رواية حكايات من بيت جدي الفصل الثالث والثلاثون 33 - بقلم مريم اماسي الليل

#حكايات_من_بيت_جدي
الجزء الثالث الثلاثين
اماسي الليل حقوق النشر محفوظه
وليد: اي ميثوم عود احنه نسابتك وكاعد تستشيرنا بأمورك العاطفيه
سلوان : احجي منو هاي الي ماخذه عقلك
ميثم : والله ابو خالد اني هم تاليتي معارك ويا اهلي
سلوان : رفعت حاجبي ليش يويل  منو هاي البنيه
ميثم : بنفس منطقتنا وتعرفون اهلها ... بت حجي عبد الرحمن
وليد: اتافجئت ولك هذولي خوش ناس وبناتهم متربايات .. وادري ابوهم رجال كلش زاهد ومتدين ومربيهن على ااحلال والحرام... بس تعال ذولي وين عدهم وحده بكدك كلهن اكبر منك
ميثم : ابتسمت ... نوران الصغيره الي احبها اكبر مني بسنتين
سلوان : الله يطيح حظك هاي امك اذا تسمع بهالسالفه تنجلط
وليد: هههه والله يا ميثوم ادري انت كاعد تحب لو دتعوض احساس الامومه
ميثم : ما ادري اني من شفتها بوقتها هي ناعمه مو ضخمه اتصورت اني اكبر منها ... ومن اتعلقت بيها عرفت هي اكبر مني والصدك مهمني الموضوع ... ممبين هي اكبر ... والبنيه اهلها تعبانين على تربيتهم ...ملتزمات حتى تلفزيون ماعدهم ... ابوهم يستحرم ولا راديو ولا مسجلوهاي كم سنه من صارحتها لليوم اني لا طالع وياها ولا اكدر اشوفها بالعطله فقط بأيام الدوام بس بالتلفو من يصير مجال ...
سلوان : والله اني اعرف بناتهم الكبار ايات وبينات ذني عبالك راهبات بحياتي ما شفت وحده منهم منزله راسها بس عينها على طريقها ولابسات جبه حتى نص چف ايدهن مضموم ... والله ما اتذكر بيوم سمعت صوتهن
بس نجوان الي جانت ويا هويده. ماجنت احبها ...
صح البنيه نفس لبس خواتها بس مو مثلهم... مشايف عليها شي الواحد يحجي حق الله بس شي بداخلي مجنت احبها اتخيلها داخلها مو نظيف( من سمعت عدها علاقه بولد. صديقنا والي ادري بي تحب غير واحد جوارينهم واكو بينهم هم علاقه وهو هم يحبها كرهتها بس مكدرت احكم عليها لان مشايف بعيني ) ... الي وراها. نسيت اسمها لا مثل خواتها. الكبار ... بس هاي نوران ما شايفها ... او يمكن شايفها وما اعرفها ... لان صغيره
ميثم: تقصد جنات الي اصغر من نجوان واكبر من نوران ... هاي انخطبت لابن خالها الي ادري بي هالفتره تزوج ... لان ابوهن مريض ذاك اليوم خطيه نقلوا مستشفى ... عنده فشل كلوي .. وكل فتره يسوي غسيل كلى ... الي باقيه ممتزوجه بس نوران ... نجوان
تزوجت واحد مطلق ...كلش متمكن. هو قايم بمصاريف
علاج ابوها...
وليد: هسه المجمل العائله ما عليها مؤشر خوش عائله والبنيه انت تكول مثل خواتها ..يعني سالفتك بيها مشكله بس بالعمر .. وهاي ما اتصورها مشكله. عند القاضي بس يم امك
ميثم :. اي والله مشكله وفوكاها امي رايدتلي وسن ....
سلوان : يا وسن ..بت صديقة عمتي نجاة ثاريك تتعيقل يويل... لك هاي سباعيه
ميثم : ما يعجبني لبسها ومتحرره ... ما أمن بيهج وحده
وليد: صح لبسها متحرر بس البنيه مؤدبه لا يغرك مظهرها ... ( وجهت نظره لسلوان افتهمها وابتسم )
( قبل ما اسافر بأشهر البنيه جانت جايه ويا اهلها على عمتي نجاة كاعدين بالصاله مال بيت جدي وسلوان. كاعد بالحديقه
من شاف لبسها متحرر وهي جميله تشبه عارضة الازياء متوقعها صيده سهله ...من شايفها. طالعه للسياره دجيب شغله ...
