#حكايات_من_بيت_جدي
الجزء الرابع والاربعين
اماسي الليل مريم يوسف
حقوق النشر محفوظه
وليد: يله خلصتي
مريم : دقايق بس دا احضر جنطة خالد ... والمميه لا اروح انساها ويفضحنا
وليد: مو گلتي راح ينام شو بعده عيونه عيون صگر .. دفي زين لا يتمرض
مريم : هههه لا هسه ينام ... يله خلصنا ... شيله انت واني اشيل الجنطه
وليد: لا انت شيلي ولفلفي زين ... اني اخذ الجنطه راح انزل
ادفيلكم السياره ...
مريم : نزلت لگيته واگف ينتظرني ... فتح الباب بسرعة خليت خالد بالكرسي وربطته
صعدت بصفه ...بالطريق شفته ابتسم ... سألته شبيك
وليد: لا هيج
مريم : احجي الله عليك ليش ابتسمت
وليد: والله اتذكرت شغله ... ( باوعتلي نظره فهمتها ادري بيها دماغها يروح لبعيد ) ادري بيج مريضه بالشك ... والله باوعت
بالمرايه صارت نظره ابنج بعيني ... يشبهج ... اتذكرت ايام قبل ... جنتي تكعدين ورا وافكر بهاليوم ... وهسه انت بصفي ... وعدنا هالعايق...
مريم : التفتت على خالد ... ابتسمت بس اني اشوفه يشبهك
هههه بالاخص العياقه
وليد: خو انت متنطين عين ... گام يغفي تعب ... والله اليوم اذا عاط بعد متشوفين الباب ...
مريم : خو انت تريدها من الله حتى تطلع وحدك ...
وصلنا ... بقينا نفتر بالمحلات اخذنا هدايا ... للكل ...
وليد:ترى عيد ميلاد عذراء يصادف احنه هناك موجودين ... اخذيلها شغله ثانيه ... عذوره لو تريد عيوني انطيها ...
مريم : انت اختارلها شغله ... واخذها ... بقينا نفتر الى ان قرر ياخذلها مداليه ذهب تنحط بيها صوره ... صغيره
وليد: هاي ناخذها اتذكرت عندي صوره اني وياها اخذتها بحفلة التخرج ... جانت تضحك ...
مريم : اتذكرها والله مشتاقتلهم وقلبي نار على شوفتهم ... مشتاقه لغرفتنا
وليد:اني هم والله مرات تجيني حاله اريد اقدم رجعه ... بس اتراجع من افكر بالمستقبل ...
ماطول ابنج بعده نايم خلي نروح نتغدا بمكان ....
مريم : يله نروح للساعة( بالشقى) ... والله مشتهيه لفاته
وليد: من نرجع لبغداد ... ادعبل خلود يم امي ... واخذج وحدنا
مريم : ان شاء الله ...فتره طويله مرت من اخر مره نكعد بمطعم
حسيت هالطلعه رجعت قربتنا مثل قبل من خلصنا طلعنا الجو بارد ...ومطر ... اني شايله خالد ووليد شايل شمسيه احسه
محاوطنا وايده على ظهري ... اتذكرت خوفي منه ايام قبل ومن عصبيته ... حسيت حلمي رجال حنين وأطفال صار حقيقه وياه ...
ركبنا السياره ... مطر ينزل على زجاج السياره والتدفئة مشتغله انتبهت شكد متغير من خوفه علينا يمشي بطئ بينما قبل جان يسوق سريع
مركز بالطريق ... بلحظه حنّيت لايام قبل من يخلي ايدي بأيده ويبقى يسوق ... حركت ايدي ..وخليتها على ايده الي جانت على رجله ... بدون ما يلتفت ... شبك ايدي ... رفعها لشفايفه
احس روحي ترجعلي من احس بعده يحبني نفس الحب بس الفرق هالمره صرت اني الي احبه اكثر ... احسه كل الدنيا وناسها ...
ميثم :فتحت باب الغرفه ... عتمه بس شي خفيف من بين البرده ...اشعه صغيره داخله
فتحت الضوه ... نوران نايمه ... محضرتلي ملابس البيت على حافة الفراش ...استغربت مو عوايدها تنام هيج وقت خليت غراضي على الميز وبدلت ...
نوران نوران .... فزت
نوران : هلو شوكت اجيت ... هسه انزل احضرلك الغدا
ميثم : قبل شويه .... شعجب نايمه
نوران:اففف امك ميثم ...ابتلي انزل شويه يمها ... لازم اطلع روحي وتذبلي بهالحجي ...
