنين مخليتني مضحكه بينج وبين نفسج
سنين تنتقمين مني لان قساوتي وياج بدافع الخوف والحب
ما اتذكر شلون ركبت السياره ولا شوكت وصلت وگفت السياره بباب بيت بيبيتي بقيت كاعد  رجعت الكرسي بوضع النوم
خليت ايدي ورا راسي مامستوعب شي من الظهر لحد هاللحظه احس ألم بجسمي مثل الي تلگه سجين اول بداية الضربه حاره ماتألم  لكن كل ميمر الوكت يبدي الالم ينغز بالقلب
هالسجين تلگيتها من اعز شخص  اكيد رب العالمين اله بيها حكمه خلاني اسمعها استرجعت  الموقف بمخيلتي
( بغرفة سلوان جايب فلم حتى نتفرجه اندكت الباب
طلع لهويده ماانتبهت عليه  لان جنت كاعد اخلي الكاسيت واربط الفيش ...ما سمعت الحديث الي دار بينها وبين سلوان  لكن افتهمت ديتغزل بيها من اسلوب الهمس الي سمعته من جاوبته ( حبيبي خلي هسه اروح لمريم ما ادري شبيها هي ووليدالعصر اتفرغلك) صار عندي فضول اسمع كلام مريم عن المشكله اريد افتهم شلون تفكر
دخل سلوان وسد الباب سألني شبيك انت ومريم جاوبته والله هاي بت عمك ما دا افتهم شلون تفكر
هسه ارجعلك طلعت وسديت الباب اجى بالي اطلع للسطح اسمع حجيهن من الشباك وگفت يم الحايط اتنصت بصف الشباك
بقيت اسمعها
مريم : هو اني اصلا ما مقتنعه بي وبأطباعه وفوگاها عنده علاقه ويا بنيه ويا .
هويده : متأكده عنده علاقه بيها وحتى لو عنده كل الشباب هيج يلعبون بس المن هو خطب خطبج انتِ يعني يحبج الج
مريم : لا حب ولا شي كلنا كبرنا على مبدا ابن العم لبت العم
نتخيل نفسنا نحبهم وهم يحبونا بس بالحقيقه الشغله مجبورين عليها لان نعرف محد يقبل لا الولد تاخذ من بره ولا البنات تاخذ غير ابن العم هسه تريدين تقنعيني بوضعج هذا ويا سلوان تحبي
هويده: انت شبيج طبعا هسه احبه قبل جنت احبه مثل اخويه بس من ارتبطنا مشاعري تغيرت وحبيته اكثر
ليش انت تريدين تقنعيني متحبي لوليد وانجبرتي على الخطوبه
مريم: ما ادري احبه لو لا مرات احبه ومرات اكرهه والاغلب
احب حبه الي لان هو يحبني ويحسسني بأهتمامه ولان
احسه ضعيف ويايه اتخيله مثل جدو ويا بيبي .
هويده: مريم مدا اصدك انت هيج تحجين شو متغيره وتفكيرج متغير
مريم: لان شفت البنات شلون متحرره وهي تختار كلشي
محد يمشيهم بالاوامر مثلنا ،حياتنا كلها بكيفهم
ووليد يريد يتحكم بكلشي حتى بصديقاتي الي امشي وياهم
وهذا سبب المشكله بين مجموعة مشاكل اعتراضه على بنيه صديقتي هيج من بعيد حكم عليها مو راحه ولتمشين وياها
واني مشفت شي على البنيه بالعكس حبابه لان سبورتيه
معجبته يمكن وفوكاها فشلني  رايح گايللها ميعجبني تمشين ويا خطيبتي وحجتلي السبب فهمت ليش ميريدني امشي وياها من حجيت ويا ليش رايح على البنيه صارت مشكله بيناتنا گتله لان انت متحارش بيها متريد يوصلي خبر هو نكر وحلف ما متحارش بيها بس اني ما صدكته لان احسه عنده هيج سوالف علاقات ولعب  والبنيه اكثر من مره جانت اتنبهني بالحجي هو عينه عليها بس اني غبيه ما فهمت ماعدا كل ميشوف احد من ولد شعبتي يحجي ويايه يسويلي مشكله وهو يسرح ويمرح براحته ويا بنات شعبته ))
اسمعها واغلي ماكملت طلعت من السطح بوجهي فتحت باب غرفتهن هي
فزت بعصبيه حجيت وياها ..
