#حكايات_من_بيت_جدي
اماسي الليل
تكملةالجزء٤٨
♥️♥️♥️♥️♥️♥️♥️♥️♥️♥️♥️♥️♥️♥️♥️♥️
مريم : وانتِ من اهله ... طفيت ضوه الغرفه
رحت كعدت بالهول ( الي مفتوح على غرفتنا) خليت الصوبه كدامي ... شغلت التلفزيون
طالع فلم ... بقيت كاعده انتظره يجي ... بحجة كاعده اتفرج
مر الوقت ... بديت احس بنعاس ... خليت كفوف ايدي واحد فوگ الخ ... على مسند القنفه ... نزلت جانب وجهي نمت عليهن ... وبقيت اتفرج الفلم واني كلشي ما فاهمه منه ...بقيت صامده
الى ان انفتح باب الغرفه .... التفتت دخل بيده ... تلفون ...
قلبي احترك ... هذا شيسوي بي ... مصعده ...دخل على ضوة التلفزيون ... يتحرك ... مر من يمي شافني كاعده اتفرج وكأنه ماموجوده كدامه ... خله التلفون على الطبله ... بالاول ما انتبه عليه ... الا من گمت ... اطفي التلفزيون التفتت دا اطلع ...
اتقصد يفتح ضوه الهول ... صار كدامي ... بس شفت ابتسامه مكتومه على وجهه فضحته عيونه ... ما اعرف ليش قلبي ... كام يدك سريع ... راح للكنتورطلع ملابس البيت ... لبسها وخلى ملابسه الي جان لابسها ... على حافة الفراش .....
وليد: من شفتها كل اعصابي ارتخت كتمت ابتسامتي ... وبداخلي افكر بت نجاة بعد اكيد وارثه الخباثه .... مثل ما وارثه الخلقه ... اليوم متحلفه ...احسن شي لف راسك ابو خالد اليوم حتى تلفون لا تلزم .... خلي الليله تعدي على خير ...
لا تالي بت نجاة تذبح البزون
بس قلبي ما ينطيني ابقى ساكت ...سطرتني ...
بعدنا على الاتفاق لو قلبتي
مريم : عكدتله حاجبي ....( التفتت عليه ... شفت نظراته ورجع وجهه طبيعي ...يريد يحجيني حتى انطي مجال )لا ما قلبت بعدنا ...
وليد: وين البطانيه الي جانت على القنفه ...
مريم : ... هاي اني اتغطى بيها الجو بارد متكفيني وحده ( عاكد حاجبه وحاقد عليه ... )
اروح اني اجيبلك لو انت تجيب من الغرفه الخ
طلع ...بدون ميحجي ... جاب البطانيات دخل وتطلع من عيونه نار ... سد الباب بعصبيه .... عرفت لازم اسكت و اتجنبه
غطيت راسي ... و بداخلي مشاعر بين فرح وبين قلق ...
صار هدوء ... اتوقعته نام ... وراها بدقايق ... ركزت ... اكو صوت اتأكدت من سمعت ضحكته .... حسيت تطلع نار من قلبي ... هذا صدك ... جان ينتظر تلفون مو يريد يغيضني
بقيت افكر ... اگوم اصالحه ...واگله تعال نام ... ب فراشك
بس اخاف يفشلني ... ويحجي كلام يغثني ..
لا خلي انام ... اذا عنده وحده ... قابل اذا صالحته راح يتركها
بالعكس راح يتعلم اني اصالحه ... وميحسبلي حساب ... انوب
اذا جان يعرف وحده ... ويحجي وياها بالختله ... تصير بالعلن ويجوز يتزوجها عليه .... (هالتفكير خلاني ... احقد عليه) ....
ثاني يوم ...
كعد من الصبح ... عصبي ... وعلى كلشي يتحجج ... بقيت بعيده عنه .... ما اتواجه ويا
لحد قبل الغدا بساعة ... سمعته نتر بيبيتي
ما اريد اتزقنب....
اجتي بيبي ... للمطبخ
محاسن: ولج هذا شبي ... اليوم متخبل ... بعدكم متتحاجون
مريم : اي بعدنا ... وهو گالب وجهه من البارحه
محاسن: شو شحاجيه ... ويا ومسممته
للولد
مريم : كلشي محاجيه ... هو من يوم يومه ... اعصابه فايره ...
بس انت قلبج عليه ... اذبين الصوج بالعالم ... وهو مينجرع
لا يرف قلبج عليه ... البارحه الليل كله نايم على التلفون ...
محاسن: اي خوش ... لعد خلي ... لحد ما يروح من ايدج ...
مريم : شسويله ... اسحب السماعه منه
محاسن : لا ... اخذه بالعيني والاغاتي ... يصير عصبي اسكت
اخلي يحجي ... هو يهدا ويتندم ... تالي انت تحقي ... بس
من يشوفج .. تراددين حتى لو جنتي صاحبة حق يلف الموضوع عليج
لج بيبي اني شكد حاجيه وياج كايلتلج الرجال يحب الحيله ...
