رواية حكايات من بيت جدي الفصل السابع والعشرون 27 - بقلم مريم اماسي الليل

#حكايات_من_بيت_جدي
الجزء السابع والعشرين
اماسي الليل ( مريم يوسف )
حقوق النشر محفوظه
مريم : راح  ادخل هالمحاضره وراه ماعندي شي لل ساعة ١٢تقريبا اذا ما بيك حيل ترجع عليه مرلي نروح سوا لسلوان وهويده ،نرجع للبيت ماجاوب بقت عينه كدامه ،يله باي  سديت الباب قبل ما اسمعه جاوبني او لا
وليد: اول ما دخلت للقسم شفت لارا وأشور  واگفين سويه ما سلمت عليهم حسيت اغلب الي بشعبتي انتبهوا أشور ويا لارا  واني بعيد دخلت للقاعة غيرت مكان كعدتي بعيد عنهم، افتهمت الاغلب يعرف  خطبتنا انتهت ورا ثواني كعد بصفي أشور
أشور: بداعت اغلى ماعندك امشي نطلع برا نحجي .
وليد: على شنو مابيناتنا كلام (ضربت بدماغي سالفه التفتت عليه، امشي )
طلعنا من القاعة شوف ترى اني طلعت وياك   كدام الكل لخاطر لارا حتى متجيها حجايه الكل عرف فسخنا من يشوفوك واگف وياها واني ما احجي وياك، راح تجيها حجايه ويصورون عرفت بينكم شي وفسخت الخطبه .
أشور: بله تعال فهمني، انت تحب بت عمك الي فهمته من لارا شكو تحاسبني، اني ما جهرت بحبي الها حتى اگول حقك سمعت حجايه على خطيبتك، ثانيا انت من الاول  ما جنت  تحبها ولا لو تحبها جان بقيت خاطبها واخذت موقف بس مني .
وليد: ليش ما صارحتني  من الاول انت تحبها وليش من شفتها بيوم النتائج ما صارحتها وما شلت تلفون عليه ما گلت لاتخطبها اني احبها وانت تعرف الي بيني وبينك علاقه تسمحلك تحجي ويايه بهيج موضوع ومن الاول تدري احب بت عمي ومصار نصيب  وفكرت اخطب لارا .
أشور: مكدرت احجي بسببها لان خفت هي عدها مشاعر تجاهك واعترافي ألك والها مابي نتيجه
وليد: على العموم الي بيناتنا انتهى مجرد اسلم عليك كدام الطلاب حتى لا تجيها حجايه من وراك وأطمئن  البنيه ماعدها اي مشاعر تجاهي جانت مجرد خطبه تقليديه .
أشور : هذا اخر كلام عندك تنهي الي بيني وبينك وانت تعرف اسبابي .
وليد: أشور اترك هالموضوع للوكت اني حاليا بعدني مغثوث منك ولارا صفحه وطويتها اصلا اعتبر  ما خطبتها بقت مجرد زميله الي ،ومن يوم الي فسخنا   الخطبه صارت اختي يعني اذا تريد تتقدملها او اتصارحها بمشاعرك اني مشايل منك ،ولا حاقد عليك والغلط الي صار مني ومنك وحتى ترتاح وتتأكد اني احب بت عمي من  اتخرج ان شاء الله اخطبها ونتزوج البارحه بالبيت هيج صار الاتفاق .
اشور: براحتك راح اتركك فتره تقدر موقفي وتفكر بي صح ساعتها راح تعذرني .