طالع وراها ...بالاول تحتاجين مساعده وبعدين ذابلها حجي ومتغزل بيها ...
نزلت ادور عليه طلعت للحديقه ما لكيته من وصلت يم باب. البيت سمعت وحده ...
انت اذا تقيم الناس على المظهر فهاي مشكلتك لان مو الكل يمتلكون القذاره الي بداخلك ... بدليل اني اتوقعتك
شخص خلوق لان الي بداخلي قيمك لكن طلعت عكس توقعي ... ومن حسن حظك انت زوج بتهم انقهر اصدمهم بيك وبأخلاقك ... )
من سمعت صوت سلوان جاوبها احترمي نفسج
صايره براسي شريفه
طلعت جريته البنيه دخلت فهمت هو متحارش بيها ومن صدته بالاول
كايللها من انت ميعجبج احد يتحارش بيج شكو مستعرضه جسمج وتدرين اكو عالم مثلي
يعجبهم الرخيص البنيه متخبله فمرزلته من دخلت البنيه وبقى يدردم عليها
اني هم رزلته كتله لان البنيه صغيره بس هي طويله. والي اعرفه
اخوها صغير والاب والام متباهين بجمال بتهم
ومحد ينصحها والام لبسها متحرر بس المره محترمه
ورزنه ... فأكيد بتها مثلها يعني الغلط منك انت طمعت بيها ... بعد شكو دترزلها لان صدتك بيومها
اتندم ...وجاوبني بالضحك هو الي يشوف هالخلقه
يبقى عنده عقل بس والله طلعت سباعيه )
ميثم : ما اخذ غير الي اختارها قلبي وأمن بيها
وليد: والله عاد براحتك ماطول انت تعرفها بت اوادم فرق العمر مو فد مشكله ماطول ممبين بينكم
سلوان : يويل امك لاول مره تختار شي صح
اني انصحك تاخذ وسن لان خوش بنيه واذا على لبسها انت غيره من تزوجها ...
ميثم : اني قافل على نوران لا وسن ولا غيرها اني من حجيتلكم حتى توكفون ويايه من. احجي ويا جدي
واريد اخطبها
وليد: وكفت من تنوي اني وياك وما اشوف عندك مشكله
راح افوت
سلوان : ددزلي هويده بدربك حتى نروح
عذراء: سولفتلكم على مصارحته ورجع طلب يتقدملي بس طلبت منه نخليها ورا التخرج
واول البارحه صدمني بغيرته عليه اكو ولد اسمه مصطفى
كلش حباب وقبل فتره صديقتي كلتلي
اشك مصطفى عينه عليج بس اني
لان يتعامل ويايه برسميات
ودائما يكلي انت اخت عزيزه ما صدكت
بس اول البارحه جان واكف ويانا تمار
بالكروب دنسولف ثاري منتبه على مصطفى
من دا اطلع للخط لكيت تمار ينتظرني
كلي
تمار: هذا مصطفى ما ارتاحله وما اريدج تحجين ويا
عذراء: ليش كلش حباب وترى اكثر من مره يكلي انت اخت عزيزه بين الحجي
تمار: لا مو اخته هذا درب حتى يحجي وياج لان يعرف
اذا تحسين بي متنطي مجال حتى يحجي وياج
عذراء: ههههه لا انت غلطان. الولد ما باله
تمار: لا مغلطان
ومركز وياه وويا نظراته بأسم الاخوه  الاخ يباوع على حلكج من تحجين ...