من اليوم انتهت وياج وهاي صديقتج الساقطه اذا اشوفج وياها قسما بالله اكعدج بالبيت صدكتي ولا ما صدكتي
اركعي راسج بالحايط هي الي تحارشت بيه ترى دا انطيج علم مو حتى ارضيج لو ابررلج بس حتى تعرفين
هالساقطه ليش ما اريدج تمشين وياها خلي تفيدج نصايحها
حاولي اطبقين شي منها حتى اطلع روحج محسوبه عليه بت عم مو غير شي مجبور انتبه عليج ومن اليوم خليتج
براسي قسما يا مريم اذا خالفتي شغله وحده من الي منبهج عنها اكعدج بالبيت
وحتى ترتاحين اي عندي علاقه ويا لارا والبنيه تحبني وهالايام اخطبها
وكلامج صح احنه ماكو حب بيناتنا الشغله تعويد وفكره خلوها براسنا من صغار ارتاحي اني هم مكتشف هالشي
بس جنت اكول بت عمي احسن من الغريبه ولخاطر جدي واحتراما لرغبته
بس كافي لهنا واحد يضحك على الثاني خلي أكسر القاعده مثل سنان .
مريم : من الخوف والصدمه بقيت بس ابچي ما ادري
كلامه صدك چذب ما ادري اني شنو جنت احجي وجنت مقتنعه بكلامي  ليش بس شفته وعرفت سمعني خفت وتألمت من كلامه بالخصوص  من گلي يحب لارا ويريد يخطبها احس قلبي يوجعني يريد يطلع من مكانه اريد اسد اذني عن كلامه يأذيني يخلي جسمي كله يرتعش حسيت هاي نهايه لكل شي حلو بحياتي لاول مره احس اني ما اكدر بلياه صار سنين ما افتهم مشاعري وياه بس هسه اعرفها  اذا صدك نفذ تهديده
يدمرني كلامي جان بساعة عصبيه وما ردت انطي بنفسي كدام هويده ما ادري شنو الي خلاني احجي هالحجي ؟
لا اعرف الاء ورا هالكلام هي الي خلتني اشيل بقلبي على وليد هي الي عبتلي دماغي منه معقوله تطلع كذابه وجانت تلفق عليه
حتى تخرب بيني وبينه هي الي خلت براسي فكره اني ما احبه مجرد متعوده عليه
اي هيه لان قبل لا اتعرف عليها وتتعمق علاقتي بيها جانت اموري ويا تمام من يوم الي عرفتها موقفها سلبي منه ودائما تزن براسي عليه مغرور ويتعيقل براسج وانت حلوه ،والشباب كلها تتمنى تزوج وحده مثلج ،
شنو هالعادات الي عدكم لازم ابن العم ياخذ بت عمه ،.. شنو اتزوج واحد اعيش ويا عمر، شنو الي راح احس بي ويا
وشلون يتحول حب الاخوه الى حب رجال ومره ،عبتلي دماغي واني الغبيه
صدگتها !!يعني جنت غافله ومصره على الغلط ووليد هو الصح
يعني بيدي نهيت حب سنين وراح يصير لو حده غيري
لا ما اصدك بي يحب وحده غيري كل الي حجاه لان مقهور من الي سمعه ديرد اعتباره كدام هويده جنت من الصدمه عايشه حاله وحده ما احس اكو احد ويايه بالغرفه ما حسيت ولا سمعت باقي كلامه ولا ادري بي شوكت خلص و طلع
بس حسيت بهويده ترزلني واني بس دموع تنزلتركتني  ونزلت
بعدها  صعدت هي وعذراء مفزوعين من الي صاير جوه
(لج  مريم شسويتي وخليتي ينزل  لجدي يريد يخطب لارا وجدي تعارك ويا مقبل والولد  طلع من البيت )
جان عندي امل يتراجع وقلبه يحن مثل كل مره وموقف جدي انطاني أمل  ميخطب
بهالايام انگلب البيت  صارت مشاكل واهلي زعلوا
من وليد وعمي الي افتهمته  مخلي اللوم على نفسه كدام الكل مفهمهم هو ميريدني يريد لارا ما گايل لاحد عن الي سمعه بيني وبين هويده حتى موصي هويده تذكر الي صار  لاي احد حتى لسلوان ..
