رواية حكايات من بيت جدي الفصل الثالث والثمانون 83 - بقلم مريم اماسي الليل

عذراء: ان شاء الله
اختنگت حسيت محتاجه أتنفس لبست العبايه وطلعت كعدت على الدرجه اسمع أصوات ضحك وناس من بيعد تتمشى
أكيد عرسان مثلنا سمعت صوت من الجانب الثاني
عروستنا واخذناها بعد شلّها العواذل
التفتت مبتسمه
سلوان : شنو الي مكعدك وحدك يا حلو لعد وين العريس

عذراء: بالحمام ...
دخلي ادخل الأكل واجي اكعد بصفج
عذراء: رجع كعد بصفي ذكرني بأيام قبل من كلنا نكعد على بآيات الدرج نلعب مدرسه ...
بيمن ذكرتك هالكعده
سلوان : ذكرتني بالمدرسه والعريس
هو المعلم
والله كان عايش اللقطه براسنا
ضحكت
التفتت عليها اي عذوره اني اعرفج من تطلعين بالحديقه وحدج تصفنين يعني مغثوثه وهسه طالعة كاعده وحدج وصفنتج جانت تقلق بروح عمي بيج شي ترى اني شفتج من اول ما طلعتي وخليني ايدج على خدج سنان ضوجج
( اتوقعت من احواله صار يومين انتبهت علي مشتت التفكير
حسيت بي مستصعب الموضوع اتوقعت مراح يكدر يتقربلها الْيَوْمَ ) ردت احجي وياها افهمها وضعه بصوره غير مباشره عن اثر تجربته السالفه
عذراء: تنهدت نسى الي ويا عذراء ولفظ اسم المرحومه بدل اسمي
سلوان : بقيت دايخ اسولف ويا نفسي يعني انتهت السالفه
لو بعدها ... خلي انتظر افهم منه
عذوره ترى مو الا من غلط بأسمج معنى نسى انت الي ويا
ترى هي شغله تعويد هو متعود على هالأسم والله يرحمها كانت زوجته فتصير مامقصوده ويجوز هسه لو تعاتبي ميفتهم شكو لان طلعت منه بدون وعي وادراك فميعرف شنو الي سوا من غلط وياج
جربي اگلبي وجهج عليه وأتأكدي كلامي صح لو غلط اذا شفتي مفتهم ويريد يلغمطها يعني حس على نفسه من نطق الاسم وإذا لا راح يبقى دايخ ميعرف شنو الي بدر منه وخلاج تنغثين
ومتأكد الاحتمال الثاني هو الأصح ... اخويه وأعرفه ترى قليل كلام ويمكن قليل يعبر عن مشاعره بس قلبه طيب يحتاجلج صبر حتى تفهمي وتكتشفين أمور تخليج تعرفين مكانتج بقلبه
لج بابا يحبج اسمعي مني بس انت شويه شعوطي قلبه خلي يطلع مشاعره هههههه لا تمشيلهيا اذبحي البزونه من هالليله
عذراء: ههههههههه شكرًا على النصيحه ابو ريمه ومنكم نستفيد
بس مو ينكسر قلبك عليه وتگلي على كيفج ويا اخويه
سلوان : لا مينكسر اني وياج عليه ههههههه بت عمي ترى صاح عذراء
عذراء: وگفت بسرعة دا التفت ادخل للغرفه
سلوان : لا هواي ذبحتي البزون ... بالهداوه
عذراء: هههههههههههه ( منظره وهو لام اصابعه ويأشرلي بالهداوة ومبتسم ضحكني تخيلته شلون الام من تحرض بنتها على النسيب )
سنان: ضحكوني وياكم ...صارلك هواي من اجيت
