رواية حكايات من بيت جدي الفصل الثالث والأربعون 43 - بقلم مريم اماسي الليل

هيام : هالشخص كل ما انسى واحاول
اطلعه من قلبي ... القدر يطلعه كدامي ... حتى اتذكر غدره
واتذكر خيانتي لرجلي بالمشاعر ... صح صاينته ومستقيمه بحياتي
لكن قلبي يخون هالاستقامه ويا كل لحظه تفكير واشتياق لسلوان
وهالقلب ما خلاني احب رجلي ...
وعلى رغم التعب الي تعبته ويا ... بسبب سلوكه واطباعه الي تتحكم بيها غرائزه ... وخيانته الي ... لكن ما بيوم ضعفت
وطلعت عن استقامتي ...
لان هو ( هاني) الانسان الوحيد الي لملم شتات حياتي ... وانتشلني من الواقع الي جنت عايشه بي ورافضته بسبب امي واهله ... طلعني منهم ورا سنه زواج ... وكعدني بيت ... خلاني ابقى انسانه محترمه بنظر العالم ... بعيد عن سمعة امي ...والبيت الي عشت بي ...
جانت هالامنيه اقصى غاياتي ... لكن دفعت ثمن هالامنيه ألم لليوم ما كدرت انسى من جنت حامل ... جان يجي سكران ميدري بنفسه يضربني الى ان مره من المرات .... فقدت الطفل الي شلته ٦ شهور وجنت انتظره يوم يوم حتى ينولد ... واطلع كل الكبت العاطفي الي عشته بحياتي اعوضه بهالطفل ... ردت احس
بمشاعر الحب الحقيقيه الي مابيها خيانه وغدر ... مثل الي تعرضتلها بحياتي من اب ما قبل اتسجل بأسمه وهو يعرف اني بنته لمجرد ذنبي امي انسانه مو مستقيمه ومن ام طايشه ضيعتني وضيعت حياتها ... بغرور ..ومن حبيب اكثر شخص حبيته وأمنت بي ومنحته مشاعري وكدرت ابوح بكل الي بقلبي وبكل الظروف المريت بيها كدامه اتوقعته يختلف عن باقي البشر لكن خذلني ... يوم
الي تزوج غيري ... سببلي الالم وصدمه جان ضعت بنفس الطريق الي ضاعت بي امي ... لكن لكيت الانسان الي حبني (هاني)
وساعدني ابقى على نفس الطريق الصح ...وما اغلط ... وخلاني اكمل دراستي)
بلحظه الي حسيت بي ورايه وسمعت شنو همسلي
اتذكرت الي عانيته بسبب سلوان
وجاوبته بدون ما التفت او اتأثر بكلامه
رجاءاً انت رجال متزوج واني مره متزوجه ... عيب هالتصرفات ... خليني اذكرك بخير لا تغير فكرتي عنك
كل الي اتذكره منك انسان ساعدني بيوم ... وما اكن الك اي مشاعر حاليا ... انت شخص غريب ميصير تجاوز حدك ... تركته ورجعت لمكاني ...
سلوان : بهاللحظه فهمت .... الي سويته بيها ما سامحتني عليه ولا نسته ... وتبدل عدها الحب لكره ... كلماتها صحتني ورجعتني لعقلي
صحيح اني متزوج ... والانسانه الي اتزوجتها محد فرضها عليه اني اختاريتها وعندي طفله منها واحتمال ... انتظر طفل ثاني ... ومحاولتي ويا هيام .. مجرد طيش ما منها رجاء وهي متزوجه ... وادري بيها انسانه مستقيمه ومتقبل بالغلط
رجعت للميز مخنوگ ... ها هويده يله نروح ...
هويده : سلوان مصارلنا هواي من اجينا ... خلينا نبقى شويه وراها نرجع ...
سلوان : لا هاهيه اني تعبت ... واشتاقيت لريما خطيه هسه
تثبر امي ...
هويده : يله بكيفك ....
سلوان : هالمره من مرينا قريب على الميز الي كاعده بي ما كدرت
اباوع عليها ... وهويده ويايه ... سلمنا على العرسان وطلعنا ...
مثل مل مره احس بتأنيب الظمير تجاه هويده ...
يمكن هيام كدرت تحب هاني وهو احتواها وخلاها تنساني ... لكن اني حبيت هويده حب عشره وتعويد ما كدرت تنسيني هالهيام ولا كدرت احبها بنفس حبي لهيام ....
الشي الوحيده الي من اشوفه انسى الدنيا .... اول ما دخلنا للبيت ... وريما شافتني وضحكت ... وتريد تطفر من حضن بيبيتها حتى تجيني ... واول ما رفعت ايدها ... معناها شيلني
وشلتها حسيت الدنيا كلها بين ايدي وبحضني ...حبي لبنتي
اكبر من اي حب بقلبي ...