بقيت بلا عقل ما اعرف شنو اسوي ووين اشوفه واحجي ويا وهو
حتى للبيت ميوصل ..
بعد ثلاث ايام الصبح من ديوصلنا سلوان سألت هويده وليد ديداوم
هويده : كافي مريم بلا لعب جهال موضوع وانتهى مابي رجعه بعد المشكله الي صارت بالبيت كلها من جوه راسج
حتى الولد طلع كدام الكل مو خوش ادمي وكلها ماخذه موقف منه وحتى گايله لسلوان اني بعد ما الي علاقه بيها انت
مسؤول عنها هي بت عمك واخت مرتك انتبه عليها بالكليه
وسلوان هم ضايج منج وگلي اذا شفتها ويا هاي الاء اكعدها من الكليه ومن اليوم تخلصين محاضرات بالريست تجين يمي تبقين ويايه ما النا خلك المشاكل
مريم : بله الي يسمعكم يكول اكتشفتوا  عندي علاقه وهيج كلكم گالبين عليه ومحسسيني ارتكبت جريمه يعني اني شمعرفني بالبشر شمدريني اكو هيج بنات بوجهين واصلا ارتاحي قطعت علاقتي بيها
هويده: بعديش والله لا تتندمين على هالغباء لان سلوان
حاول يدخل ويصلح الوضع بينكم وليد گايله ماكو خط رجعه
ويا مريم انتهت بلنسبه الي ...
مريم : من سمعت قراره شفت ماكو فايده اروح احجي ويا
مرت اكثر  من عشر ايام وهو بعيد عن البيت   كل  يوم احس شكد جنت غبيه ومغروره ضيعته
احس البيت بلياه مابي روح  مضيعه امي وابويه
حسيت بأهمال جان هو معوضه  بأهتمامه حسيت بغربه وضياع هو سعادتي
الوم نفسي واعاتبها ليش ما نحس  بقيمه الشي الا من نفقده ليش منعرف مشاعرنا الحقيقيه الا من نفترق لاول مره ادعي
ياربي رجعه الي ما اكدر بلياه ياربي اني ضعيفه بحبه مو هو الضعيف
حتى بالجامعه بقيت وحدي كرهت حتى الدوام ويا كل مره اطلع ريست عيوني ادور عليه وانتظره يحن بيني  وبين نفسي اگول راح الگاه ينتظرني لكن ولا مره شفته  دائما ابقى ويا هويده وكروبها  لان بديت اخاف من البنات واتجنبهم والولد الي ويايه بالشعبه على كد السلام . واذا شغله تخص الدراسه والمحاضرات لا سوالف ولا ضحك ولا شقى
جانت امتحانات نص السنه
بس ردتها تخلص واكعد بالبيت بديت  احس بعذراء واعرف من جانت تصفن تذكر امور تجمعها بسنان
مثل ما اني اتذكر وليد
(شكد جنت فرحانه بأول يوم داومت وهو طاير اتذكره من واگفه گبال ميز التواليت امشط شعري مدلي راسه
وليد: اليوم اكابلج  حتى ما اوصل لقسمي
مريم : ابتسمت اي ابقى ويايه حتى اتعلم على المكان
وليد: اليوم ادليج كل الجامعه ومكان هويده وسلوان ومكاني حتى اذا تحتاجين شي بالايام الجايه تجين علينا )
(تذكرت من وصلنا جان هو ابويه الي وصلني لقسمي ودلاني شعبتي وبقى يمزح ويايه ' هسه يعرفوكم صف اول
وهسه يبدون جماعة الصفوف الثاني والثالث والرابع يرسمون عليكم بسوالف علاقات ويبدون يتراهنون على فلانه وعلانه وتبدي المصارحات انت يبطه الي يوصل يمج
بس گليلي اسمه
اي حتى يوميه تگب العركه ضحك
لعد شلون ؟
اطمئن اني ما انطي مجال لتخاف عليه اگلهم مخطوبه
هم ينهزمون .