وليد: الله كريم تركته ما  دخلت للمحاضره بقيت گاعد برا راسي مابقى شي مافكر بي  عليه حسبه اتجيبني وحسبه توديني ك لكن قلبي صحى هالدماغ
بأشتياق ما حسيت برجلي الا ماخذتني انتظرها تطلع من المحاضره شفتها طولت رحت للكافتريا اجيب عصير الي والها من رجعت لگيتها واگفه تتلفت
وصلت وراها، تنتظرين احد
مريم : ابتسمت والتفتت نظراتنا التقت، انتظر واحد ماخذ قلبي وعقلي
وليد: ابتسمت ، والي ماخذ عقلج يستاهل تغثي
مريم : اي والله يستاهل لان واگفه اعصابه بيني وبينه ويتحسس مني ويدري هو الهوا الي اتنفسه
وليد: امشي يا علة قلبي وين نكعد .
مريم : اريد اروح وياك لكليتك.
وليد: مراح تبطلين تريدين تطمئنين مو اگلج انت ِ كتاب مفتوح ابتسمت يله هاج العصير ونطيني ايدج...
مريم : شو بس عصير مراح تريكني .
وليد: من نوصل هناك نكعد بالكافتريا نتريك حتى اشوفين الي بالج وترتاحين
مريم : ههههه عندك اعتراض .
وليد: لا بس من اليوم صفحه ونطويها متجي بالسيره .
مريم :  كمت ادندن( من اشوفك انسى خوفي وانسى كل ماصار بيه واشعر بكل ارتياح من اضم ايدك بأيديه يكفي بعيونك الحلوه أشوفني وتسأل عليه
تضحك الدنيا بعوني والسعاده تطير بيه كلك على بعضك حلو )
وليد: مو اتذكر الصبح جان بيه شوفه
مريم : من يم الناس بس بعيوني حلو
وليد: وهاي من ازعل تبقين هيج ترضيني حتى  ازعل يوميه
مريم : تنهدت، احبك يا ابن عمي بكل حالاتك زعلان ولا راضي
وليد: خلي ناخذ صوره حتى كل ما تغثيني اتذكر كلامج بهاليوم يشفعلج
مريم : ههههه ترى والله انت تتحسس من كلامي وتدلل عليه وصلنا لكليته شفت لارا ويا الولد صديقهم كاعدين بالكافتريا ،كعدنا على صفحه جانت الاغنيه الي مشغليها  زيديني عشقا من راح وليد ديطلب الاكل التفت مبتسم اشرلي على اذنه يعني اسمعيها  رجع
وليد: ها  عصفوره قلبي ارتاحيتي شفتيها يم منو گاعده .
مريم : شكد احب هالاغنيه اليوم حبيتها اكثر .
وليد: اسمعي شيگول من اجلك  اعتقت نسائي انت هم اعتقي سبيلي وريحي راسج ماكو غيرج بالقلب.
أشور: صباح الخير .
مريم : التفتت أشور شفت وليد اتفاجئ.
أشور: ابو خالد  زعلان مني گلت اتوسط يم اختي  واگعد وياكم .
مريم : ابتسمت خجلانه اباوع لوليد  على وجهه ابتسامه خفيفه وياها وجه ثگيل جر أشور  الكرسي وكعد ويانا
أشور : اي ابو خالد شخبارك
وليد: ابتسمت لفيت نص جسمي عليه شكو
أشور: شنو اضيفج هاي اول مره تجين يمنا .
وليد:  بأبتسامه لك خليك ويايه عوفها منو سمحلك تگعد .
أشور:  ضحكت ليش بين الاخوه اكو اذن اجيت اكعد يم اخويه ويم اختي
شبيك نحس لا تخاف  ما اخليك تعزمني اني اعزمكم اعتبرها عزيمه الصلح
مريم : ابتسمت .
وليد: يويل مزعلان بس روح .
أشور: هاي طرده وصلح مال كفيان  شر  والله ما اگوم اذا منتصالح.
وليد: گوم عاد لا تلح  والله مزعلان انت اخويه .
أشور : هههه عرفت نقطة ضعفك  يله اني اترخص، ادري بيك هسه على اعصابك متحملني
وليد: ههههه دروح لا تلح  ...