ميثم : استغفر الله ترى اني تعبت منج ومن امي ...يعني احير بمشاكلكم لو احير بدراستي ...على شنو بله
نوران : على سفرنا لعمان گلتلي مراح تروحون ... عرفتها تريد اتغثني
ميثم : لا صحيح حجيها البارحه عرفت مريم ووليد راح يجون ...
لغيت فكره السفر
نوران : شنو شنو واني شنو علاقتي بمريم ووليد ... اجوي ولا راحوا ... وانت شلون تلغي السفره بدون متگلي
ميثم : شوفي ( رفعت اصبعي بصوره تهديد) مره ثانيه اذا حجيتي ويايه بهالاسلوب متلومين الا نفسج .... اقرر الغي اروح اني الرجال هنا مو انت
انت ما الج علاقه بمريم ووليد اني الي علاقه ...سفر اكدر اسافر بأي يوم بس اختي وابن عمي ما اكدر اشوفهم الا من يجون
نوران : هذا طبعا زن امك ... براسك اني اعرف ...
ميثم : امي شنو علاقتها حجايه زايده راح تخليني امد ايدي عليج شبيج متخبله هالايام
ذاك اليوم مخليه نگرج من نكر هويده تنتقديها لان مامحجبه رجعتي تذمرين من بناتها ...
لان ادزهم يمنا ... بلعتها ...تنتقدين سلوان كدامي
تگليلي ميدري بأختك وين اطب وتطلع عايفها بكيفها ...
گتلج ما الج علاقه ولا تدخلين بس هالمره راح اگلج ... اهلي خط احمر ماطول شي ميخصج ما مسموحلج تنتقدين احد منهم ...
فاهمه ...خليج بحالج ولا تقارنين ... ميريد يحجبها هو وقناعته
لا تلحين بهالموضوع ...
نوران: حبيبي انت احد مضوجك ... وطلعتها بيه ...لو تعبان ...
واني غثيتك بهالحجي ...مو قصدي اضوجك ... عوف هالموضوع
اني اسفه خلي انزل احضرلك الغدا
ميثم : (بعصبيه )ما اريد ...
نوران : ميثم لا تسويها زعله ... يعني اني افضفض وياك انت تحقد عليه ... يعني مو قصدي خباثه ... بس تدري بيه اني متربيه ببيت اعرف الحلال من الحرام ... اشوفك انت تحاسبني
على الشعرايه اذا طلعت وامك واختك مو محجبات ... يعني جان قصدي نصح
ميثم : لا هاي يسموها غيبه من تحجين على احد بظهره ... والموضوع انت ما الج علاقه بي ... امي واختي عدهم رياجيل
ثانيا الاكثريه بمجتمعنا مو محجبات ولو اني ماخذج ما محجبه يجوز هم ما افكر البسج الحجاب
هاي اخر مره اسمعج تحجين بهالموضع
نوران: خلص بعد ما ادخل ... بس لا تزعل ما اتحمل زعلك ... حبيبي راح انزل اسويلك الغدا ( جاوبني عاكد حاجبه )
ميثم :انزلي يله
نوران: نزلت احجي بداخلي ... من يمي ميتحمل كلمه ومن يم امه وخواته ميفتح حلگه ...مدري شمسويتله هالنجاة لاصمه حلگه اف ياربي ... شلون نمونات
خلي اتكفى شره ... ولا افرح نجاة وتحس اكو بيناتنا مشكله عاد ماكو سفر اخلي يطلعني ...
عذراء: جنت كل ما اروح للجامعه ... اتذكر تمار ... وبداخلي اسأل بعدك تذكرني ... لو نسيتني ... على كد مكانة هالانسان بداخلي ... لكن اتمنى نساني ... وعايش حياته ... كأنه القدر
ميريدني انسى ... بمره من هالمرات ... صادفت البنيه الي خلاها تتصل عليه قبل اخر لقاء بيناتنا ... جانت علاقته قويه بيها
سلمت رديتلها السلام
عاتبتني ... لان كسرت قلبه وگلتلي تدرين كل ما يصير بيناتنا ... اتصال يسألني اذا اعرف شي عن اخبارج
جاوبتها عفيه لاتگليله التقينا ... واذا متكدرين تكذبين گليله انخطبت ... باوعت لأيدي ... گلتلي بس انت مو مخطوبه صح
جاوبتها لا مخطوبه بس بعدني ما لابسه حلقه ...ابتسمت شكلها عرفت اكذب
لكن حسيت الي نطقت بي مثل الانتقام مني لزميلها ...گلتلي ( لاتخافين سؤاله مجرد فضول ... الولد اتزوج بت خالته ... وينتظر طفل بس اظاهر قلبه بعده يحن للانسانه الغلط )... بلحظتها انقهرت من حجايتها ... جاوبتها بدون وعي ... اذا جان ظنج السبب اني
فأنت غلطانه امه السبب ... وماكو داعي بعد اتحمل فوگ طاقتي ملامه ...
