رواية حكايتي مع النصيب الفصل العاشر 10 - بقلم نور الشمس

غلقت الجهاز ونمت حيل مرتاح واحس بروده بگلبي
ثاني يوم گعدتني امي

..بهاء يمه اگعد كافي نوم الساعه بالعشره

..يمه خليني غير كتلج ماعندي شغل مااطلع اليوم

..اي يمه ماتطلع جاتظل بفراشك مو عوايدك اگع
ترييك اغسل اريد اشوفك افهم منك شصاير

..رفعت الغطه ..صباح الخير يمه

..صباح العافيه ..شبيك يمه شبي وجهك ياهوو مسوي بيك هيج جا شوو همه المشتكين

..ياهوو مشتكي

..ماادري گوم اجوك عمك ابو حيدر واخوك علاء متانينك بالصاله

..ياالله اصبحنا واصبح الملك لله ..شني متحلمين بيه من الصبح جايين

..گوم يمه گوم فهمنه جاانت دوم كلشي براسك تسوي

..اليسمعچ يگول مسوي بلاوي ..اغسل واجي وراچ روحي يمهم  على مااجي روحي طالعه ومو مال محاضرات انه

..جا انت مالك چبير ماتريد احد يحاسبك

..شيحاسب يمه فدوه لاتغثيني من الصبح بروح غالييچ خليني مرتاح

..اخاف عليك يمه جا الله يرضا من وره وحده معصعصه هيج يصير بوجهك

..هههههه شبي وجهي حجيه هاي خفايف جا لو شايفه وجه اخوو المعصعصه على گولتچ  

..فلك طرني تريد تبلينه انت تاليتنه طلاييب وفصول والله شنهي بهاء حبله وحده ملحه واخوها ماانطاها وظل حاط نكره من نكر اخوها

..شو خل امشي أنتي تاهمتني تاهمتني وهاي الملحه والمعصعصه زرفت گلبي يمه وشلت احوالي بس ماليه بيها بعد ارتاحي مااريدها گلبي يريدها بس روحي عزيزه واليتغله علينه مانغليي.. روحي گعدي يم عزيزج ولهيه بين مااجي لايظل يصيح ويخبص روحه

رحت اغسل وبالي يمها اووف ولاتروح من بالي صفنتها خرب بذاك الحظ شجابها عليه
كله من وره حويدر هوه الخلاني انتبه الها
خل يرجع اطلع حرگة گلبي بي
اشتاقيتله والله ولاجنهن ايام الراح بيهن چنهن سنين
مامتفارگين حيدر ازغر مني  ازغر مني بخمس اسنين توه اثنين وعشرين عمره
رغم هوه زغير بالنسبه الي يعني مومال اصادقه بشبابي وهوه بعده طفل يعتبر بس عمي رادني اصادقه ماعنده اخوان وراده وياي دوم حته محد يستغله وسبحان الله صار عندي اغلى من اخواني حته اسراري عنده وكل اسراره عندي
اعتبره اخوو وصديق ودنيا بحالها
گلت اخلص من سالفة علاء وعمي واخابره

طلعت الهم سلمت عليهم حاجاني عمي

..بويه بهاء شنهي سالفتك كبرت بويه طيش الشباب تعداك خله يولي

..بويه انت تشوفني طايش جنت بشبابي لو بس اليعيل ارده

..لا مو طايش انت بس ماتتحمل ايدك والطگ

..اليتعده شتريد اسويله ياعمي ابوسه من گصته

..انت محد متعدي عليك همه يگولون خلصونه من شره

..همه ياهم

حاجاني علاء

..بهاء اني مو گتلك عوفها ماتفيدك

..علاء أنت تسولف بالقديم ياهيه الاعوفها عفتها وولت بعد شهالطلابه 

علاء..اذا عفتها ليش تعاركتوو

..انسان قليل ادب وأدبته هذا هوو

علاء..أدب نفسك بالأول

..لا اله الا الله درت على عمي عمي الخاطر جيتك وتعرف غلاك عندي راح افهمك الك مو الغيرك وانت تحكم يستاهل لو لا

..احجي عمي خل نفهم

..انه والشباب صفاء وعلي وحازم چنه نتمشه ولاگونه هوه وأياد اول ماشافني شمر جگارته بوجهي ومن رفعت راسي اباوعله نفخ دخانه وضحك باستهزاء هوه رايد عركه وانه انطيته الي يريده وبردت گلبي اذا عدكم انه غلطان انه اگول اول مره اسوي الصح وبعد انتوو بكيفكم الي يقلل احترامي يستاهل هذا العندي