بعد مرور اشهر 
وليد:  سلوان يله فضها تجي لو اروح
سلوان : هسه صعدت يويل اصبر ثبرت روحك على القاط ،
رحت لحديقه  ناديت  هويده اجتني يم باب الهول ، اكويلي ملابسي بسرعه
هويده : اوه سلوان  ناديتني حتى اكويلك ملابس  دكويهن انت حباب والله تعبانه هسه كعدت ويا البنات .
سلوان : شنو القصه شكلج تگليلي تعبانه ترى هاي مو وضعيه كلشي اني اسوي لروحي اني مو حالي من حالج دوام وفوگاها من الكليه للشغل .
هويده :  بتذمر ) يله هسه راح اسويهن .
سلوان : ملازم اخاف تتعبين، صعدت انتظرها تصعد ورايه تأخرت ...
بدلت وطلعت لگيتها كاعده يم البنات، استغفر الله هاي شلون اتعامل وياها
وليد: ها خلصت .
سلوان : اي خلصت يله ،صعدت بالسياره مغثوث
وليد: شبيك شو گالب وجهك
سلوان : من بت عمك خبلتني يعني اهم شي عدها نفسها متحس بيه ولابتعبي عبالك دداوم كليه مسويه منيه براسي كلشي ما مفتهم منها ترجع من الدوام تنام تكعد تلتهي ويا البقيه تدرس ارجع اني من الشغل على كد نكعد وياكم بالهول ساعة ساعتين اصعد الگاها نايمه حتى ملابسي ممحضرتها
وليد: انت مابيك حظ لو تدري بيك تكعد ثاني يوم وتلگه ملابسك ما محضره تبلغها  ماكو دوام، مره مرتين تجوز  وتحضر امورك ،اذا تكعد الصبح وتلگيك محضرهن طبعا تعلمت بعد مو من حقك تحاسبها انت علمتها تتكل عليك .
سلوان : افففففف  هو هذا طبعها شسويلها كومه حجيت ما فاد
وليد: خلص لعد الي من ايده الله يزيده لا تتذمر  .
سلوان :  وانتَ مرات تحجي عليه لان اسهر ويا فائز اذا اني حتى يوم الخميس ما اشوفها لو طالعه ويا امها وعمي
لو معزومه لو عازمه صديقاتها  وتالي الليل تصعد تلف راسها وتنام
(بقلبي واذا سهرت ويايه  مسويه عليه منيه)
وليد: سلوان انت الرجال انت الي تمشي مرتك مثل متريد شنو تطلع ويا امها لو ويا عمي امرها عندك لا عمي ولا امها انت من البدايه خليتها براحتها وما فهمتها حقوقك عليها كرجال عنده مره شنو امك تغسل ملابسك ويا ملابس سنان، بله سنان  الرجال بعده ما متزوج هسه يزوج ومرته اتخدمه وانت تبقى امك تحير بيك .
سلوان : والله انت بطران اني اجي ما اشوف دربي من التعب من الكليه بوجهي  لعمي  سعد ما اخلص شغل للمغرب ارجع بس اريد ارتاح  الي خلگ اگضيها بالمشاكل
وليد: خلص انت سلمت لحيتك من البدايه اتعلم واقنع بحياتك وياها انت من البدايه تعرف طبعها المفروض من البدايه تمشيها على مرامك  سد الموضوع ترى انت تغثني من تحجي .
سلوان : دخلي اشوفك من تاخذ مريم اذا ما صرت اتعس مني هن ماخذات طبع عمتي نجاه وعمك هم طابگ ويا مرته وبناته على كلشي.
وليد: دخلي اخذها وشوف منو حجايته الي تمشي لا عمك ولا امها ولا اكبر واحد بالبيت الي اني اريده هو الي يمشي
سلوان :  نشوف ،اگلك  ماطول اجيت وياك  لعد خلي اخذ قاط التخرج اخاف ميصيرلي مجال هالايام  ..
وليد: مو تبقى تفتر ترى اني موچد  الي راح اخذه لونه نيلي قبل يومين شفته .
