رواية حكايات من بيت جدي الفصل السادس والثلاثون 36 - بقلم مريم اماسي الليل

#حكايات_من_بيت_جدي
الجزء السادس والثلاثين
اماسي الليل
عذراء: تمار اني اول مره كذبت عليك ... من طلبت مني احجي ويا اهلي بوقتها جانت عدنا ظروف بالبيت ... وادري بجدي مراح يوافق ... والصدك
حاولت احجي وياك لكن استحيت ... ويوم الي سألتني جاوبتك
رفضوا لكن بالحقيقه هم اصلا ماعدهم علم بالموضوع ... السبب مني مجنت متأكده من مشاعري تجاهك وبنفس الوقت مردت انطيك أمل ... وتبقى تنتظر وبعدين ممكن يرفضون
تمار: يعني ماعدهم علم اصلا اكو واحد اسمه تمار وياج بالجامعه
عدراء: لا محد جان يدري بس حاليا لا عندي من يدري بنات عمي الي هم بمثابة خواتي اني اشركهم بكلشي يخص حياتي
تمار ما اريدك تزعل مني ...
تمار: ابتسمت تدرين انت هسه انطيتيني أمل جنت فاقده بسبب
جوابج الاول ... لو مريحه قلبي وتفكيري من زمان ... لو تدرين
شكد هالموضوع اذاني بوقتها ... المفروض ازعل منج بس قلبي
وياج غلب العقل ... يا اول حب واخر حب بحياتي ..
عذراء: يعني مزعلان مني ... ولا انغثيت
تمار: بالعكس ... هالاعتراف ريحني ... راح امشي بحجايتج
وأأجل الموضوع بالوقت الحالي الى ان تتخرجين ... حتى فرصتي تكون اكبر ...
عذراء: ريحت قلبي جنت خايفه من تعرف .... تاخذ موقف مني
تمار: يمكن لو بعقل قبل كم سنه جان زعلت وحسيت انجرحت بكبريائي لكن بالوقت الحالي واني متأكد من مشاعرج وما عندي علم بالظرف الي مريتي بي بوقتها لا اعذرج
عذراء: تمار يوم على يوم تخليني اتعلق بيك اكثر واحس انت الانسان الي جنت انتظره ياخذ قلبي ... ويفهمني بكل حالاتي
تمار: انه الحب يا دكتوره يلعب بقناعاتنا هههههه
عذراء: ههههه
مريم : ولودي ... اكعد هم يله نروح
وليد: خلصي مريومه وكعديني ... ابدل ونطلع
هاي شوكت نامت بطة سلوان بصفي
مريم : قبل ساعة مسمعتها من تكركر الفطيره جانت تلعب ... وتناغي ... عبالي تدري بيها
وليد: لا والله من خليت راسي بعد ما دريت بالدنيا ...
اذا مصار عدنا جهال... نلوكها علينا لحد منخليها تتبرى من اهلها واحنه ناخذها ...
مريم : ابتسمت اذا مغثوث من هالموضوع ... اتركه ما نروح ...
وليد: لا گومي بدلي ... اني هم حنّيت لطفل من ورا سوالفها
مريم : شفته يتحارش بيها وهي نايمه ويبوس بخدها ... يريد يكعدها... من شفته رافع ايديها مخليها على شفايفه ... بقلبي دعيت ياربي ميطلع شي يحرمنا من طفل وينغص علينا راحتنا
وليد: هاي تنمبل على امها ههههه
مريم : ها گلبت على هويده ...
وليد: لا هدهد عزيزه ... تدرين بيه شگد احبها ... ادري بيها هم
تحشي براسج بس مكدور عليها ...ما الها تأثير مثل تأثير نجاوي
مريم : وتالي وياك ... ليش اضوجني وتحجي على امي ...
وليد: اليوم من نرجع ... نروح نتعشى يمها ...دا احس نفسي مقصر وياها لعمتي ... ادري بيها مشتاقتلي ههه انطيني الباكيت ... والجداحه
مريم : هاك ...يله قلبي گوم بدل ...