ثاني يوم رجعت من الدوام .... اخذت هويده اشوف البيت ...
هويده : سلوان حلو ... بس ليش الكراج والحديقه صغار ...
سلوان : لان استغليت المساحه كلها ... بناء من جوه هسه اشوفي يبين چبير ...
هويده : دخلت وجنت متأكده راح يعجبني لان ادري بي ابو بيت ... ويخطط للبعيد ... المطبخ جبير وغرف النوم كبار ٢ جوه و٤ فوگ ...بينهن هول داخلي وحمام ... تقريبا نفس تصميم بيت جدي بس بيت جدي المساحه اكبر بهواي ...
حلو ... محسب احساب مال عشيره ... شكلك صدك ناوي على ال٦ جهال
سلوان : ابتسمت لعد شقى ... ريمه بالغرفه الجوه يمنا والبقيه اشمرهم فوگ ...
يله اذا خلصتي ... خلي نلحگ نمر للمختبر ...
هويده : يله ... غير مره امر ... من يكمل البناء
طلعنا ... لمختبر التحليل سويت التحليل ... بس بداخلي اتمنى يطلع ماكو حمل ... اني ما احب الجهال عكسه هو
ورا شويه طلع التحليل ايجابي .... ابتسامته وفرحته ... خلتني
احس بنفس المشاعر من عرف حامل بريم ... بهاللحظات احسه يحبني ... وقلبه الي ... ابعد كل شك وتفكير اكو غيري بقلبه .
سلوان : هههه قلبي حس اكو واحد بالطريق گتلج البارحه ماصدكتي
هويده : اويلي سلوان هم راح ارجع اتوحم وارجع اصير دب
ما لحكت حتى انسى
سلوان : يله حبيبتي ... كم شهر ويشرف ... وراها انطيج استراحه فد ٦ شهور ونسوي الثالث
هويده : اي والله عايزه ... مو گلولك متزوج أرنبه .... عاد بلكت اللحگ اتخرج دور اول ... هذا اخر جنص الي
رجعنا للبيت ...
على كد ما بشرنا خالتي ... واخذنا ريمه ورحنا لبيت بيبيتي
سلوان : فتحت باب الهول ...دخلنا يا الله
رجعت ليورا ... على صوت وليد عرفت مريومه بلا حجاب
مريم : كاعدين بالهول نتفرج تلفزيون وليد نايم على رجلي
وبيبي يمنا وجدي كالعاده بالصاله يقرا كتب
دخلوا سلوان وهويده واني بلا حجاب ودشداشتي قصيره نص ردن ....طفر وليد ...
هويده : شلونج يمه
وليد: ولك اوگف دقيقه ... شفت مريم طلعت ... من الهول تعال ...
محاسن : هلا بيبي ... يمه فدوه للبنات ... جيبيها ... خلي أبوسها ... جدج والله قبل شويه گال جيبوها ...مريومه گلتله ورا العشا نجيبها تبقى لحد متنام وتوديها
سلوان : شلونج يمه ... هو راح تبقى يمكم بعد ... منا وجاي
امها راح تلتهي بالجديد
محاسن : هلو حبيبي ... على الخير.... بيبي حامل ؟
هويده : اووووف ... اي يمه حامل ... متشوفي وجهه يضحك مكيف وشمتان بيه الطريق كله ...
من اليوم متبرعة بريم الي يريدها خل ياخذها ...
وليد: على الخير ... اذا اجاني ولد ... وجبتوا بنيه ناخذها
سلوان : خُفَت (لهالوجه).. اذا اجا ولد واني شنو كفيل بأبنك اخلفله نسوان
ان شاء الله هالمره ولد ... يمه ادعيلنا ولد ...
محاسن : بيبي شبيكم متريدون البنيه ... كاتلين روحكم على الولد ...البنيه حبيبه وحنينه .. شبيها هاي دشوفوها تتبطرون
مريم : شلونك سلوان ... ها هدهد شلونج ... همزين جبتوها ..
لريمه
سلوان : الحمد لله مريومه
هويده : هلو مريومه .. الحمد لله ...
وليد: راح تصيرين خاله مره لخ
مريم : صدك اختي حامل ... على الخير .. ان شاء الله هالمره ولد ..حتى بنيه وولد وكافي
وليد: لا بربج محدده العدد بكيفها ... عادي تريدين ولد وبنيه
النسوان تارسات الدنيا اروح اتزوج وأخلف
هويده : عاد انت وسلوان خوش حافظين كليشه لو ننگلب أرانب لو تزوجون ...