سلوان : لا بس كعدنا على الدرج و اتذكرنا المدرسه والمدرس مال بيت جدي ضحكنا
سنان: ابتسمت ... تعالوا ندخل جوه اتعشى ويانا
سلوان : لا والله هم يله اروح من دخلت عذراء سألته شصار وياك
سنان: الحمد لله الأمور تمام
سلوان: دير بالك عليها صير أريحي شويه ورومانسي عبر عن مشاعرك
عذوره ورده تستأهل تخليها بعينك وانتبه من تصيحها بأسمها
سنان: انخطف قلبي حسيت بيها من طلعت من الحمام بيها شي بس اتوقعت بعد الي صار بيناتنا ممكن تحس أخذت شي عزيز عدها محافظه عليه صار سنين اتوقعت رد فعل طبيعي خجلها وسكوتها
بس من سلوان گلي انتبه من تنطق اسمها قلقت لا أكون ذاكر اسم المرحومه بدون قصد كدامها
صابتني خيبه أمل على الشعور الي يداخلها لو صح هالامر
( ليش گلتلك غلطت وياها بالاسم احجي بداعتي )
سلوان : كأنه متعرف مني اي ذكرت اسم شهد بس اني فهمتها تصير بدون قصد
انت حاول تستفهم منها ليش مغثوثه أبد لا تبين تعرف السبب
حتى تعرف كلامي صحيح
سنان: بس صدك اني ما متقصد وبدون وعي طلع مني واعي
عذراء الي ويايه مو المرحومه بس زله لسان
سلوان : على العموم اتعلَّم تفصل ترى الشغله صعبه مو عينه تصيحلها بأسم مره ثانيه وهي تعرف بيها حساسه تكتم بداخلها من تنقهر
اتذكر هاي أمانة عمي عندك
سنان : همزين نبهتني حتى اشوف شلون راح أتصرف واصلح هالغلطه
من راح سلوان ... دخلت لگيتها متمدده ومعمضه عينها
عذورتي يله گومي نتعشا
عذراء: بالعافيه اكل انت اني مو جوعانه
سنان : اني هم اذا مو على الواهس ما اشتهي اكل
عذراء: التفتت عليه مو قبل شويه كلت تأخر سلوان جعت
سنان : اي بعدني جوعان بس عبالي اتعلَّم من هالليله مرتي تگابلني على الاكل تسويلي واهس
عذراء: گمت من مكاني ... يله تعال تعشى راح اكعد وياك
كعد بصفي بدا يأكلني جبرني. اكل وإني بالفعل شهيتي انسدت مجرد ما اريد افشله
سنان: شو دا احسج مامرتاحه اكو شي
عذراء: لا ماكو بس تعبانه ونعست
سنان : كملي اكل وروحي ارتاحي
عذراء: ادعيت النوم ... وإني احس بي يتحرك بالغرفه بوقت متأخر مكدر ينام اخر شي شفته صلى الفجر و تمدد على القنفه
صبحت الصبح وعيت على نفسي اني بحضنه وأيده محاوطتني
حاولت استذكر شوكت صار هالشي ...استذكرت أمور مامتأكده منها حقيقه لو حلم
(قبلات على خدي / وعيونج واعي انت ويايه ولهاللحظه مكدرت انام لان اريدج بحضني / خلص سنان اريد انام
انت متحبني )
التفتت عليه اريد استذكر اجابته حتى لو كان حلم شنو جاوب من كلت انت متحبني
اتذكرت كلام سلوان هو رجال ويعرف شنو الي يحرك مشاعر الرجال ويخلي ينطق ويعبر
ابتسمت وهمستله وهو نايم ....

