رواية حكايات من بيت جدي الفصل التاسع والستون 69 - بقلم مريم اماسي الليل

#حكايات_من_بيت_جدي
الجزء الاول بارت ٥٧
اماسي الليل مريم يوسف
بعد مرور اكثر من عام
سلوان : ابوعلاوي ... انت اختار المكان ... واني اجيك
لا شغله ليل وشرب ما الي بيها .... خليها الظهر على غدا ....
اتفقنا باجر نلتقي بالمطعم ....
غلقت السماعه ... رفعت ايدي اشوف الوقت ... بداخلي هم يله ارجع اشوف البنات واروح للبيت ارتاح ....
طلعت من الدوام بوجهي لبيت اهلي ..
((بالعاده امي تروح لبيت عمي اتجيبلي البنات ... اشوفهن لو مرات اخذهن ويايه للبيت ارجعن لليل
صرت اغلب المرات اتغدا ويا ابويه وسنان .... اول فتره
الكل تنتقدني وماخذين مني موقف ... وانقطعت علاقتي بأهلي وببيت جدي
لكن بيوم بليل وحدي ببيتي ..... حسيت بألم بالاول يحتمل بعدين وصلت مرحله احس الالم يشلني .... اتصلت على اهلي ... رد عليه سنان بلغته بحالتي ولان البيت قريب
بعد دقائق إجى اخذني للمستشفى ... طلع عندي حصى بالكلى متحركه
انطوني علاج ... استمر عليه الدكتور بلغني اذا ما فاد ني ... اسوي عمليه
امي وابويه طلبوا مني ارجع يمهم ... رفضت
رجعت للبيت ويايه سنان يبات عندي وامي تروح وتجي عليه تطبخلي
وتنظف عرفت هويده عدها علم بحالتي لكن لا اتصلت ولا وصلت للبيت ... بعدها تحسنت رجعت اتصال بأهلي وضلت امي يوميه تتصل اجي اتغدا لو اتعشى وياهم .... واجيب ملابسي
تغسلها وتكويها ... وتحضرلي اموري
منها رجعت علاقتي بأهلي .. يوميا امرلهم من الباب الخلفيه الي تربط
بيوت عمامي بكراج وبحديقه خلفيه وحده ....
اما جدي فصارت بيني وبينه حرب اول فتره بعد ما انرفض الطلاق ...
طلب مني اطلگ هويده ...
كعدت ويا اتحملت اهاناته ... ورفضه للاستماع الي
لكن جبرته بالتوسل يسمع وبالنهايه قنعته الي يمنعني انفصل عن هويده بناتي وتربيتهم
اما علاقتي بميثم وبالكل طبيعيه الانجاة ماخذه موقف مني مثل موقف هويده وجدي
حالي ويا هويده .... كل هالاشهر شبه منفصلين .... هي وبناتي عند اهلها
من يوم المشكله ....
حتى بعد ما رفضت المحكمه طلبها للانفصال ... رفضت ترجع تعيش ويايه ببيتنا المستقل ... حاولت وياها اكثر من مره .... وكل مره ترفض
الشي الوحيد ... الي يجبرها تحجي بي ويايه ... هو الماديات كأنه تريد توصلي فكره انت بقيتني على ذمتك ... واني بقيت لان معتبرتك بنك لا اكثر)بالمقابل ...طلبت منها تخليني اخذ البنات ويايه بالبيت ....
كم ساعة وارجعهم ....
.... ( اتذكر اول مره طلبت بيها اخذهم
رفضت ... خافت عليهم ... حاججتها اعتبري نفسج بالدوام ومجبوره
تتركيهم يمي مثل ما تتركيهم يم اهلج ... بعد مشكله وصياح ادخلت بيبيتي وهي الي قنعتها ... توافق
اخذتهن ... ( ديم هادئه وريم راح تدخل مدرسه بعد اشهر ورانيا الشعنونه الوحيده الي جنت شايل هم من اخذها تروح تتأذى لان وكحه
اول ما دخلنا للبيت ... ريم سألتني ليش بابا متبقى ويانا ب بيت جدو ياسر
جاوبتها لان كبرت لازم اكعد ببيتي انت هم من تكبرين تجين هنا ....