..بس هذا الصار عمي

..كفيلك الله هذا الصار اسأل الولد اذا مو مصدگ ..صحت صفاء وينك

عمي گال هذا هوو عمي مو اياد شاكي الأخوك ومسولفله غير شي وهذا يگل الأخوك اهله على يوم يجوكم ويبلوكم وتصير مشاكل

..خل يولي هوه حرامات مالحته هواي جابردت گلبي بي درت على علاء
وانت تصدگ اياد وماتصدگ اخوك

..ادري بيك عصبي شتريد يعني وينه صفاء خل يفهمني السالفه

..تنهدت والله ياعلاء ماادري شگلك هسه اصيحلك صفاء صحت صفاء
اجه حسين گال صفاء طالع گلت العلاء سمعت طالع عود تانيه من يرجع يسولفلك

..زعلت شني

..ليش ازعل ماازعل انه تعرفني

..بس چنه ماعاجبك الحچي

..اي طبعا مايعجبني جاي احچيلك الصح وانت مامصدگ جاي افهمك هيج صار وهيج وانت مصر انه الغلطان هسه من الأخير افرض انه غلطان شتريد تسويلي

..تروح تعتذر منهم

..والخلقك لو تمطر ذهب مااروح واعتذر

..تجبرني اروح انه الهم اعتذر نيابه عنك ترضاها انه اخوك الچبير اعتذر نيابه عنك

..وروح ابوك وتراب گبره دروح وسويها الا هالمره اهد عليه بنص بيته والله وابليكم بدم هالمره طلعوهم من راسي الله يخليكم ابتليت خطبت منهم خوما ابتليت

عمي صاح على علاء اصبر الحچي مو هيج عمي
اذا همه المعتدين احنه نحگهم ومايحگونه ويستاهلون الصار الهم
علاء گله مو اني هم ابتليت هم اخاف على نفسي على ابني جاي يگلي يگولون انت حصتنه

كتله هذا اياد يعرفك مالك بيها وجاي يستغلك
بس اطلع منها ولو اجاك اطرده وگله روح البهاء وهمه انه اعرف شلون احلها وياهم

..هم راح تتعارك انت ماتمل

..مااتعارك والله انه احلها معليك

هدأ شويه گلي والله خايف عليك اني واخاف على اخواني على نفسي وابني ناس ماتخاف الله وگامت تچلب بالطلابه تريدلها حجه وامك تعبت مو مال تتعب اكثر فكر زين واتصرف اني اخوك مو عدووك
يجوز افكارنه تختلف يجوز تشوفني بغير صوره بس الله يشهد انتو اغلى من روحي واذا زعلك عليه وثكل وجهك جي ماامر واگعد وياكم
تره الدنيا تلاهي وانه هم بيت عندي ومسئوليتي جبيره ومكتفي بيكم اخوان ينشد بيكم الظهر مأمن على امي ونورس وياكم لاعبالك ماحاس بيكم انه انتو مبتعدين عني

من حچه هيچ انعصر گلبي يمكن صدگ احنه هيج نشوفه بس عبالنه مايحس بشي
گتله
..مو هيچ انت اخونه الچبير وغصبا عنه نحترمك بس انت المبتعد علاء انت دائما تصدگ الغريب وتلومنه على شي مامسوينه هواي مواقف وانت نذكرهن مايحتاج اعيدهن واذا على جيتك علينه تره مانريد منك شي تتواصل وبس الله عليك صار شگد ماجايب ابنك وانت تدري بشوفته ارواحنه ترد وتدري كلش زين مانجيكم انت وامه اثنينكم دوام وزحمه بوكت راحتكم نجي
هسه مو وكت عتاب ولاوكت تبرير عوفنه من كلشي نرجع الموضوعنه بعدك تريدني اعتذر وهمه المعتدين

..لا اذا معتدين همه  يولون انه هم ماارضاها الك

..هذا هوو وسالفة اياد وتهديده على السانهم انه احلها

..بس بدون عرك

..انت تشوفني عقلي بيدي بس اعارك اليستاهل انطيها اله بس انه افكر وداعتك ضحك هوه وعمي انحلت السالفه وحچي علاء هم فرحني اول مره يعترف هوه گاطع ومقصر ويعتذر صح هوه گالها بطريقة عتب بس المهم هوه حاس بهالشي