والله ياسر قفلها بوجهي اريد اشوف شوكت يفكها ونلبس الحلقات يله كم شهر وتجي العطله '.)
اشتاقيت  اطلع من المحاظره و الگاه ينتظرني
جنت مرتاحه ومتونسه الى ان اتعرفت على بنات من شعبتي وتعمقت بعلاقتي وياهم بسرعة وعرفت الاء الي من يوم عرفتها على وليد حسيت بكرهه الها  وبدت المشاكل بيناتنا بسببها جنت نتصوره  الموضوع من باب يتحكم بيه كخطيبته  مجنت مخليه ببالي الاء عدها سوالف علاقات الا من قطعت علاقتي بيها صرت  اسمع من البنات اكثر من مره  شايفيها
راكبه سياره ويا ولد بالتربيه رياضيه
وعرفت الولد الي جان يجي عليها مو ابن عمها مثل مجانت مفهمتني  صديقها عرفت  بعد فوات الاوان وليد مجان يكذب من گلي هي أتحارشت بيه وفهمت  جانت تحركني عليه حتى اكرهه ويصير بيناتنا مشاكل لان صدها فكرهته ورادت تنتقم منه بيه  وكدرت تحقق مرادها
وهالشي تأكدت منه بيوم مهر سلوان وهويده بعد  ايام من بدت العطله عرفت سلوان گايله اذا مترجع للبيت وتحضر المهر
يزعل منه ويقطع علاقته بي بهاليوم جنت انظف الصاله من دخل
سمعت صوته حسيت قلبي يرجف حتى من الخوف والارتباك راسي صدع خايفه شلون راح التقي بي
بقيت خاتله بالصاله ماطلعت عرفت من هويده صعد لغرفته بعد ما كملنا اني والبنات  اخذنا سنان  للصالون من رجعنا  فهمت من لحظه الي صعد ما نازل من غرفته  الا من بدت الحفله وكل الي عازميهم وصلوا 
نزل سلم من شفته اعصابي كلها ارتخت  ايدي ترچف ما اكدر الزم شي ولا اشيل شي
احس الدموع كلها اجمعت بطرف عيني لو بيدي اجره كدام الكل واحجي ويا ابررله وافهمه كل الي سمعه مو صحيح
عينه ما لمحتني  كأنه ماموجوده بالمكان بقى ويا سنان
وعذراء وشهد اغلب الوقت  بقيت استرق النظر بحسره وتنهيده ياربي شسويت بنفسي
متحملت بعد  صعدت دموعي ما فارگتني لحد ما   تعبت وگلت  خلص
الي سويته من ايدي اتحمل النتائج واصير مثل عذراء
اسلم بالامر قسمتي ونصيبي ويا  لهنا انتهت
مجنت اعرف هو مثل حالي دخلت للحمام لگيته واگف گبالي يباوع على نفسه بالمرايه ووجهه مبلل  مبين تعبان  من شافني غمض عينيه اندار صار گبالي وصدره يصعد وينزل نفسه سريع متحامل عليه من نظراته بقينا لحظات واحد يباوع على الثاني بحركه سريعه
جرني من ايدي وداني للهول سد الباب لزمني من وجهي  بغضب.
وليد: على كد ما حبيتج كرهتج والله لا اندمج على كل كلمه سمعتها لا اندمج على كل يوم جنتي تضحكين بي عليه وتستغليني لج والله طلعتيني اثول بس صحيتيني من اليوم اعد عليج النفس صوتج ما اسمعه بالبيت
المكان الي اكون بي اياج ادخلي  حاولي متخليني اشوفج
لان متحامل عليج لدرجه اأذيج وميرفلي قلب كل الي صارلي من ايدي انطيتج اكبر من حجمج .
مريم : معرفت احجي شي بس دموع تنزل واشوف نظراته شكد متغيره واحس بأيده ترچف مخنوگ ..