أنصت يا صاحب القلب المغلق اني أعلنت عليك الحرب فتسلح وكن شديد البأس لكيدي
سأسقيك لوعة قلبي وصبري وسأغزوا حصونك المنيعه
اقسم بذاك الحب الذي نقش في قلبي منذ الصغر
سأقسوا وابتعد وستغضب وترتعد وسأبتسم لك
حين تصاب بلعنه ذالك الحب مُعلِنَةً انتصاري عليك
اماسي الليل حكايات من بيت جدي
سحبت نفسي وغيرت ملابسي سرحت شعري وخليت مكياج خفيف
وبديت احضر غراضنا حتى نسلم الغرفه ونرجع للبيت اهلي
بعد وفاة أبويه بقى فارغ لان أمي رجعت لغرفتها القديمه ببيت جدي ...وليد وجدي اقترحوا علينا نسكن بي اني وسنان
فقط غيرت اثاث غرفتي القديمه بأثاث غرفه العرس
من كملت ... رحت عليه
بأصابع أيدي على كتفه ... سنان يله اكعد هم يله نرجع
صحى غلق عينه وفتحها اكثر من مره
بمحاوله منه يتيقظ
سنان: صباح الخير ليش شكد الساعة
عذراء: صباح النور ب١٠.٣٥
سنان: وانت من شوكت صاحيه ومتهيئه
عذراء: صار ساعتين لو ساعة ونص ... حسيت بي انزعج بس يحاول ميبين كدامي
سنان : ليش مكعدتيني ...
عذراء: ما خطر على بالي تركتك ترتاح
نهظ من مكانه ... دخل للحمام بعدها بدقائق طلع غير ملابسه
سألني الكاميرا وين
جاوبته ضميتها بالجنطه
سنان: طلعيها وخلي نطلع ناخذ صور قبل منروح
عذراء: اخذنا لقطات حميميه ولقطات منفرده
لكن وحده من هاللقطات كانت بين ازهار لونها اصفر وإني فستاني كان اصفر طلب مني اوگف بنصها
قبل لا أخطي بداخلها قطف وحده منهن وخلاها بجانب شعري
نظراته وابتسامته وهو ياخذ اللقطه عرفت اكو شي عاجبه
بهالصوره حسيت بمشاعر لهفه وحب وهو بندلي ايده ...
حتى نرجع بالفعل رجعنا الطريق كله أيدينا بأيدين بعض
سلمنا الغرفه ... وطلعنا للبيت
طول الطريق كان كلامه بصيغه عتاب مبطن
سنان: عذوره انت اي ساعة تنامين بليل حتى ارتب وقتي وياج
الوحده ممله
عذراء: حسب مرات أسهر من أكون مرتاحه ومن انغث اروح انام
سنان: ها بس نومج ثگيل ... يعني الي يصحيج مراح يستفاد غير ب الاعترافات الي تحجيها
وانت بدون وعي مثل الي يفكه البنج يكت الي بقلبه
عذراء: التفتت عليه مصدومه .... ليش حاولت تكعدني
سنان: عرفت ما حاسه عليه من دتحجين ويايه
عذراء: ابتسمت يعني الأمور الي تذكرتها مو حلم حقيقيه
شنو حجيت وياك وإني نايمه الله عليك
سنان: ابتسمت اسرار بيني وبينها بس والله طيرت عقلي خلتني الليل كله سهران اتمعن بيها وهي نايمه
عذراء: خجلني .... بداخلي احجي يا ربي شنو حاجيه ومعترفه
بحيث هذا هيج مصبح طاير عقله ...
سنان: نوصل على كد نفوت نسلم على اهلنا ونروح للبيت
مو نتأخر يمهم
عذراء: ماشي
وصلنا لگيناهم ينتظرونا ... وجدي محضر الخروف
ذبحه بعتبة الباب جوا رجلينا بداخلي ذكرت بيبيتي وترحمتلها هاي عاداتها
تذبح الذبيحة وتاخذ منها جزء تسوي بي غدا تلم العائله كلها
بأي مناسبة والباقي توزعه بركه وصدقه
دخلنا للهول ... كعدنا شويه وصاحت علينا أمي ... كالت تعالوا تريگوا
دخلنا اني وسنان للمطبخ عادات فطور العرسان بيوم صباحيتهم يقدمولهم الكاهي والگيمر والعسل والدبس
سنان: عذوره ورا الاكل بشويه نترخص
عذراء: ما اعرف ليش الشيطان دخل عقلي وگلي عذبي
جاوبته ان شاء الله
بس بنيتي اتحجج وأطول يم بيت جدي ....