فكري بالكلمه الي تريدين تحجيها ويا ... واختاري الوقت المناسب
هسه اليوم اتكفي شره ....عوفي لاتحجين ويا كلمه
مريم : والله يمه اني ما اكدرله ... اعصابه ما تُحتَمَل ... ليش اني لازم اتحمل ليش ما هو يضبط اعصابه ....
محاسن: هاي بعد قسمتج مثل قسمة بيبيتج ... وترى وليد فقير يم جدج ... والله جدج من جان بعمره ... خبلني حتى من يتعب من الشغل يطلعها بيه ... فد يوم ... العصر راد اكل قبل لا يطلع ...تأخرت عليه شويه ... بس خليت الصينيه كدامه گلبها ... وطلع ... وانت قيسي عصبيته.
هسه فهمتي
مريم : فهمت
اتأخر ما رجع للبيت قلقت عليه .... كلت اتصل على هويده اشوف طالع ويا سلوان
الو
هويده : هلا يا ام المصايب.... والله جنت ناويه اليوم امرلكم حتى اطيح حظج
على لسانج الي متعرفين ... تضبطي
مريم : عود بعدين رزليني... هسه گليلي ... سلوان طالع ويا وليد
هويده : واني شمدريني ... من وراج تعاركنا ... والبارحه حتى كلمه ما حجى ويايه .... ومانام بالغرفه ... على كد صعد بدل ونزل نام بالصاله ....
واليوم اول ما رجع من الدوام الظهر صعد سبح بدل ملابسه وطلع لهسه ما شفت وجهه
مريم : لعد وليد ويا .. ماطول نفس الوكت ... طلعوا
هويده : امشي نروح لبيت اهلي فد ساعة .... ماطول رجلج ماكو
مريم : روحي انت اني ... ما اكدر ... اليوم عينه بگصته ما الي خلگ المشاكل
هويده : من ايدج ... لو تعرفين تلزمين لسانج ... متصير مشاكل
اني هم ما اروح لعد .... قبل ربع ساعة جنت احجي ويا امي بالتلفون ... جانت طالعه قبل شويه رجعت ... گلتلي تعالي ... بس اني مرت اخوج ما اطيقها ...
امي تگلي ...هالايام حابتكم كل شويه تگله لميثم صيح سلوان وهويده ووليد ومريم
مريم : والله اني البنيه ما شفت منها شي ... وحتى تعاملها ويايه
زين ... مو مثل متگولين وياج ... يجوز السبب منكم انت وامي ... لان تحس بيكم تكرهوها ... تخبث وياكم
هويده : هو انت جايتلج يومين ... تريديها تخبث وياج لو تعاملج مثلي
بابا هاي تغار مني ... لان بناتي ... دائما يمهم و تشوفميثم متعلق برانيا وهي ميصير عدها اطفال تتخبل ... لج هي حاسدتني على سلوان
عبالها اني مسعده .... متدري بسوالفه ....
مريم : والله يا اختي .... سلوان شيسويلج مو بعينج ...
والرجال يتخبل من يحس المره متقدر ... تعبه وتنسى محاسنه .....وتركز بس على عيوبه
هويده : الي يشوفج تتفلسفين براسي يگول هاي شلون عدها عقل يوزن بلد ...ومخليه رجلها مثل المحبس بأصبعها ....
مريم :هو اني هم مابيه خير اعرف انصح غيري ... بس ما اعرف
أتصرف ويا رجلي ... وهم انتقده على عصبيته ...واطلع الصوج بي ... واتغاضى عن حاله التسرع والشك ... والعناد الي عندي ... اصلا اني احس هو يكمل كل عيب بيه ... . والله اليوم
من طلع لهسه احس روحي تائها بليا ...
هويده : لان تعلمتي عليه هناك مكابلج ... وبس انت اله بالغربه .... حسيتي هنا بالفرق
لان يفرفر ومكابل سلوان ... بس ترجعون بعد لا سلوان ولا تخامة بغداد
اكلج يله راح اروح .... عمه امال ... دتصيحني
مريم : يله اخذي راحتج وسلميلي ....
يمه ... راح اخذ خالد واروح يم عذراء.... لبيت عمي
محاسن : روحي ... هاج الولد خلي اني هم امر اشوف ام محمد شلون صارت ... بسرعة وارجع ...
مريم : دقيقه بس اصعد اجيب حجابي ... واجي اخذه ...
بين ما لبست الحجاب وحضرت ...مميه لخالد ... نزلت ... سمعت
وليد ... بالهول ... يلعب خالد ويسولف ويا بيبيتي ... سالها وين مريم لعد
گلتله صعدت تلبس الحجاب راح تودي لعمته ...