وليد: ... خطيه هاي موجوده نسيت( ريم) ... راح اطلع ادخن برا بين متكملين ... حضري ملابسي وصيحيني
طلعت ... وبقلبي ياربي متوكل عليك ان شاء الله تطلع التحاليل
سليمه ... انت تعلم لو عليه راضي بحكمك... وقانع بس نجاة
شيخلصني من لسانها عاد تلگالها سالفه تنغص حياتي ويا بتها
مريم : رحنا سوينا تحاليل ... ورجعنا .. للبيت بدلنا ملابسنا
ورحنا لاهلي ...
وليد: يمه راح نروح لبيت عمي سعد ...
محاسن: عود اكعد ويا ميثم احجي ويا افتهمت من جدك يريد يخطب بنيه اكبر منه
وليد: وخلي يخطبها اذا خوش بنيه واهلها اوادم شتريدون منه احسن من ما ياخذ وحده منعرف اصلها من فصلها
محاسن : جدك هم يگول ... بس اني شو ما مقتنعه بسالفه هي اكبر منه
وليد: يمه هو راح يتزوجها قابل انتو كل لشه تتعلك من كراعها هو اختارها يتحمل مسؤوليه اختياره شكو مدوخه نفسج انتِ
محاسن: على گولتك واني شنو علاقتي هو يفتصل ويا جدك
وليد: خلي اخابر ابو السوس ... الو
هويده : الو هلو لتگلي راح ترجعون ريمه هسه
وليد: هههه هلو متريدوها خو نتبناها على شنو باقيه بأسمكم وهي مقيمه يمنا
هويده: هههه اخذوها لا والله دا اشتغل ما صدكت بيبي گلتلي نايمه من اتصلت
وليد: لا بعدها نايمه ما ادري عليمن طالعه .... وينه سلوان
هويده : ههههه هذا بسمار ... سلوان طلع ديجيب شغله ويرجع فد شويه
وليد: لعد تعالوا يم اهلج ... ننتظركم هناك ...
هويده : ها ماشي هسه من يجي سلوان نلحگكم ....عفيه خلي مريم تكعدها لتروح متنام بليل
وليد: صار ... يله اخذي راحتج ...
صحت يله مريومه وينج ... كعدي ريمه دناخذها ويانا ... هسه اهلها يجون ورانا
مريمه : دقيقه .... دكيت باب غرفة جدي ....
ها يابه ... هاي كاعده ....
ياسر: اي صارلها هواي من كاعده .... راح تأخذوها ...
مريم : منظر جدي وابتسامته من ديلعبها ... ما اله علاقه ...
بالشخصيه القويه الي يظهرها ...
اي امها تريدها ....
ياسر: يله اخذوها ... وباجر گليلهم يجيبوها الصبح ...
مريم : ان شاء الله ... طلعنا من الباب المشترك... فتحت باب بيت اهلي ودخلنا ... ماما وينج
نجاة: هياتني بالهول ... تعالي ...
وليد: يا الله ....
ميثم : ابو خالد ... فوت ...
وليد: دخلنا للهول ... الله بالخير
نجاة : هلو شعجب مريتوا اليوم
ميثم : تعال اكعد ...
مريم : لا هو يوميه المغرب يگلي خلي نروح ... بس اني التهي بالشغل والعشا ومرات ريمه يمي ما الحگ
وليد: شفت مريومه ابتسمتلي ودزتلي اشاره بعينها بتوسل ( معناها لخاطري )
ابتسمت ... انت عمه شعجب متجين لوما الحايط بصف الحايط
نجاة : انتظر نسيبي يعزمني على العشا وأمر ....اني امر الصبح مرات يم عمتي ...
وليد: عمه بيناتنا عزايم ... انت تعالي وادللي ...
نجاة: صدك رحتوا للدكتوره ...
وليد: عمه انت ريحي راسج من هالموضوع ...هو احنه ما مفكرين بي ...انت حيري زوجي ميثوم
نجاة: والله وكعت على علتي ... هذا يمك شويه انصحه ... عقله
ميثم : لا يعقلني ولا ترجعين تفتحين الموضوع
سلوان : الله بالخير ...
هويده: شلونج ماما ... ابويه بعده ما رجع ...
نجاة : هلو عمه حبيبي ... لا والله ماما بعده هسه على جيه ....
سلوان : غمزت لوليد...يله ننتظره حتى نتعشى سوا ....