سلوان : شو نيلي
وليد: عجبني  مكدرت اگله ( اختارينا اني مريم،ولان  وهي اشترت  كوستم ابيض ونيلي واتفقنا  ناخذ صور  )
مريم : هويده سلوان طلع، يعني حتى مرحتي وراه اشوفي اذا رايد شي .
هويده : كلشي يعرف يسوي شسويله يعني والله انت بطرانه اني ميته من التعب ارجع من الدوام .'
عذراء: ادري هويده  مثل ما مهتمه بروحج اهتمي بي مو خطيه ديجي هلكان من التعب .
مريم : ثانيا لان عمه أمال فقيره وما تحجي  انت مستغله الوضع ترى لو غير وحده ما تقبل  شنو هي اتصب أكل  لابنها لو تغسل ملابسه لعد انت شنو شغلج
هويده : ترى والله انتو تدخلون بأمور ما تخصكم  هو راضي ومتعلم على طبعي وعمه أمال تدري عندي دوام وما اللحگ عود من اتخرج اتفرغله
مريم : لا والله بعدلج سنه يله تتخرجين يبقى الولد حاير بروحه حاله حال العازب والله ما ادري شلون تفكرين .
هويده: بقلبي (مو انت ابن عمج مشيج على مرامه قبل ما يخطبج  ،صايره مابيج خير من تزوجين يطيح حظج لو ما اخته  كاعده جان رزلتج )
ما الكم علاقه بيه اني ورجلي متفاهمين
عدراء: والله براحتج اني بس دا انبهج .
مريم : اني هم والله بعد ولا انصحج انت تنغثين من عدنا  كأنه دنحركه عليج غير نخاف على مصلحتج والولد ممقصر وياج راتبه كله الج ووين متريدين يوديج ميتعاجز .
هويده : تدرين ليش لان يدري ما انطي بنفسي ومن اسويله شي يغزر بي ويحس بقيمته لو انطي بروحي جان مباوع بخلقتي.
عذراء: ترى الحياة مشاركه مو منو يمنن على اللاخ ثانيا انت هاي واجباتج ...
هويده : اوه تبدلون الموضوع لو اگوم .
مريم : لا خلص شعلينا انت ورجلج تنجازين .
هويده : من دخلت عذراء ، التفتت لمريم لج انت متتعلمين من امي شوفيها منو مثلها من نسوان عمامي مدلله ابقي مابيج خير
مريم : والله اني طبع امي ميعجبني مكافي كلشي مفتهمنا منها حايره بروحها وطلعاتها وونستها هسه صرتي انت وياها صديقات وكامت تعلمج  وتحجي وياج، شلون تصرفين ويا رجلج عبالها كل الرياجيل مثل ابويه
هويده : نيالي انت اذا اخذتي وليد يطيح حظج وأتذكريني ماطول من البدايه مشاج  بمزاجه .
مريم : وليد ما اله علاقه ، بس اني طبعي مو مثلكم انت وامي تحبون نفسكم وما تهتمون  لاحد .
هويده : محد يفيد احد ليش ما نهتم  بروحنا اصلا الناس من اشوفج متنطين بنفسج تحسبلج حساب من هاي امي  متريد وليد  لان تگول عليج مابيج خير ثاري متنلام .
مريم : سدي الموضوع اني ما احب احجي بي لان ادري متغلطون نفسكم
لليل اني بالغرفه دا اكوي ملابسي اندكت الباب .
ادخل
وليد: مريومه شلونه القاط .
مريم : ابتسمت لزمتني العبره ( طالع حلوه تنهدت اتذكرت من نزل بيوم خطوبته وشفته متت،  يوم الي الله يهدي جدي ويوافق وتصير من نصيبي  حسيت من هلكد ما عيوني تحبه راح احسده ) بالعافيه كلش حلو
وليد: باجر حبيبتي  تبقين ويايه حتى ناخذ صور .