وعيونه تلمع بقهر مجروح مني جرح رجل بكبريائه
وبقلبه ،
الي سمعته مو صحيح بساعة غضب والله احبك ( نزل ايده )
وليد: بعدج معرفتي قلبي انغسل منج والايام تثبتلج
تحبيني ولا لا بعد ميأثر بيه لان مسحتج من حياتي
بكد زينيني وياج بعتي حقاره ويايه بس شويه صبري عليه .
مريم : من طلع ايقنت خلص الي بيناتنا انتهى .
سنان: من عقد سلوان وعرفت راح يسوون حفله شفتها فرصه اعرف شهد لجدي ولاهلي بس بقت شغلة شلون
ادخلها للبيت مترهم اني اعزمها  لازم عذراء الي تبادر
ثاني يوم طلعت لعذراء لكليتها جان احساس الخجل والارتباك ملازمني لكن ما جان كدامي غير حل بقيت انتظرها الى ان طلعت من المحاضره
اتفاجئت من شافتني
عذراء: هلو شعجب اليوم مار
سنان: تنهدت اخاف اكلج وتزعلين .
عدراء: ابتسمت ليش ازعل گول اكو شي ( احجي ويا بس دكات قلبي ترجف )
سنان: عذراء اريد منج تعزمين شهد على مهر هويده وسلوان .
عذراء: ابتسمت ابتسامه الطير المذبوح شنو هالقوه الي بداخلي تخليني استقبل هالموضوع واكدر امثل متقبلته ..
معقوله حبه ينطيني هالقوه معقول اني هيج قانعه اشوفه يروح مني لغيري ومتحمله لهدرجه احبه بحيث تهون عليه
ألامي وميهون عليه اشوفه متعذب وحاير )
بلحظتها صرت جريئه جاوبتهسنان موضوعك ويا شهد اني احله ويا جدي اني احجي ويا وافهمه احنه اخوه  والي براسه ما
ما اله طريق بيناتنا لاتخاف ما اخلي هالموضوع يوگف بطريق سعادتك جدي بعده على قناعات ايام قبل
ميعرف الدنيا تغيرت واحنه هم تغيرنا وكبرنا يمكن هو فسر علاقتنا غلط بس اني فاهمتها صح واكيد مثل ما اتمنى لوليد
يرتاح بحياته اتمنالك هالشي
ريح راسك من التفكير الي تريده راح يصير اليوم من نرجع اعزمها
جانت الكلمات الي تطلع مني مثل الي قلبه ينزف ويكابر
محاس بالالم من كميته حراره اجتاحت جسمي مثل الي يلفظ انفاسه الاخيره ويودع اخر امل اله اريد هالشي ينتهي حتى ارتاح واعرف سنان لا كان ولا حيكون الي بيوم
اريد اتعود بدون امل بدون انانيه بلحظات افكر ممكن القدر يجمعنا اريد ارجع عذراء القديمه واتناسى هالحب وجرحه اريد ارجع قويه واكمل بلا احلام واستفيق على واقع
حقيقي بلا ذكريات واوهام 
عزمت شهد و بيومها ايقنت من نظرات الحب الي بينهم حرام تكون نهايتها ألم لاثنين قدرهم تنجمع قلوبهم بحب صافي
مابي ايحاء للكذب كلشي بي صادق يشع مثل النور
ايقنت كبريائي فوك اي حب كبريائي فوك اي ضعف
الي رسمته واعاني منه اني دخلت نفسي بي ولازم اتحمل الى ان اتخلص من دوامه هالمشاعر من كثر ما جنت اقرأ قصه ذهب مع الريح صابتني لعنه ريح الحب اخذت مني تفكير سنين من طرف واحد وقلب
ينبض بكذبه حسيتها وحدي وكبرتها بتخيلات
بيوم الحفله شفت سنان ثاني سنان بقلب ضعيف خايف ومرتبك تصرفاته مثل الي الحفله حفلته هو اهتمامه بنفسه وبمظهره، قلقه وترقبه للساعه وعينه على الباب يطب ويطلع يسألني شوكت تجي لاول مره اشوفه يتنازل ويحاول يتودد لجدي
حتى وهو ما مقتنع بأفكاره مثل الطفل الي يحتال حتى يحصل عاطفة اهله لاول مره يدخل شعور الغيره والحسد بقلبي لاول مره احسد شهد على هالانسان وحبه الها
اصبر قلبي واواسي ( تحمل تهون ويصير ماضي يوم بعد يوم تصير اقوى )
سنان: من دخلت شهد حسيت الدنيا وكفت والالوان تغيرت
والعطر تغير اتنفس مشاعر ازفرها وارجع استنشقها
شفتها تتلفت ناديتلها عذراء تستقبلها وياها امها
وراها استغليت فرصه وكفتها ويا عذراء رحت سلمت عليها
ومشاعري فاضحتني وليد وسلوان وتروني بغمزاتهم وابتساماتعم الي تحمل معاني افهمها الى ان مر وليد بجانبي واشرلي رايدني وكفت ويا على صفحه ، خير اكو شي .