مريم : شفت الابتسامه المتبادله بين هالاثنين عرفت ... راح تشتغل سوالفهم
ميثم: بشاربك ابو خالد لا تجيب سيرة موضوعي ويا امي ... ترى الوضع متوتر
وليد: ابتسمت... عود اغسل السياره ميثوم ...
سلوان : وسيارتي لا اتعب روحك بيها زايد ...ورا ما تغسلها لمع الجام
ميثم : اني اتذكرت عندي شغله لازم اطلع ...عود اخذوا راحتكم بالسوالف ... ويا امي ... لتقصرون بموضوعي ... گمت وگفت
وليد: اكعد يويل دنتشاقى ... اعصابك متوتره شبيك ...
نجاة: وين راح تروح
ميثم : ما رأيح بطلت راح ابقى ويا الولد ... بس لتفتحين الموضوع
نجاة : يعني والله راح تخبلوني ... متگلولي شبيكم محد بيكم حظه كاعد ...
وليد: رفعت حاجبي ... ما اتحملت الحجايه ... عرفتها راح تبدي
شفت سلوان ملتهي يلعب بنته ... اشرت لمريم يله
نجاة : وين مو گلتوا راح تبقون على العشا
وليد: حجيت وياها متنگ عندي دوام ...التفتت على مريم اذا تريدين ابقي
مريم : باوعت لامي نظره ... معناها الا تحجين) لا اجي وياك
هويده: ادخلت من شفت وليد ضاج ...دبقوا الله عليكم صار فتره مامنجمعين ميخالف بعد وكت سلوان هم عنده دوام ...
سلوان : دبقى بعدين نروح سويه ...
نجاة : ابقى عمه متونسين على لمتكم ... هسه عمك على جيه متريد تسلم عليه ...
مريم : ولودي بس اشوف ابويه ونروح ...
وليد: ماشي ...
سلوان :يويل انت من كل عقلك تنغث منها خليها تورور وحدها شفتني سويت نفسي ما سمعتها
وليد: شكد قليلة ذوق مو زلم مشوربه كدامها الا يعني تخليني اقل ادبي واردها رد حلكها بعد متفتحه
سلوان : لك بابا هي تتقصد هيج تحجي تريد تلزم زله علينا انت ادبل قلبها هسه هاي لواكتها من شافتك ردت تروح تسوى عمرها
مريم : امشي هويده للمطبخ ... دا اسوي اكل لريمه ...
من دخلنا شفتيها الامي ... بله هي هاي حجايه ... وفوكاها تحجي عليه لان ميمر حقه يعرفها اذب حجي وهو ميتحمل
هويده: هسه هو هم شدعواه مو هذا سلوان شتحجي ميدير بال
مريم : هويده سلوان يختلف وليد عصبي وحساس ... ميتحمل
اول ما فتنا سألت ها رحتوا للدكتور ... ميصير تحجي ويا بهالموضوع بيني وبينها ميخالف ... بس هو رجال يشوفها صعبه
هويده : خلص انت تعرفين رجلج وتصيرلج مشاكل من وراها شكو تحجيلها احتفظي بأموركم لنفسج لو تحجين وتتحملين طبع امي
نجاة: هاي شبيجن يله خلي نسوي العشا ابوكم إجى
مريم : ماما انتبهي على كلامج ... ترى رجلي مو مثل سلوان ميتحمل ..اول ما فات تلگيتي شعجب وتلگيني سلوان هلو حبيبي
وفوكاها تتعبين ميمرلكم
نجاة : والله رجلج من قبل اني ما ابلعه وانوب من اتزوجج زدت
شايف روحه ..خشمه ميكصه السيف .. حظ اغبر
مريم : لا والله مو اغبر اصلا اني محظوظه بي بس كافي
يفتقدني ويتنغصلي كلشي ...حتى كلاص المي من يشربه
هويده : والله صدك اني اشهد سلوان مو مثله ... لا ابو خالد ورده
نجاة: يله هسه جلبنا بي على العشا بعد شتريدين انسويله
ما بقى عليه والله بس اداري النسابه ..عدنا السالفه بالعكس
بدل ما هم يتلوگولي اني اتلوگلهم
مريم هويده : شلونك بابا ...
سعد: هلو باباتي ... جدو صايره تعرفيني ...
هويده : بابا هاي لوگيه تعرف البيت كله ...
