رواية حكايات من بيت جدي الفصل السابع عشر 17 - بقلم مريم اماسي الليل

#حكايات_من_بيت_جدي
الجزء السابع عشر
اماسي الليل
طبعا گتلكم .... اني هالقصه ناويه اكتبها براحتي بدون استعجال
لذلك اتأخر لان ... ارجع اراجع الاحداث للقصص  يله ابدي اكتب حتى ما انسى شي ...يعني اتحملوني
لازم انهي حدث ... يله افوت بحدث ثاني
ما اريد.... اخربطكم

ةيله گوم خلي نرجع اتأخرنا ليضل بالهم
شلون راح ادخلك  للبيت ومحد يشوفك ما ادري ساعدته يگوم من على الرصيف بالجادريه ركبته السياره
بقى ساكت جنت مصدوم بي  ومن عرفت حقيقة عمي قيصر وسلوان يشبه نفسه بي
سلوان : راح اطلك هويده خطيه اظلمها وتصير مثل امي عاشت سنين تعاني من ابويه
وسوالفه حتى تحتقره بينها وبين نفسها  لان تعرف حقيقته لكن متكدر تحجي وتعيبه لان محد يصدكها
وليد: بقى يضحك واني صافن مصدوم بكلامه
وهو مستمر بالكلام
(اني هم مثل قيصر لا وفوكاها مستنكف من هيام واني حالي حال هاني بس اعرف امثل زين )
بقيت مامستوعب كل هالاعترافات وبداخلي اجاوبه بالفعل انت ممثل الي اني مرافگك سنين ما ادري بحقيقتك الادهى من عرفت بي مصادق بنيه جيرانه متزوجه وزوجها صديقنا بلحظتها ردت
اضربه بس مجان بوعينه بقيت ما مستوعب ما اريد اصدك
ابررله بداخلي ( هذا لان سكر  ديتخيل وكلامه مو صدك لان مو بوعيه فد يخربط بالحجي  والي مخليني اشك بكلامه البنيه مرت صديقنا فقيره حتى طلعه من البيت متطلع الا ويا رجلها شوكت صارت عنده علاقه بيها
جنت اتمنى اكدر احجي لهويده واخليها اتركه بس صعبه
هو مأمني على نفسه وسره  والبنيه هسه مرته معناها تطلك وتصير المشكله بوجهي حسيت نفسي مجتف ما اعرف شلون اتصرف قررت اواجهه باجر من يصحى
واهدده اذا بقى بهالدرب انطي خبر لجدي بلكت يردعه
ويخاف على مشاعر هويده اذا عرفت لان حتى وهو بحاله السكر جان واضح من كلامه يحبها و يهتم لمشاعرها ويخاف يأذيها
بس يمكن يتركها  احسن من ما تتعب والبنيه فقيره مراح تعرف تقشمره لهذا ابو دروب العوجه  )
وصلت لباب البيت دماغي يفتر شلون راح ادخله لحد يحس بي معناها تقوم القيامه استغفر الله شلون ورطت نفسي
تركته بالسياره ونزلت دكيت الباب سمعت صوت سنان
منو
جاوبته اني وليد فتحه دخلت للهول بس هو وميثم وعمي سعد
كاعد على الميز حلو  ماكو غير افوته من باب المطبخ واصعده محد يشوفه
سنان : لعد سلوان وين
وليد : برا يم السياره واگف ويا محمد
بقيت مرتبك ليروح ينزل ويفضحنا طلعت من المطبخ
نزلته،لك حلگك  لا تفتحه  وتفضحنا خلي الليله تعدي على خير .