فرشت دواشك بالهول ... خليت كاسيت كارتون بالفيديو ... طفيت الاضويه
تمددت ديم على ايد ورانيا على الخ وريم بصف ديم ... يتفرجن ... وصيت ريم ادا شافتني غمضت تكعدني
بقيت اتفرج وياهن الى ان حسيت بشفايف على خدي ... فتحت عيني ريم
التفتت على ديم ورانيا مفزوع لان استوعبت جنت نايم ... وتركتهن وحدهن
لكيتهن نايمات ... ليش بابا بعدج كاعده
ريم : مو اخاف ... اريد انام هنا ...
اشرت على ايدي ... شلت ديم خليتها على صدري ونامت ريم على ايدي ... تغير تنفسي لتنهيدات ..بداخلي مشاعر تمنيت ادخل الثلاثه بقلبي حتى ارتاح من التفكير والقلق عليهن ... بعد ما نامت ريم
خليتهن على الفراش وگمت صفنت على ديم كل ما تكبر تشبه امها اكثر ...
اشتاقيت لهويده ... رحت رفعت السماعه اتصلت على بيت عمي اجاني صوتها كأنه كاعده بصف التلفون ... عرفت باقيه قلقه وقريبه من التلفون متوقعه اتصل اسألها....
جاوبتها الو
هويده : شوكت ترجع البنات
سلوان : ما ناوي ارجعهن
نايمات اذا قلقه عليهن امر عليج اجيبج لبيتج يم بناتج ...
هويده : بيتي بيت اهلي ... سد الموضوع الي بيناتنا انتهى
سلوان : على اي اساس انتهى انت بعدج مرتي وعلى ذمتي ... ومثل ما اني ما مقصر بأي حقوق الج ولبناتج الي حقوق عليج
هويده : من الاول ردت انفصل عنك ... وانت الي ما قبلت ننفصل
اني هذا وضعي ما يتغير وتعرف طلعتك من حياتي ...بدل ما صابر عليه روح طلك
سلوان : حبيبتي تعرفين طبعي محد يكدر يستفزني ... والي براسي اسوي ما اسمع حجايه احد ... لو السالفه بس عليه وعليج كان ريحتج وطلگت من قبل سنه ...
بس ادا انت ناسيه بيناتنا بنات اني ما ناسي .. تريدين تبقين على وضعج هذا
معناها تگليلي روح اتزوج
هويده : اتزوج ما يهمني ....ومن يكعدون البنات رجعهم )
سلوان : بعدها بأيام رحتلها للدوام .. انتظرها يم سيارتها ... من شافتني اتفاجئت وارتبكت
هويده : صاير شي ... بالبنات لو بالبيت
سلوان : ليش الا يصير شي يله اجي على مرتي
هويده : هبطتني ...اذا جاي تگلي ارجعي ... ماكو داعي اتعب نفسك تعرف الرد
سلوان : وتالي وياج ....هاي اخر مره اطلب منج ترجعين ويايه للبيت
ونبدي صفحه جديده
هويده : واني للمره الألف اگلك ما ارجع الي بيناتنا انتهى ....
سلوان : وبالفعل كانت اخر مره اطلب منها ترجع ))).......
وصلت لبيت جدي ... طبگت السياره .. ونزلت دكيت الباب على اهلي .... بين ما راحت امي اتصب الاكل ...
اتصلت على بيت عمي سعد طلعلي ميثم ... بقيت اسولف ويا ... سمعت صوت بكاء ابنه قريب عليه فهمت شايله ويحجي ويايه
ميثوم اخذ راحتك غير وكت نسولف
بس أنطيني هويده ... سمعته صاح على هويده
ميثم : خلي اودي يحيى ل أمه ... غير وكت اشوفك هاي هويده وياك
الو
سلوان : الو حضريلي البنات اريد اخذهن ويايه للبيت
هويده : خليها غير يوم ...
سلوان : نص ساعة امي تمر تاخذهن ... مو على مزاجج تخليني اشوف بناتي
ودزي كتب ريم وياها ...حتى ادرسها ...
هويده : باجر جمعه واخذهن ... اخاف اليوم وراك سهره
سلوان : مممم عرفت تريد تغثني ... وما مصدگه تغيرت وبطلت السهر
شي بداخلي ... خلاني اكذب واجاوبها ...