سنان : ترى اني البارحه عشيتج الْيَوْمَ انت تريگيني
عذراء: هههههه لا من بأجر نكون وحدنا هسه اخجل اخاف احد يمر
سنان : ابتسمت مو من ايدج يصيرلها طعم غير شكل
عذراء: أكلته .... دخلت مريم مبتسمه غمزتلي
سنان : افتهم خجلت وبطلت ... شنو تستحين من مريومه
گضت حياتها تضمضم لأبو خالد اللحم بعجين ...وتزقزق بي
ههههههههههه
مريم : خجلت ولا متصوره سنان هيج منتبه علينا لان الي يعرفه يتخيله فاصل عن العالم الي حوله الا بالامور المهم
من كمل ريوك ... طلع من المطبخ
ولج عذوره شمسويه للولد شو راجع غير واحد
عذراء: والله ما اعرف صبح هالشكل
بس هاي سالفه اللحم بعجين ما ادري بيها هههه طلع صايدكم
مريم : والله طلع سنان ينطبق عليه تحت السواهي دواهي
عذراء: اظاهر راح نكتشف بي أمور جديده
مريم : بس لا يطلع مثل سلوان بس الفرق ذاك مفضوح وهذا خنوسي
عذراء: هههه اسكتي والله البارحه سلوان حركني عليه وناويه اطبق نصيحته الْيَوْمَ
بداعتي جلبوا بيه انت وهويده وينها خابريها خلي تجي ...
من يگلي يله طلعوا حجه أبقى وياكم
مريم : شكد لئيمة خطيه بعده عريس
عذراء: نفذي الي كتلج عليه ترى أشحن اخويه عليج ههههه واشتغل وياج شغل الحموات
مريم : شكو شو مصبحين انت ويا غير اوادم ههههه
عذراء: مر الوقت حسيت بي يدزلي نظرات ينبهني يله نروح للبيت
وإني مغلسه ملتهيه اسولف ويا البنات وامي وعماتي ... ورها دخلت وياهم للمطبخ نحضر الغدا
بعدها بدقائق إجى ورايه ....
سنان: يله عذوره نروح
هويده : وين تروحون الغدا بعدله ساعة ساعتين ويصير
أبقوا ورا الغدا روحوا
سنان: والله تعبان اريد أغفى وعلى الغدا أجي
هويده : لعد روح ارتاح وخليها شوفها مصحصحه
تريدين تنامين
عذراء: لا والله منعسانه ... روح انت اخذ راحتك من يصير الغدا أجي اكعدك شفته تنهد ما عجبه كلامي
سنان: دمشي ويايه طلعيلي غراضي وارجعي
هويده : الله عليك عوفها يمنا ... مشتاقتلها
سنان: يله براحتكم
مريم : لا عذراء محلو هيج ترى هو حساس وهالامور مو بصالحج تتبعيها ويا من البدايه تخلي فتور بالعلاقة بينكم
صدگي مره ثانيه بعد ما يجي عليج ويگلج يله راح يروح بوجهه
اخاف احجي شي وتزعلين تذكرين من جان يجي على شهد رأسا تروح ويا حتى لو نجلب بيها متبقى معليج بهويده ترى
هي خربت سلوان عليها
هويده : ولج معليج بهاي ... نصائحها مابيها خير
عذراء: لا خلي اروح حسيته فشل ... ومراد يحرجني
طلعت وحت للبيت اول ما دخلت .... لگيته متمدد على القنفه بالهول بنفس ملابسه
من حس عليه التفت
سنان : مره ثانيه تفهميني من نظره عيني من گتلج شويه ونرجع خلص تمشين بالاتفاق
ومن اگول يله اعرفي اريدج تكونين ويايه بكل مكان تعلمي على طبعي
وما احب تتعلمين وتتبعين ويايه اُسلوب احد ثاني ....