مريم : ولودي نبقى على العشا لو نروح
وليد: لا عيب عمي كال ابقوا .... نتعشا وياهم ونروح ...
سلوان : كملتوا هذا البيت الي بالجادريه ...
سعد: لا بعده دير بالك كدام عمتك تگول مال مره متدري ...
سلوان : ابتسمت لعد اخاف من هاي دتتأخر بموعد التسليم
سعد: ههههههه لا كبرنا على هالسوالف
سلوان : بقلبي كبرت.... عبالك ما ادري بيك وين تلتقي والمن مصادق ... بس والله تستاهل نجاة ...
لا عمو شكبرت بعدك شباب ... شفايتلنا نصير بكدك ونبقى مثلك
سنان : لليل رجعت للبيت ... جنت بحاله ضيق وصدمه من موقف شهد .... لكن من فتحت باب الغرفه .. ولگيتها ظلمه بس اسمع صوت بجيها وشهگتها ... اول ما فتحت الضوه ... وشفتها
كاعده على الفراش مخليه وجهه بين رجليها .... اول ما كعدت بصفها ... ونطقت اسمها ... حضنتني
شهد: اسفه والله ادري اني انانيه المفروض اول ما يجي بتفكيري
يصير عدنا طفل ... ادري بيك صبرت عليه وساندتني صار سنين ... خلص اوعدك ما افكر اتعين وااجل الموضوع ...
سنان: ألي بيناتنا اكبر من افكر بطفل يربطنا ... الي حز بنفسي هاي اول مره احس اكو شي كدر ينكد علينا ...ويسببلنا
مشكله ... اهدي خليني احجي وياج ...
ولا مره فكرت اكون اناني وياج ... واذا شفتيني ظلمتج بهالموضوع السبب تعلقي بيج وخوفي عليج ...
باجر اقدملج على تعيين ويايه بالمستشفى .... لان من حقج بعد هالتعب ... تشتغلين بأختصاصج
شهد: لا ما اريد تقدملي والله عن قناعه ... دا احجي راح اقدم
تعيين بالجامعه ... اني هم ما اكدر التهي عنك اكثر ... ادري قصرت وياك من يوم الي اتزوجنا ...
سنان: كافي دموع ... وماكو اي تقصير ... نامي هسه وباجر
نتفق... بشي يرضينا احنه الاثنين
وراها شفتها نامت ... نزلت يم اهلي ....
أمال: لعد شهد وين
سنان : شويه راسها يأذيها ... لگيتها نايمه ... وين ريمه
أمال: يم بيت عمك .. اليوم
مريم : ورا العشا رجعنا ... صعدت للغرفه ...
محاسن: ها بيبي تونستوا ... اني اروح انام ... تصبحون على خير
وليد: شويه غيرنا جو ... وانت من اهله ...اني هم اصعد انام ورايه دوام ...
مريم : لبست دشداشه قطن قصيره نص ردن اشتريتها من طلعنا ... من دخل سألته شوفها حلوه
وليد: حلوه ... بس شو قطنها خفيف تبين تفاصيل الجسم ...
هاي حبيبتي متلبسيها من احد يمنا ... بس من وحدنا ...
مريم : لا مابيها شي انت يتخيلك ... هي دشداشه عاديه ...
وليد: كملي وتعالي يمي راح اكعد اتفرج تلفزيون ...
مريم : كعدت بصفه ديدخن ...ولودي هم وياك بالقسم بنات حلوات
وليد: ليش دتسألين ... اي اكو
مريم: اكو وحده تحسها ... مخليها عينها عليك ... ضحك ونفث الدخان بوجهي ..
وليد: لا ماكو ... لان علاقتي بيهن بحدود واخويه .. بكل مكان اكو الزينه واكو الموزينه ... بس تتبع الرجال .. يتقشمر لو لا
مريم : ترى والله ما اتحمل ...افكر بيوم عندك شي ورايه ...
خلى ايده على چتفي وقربني منه ...
وليد: مريومه احجيلي شنو الي خلاج تفتحين هالموضوع ترى اني اعرف الي يطلع من هالشفايف سامعه شي بهالاذن
مريم : اگلك بس بالاول ريح قلبي وگلي متسويها
وليد: زين انت قبل ما نتزوج تتوقعين عندي سوالف مكسره
مريم : لا ادري ماعندك ... بس من جنت اصغر جان عندك
وليد: هاي ايام المراهقه وطيش ...بس وراها والله مجان عندي ..
