رواية حكايات من بيت جدي الفصل الرابع والثمانون 84 - بقلم مريم اماسي الليل

٦٣
رجعت للغرفه جبت شرشف رحت غطيته بي
على كد الحب الي احس بي بمجرد ما المحه على كد ما ناويه امتلكه بالغصب راح تجبرني اتبع وياك كل الاساليب حتى تحس بيه
رجعت لغرفتي وقفلت الباب عليه ... امتددت على فراشي
مشغولة بالتفكير شنو الخطوه الي لازم اخطيها امشي الأمور
اعتيادي لو اتخذ موقف ....أفكار سلبت راحتي الى ان غلب عليه النوم
ما صحاني الا صوت سنان ودكاته على الباب
سنان: عذوره افتحي الباب .... أمي على جيه
عذراء: احاول اگوم بس احس جسمي نحلان ... رفعت نفسي عن الفراش بتثاقل ... متوجهه للباب افتحه بثانيه توقفت
صحت دقيقه
رجعت فتحت الكنتور بحركه صبيانية انتقيت شي يظهر مفاتني بمحاوله للانتقام
غيرت ملابسي ورتبت نفسي بهيئه عروس ... فتحتله الباب
والتفتت منطيته ظهري متوجهه للمشط بحجه اسرح شعري
سنان: أمي اتصلت راح تمر ...
عذراء:هلا بيها فتح الكنتور ... وطلع دشداشه بيضه عادات اول يوم بعد العرس العريس يلبس دشداشه بيضه والعروس كلابيه
سمع صوت الباب طلع بسرعة يفتحه
وإني لبست كلابيتي فوك ملابسي وطلعت .... لگيتها جايبه صينية اكل ...
بوستها واخذتها من أيدها وديتها للمطبخ
أمال: والله من قبل كم ساعة ردت امر بس سعاد گالت نايمين
عاد هسه رحت عليه جبتلكم الاكل وأجبت اشوف محتاجين شي
عذراء: لا عمه سلامتج ما قصرتي الثلاجه مليانه
أمال: لا والله هاي مو اني سلوان تسوگلكم كلت اخاف ناسي شي حتى أوصي يجيبه
سنان: يوم اذا نحتاج شي انتو يمنا
عذراء: لمحت بأيدها كيس ورق متوسط الحجم
طلعته ...
أمال: عمه هاي هدية عمج المفروض من دخلتوا البسجياها بس نسيتها والتهيت ويا أمج بالمطبخ
عذراء: طلعت من العلبه سوارات برم لبستنياها
بوستني
عاشت ايدكم كلش حلوه
بليل امر اشوف عمي واتشكره
أمال: حبيبتي والله انت تستاهلين الاحسن يله اني اترخص
عذراء: بعد وكت والله فرحانين بجيتج
أمال: امر غير وكت عمج بالبيت وحده
سنان: بليل احنه نمرلكم ان شاء الله
أمال : يله لعد ننتظركم على العشا
عذراء: ان شاء الله
اول ما طلع سنان وراها .... رجعت للغرفه نزعت الكلابيه لهيت نفسي ارتب بالمكياج
دك الباب
من شاف ما فتحته ... رجع للهول سمعت صوت التلفزيون
عرفت كالعاده تمدد يتفرج لو يلزم كتاب
بعدها سمعته يحجي بالتلفون ... صوت ضحكاته ... طول بالمكالمة صار عندي فضول اعرف ويا منو
طلعت بحجه ادور بمكتبه أبويه على كتاب ....
تجاهلت نظراته من دخلت ... بقيت الهي نفسي بالكتب الى ان سمعته گال
سنان: يابه والله بأجر أنمر نتريگ وياكم ونبقى لليل ...
سديت السماعه بعد ما نهيت الاتصال
على شنو ددورين
عذراء: على كتاب ...
