رواية حكايات من بيت جدي الفصل الثالث عشر 13 - بقلم مريم اماسي الليل

بارت قصير
#حكايات_من_بيت_جدي
الجزء الثالث عشر
اماسي الليل
مريم : ثاني يوم ما منتبهه على نفسي والحاله الي اني عليها لان گالب وجهه عليه ولان  موضوع الصور شغل تفكيري وثار الشك بداخلي بقيت اغلب اليوم اصعد وانزل شايله ماعون بي كيك اطلع غضبي بالاكل
وحده من المرات لمحني واني اكل بالكيك  دخل شفته ابتسم ابتسامه تكاد تكون واضحه فتح الثلاجه دخل راسه صفن بيها شويه طلع بعدها العصر طلع للحديقه لگاني اني والبنات دناكل منها  اخر مره لمح بيدي ماعون دا اصعد حسيته صعد ورايه بدأ يدندن  مر بصفي .
وليد:امشي رجعيها ترى جايب كيكتين خو ما تريدين تخلصيهن كلهن بنفس اليوم ويصير عندج سكر .
مريم : خلي يصير عاد انت شكد تهتم صعد قبلي للهول
لگيته كاعد على القنفه الي بيها كتبي
وليد: تعالي اكعدي دا احجي وياج وانطيني الماعون
مريم : هاك بدل هالف والدوران گلي اجيبلك .
وليد: والله ما اريد اكلها بس حتى انت متاكليها لان شفتج هوايه اكلتي وموزين عليج
مريم : ترى حبيبتك بالصور مو ضعيفه حتى كاعد تحاسبني على الاكل
ترى ادري تقصد حتى ما اسمن
وليد: صح حبيبتي بطه ابتسمت ترى والله حرت وياج ساعة احس عقلج مال مره ومره طفله ماعندي حبيبه غيرج والبنيه الي شفتيها بالصور زميلتي وماعندي شي وياها مجرد علاقتنا اخويه والبنيه تعتبرني اخ ارتاحيتي .
مريم : والصور ليش محتفظ بيهن القديمات .
وليد: كلهن شگگتهن روحي شوفي بالكنتور بس صور الكليه بقت .
مريم : گول والله
وليد: والله مريومه بعد كل هالسنين معرفتي انت شنو بالنسبه الي وتتخيلين اكدر اشوف لو افكر ب وحده غيرج بس انت متعبتني ما اعرفلج قرار 
تدرين شكد تأذيني بهالتصرفات ترى اني ادوس على نفسي هواي وياج مرات احس حتى كرامه ما بقت عندي و انت تستغلين هالحب
هاي اخر مره انبهج  الي يحب ميكدر على زعل حبيبه
انت من تغلطين متتنازلين دائما اني اتنازل حتى وانت غلطانه ما اتحمل اشوفج مغثوثه ترى انت كدامي كتاب مفتوح
اني ادري الموضوع من البارحه لليوم هو بدماغج  واعرف من تتغثين اطلعين حرگتج بالاكل ترى لوما احبج ما انتبه على هالتفاصيل
والله شيبتي قلبي شنو الي يريحج وتبقين ويايه على نفس الطبع انت فهميني  الي اني ما فاهمه  جنتي تگليلي اضوج من عصبيتك وقسوتك ، متلاحظين   تغيرت لخاطرج بقمة عصبيتي الزم نفسي وياج واتحكم بيها
وانت بعدج على حالج تريديني اتغير وتغيرت وانت بعدج على وضعج .
مريم : ما ادري احس اكو خوف بداخلي منك .
وليد: اي غير افتهم من شنو .
مريم : ما ادري من اطباعك .
وليد: لا انت عندج سوء ظن ودائما ظالمتني بتفكيرج والصدك بديت اتعب من هالفكره اني البارحه بليل جنت مقرر من اليوم خلص ادوس على قلبي وياج بس من شفت وضعج اليوم متحملت، ترتاحين اذا اكلج انت نقطه ضعفي وماعندي سيطره على قلبي وياج ترى لاتصورين هينه عليه احجي هالحجي بس اريد اشوف تاليها  اريد تشيلين هالخوف مني ليش متخيله اكدر اكسر قلبج لوااذيج صارحيني بحقيقه الي بداخلج لا تبقين كل مره بحال
انت تبادليني المشاعر لو بالنسبه الج شخص مفروض عليج لان جدي مينطي بنيه لغريب ولان الكل عرف انت الي
مريم: لا مامفروض ...
وليد: يعني ...
مريم : يعني انت تعرف اني هم احبك بس ما اتقبل تكون ويا غيري
وليد: لج بابا ماعندي شي كبرت على هالسوالف بس بعدني احتاج الاهتمام احتاج احس بمشاعرج  مو ابقى استجدي منج تحسين بيه
مريم : اني ما اعرف اعبر .
وليد: والحل ؟ ماشي مراح اضغط عليج راح اخليج براحتج خلصي امتحانات  وارجع افتح هالموضوع بوقتها تكونين عارفه ومقرره وضعنا .
مريم : اي افضل اني هم هسه دماغي مشتت بالي يم الدراسه
وليد: خلص مراح افتح وياج اي موضوع تنهدت بس بساعتها تردين اي او لا ... ماعندي حل وسط
لو نكمل لو كل واحد يشوف حاله .