وليد: لا حبيبي بس شفتك مشطت شعرك بأصابعك هواي ترى كثره التمشيط والتفكير تاليها صلع هههه
سنان: كافي لك انت وذاك دوختوني ترى اخوكم ماعنده خبره مو مثلكم انت وهذا صايريلي كزنوفا
وليد: يعني ماعندك مانع اسلم على چنتنا الجديده
سنان: لا تعال سلم عاد الگاها حجه ابقى واگف وياها امها موجوده
وليد:لك دتلحلح وعرفها على جدك بلكت يلين البنيه مبينه بت اوادم وطيبه لتضيعها هاي فرصتك
سنان: ادري شلون اخذها واعرفها دا اگلك امها موجوده واخاف من رد فعل جدك هو قافل عليها من قبل ميشوفها
وليد: والله البنيه اني ارتاحيتلها مبينه ورده خوش تنيشن
طلعت مو هين صدك الخوف من السكوتي
روح احجي ويا گله البنيه ضيفتي لاتفشلني هو صاحب واجب ومضياف  ويعزك ميردلك طلب ولا راح يفشلك اخذها مني حجايه محد يفهمه بكدي قلبه رهيف لتغرك عصبيته
سويت عمله محد يسويها صح ماخذ موقف مني وميحجي ويايه بس ادري الي بقلبه غير، بيبيتي  فتنتبي عليه هو الي طلب من سلوان يتصل عليه گايله شنو معناها كاعد بيت بيبيته ماعنده بيت
سنان: انت اشوف هيج
وليد: اخذها مني حجايه انت من فتحت الموضوع ويا صار كم شهر هسه هدئ وقلبه حن عليك وعرف مراح تغير قرارك بالنهايه  راح يسلم بالامر
يدري كلنا طالعين عليه من نقفل ماكو رجعه والي براسنا هو الي يمشي .
سنان : زين لعد خلي اروحله
يابه البنيه وامها موجودين اريد اعرفك عليهم هم ضيوف عذراء قبل ميكونون ضيوفيلا تفشلنا وياهم ،عكد حاجبه وتنهد .
ياسر: وينهم ناديلي بيبيتك
سنان: افتر بالبيت ادور بيبيتي لگيتها كاعده ويا كرايبنا استحيت اناديها  ناديت على امي
أمال: ها ماما
سنان: البنيه الي گتلج عليها موجوده تعالي شوفيها بالحقيقه
تختلف عن الصور ونادي بيبيتي
أمال: ابتسمت يعني هالاناقه وراها العروس ..
سنان: خجلت من ملاحظتها يله تعالي عيب باقين يم عذراء وعمه سعاد
أمال : هسه انادي عمتي ونجيك .