مريم : والله اختي مومايحسون بالمعاناة على الحاضر يصيرون اباء ... طبعا يريدون ... اذا التعب براسنا
سلوان : والله يمه عندي ريمه هسه ويا النفس بس هم اريد ولد ..
اذا يجي ... الولد..وراها لو ابقى اخلف بنات عادي
مريم :والله الام الي تخلف بنيه بجرها ... الله يحبها من تكبر تساعدها وتصير صديقتها ...
وليد: ان شاء الله يجي ولد ... اذا تجيني بنيه و ابقى اركض وراها
لحد يتحارش بيها لو يحبها ... غير اتخبل
هويده : ههههههه صدك علمود هالسبب متريد بنات ...
محاسن: اي والله بيبي هاي عقليته ... هو على ريمه يگول
هاي حلوه أتعبنا من تكبر ... لازم اني وسلوان نجيبها ونوديها
حتى محد يتحارش بيها
مريم : لعد اويلي عليج خاله ... راح اشوفين ضيم اسألي خالتج
يجوز يلوحج فد جفجير ...
سلوان : حتى ما انيمه براسه شحده ألي يمد ايده على ريمتي ..
حير بخلفتك مالك شغله ببنتي ...
هويده : ( سلوان) خطيه شلون مُتفَهِم ... ما جنت تكومنا وتكعدنا برزاله
وحتى تكفخ اخذنا منك ... واحنه سطح منشوف
وليد: سدوا هذا الموضوع من ينفتح مو بصالحي ... ام خالد تحقد عليه
سلوان : راح أتسمي خالد ... اني گتلها لهويده اسمي رامي
محاسن : انتوا سموا وهو ربكم قاسم ومسمي من فوك ...
لا بكيفك ولا بكيفه ... ادعوا بتمام الخلقه حرام هالحجي ...
الله ما يرضى بي ...
سلوان : اني نسيت جدي خلي اكوم اسلم عليه ... فتحت باب الصاله
شلونك يابه
ياسر: هلا بابا ريمه وياكم ...
هويده : شلونك جدو هياتها ... اللوگيه عرفتك ... سلوان شوف الحركات .. والتصفگ
ياسر: تعرف روحها عزيزه ... جيبيها جدو وروحي ... وسدي الباب وراكم
هويده : سديت الباب ورجعنا بالهول سولفتلهم على ريمه من شافته لجدو
محاسن : مو هو يلعبها لعبات يخليها على ظهره ويمشي
على ايده ورجله ... لو يشيلها برجله ويلزمها بأيده ويصعدها فوگ
متشوفي گلج سدي الباب .. حتى محد يشوفه يرجع بكدها ههههه
مريم : بيبي خطيه ليش تحجين عليه ... ميكدر كدامنا يشوفها صعبه .. المهم قلبه حنين ... لو ما عزيزه مجان سوى هيج
محاسن : اي ارجفي على جدج ... خلي يشبع بيجن اني حصتي الولد على قلبي ...
سلوان : باجر خميس نطلع ويا الولد ابو خالد ...
وليد: ان شاء الله ... مريم انعقجت
وراها اشرلي سلوان نطلع عرفت عنده حجي ...
طلعت جگاره گتله امشي نطلع بالحديقه دا ادخن ...
طلعنا كعدنا ... حجالي من اول ما فات العرس لحد هاللحظه
وليد: سلوان ترى هذا خريط ... أكو حب بعد البنيه اتزوجت
وانت اتزوجت وعندك بنيه ومرتك حامل ... شنو انت مراهق
متفكر بمرتك خطيه لو شايفتك ... شلون تخليها بهالموقف
ادري ما كلت هيام راح اشوفها لهويده وياك وتعرفك ما مقدر مرتك وما محترم حضورها حتى اذا جانت تحبك بيوم ( هيام)راح تلعب نفسها منك علو تصرفك
سلوان : ادري كلي غلط ... من راسي لرجليه بس بعد صارت
بلحظة الشفتها ما بقى عندي عقل ...
وهي البنيه هم صدتني ولا عرفت ولا راح اعرف عنها شي ..
ولا وين مكانها شنو حياتها
وليد: لا عايزه تعرف مكانها وأخبارها مره متزوجه تريد تخرب حياتها انت َ
سلوان : قصدت يعني مراح اعرف عنها شي ... وبمرور الوقت هم ارجع التهي عن التفكير بيها ويجوز من يصير عندي بعد جهال ويمر بيه العمر انساها .
وليد: الله كريم .. وبداخلي ما مقتنع.. راح ينسى كل ميشوفها
راح يتذكرها .. وتتأثر حياته ويخربها وهو الي يخسر