تركتها ومشيت لاول مره افقد اعصابي ...بسبب الالم الي بداخلي ... من سمعت متزوج انكسر قلبي للمره الاخيره
وما اتصور بعد اكو شي يكسره تعلم على الخساره والخذلان
بداخلي ياربي تعبت ... ارحم بحالي ... ليش من دون هالبنات ماعندي حظ... ليش مكتوب على هالقلب بس الاذيه ... عمري ما مشيت بطريق الغلط ولا خنت الثقه ...ما اتحملت انزل دمعه بعد
كافي لهنا ... كرهت الحب وكرهت شي اسمه مشاعر
بيومها ... حسيت محتاجه اروح لسنان ادور عليه ... هو الوحيد
الي من احجي ويا ارتاح ...
لگيته داخل محاضره ... بقيت انتظره ينتبه عليه ... التفت شافني
اشرلي انتظره
بقيت انتظره الى ان طلع ...
سنان : ها عذوره ...
عذراء: شوكت تخلص ... اذا ماعندك شي وراها ... انتظرك بالكافتيريا
سنان : ماشي ... اكمل واجيج لان وراها عندي محاضره ...
انتظريني نرجع سوا ...
عذراء: ماشي ... دخلت للكافتيريا حتى هالمكان ... يذكرني بتمار... بقيت كاعده سرحانه ... اتذكر مواقف جمعتنا وكلام دار بيناتنا ... ايقنت الزمن كفيل ينسينا ... ويخلي قلوبنا تتعود على الفراق ...
هويده : بيبي اليوم ... كالت نتعشى يمهم كلنا ماطول باجر عطله
هسه من جبت ريما انطتني خبر
سلوان : اني متواعد ويا فائزوالولد ...اطلع وياهم ...
هويده : استغفر الله ... سلوان شوكت اتبطل هالسهر والشرب ...
ترى والله مليت ... يعني انت ماعندك مره جهال... تگابلهم
يعني فد خميس اغلط ولا تطلع ويا استاذ فائز ... حرام عبالك
عندي ضره ...
سلوان : صايره شكد تنگين لخاطر الله ... الي يسمعج يگول ... خطيه يوميه اجي الگاج منتظرتني ...
واذا لگيتج كاعده ... ماعندج سالفه عدله ... شگال البيت وشوكت تسجله بأسمي ... ترى روحي طافره منج ...شوفيها لمرة اخوج
اتعلمي منها ...شلون تحجي ويا شلون مهتمه بي ... بس حايره
تنتبهين فلانه رجلها مدللها ... وحاير شلون يرضيها الي يسمعج
يگول اني مقصر ... مو اشتغل من الصبح لليل ... وما عاجب
ولا تقدرين ... مره وحده حسي بيه ... اغلطي وسمعني حجايه حلوه ... كله تذمر وشكوى ... صايره نسخه من امج ... شوفي شنو الخلل الي بيج مخليني ما طايق الكعده وياج ...
هويده :هاي انت ... ما اطلع روحك غلط ... بس تعرف تتحجج
بهالحجي ... وأذب اللوم والصوج عليه .....
اوي روح اني هم زايده مني ... شكو غاثه نفسي ... واجيب الحجي لروحي ...
سلوان : اف استغفر الله العظيم انت الحجي وياج بس مغثه بلا فايده ... نزلت ... لكيت امي وابويه
بالهول ... كعدت وياهم شويه ...
أمال: شنو راح تطلع
سلوان : اي متواعد ... ويا الولد ... شفت ابويه ما عجبه الحجي
قيصر: انت راضي على وضعك هذا ... ترى كبرت ... شويه انتبه لنفسك
سلوان : اسمعه وبداخلي استهزء...بعدك ابو طبع ميغير طبعه تبيع مثاليات ... متگول لنفسك ... كبرت ...حتى احفاد صار عندك وبعدك ... تضحك على نفسك قبل ما تضحك على العالم تكذب الكذبه وتصدكها ... عبالك صلاتك واصله ...وكلها رياء
طگت روحي من هالبيت ...بقيت ساكت وهو يرزل بيه من كمل
كمت اترخصت
طلعت ... بس من اروح لبيت جدي ارتاح ... مريت اسلم على جدي وبيبيتي ... وانطيها خبر معزوم
دخلت سلمت تلگتني ... ملگاها يريح قلبي ...