سلوان : لك راسي راح ينفجر
وليد: يطبك مرض لو تدري شكد كارهك بهاللحظه سد حلگك ما اريد اسمع صوتك لحد ما نصعد ،
من صعدته حتى اشاهدت لا الحظ يطلع جدي ويشوفه معناها يلزمنا الباب
كملت الدرج كلت يا الله طلعت كدامي عذراء من الحمام
عذراء: شبي سلوان
سلوان : راسي
وليد:  وصلته لباب غرفته التفتت جاوبتها  عنده هبوط  دايخ هسه ينام ويرتاح
عذراء: اقيسله ضغطه
وليد: لا حبيبتي روحي نامي  وديته للمضمد قاسه   قبل منجي ما بي شي
دخلته على فراشه تمدد جبت دوشك وفرشته بصفه
اخاف اعوفه ويروح ينزل ويفضحنا هو نام واني بقيت للصبح كاعد فاتح الشباك ادخن وصافن بهالدنيا الغبره وشلون الناس الها الف وجهه وشلون الانسان يكدر يخون ويخلي عينه بعين الي يخونه بصلافه
رحمتك ربي جيرني من هالطريق اني صح ما ملتزم بصلاة بس ما اغضبك الحمد لله على نعمتك منطيني عقل افكر بي حتى ما اغلط وانجرف للحرام بقيت انتظر صلاة الفجر قررت من هاليوم ابدي اصلي و اتقرب لرب العالمين
عذراء : ثاني يوم كعدت مقرره ابدي من جديد ما اخلي اي الم ومعاناه تغلبني ورا الريوك كعد سنان بصفي حجالي شلون نزل لجدي بعد ما حجيت ويا بالسياره لگاه حاسم الموضوع بسرعةانطاه الموافقه ،
وطلب مني اتصل على شهد انطيها خبر تبلغ اهلها ويرجعولنا خبر
بالفعل وصلت مرحله ما اهتم مستسلمه استقبلت كلشي بقوه، كلام هويده خلى عندي اراده ما اخلي دمعه تنزل ولا اخذل نفسي
للعصر اتصلت على شهد بلغتها جانت فرحانه من صوتها بلغتني تحجي ويا اهلها وترجعلي خبر
سنان بقى يترقب للمغرب الكل ملتمين بالهول بيبي كالعاده تلزم سنارتها تشتغل بالصوف
وجدي وابويه وعمامي يتفرجون اخبار الثمانيه
ووليد كاعد بيده طاسة اللبلبي وبصفه سلوان   على القنفه الي بنهاية الهول يتهامسون مبين اكو شي بيناتهم من عگدت الحواجب نادرا منشوفها بيناتهم
لان دائما متصافين
وسنان يحجي ويا عمه امال وامي وعمه نجاة يكرزون  حب ويسولفون
اما مريومه تضرب صفنات وعينها على ابو سمره شالع قلبها
وهويده بصفي بيدها مجلة برده اجنبيه تخص الموضه والتفصيل 
واني لازمه كتاب قصائد نزار قباني  ناويه افتحه للحظه الاخيره غيرت رأيي وشاركت هويده بمجلتها 
رن التلفون ديرفعه وليد  صحت الي الي التلفون شفت نظرات سنان  تترقب رفعت السماعه الو
شهد: هلو عذوره همزين انت جاوبتي جنت شايله هم لا احد يشيله استحي اجاوب
عذراء: لا عرفت انتِ
شهد: عذراء اهلي يطلبون مهله يسألون على سنان تعرفين هاي اجراءات التحري عن الخطيب .
عذراء: گليلها لخاله عذراء تكلج بضمانتي لتتأخر ترى الولد على نار .
شهد: عذراء استحي احجي ويا اهلي خليهم براحتهم وانت احجي ويا سنان گليله يتحمل ان شاء الله ما يطول بابا بالرد
عذراء: ان شاء الله .
مريم : ثاني يوم كعدت الصبح احس نفسي مشتاقه اشوفه من البارحه العصر من طلعنا بعد ما شفته نزلت لگيت هويده وسلوان بالمطبخ ديتريگون سوى افتهمت من كلامه وياها جان طالع هو ووليد البارحه بليل ويا ولد ملتمين  ب بيت واحد منهن و اخذهم الوقت رجعوا متأخرين اباوع عليها هو يسولف ويبرر وهي ولا مهتمه ،   بداخلي احسدها على الا اباليه الي عدها وهي البارحه راحت نامت كالعاده على موعد نومتها ولا قلقت ولا انتظرت يرجع رجلها واني هذا مشوفني نجوم الظهر مكدرت اغمض عين بقيت  طول فتره الانتظار اتفرج مجله وبالي كله يمه اخاف عليه لان يسوق سريع
الا من سمعت صوته يحجي ويا عذراء يله كدرت انام ،
حتى لو وكف النصيب بطريقنا بس قلبي ميكدر ميخاف عليه ولا ميحبه من اول ما فتحت على الدنيا وهو ورايه وكدامي وين ما التف ما اشوف احد غيره حتى من نلعب ختيلان جان يعرف الاماكن الي اختل بيها حافظني ياريت نرجع نختل سوى ورا البرميل وورا البرده وبداخل الكنتور ياريت يرجع
يخلي ايده على حلگي حتى ما اطلع صوت' ابتسمت من يوم يومه متسلط لليوم اتذكر عگدت حاجبه وخنزرته يمنعني من الكلام حتى منخسر ومن نخسر يگلي خلص بعد متجين ويايه بالفريق وثاني يوم محد يريدني ويا لان اخسرهم
ينجبر ميخليني وحدي يگلي تعالي بس هاي اخر مره وكل مره هاي اخر مره وما انتهت هالمره الا من كبرنا وبطلنا لعب ))
محاسن: بيبي وين صافنه ومشغله العين ما عليها شي
مريم : التفتت لكيت بس بيبي وهويده بالمطبخ ،
هسه اخلي الجاي .
محاسن : هويده بيبي من سويتي ريوك غير تسوين جاي للكل
هويده : بيبي مو سلوان راد ريوك سريع فسويت قلبل حتى بسرعه يتخدر روحي انت اني ومريومه نسوي الريوك .