غيرت الموضوع وحاجيت عمي ابو حيدر

..عمي انت وعمتي شلونكم

..بخير عمي الله يسلمك والله عمتك مالها خلگ وضايجه وتلح على حيدر يبطل وهوه مايرضا

..حته انه عمي گتله بس هوه هم مل غير دفع كوم فلوس على تعيينه شلون يبطل انه البارحه حاچيته هذا الاسبوع اجازته وفهمته يجهز العرسه هالمره

..سولفلي ع السويته وياه وشنطيته والله ياعمي محتار شلون اجازيك ولو انت اخوو وهوه تربات ايدك يوگفلك بعرسك ان شاءالله

..الله يسلمك عمي مابينه مجازاه انت ابوي وهوه اخوي اهم شي نفرح بي ويتزوج بس انتو بلغتو عمي ابو اكرم گلتوله على بنته

..اليوم اتأكد من حيدر واروحله ان شاءالله

..اله كريم ان شاءالله ..باوعت العلاء  جان مستغرب شنو الموضوع مايعرف وانه اصلا ماذاكر راح انطي فلوس العرس بس الضياء وصفاء يدرون بيه

عطلتهم ع الغده ماقبلوو عمي گال عمتك وحدها مو مال اعوفها وعلاء گال الجمعه امرلكم واجيب حسين الك حته ترضا گالها بضحكه
گتله ياريت والله عاد حسين يشفع للعشيره كلها

طلعوو همه وامي بدت تسأل وعلما فهمتها طلعت روحي وبعدهي مصره انو انه متعارك علمود الملحه گولتها

فوك ماانه ماناسي الصار يوميه يذكروني وكل مااذكرها احس بجسمي نتله اكوو شي يفرحني وهوتي اشياء تضوحني بذكرها افرح واضوج بنفس الوكت مااعرف ليش هذا احساسي
اريد انساها اريد شي ينسيني عيونها وصوتها

خابرت حيدر وحچيتله الصار
گلي
.. هذا هوو اصبر بس حاجي اخوو امجد مبيين عاقل احجيله گله نصيب ماالي وعرفت خل اخوك يجوز مني

..انه هم هيج مفكر مفكر اروح الأبوو بس همزين انت ذكرتني بأخوو مبيين هوه اعقلهم

..عمي منتظر منك خبر اكيد حته يحاجي عمي ابو اكرم علمود يتفقون ع العرس

..ها بعده مامخابرني وانه ماادري غير لازم نجهز يجوز مو هاي الأجازه الوراها

..خايب انت شبيك ليش تاجل بعرسك اتزوج وارتاح ورييح البنيه مو تكول مضلومه

..ادري غير انلحگ انه مارايد امنيتي هاي

..تلحگ من هسه اتفق وياها تشتري هيه وخل امي ولمياء يساعدنها وانه اودي الفلوس العمي يوديهن الهم والغرفه شرايك اصورلك وانت وهيه اختاروو من الصور انه اصور الكم

..يخوي انت ليش محتار بيه

..جابيمن احتار غير ادري بيك رايد زواج من صدك ومرتك موجوده بعد شمتاني

..احاچيها اشوي هذا هوو هههههه يعني هالمره انزل عريس ولك اف احلم وشيگضيلي هاي الأيام

..ضحكت مبيين من ضحكتك دگت براسك ..ان شاءالله نفرح بيك
يايوم انت تنزل

..مو اكيد اكثر شي ع الجمعه ان شاءالله

..ان شاءالله عرسك نسوي الأثنين

..ان شاءالله دروح خل احاجي ابوي

..ههههه الله وياك شو جنها طرده هاي

العصر رحت للمعارض ولخذت صور لهواي غرف وتراسلنه ع الماسنجر الليل كله ظلينه نحچي كل شويه يتأخر كتله انه حاير بيك وبالك مو يمي لازم تخابر ولك
ضحك گال لا بس جاي نتراسل واوديلها الصور اشوف شيعجبها