محاسن: ها حبيبي شلونك
سلوان : الحمد لله يمه بوستها من راسها ... شلونك يابه
ياسر : هلا بابا لعد ليش ما جبت هويده والبنات بين ما يجون البقيه ...
سلوان : استحيت اگله متواعد .... جاوبته ...عدها كم شغله تكملها وتجي ويا ابويه وامي ...
ابو خالد ...اليوم گلي ... طيارتهم توصل فجر السبت ...ان شاء الله اتفقت ويا اطلعلهم قبل ما اروح للدوام اني اجيبهم
محاسن :تنهدت اوف يابيبي ... قلبي نار عليهم والله دا احسب يوم يوم ... اشوفكم ملمومين كدام عيني مثل قبل ... البارحه خابرني گلي السبت كلنا نتغدا سويه ... راد اسويله دولمه ...
والله من يحجي ويايه ويبقى يداهرني يگلي مشتاقلج حسونه
دموعي نزلت ما اتحملت ... فكره يجي يوم وليداتي كل واحد بمكان ... قبل كلنا ملمومين ...بمكان واحد
سلوان : ابتسمت يمه بعدنا كلنا بسياج واحد ... اعتبري كل واحد بغرفته .. بصفج ...
ياسر: جدو بيبيتك تقصد بعد كم سنه تخاف تفكرون تطلعون
كل واحد بمكان وحده
سلوان : قلبي نغزني بس لا عرف بموضوع البيت ... جاوبته لا يابه البيت جبير ومكفينا ... احنه هم منكدر بلياكم الله ينطيكم الصحه والعافيه وتبقون خيمه على راسنا ...
محاسن: اي حبيبي ريح قلبي ... عود من اموت اطلعوا ...
سلوان : يمه اسم الله عليج ... ليش تفكرين بهالمواضيع وتقهرين نفسج هذا ابو خالد ... مأثر عليج ... هسه يومين تلگي فوگ راسج هو وابنه العايق ...هههه والله لو اشوفي من يسولفلي عليه
تگولين عنده ابن عاق عمره عشرين سنه ودايخ بي ...
ياسر:والله هذا الملعون اكثر واحد اني مشتاقله ... راح عمره اشهر هسه مريومه تگول يمشي ووكح ...
سلوان : شكد جدي حنين ... الي خالد خلاه يبادلنا الحديث ...
وبعينه لمعه اشتياق حتى لو ما يحجي واضحه من ابتسامته من يحجي بهالطفل
ورا اقل من نص ساعة اجوي بيت عمي ومرت ميثم ... جانت شايله دانيا بنتي ....
دخلوا سلموا ... سألتهم على ميثم ... جاوبتني هسه يجي ديدخل السياره للكراج
بهالاثناء... من شافتني دانيا گامت تبچي تريدني ...
نوران : هاي من شافت ابوها بجت ... صارلها من العصر عدنا ما تسمعولها صوت ... سلوان گلي جيبيها ... رحت انطيهيا
بداخلي نيال هويده عليك شلون شخصيه واثق من نفسه .... انطيته دانيا
سلوان : من دتنطيني نوران دانيا گلتلي هاي لان حلوه تشبهك تحن عليك ... استغربت من هالميانه ... ولا يبين على تصرفاتها تطلع منها هيج كلمه ... والي نبهني اكثر حجتها بصوت ناصي
والكل ملتهين يسولفون ... ما جاوبتها اتجاهلت مجاملتها ...
وراها الكل اجوي .... التمينا ... هويده گالبه وجهها بقيت على العشا من كعدنا ...شفت نوران تخلي لميثم اكل كدامه ... والابتسامه على وجهها من تحجي ويا ... باوعت لهويده افتهمت
معناها اتعلمي ... بدل ما گالبه وجهج ... سوت حركه مال چفيان شر ... گامت من مكانها خلتلي اكل ... بالاول كلت حست
بس من گلتلي بصوت ناصي بلكت نعجب ... ما جاوبتها ... كملت عشا ... وكمت اترخصت منهم طلعت اسهر ويا الولد
يتبع دا اكتب التكمله بس تخلص انزلها للسهرانين
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!