سنان: تقدمت سلمت على والده شهد عندي سابق معرفه بيها من تخربطت شهد ووصلتها عرفتها على امي وبيبيتي رحبوا بيها التفتت لگيت جدي واگف بصف عذراء وشهد ومخلي ايده على چتف عذراء وابتسامه على وجهه اتنفست براحه واستبشرت خير
بلحظتها سألت بيبيتي عنها والدتها نادتها تجي اتسلم
وهي دتخطي بأتجاهنا بيبيتي منتبهه على نظراتي لشهد صدمتني من همستلي
محاسن: مو حرام بيبي تضيع بت عمك بشنو هالبنيه احسن منها
سنان: حبيبتي ردتج عون متفرق عنها  عذراء ورده وماكو احسن منها بس قلبي حب هالبنيه وعذراء اختي ليش تقهريني بهالحجي
وانت تعرفين اني مو مثل الولد اكدر اتقبل اخذ بت عمي وامثل عليها واظلمها انت ترضيها اخذها وهي تدري قلبي معلگ بوحده ثانيه كلشي قسمه حتى الحب اني قسمتي حبيت هالبنيه .
محاسن: والله بيبي البنيه مبينه حبابه وامها محترىه بس والله من قهري احجي ما اريد اغثك وما اقبل عذوره تتأذى  الله كريم اذا مقسومه الك هالبنيه متاخذ غيرها .
وليد: سمعت حجي بيبيتي ويا عمه أمال انصدمت بموضوع عدراء مخلين ببالهم سنان ياخذها وعمه أمال تواسيها (' عمه كلشي قسمه لا تنقهرين خلي نتعرف ب البنيه ونحكم ')
بعد ما التقوا بالبنيه انتبهت على بيبيتي واگفه ويا سنان تحجي ويا منفعله فهمت من تعبير وجهها اكو اشكال ،مجرد اتذكر كلام عمه امال وبيبيتي احس انغثيت ما متقبل  فكره اختي تاخذ سنان وهو يريد وحده ثانيه
شنو ذنبها يفرضون هيج زواجه بحكم العادات وعقليتهم
ما تمنيت الموضوع يوصل لعذراء وتعرف تفكير جدي وبيبيتي خفت على مشاعرها لحظتها فطنت  هي سبب المشكله بين سنان وجدي بالمزرعه ورفضه للبنيه مو لسبب يخصها انما  راد سنان ياخذ عذراء هو هذا الموضوع الي تحرج سنان يحجيلياه بيومها من سألته)، رحت وگفت بصفهم
ها حسونه شلونها الچنه الجديده زوجيها لسنان واخلصي منها ترى رجلج
ارتاحلها ليروح ياخذها عليج هاج هاي بشهاده شوفي انطلق ديسولف وياها هي وعذراء.
سنان: هههه لك والله رايد اتعلم دروبك ويا حسونه حتى تلين قلب جدي
محاسن: والله اني ما ادخل بهالموضوع جدكم هو يقرر مو تالي تاخذها وتعبك يكعد ياكل راسي على ابو انتِ طبكتي ويا وخليتني اوافق .
سنان: اذا هاي حجتج اطمئني لو أطلع حليب امي من خشمي اني راضي وما اذمر بتوسل بس انت قنعي  وامدحيها كدامه .
وليد: هاي شبيك حسونه قلبها طيب  متكدر اشوف واخد بينا قلبه معلعل .هسه اني راح توگف ويايه منا لحد ما تقنع هالشايب يوافق اخطب لارا
محاسن: لا انت سالفتك غير اني اول وحده ما اروح وياك سنان
سالفته غير عنك ما سوه سوايتك اكو واحد يدك هالدكه ب بت عمه اني ما حجيت اريد السالفه تهدأجدك ما متحمل تعب وعصبيه بعدين نتفاهم ونتعاتب
سنان : اني اترخص اروح يمهم
وليد: ماطول بقينا وحدنا راح احجي وياج شي محد يعرف بي لان ما اتحمل اشوفج شايله بقلبج عليه بت عمي تدرين بيه احبها بس هي متريدني شلون تريديني اخذها وادري بيها مغصوبه عليه
محاسن : منو گلك .
وليد: سمعتها بأذني ولتفتحين وياها الموضوع لان حسمته ما اريدها بعد .
محاسن: لك بيبي هاي بعدها صغيره متفتهم انت تاخذ بحجايتها بالعشره تحبك .