عذراء: زين يعني انت متضايق منه بس لازم تقدر طول ما هو يتعامل ويايه بأحترام
اني ما اكدر افشله وانهي زمالة كم سنه بسبب شكوك
وحتى لو الي بداخله غير عن كلامه
المفروض متضوج لان المهم عندك اني منو اختاريت
تمار: يمكن كلامج صح. بسبب غيرتي عليج ينتابني الشك لان مره شفتج ويا واحد وتخيلت
من نظراتج وابتسامتج وياه اكو بينكم شي بعدين سألت وافتهمت. الشاب ابن عمج وعايشين بنفس البيت ومثل اخوج
وراها عرفت منج خلال الحديث ويا الكروب. الولد خطب
يومها اتندمت لان اتسرعت. بالحكم وشكيت ومنها اتأكدت
مابينكم شي بعدها بفتره فاتحتج بالخطوبه
يمكن هالمره هم سبب الغيره ما حكمت صح على الولد
ماشي يا ست عذراء قنعتيني (ابتسمت )بس منا وجاي راح اثوله بالحجي ويايه حتى ما انطي مجال يحجي وياج
عذراء: ههه دكتور شكلك راح اتعبني يعني عندي ٣ نسخ منك بالبيت ... ما محتاجه واحد رابع ينقنق
تمار: حلو معناها من اصير نسيبهم اتراهم وياهم
عذراء: ابتسمت ان شاء الله تتراهم بالاخص ويا الي شفته واكف ويايه ... اسمه سنان هذا اعتبره توأمي
لان متشابهين بالصفات والافكار حتى زوجته مثلنا ان شاء الله يجي يوم واعرفك بيهم
تمار : ان شاء الله ...)
هويده : لج عذراء خطيه الولد صارله كم سنه لتكليلي
ماعندج مشاعر تجاهه وبعده قلبج ويا ...
عذراء: لا بديت احسه قريب مني فاهمني وارتاح من احجي وياه لان انسان عاقل ومحترم. احس
يحبني برومانسيه ورزانه حتى من يعبر بهدوء ما ادري دا احس بديت احبه ... ويشغل بالي بكلامهحتى مرات صايره من احجي ويا سنان يصير تمار كدامي اتخيله هو الي ديحجي ويايه من هلكد ما احسه
قريب لقلبي ...
مريم : واخير عذوره ...راح تنسين وتبدين من جديد هويده خزرتني شنو ؟
وليد: ها يا بنات هويده سلوان رايدج يكول يله
هويده : يله تصبحون على خير خلي اروح ....
وليد: يله احنه هم نروح ...
مريم : لزم ايدي ،وين نروح ؟
وليد: امشي ويانا لبيت اهلي وبعدين ارجعج
عذراء: دمشي وباتي اليوم ويايه
مريم : لا والله ما اكدر اخاف ميقبلون
وليد: ديله عيني مو جنتي تنامين بالغرفه الكبال غرفتي بنفس الطابق ونفس البيت هسه كلمن عزل. بمشتمل صار بيها ميقبلون ثانيا ميقبلون من جنت ابن عمج هسه مرتي امشي كدامي
عذراء: هههه الا تترزلين
مريم : اوگف احجي كدام جدي لو امي لو ابويه راح تاخذني يمكم حتى يعرفون اخاف اترزل بعدين
وليد: همستلها لاتخافين  ما ابيتج يمنا لان ادري بروحي مو خير ...
مريم : ههههه هو اني اصلا ما ابات يمكم حباب خلي نبقى هنا ويا اهلنا .. باجر تعال عليه من الصبح مراح اداوم اخذني يمكم .
وليد: وين مشتاقتلك ولودي ثانيا ترى انت مطلوبه شرط قديم ما ووفيتي بي .
مريم : اني شگايلتلك لا اضوجني بهذا الحجي .
وليد: يا حجي ولج انت مرتي غبيه انسي جنت بس ابن عمج هسه اني رجلج هسه اذا اخذها كدام ياسر بعد ميكدر يفك حلگه فاهمه اني ولي امرج ...
مريم : گول والله راح تسويها كدام جدي حتى والله ما اكعد بصفك ..
وليد: يمكن ياسر ضحك عليه من اخذتج يبطه بس لا راح اطلعين مثل عبله الي بمسلسل سنبل ..
مريم : ههههه ليش شبيها
وليد: لا مابيها بس شويه هبله ومسترجله .
مريم : عكدت حاجبي لعد شكو كتلت روحك واجيت من اخر الدنيا حتى تخطبني اذا مسترجله
وليد: اهبل غير كدامج كم يوم تغيرين فكرتي عنج قبل لا اسافر ...