قبل ما اروح اسهر ... ارجعن حتى ينامون من وكت ...
هويده : تندمت لان حجيت هالكلام وخليته يحس بعدني مهتمه لأمره
شي بداخلي خلاني انزعج ...
اخذ راحتك ... السهر اهم
سلوان : هاي اني أحددها من الا هم والي اله الاولويه بحياتي ...
واتصور تعرفين كلش زين بناتي اهم شي بحياتي ... ماعندي شي اهم منهن
واذا تتكرمين وتقبلين يباتون يمي ... الغي السهره لخاطرهن
هويده : ديم متكدر تبيتها عندك ... لان تحتاج اغيرلها بالليل وتعرف بيها تشرب مميه
سلوان : سهله مثل ما غيرت لريم قبل من جنتي تتعاجزين تغيريلها اكدر اكعد واغير لديم ... لا تتحججين
هويده : غثني ... خلص اخذهن ... متأكده راح ترجعها بنص الليل
لان ميكدرون ينامون بلا امهم
سلوان : اطمئني اذا رادوا يرجعون ... ارجعهن حتى لو الفجر
هويده : اففف انت تتقصد تتقرب للبنات حتى ... تعلقهم بيك اعرف نواياك والي تخططله ورا هالموضوع
سلوان : مو مشكلتي ... تفكيرج بيه سئ دائما ... ما بنيتي من الي بدماغج
وبناتي مثل ما انت امهم اني ابوهم ومن حقي اخليهم يحبوني ويتعلقون بيه
لا تبقين تستغلين البنات حتى تسمميني بالكلام ... انت اختاريتي تبقين بهالوضع وحددتي مصيرج ويايه مو من حقج تحددين مصير البنات وتبعيدهم عني ...
لو اريد اجبرج على العيشه ويايه باجر ارفع عليج قضيه ناشز ... واجبرج تعيشين انت والبنات ويايه بنفس البيت ... بس تدرين بيه ما اسويها
لذلك افصلي موضوعنا وحقدج عليه عن البنات لا تنقليلهم هالحقد وتبعيدهم عني ...
هويده : انت شنو تهددني .. اني هم اكدر ارفع قضيه واطلب الطلاك مره لخ
سلوان : وداعتج جان رفعتيها بس تعرفين ... هم تنرفض مثل المره الاولى
وعيب نبقى يوميه مكابلين المحاكم ... ما اتوقع الطلاك يغير شي بوضعج ويايه لان وضعج حاله حال المنفصله عن رجلها ...
هويده : تدري انت غلطه حياتي ...
سلوان : تنهدت ... ترى دا اتحمل منج فوگ طاقتي ... انتظر البنات نص ساعة واريد اروح للبيت
سديت الخط ... تقصدت تأخرهن ... ورا ساعتين ونص يله دزتهن ...
من صعدوا ويايه بالسياره ...فاجئتني ريم بالكلام
ريم : بابا ما اريد ابات يمك اريد ارجع يم ماما ..
سلوان : تنهدت بالاول عصبت بداخلي ... لان هويده بدت تتبع اسلوب التحريض وملئ عقل البنات بلي هي تريده ...
اجيت انزل ... اروح احجي وياها ... تعوذت من الشيطان .... وطلعت للبيت
بقيت البنات يمي كم ساعة .... من انتهى المغرب رجعتهم الها من الباب
من دون ما اعاتبها على كلامها ويا ريم
لان طول فتره وجودهم ويايه ... بالبيت بقيت افكر ما اريد نزاعنا اني وهويده يأثر على نفسيه بناتي وتربيتهم واطباعهن ولا ردت اجرجر الطفله بالكلام واعرف امها شنو تحجي عليه كدامهم ... خوفا من تعلم الطفله الفتنه ونقل الكلام .... بقيت دايخ بوضعنا .. اخر شي قررت ما استفزها واخضع
للي هي تريده حتى اتجنب شغله تعبي راس البنات وتبعدهم عني ...
ثاني يوم .... طلعت الظهر لموعدي ويا ولد صديقي
وصلت للمطعم لگيته ينتظرني ... طلبنا الاكل وبدينا نحجي بالشغل ....
شفته رفع ايده خلال تحاورنا ... يسلم على شخص ورايه
التفتت ...
وانصدمت بالشخص وبالبنيه الي ويا ....