يعني هسه من عندي مره احبها وادري بيها تحبّني ...ليش ادور عليها وأخرب حياتي وياها
بس اريد اعرف شنو الي براسج
مريم : اگلك ومتحجي الله عليك وانت هم تحجيلي الصدگ
وليد: وداعتج ما احجي واجاوبج الصدگ
مريم : هويده تعرف سلوان عنده هيج سوالف ... بس متواجهه
حتى يتخيل هي متعرف ...
اني مو مثلها ما اتحمل ... يعني لو ادري عندك شي اواجهك
وامي نفس الشي تگول المره حتى لو تدري برجلها عنده شي من وراها لازم متخلي يعرف حتى يبقى يحسب احساب للمرته..
وليد: يمكن صح حجايتها ... بس المفروض بدل متغلس... تحاول
تقربه منها وتلهي عن غير وحده .. هويده تعاملها ويا سلوان غلط ... من البدايه اتذكر جان اكو إهمال صح هذا مو عذر للرجال حتى يعرف وحده على مرته ...بس هم وضعهم يختلف عن وضعنا ...زواجهم تقليدي .. يعني احتمال اكو امور متوالموا بيها
من البدايه .. والغلط الاكبر من سلوان
احنه وضعنا يختلف لتقارنين نفسج بيها لان لا اني مثل سلوان ولا انت مثل هويده ... لتشغلين تفكيرج بهيج امور
مريم : زين ....خلى ايده على شفايفي
وليد: يبطه شو صايره نكديه سدي الموضوع ... ادري بيج تقلقين من تسمعين بهالامور ...بس اني گايلج ما اشوف غيرج وحتى لو اريد قلبي ميحن لوحده غيرج ...
مريم : حضنته بس انت تفهم الي احس بي ... والله بقيت طول الوقت افكر بالكلام الي سمعته واجتي افكار براسي اذا ميصير عدنا طفل والسبب مني تخيلت راح يجي يوم وتفكر تزوج عليه
حسيت قلبي يوجعني من الفكره .. لو تسويها بالحقيقه يمكن اموت
وليد: زوجتيني عاد العروس حلوه لا ... اتزوج بحاله وحده ..
اذا تبقين تسمعين نصائح الوالده ...
مريم : هههه لا محلوه اني احلى .... اذا تزوج اموتك والله
وما ابقى وياك يوم واحد
وليد: اذا هيج بطلت ... هي عله وحده خلفها عمي سعد ..
وورطني بيها ... ورطة العمر
مريم : ابتسمت ..اني هم تورطت بيك .. بس مو عمي معن ألي ورطني هذا اشرت على قلبه ... قرب وجهه ونظراته على شفايفي
غمضت وضعت ويا حبه
ورا يومين ... دخل فرحان ... بيده نتيجه التحليل سليمه ... ماعدنا مشاكل من خوفي مقبلت اروح ويا نستلمها دزيته وحده
بقيت انتظره بالحديقه الى ان شفت الابتسامه على وجهه ارتاحيت
وليد: يعله قلبي ارتاحي يجي يجي مو هسه بعدين من يأذن الله
بس ريحيلي هالراس ...
مريم : الحمد لله والله بعد ما افكر اخليها على الله ... المهم ارتاحيت
سنان: ثاني يوم ... رحت قدمتلها على تعيين ... من رجعت ..
تلگتني
شهد: هلو قلبي ....
سنان: قدمتلج على تعيين ويايه بالمستشفى
شهد: سنان والله ما اداوم حتى لو يقبلوني..... راح اقدم معيده ...
سد الموضوع ماكو شي يعوض ساعة نقضيها سوا ...
ما اريد يوم ابقى بعيده عنك ... كافي خفاراتك ماخذتك مني
حاليا افكر ... اسوي طفل ان شاء الله
سنان: متأكده ومقتنعه
شهد: والله مقتنعه .. لو انطيك عيوني ما اوفيك حقك ... انت جنة حياتي اكو واحد يفرط بجنة حياته الله يحفظك الي ... الي صار
اول وأخر مره يصير بيناتنا وعد ... طول العمر