سنان: ادري كتاب قابل المكتبه بيها صينية غدا دتحضريها حتى تغدين هالرجال
عذراء: ابتسمت بدا يداهر
التفتت دا انتظرك تكمل وأسألك تأكل
سنان: بذمتج بضميرج جايه تسأليني .... لو قلبج محمل مني حتى ميهلج تكعدين ويايه
عذراء: لو قلبي يعرف يشيل عليك كان شال من زمان
سنان : تنهدت بداعتي لا نبديها زعل ... ترى والله ضايگ خلگي انت عبالج اني هينه عليه انت ويايه بنفس المكان ويعيده عني وفوگاها زعلانه
وين نتغدا بالمطبخ لو هنا تجيبن الصينيه
عذراء: بكيفك
سنان : لا بكيفج انت ام البيت شلون ناويه ترتبين وضعنا
عذراء: لعد بالمطبخ
كعد گبالي اكل وهو ساكت كمل گلي انتظرج بالهول نشرب الچاي سويه
طول فتره كعدتي يمه رجع متحفظ ويايه كأنه يريد ينسيني الي صار الصبح ... ويشغلني بحديث بعيد عن حياتنا حديث
مطرقيله بالماضي كأصدقاء ... وامور تخص الجامعه وشغلنا
الى ان سألته شوكت نروح لبيت عمي
سنان : من أمي تتصل وصيتها من تكمل العشا تنطينا خبر
حتى ما نتأخر يمهم نرجع بسرعة
عذراء: بالفعل زرنا بيت عمي على كد تعشينا گال احنه نترخص بطلعتنا منهم دخل سلوان
سلوان : ها رايحين ... فد شويه امرلكم ضحكت من شفت تعبير وجهه
سنان: همستله يويل شو راجع خبيث تغار
سلوان : اطمئن على بت عمي ويا النسيب واشرب الجاي ويا اخويه الچبير لا صدك عندي سالفه وياك
سنان : خليها باجر
عذراء: بمجرد ما رجعنا للبيت ... دقايق وندگت الباب
سنان ابتسم
طبعا جاي يداهرني لا عنده سالفه ولا شي اخويه وأعرفه
عذراء: ابتسمت هو انت متقدر الناس الي يحبوك رفع حاجبه
سنان : منو يگول بالعكس بالأخص من هم نايمين ويحجون الي بقلبهم
ادخلي للغرفه راح يكسر الباب بعدين نتفاهم
عذراء: طلعت شفتهم واخد كاعد قريب على الثاني يتهامسون ويضحكون
من لمحني سلوان
سلوان : اريد اشرب جاي وميقبل يضيفني ترضيها
عذراء: لا طبعا دخلت حضرت الشاي وقدمته
بقيت كاعده وياهم اضحك على سوالف المداهر مال سلوان
الى ان فرك وجهه مبتسم ... كال
سلوان : كافي تعبتني خلي اروح لبيتي .... أديت الواجب وياك وزياده
سنان : اي والله ما قصرت ابو خالد ينتظرك هسه بالحديقه
سلوان : لا يابه محد ينتظرني كلمن كاعد بعشه ويا عصفورته
سنان: عصفورتك فرق خطوتين روحلها
سلوان : لو تنطبگ سما على الكاع ما أسويها خليها معششه يم نجاة
يله اني اترخص ....
عذراء: مر الوقت وسنان من اول ما طلع ويا سلوان يوصله لباب البيت ويقفل ورا ما رجع
مديت راسي من شباك المطبخ شفتهم ملتمين برا اصواتهم بارزه
رحت للغرفه
تمددت اتذكرت الراديو مالتي ... رحت طلعته
وجبته خليته بصفي على الفراش برنامج ماجد سليم
بقيت اسمعه واسمع الاغاني على صوت عبد الحليم استرخيت ودخلت بنوم
سنان: دخلت للبيت متأخر ماكو لعذراء اثر ... رحت افتح الغرفه لگيتها قافله الباب دكيته اكثر من مره عرفت نايمه وصوت الراديو واضح
زفرت بقوه .... استغفر الله
رحت غسلت أيدي ورجعت تمددت على القنفه ... بقيت احجي ويا نفسي
شنو الي قلب حالها مره ثانيه حيرتني تصرفاتها 
دا احسها مو عذراء الي اعرفها من سنين شلون راح أتصرف وياها

....