مريم : گول والله ( ابتسم )
وليد: امشي يعلة قلبي خلي اشوف جدي ,يمه وين جدي
محاسن: يمكن فات للغرفه ليش ...
وليد: دا اتفق ويا على الزواج اني بعد ما اكدر اجي باجر اقدم طلب على نص السنه ادز على مريم اذا حصلت موافقه تسويلها عرس هنا ببغداد حسبتها اخلص شغلتي ورا عطلة نص السنة بكم يوم مباشره ارجع لبغداد
محاسن : ادري بيبي لعد شكو مستعجل انتظر ترجع وتزوجون هنا نسويلكم عرس ...
نجاة : اي صدك يعني شنو انسوي عرس بدون عريس
سعاد: زين ماما انت متكدر ترجع كم يوم تزوجون واخذها وياك .
وليد: لا ما عندي اجازه بعد هسه اني دا احجي بشي مبدأي بالاول خلي اتصل استفسر ومن اسافر اقدم طلب وراها اردلكم خبر بس اتفق ويا جدي أترتبون اموركم
محاسن: والله بيبي لو الله يهديك وتسمع الكلمه وتنتظر من ترجع اسويلكم احلى عرس مثل اعراس ولد عمك وبنفس الوقت حتى ترتب غرفتك وتفتحها على الغرفه الثانيه مثل ما اتفقنا ..
وليد: يمه سهليها اني والعروس متفقين
مريم :مرت الايام بسرعة واجى موعد سفره من جديدلكن هالمره الوداع يختلف
ولودي : من تخلصين انت وعذوره جنطتي تعالي راح اروح اتمدد اخاف اغفى كعديني
مريم : من طلع عذراء طلبت مني ...
عذراء: روحي خطيه ابقى يمه اني اكملها
مريم : فتحت باب الصاله دخلت لگيته يدخن كاعد على القنفه الي يم الشباك كعدت بصفه خلى ايده على كتفي ليش متنام وترتاح قبل متروح خلى راسه على راسي
وليد: يا علة قلبي هلمره راح اسافر مرتاح انتظرج تجيني لهناك
مريم : مرت الاشهر وسويت حفلة. الحنه بالبيت وعزمت بيها كل صديقاتي والنسوان كرايبنا واخر ساعه لبست بدلة عرس اخذت صور ويا اهلي لان اتفق ويايه من اوصل ناخذ صور العرس هناك سويه ،اليوم الي قبل سفري اتصلت عليه تقريبا ب١٢ الظهر الو
وليد: الو ها حياتي
مريم: ولودي راح اروح لبيت جدي ويا امي لسلم على بيبيتي وخالاتي ... ساعة ساعتين وارجع
وليد: من ترجعين خابريني
مريم : ان شاء الله من وصلنا لبيت بيبيتي خالاتي ديروحون للمنصورامي لعبت بعقلي گلتلي خلي نروح وياهم ... اخاف عندج نواقص حتى تاخذيها گتلها اخاف يصير عصبي ،گلتلي لج بابا علمي مو كلشي بكيفه ثانيا يزعل اليوم باجر انت رايحتله ينسى الزعل اتعلمي شلون تستغلين المواقف وتخلي يتعلم على اطباعج ويمشي على مرامج أني هم اخذت نصيحه امي وما رجعنا للبيت الا بالتسعه بليل تقريبا اول ما دخلنا من الباب
ميثم : بيبيتي سألت عليج كالت اول متجي خلي تجيني
مريم : رحت لبيبيتي تلكتني
محاسن : تعالي يمعزايه اليوم حرك التلفون عليج من الظهر لهسه هسه قبل نص ساعة هم اتصل فوتي خابري كلي اذا ما اتصلت لتجي ما اريدها
مريم : فتت بسرعة اتصلت بس جسمي كله يرجف ... انشالت السماعه بس كلت الو
وليد: اظاهر انت مشايفتني رجال من طالعه من ال١٢ لل٩ بليل معناهابالج اني طرطور دوصلي باجر وراح اشوفج الطرطور شراح يسوي
مريم : سد التلفون بوجهي