محاسن: مو تنسون البيض المسلوك لجدكم .
عدراء: صباح الخير
صباح النور .
هويده : عذراءماطول كعدتي ساعدي مريم خلي اروح اعزل غرف الولد وليد كعد
عذراء: ما اتصور مشفته بالهول وياهم .
هويده : هسه اصعد اشوفه واكعده يتريك بين متخلصون
صعدت فتحت غرفة سلوان لگيته نايم على دوشك بالگاع
وليد وليد .
وليد: ها هويده
هويده : يله انزل  حتى تتريك شويه ويصبون
اخذ مخدته وبطانيه وطلع من الغرفه  رجع مد راسه
وليد:  هويده فدوه خلوني نايمه اذا احد صاح گليلهم ما اريد هسه من اكعد ولحد يوصل لغرفتي عوفوني لحد يكعدني الا اني اكعد
هويده : اخذ راحتك هسه ابلغهم دخل  لغرفته سمعت صوت طگت المفتاح قفله .
مريم : دنصب الغده وهو بعده نايم  بيبي كالعاده تستفقده
وتقلق عليه لان عنده ربو من يطول بالنوم  دزت عذراء اتكعده
دقايق ونزلت عذراء
( دكيت نومه ثگيل ردت ادخل لكيته قافل الباب )
محاسن : بيبي  هويده خلي سلوان يصعد  يشوفه اخاف بي شي
هويده : بيبي لاتقلقين جان نايم بغرفة سلوان وحجى ويايه كلشي مابي بس شكله سهران ونعسان
مريم : بأثناء ما ديسولفون نزل يتمختر عيونه مورمه شبعان نوم ووجهه مفرفش شكد مكروه دخل للمطبخ
وليد: حسونه شطابختلنا .
محاسن: وليدي ليش نايم لهسه بقيت بالي عبالي صدرك متنك
وليد: والله يمه بقيت سهران  للصبح ما اجاني نوم
٧.٣٠ يله نمت بين ما اصلي صيحوا البقيه ترى خربان من الجوع
محاسن: الله يهديك حبيبي روح صلي
وليد: بقت مريومه مطيتني ظهرها من اول ما دخلت للمطبخ شفتها التفتت على الكاونتر تحضر الخضره
من دا ادخل للصاله لمحت سلوان كاعد ويا جدي وعمامي والولد ديتمضحك بقلبي
دخلي اصلي جايك
دخلت للصاله  ذكرت ربي وطلعت دخلت للهول ثواني ونادت بيبي تعالوا اتغدوا
مر من يمي همستله ورا الغدا تلحكني للغرفه
سلوان : شكو خيرك
وليد: بعدين تعرف امشي نتغدا التمينا كلنا على السفره
شفت مريومه ما گعدت على كرسيها
ياسر : تعالي باب تغدي
محاسن : مسويه رجيم .
مريم : جدو ما اريد اكلت قبل شويه.
ياسر: جدو تعالي اكلي هو اكو احلى من هالخدود .
مريم : لا جدو بالعافيه  ما اريد  .
معن: عمو حبيبتي  شسوين بالرجيم تعالي اكعدي بابا
لحد يقشمرج بهالسوالف ها بابا انت هم مسويه رجيم
عذراء: ابتسمت لا بس بيبي مزاغله هالمره ومخليه ليه
هواي ومبين طعمها .
معن : تعالي عمو اكعدي بمكان عذراء لعد
محاسن : بيبي هي الدولمه متصير طيبه اذا مو اللحم دهين
متكليلي انت على منو طالعه تتحسسين من اللحم والليه
وليد: كعدت مريم  بصفي بيني وبين امي حسيتها مدتاخذ
راحتها بالاكل لان اني يسراوي على ابويه وامي يمناويه وهي بيناتنا ضايقتها بالاكل
زحفت الكرسي بعيد عنها حتى تاخذ راحتها  ،افتهمت  الحركه غلط
كملت الاكل ناديت وحده تسويلنا الجاي رحت اغسل
وراها كعدت بالهول شويه وفاتت كتله من نار تحجي بصوت ناصي
مريم: ترى كعدت يمك لخاطر عمي ماردت افشله  يعني ماكو داعي دتحسسني كعدتي ثگيله عليك لان فهمت الي
حجيتلياه ما النا  خط رجعه وهالمره اني اگلك لاتتخيل اي تصرف  يبدر مني دا اتوددلك حتى اريدك ترجع لان اني ما اريدك مو انت متريدني مثل ما فهمت الكل .
وليد: لج انت صدك مو ادميه ومو مال واحد يحترمج  من حسن حظج الكل موجودين ولا جان شوفتج شي ميعجبج بس هينه ولي من وجهي ولا تشوفيني خلقتج اليوم طلعت خلت دمي فاير تحلفتلها

تصويت