..يلله براحتكم اروح انام ومن تختارون ودوها حته اجيبها باجر

سديت التليفون حاولت انام ماگدرت ماادري ليش سيطر عليه خوف خاف يصير شي
كل مااطرد الفكره من بالي يتخيلي حيدر يصيرله شي تعوذت من الشيطان وقريت ايات ونمت
من صبح الصبح لكيته مراسلني وموديلي الغرفه المختاريها فرحت من شفت منه رد گلت الله خييب احساسي اول مره مااصدگ احساسي ومااريد اصدكه
رحت جبت الغرفه وعمتي تلكتها بالهلاهل ولكيت امي هم يمها خابرته وهنه يهلهلن ويگفلن فرح هواي وحته جماعته اليمه فرحوو
عمي چان گاعد بالباب والجيران بدت تباركله هيج طبعنه جار يشارك جار بالفرح بالمناسبات تحسهم بيت واحد چنت حيل فرحان وحته احساسي الجان مسيطر عليه اختفه
طلعت بالباب لمحت اكو احد يباوع من وره الباب من باب بيت عمي ابو اكرم اجت ابالي ياسمين اكيد هيه جاي تراقب وتريد تشوف غرفتها تذكرت مصرفها نسيته وانه وعدت حيدر
رجعت للبيت وجبت نورس ورحت عليهم سلمت على عمي ومرته والولد اكرم اكبر واحد من ولده عمره ١٧سنه تفاجأوو بجيتي گتلهم نورس رايده تشوف ياسمين وانه وصلتها
فهمت نورس تنكيها الها من مصرفها جني ماادري
من طلعنه هيه طلعت وي نورس شفت اهلها محد موجود عمي راد يطلع وياي وماخليته سلمت عليها وگتلها انه هم اخوج واخو حيدر السويتي زعلني بس على راحتج ع العموم شتحتاجين انه موجود عن طريق نورس يوصلني
تشكرت مني ورجعت

مرت شكم يوم واحنه نجهز

ليلة الجمعه خابرته بالليل گتله

..حيدر مو تستعجل وتطلع وحدك انت وشكم واحد تاني الوجبه كلها تنزل حته تنزلون بحماية رتل مو هيج وحدكم

..وانت مصدگ اتانيهم يتعطلون يمعوود وانه مااعول اوصل

..لا حيدر بداعتي انتظر وجبتك تنزل يلله تنزل

..ميخالف عود لايظل بالك

..سديت الخط
وطلعت كعدت يم اهلي انطيت النورس فلوس تشتري ملابس  للعرس جانت لمياء كاعده طلعت فلوس واشرتلها انطيهم اللمياء گوه اخذتهن واتشكرت هواي
من طلعن البنات انه مدنگ ادخن وافكر بجية حيدر  حسيت امي باستني براسي ضحكت متفاجأ

..هالله هالله هاي البوسه الي حيييل من شوكت ماحاس هيج احساس

..ليش ولك توني بايستك

..لا بس مو هيج شكوو يمه شعجب بصوتها الحنين الي يبجي الصخر گالت

..ريت الحنين يطول عمره

..تنهظت يمه فدوه اروحلج لاتكملين وعلي ابجي مخنوگ وگوه مصبر روحي

..اسم الله عليك من الخنگه يمه الصبح انطيتني مصرف ومساع انطيت الاختك من صحتها شفت مرت اخوك گلت انطيها مصرفي اخوك ماعنده ومااريدها تضوح وتحس بنقص بس مااتصورتك تفكر بيها

..صدك جذب يمه حالها حال نورس 

التموو الولد يضحكون ويشاقون وبالي مو يمهم رجعت خابرته صار بيه هووس

كلي ولك شرايد ادري ماخذك انه ماخذ ياسمين شبيكم اريد اكلي لگمه

ضحكت اكل يخوي الف عافيه بس موصوجك صوج اليشتاقلك
ختمتها وياه بضحكه وعدت عليه وصيتي اله مايطلع الا بنزول وجبه كامله

گعدت الصبح  خابرته

..ها ولك بشر وين انت

..جايكم طلعنه

..توصل بالسلامه خو مو وحدك

..لا وي الربع

..الله عليك

..خايب شبيك شو خل اشوف هذا ياهوو مخابرني بهاء لو الوالده

..ضحكت گلبي گلب والده شسوي تحملني

..متحملك شعندي غيرك غير انت الهوه

..يابعد كلهن متانيك انه

مرت الساعات وصار العصر المفروض هسه وصل
خابرت الجهاز مغلق
فوك الساعه وهوه مغلق لاأگدر احچي ولاأكدر اكعد خاف اخبصهم ويجي واطلع انه مفاول بشي مو زين ساعات وانه ماكاعد على وكفه وحده اباب الشارع
بيت عمي يصيرون بساحه بنهاية شارعنه اكو دربونه من الدربونه ندخل للساحه همه بيها
كل شويه اروح اوصل الدربونه من بداية الساحه اباوعلهم وما اوصل شكلهم لو وصلت اكلهم اسال عليه خايف ولازم هسه هوه واصل