دخلت يمهم بقى متجاهلني
بالاول ما انتبهت على ملابسه مو نفسها الي طلع بيها الا من تقربت منه اخذ خالد حتى اروح .... شفت شعره يلمع مبين رطب ...
بلحظتها ... حسيت قلبي نقبض وألم ... بداخلي ....
ماخطر على بالي ... غير جان ويا وحده ....
( شوكت اخذ ملابس ... هاي الملابس جانت موجوده بالكنتور ...
لو جبناها ويانا من سويسرا ... لو جانت بغير مكان ...
ال لو ... خلتني ... ما احس من اخذت ابني وطلعت لبيت عمي ودكيت الباب .... الا من صارت عذراء گبالي ....
عذراء: ياهلا ... بروح عمته ... تعالي مريومه
الصبح ابويه ... ذكره ... گلي جيبي ... بس التهيت بالشغل
وهو هم نام ورا الغدا والعصر طلع ... ويا جدو
سعاد: شلونج مريومه ... خلودي ... حبيب بيبي ... تعال
مريم : هلو عمه شلونج نزعت حجابي ( ابني شمر روحه على بيبيته) ... بقت تبوس بي ...
عذراء: بصوت ناصي ... شبيج
مريم : بعدين نحجي ....
عذراء: يوم انت حيري بخالد ...راح نكعد اني ومريومه ... بالغرفه
سعاد: روحوا وبقوا يمي ...
عذراء: دخلنا وسديت الباب ... شكو شبيج ... مو على بعضج
مريم : كأنه جنت انتظر احد يگلي شبيج ... حتى تنزل الدموع الي بقت محبوسه من انتبهت على ملابسه وشعره ... لحد هاللحظه ...
عذراء: شبيج مريومه .... صاير شي
مريم : وليد ... طلع ورا ال ١٢ الظهر هسه دخل للبيت ...
بغير ملابس وشعره رطب ... مبين مغسول ...
عذراء: يعني شنو ما فهمت ...
مريم : يعني عنده مكان ثاني ... ويعرف وحده ... ماكو غيرها ..
وين بدل ملابسه وين سبح ... اكيد لو بفندق لو ببيت ...
عذراء: امسحي دموعج ... ماكو هيج حجي ... ليش هو لو يعرف وحده غبي ... يجي مغير ملابسه ... خو يبقى بنفسهن حتى ما يثير الشك ... ولا يفضح روحه
مريم : مو البارحه ...من گتلج ضوجني ... اني هم ردت اضوجه گتله (بعد لو اشوفك ويا وحده ... لو وين تطلع ويامنو تحجي .. ووين تنام ... ميهمني ... واعتبر نفسك اصلا ما متزوج
گلي .... اتفقنا مو تغيرين رآيج ... وبليل من رجع ... سألني
بعدج على الاتفاق ... جاوبته اي ... وادري بي رادها حجه
حتى نتصالح ... بس اني غبيه ... صديته ... بعدين سمعت
صوت ضحكته ديحجي ويا احد بالتلفون ... تالي الليل
واليوم ... اخذ راحته بعد ميهتم الي ... لان هو .. قبلها گلي ... بلسانج
اخذت الموافقه ... وحاير بالموضوع واخاف على مشاعرج ...
لج مبين لو متزوج لو مصادق وحده .... ماكو... غيرها ...
عذراء: اكلج انت ليش ما تباتين يمنا اليوم ... هم ترتاحين ونفكر اني وياج صح ... لان اذا رحتي ... اعرفج ما تتحملين ... وطگيها بوجهه وتصير مشكله ... ويجوز ... كل شكوكج ما الها صحه
مريم : اني اصلا ما اريد ارجع واشوفه ... ما اتحمل ما احجي والله احس ألم بصدري ... من اتخيله جان ويا وحده ... قلبي مو قابل يصدك
لو يشك بي عنده هيج سوالف ... بس كل وضعه يدل عنده هالسوالف ...وديخوني
عذوره عود روحي جيبي ملابس لخالد والحليب ... عفيه
عذراء: ميخالف ... فد شويه اروح ... هسه امسحي دموعج ...وسمي بالله ان شاء الله كل هالشكوك ما الها صحه ... اهم شي انت
تصيرين قويه وما تبينين ... تعرفين شي او شاكه بشي لازم تصرفين طبيعي ...
اگلج ... ابقي انت هنا ... تمددي بفراشي ارتاحي وبطلي هالبچي واني راح ... اطلع
اگول كدام امي ... (مريومه هبط ضغطها ... وگتلها نامي وارتاحي واليوم راح اخليها تبقى يمنا ... )
فهمتي ...
مريم : فهمت
عذراء: خلي اجيبلج كلاص مي .... واروح اجيب غراض جركايه انت تريدين شي
مريم : لا ... بس الي وصيتج عليهن ....
تم
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!