اريدج انت بأطباعج بتصرفاتج الي اعرفها وحافظها لانخليني
اتوه بالتعامل وياج ... انت تعرفين طبعي اني احب كلشي يمشي حسب الأصول احب الي بيناتنا ينحصر بين هالحيطان لا احد يعرف بحياتنا ولا ننطي مجال لأي تدخلات
تعرفين بيه احب الصراحه عاجبج تبقين ويا البنات تجين تگليلي سنان اريد أبقى ورا الغدا نرجع .... مراح اكلج لا راح أبقى وياج انتظر نرجع سويه
التصرف الي صار أبد مو مقبول ... ولا متعود عليه
عذراء: انقهرت من كلامه لان صحيح وانقهرت من نفسي لان خليت نفسي بهيج موقف وما كدرت أغلط نفسي كدامه
احساسي بالقهر من كلمه ليلة أمس هيجت أعصابي
جاوبته
اعرف انت تريد حياتي وياك مثل حياتك ويا المرحومه تريد تعيش حياتك بالسابق بكل تفاصيلها كأنه هي الي موجوده وياك مو اني ...ولازم عذراء تبقى تتحمل لحد ما تضبط اسمها ومتغلط بي
وتحس هي غير انسانه عن المرحومه ...
بس خلي بعلمك اني صار متحمله سنين وانت لليوم محسيت بيه .... ولا ناويه اطلب منك تنساها لان اعرف من نحب شخص متكدر نطلعة من گلبنا مهما كانت الظروف بدليل جان اني كدرت اطلعك من قلبي كل هالسنين من قبل حتى ما تعرفها وترتبط بيها ....بحياتي ما دخل قلبي شعور الغيره بس الظاهر انت راح تغير بيها هوائه أمور اني كارهه الها
سنان: اتنهدت عاجز ... معرفت اجاوبها وإني اشوف دموعها وكلامها بحرقه قلب ...
حسيت نفسي قسيت عليها طلعت بعصبية مكان المفروض اتبع
هالاسلوب وياها كان المفروض من عرفت من سلوان غلطت بأسمها احاول ابعد تفكيرها عن ان تربط تصرفاتي وياها
الها علاقه بحياتي السابقه
ما طلع ويايه بلحظتها اي كلمه .... الا من طلعت راحت تغسل على المغسله
رحت وراها
والله وبروح بيبيتي كل الي حجيتي ما اله صحه
ولا اكو اي ربط مثل ما متصوره هاي تخيلات براسج
لمجرد غلطت بالاسم وهالشي خارج عن ارادتي مجاي من تفكير بهالشخص لو احساسي بوجوده
واعي ومركز وعايش وياج بكل التفاصيل حتى بالمشاعر وإني عارف انت عذراء بت عمي اقرب انسانه الي من قبل ما نرتبط
كيف ورا ما ارتبطنا تتخيلين اشوفج بصوره ثانيه
ثانيا لو ما ألج مكان بقلبي مجان كدرت أخطئ هالخطوه وأول ما أفكر ارتبط وأكمل حياتي ويا انسانه الا اذا كانت الها مشاعر بداخلي
الله يرضى عليج لا تأذين نفسج بأوهام ومقارنات ما الها وجود
من جانبي سهليها عليه لاتخليني تايه اخاف من كل تصرف وكل حركه لا تفهميها غلط
وبالفعل هالشي صار بدون قصد مني انت اتخذتي موقف وبنيتي عليه أفكار
عذراء: علگت المنشفه ودخلت للغرفه دموعي ما كدرت اوگفها
قفلت الباب
دك اكثر من مره طلب مني افتحله
جاوبته سنان الله يخليك عوفني وحدي
مر الوقت ... لحد ما هدأت طلعت اتصل على أمي لگيته غافي على القنفه
اتصلت بلغتها سنان نايم وتعبانين منكدر نتغدا وياهم
سعاد: يله براحتكم راح اخلي من تكعدون عود لو اني اجيبه لو ادزه بيد مريومه
عذراء: ويجوز اني امر اخذه ....
يله حبيبتي نمرلكم غير وكت ....