كلت خل يجب الا ارزله ظل دوم بهاي سوالف يحجي وي مرته للصبح ويخلي جهازه بدون شحن

رجعت للبيت لاكاني صفاء وجهه مخطوف بعده بالباب ماداخل

كال
..بهاء هم خابرت حيدر

..ليش

..خابرته لو لا

..من الصبح وجهازه هسه مغلق شفته يتلعثم وكوه يطلع السالفه گال ابن ابو كاظم هسه نزل وگال سياره كامله من وجبتنه طلعت الصبح كتلوهم بالطريق وماعرفنه منو منهم لأن ناقليهم للمسشفى

..يعني شني.. احس الدنيا افترت بيه اباوع دايؤ مادايري مااشوف شي ماكمت اركز

..شني يعني يعني ماكو غيرها مادام مااجه هسه هوه وياهم

..انچب ولك انچب لاتكمل اشش لايسمعك عمك

..ولك وتالي

..ماكوو تالي هسه يجي

..لحظات مرت هوه يباوعلي وانه اباوعله استوعبت الكاله وخوفي والقلق ركضت ومااعرف وين اروح اريد اوصل بيت ابو كاظم اتأكد لو اروح العمي لو شسوي احتاريت صاح صفاء تانيني اوكف
وگفت بس احس النفس گوه يدخل بصدري ماتعبت انه ماركضت هواي شبيه هيج اتنفس تونه نريد نمشي وخابر ضياء

..بهاء تعال

..شكوو ضياء احچي

..تعال وانت تعرف

..لاتگلي مستشهد

..اي

ركضت واسمع ولد يسالون صفاء بهاء شكوو ماجاوبت
وصلت بيت عمي الدنيا مگلوبه هاي الناس شوكت التمت توني چنت اباوع ماكو احد

اباوع للباب اتخيل وگفته بيها
صوت واحد صحت حيددددددرر

وبعدها سكتت حته دموع متنزلتلي مااريد اصدگ متوهمين اشوف عمي منتهي واخواني گوه ساندينه امه ماتنشاف من لمة النسوان يمها
لمحت وحده بدون حجاب وشعرها يطاير چانت وحدها تلطم على جهه بزاوية بيت عمي محد منتبه الها ولاوحده من النسوان تواسيها ركزت بيها ياسمين
كن شفتها بچيت تذكرت حلمه وامنيته هيه جان يشوفها حلم وهيه تشوفه منقذ الها الاثنين راحت احلامهم لاهوه كدر ينولها ولاهيه تحقق حلمها ااريد تمي لو لمياء اريد وحده تروح يمها اباوع امي ماكوو واني اتلفت ادور عليهن شفت نورس ولمياء جايات ودموعهن تصب صحتهن روحن يم ياسمين محد يمها وخل تلم شعرها گللها مايرضا مايرضا احد يشوفها
مر الليل شطوله راحوو علاء وضياء يجيبون الجنازه مارحت وياهم ماادري ليش صابني خوف شلون اشوفه بتابوت خوف من الحقيقه يمكن
الفجر وصل التابوت
شفته من بداية الساحه ركضت حافي السياره تمشي وصعدتله اريد اشيل الغطه مااگدر احس روحي مجتف شسويله واشوفه بذاك طوله وصلنه ونزلنه الجنازه بطارمتهم خليناها
التمن النسوان واحنه ابتعدنه مابينه غريب كلنه ولد عمومته
اباوع العمتي شحالها توقعتها تموت فوك التابوت شويه واجت بنيه تركض من الشارع طبت شعرها منفوش تركض ذبت نفسها ع التابوت اباوع للباب هاي شطببها من بين هاي الزلم كلهم اجو گالو كافي خل نشيله لانتأخر
حته من امه وخرت هيه ماقبلت يشيلن بيها وترجع
وكلنه يم راسها واگفين
دنگت عليها

..گومي كافي گومي لمي شعرچ لاتعذبينه خلي يتوكل
ماردت وظلت على حالها كتلها كافي التسوي مايرضي كلها تباوعلچ يرضا عليچ هيچ تسوين صاحت بصوت وبچت حسيتها ماتكدر تگوم سندنها واجت لمياء اخذتها
گلت اللمياء
وينجن عنها شلون اطب من الشارع هيج وليش هيه ابيت اهلها وكلجن هنا مرت ابوها وين وانه شوصيتجن

..مو البترحه انطوها ابر مهدئ وگالن هناك احسن الها يمكن گعدت من سمعت الهوسه واجو فاقده

مارديت عليها شلناه وطلعنه للنجف

يتبع..

اعرف الاحداث مؤلمه بس طلب من اصحاب القصن مااختصر اي حدث وخاصتا هذا الموضوع بالذات
لذلك سامحوني

البارت تعويض عن اثنين اكثر من الفين و٤٠٠كلمه