وليد: ما اريد هالعشره عادي متقبلون اخطب ابقى بدون زواج
لحد ما يجي احد ياخذها ذاك الوكت راح تفتهمون ما الي رجعه وياها
وراها عود اخطب ما مستعجل البنيه لارا وموجوده واني حجيت وياها وهي هم طلبت مني ااجل هالموضوع بالوقت الحالي
محاسن: يعني هم متحبك وانت متحبها تحب بت عمك يعني
بالعشره راح تحبك خو اخذ بت عمك واصبر عليها ليش تصبر على الغريبه وتنطيها فرصه ومن يم بت عمك دماغك قافل .
وليد: الغريبه ما كسرت قلبي ولا اذتني بت عمي سوتهن
وهذا الموضوع الي حجيتلج عنه اني لامي محاجي والله اذا حجيتي لاحد حتى لجدي ما ابقى دقيقه بالبيت واذا عرفت فاتحته ويا مريم هم ما ابقى .
محاسن: والله بيبي اني مصدومه بيكم هاي تاليها من وراكم يصير زعل ومشاكل بالبيت
وليد: بيبي لتخليني اتندم حجيتلج ترى ما متحمل روحي
على شنو يزعلون لا اني اول واحد يخطب ويفسخ خطوبته اعتبروها هيج كلشي قسمه ونصيب ومريم مو نصيبي ولا قسمتي
اذا تريديني اطلع من البيت وبعد ما ادخله احجي الي سريتج بي لاحد .
محاسن: كافي ولك كاعد تهددني اذا طلعت راح اموت وراك
وليد: ابتسمت لا بس متتحملين فراگ حبيب قلبج انت معترفتلي اني عزيز قلبج ابن معن تنكرين
محاسن: لا ما انكر بس انت هم اذا تحبني تاخذ بت عمك
والله حرام ياخذها الغريب دشوفها وينها هي شو ما موجوده
وليد: ما اريد اشوفها گتلج ما ارجع عن قراري ريحيني وبعد لتفتحي ويايه
محاسن: والله بيبي اني گايلتلك انت ماجايبها من بره طالع على جدك بعدين تتندم ومترتاح .
وليد: ريحي راسج ما اتندم اني اتحمل نتيجه قراري.
( الي بقلبي غير عن الكلام من نبهتني بيبيتي هي ماكو
جنت مشتاق بس المحها طريقي انقفل وياها بس يبقى قلبي معلعل بيها انتظره شوكت يشفى وينساها تحججت ويا نفسي اصعد لغرفتي بحجه ادخن بس اعرف اكذب على نفسي رجلي اخذتني لفوك حتى بلكت اصادفها من صعدت احس المكان يخنكني اصارع قلبي وعقلي واحد يحن وواحد يقسى الي بداخلي تعبني صار ايام مثل المدمن حتى يشفى يتأذى ومن كثر الالم يفكر يرجع لادمانه لكن ارادته هي الي تمنعه كبريائي هو الي يمنعني حسيت على نفسي دخلت للحمام غسلت وجهي احجي ويا نفسي بالمرايه
نسيت حجايتها احب حبه الي ما فهمت من كل كلامها يعني متحبك وبعدك ما توبت منها من صارت كدامي بالمرايه توقعت نفسي دا اتخيلها
بس حركت ايدها وهي تمسح دموعها خلتني التفتت اتأكد اني مدا اتخيل وهي كدامي صرت مثل التمثال من اعصار المشاعر المخربطه بين لهفه واشتياق وبين حقد وكره صفيت بلا مشاعر بلحظه صحى  الغل والحب بنفس اللحظه
ما حسيت على نفسي بس احس بكم الاذيه الي اريد اردها الها وجهها بين ايدي كل دمعه  منها تلامس  ايدي احسها تجويني كرهتها لان خلتني عاجز امسح هالدموع
كرهتها لان خلتني ما مفتهم حالها وليش دتنزل هالدموع وعلى منو كرهتها اكثر لا ن زرعت الشك بداخلي حتى من گلتلي احبك ما كدرت اصدگها الي سمعته اكثر لاخر لحظه قلبي جان بي خط رجعه بس من گلتلي احبك
صحيت هم راح ترجع يا قلبي اصدك وينضحك عليك بلحظتها انتهى اخر امل حتى لو جانت تحبني ضيعت هالحب بغرورها .