مريم : جبت الفلم
وليد: اوف نسيته والله خلي اروح هسه اجيب قبل ما يعزل  المصور .
مريم : اذا عندك شي اكوي انطينياه ماطول دا احضر بملابسي
وليد: بس القميص يحتاج كوي وعذوره گالت راح تكوي
مريم : لا جيبه ماكو فرق .
وليد: لعد هسه انطيجياه حتى بليل انت وعذوره ترهمولي الرباط..
مريومه : ابو خالد سنه لخ اداوم وانت ماكو .
وليد: سنه الخ  اداومين  بأذن الله وانت مرتي اتحمل بعد كم شهر وراها افاتح جدي من اشوف  فرصه .
مريم : ان شاء الله يله روح قبل ما يعزل  المصور .
سلوان : دخلت للغرفه عاكد حاجبي تمددت على الفراش حضريلي ملابسي باجر ناخذ صور ويا وليد .
هويده : طلعلي الي تريد تلبسه واكويهن.
سلوان : طلعي انتي اكعد الصبح الگاهن حاضرات وله والله  دوام ماكو
هويده : هاي شكو سلوان شو ددورلك مشكله يعني اذا طلعت ملابسك او كويتهن وساعدتني ترى مو صعبه المفروض تقدر اني عندي دوام ودراسه ...
سلوان : لا مابيها شي اذا مرتي بالمقابل تقدر تعبي اني هم تعبان
اذا انت ترجعين تنامين اني ارجع بوجهي لشغلي ودشوفيني اجي هلكان مو المفروض الگي  اموري كلها حاضره ومرتي تنتظرني تخفف عني التعب اتسمعني حجايه حلوه
اني شمفتهم منج، حالج مثل قبل منتزوج  بس الغرف تغيرت اخاف هم نومتي بصفج زاعجتج ارجعي نامي يم البنات .
هويده : امممم ( بقلبي بدا يتذمر يحتاج زعله )
بدون كلام  بدلت دشداشتي وطلعت رحت نمت يم البنات .
سلوان : استغفر الله هاي شلون راح اتعامل وياها بقيت كاعد اتصفن هاي احنه بعدنا بدون اطفال  وهذا حالها شلون من يصير عدنا اطفال يجوز صدك لان عدها دوام من تتخرج تتغير لان ماعدها التزام كمت فتحت الكنتور طلعت ملابسي حضرتها صحت مريم ...
مريم : نعم سلوان ..
سلوان : مريومه اكويلي ذولي هويده بالغرفه يمكم لو جوه
مريم : استغربت لا مو جوه لان اني صعدت هسه مجانت موجوده يجوز بالغرفه هسه اناديها  وادزلك الملابس وياها .
سلوان : لا عوفيهن الصبح اخذهن منج سديت الباب ورجعت انتظرها  تجي تنام متعلم عليها استوحشت الغرفه ،هاي اول مره من اتزوجنا تنام بغير مكان . بقيت الوم نفسي ( هسه انت الا تگلها روحي نامي بغرفة البنات  خلي اگوم اصيحها)  وصلت للباب ورجعت لا هي الغلطانه لازم تحس بغلطها راح تتعلم من تزعل تنام برا الغرفه
بقيت الليل كله اتگلب الى ان سرحت وتذكرت هيام غمضت عيني تخيلت  لو هي مرتي جان هسه هي بحضني وحامل  بأبني، يالله شكد مشتاق اشوفها صار كم شهر مشايفها  هسه اكيد بطنها كبرت (حسبتلها المفروض هسه هي بالاشهر الاخيره )
من اتذكر يوم الي سمعت بيها حامل وراح يصير عدها طفل من هاني  حسيت روحي ماتت وراها ما تحملت اشوفها وقررت انساها وامنع نفسي عنها  من يومها واني ميت  وما حاولت حتى اعرف عنها شي وگلت انسى بس ما لكيت بهويده المره الي تنسيني هالعذاب وتهونه عليه .