مريم : طلع. من الهول  بقيت افكر شنو اهتمام وشلون نتعلم الاهتمام واحنه مفتقدي سلوان يريد اهتمام من هويده ووليد يريد اهتمام مني معنى اكو خلل بيناخلل اثر علينا من اهمال الام والاب، ليش احنه منو الي ربانا؟  كل البيت ربونا
كل الي بالبيت ادخلوا بحياتنا وقراراتنا الكل يأمرنا واحنه انفذ حتى العقاب اخذنا من كل البيت مو من ام واب يعني مكافي شوكت يجي اليوم يكون المسؤول علينا شخص واحد نتحاسب ونتعاقب ونتعلم من شخص واحد 
اوف ليش امي مو مثل عمه سعاد ولا مثل عمه أمال ليش حالنا مثل الايتام وامنا بالوجود ليش من يوم الي بديت السادس ما سألتني عن دراستي ولاشجعتني اطلع معدل ولا سألتني اي جامعه ارغب
صح وليد وكع على علتي  اني مغروره بحبه و صح اني استغل ضعفه وارتاح من اشوفه متعلق بيه واني الي مسيطره عليه مو هو الي مسيطر عليه
ماكو غيره يخليني اطلع من سلطه الكل واصير بحكم الفرد
على الاقل حريص عليه  بعز مغثته مني مايتحمل يشوفني مغثوثه
وفكر بدراستي ومستقبلي (بداخلي صوت يشككني بقناعتي مثل وسوسه شيطان
انت تريدين تصيرين مثل امج
لا ما اريد اريد اعيش حياة مثل حياه عمه امال وعمه سعاد
اريد يكون عندي رجال وبيت واطفال انطيهم كل الي افتقدته
من حنان امي ما اريد اصير مرايه وشكل حلو مهمش كل همه مكياج ولبس وطلعه ونظره الناس لمظهري  وللمظاهر
اريد يقيموني لنفسي لكن لكن وليد شمقيمني لشكلي لو للي بداخلي ؟
راضي بيه وبعيوبي ويحبني لشخصي
لو لشكلي اخاف من اصير اله ويتعود على شكلي يهمشني و ما ارتاح ويا ما اكدر احقق حلمي( امومه واطفال وبيت هادئ ورجال يحتضني ويحتضن اطفالي) ..
حلمي بسيط بس الواقع صعب، لا ما اريد اصير مثل عمه امال اني مو مثلها قويه وعندي حكمه هي كدرت تكمل ويا عمي وهو مهمشها وعايش حياته بعيد عنها محملها مسؤوليه كلشي مجرد زوجه كدام العالم وأم ولولده ما اريد اعيش مثلها ولمحة الحزن تلمع بعيني ابسط موقف يحرك احساسي يحرك ثوره الظلم والحرمان مال سنين مكتوم بصدري يطلع نار بهيئة دموع اني ذكيه واحس واعرف كل واحد بهالبيت ادعي الغباء والعفويه يمكن حتى ارتاح من التفكير
لا ما اريد اصير مثل عمه سعاد ادعي القناعه والراحه والسعاده لان ماكو سعاده وراحه بدون قناعه
رجعت راسي على القنفه وبديت اتمطى من تعب التفكير
اريد اتحرر من قيد هالافكار اريد اتحرر من ذكريات ضرب جدي لبيبيتي وسلطتها على قلبه ما اريد اصير مثلها انانيه
ومتعبه جدي  بأستفزازها اله  دائما جنت المح نطره تعب
بعينه من مره عنيده متكبره تحاول تتلون ويا تبين ضعف مبطن بأستغلال محبته تثور عليه بطغيان يمس كرامته
اريد حب ومشاعر بسيطه وحياة هادئه مستقره اريد احس بأمان .
مرت الايام ووليد وفى بوعده ويايه مخليني على راحتي واني حالي
مثل الي طلقوا سراحه و يراقبوا من بعيد وين  يحدد
وجهته ووين يريد يكون ويستقر بأي مكان اكثر واحد ساندني هو دائما جان  يسألني  عن دراستي ويطمئن عليه يفتقدني ويتنغصلي كلشي ،باله يمي حتى واحنه محاوطين مشاعرنا بسورلكن بلحظات تلتقي نظرات الاشتياق لكلمه حلوه وحديث مطول وعتاب  لمشاكل وزعل وصلح بهالفتره اشتاقيتله حتى وهو كدام عيني لكن بعيد مثل الي لازم قلبه
وملفلفه بشي اسود حتى يخفي اشعاع هالحب هالمره جانت
حاسمه غير عن كل مره
أتخرجت من السادس وطلع قبولي علوم الاحياء  جامعه صدام ( النهرين ) وكان  هو صاحب فكره التقديم وهو الي جان يجي ويروح ويايه حتى انقبل حتى بامتحان الكفاءه هو الي يوديني ويجيبني جنت اشوف فرحه واهتمام ما شفتها عد احد غيره كلهم مو مثله بيوم الي انقبلت اتذكر بطريق الرجعة صافنه على الشباك حسيت بأول رد فعل لمشاعره المكبوته
من فتره ،اشتياقي للمسة ايده على ايدي
خلتني اغمض عيني واعرف هو هالفرد الي راح يعوضني عن الكل هو الي راح يخليني اعايش حياة مستقره ويحتضن بيت بزوجه واطفال بهالحب والحنيه الي عنده ماكو انسان كامل كلنا عيوب وهو عيبه العصبيه لكن اكو شي اكبر من العصبيه يغطي عليها صاحب كلمه وحب صادق
لاول مره اشبك اصابعي بأصابعه واشوف نظره تملك وراحه بعينه حسيت رَجَعتله روحه من سمعت تنهيدته مثل الروح الي دخلت بالجسد واول رد فعل لبث الحياة بيها هو النفس ..
وليد: حبيبتي خلينا نكمل سوا
مريم : راح نكمل اذا القدر راسم هالنهاية.